Красноперов Вячеслав Николаевич
Сизьыметӥ тулкымлэн йылаз[править]
1993-тӥ арын Россиысь Пичи Академической театр бордысь М. Щепкин нимо вылӥ театр училищее (вузэ) удмуртъёсты кутон сярысь ялэмын вал. Приёмной комиссия азьын кӧня ке нунал ӵоже ас быгатэмзэс возьматӥзы ог сю нылъёс но пиос. Бырйизы устооссэ. Нырысетӥ учконын ик син шоры йӧтымон ассэ усьтӥз чабей куро бӧм кадь лӧбак йырсиё, шаплы, сэзь пияш. Со лыдӟиз Алла Кузнецовалэсь баснязэ, Алексей Шкляевлэсь прозазэ, Степанида Ивановалэсь кылбурзэ. Одӥг пичи но янгышъёстэк, чылк-чылк удмурт кылын. Собере арганэныз шудӥз на. Но тани мар шараяськиз: солы 16 арес гинэ вылэм, эшшо ар школаын дышетсконо на. Комиссилэн тӧр шораз пукись, училищеысь факультетлэн деканэз, курссылэн чеберлыкъя кивалтӥсез, профессор Д. Г. Кознов жаляса шуиз: таӵе пияшез ыштыны уг яра, солэн азьпалан кизилиез пиштэ. Дэмлазы шор ёзо школалэсь экзаменъёссэ гужем куспын экстернэн сётыны но ваньмыныз ӵош Москвае мыныны. Слава Краснопёров тыршиз - оскемзэс быдэстӥз. Со дырысен тани ӝоген дас ар луоз. Удмурт театрлэн коллективаз пырем артистъёслэн сизьыметӥез тулкымзы тупаз 2000-тӥ аръёслэн кутсконазы. Та егитъёс пӧлысь одӥгез тужгес яркытэз луэ Вячеслав Краснопёров, Алнаш ёросысь Туймыйыл гуртын вордскем-будэм пи. Та дырозь солы шудыны кылдӥз ни ньыльдонлэсь уно рольёсты - пӧлазы вань бадӟымез но, пичиез но, котькудӥз бордын пыр-поч, сюлмысь ужамын.
- Слава, кызьы тон малпаськод: актёрлэн сюресэз пичи дырысеныз ик кутске-а?
- Озьы ик, дыр, кызьы кылбурчилэн, суредасьлэн - пинал дыр ошмесысен. Котькудӥз пичи мурт шаянтӥсь, оломае но адӟем карись луэ. Но кудӥз ас пушказгес возе йыринтон сямзэ. Пиналлы усьтӥськыны юртто котыръёсыз, нырысь ик - семьяез. Таза кидыслэн пушъетъёсыз но чебересь луо. Та ласянь мыным удалтӥз, шуыны быгатӥсько. Кырӟам-шудэм куараез огшоры кылзэме уг луы вал - анай-атае сое шӧдӥзы, арган басьтӥзы. Туймыйыламы крезьгуръя школа усьтэмзы бере, отчы куинь ар ветлыса, баянэн но шудыны дыши. Туж яратӥсько вал радиопостановкаосыз, тодмо артистъёслэсь кылбур лыдӟемзэс кылзыны. Тӥни озьы сюлмам лушкем малпан вордскиз: артист луо.
- Кызьы тӥледыз пумитазы Москваын дышетскыса вуэмды бере?
- Пумитазы туж умой. 1997-тӥ-1998-тӥ аръёслы сезонэз кутскизы милемыз ӟечкылан бордысен. Сӥзизы шудо но азинлыко сюрес. Культурая министерствоысь но лыктэмын вал, ветеранъёсмы но - Н. П. Бакишеваен А. И. Перевозчиков. Мӧйыгес эшъёсмы юрттӥзы театрлэн мынӥсь репертуараз пырыны.
- Тынад дебютэд удалтӥз. А. Островскийлэн «Серекъялод но бӧрдод» («Свои люди - сочтёмся») пьесаезъя спектакльын Тишкаед кузёезлы, Подхалюзинлы, ӵап тупа: кескич, соя кариськыны быгатӥсь… Нош собере мар шуысалыд рольёсыд сярысь?
- Зэм ик но, дипломлы шуыса дасям та спектакльысь Тишка мынам яратоно роле луиз. Та нырысетӥ ужмы бордын зол пӧсяса тыршим. Режиссёрмы-педагогмы Т. Н. Ерохина, оскымон образъёс мед кылдытом шуыса, трос выриз котырамы.
Театрын - мукет режиссёръёс, асьсэлэн куронъёссы. Кыӵе ролез мыным оско, тыршисько сое пумозяз вуттыны, вань луонозэ «пызьыртыны». Но тросэз потэ ук материал, режиссёр бордысь но. Тани, кылсярысь, кызьы гинэ ӧй «позыръяськы» мон, П. Захаровлэн «Выль кен» пьесаезъя спектакльын Данькаез шудыкум, солэн тусбуйыз озьы ик ву вылэ суредам кадь кылиз.
Тунсыко потӥз мыным «Ненег сюлэм» водевильын Александр Золотниковлэн, «Гроза» драмаын Кудряшлэн рольёссы бордын ужаны. Выжыкылъёсын шудыны кельше: пиналъёсын ӵош выйиськод но со дуннее - чылкытгес, йыгмытгес, зэмлыкогес луиськод кадь.
- Котьмае шудыны пӧрмыто шуыны быгатӥськод-а ини?
- Уг. Рольёс ласянь мон ӝоже уськытэмын ӧвӧл, но ваньзэ быгатӥсь шуыны уг быгатӥськы на. Собере - озьы луэ-а меда? Весь но весь ас бордад ужано ук - кылэз волятоно, уката ик ӟучсэ. Та ласянь мыным но, мукетъёсызлы но трос юрттэ В. А. Садаева, озьы ик юрттыны вутско Ф. И. Будина, П. М. Романов, В. П. Байков. Туж жаль, ӧжыт удмурт пьесаос, ӧвӧл режиссёръёс-педагогъёс. Мыным озьы потэ: малы дышетӥзы милемыз мастеръёсмы, со пумен ыше-шупче ни. Тани басьтом «профессионализм» валатонэз. Шуылӥзы: со талант гинэ ӧвӧл, со вылӥ быгатонлык но, тыл кадь лопыръяськыса ӝуан-тыршон но… Ӝыт мынӥсь спектакльёсын гинэ шудыса, оло, кӧсэктысал, милемыз уте, шуи ни, выжыкылъёсын шудэммы. Татын материал узыр, быгатондэ усьтыны луонлыкъёс вань: астэ тыро-пыдо, сӥлё-виро шӧдӥськод.
- Нош мукет кылъёсысь удмуртэ берыктэм пьесаосъя спектакльёс - кельшымон-а, сюлэме лякиськымон-а пото, кыӵе мылкыдын ужаськоды соос бордын?
- Пьеса ке ӟеч, улонлэсь сюлэмшуго палъёссэ, адямиослэсь кусыпъёссэс, пуш дуннезэс зол ке шарая, со котькыӵе кылын гожтэмын мед луоз - таӵе ужъёсыз шумпотыса пумитано. Милемлы шудыны кылдэм сыӵе пьесаос пӧлысь пусйыны кулэ М. Ладолэсь «Огшоры учырзэ», А. Дударевлэсь «Чибориё пиштэ шундызэ». Соосты берыктыса пуктыны дасяз удмурт кыллэсь пуштроссэ умой шӧдӥсь драматург А. Григорьев.
- «Чеберлыко творчествоез азинтон понна одно ик луыны кулэ кичӧлтон». К. С. Станиславскийлэсь та кылъёссэ асьмелы тупамон валэктоно ке?..
- Сцена вылысь искусствомес пушйыны луоз - актёръёслэн, режиссёръёслэн утчаськон мылкыдзы гинэ медаз кысы. Кыӵе ке дась амалъёс ӵектыны татын уг луы. Но ас творчествозэ гажась актёр огинтыяз уз сылы. Солы мед юрттоз режиссёр, кызьы шуиз К. С. Станиславский ик: «Режиссёр понна тужгес кулэез - актёрлэсь луонлыкъёссэ усьтон, солэсь маке борды ӝуалскыса кутскон мылкыдзэ улӟытон».
- «Театр - со учкисьлэн лул-сюлэмыз понна нюръяськон». Таиз веран ласянь мар шуысалыд?
- Театр улонэ пыриськыны кулэ кышкатэк, ӝабыр-ӝабыр. Берло дыре театрлэн данэз кӧнялы ке усиз. Соин, дыр: удмурт драматургия туала улонлэн куронъёсызлэсь бере кыле, нош ми, актёръёс, репертуар бырйыны ум быгатӥське. Вунэтӥськом: мурт малпанэз быдэсъясьёс ӧвӧл ми - ас кожаз улыны быгатӥсь чеберлыкез кылдытӥсьёс. Учкись мурт спектакльысь буш мылкыдын кошке ке, озьыен, со лул-сюлэмыныз ӧз узырмы, выльысь театре лыктэмез уз поты.
- Табере ини егитъёслы оскон. Кызьы малпаськод, соослэн луыны кулэ-а асьсэлэн сценазы?
- Туж умой вылэм, театре лыктэмзы бере ик егитъёслы усьтысалзы ке сыӵе сцена. Отын ужез пуктоно, чот-чот малпаса, планэн чаклам репертуарез лыдэ басьтыса. Ато озьы луэ: спектакльёсын шудо ялан одӥгъёсыз ик. Нош мукетъёсыз - кыкетӥ яке куинетӥ составын, репетициосын ужаса вылысь со роленызы одӥг пол но сцена вылэ уг пото. Уката ик озьы шуыны луэ нылкышно артистъёсмы сярысь, соос уго коллективамы тросгес.
Огъя вераса, егитъёслы кулэ нимысьтыз площадка - отын соос мед быгатозы режиссёръёсын, драматургъёсын но пумиськыны, зэмос бадӟым рольёс бордын но ужаны.
- Улонлэн вошъяськемез туж шӧдӥське театрмы вылын но. Мар верасалыд тон ужан интыедлэн туннэ нуналыз сярысь?
- Театрмылэн туэ вамышъёсыз секытэсь: одӥг но азьлань уд мыны уксётэк. Кызьы пуктод вылӥ дунъямон спектакль, чебер дӥсьёс, декорациос дасяны уг луы ке? Палэнысь режиссёрез ке ӧтёно, нош уксё уг тырмы. Милемлы шуо: асьтэос коньдон поттэ. Соин ик тӥни кивалтӥсьёсмы быръёно луо капчи пьесаосыз, нош режиссёръёс калыкез театре кысконо карисько пӧртэм маскаръяськон-мактаськон амалъёсын. Соиз но вань: уждунзы пичи луэмен, артистъёсмы палэнын, куддыр воксё но мурт удысын уксё поттыны выро.
Театрмес тазьы ёрмытон-ёркатон милемыз, артистъёсыз, туж сюлмаськытэ. Гуртъёсын но, коньдонзы ӧвӧлэн, милемыз мылкыд каремзыя пумитаны уг быгато ни. Нош Ижкарысь учкисьёсмы, азьло вакытэн ӵошатоно ке, азьтэмзэс вормымтэен, «гур вылазы» пуко.
- Удмурт театрез тупатъяны ворсамен, со шуг-секытъёс уката но шӧдӥсько.
- Озьы. Ми али быдэсак «питранъёс вылын». Городын ке - «Спартак», «Ударник», «Удмуртия» кинотеатръёс ӧсъёссэс усьто, но отысь залъёсын, сценаосын ужаны секыт.
Малпасько, таӵе шуге-леке сюремысь потом, ар куспын выльдэм юртмы ӧсъёссэ вӧлъялоз. Учкисьёсмы эшшо но тросгес луозы, уката ик - егитъёс. Мукет сямен луыны но уг быгаты: Удмурт театр уго - со асьме калыклэсь лул узырлыксэ, кылзэ, сямъёссэ-йылолъёссэ возись но вӧлмытӥсь чеберлыко юрт.
Источник:
Красноперов В. Н. Сизьыметӥ тулкымлэн йылаз / В. Н. Красноперов ; записали Анна Евсеева, Татьяна Чернова // Удмурт дунне. - 2007. - 23 марта. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
