Чернова Татьяна Николаевна

From Воршуд
Jump to navigationJump to search

Парнас, Пегас но пегась

Chernova.jpg

Тодмо удмурт кылбурчи Татьяна Чернова котьку лыдъяськылӥз можга ныл. Нош берло аръёсы кин ке вӧлмытӥз таӵе кыл: со, пе, Кедра Митрей выжыос палась, Зуралэн Гондыркушысьтысь. Маскаръясько, дыр, озьы? Кин тынад выжыосыд? Утчаськод-а соосты?

- Выжыосме утчаны ӧй кутскы на. Но анайме весь ёртӥсько: мед мадёз пересь бубаосыз сярысь. Тодӥсько: вирам пӧртэм выжыос сураськемын. Михаил Атаманов эскеремъя, мон пырисько Зура (Зури) ласянь Пурга воршудэ. Атае ласянь ке, вашкалаосмы Ӝикъя, Уча воршудысь. Песятайме Ӟипар Илля шуо вал бере, бигерлэсь но вань, дыр, маиз ке. Юнме шорысь шат бигеръёс мыным асьсэ кылын вазё. Чувашъёс но асьсэлэн кожазы вал. Болгариын но монэ мурт ӧз каре – татын вашкала славянъёс, тюркъёс но фракиецъёс сураськемын. Тодмо суредасьмы Менсадык Гарипов соин ик шуиз вал, дыр: тонэ, пе, национальностедъя котькин шуыны луысал, ӟуч гинэ ӧвӧл.

- Удмурт нылкышноос пӧлын тон луид СССР-ысь Писательёслэн союзазы кутэм нырысетӥез адями. Кинлы со понна тау кариськод? Кин азьын кыл кутӥськод?

- СССР-ысь Писательёслэн огазеяськоназы кутӥзы 1988-тӥ арын, удмурт литературалы 100 ар тырмон азьын. Соин ик Москвае та юбилеез пусъёнэ ветлыны шуд усиз. Нош солэсь азьвыл Пермьын вал Волга но Урал котырысь егит литераторъёслэн семинарзы. 1984-тӥ арын Москвае Всесоюзной совещание люкаськылӥзы егит писательёс. Кивалтӥсьмы вал туж тодмо поэт Владимир Соколов. Монэ зол-зол «жугемзы» бере ӵапак со ик шуиз: «Асьме азьын, веранэз ӧвӧл, зэмос кылбурчи».

Солэн сыӵе дунъетэз тыбырме шонертӥз, аслым осконэ будӥз. Александр Шкляев, со вакытэ Удмуртиысь писательёслэн йырзы, монэ ысъяз Пицундае, егит критикъёслэн ӧтчамазы. Синйылтӥзы, дунъязы - нырысь ик, Владимир Романов, Алексей Ермолаев, книгаосылэн редакторъёссы Михаил Федотов но Федор Пукроков. Нырысетӥ вамышъёсме – Даниил Яшин но Семён Самсонов. Озьы ик анае но, Лидия Чернова – визьнодасе но ӵушкасе. Людмила Кутянова – соин вожмаськыса, ог-огмылэсь адӟем карыса будӥм. Анна Зуевалы но тау – котькудмылэсь аспӧртэмлыкмес висъяз.

Быдэ вуонэ тупаз, Михаил Федотовен ӵош издательствоын ужакум. Мон соку йырысеным пыдозям поэзия «шумесэ» выйылӥ. Нош Владимир Романов шоры киросатаймы шоры кадь учкиськом вал. Котькуд верамзэ йырвизьмын бергатылӥм: малы озьы шуиз? Со кулэм бере кинлэсь ке визь тыремзэ возьмаса ӧй улы ни. Тӥни соку валай кыл кутонме. Ачим но литобъединениос нуон борды кутскылӥ: газетлэн редакцияз, педучилищеын. Нылкышноосын ӵош кылыдытӥм вал «ОКИ» огазеяськон – «Оскисько Кылбур Инмарелы». Али Як.-Бодьяысь литобъединенилы юрттэт сётӥсько. Со сяна, гуртысь гожъяськись нылкышноосты нош люкано вал, 8-тӥ Март котырынгес.

- Маин тынад поэзиед висъяське Удмуртиын, Россиын, дуннеын? Кыдёке-а кошкид нырысетӥ чуръёсыд дорысь?

- Ойдолэ финн-угор дунне котыртӥ гинэ бергалом. Пӧртэмлык сярысь верано ке, сое валэктэ кадь Виктор Шибанов Эстониын потэм «Ньыль тылскем» книгалэн азькылаз. Мынэсьтым поэзиме со романтизм пала кыстӥське, шуо. Ачиз автор этнофутуризмен «висе» бере, поэзия шоры со тазьы учке: «Лыдэ басьтӥмы ке туала финно-угор культураосын этнофутуризм (аспӧртэмлыко выль романтизм) азьпал радэ потэ шуыса, соку валамон луиз, малы Т. Черновалэн романтизмо лирикаез али вылӥын лыдъяське». Виктор Шибанов Кари Салламаа финн тодосчиен ӵош мынэсьтым «этнофутуризмо» кылбуръёсме шедьтӥзы. Паймоно кадь: мон асме тып-тып музъем выл адями кожасько ни вал. Анна Зуева но юнме ӧз вера, дыр, лирикаям драматизм шӧдӥськем сярысь. Нош нырысетӥ кылбуръёсы – зэмзэ но – дунне шоры паськыт но сайкыт синъёсын учкись нылмуртлэн гожъямъёсыз.

- Котькуд критик тынад чуръёсысьтыд аспӧртэм палзэ адӟе. Тон зэмен ик олокӧня пӧртэм буёло мурт кадь. Оло, фамилидэ вошъямдэ но соин валэктыны луоз?

- Ма, весь уг вошъяськы ук! Одӥг пол гинэ мукет кари вал но – берен берыктӥ аслэсьтымзэ. Чернова – Петрова – Белова ӧй луы, одӥг мурт тазьы серекъяз ке но. Зэм, газетын ужаку, олокыӵе но «фамилляос» пуктылӥ: Николаева, Сидорова, Сорокина… Сотэк уг луы вал. Куке-соку, нырысь-валысь, «Советской Удмуртия» газетын ужаны кутски но, валтӥсь редактормы визьмаз: кин со Т. Ларина, кӧня тынад фамилиед?

- «Советской Удмуртиын» нырысьсэ ужамдэ вунэтӥд ни кожасько вал.

- Кызьы? «Советской Удмуртия» - со мыным синме усьтӥсь но, дышетӥсь но, дуннеез паськыт адӟытӥсь но луиз. Отын ужай 1977-тӥ - 1985-тӥ аръёсы, «Удмурт дуннеын» – 1996-тӥ – 2001-тӥ аръёсы. Тау Степан Григорьевич Машковлы но Василий Михайлович Михайловлы: монэ, сыӵе нюшмылиез, редакцие кутыны дӥсьтӥзы. Телефон трубкаез но кутыны кепырасько вал ук. Кирилл Ломагин бордын дышетӥзы. Львове журналистъёслэн семинаразы ысъязы. Василий Михайлович, командировкае лэзе ке, клубе яке библиотекае гинэ уг ысты – нӧдэм фермае но, лэсьтӥськонэн ӝегась школае но пыраны косэ вал. Ӝыны улонэ газетлы сётэмын кадь потэ ни: со конвейер сомында кужымез кыскиз. Трос сётӥз но. Али но газетлэсь мӧзмонэ маза уг сёты. Газетын мыным соин кельше: «пӧрам» уждэ соку ик адӟиськод. Нуналлы быдэ шумпотон кадь. Нош книгаез поттон (издательствоын ужаме сярысь верасько) – кема, куддыр арен-арен кыстӥськись маке. Таизлы чиданэ уг тырмы кадь потӥз. Журналын но ужаса утчай, «Вордскем кылын» но огинтыын сылэмме шӧдӥ. Соин ар гинэ отын ӝегай.

Журналистын ужаны мынам отчы-татчы чуртнаськон сямы уггес ик тырмы, дыр (кӧня ке дыши ке но). Нош редактор луон – таиз вирам ик пыӵамын, лэся. Та ужлы вордскемме шӧдӥ, берло дыре Арсений Загребинлэн но Любовь Тихоновалэн рукописьёссы-книгаоссы бордын ужакум. Дась вал уй-нунал пукыны… Сыӵе дыръя муртлэн гожъямез аслам кадь ик потыны кутске.

Но, кызьы ке газетэ гожъяськон, озьы ик кинлэсь ке чуръёссэ волятон-тупатъян трос лул кужымез кыске – аслыд, ас кылбуръёсыдлы уг кыльы ни. Котькудӥз писатель, поэт малпа, дыр: эх, луысал ке аслэсьтыд гинэ гожъяса пукыны, яке толэзь, кык, куинь со понна дыр сётысалзы ке… Зэм, куд-огез дышизы ни туала улонъя тупатскыны, узыр дядяйёслэсь кураськыны, договоръя ужаны…

- Ку бен писатель чебергес гожъяське – кӧтыз сюмаку-а, ангесыз кык полэс луэм бере-а?

- Оло, зэм но, гожъяськисьёс ласянь нуиськись политика соосыз юри сютэм возе: мед ай, мед – золгес гожъяськозы. Кызьы ке культура, озьы ик искусство но литература чылкак пыд улэ лёгемын ни. Соинтэк-а «Удмуртия» издательство рукописьёсыз уг куты, ачиз автор уксё уг дэмла ке. Писателед чонари вотэсэн ӝокатэмын яке кисэн кадь пачкатэмын ке, кыӵе чебер чуръёс сярысь вераськонэз на? Коть зарни чуръёс гожты, соосыз калык ӧз адӟы ке… Писатель книгаостэк – «сапожник без сапог» шуэм мактал. Кӧттырогес улон дыръя писательёс шутэтскылӥзы дачаосын. Асьме дорын ӧжыт гинэ ӧз пуктӥськы Творчествоя юрт. Квартираос, гожъяськыны нимаз комнатаос сётылӥзы. Ӝыт ортчытоно ке, аренда понна дун тыронэз ӧй вал. Мар веранэз на… Нош романъёс, повестьёс потылӥзы, али сямен ӝӧкын ӧз кылле.

- Соку музон юан. Дунне вылысь вань кылбурчиослэн-а, яке удмурт кылбурчилэн гинэ-а адӟонэз сыӵе – ёрмон?

- Удмурт поэтлэн гинэ озьы ӧвӧл. Тодмо ӟуч кылбурчи Ксения Некрасова, кылсярысь, калык вылтӥ кураськыса ветлӥз, нокыӵе липетэз ӧй вал. Асьмелэн но сыӵе куанеръёсмы вань. Я огзэ, я мукетсэ патерзэс ышто – отын но, татын но соосыз алдало. Мукетъёсыз но, ӟеч улыны турттӥсьёсыз гожъясьёс, уг быгато узыр коттеджъёс пуктыны, иномаркаосын ворттылыны. Соос узырлык люкан борды кырмиськемын ӧвӧл, дырзы быре ас гожъяськон бумагазы вадьсын.

- Тӥляд но семьяяды кык кылбурчи – Лидия Чернова но Татьяна Чернова…

- Выжыысьтыз пушъетэз. Нылпиос котькугес ик анай-атайзыя мыно ук: доярка ке, доярка, врач ке, врач… Пичи дырысеным, кӧня тодӥсько, весь книга, газет, журнал бордын вал улонмы… Но со гинэ ӧвӧл - колхозын уриськон, мажсаськон, турнан, мешок ӝутъян но йӧтӥз. Мамае счетоводын-бухгалтерын ужаз. Почтальонкаын – кема ик ӧз, но со почта зынъёс пушкам пыӵаса кылизы. Выль газетъёсыз куасаллян сямен учкылӥсько вал, мар отын печатлаллям. Зэм, валанэ ӧжыт вал ай. Паймылӥ: кинъёс меда газет лэсьтонын ужало? Мон нырысетӥ классъёсысен университетэз быдтытозь, анае гуртысь библиотекаын ужаз. Соку книгаослэн кузёзы кадь мон вал. Лыдӟымтэзэ ӧй кельты ни. «Вуж Мултан», «Вордӥськем палъёсын» кадь бадӟым книгаосыз 2-тӥ-3-тӥ классысен «ньылӥ». 50-тӥ аръёслэн пумазы, гожъяськыны кутскемез бере, анае нырысь чуръёссэ ик милемлы, нылпиосызлы, лыдӟылӥз. Со «Куатаськисез» пырак ми сярысь гожтэмын кадь: «Кин со пуке ӝӧк улын? Кис-кис-кис – оло, коӵыш?»

Озьы, анаелэсь адӟем карыса, ачим но ӧдъяй кылбураны. Нырысь гожтэмме со тупатъяз… Собере ӧй возьматы ни, аслам кадь уз поты шуыса. Анае трос гожъяз нылпиослы, книгаос поттӥз. Берло, мӧйыослы сӥземаз, яратон сярысь чуръёсаз, мыным укшатыса гожъямъёсыз вань. Мукет ласянь, мон но «юрттӥськем» солы.

- Яратон, пе, адямиез бурдъя. Вань-а со зэмос улонын?

- Со сярысь мон кылбуръёсам верай - кызьы быгатӥ, кӧня быгатӥ. Али кык ар пала йӧн-йӧн ӧй ни гожъя. Тодӥсько: азьвылэзлэсь ӟечгес гожтыны уг быгаты. Эшъёсы но озьыгес кадь. Людмила Кутянова мукет гожъясьёсыз эскерон бордыгес кариськиз, Галина Романова прозае но драматургие выжиз. Али черод вуиз Любовь Тихоновалы но мукетъёсызлы асьсэды усьтыны.

- Тон но драматургилэсь уд пегаськы кадь.

- Дасо арлэсь кема ни книгае, ӧз поты. Но та аръёсы тэк ӧй улы – нылъёсме будэтӥ. Соиз но таиз борды басьтӥськылӥ. «Ашальчи» журналэз кылдытонлы кужымме сётӥ. Верай ни: литобъединениосын но ужай. Собере «Айна» лирико-романтической драмаез Василий Ушаковен ӵош гожтӥм. Со монэ ог куинь арнялы «пытсаз». Югыт дуннеез ӧй адӟылы - озьы нырысьсэ шӧдӥ зэмос творчестволэсь шӧмзэ. Эшшо озьы пытсасалзы на ке… Гожъяськись мурт эрикез яратэ ке но, сое куддыр ручка борды думыны кулэ.

- Тросэз тодо Пётр Ёлкинлэсь тыныд сӥзем суредзэ. Со но тонэ ворсаса возиз-а?

- Суредын мон туж вылӥ, инмар кадь адскисько. Астэ сыӵеен адӟыны умой, дыр. Аслэсьтым визьмогес но кадь. Туж гань-гань, но пуш мылкыдылэн бугыръяськемез адӟиське.


Мон ӵемысь бурдтэк лобӟыса канжаськисько, усисько, вӧсь луисько, йырме ошыса ветлӥсько… Юмоке сюрылӥсько. Визьмо ке луысалыд, улыны быгатысалыд, шуисько…

Пётр Ёлкин монэ кыӵеен адӟемез потэ, сыӵеен адӟиз, дыр. Мастерскояз кӧня ке пол ӧтчалляз. Борддоре весь кыӵе ке сяськаё басмаос ошылӥз – фонлы, пе. Ачиз весь маке сярысь вераськылӥз, юалляськылӥз. Олоку суредаз… Возьматӥз но - мон пыжын пукисько. Укыр бадӟым портрет суредам. Казаньысен «Бадӟым Волга» выставкае тупай. Ас тусбуйме адӟи. Кыӵе ке агайёс отын сыло. Таки шараяме потэ, мон со шуыса. Вератэк ӧй чида, лэся. Кельшиськоды, шуизы. Та суредэз «Инвожоын» но поттылӥзы. Табере «Вордскем кылын» сёто. 1995-тӥ арын, творчествоя ӝытэ дыръя, сцена вылэ пуктылӥзы.

- Трос-а кулэ нылъёслы но кышноослы кылбурын но нуналмысь улонын?

- Мылкыдэз капчиятон понна трос ик кулэ ӧвӧл. Зэмзэ но: сяська, мусо вазем, шулдыр куазь. Кӧс вина, шампанской. Нош нуналмысь улонын трос ик кулэ. Вакыт туэ дуно. Собере котькудӥзлэн малпанэз пӧртэм ук. Кин ке дасяське ас фирмазэ усьтыны, кин ке – нуналаз огпол ке но сиськыны, жаг куян интыысь нянь юдэс шедьтыны.Мон сямен, али котьмалэсь зол кулэ вылэм чылкыт омыр но ву. А то шунды но вожзэ поттэ ни, бамзэ трос ик уг возьматъя. Куазь бӧрдэ. Яке чар-чар кезьытэныз кышкатэ.

- Кылбур пӧрмиз кырӟанлы. Мар со сыӵе меда?

- Мынам ӧжытэз кылбуръёсы кырӟанлы пӧрмо. «разговорной» поэзилы соос матынэсь. Озьы пусйиз вал Алексей Ермолаев критик. (Флор Васильевлэн но сыӵеесь). Гитараен шудыса кырӟаны тупасалзы. Аслам гуръёсы вань. Кылбуръёсме ярато Валентина но Игорь Моисеевъёс, Надежда Уткина. Соос чебересь кырӟанъёс пӧрмытӥзы, лул гурмы тупало, дыр. Кельше на Наталья Матвеева. Усто кырӟан пӧрмытыса кельтэм Николай Уткин («Мон тынад тодад-а» сярысь уг вераськы) – тазэ «кӧкыязы» веттало на Гриша Собиновъёс, кияса крезьгурчиос. Ӝоггес калыке мед поттысалзы. Мукетъёсызлы но кырӟан гожъясьёслы тау шуэме потэ: Николай Шабалинлы (спектакльёслы гожъяз), Пантелей Кузнецовлы, Геннадий Бекмановлы, Ольга Зориналы… Любовь Быковалы но – куд-ог кылъёсме оломар кадь тупатъя ке но. Алигес шулдыр кырӟан гожтӥз Геннадий Ганьков.

- Берло дыре паськыт вӧлмиз глобализация кыл. Кызьы со герӟаське кылбурчилэн пуш дуннееныз? Кызьы соос тэро, кызьы нюръясько?

- Кылбурчи ас пуш дуннееныз котьку кылёз. Компьютер со понна кылбуръёс уз гожъя. Котькыӵе огъя кабе мед кыскозы, адями ас юанъёсызлы валэктон утчалоз искусство но поэзия пыр. Ӝиптэмын ке но кылбурчиос, улонын соос кулэ ай. Сое мон, кылсярысь, валай таӵе учыръя. «Айна» спектаклез дасяку, нокызьы уг пӧрмы вал берло кырӟанэз фонограммае гожтэмзы. Ударениез уг тупа я мар. Мыным ик вазиськоно луизы.

- Йылпумъяса мар верасалыд?

- Вуэ ни кылбурет бусыысь емышъёсыз бичан дыр. Собере, котыръёсме утялтыса, прозалэн йыромытӥсь тэляз, оло, пырыны дӥсьто.

- ?

- Тау, Алексей Петрович, тӥ али монэ Парнас вылэ ӝутылӥды. Вераськонмы со гурезь йылын кадь луиз. Но музъем вылэ васькытэк уг луы – татысен со гурезь йыл уг но адӟиськы. Мукет сямен вераса, кылбурчилэн лулыз гинэ кытын ке вылӥын лоба, нош суйыз-пыдыз, мугорыз ӝабыртэмын музъемвыл сюлмаськонэн. Озьы ик мынам но улонэ - Парнас, Пегас, нош ачим - пегась.

Источник:

Чернова Т. Н. Парнас, Пегас но пегась / Т. Н. Чернова ; записал А. Шкляев // Удмурт дунне. - 2003. - 5 января. - (Удмурт кизилиос).

За предоставление материала выражаем огромную благодарность редакции газеты "Удмурт дунне"