Смирнов Сергей Михайлович
Сьӧлтаськисько, оскисько, оскытӥсько…[править]
Удмурт семьяын вордскыса, удмурт кылэз дышетыны солы ӧз кылды. Пичиысен кырӟан-эктонъёсын эшъяськыса, со ноку ӧз малпалля артист луон сярысь. Сергей Михайлович Смирнов — шаерамы тодмо эмъясь, медицина наукаосъя кандидат. Кивалтэ Удмурт кун университетысь психология но психоанализъя кафедраен но республикаысьтымы наркология диспансерысь реабилитацияя ёзэн. Республикаямы нырысетӥез антрополог луэ. Со огкыл шедьтэ кивалтӥсьёсын но, шузимытӥсь суретъёслэн вотэсазы шедемъёсын но.
Но Сергей Михайлович ӧз люкиськы удмурт кырӟан-эктонъёсын. Солэн пушказ йыгаське удмурт сюлэм.
— Вордски мон 1967-тӥ арын март толэзе Можга городын. Югыт дуннез адӟыкум, анае но атае воксё егитэсь вал ай — кыксы но дышетскизы Можгалась педучилищеын. Сое йылпумъятозязы, монэ келязы Ува ёросысь Косой гуртэ. Отын улэ вал косой бабае — мамаелэн анаез. Ог 3-4 арескам семьямы выжиз та ёросысь ик Красное черкогуртэ. Мамае, Александра Ивановна, покчи классъёсы ветлӥсьёсты дышетӥз. Папае, Михаил Терентьевич, крезьгуръя урокъёсты нуиз, бӧрысьгес ини интыяськиз мувӧй кыскон удысэ. Со али но туж умой шудэ баянэн, гитараен. Татын вордскизы Оксана сузэре но Алексей выны. Озьы ми семьяямы куинь пинал будӥмы.
Красное — ӟуч черкогурт, удмурт кылэз отын туж шерез поттылӥз, школаын но удмурт кылъя но литературая урокъёс ӧз нуиське. Нош мон, татчы лыктыкум, ӟуч сямен одӥг кыл но уг тодӥськы вал. Ярано, эше — удмурт маке — ӟуч сямен усто вераськылӥз, со кабен ик дыши кадь выль кыллы.
Мыло-кыдо эшъяськылӥ Нардыкысь, чылк-чылк удмурт гуртысь, пиналъёсын. Красное соос туж трос кузя дышетскыны ветло вал — трос луэмысьтызы китаецъёс гинэ шуылӥмы. Улӥзы соос интернатын. Озьы таосын ӵош ик асьмелэсь кырӟанъя но эктонъя ансамбльмес кылдытӥм. Концертъёсын трос ветлӥм артысь гуртъёстӥ. Вуылэммы вань Иже но — республикаямы радъяськись конкурсъёсы. Вормисьёс радэ но шедьылӥмы. Мон, школаын дышетскыкум ик, шудӥсько ни вал гитараен. Кырӟаны-вераны быгатэмме шӧдыса, лэся, колхоз ялан поттылэ вал направлениея культпросвет училищее келян сярысь.
- Ӧз ӝутскы шат сыӵе мылкыдды?
— Кырӟан-веран со мон понна ваньмон дырез ортчытыны ӟеч амал, хобби, гинэ луэ. Анаелэн-атаелэн сюрестӥзы вамыштон, дышетӥсь луон, мылкыды но ноку ӧй вал. Ньылетӥ классын дышетскыкум ай, сочинение гожтыны косӥзы: «Кин луо мон, будӥ ке?» Эмъясь луон мылкыды соку ик вылэм ни, лэся — адямиослы юрттэме потэ, шуи. Малпанэ со дырысен ӧз вошъяськы ни. Гуртамы фельдшермы туж ӟеч вал, оло, со кадь луэме потылӥз. Классэн кивалтӥсьмы, Валентина Семёновна Измайлова, химия но биология урокъёсты нуылӥз. Темаосты туж тунсыко мадьылӥз. Солы луыса но, малпасько, та предметъёсъя тросгес но тросгес выльзэ тодэме потылӥз.
Укмысэтӥ классозь туж ӟеч дышетски. Дасэтӥ классэ потон азям семьямы выжиз Иже — папамылы ужысьтыз квартира отчы висъязы. Озьы городысь 16 номеро школае лыктыкум, аттестатам «витьёс» гинэ вал. Бен, выль эшъёслы, дышетӥсьёслы дышыны выронъям «ньыльёсы» но адӟиськылыны кутскизы. Озьы ке но школаез азвесь медален йылпумъяй.
Дасэтӥ классысен ик ветлыны кутски мединститутысь подготовительной курсъёсы. Нош школаме йылпумъяса, документъёсме та вузэ чик могатэк сётӥ. Экзаменъёс пыр капчиен потӥ. Дышетскон но секытэн ӧз сётӥськы.
- Антропологиен мургес тунсыкъяськоды шуыса, соку ик тодӥськоды-а ни вал?
— Ӧй, аслэсьтым ӧрме шедьтон понна трос котыръяськоно луи на. Дышетскыны пыри мон лечебной факультетэ. 1-тӥ курсэз йылпумъяме бере 2 ар нуллӥ сурон сапег — со аръёсы вылӥ образование басьтӥсьёсты ваньмыныз ӵош армие басьтылӥзы. Связист вал. Но, кык ар дырме быдтӥ шуыса, уг малпаськы, армия мон понна бадӟым урок луиз.
Институтэз йылпумъяме бере дэмлазы факультетской терапия кафедрае кыльыны. Отын ик интернатураез ортчи. Диссертациелы темае но быръемын вал инӥ «Ува» санаторийысь вулэн ӟечлыкез. Та уж борды кутскон понна асме кема дасяны выри. Но малы ке со монэ бордаз озьы ик ӧз кыскы.
Кошки анатомияя но хирургияя кафедрае. Ӵапак татысен ик мургес тунсыкъяськыны кутски адямилэн кылдэменыз но азинскеменыз, пӧртэм выжы калыкъёслэн кылдэменызы, наука кылын вераса, антропологиен. Удмуртиын антропологияя доцентъёс, профессоръёс ӧвӧл. Соин ик аслым кивалтӥсь утчаса, Москваозь вуи. Профессор, РАМН-лэн член-корреспондентэз Борис Александрович Никитюк ас эскеронъёсыныз соку быдэс кунамы тодмо ни вал. Со кивалтӥз Россиысь Мугорез кыдатонъя академиысь анатомияя но антропологияя кафедраен. Нырысь жингыртӥ солы, дораз дышетскон мылкыдме верай. Монэн ужаны со пумит ӧз луы, Москвае лыктыны куриз.
- Озьы кышкатэк вамыштӥды Москвае?
— Со вал 1996-тӥ арын. Аспирантурае пырон понна экзаменъёс сётоно на вал. Соос ог толэзь ӵоже кыстӥськозы шуыса, тодӥ. Но кытын уло — ӧй ик малпа. Отын матысь тодмоосмы ӧй вал. Ярано, поездын мыныкум, тодматски Слава Краснопёровен, Удмурт театрысь артистэн. Соку со Щепкин нимо вылӥ театральной училищеын дышетске на вал. Солэсь телефон номерзэ, адрессэ гожтыса кельтӥ.
Бен, институтын улон инты висъязы ик. Но со черкизовской вуз карон интыен артэ вал. Кызьы валай, вуз карисьёслы но со огъяулонние сэрег висъяллязы. Учкисько — котыр бадӟым сумкаос, кырсь, кытын комнатаослэсь усьтонъёс, валаны уг луы. Ӧй чида, жингыртӥ Славалы. Озьы экзаменъёсме сётытозям, улӥ доразы. Училищелэн огъяулонниысьтыз быдэс этаж сётэмын вал удмурт егитъёслы. Соин ик Удмуртиысь но ӧй кошкылы кадь потӥз.
Аспирантураын дышетскытозям, арлы кык-куинь пол одно ик ветлоно луэ вал Москвае. Асьме егит артистъёс доры одно кожылӥ ни. Отын тодматски поръёсын — ох, тапыр эктылӥзы, ява. Артэ ик улӥзы гурезьёсысь алтаецъёс. Таосызлэн ӝӧкъёссы но, пуконъёссы но ӧй вал. Выж вылын — ковёр. Со вылын ик сиськизы но, изизы но, занятиослы но дасяськылӥзы. Паймымон, макем утизы сямъёссэс но йылолъёссэс.
Кык арня пала улӥ тодмо кылбурчи но журналист Эрик Батуев дорын. Удмуртиысь куноос дорысьтыз уг бырыло вал. Мон отын дыръя эшъёсыныз ӵош вуылӥз Касим Галиханов. Но ассэ Эрикез кык арня куспын трос ик адӟыса ӧй вуттылы. Со вазь ӵукна кошкылӥз, нош берытскылӥз уйин 3-4 часын но. Сокема ужалляз. Батуев сокугес бертэмын вал Чечняысь. Секыт ожъёсты адӟемез бере трос эмъюм юэ вал, оло, соин но мыным со трос вераськисьтэм потӥз. Быремзэ тодэме бере пушкы ик оломар луиз.
- Иське, аспирантураын дышетскон аръёстэс валаса но ӧд вуттэ?
— 2000-тӥ арозь дышетски. Диссертациелы тема но Борис Александровичен ӵош бырйимы. Эскери, кызьы чиньы пытьыосъя валаны луэ пӧртэм выжы калыкъёслэсь пӧртэмлыксэс. Эскери Удмуртиын улӥсьёсты — ӟучъёсты, удмуртъёсты но бигеръёсты. Ваньмыз вӧй вылтӥ кадь кошкысал, вылды, но, жаляса верано, Борис Александрович 1998-тӥ арын улонысь кошкиз. Озьы диссертациме сотэк утёно луи ни. Но юрттӥзы солэн ӵош ужам эшъёсыз, уката но Лев Львович Колесников, таиз но профессор, РАМН-лэн член-корреспондентэз. Борис Александровичен соос одӥг кыткетын ужамын. Юрттӥсьёс ӧй шедьысалзы ке, мон та тунсыко но со дыре ик секыт ужме йылаз-пумаз вуттыны шугомысал. Но диссертациме капчиен ути, Борис Александровичез буре ваён кадь луиз ни со.
- Асьтэлы трос тунсыкозэ усьтӥды, луоз?
— Ужелэн одӥг люкетэз сӥземын вал шундылэн адямиос вылын шӧдӥськемезлы. Кызьы тодӥськом: та кизили пӧртэм вакытъёсы пӧртэм сямен пиштэ — куддыр туж зол шунтэ, дырын-дырын лябӟылэ. Нуныкар пушкы кыӵе вакытэ герд кылдэ — талэсь потэ пиналлэн кыӵе луонэз но. Шундыез уката но шӧдо лулсэр пырыос. Кылсярысь, пӧсь вакытэ кылдэмъёс чупресэсьгес луо, салкым дыръя ке — зӥбытэсьгес. Диссертациме гожтыкум, мар паймымон потӥз на: удмурт кышномуртъёс вирзыя матынгес луо монгол, бигер выжыослы, воргоронъёс — Европаын улӥсьёслы. Маин со герӟаськемын? Та юанлы валэктон али ӧвӧл — эскероно сое.
- Озьыен, тодосчиослы тунсыко тема вань?
— Ачим но басьтӥськы вал — дыры уггес тырмы. Мукет ужъёсы трос люкаськемын. Диссертациме утеме бере мон мединститутысь кошки Удмурт кун университетэ, психология факультетэ. Мединститутын одӥг интыям лёгаськем кадь потыны кутски ни вал, ужам маке но выль шӧм пыртэме потӥз.
Озьы 2000-тӥ арын вуи психологияя но психоанализъя кафедрае. Али кивалтӥсько соин. Студентъёслы лекциос но лыдӟисько, практикая занятиос но ортчытъясько.
- Туала студентъёсын секыт ӧвӧл-а ужаны?
— Тросэзлэн верамзы потэ, азьло вакытъёсы кадь соос ӧвӧл ни шуыса — йӧноесьгес, асьсэлы оскисесь. Но, малпасько, со улонлэн куронэз. Туннэ адями сыӵе ик луыны кулэ. Туж шумпоттэ: соос котьмаин тунсыкъясько, олокыӵе но юанъёссы кылдыло. Егитъёс пӧлын ужасько бере, ачим но арлыдме чотаны уг дыртӥськы, соос радын ик вамышъяны турттӥсько. Лекциосме учебникъёсъя нуонлэсь кемалась куштӥськи ни. Книгаос нырысетӥ тодон-валанъёс басьтыны юртто. Нош соиз я таиз темая мургес тодэмед потэ ке, мукет амалъёс утчано. Мон, кылсярысь, уг потаськы Интернетысь — тунсыкъяськисько, мар дуннеын луэ. Ачим трос потамын кунгож сьӧры. Эшлыко кусыпъёсмы Финляндиысь антропологен Анна Мария Вильяненэн. Дораз трос пол ветлылӥ ни. Ӵошен эскериськом пӧртэм ужпумъёсты, ужамы кыскыны вырисько студентъёсты но. Мон УдГУ-э выжон вакытэ вал со. Европаысь «Темпус» огазеяськонлэн радъям одӥгаз конкурсаз милям университетысь психологияя но психоанализъя кафедра наркодиспансерен ӵош грант басьтӥзы. Наркоманилы сӥзем дышетскон пособие дасянэн герӟаськемын вал со. Но сое поттон азьын трос ветлоно луим на кунгож сьӧртӥ. Та ужазы мыным но пыриськыны дэмлазы. Озьы вуылӥмы Англие, Германие, Гамбурге но мукет кунъёсы. Тодматскимы отысь реабилитация центръёсын, кожылӥмы наркопритонъёсы но. Амстердамын марихуанаез эркын вузаны лэземын. Отысь югдурез ас синмынымы адӟим. Номыр кышкытэз ӧвӧл, но Россилы таӵе амал уз тупа шуыса, соку ик шӧдӥмы — асьме калык тае уз вала. Тӥни озьы, кунгож сьӧрын адӟемъёсме-тодэмъёсме вуттыны тыршисько студентъёслы. Антропологилы сӥзем 3-4 дышетскон пособиос но дасяны пӧрмытӥ ни.
- Сергей Михайлович, тӥ кивалтӥськоды на республикаысьтымы наркология диспансерысь реабилитацияя ёзэн. Татчы кызьы вуиды?
— Грантэз утэммы бере кунгож сьӧртӥ котыръянъямы ик матэгес тодматским диспансерысь специалистъёсын. Монэ доразы ӧтизы эмъясь психолог луыса. Со вал 2006-тӥ арын. Нырысь ужамы нылпиосын гинэ. Командамы юнмаз, ужмы пӧрмиз. Мон сяна, эшшо ньыль психологъёс вал на. Нош 2008-тӥ арын реабилитацияя нимысьтыз ёз усьтӥськиз. Татын кивалтыны кутскемелэсь азьло наркологъёсты дасянъя курсъёсы ветлӥ на. Дорамы пыд вылазы выльысь султыны дышетско юонэн, наркотикъёсын герӟаськылэм муртъёс. Со сяна, тодон-валанзэс юнматыны ветло психологъёс.
- Дышетӥсь луон мылкыдды ноку ӧй вал шуиськоды ке но, асьтэос валатэк, анай-атайдылэсь сюрессэс но азинтӥськоды кадь? Ӧд сураське на-а: тӥ психолог-а, дышетӥсь-а, эмъясь-а?
— Ма, зэмен но озьы пӧрме кадь! Ярам, озьы шуом: мыным кельше ваньмыз, мар вань вылез, тунсыкоез. Кыӵе сюресъя вамыштоз адями — ачиз бордысь но потэ. Но, малпасько, вань на адӟон, удалтон. Та ласянь мон обидемын ӧвӧл. Наркология диспансерын коллективмы туж умой, Удмурт кун университетын но огъя кыткетын ужаськом.
- Тодӥсько, кузпалэныды но удалтэмын.
— Ольгаен тодматским ай студент вакытъёсамы. Мон мединститутын, со Удмурт кун университетысь биология факультетысь психология ёзаз дышетскиз. Соку та удысъя нимысьтыз факультет ӧй вал на. Но огазеяз милемыз «Тюрагай» — кыкмы но отчы кырӟаны-эктыны ветлӥськом вал. Тямыс ар пала эшъяським, ог-огмес чакласа улӥм. Кузпалъяськыкумы мон аспирант вал ни, со витетӥ курсэз йылпумъяз.
- Ольга Ильинична шаерамы дано выжыысь луэ — тодмо кылчилэн Бибинур Загуляевалэн нылыз. Семьяязы тӥледыз эмеспи карыны ӧз пумитъяське-а?
— Туж-туж пумит луэмзэс ӧй шӧды. Бибинур Шараповнаез мон Ольгаен тодматскемелэсь азьло тодӥсько ни вал. Институтын дышетскыкумы ай, «Ашальчи» ансамбль кылдытӥм вал. Кырӟам-верам сяна, ми калык эмъян амалъёсын тунсыкъяськылӥм, Иднакаре экспедициосы но поталлям. Сокуен ик сюресъёсмы пумиськылӥзы вуоно варманаеным.
Бибинур Шараповна туж юрттэ нылъёсмес будэтонын. Бадӟымезлы, Машамылы, 17 арес тырмиз ни. Кырӟаны туж пӧрмытэ. Туэ но ветлӥз «Шундыкарысь» эстрадая отрядэ. Бен, со пичи дыръя ӵужикмы (озьы шуо пиналъёсмы Бибинур Шараповнаез) тросгес ветлӥз ай кунгож сьӧръёстӥ. Нош Сонечкамес быдэсак со учке, шуыны луоз. Пичиезлы нылмылы 9 арес. Ветлэ удмурт классэ. Озьы ӵужикеныз ӵош со удмурт-ӟуч словарь дасяз ни. Классазы сое уже куто.
Кузпалы но трос лэсьтэ пиналъёсмы понна. Машамы нылпи садэ мынэм бере со отчы психологе интыяськылӥз. Собере школае выжылӥз. Али Удмурт кун университетысь кунгожсьӧр кылъёсъя институтын директорлэн воштӥсез луэ.
- Тӥляд со туж йӧно. Вожан сямъёсты уг кылдыло-а?
— Котькыӵе вакытъёс луыло (серекъя).
- Асьтэос но туж тузӥ шуиськоды-а? Зэмзэ но, ӵемысь адямиослэсь пӧртэм дӥсяськиськоды?
— Костюм, галстук нуллыны чик уг яратӥськы. Асме эрикогес шӧдэме потэ. Бен, куд-ог дӥсьёсылы кышное но пумит кариськылэ. Но троссэ ӵошен бырйиськом.
- Пеляды угыен но адӟылыны луэ тӥледыз.
— Малпасько, со син усемлэсь уте. Нош соин ӵош ик дорам йӧнатӥськисьёсын матэгес кариськыны, соослы сюлэмзэс усьтыны юрттэ. Наркоманъёс ведь — туж аспӧртэмлыко адямиос. Соослэн асьсэлэн дуннезы. Мудрон дӥсяськемме адӟо ке, каньылгес вераськыны кутско. Юасьёсыз но вань: асьтэос шузимытӥсь суретъёсын уд кушласькиське-а? Мар карод: куддыр асме наркоманъёс пӧлы но пыртытэк уг луы. Соос мед гинэ оскозы мыным. Осконзы луиз ке, капчиенгес сазьтӥськозы, улонлэсь шӧмзэ валаны кутскозы. Висисьёс пӧлын удмурт кылэз валасьёс вань шуыса, ваклайтӥсько ке, соослы одно анай кылынымы вазиськисько. Та амал но соосын матэгес кариськыны юрттэ.
- Син усемлы оскиськоды шат?
— Кызьы сотэк? Тодӥсько — вань жуммытӥсь но, бурмытӥсь но кужымъёс. Адямиез пелляса но пыд вылаз султытыны луэ. Улон учыръёсъя, пересьёслэн верамъёссыя гинэ тае уг тодӥськы, ачим нимысьтыз эскеронъёс нуисько.
- Гороскопъёслы но оскиськоды, оло?
— Одно ик. Ачим Чорыглы туж кельшисько кадь потӥсько. Кылсярысь, трос калыклэсь жадисько ке, ватскон инты утчаны кутскисько. Шуом, Лудорвай вӧзысь сад-бакчаямы пегӟисько. Оскисько Инмарлы. Ужан интыям борддорын но мудоръёс тыремын. Соос мыным кужым, оскон сёто.
- Дышетӥсьёслэн семьяязы будӥды, анай-атайды, Инмар ӧвӧл, уг шуо вал шат?
— Школаын дышетскыкум, мон пионер но вал, комсомолэ но пырылӥ. Со вакытъёс али но син шорам — кыӵе мон вал: пионер отрядмылэн кивалтӥсез, собере комсорг… Но улон воштӥськиз. Выльдӥськон мон понна озьы ик кышкыт ӧз луы — солэн лыктэм омыреныз шокыштӥ кадь потӥ. Вань выляз, тунсыкояз мон ӝог сьӧлтаськисько уга. Эрикез зэмен но шӧдӥ. Сокуен ик улонъя вамышъянъям Инмарлы осконозь вуи. Черке пыратэк уг улӥськы.
- Сергей Михайлович, тодӥсько вазен тӥ туж мыло-кыдо пыриськиськоды вал удмурт движение.
— Огвакытэ кивалтӥ «Удмурт кенешлэн» Ижысь Первомай ёросысь ёзэныз. «Шундыез» кылдытонэ пыриськи ай. Ми вакытъёсы ик ужаны кутскиз фин-угор лагерь. Солэн кивалтӥсез но луылӥ. Нырысетӥяз лагере ик вуылӥзы Башкириысь, Эстониысь нылпиос. Паймымон вакытъёс вал. Та ӧрлэсь палэнтӥськи аспирантурае пыреме бере — дыры ӧзгес тырмы ни. Но мар луэ удмурт калык пӧлын ӟеч тодӥсько. Кузпалы Удмурт нылкышно кенеше пыре — солэсь ма но со кылӥсько. Удмурт ужрадъёсты котьку син азям возисько, Гербере туэ но ветлӥ. Туж яратӥсько удмурт кырӟанъёсты. Котьку но лэземын «Мынам Удмуртие» радио. Кунгож сьӧры потакум, эсьма, Интернет пыр герӟаськисько соосын.
Кин ке со шутэтскон вакытаз лымшор пала дыртэ, зарезь дурын шутэтске. Егит дыръя вань со пала вуылэме. Тодӥсько, мар со сыӵе. Озьы ке но сюлэмы уг кыскы со пала. Асме каньылгес шӧдӥсько Удмурт шаерам. Яке Финляндие мыно ни. Отысь калык гань-гань, мыным туж матын. Удмурт виры шӧдэ, лэся, ас выжыоссэ…
Источник:
За предоставление материала выражаем огромную благодарность редакции газеты "Удмурт дунне"
