Садаева Вероника Алексеевна
Эше мынам – кырӟан[править]
Удмурт Республикаысь но Россия Федерациысь калык артистка Вероника Алексеевна Садаева одӥг пол гинэ монэ ӧз бӧрӟытъя. Ачиз ӧз – солэн героиняосыз. Кызьы вунэтод Катерина Измайловаез, Медеяез. Вал серемез поттӥсьёсыз но – Насьток («Исьток но Насьток»), Одоть («Бызьыны вуэм песяйёс»). Ваньмыз сю пала роль шудэмын. Соос сокем аспӧртэмлыкоесь, макем аспӧртэмлыко луыны быгатэ нылкышно.
- Вероника Алексеевна, тӥ сярысь трос верамын но, гожъямын но ини, юалляськемлэсь акыльтӥды ни, луоз. Озьы ке но газетмес лыдӟисьёс удмурт кизилиос пӧлысь тӥледды ӧз ке адӟе, троссэ ыштозы, малпасько. Учыр но тупаз, ӵапак та нуналъёсы дано лыдпустэс тырмытӥськоды.
- Зэмзэ но, тӥ тани куинетӥез вазиськиды. Нош ик ваньзэ выльысь тодэ ваёно. Но адями дорам лыктэ бере, ужез ке солэн сыӵе, мар карод?
Туж уг яратӥськы, журналистъёс малпанъёсты мыдланьтыса сёто ке. Уг кельшо спектакль сярысь гожтыкузы пуштроссэ гинэ мадисьёс. Алигес одӥгаз газетын серем карыса кадь гожтэмын вал: Удмурт драмтеатрын шутэтскыса пукыны гинэ но нокытын, буфетэз, пе, туж пичи. Кин янгыш театр со калэ вуэмын шуыса? Но таиз пумысен вераськем ик уг поты.
Нош мон сярысь газетэ гожтон пумысен ке, укыр акыльтымон уз луы-а со лыдӟисьлы. Витьтон, витьтон вить, куатьтон аресэз пусъемен тырмыт ӧвӧл-а? Эсэпсэ тодыны кулэ, весь одӥг адями сярысь гожъям акыльтымон луоз, котькуд нунал одӥг кырӟанэз кылзэм сямен ик.
Мар бен мон ачим сярысь вералом на? Ужен возьматоно астэ, уногес спектакльёс шудоно. Адямиослэн монэным тодматскемзы потэ ке, театре мед ветлозы.
- Мон тодэмъя, тӥ ӟуч выжыысь, нош шудӥськоды удмурт театрын.
- Мон ӟуч ӧвӧл, паспортам удмурт гожтэмын. Но папае мынам ӟуч. Куинь аресозь Шаркан районысь Табаньгуртын удмурт бабуэ Анна Мироновна Артаманова (Кельманова) дорын улӥ. Школае мынон азьын мамае бордаз басьтӥз но, ӟучоми. Но бабуэ мамаеным удмурт сямен вераськылӥз, озьы мон кылме ӧй вунэты, вольыт уг ке но вераськиськы.
Нош театр сярысь мон пичи дырысеным малпаськылӥ. Мылкыды вӧзы учыр но тупаз. 10-тӥ класс бере газетысь ялон адӟи, Ленинградысь театральной институтэ удмурт студия люкан сярысь.
- Сыӵе малпан ас кожаз ӧз лыкты ук.
- Пичи классъёсын мон дышетски Селычкаын, нош дас классэз йылпумъяй ни Як.-Бодьяысь шор ёзо школаын. Пичи дырысен ик пыриськылӥ самодеятельносте. Покчи классъёсын дышетскыкум, акробатикая номеръёс но возьматъяй, туж яратылӥ кылбуръёс лыдӟыны. Ас поннам олокыӵе гинэ выжыкылъёс малпалляй но, нюлэскы палэнскыса, шара мадиськылӥ. Туж яратӥсько вал библиотекаысь книга лыдӟыны.
- Анайды ӧз паймы-а улондэс театрен герӟаны турттэмдылы?
- Мылкыдме тодэ вал бере, номыр ӧз шуы. Семьямы милям бадӟым, укмыс нылпи вал, мон – самой бадӟымез. Монэ аслам атае ӧз будэты, но Иван Савельевич Поляковез мон атай шуылӥ. Со монэ будэтӥз, ас пиналъёсызлэсь номырин ӧз висъялля.
- Самой бадӟымез нылпи вал бере, секыт йӧтылӥз, дыр?
- Витетӥ класс бере мон дорын ӧй ик улы, шуыны луоз. Дышетскыны дас куинь километр кеме ветлоно луылӥз. Сюрес ӧвӧл, дэри, лымы, тыбырын котомка. Улӥ квартираын, берло кык арзэ интернатэ интыяськи. Шутэтскон нуналъёс вуо ке, кызьы бертон сярысь сюлмаськоно. Ярам, нялтас машина сюриз ке. Одӥг пол озьы мешокъёс вылэ пуктӥзы. Нырко-гопо сюресэз потыны турттӥсь машинаысь мон лымы вылэ палдӥ. Берло Селычкаын сизьым классъем школа усьтӥзы, эшъёсы гуртэ кылизы, мон огнам ветлӥ Як.-Бодьяе. Ма, анае но шуиз, огдышем сямен отын ик дышетскы ни, пе.
- Анайды туж данъяське, дыр, ук сыӵе нылыныз?
- Нимысьтыз номыр верамез ӧвӧл. Сцена вылысен со монэ ӧз адӟылы. Адямиос шуо, малы, пе, ӧд ветлы, учкы кыӵе кырӟа, эктэ нылыд. Но гуртэ бертӥсько ке, мамае тышкаське монэ: малы ымдурдэ уд буяськы, малы чебер уд дӥсяськиськы? Нош мынам огшоры луэм потэ, ваньмызлэсь куштӥськыса, асме эркын мед шӧдо.
- Вероника Алексеевна, тӥ пичи дырысен ас поннады улыны дышемын, мылкыддэс возьматыны, вераны кылзӥськисьтэк но быгатӥськоды. Асьтэ понна вераськон сямды али но ышымтэ-а?
- Мар ке пӧрасько-а, бакчаям-а ужасько – мон весь вераськисько. Кидысъёсме но вешаса-вешаса кизисько. Коӵышен но, пуныен но вераськисько. Алигес укно уламы шушыос вуизы, кылемзэ палэзез окто-кокчало. Кызьы уд бӧтьырты соосын?
Ас поннам вераськыса ветлэмелы паймыса учкисьёс но вань. Одӥг пол трамвайын вал сыӵе учыр. Ӧйтӧд, оломар вылды малпало адямиос ас понназы. Пичи дыръям но монэ ваньмыз ик уг валало вал, визьтэм но шуылэмзы вань.
Квартираысь потыкум, кырӟаса васькисько. Бускель кышно шуэ, кырӟам куара кылӥське бере, Вероника, ваське. Вождэс эн вае, шуисько. Мар, мар тӥ, кырӟалэ, пе. Кӧня пол аслым шуылӥ – уг кырӟа ни. Ачим ик уг шӧдӥськы нёръяны кутскемме.
- Макем бадӟым инты басьтэ улонады кырӟан?
- Кырӟанэн мон ноку ӧй люкиськылы. Тужгес но яратӥсько кырӟаны урод мылкыды дыръя – удмуртсэ но, ӟучсэ но. Секыт мылкыд соку кырӟанэн ӵош омыре тӧлӟе.
- Ӟучез-а, удмуртэз-а кырӟан золгес сюлэмдэс шунтэ?
- Удмуртэз, дыр, кылъёсыз но, гурез но тупало ке. Туж кельшо «Тӧдьы Кам кузя», «Ӟеч лу шуид но тон кошкид» кырӟанъёс. Ӟучъёсыз пӧлысь сюлэмме вырӟыто война бере кылдэм кырӟанъёс. Туала кырӟанъёс пӧлын но вань умойёсыз.
- Спектакльёсысь кырӟанъёсты туж сюлэмез вырӟыто, огнады но, эшъёсыныды но кырӟаськоды. Но калык пӧлы соос малы ке но уг вӧлмо?
- Радио пыр «Мынам яратонэ татын» спектакльысь кырӟамме кылыса, одӥгез актриса мынэсьтым юа: малы, пе, кырӟанъёсыныды калык пӧлы уд потӥське. Спектакльёсын, кыӵе ке компаниосын мон кырӟало, нош коньдон поттон понна – уг. Кырӟасьёс азе пуктэм куронъёс берло дыре туж улӥе лэзиськизы.
- Нош актёръёс пӧлысь кинэ тӥ тужгес вылӥе пуктӥськоды?
- Туж яратӥсько Алиса Фрейндлихез. Удмурт театрысьтымы кельше Галя Владыкина. Диапазонэз Галялэн туж бадӟым, институт бере ик дась актриса вал ни. Роляз туж зол пыре, ассэ возьматон мылкыдын ӧвӧл. Нош кудӥз рольын нырысь асьсэды возьматыны тыршо, но калленэн-калленэн дышо. Егитъёс но будо – котькудӥзлэн аслаз быгатонлыкез.
- Со быгатонлыкез нуналысь-нуналэ волятыны кулэ. Нош тӥ кызьы сыӵе йӧно но чебер возиськиськоды?
- Котькуд нунал зарядка лэсьтӥсько. Озьы ик нуналлы быдэ кылме волятон бордын ужасько, удмурт но ӟуч кылын кылбуръёс лыдӟисько. Актёрлы ас бордаз ужатэк уг луы, психофизика мед азинскоз, ог интыын медаз сылы. Улоно номыр но уг тодӥськы шуыса, котькуд адямилэсь марзэ ке но басьтыны тыршоно. Ваньзэ тодӥсько ни шуэ ке, адями ассэ ыштэ.
- Сцена вылын улонды калык син азьын. Но яратоно артистэз сярысь адямилэн тросгес тодэмез потэ, семьязэ но вераса.
- Котькудӥзлэн улонэз аслаз, мынам со сярысь тодэме уг поты. Мынам но со аслам медло. Ас пуштэ шарае поттод но, мукет сямен валалозы. Нош сцена – со мукет улон, пуштэ усьтытэк, кызьы отын шудод?
- Озьы ке но семья улонлэн сцена вылаз кинэн тӥ асьтэды адӟиськоды: анай, кузпал, ӟеч пӧраськись?
- Семья улон сярысь ке верано – валтӥсь интыын ог-огдэ валан медло. Куд-ог шекъёсты адӟымтэ улсы но кельтоно. Соосты гинэ синйылтыса возид ке, одӥг кылэ ноку уд вуы. Котькуд адямилэн вань ӟеч палыз но, тырмымтэосыз но.
Егит дыръя малпаськод, мон котьку шонер. Со пыр мон кемалась ортчи ни. Арлыд будэмъя тросэз шоры мукет синмын учкиськод.
Мынам кык пиосы табере бадӟымесь ни. Пичиез вить арзэ улэ ни Венгриын, бадӟымез – Москваын. Анай сяна, мон кык полэс песянай, бадӟымезлэн пиелэн кык нылъёсыз будо. Алёшаен Хасан куспазы туж тупаса уло, бертонзэс но огвакытлы тупато.
Картэ али улэ Селычкаын. Ваньмон дыръёсам ачим но отчы бертӥсько. Анае но татын ик улэ. Яратӥсько губияны, узы-боры бичаны, бакчаме утялтыны. Нош ӟеч пӧраськись асме ӧй шуысал, но ваньмыз ческыт шуыса сиё. Яратӥсько на керттӥськыны.
Вероника Алексеевнаен тодматскеме, соин пумиськеме бере, выльысь пельтӥз кадь пинал дырысьтым ыркыт тӧл – сюлэмез бугыртӥз театрлэсь мӧзмон.
Источник:
Садаева В. А. Эше мынам – кырӟан / В. А. Садаева ; записала Лия Малых // Удмурт дунне. - 2004. - 30 янв. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
