Смирнова Ольга Ильинична

From Воршуд
Jump to navigationJump to search

Улонэ – буёло[edit]

О.И. Смирнова

Ольга Смирнова – Удмурт кун университетысь Кунсьӧр кылъёсъя но литературая институтлэн директорезлэн воштӥсез, кунгож сьӧрысь но Россиысь кылъёслы вазь дышетон дидактикая кафедраысь но Ватсаса тодон-валан сётонъя институтысь психолог. Ольга Ильинична озьы ик Удмурт нылкышно кенешлэн кивалтӥсезлэн воштӥсез. Ижын будыса но дышетскыса, шалтыр мадиське удмурт кылын.

- Льӧль малпанэ вал врач луыны. Но улон мукет пала берытскиз, дышетскыны пыри Удмурт кун университетысь биологияя но химияя факультетэ. Татын ик дышетсконме азьланьтӥ психологе. Оломаин но тунсыкъяськисько вал бере, валай, мыным кельше психология. Со биология но медицина куспын инты басьтэ.

Школаын но, нылпи садын но ужаса вуттӥ. Али студентъёсын эскериськом, кызьы пичиос будо, кызьы но кыӵе амалъёсын соосты дышетоно кылъёс бордын ужаны. Та ужпумъёсты мон валэктыны быгатӥсько аслам опытэя: кызьы мон нылпиосыным выри, кызьы удмуртэз дышетӥмы, кызьы улоназы пыриз ӟуч кыл. Студентъёслы тодон-валан сётӥськод ке, зэмос улонэз басьтыса, соку соослэн тунсыкъяськонзы кылдэ. Юало, мар, пе, кароно, пинал уг кылзӥськы, ӧч каре ке? Шуисько, тросэз потэ соослы вазиськем бордысь. Ноку но уг яра нылпилы али ик лэсьты шуыса вераны. Тӥледлы асьтэлы кельшоз-а сыӵе косъяськем? Нош малы пичи муртлы со яраны кулэ? Кыӵе ке гинэ пример сётӥськод но, студентъёс утчаськыны, малпаськыны кутско, одӥг учырез ик пӧртэм сямен берыкъяса.

Студентъёс тунсыкъясько, яра-а, пе, пиналэз жугыны? Юасько, нош мар понна йӧттыны малпаськоды? Валэкто: со понна, та понна. Милемыз но пичи дыръямы жугизы ук, пе. Тодазы вайыны кутско пӧртэм учыръёсты. Юасько, пайдаез вал-а со жугемъёслэсь? Ӧй вал, шуо. Валамон, весь жуго, куарето ке, пинал дыше солы – пумитъяськыны, ассэ уката алама возьыны кутске. Но луо сыӵе учыръёс, куке жугытэк уг луы. Вӧсь карон понна ӧвӧл, валан мед пыроз шуыса.

- Ольга Ильинична, нош тӥледды жугемзы вань-а?

- Монэ пӧртэм сямен визьнодазы. Странаямы но, семьяын но авторитарной режим вакытэ будӥ бере, анай-атайлэсь кылзӥськытэк уг луы вал. Бадӟымъёслэн нылпиосын сыӵе кивалтэмзы геронтократия шуиське. Алдаськеме понна одӥг-кык пол йӧттэмзы вань ик.

Нош малы алдаське пинал? Ватыны турттэ мар ке но янгыш лэсьтэмзэ. Анай-атаез со сярысь тодӥзы ке, уз ни яратэ, палэнскозы. Алдаса вераз ке, тодытэк кылёзы, номыр со понна уз луы. Пиналлэсь пӧяськемзэ шӧдыса, анай-атайёслы малпаськыны кулэ: мае со ватэ, малэсь кышка.

Алдаськеме шоры али психолог синмын учкисько: мон соку пӧяськемысь дугдӥ, но ӵем дыръя кыӵе ке учыр сярысь вератэк кельтылӥ. Ӧз ке тодэ, юанъёссы но уз кылдэ ук. Табере асьсэос ӝожтӥсько, малы, пе, уд вераськы, шуг-секытъёстэ ас пушкад ватӥськод? Шуисько, кыӵе вань, вань ни, табере мон мукет уг луы. Нылпиез чурыт возьыны турттӥд ке, со ӵем дыръя мукет палыныз берыктӥськоз.

- Тӥ анай-атайды вӧзын улӥськоды. Одӥг корка куинь поколение люкаськемын. Ӵужанай-ӵужатай вӧзын будыса, нылъёсты эркиямын ӧвӧл-а? Оло нош соос азе кык полэс куронъёс пуктэмын?

- Анае Бибинур Шараповна но атае Илья Александрович валало: нуныкайёсты эркияны, нуныяны кулэ, но соин ӵош ик эсэпсэ тодоно. Пиналлэн валанэз луыны кулэ: мае яра лэсьтыны, нош мае – уг. Та ласянь милям нокыӵе споръяськонъёс уг кылдо. Мае мон ачим тодӥсько, валасько, ваньмыз со басьтэмын анаелэсь-атаелэсь. Семьяысьтымы потэм со валатонъёсты, куронъёсты ик мон пиналъёсылэн йыразы, сюлмазы пыртыны турттӥсько.

- Анай-атайёс но нылпиос вискын кылдылӥсь ваче вуонъёс палэнэтӥ ортчизы, шуэмды потэ?

- Инмарлы тау, милям ноку сыӵеез ӧй вал.

Удмуртъёс азьло вакытъёсы бадӟым семьяен улӥзы. Берло дыре югдур воштӥське. Жаль, пиналъёс песятай-песянайёссытэк будо шуыса. Улонэз ортчем арлыдоослэн шӧдон-валанзы нылпиос понна – бадӟым узырлык. Пересьёсын ӵош уг ке уло, пиналъёслэн сюлэмъёсазы лекез капчиенгес пыӵа, улонэз но соос мукет сямен шӧдо. Нош анай юромо палэнтэ ке аслэсьтыз анайзэ, соку нылыз ассэ но кулэ уз кары. Пиналъёс ас пушказы пыӵато ваньзэ, мае адӟо семьяысь. Мукет ужпум, куке пересьёс йӧнтэмесь, пиналлы соос номыр ӟечсэ сётыны уг быгато. Соку нимаз ик улыны турттоно.

Али тросэз нылпиос семьяын огназы будо. Пересьёссы вань ке, соос котыр ласянь внукъёссыя карисько. Татын нош ик малпаськыны кулэ: кузяз ветлыса, нылпи улонлэсь радзэ валамысь уз дугды меда, ассэ гинэ уз адӟы-а?

- Асьтэ сямен ик, кыксы но нылъёсты тодо удмурт кылэз.

- Куинь арескозь мон удмурт сямен гинэ вераськисько вал. Садике мынӥ, ӟуч кылэз тодытэк. Одӥг арня ӵоже бӧрдӥ, номыре валатэк. Мар карод, собере дыши ваньмыз сямен вераськыны. Нылъёсмы но удмурт кылэз тодо.

- Тросэз гуртоос пиналъёссэс анай кыллэсь палэнтыны туртто, ӟуч сямен ӟечгес мед вераськозы, пе.

- Удмурт кылэз дышетытэк кыльысал ке, улонэ ӝынылы палдурес луысал. Али мынам улонам буёлэз тросгес. Студентъёслы лекциос лыдӟисько ӟуч кылын. Туж абдрало удмурт кылэз тодэмелы. Ӟуч кылэз ӟеч валан но вераськыны быгатон понна нылпиез вордскем кылызлэсь люкыны кулэ ӧвӧл, лыдӟиськыны дышетоно. Ӟуч книгаос юрттозы будыны, азинскыны. Мон туж шудо, вӧзам визьмо атае вал. Со каньылак пыртӥз монэ лыдӟиськон дуннее. Кӧня книгае вал мынам пичи дыръям!

Дорам вазиськисьёслы кык кылын юрттэт сётыны быгатӥсько. Адямилы анай кылыныз вазиськиськод ке, пушказ тымиськем шуг-секытъёссэ со трослы капчиенгес усьтэ.

- Соин но калык тӥледлы вазиське. Но котькудӥз доры уд вуттӥськы ук. Кин доры мыноз гуртысь адями аслаз сюлэм висёнъёсыныз?

- Али пӧртэм амалъёс вань аслыд ачид юрттыны. Психолог доры мыныны луонлык ӧвӧл ке, вазиськыны луэ оскон телефонэ. Интернет пыр но юрттэт сётозы. Утчаськытэк номыр уз лыкты.

Бен, калык психологъёслы кулэяське. Та сярысь верало Удмурт нылкышно кенешен радъям пумиськонъёс но. Школаосын психологъёслы нимаз ставкаос уг тырмо, уждун туж ӧжыт. Югдур тужгес но секыт гуртъёсын. Калыкен пумиськонъёс ортчытъяса, Удмурт нылкышно кенеш ӟеч уж лэсьтэ. Но со огдырлы радъям уж, кӧнялы тырмоз проектъя висъям уксё. Соин ик луыны кулэ коньдонэн юнматэм нимысьтыз программа, кудӥз луонлык сётоз пӧртэм ёросъёсы потаны.

Котькуд ужрадлэн аслаз дырыз. Нимаз психологической служба кылдытонозь мон ӧй буды на, шӧдске. Но кин тодэ, кытчы вуттоз улон ӧре. Шуо ук, мар ке сярысь малпаськиськод ке, со быдэсмыны быгатоз.

- Психологъёслы ӵемысь асьсэлы но юрттэт кулэ бордазы биниськем кырсьлэсь но улоназы кылдэм шуг-секытъёслэсь утиськон понна. Кытысь юрттэт басьтӥськоды?

- Стресс шуонъёс палэнтӥ уг ортчо. Отысь пӧртэм сямен потыны луэ. Дышетски бере адямиослы юрттэт сётыны, валасько мар мыным аслым кулэ сояз яке таяз учыре. Куддыр буйгатскыны юрттэ кыӵе ке уж яке творчество пӧлы выён, куд-ог учыре ураметӥ поръян, эшъёсын пукон-пумиськон пайдаё луэ. Бассейнын уян, пӧсь мунчое пырон но мылкыдэз небӟытэ.

Куд-ог дыръя суредаськеме потэ. Кин тодэ, оло, пересьмыса суредаськыны кутско – примитивной шуон искусство бордаз кыскоз…

- Паймонэз ӧвӧл, таиз но быгатонды усьтӥськиз ке. Мон тодэмъя, кырӟаны пӧрмытӥськоды на.

- Инмар сётӥз крезьгурез кылыны но валаны быгатонлык, кырӟаны пӧртэм куараен пӧрмытӥсько. Но куарае сцена вылэ потымон ӧвӧл, калык сьӧры нюж нёръясько. Дасэтӥ классын дышетскыкум, «Ижмаш» культура юртысь «Тюрагай» ансамбле ветлӥ. Кырӟаны но, эктыны но вуттӥськи. Калык азе кышкатэк потыны быгатон – со но улыны дышетскон. Университетэ пыри но быдэсак дышетскон пӧлы выйи. Одӥг дыре «Эктон коркае» ветлӥ. Со но асме эскерон вал.

Улон туж мудрон. Планэ одӥг вал, улон воксё мукет ӧръя нуиз. Кыӵе ке интые пыд ачиз вуттэ, нош кытчы ке уд вуиськы. Шуо, ваньмыз вылӥысен чакламын. Но, малпасько, адями улон ӧрзэ куддыръя ачиз но воштыны быгатэ. Нокинлы алама эн кар – тыныд но алама уз каре, астэ адями кадь возь, анай-атайдэ, нылпидэ яраты. Соку улон ваньзэ интыяз пуктоз: шуг ке вал, капчи луоз. Адямилы чиданы быгатэмезлэсь трос уг сётӥськы.


Источник:

Смирнова О. И. Улонэ – буёло / О. И. Смирнова ; записала Лия Малых // Удмурт дунне. - 2012. - 11 марта. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"