Шкляев Алексей Петрович
Миллиард ар куспын кезьыт тузон но ӟырда[править]
Кивалтӥсьмес Алексей Шкляевез кык ар пала нерад карим, удмурт кизилиос радэ пыртыны вырыса. Чутрак пумит луиз: мон кизили ӧвӧл. Соку ми утчам музон амал. Редакциын ужасьёслы но дорамы пырасьёслы вазиським таӵе куронэн: мар юасалды редактормылэсь? Печатласьком Алексей Шкляевлэсь валэктонъёссэ.
- «Удмурт дуннее» 18 арескын лыктыса, татын 35 арлэсь кема ужаськоды ни. Малы? Асьтэды патриотэн лыдъяськоды-а, мукет азе ӧтёнъёс ӧй вал-а? Кошкысалды-а али, вылэгес чортысалзы ке?
- Та редакциын лекос кема ужамелэн мугез валамон. Тон мукет интыын кулэ ӧвӧл ке, малы кытчы ке палэнэ лӧптылонэз? Пук вуж интыяд, татысь коть уг тузо ай шуыса. Пишмытысал-а мон мукет интыын? Уг тодӥськы, палэнын одӥг нунал но ужамын ӧвӧл. Серекъятэк вераса, мон укыр яратӥсько «Удмурт дуннеез». Вылӥос мыным визь тырыны ӧдъяло ке, малпасько: редакторысь коть туннэ ик мозмытэлэ, редакциысь гинэ эн уллялэ. Удмурт визь-нодлэн кыӵе ке аспӧртэм шорсюлмыз, дыр, татын.
- Берло дыре «Удмурт дуннеысь» ӟеч ужасьёс кошко кадь.
- Соос кошко, мон кошкымтэен (вождэс эн ваелэ одӥг кылэз кык пол кутэме понна). Монэ туздырдысалзы ке, татысь кӧня адями вылӥегес ӝутскысал! Тымыса воземелы чидатэк, шудзэс палэнысь утчало. Маскаръяськонэз палэнтоно ке, «Удмурт дунне» котьку вал удмурт журналистикалэн кебитэз. «Кенешын» но, «Кизилиын» но, «Вордскем кылын» но редактор но воштӥсез будэмын дорамы. Удмурт телекизилиос Владимир Алашеев, Валерий Сидоров, Георгий Грязев кыдазы «Удмурт дуннеын». Алигес кошкем воштӥсьёсы Иван Лебедев, Юлия Александрова, Екатерина Кириллова вылэгес тубизы, шуыны луоз. Соос понна куректоно ӧвӧл – шумпотоно.
- Ӝӧк вылады гожтэмын: «Чида!!! Ваньмыз ӟеч луоз!» Тӥледды чидась шуыны шуг, дыр.
- Шуг. Улон сюрес вылам куинь пиртэш интые вань: будӥ бубытэк, ӧй ветлы армие, бер луи кивалтӥсь. Чиданлэсь кулэлыксэ валаны ӧдъяй алигес гинэ.
Милемды дышетӥзы Ленинъя: тушмонэз пазьгоно, кин милемын ӵош ӧвӧл – со милемлы пумит. Ми азьын курлазы Иисус Христосэз, Лев Толстоез но солэсь Платон Каратаевзэ, Фёдор Достоевскиез но солэсь Алёша Карамазовзэ. Ми ӧм тодылэ Дэйл Карнегиез но Сирил Паркинсонэз. Соин чиданэ чигылэ. Кӧня пол юмоке усьылӥ ни!
- Одӥг бамады чабко ке, мукет бамдэс мыжык улэ пуктӥськоды-а?
- Берло аръёсы ӵемгес озьы карисько. Зэм, сюрес вылам шедьыло лекос кӧтвеськантэмъёс но. Сыӵеосын сэрен 1991-тӥ арын арня ӵоже сютэм улӥ. Визьмо удмуртъёсты ӟучъёс пӧлын саптась муртлэн пиняз сётыны вырисько ни вить ар ӵоже. Мон ке ӧй, кин-о сыӵеосты кортналоз?
- Тӥледды пыкылэмзы-сӥсъямзы асьтэлы кельше-а?
- Радазтэм уг. Курлась шоры нырысь ик учкисько тазьы: со тонэ вӧсь карыны-а выре, янгышамлэсь-а утьыны малпа? Тужгес ик секыт вал ньылыны воштӥселэсь Иван Лебедевлэсь меӵак миськемъёссэ. Кык нунал жум ветлӥськод, сое ассэ ыльыскын сиыны дасяськыса. Куинетӥяз шуиськод: Иван Иванович тыныд ӟеч карыны турттэ, нош тон, тау карем интые, вождэ вайиськод. Шоканы капчигес луэ.
- Сётскиськоды-а мукет муртлэн кылызлы но кужымезлы? Ӵем-а вузаськиськоды?
- Воргоронъёслы пумит кулэ дыръяз меӵ султӥсько. Кышноос ортчыт кескичесь шуыса, та аръёсы гинэ ятвылтӥ. Соослэсь эрекчаськон сямзэ шӧдытэк, умойтэм шудонъёсазы но амалтэк пыриськылӥськем. Вузаськон пумысен гордэктӥсько. Вал сыӵе учыръёс. Кызьы индылӥз редакциын мон азьын ужам кузё, редактор – со политикаысь кивалтӥсь. Татын кык пол кык котьку ик ньыле уг вутты, законъёсыз кескичесь. Зэм, мон асме ачим вузаны лэзьылӥ сыӵе муртъёсты гинэ, кинъёс асьсэос мукетъёсызлэн тыбыразы пурт бышказы. Политика, власть, кун (государство) кырсь макеос, шуо. Шонер. Ойдолэ син азямы пуктоме: туннэысен ӧвӧл политика но, кивалтон но, кун но. Мар луоз? Асьмеос пӧрмом кыр (дикой) муртъёслы, адями сиисьёслы. Кырсь макеос пӧысь лябгес саптаськемзэ бырйиськод ини.
- Асьтэды кизилиен уд лыдъяське. Нош кинэ кизили кожаськоды? Трос-а соос удмуртъёс пӧлын?
- Кин кизили, кин ӧвӧл – мон судья луыны уг быгатӥськы. Инмын сямен ик, музъем вылын но соос вань бадӟымъёсыз но пичиосыз. Удмуртъёс пӧлы Толэзьысь визьмо мурт уз васькы. Шедьтоно, пусъёно, данъяно луэ ванез пӧлысь. Чорыгтэм интыын кисло-кусло (рак) но чорыг, шуо. Ужбергатӥсьёсмы пӧлын выжыосмы трос ӧвӧл бере, шоро-куспоез но кизили лыдъяське ни. Артистъёсмы Москваысь Бадӟым театре уг шедё ке, эстрадаын кырӟась но кизилилы пӧрме. Николай Островский егитъёслы шуылӥз: тӥ пӧлысь котькудӥз писатель луыны быгатоз (нош аслэсьтыз тугаськем чуръёссэ выль сямен гожъяса сётылӥз Валентин Катаев). Мон но озьыгес оскытысал: мынам интыям пукем котькудӥз куалялюльы 35 ар куспын син шоры йӧтысал ни. Миллиард ар куспын космосысь кезьыт тузон но Шунды нимо кизилиёзь ӟырда ук.
- Редакциын ужатозяды кыӵе гожъямды тужгес усто пӧрмиз кадь, кудӥз янгышты тужгес бадӟым?
- Ужъёсме дунъяны кепырасько. Пиналгес дыръям ик сюбег пельпумы вылэ туж секыт ныпъет ошыны выри. А. Шкляев гожтэмез адӟыса, адямиос мед шуысалзы: таид маин ке но абдратоз - лыдӟоно. Жаляса пусъёно луэ: котьку ик озьы уг пишмы. Али но асме индылыны шӧтасько: мадь озьы - тон сямен нокин медаз пӧрмыты, гожты озьы – А. Шкляев кылэз адӟытэк, мед ятвылтозы кибервылдэ. Та ласянь пусйыны кулэ, вылды, Казахстанысь, Армениысь, Крымысь, Венгриысь, Эстониысь, Финляндиысь, Египетысь вуттэм чуръёсме. Отын Америкаез ӧй усьты. Но удмуртъёс кунгож вамен уггес выжыло бере, соослы маке но выльзэ сётыны выри кадь. Янгышъёсы сярысь. «Шӧкыч» сэреге гожъяны ӧдъяме бере мемие алӥз: ужась муртэ вӧсь эн кары, пие. Жалямез потӥз, вылды, огшоры калыкез - нянь будэтӥсез но пудо вордӥсез. Меӵак шараяло: ӧй быдэсты куронзэ. Коммунизм вакытэ но, али но кинэ бышкалтод, огшоры адямиез ке ӧд? Сыӵе ни улон-вылонмы: 300 манет лушкам понна пукто пытсэт сьӧры, 300 миллион доллар капыртэм понна – вылӥ кивалтӥсе. Данаксэ вӧсь каремъёсме, кылсярысь, Кияса ёросысь азьмынӥсь «Рассвет» эштосысь парсь сюдӥсьёсты, вунэтӥ ни. Куд-огез али но тодамы вайыто сьӧлыкамъёсме. Тӥни сыӵе учыръёс но монэ ало асме кизилиен лыдъянлэсь. Мыдланьяськисько, нош асме янгыш карыны уг дыртӥськы.
- Оскиськоды-а Инмарлы, сопал дуннелы, вегинъёслы, туно-пеллёослы, экстрасенсъёслы?
- Оскисько но, уг но. Мемие монэ куать нуналъем дыръям-а, мар-а, нуллэм бускель Игра ёросысь Чумой черке пыртыны. Школае мынӥ но, дышетӥсьмы Мария Семёновна Петрова (Никитина) кирос нуллӥсьёсты куриз кизэс ӝутыны. Куамын пӧлысь куать кузя сюримы «несознательнойёс». Бертыса мемилы верасько: Инмар ӧвӧл. Со нодъяз: тон лыдъя, со ӧвӧл шуыса, но озьы шара эн вераськы. Инмар, пе, дышетэ адямиез яратыны, уте сьӧлыкамлэсь. Но… Инмарлэн нимыныз пуромизы ваньмыз сямен вашкала но туала ожмаськонъёс. Аслэсьтыз кылдытэм Адямизэ быдтыны лэзе ке, Господь (Аллах, Будда) вань-а меда? Мукет ласянь учкыса, кизилиос но атомъёс ог-огзылы укшало: электрон (Шунды) котыртӥ бергало протонъёс (Музъемъёс). Кин ке но соосын кивалтыны кулэ ук. Анай куке-соку таза нылпи мед ваёз шуыса, нылмуртэз кин ке утьыны выре дырызлэсь вазь сьӧлыканлэсь. Тазэ но кыӵе ке валантэм маке (визь, кужым) малпам. Леонид Жуховицкийлэсь чебер уд вера ни: мон уг тодӥськы, вань-а Инмар, но улыны турттӥсько, со вань лыдъяса. Пыртэмзы бере ӝыны даур ортчыса, юри ветлӥ Чумое. Черклэн пу юртэз вань на, но отын уг вӧсясько. Озьы ик сылэ: уг тупа черклы но, кенослы но, клублы но. Мынам но Инмарлы осконэ сыӵегем. «Дор» пьесаме гожтыкум, мургес тодматски черкысь адямиосын. Сюлмы ик вӧсь луиз. Отын но вань кырсь сюлэмъёс, оскись вылын узырмыны вырисьёс, ог-огзэс ултӥясьёс. Огез синазькыль каре Аллахез, музонэз - удмурт вӧсез, куинетӥез – юлтошсэ. Сьӧлык, дыр, отысь кырсьсэ мыным шараяны. Но… Рос-прос малпалэ ай таӵе учыръёс сярысь. Калыклэсь лушкам коньдонэн олигарх пуктэ храм. Кызьы сое дунъялод? Священник юыса сюре милицие. Мар шуод? Кулэ-а асьмелы Инмар но тон вискын кин ке куинетӥез? Таӵе юанъёслы валэктонэ ӧвӧл. Уз ни луы, шӧдске. Сопал дунне пумысен тазьы верасал. Нуныкарын (маткаын) дыръяз пиналлы будӥсь суй-пыдыз кулэ ӧвӧл – люкето гинэ. Но нылпи озьы дасяське вордсконэзлы – вуоно улонэзлы. Музъем вылын улыкуз, адями валаны кутске возьытлыкез-возьдаськонэз. Та сям солы али ӵемысь люкетэ узырлык люканы, кинэ ке лёганы, юыны-кыскыны. Кин тодэ: возьытлык со, оло, вуоно улонлы дасяськон ёз (аспӧртэм суй-пыд шуод-а, мар-а). Кин тодэ: сопал дунне оло зэмен ик вань, отын возьытлык пӧрмоз тужгес кулэ органлы. Гороскопъёслы но вегинъёслы осконэ ӧжыт. Азьпал улонэз шонер тодыса но, соос изъян гинэ ваё кадь потэ. Историе кылиз таӵе учыр. Пушкин но Дантес куспын дуэль азьын кылбурчи ветлӥз туно-пеллё доры. Таиз шуиз: тонэ виёзы. Александр Пушкин сокем оскиз: кулонлэсь палэнскыны чик ӧз выры ни. Сыӵе сьӧд малпанэн Сьӧд шур дуре вуиз но быриз. Трофим Архипов «Советской Удмуртие» огпол тазьы гожтӥз: шудэз уг витё – шуд понна нюръясько. Татын гороскоп уз юртты.
- Кыӵе муген юнматыны ӧдъяды тазалыктэс? Малы уже, ньыль иськеме, пыдын ветлӥськоды?
- Инкуазьлэсь мон начаргес сӥльвир (материал) басьтӥ. Копак сьӧдун (рахитик) ӧй вал, но ёзъёсы монэ унь-мань карыны вырылӥзы ик. Соин ик физкультураез ӧй яраты. Дэбесысь педучилищеын дышетскыкум, суббота вуытозь, быдэс арня ӵоже кайгырисько вал: Анатолий Константинович Сунцов нош ик куас сюрес вылын курадӟытод-а? Турникын берганын но кузьдалае тэтчанын нылъёс азьын возьытэ усьылӥ. Берпуметӥ курслэн пумаз кыкетӥ шоканэ усьтӥськиз кадь. Барьеръёс вамен бызьылонэ пӧрмыны ӧдъяз. Иже вуэме бере шуак яратӥ каргам куасэз. Кызьы уд гажа, тынад азбарад уло ке олимпиадаослэн, дуннелэн, СССР-лэн, Удмуртилэн чемпионъёссы Галина Кулакова, Владимир Никитин, Тамара Тихонова, Нина Парамонова, Юлия Шамшурина? Юля ик кылем толалтэ мыным кузьмаз аслыз кулэтэм куассэ. Педучилище вань даурлы пыӵатӥз физкультураез гажан сям. Соин ик ӵукналы быдэ - тол коть гужем - бызьылыны потасько. Уже вамышъясько пыдын. Отпуск басьтӥсько ар пумын. Куддыръя нуналаз кык пол куасэн ветлӥсько. Редакциын пиос куспын волейболэн нюръяськыкумы (вал сыӵе аръёс) – урод шудӥсьёс сярысь Ульфат Бадретдинов юнме ӧз шуылы, дыр: сыӵе ӵушни-пашниос педучилище пыр потэмын ӧвӧл.
- Асьсэды визьмо лыдъясь воргоронъёс палэнысь кышно ваё но удмуртъёс азьын чеберъясько. Малы?
- Кышное бигер шуэмды потэ-а? Та юанлы макем шонергес вералод, сокем узгес оске. Мон удмурт кузпал ӧй шедьты, малы ке шуоно, удмурт нылъёс шорам ӧз учке. Мугзэ тодско. Гуртысен городэ вуэм пиёклэн манеръёсыз сумбресэсь, вераськемез шакшы. Но удмурт нылъёсты ултӥяме яке азязы гольтыръяськеме ӧвӧл. Сю пол оскытъяй ни: соос пумен чебересьгес уло. Алёна Фёдорова кадь удмурт ныл, ӟуч Оксана Фёдорова музэн, куке-соку дуннелэн миссэз луоз ай. Яратон сярысь таӵе мадён вань. Солдатъёс ченгешо: вань-а со? Жугиськон калэ вуиллям. Старшина вуэм но верам: яратон вань. Солдатъёс соку ик соглаш кариськиллям, малы ке шуоно озьы оскытэм ачиз старшина. Философия ласянь учкыса, инкуазьын айыос но мумыос вань ке, озьы кинлы ке кулэ, дыр. Кинлы? Валамон ни, яратыны.
- Малы драматургилэсь куштӥськиды?
- Удмурт драмтеатр али секыт висе. Нырысь ик - коньдонлы ёрмыса. Соин ик пьеса гожтӥсьёсын ужанъя трос арлы план лэсьтыны уг быгаты. Асме нош ик кортнасько: муртлэн черказ аслаз законъёсыныд эн пыр. Борис Саушкин висьыны усем но кулэм бере театр ыштӥз кадь тачак ӟеч сямъёссэ: сезон усьтонзэ но ворсанзэ, артистъёсты гастроле сӥё-дано келянэз но пумитанэз, группалэсь сӥзьыл люкаськонзэ. Озьы ыштэ драматургъёсты но, учкисьёсты но. Кытчы со вуттоз? Укыр шимес верало, дыр, мон: пуктымтэ пьеса – со вайымтэ нуны.
- Кыӵе юан возьмаськоды на вал?
- Шаркан ёросысь Урдогурт но Балтач школаос бере, Дэбес педучилище, Казаньысь университет но Свердловскысь вылӥ партшкола бере тужгес вылӥ дунъяськоды Дэбесэз. Малы?
- Малы бен?
- 14-18 арес – быдэ вуон, тодон-валан люкан но яратон вакыт, физкультураен, музыкаен, суреданэн эшъямзы, пул вандыны, вуриськыны но утюганы дышетэмзы пыраклы пыӵазы. Мыным отын дышетскыны дэмлазы драматурге, артистэ, музыкантэ, астрономе, физике, математике, физкультурнике. Котькуд удысын кыӵе ке шекезлэсь кисырай бере, аслым бырйи ни тужгес капчизэ удысэз – газет поттонэз. Туннэ но уг жаляськы. Дэбес али но сюлэмын. Малы ке-а вить арлы огпол (кытӥяз ӵемгес но) мон Дэбесэ люкаллясько Д группаме. Музонъёс но бордам итӥсько ни. Зэм, группаын укмыс пӧлысь ньылез ӧвӧл ни. Кылемъёсыз каньыллям шокаськом кадь. Кема мед уломы на.
Источник:
Шкляев А. П. Миллиард ар куспын кезьыт тузон но ӟырда / А. П. Шкляев // Удмурт дунне. - 2003. - 31 октября. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
