Грязев Георгий
Георгий Геннадьевич Грязев - удмурт гожъяськись, журналист но публицист, Удмурт Элькунысь сӥё-дано журналист.
Улон сюресэз[править]
Грязев Георгий Геннадьевич вордӥськиз Ува ёросысь Туймат гуртын 1964-тӥ арын 14 июле. [1] Семьяын Гера ньылетӥ нылпи. Пиналысен анай-атайтэк кылиз. Соин бадӟым агаезлэн семьяяз быдэ вуоно луиз. Но туннэ но со туж бадӟым тау карон кылъёсын тодаз вае агайзэ но кенаксэ, Нина Александровна Грязеваез. Асьсэлэн куать нылпиоссы пӧлын, соос пияшез мултэс ӧз каре, вордэм пизэс сямен утялтыса но сюлмаськыса будэтӥзы, сизьым ар Ижкарысь но Ленинградысь университетъёсын дышетскыны луонлык сётӥзы. [2] «Школаын мыным туж удалтӥз дышетӥсьёсын», – шуэ Георгий Геннадьевич. Гера 4-тӥ классын дышетскыкуз, школаязы ужаны лыктӥз егит дышетӥсь Пётр Васильевич Куликов. Со литературая кружок кылдытӥз, быгатӥз пиналъёслэсь гожъяськон мылкыдзэс ӝутыны. [3]
5-тӥ но 7-тӥ классын дышетскыкуз, Гера вуылӥз егит гожъяськисьёслэн семинаръёсазы. Отын со нырысьсэ пумиськиз зэмос гожъяськись адямиосын: Владимир Романовен, Флор Васильевен, Роман Валишинэн. «Дась лу!» ик пияшлы уно эшъёс но кузьмаз. Слётъёсы, семинаръёсы, «Артек» пионерлагере вуылэмез бере, соос элькунысьтымы пӧртэм сэрегъёсаз кылдӥзы. Семинарын со нырысьсэ пумиськиз Виктор Шибановен, Михаил Федотовен, Галина Кондратьеваен, Юрий Лобановен. Егит гожъясьёсын мыло-кыдо ужаз Герман Алексеевич Ходырев. [4]
7-тӥ классысен Гера куасэн бызьылыны кутскиз. 9-тӥ классысен со Ува ёросын кужмоосыз куасэн бызьылӥсьёс пӧлы пыре вал ини, 1-тӥ разрядлэсь куронъёссэ быдэстӥз. Туж но туж мылкыдыз вал военной журналист луыны, но, синмыз лябен, малпанэз ӧз быдэсмы.
Удугучин черкогуртысь шоръёзо школаез йылпумъяса, Гера дышетскыны пыриз Удмурт кун университетлэн филологияя факультетысьтыз удмурт ёзаз. Татысен ветлӥз литературая кружоке, кудзэ соку нуэ вал Даниил Александрович Яшин. Со гожъяськонлэсь пуштроссэ валаны дышетӥз. Но ньылетӥ курс бере (1985-тӥ арын) пияшлы луонлык кылдӥз дышетсконзэ азьланьтыны Ленинградысь А. А. Жданов нимо кун университетлэн журналистикая факультетаз. Сое отчы куинетӥ курсэ кутӥзы. [3] Ленинградысь бертӥз гинэ но, армие басьтӥзы. 1988-1989-тӥ аръёсы служить кариз.
1990-2008-тӥ аръёсы Георгий Геннадьевич ужаз Удмурт телевидениын. Нырысь ик сое иворъёсъя ёзэтэ кутӥзы. Бӧрысь дасяз но нуиз «Шаер», «Шаермылэн вамышъёсыз», «Чибори», «Улон-вылон» (таиз передачалэн «атаез» луэ), «Вамыш» передачаосты. Телевидениын ужан аръёсаз элькунысьтымы вань ёросъёсы, дыр, вуылӥз, трос калыкъёсын пумиськылӥз. Вал корреспондент, спецкорреспондент, генеральной директорлэн воштӥсез но вал. [5] 1998-1999-тӥ аръёсы, руководство ӧтемен, ужаз «Арсенал» телекомпаниын. Отын соку удмурт кылын передачаослы дыр висъязы. Г. Грязев корреспондент но, передачаез дасясь но, ачиз ик нуись но вал. Гергий Геннадьевич 2005-тӥ арын кыкетӥ образование басьтӥз на, УдГУ-ысь правоя, социальной управлениея но безопасностезъя Институтэз йылпумъяз, юрист луиз.
2008-тӥ арысен «Удмуртия» книгапоттониын валтӥсь редактор луыса ужа. Берло аръёсы «Удмуртия» издательствоын трос чебересь, тунсыкоесь книга-альбомъёс поттэмын вал. Соос пӧлын «Здравствуй, Удмуртия»=«Ӟечбур, Удмуртия» (2016), «Музей-заповедник Лудорвай», «Петр Чайковский : к родословной» (2014), «Петр Чайковский. Родина гения» (2016), «Секреты удмуртских мастеров» (2019), пиналъёслы «Я живу в Удмуртии» (2017), «Любимый Ижевск : книга для семейного чтения по краеведению» (2015) но мукет книгаос, кудъёссэ радъяз Г.Г. Грязев, трос конкурсъёсын вормисе потылӥзы.
Гожъямъёсыз сярысь[править]
Гожъяськон мылкыдыз Гералэн пуромиз школаын дышетскыкуз. 4-тӥ классын дышетскыкуз, одӥгаз урокын удмурт кылын но литератураен дышетӥсьсы Пётр Васильевич Куликов ӵектӥз выжыкыл гожтыны. Кинлэн ужез умой пӧрмиз, солэсь, пе, «Дась лу!» газетэ ыстом. Кӧня ке дыр ортчыса, Выль ар бере быдэс школаын Гералэсь нимзэ верало ни вал, выжыкылэз «Дась лу!» газетын потэм. Со дырысен пияш гожъяськон висёнэн черлаз. [4]
Университетын дышетскыкуз гожъямъёсыз печатласькыны кутскизы «Дась лу!», «Советской Удмуртия», «Даур» но мукет ёрос газетъёсын, «Кенеш», «Инвожо», «Кизили» журналъёсын. Озьы ик печатласькиз «Пионерская правда», «Красная звезда», «Сельская жизнь», «Слава Родины» газетъёсын, научной но огъя (коллективной) сборникъёсын. Кема аръёс телевидениын ужаса, Георгий Геннадьевичлэн трос гинэ материалъёсыз люкаськизы. Передачаын ог 15 минут мында материалэз куто, нош кылемез вандӥське но жуг-жаг пӧлы куштӥське, уно тунсыкоез кадр сьӧры кыле. Георгий котьку но погонъёсын адямиос шоры синмаськыса учкылӥз. Трос чиданэз адӟо соос. Афганистан, Нагорный Карабах, Югославия, Шор Азия, Чечня… Отын быро, курадӟыны шедё асьме удмурт пиосмы. Соос сярысь передача лэсьтэ но, сюлэмыз уг няська. Передачаез возьмато, со кошке. Дыр ортче, собере сое уже кутыны уг луы ни. Нош журнал-газетэз котьку лыдӟыны луэ. [3]
Ӵапак тележурналист луэмез юрттӥз но юрттэ Георгий Грязевлы улон-вылонмылэсь чебер буёлъёссэ но сьӧд виштыоссэ синйылтыны, соос пумысен ӟеч-ӟеч малпаськыны. Сюлмаськонъёсыз, малпанъёсыз, шумпотонъёсыз но куректонъёсыз чагыр экранэ гинэ ӧз тэре ни, соос вӧлмыт чуръёсын кисьтӥськизы бумага вылэ. Ӵапак озьы кылдӥзы «Кирень», «Шелеп» повестьёсыз но «Нырысетӥез», «Пиос но будо но…» но мукет очеркъёсыз. «Кирень куректон» ужез сӥземын Якшур-Бодья ёросысь Кекоран гуртын вордскем но будэм воргоронлы, лётчиклы, майорлы, кык Горд Кизили орденэн пусъем муртлы Виктор Вахрушевлы. Автор пумиськылэ гожъян адямиезлэн семъяосыныз, анай-атайёсыныз, тодмоосыныз. Котькудӥз геройез солы матын но дуно потэ. Та ужъёсын егит автор сюлмаз люкаськем секыт малпанъёссэ лыдӟисьёсызлы чик ватытэк усьтэ, туала шакшы улонмы пумысен йырзэс тӥяны ӧте. [6]
Георгий Грязев – нырысез автор, кудӥз шедьтӥз но лыдӟисьёс доры вуттӥз Георгиевский киросъёсын полной кавалерез, Пичи Пурга ёросысь Бураново черкогуртын будэм Я. Ф. Байсаровез («Ньыль киросъёс», 2004). Солэн пероез улысь ик потэмын «Вунэтэм герой» (2002) очерк но. Таиз Совето Союзысь Герой (та звание солы Афганистанын сётэмын вал), асьме землякмы В. Ф. Попков сярысь. «Атай, тон весь эн бӧрд ни…» (2004) очеркысьтыз «Удмурт дунне» газетэз лыдӟисьёс нырысетӥосыз пӧлын тодӥзы Татарстанысь Балтаси ёросын Вуж Кушкет гуртын вордскем но будэм Россия Федерацилэн Героез, лётчик, майор Олег Исаев сярысь. Со бырыны шеде Северной Кавказын.
Лыдӟисьлы тодмо трос мукет очеркъёсыз но: «Кезьыт кизили» (2001) Россия Федерацилэн Героез Ю. Г. Курягин сярысь, анай-атаез Камбарка ёросын уло, «Мултэс адямиос» (1997) Глазов ёросысь Россия Федерацилэн Героез А. Б. Ушаков сярысь, «Ыштэм орден» (2011) Шаркан ёросысь Владимир Главатских…
1996-тӥ арын егит гожъяськисьлэн «Кирень куректон» книгаез потӥз. Со сӥземын Афганистанын но Чечняын ожмаськем улосчиосмылы. Литературая тодосчи Татьяна Ивановна Зайцева аслаз статьяаз гожтэ: «Ас сяменыз паськытатэ но узырмытэ документальной жанръёсты Г. Грязевлэн армилы сӥзем очеркъёсыз. Мар кыске лыдӟисез та быгатӥсь авторлэн ужъёсаз? Нырысь ик оскымон гожтэмез, зэмос учыр, факт, кудӥз егит писательлэн перо улаз азьвылзэ но туалазэ сэрттыны-пертчыны юрттэ, лыдӟисез малпаськыны косэ». [7] Георгий Грязев «Спортивная гордость Удмуртии» (2010) но «Неизведанными тропами Удмуртии» (2012) справочникъёслэн но пиналъёслы «Алнашысен Ярозь» (2011) ӝӧк вылын шудонлэн авторез-составителез луэ.
2011-тӥ арын Георгий Геннадьевич одӥгез нырысетӥосыз пӧлысь Эрик Батуев нимо премилэн лауреатэз луиз. Комиссилэсь сюлэмзэс вырӟытӥзы солэн зэмос геройёслы сӥзем очеркъёсыз. Соос туж мур но яркыт гожтэмын: лыдӟыку син азе пуксё ожысь суредъёс, асьме пиосъёслэн кышкасьтэм луэмзы, эшъёссэс утемзы. Та гожтосъёсты огкутскемен лыдӟыны но уг луы, сюлэм позырске, шокан пытсаське. [8]
Премиосыз[править]
Сӧсыр луэм адямиослэн «Милосердие и гуманность» Всероссийской обществолэн медаленыз пусъемын (награждён медалью Всероссийского общества инвалидов «Милосердие и гуманность» (2008)), 2008
Физической культурая, спортъя но туризмъя Министерстволэн «За заслуги в развитии физической культуры и спорта» пусэн (знаком Министерства по физической культуре, спорту и туризму УР «За заслуги в развитии физической культуры и спорта»), 2010
Эрик Батуев нимо национальной премилэн лауреатэз, 2011
Библиография[править]
Книгаосыз[править]
Вамыш : очеркъёс. - Ижевск : Удмуртия, 2014. - 191 с.
Кирень куректон : очеркъёс, повестьёс. – Ижевск : Удмуртия, 1996. – 279 с.
Статьяосыз[править]
Бурдъёс : верос // Кизили. – 2005. – № 10. – С. 4–5.
В каждой картине – частичка его души // Увинская газета. – 2010. – 13 июля. – С. 3.
Вӧёгуртысь батыр // Кенеш. – 2007. – № 5/6. – С. 77–82 : фот.
Вунэтэм удмуртъёс? // Кизили. – 2005. – № 8. – С. 10.
Гурезез берыктӥсьёс // Удмурт дунне. – 2006. – 1 авг. – С. 7.
"Дэремен" вордскем разведчик // Удмурт дунне. – 2007. – 20 июня. – С. 6.
Зэмлыкез витись ветеран // Удмурт дунне. – 2007. – 8 мая. – С. 4.
Казахстанысь удмурт сюресчи // Кенеш. – 2010. – № 2. – С. 72–79 : фот.
Казахстанысь ӵыжы-выжыосмы // Кизили. – 2006. – № 8. – С. 6–7.
Кортэз ӝутъясь // Кизили. – 2008. – № 7. – С. 4 ; Инвис (Шаркан). – 2007. – 7 дек.
Кошкиз кык арлы но... пыраклы // Удмурт дунне. – 2006. – 3 окт. – С. 5.
Малышка койык // Кизили. – 2009. – № 1. – С. 6.
Москваез утисьёс // Ӟечбур! – 2010. – 1 июля. – С. 7. – (Вормонлы – 65).
НЛО ; Десантникъёс ; Юсьёс // Удмурт дунне. – 2006. – 25 янв. – С. 5.
Ньыль киросъёс // Кизили. – 2005. – № 2. – С. 2–3.
Ошиськем банан : улонысь учыр // Удмурт дунне. – 2006. – 4 авг. – С. 15. – (Шӧкыч).
Пӧсятӥсь лымы : армиысь суредъёс // Удмурт дунне. – 2005. – 22 февр.
Туйматысь кедр // Даур. – 2011. – 5 авг. – С. 4 : фот.
Тэтчась // Удмурт дунне. – 2012. – 24 июля. – С. 6 : фот.
Удмурт шаер соосын данъяське // Кизили. – 2011. – № 2. – С. 4–5 : фот.цв.
Удмуртиысь кырпарсьёс – Казахстанын // Кизили. – 2012. – № 1. – С. 3 : фот.цв.
Улон – шудон, улон – шӧдон // Удмурт дунне. – 2011. – 13 дек. – С. 4.
Чекерысь десантник // Удмурт дунне. – 2006. – 26 сент. – С. 6.
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература[править]
- ↑ Михайлов В. Георгий Грязев (1964) // Писатели и литературоведы Удмуртии / сост. А. Уваров. – Ижевск, 2006. – С. 144.
- ↑ Грязев Г. Удугучин – моя малая родина : встречи и воспоминания // Увинская газета. – 1993. – 17 июня. – С. 3–4.
- ↑ 3,0 3,1 3,2 Тихонова Л. «Вамыш» бӧрсьы вамыш… // Удмурт дунне. – 2004. – 24 сент. – С. 6, 11. - (Удмурт кизилиос).
- ↑ 4,0 4,1 Грязев Г. Мынам «лёгетъёсы» // Ӟечбур! – 2005. – 6 янв. – С. 7.
- ↑ Андриянов А. Сугон куректон // Удмурт дунне. – 1998. – 7 мая. – С. 4.
- ↑ Куликов П. Азькыл // Кирень куректон / Георгий Грязев. – Ижевск, 1996. – С. 5–6.
- ↑ Зайцева Т. 90-тӥ аръёсысь удмурт проза : сое эскерон ужпумъёс // Кенеш. – 2004. - № 7. – С. 62–66.
- ↑ Рябинина З. Гожтэм кыл уг ӝуа : удмурт журналистъёс дунъямын Э. Батуев нимо премиен // Удмурт дунне. – 2011. – 14 окт. – С. 12.
