Моисеева Валентина Михайловна

Материал из Воршуда
Перейти к навигацииПерейти к поиску

Мон шедьтӥ тонэ, туганэ![править]

В. М. Моисеева

Уг тодӥськы, ма татын янгыш – оло, азьпал радын луыны тыршон, вожвылъяськон, нырдэ вылӥе чатыртон – но милям, пурга нылъёслэн, пурга пиосмес алнаш нылъёслы кузпал чот карыны сётэммы ӧз пот. Огымысь куаретӥськом: ма, ми алнаш дыдыкъёслэсь маин ке бере кылиськом шат?! Нош куке одӥгез етӥз пурга пияшмы Игорь Моисеев выль кен кураны Алнаш палъёсы ширтӥз – ваньмы ымъёсмес тунгонамы. Туж ӟеч тодӥськом вал ни уга выль кенмылэсь – Валентина Черновалэсь – пурга чеберайёслэсь пӧртэм луэмзэ: кырӟаса-эктыса но лэзёз, сцена вылын но ассэ воземез макем йоно! Нош ӝоген ми гань-гань шокчим (вожвылъяськон йырын ик ӧй вал ни) – кыӵе чебер, шаплы но котькыӵе ужлы мыло-кыдо артистъёслэсь семья кылдӥз.

Зэм, кудӥз-огез пусъёз но: кык артистъёс – кык пӧртэм адямиос – оло, «Удмурт кизилиосын» Игорь но Валентина Моисеевъёсты нимаз возьматоно вал. Но мон малпамъя, соос сокем ог-огзылы тупало, одӥгезтэк мукетыз ӧвӧл но кадь.

- Тодэме потэ: ку-о, кыӵе-сыӵе нуналэ ог-огдэс синйылтӥды? Но верамдылэсь одӥгзэ азьло ик тодӥсько ни – со туж яркыт пумиськон вал, дыр.

Игорь:

- Али кадь ик син азям ай со нунал. Мон, егит пияш, ӝытазеосы гуртын ӧй пукылы. Акшан васькемъя кыштыр гинэ Вуж Монья (Пичи Пурга ёрос) клубе тубисько вал ни. Отын ми эшъёсыным трос кузя люкаськылӥм, соку уго гитараен шудон, кырӟан-серектон ми понна зарни кадь вал. Озьы одӥг ӝытэ клубе потыны дасяськисько, туж кема вырисько, дырез нуйтӥсько – тодӥсько вал уго: клубе туннэ асьсэлэн спектакленызы вуыны кулэ Удмурт театрысь артистъёс. Эх, малпасько, таосыд гитараен шудыны уз сётэ ни, бергес пото. Нош аслам сюлэмы маке ас интызэ уг шедьты, кытчы ке куриське. Озьы тӥни сюлэм ӧтемъя мон клубе вуи. Отын ӵапак «Эн кушты монэ, туганэ» спектакль йылпумъяськем, сцена вылысь декорациез урамын сылӥсь машинае поттало. Монэ но, солань-талань ветлӥсь макеез, юрттыны куризы. Ма, гуртын будэм пияш пумит луоз шат вуэм куноослэсь куронзэс быдэстыны! Озьы созэ-тазэ поттан вискам вӧзтӥм ортчиз мертчан йырсиё, вӧлэм кадь мугоро нылаш. Синъёсы бордаз кугӟазы. Кытысь-о вуиз таӵе мусокай?! Кема чидаса ӧй улы, эшъёсылэсь юано кариськи. Соос но номыр сыӵезэ-таӵезэ вераны ӧз тодэ, а-а, пе, городысь вуэм нылаш. Соку соослы шуисько, ойдо пус чӧлтом – мон али та нылашен одно тодматско но аслым синмаськыто. Ярам, пе, - азьлань! Пельпумъёсме олокыӵе ик выретыса, йӧн-йӧн вамыштӥ со нылаш доры. Городысь вуэмын бере ӟуч кылын вазиськоно кариськи: кызьы-о тӥляд нимды? Со мон шоры пыр-пыр учкиз но эшшо мае ке тодэмды уг поты на шуыса, дорысьтым палэнскиз. Нош мон мар вазьыны ик пайми, нылъёсын весь одӥг кыл шедьтӥсько вал кадь но… От, малпасько, шумприч нылаш, эшъёсы азьын сереме ведь вуттӥз! Ӝыт ӵоже трос гинэ котыртӥз гожеръяй на, тодматскыны ӧй пӧрмыты. Озьы ик нимзэ гинэ но вератэк та нылаше городаз кошкиз. Солэн ассэ сыӵе йӧно воземез мукет нуналъёсы но йырысьтым ӧз тӧлӟылы. Но ӝоген со но вунӥз.

Бӧрысь вал армия, отысь бертыса вуи-а, ӧй-а пыри Москваысь Щепкинлэсь нимзэ нуллӥсь театральной училищее. Дышетскон кабен со учыр сярысь тодам но ӧй вайылы ни. Ма, дыр но ӧз тырмылы, лэся, угось сомында вылез но сюлме пырымонэз вал – сцена вылын астэ возьыны дышетскон, героедлэсь психологизэ валан-шӧдон, дано артистъёсын пумиськонъёс…Со понна ик со студент аръёс – улон пӧзе, бугыръяське, воштӥське.

Училищеез быдтыса ини 1995-тӥ арын 20-тӥ сентябре (али кадь ик нуналзэ но тодӥсько на) мон Удмурт театре вуи. Тӥни отын Валентинаен выльысь пумиськи. Но соку мон чылкак вунэтӥськем ни вылэм, соин куке но тодматскыны выри шуыса. Со мыным нош ик вераны луонтэм кельшиз. Ог нуналэ репетиция бере сьӧраз келяны калъяськи. Ӵош дышетскем эшъёс шуо: ма, сыӵе нылашлэн одно ик лул-гажанэз луоз, юнме дырдэ быдтӥськод. А мон мар малпай, озьы ик лэсьто шуи. Келяны ӵектон вискам Валентиналы маке умойтэмзэ вераны шедьтӥ-а мар-а, со шлач! гинэ бамам чабкиз. Пегӟиз. Мон сьӧраз…

Валентина: - А мынам соку сыӵе йыры кур луиз, кельшиз-а бамад чабкеме шуыса, эшшо васькытӥ на. Уг тодӥськы малы, но соку гинэ Москваысь театре вуэм пияшъёс мыным ӟучесь пото вал. Оло асьсэды укыр йӧно но шаплы воземенызы, оло Москваысь вуэм беразы вераськоназы мултэс трос ӟуч кылъёс пыртылэменызы. Ой, малпасько, та ӟучъёслэсь оломае но адӟод, таосыдлы тяп-ляп луэмдэ адӟыты гинэ, кокчалозы - сётсконо ӧвӧл. Бӧрысь ини тодӥ со нокыӵе но ӟуч пиос вылӥллямтэ шуыса. Озьы тӥни нуналысь нуналэ, аръёсын-аръёсын огазе ужаса, матын луим, эшъяським, собере кузпалъяським.

- Чылкак чебер кино учкем кадь потӥз. Кыкнады ик, оло, пичи дырысеныды ик тодӥськоды вал, артист луоды но артистэн ик кузпалъяськоды шуыса?

Игорь:

- Куатетӥ классын мон гитараен шудыны дышетски, соин мон ӧй люкиськылы. Азьланьын улон сырысь малпанъёсы но соин герӟаськемын вал. Озьы ик син азям пуктылӥ, кызьы мон пӧртэм шаеръёсты гастрольёсын котыръяло, калыклэсь улонзэ кырӟанъёсыным шулдырто. Сцена вылын драматической рольёсты шудо шуыса, ноку но йырам ӧй вал. Эшъёсыным ӵош кылдытэм вокально-инструментальной ансамблямы тямыс классозь ветлӥ, отчыозь весь малпай эстрадаын кырӟась луо шуыса. Бӧрысь со ВИА-мы пумен-пумен бырыны ӧдъяз, Коля Комаров эшеным ма но со лэсьтыны вырим на ке но, ӧз пӧрмы ни. Школаез йылпумъякумы, берпуметӥ концертмес сётӥм но, собере ваньмыз куашказ. Тӥни озьы мон сцена вылэ сюрес шедьтӥ, озьы ке но, соку но, али но со вылэ потон азьын пичияк куалекъясько. Но интыяз со но кулэ. Воксё уд куалекъяськы ке, озьыен, тынад ролед сюлэмыд пыр ӧз поты, соку, иське, тон соин ӧд висьы, аслыд матэ ӧд кары. Мон тани Валиме малпасько: со ведь пичи дырысеныз ик артист луон мылкыдын будэмын. Драмая артист ке ӧй луы, одно ик оперной кырӟась, пе, луо шуисько вал. Таиз но пӧрмысал, дыр, угось быгатонлыкъёсыз та ласянь но тырмыт. Вот со озьы ик ассэ артистлэн улонэзлы дасяса возем ини. Куддыр паймисько солэн сыӵе юн сямо луэмезлы. Ушъяськыны уг малпаськы, но данъяськыса верасько: йӧно но учкымон кышномурт. Творчество ласянь но со жадёнэз тодӥсьтэм вал кадь. Весь то таиз, то соиз малпан йыраз вордске, монэ паймытъя.

- Творчество сярысь малпанъёс уж дурады гинэ ӧвӧл, дорады но маза уг сёто, луоз? Одӥг удысын тыршон соку, оло, шуг-секытэ но вуттэ?

- Ма, кызьы сотэк. Тани, шуом, ӝытазезэ спектакльын шудӥд, пӧртэм мылкыдъёс сюлэме кылизы. Гуртэ вуыса, сиськыку гинэ ӧвӧл, изьыны выдэм бере но со сярысь малпаськемысь, вераськемысь уд дугдӥськы. Вылаз ик, ӵошен одӥг спектакльын шудыны тупаськом ке, соку, ӟуч кылын вераса, берегись! Ог-огмылы индылонъёс сётъяськом: тани татын мон сокем ик умой ӧй шуды, мукет интыяз тон янгыш лэсьтӥд. Озьы тӥни куддыр керетонозь но вуиськом, ма, со чылкак керетон но ӧвӧл. Угось творчествоын керетон луыны уг быгаты. Со мур кенешон, отын ик зэмлык но усьтӥське. Кузпалыныд огкадь-а, пӧртэм-а удысъёсын ужаськод – ог-огдэ валан соин герӟаськемын ӧвӧл. Мукет адямиез валан понна нырысь астэ тодоно, кытӥ-отӥ ченгешонъёслэсь чидатскыны но быгатоно, валано, кыӵе интыын кутске кенешон, ку со выже керетонэ. Сыӵе шӧдонэд вань ке, самой матысь адямиеныд гинэ ӧвӧл, котырысьтыд калыкеныд но ӟеч кусып тупатыны быгатод.

- Таӵе шӧдонды вань бере, режиссёреныды ваче уд вуылӥське, вылды…

- О-о, режиссёрлы эшшо но валасьгес-шӧдӥсьгес, чидасьгес луыны кулэ. Вераськон ласянь гинэ но. Артист шоры со номыре валэктытэк черекъя ке, кинлы-о со кельшоз. Адямилэн сыӵе ук психологиез: куараез будэтыса верам индылонъёсты санэ ум басьтӥське ни, ваньзэ огпала берыктыса лэсьтӥськом. Режиссёр адӟем карымон луыны кулэ. Нош куке шӧдӥськод солэсь лябзэ, зэмзэ вераса, сое гажан мылкыд ыше. Режиссёр но, артист но – ми одӥг ужен выриськом ук – ог-огмылэсь мылкыдмес ӝутыса тыршыны кулэ. Озьы ужмылэн пайдаез но ӟеч луоз. Собере тани ӵош ужан эшъёсын но ог-огдэ туж валаны кулэ. Семьяын кадь ми матын – одӥгез артист висьыны усиз, со соку ик шӧдӥське ини – огъя ужан радлык тӥяське, таӵе дыръя аслэсьтыд геройдэ но пыртӥд секытэн поттӥськод.

Мон сцена вылэ асме гинэ адӟытыны уг потӥськы ук, мон тыршисько ас выросъёсыным мукет адямиез усьтыны – озьы тӥни милям рольёсмы-образъёсмы ог-огенызы герӟасько но огъя суред-спектакль кылдыто. Со пыр ми учкисьёслэн сюлмазы пырыны тыршиськом, мылкыдзэс бугыръяськом – озьы соос зэмзэ но кыӵе ке зарни тысе – мур малпанэ вуозы. Кудӥз-огез шуо: сцена вылын шудыку, нырысь интые потэ астэ возьыны быгатон, аслад чебереныд учкисез кайпалтон. Нош кыӵе интыын соку кыл? Котьма ке но, мон малпасько (ма, Щепкин нимо училищеын но милемыз озьы ик дышетӥзы), драмая театръёсын азьпал радын луыны кулэ кыл. Учкись уг кылы, уг вала ке артистлэсь верамзэ, кыӵе-о со артист!? Артист кылыз пыр учкисезлэсь сюлэмзэ бугыртыны кулэ. Но со понна уже кутыны кулэ мимикаез, пластикаез. Шуом, мон сцена вылэ пото но огшоры шуо: «Мон – эксэй!» Нокин мыным уз оскы, угось со мылкыдтэк но сюлэмтэк верамын. Озьыен, ваньмыз одӥг гердэ герӟаськемын луыны кулэ – вот со зэмос театр.

- Артистъёс но со адямиос. Луэ, дыр, озьы но: кыӵе ке ролез шудыны тупаськоды кельшымтэ партнёрен. Кызьы-о вамыштоно со пыр? Ужад ас мылкыдъёсыныд нюръяськыны кызьы-о амал шедьтоно? Малпан но кылдэ: оло, артистлэн тужгес но бадӟым быгатонлыкез со бордын?

- Малпаськытӥсь юан. Уг тодӥськы, кызьы сое шуод: быгатонлык-а, пуш кужым-а. Сыӵе дыръя тон астэ тӥялтӥськод, ас пыртӥд вамыштӥськод. Соин но озьы луыса кошке, дыр: улонзэс театрлы сётэм артистъёс ӵемысь асьсэды ышто, адямие потыса но кытчы ке сылмо-ышо. Угось коллективын астэ возьыны но ой-ой, кӧня кужым кулэ. Кӧня ар ужасько ни Удмурт театрын, весь дышетскисько ужам кулэтэм луись мылкыдъёсыным нюръяськыны, соосты пушкысьтым портыны. Таӵе дыръя тужгес но кулэ ас кужымедлы оскон.

- Артистлэн возьдаськонэз луыны кулэ-а?

- Керпотон, возьдаськон кулэ интыяз со ноку мултэс ӧвӧл. Мон малпамъя со адӟытэ адямилэсь макем адямилыко луэмзэ. Куд-огъёсыз шуо: возьдаськон – алама сям. Со озьы ӧвӧл. Валано гинэ, кыӵе учыръёсы, кыӵе вакытэ сое интыяз уже кутыны.

Сцена вылын возьдаськонэз ке верано… Тани тон уд возьдаськиськы ук кыӵе ке статья, заметка гожтыны? Со уго тынад ужед, мултэс керпотӥд ке, уксё поттод шат? Артистлэсь ужзэ быдэсъяны тон возьдаськыны кулэ ӧвӧл. Нош улонын тон возьдаськись сямо ке, сцена вылын сое вормыны мед пӧрмытод. Вот соиз ини зол луоз.

- Игорьлэн пичи дырысь малпанэз но быдэсмиз, шуыны луоз. Угось тӥ драмая артистъёс гинэ ӧвӧл, удмурт эстрадаысь кырӟасьёс но.

Валентина:

- Зэм, кырӟанъёсмы милям туж трос. Но жаляса верано, ваньзэ сое калыке вуттыны секытгес ик. Озьы луыса кошке ини туала улонамы: та ужен вырыны дырыд сяна, коньдонэд но лачак мед луоз. Кемалась ик ӧвӧл поттыны быгатӥм вал альбоммес, но со витьтон кассета сяна ӧз люкаськы. Кассета вылэ чебер туспуктэм кулэ вал лэсьтыны, ӵап дыр ӧз сюры, уксёен но маке ёркытгес вал – озьы ик туспуктэммытэк кассетаосмес ӵыжы-выжыосмылы, эшъёсмылы сётъяса-люкылыса быдтӥм.

Игорь:

Туж тунсыко ортче милям кырӟан кылдытэммы-гожтэммы. Мон Валиелэсь кырӟамзэ, гур пуктэмзэ кылзӥсько, гитараме кутӥсько но кырӟам улсаз шудӥсько, аккордъёс бырйисько. Одӥг-кык пол озьы кырӟаськом, бӧрысь сое кассета вылэ гожтӥськом. Пӧрам ужмес сётӥськом аранжировкае, озьы кырӟанмы вордске. Мыным туж яра кузпалэным ӵошен кырӟан кылдытон бордын ужаны. Сомында мылкыдъёс огдыре бугыръясько. Соин сэрен кусыпъёсмы но юнмало, ог-огмылэсь маке выльзэ усьтӥськом, ваньмыз шоры выль синмын учкиськом.


- Кыӵе учыр мылкыддэс тужгес но бурдъяз, лӧпкытӥз, тӥледлы серем пыры кузьмаз?

Игорь:

- «Царевна-лягушка» выжыкылын курег пыд вылын сылӥсь коркалэсь рользэ шудӥ вал. Вылам ӟустарилэсь лэсьтэм коркаез-коробез дӥсяй. Спектакль кутскиз. Отын сценарийя Баба-Яга Иванушкаен эктыны кулэ. Соин ӵош тэтчаны кулэ вал мон но. Нош сцена шортӥ ик кыскемын векчи гинэ гозы, ми эктон вискын соин кыскыса поттыны кулэ вал гомась тылпуэз. Пыд улам учкыса тэтчай-эктӥ, шӧдӥсько: муз дорозь ошиськем ӟустариосы вылэ лёгиськыны шедьтӥ, гозы борды канжаськи, шонаськыса сылӥ-сылӥ, лыптыр-лоптыр уси. Но бӧрысь ини тодӥ: сценарийя озьы малпамын ӧй вал ке но, ваньмыз интыяз ортчем: Баба-Яга эктэменыз сэрен жадьыса усе, мон но, солэн коркаез, катьтэммыса пограсько. Азьланяз озьы ик шудӥм: усьылыса-усьылыса.

Валентина:

- Али тани «Сестрица Алёнушка» выжыкылын шудӥ. Алёнушка вые уг ай отын, вот монэ но гозыен музозь лэзьыны кулэ вал. Но вуэ зымон интые мон омыре ошиськи: ӧй но выйы, муз вылын но ӧвӧл кадь. Омыре ошиськи но тӥни. Оло, мон сярысь сцена сьӧръёс вунэтӥллям, оло шай ини. Собере мырдэм но кызьы позыръяськыса-позыръяськыса муз вылэ лэзьки ни.

- Кызьы но кытын шутэтско Моисеевъёс-артистъёс?

Огымысь:

- Мылкыд ӝутске, музъем бордын ужаса. Котьма кар ини: ми гуртын вордскем адямиос.

Источник:

Моисеева В. М. Мон шедьтӥ тонэ, туганэ! / И. А. Моисеев, В. М. Моисеева ; записала Е. Никитина // Удмурт дунне. - 2004. - 6 авг. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"