Галиханов Касим Шарифьянович

Материал из Воршуда
Перейти к навигацииПерейти к поиску

Адямиос дас ӵого, мон - огпол [править]

Галиханов К. Ш.

Касим Шарифьянович Галиханов – архитектор, дизайнер, суредась, скульптор, график. Вордӥськиз Башкортостанысь Алтау (Алтаево) гуртын 1959-тӥ арын. Йылпумъяз Новосибирскысь лэсьтӥськонлы инженеръёс дасян (инженерно-строительной) институтысь архитектурая факультетэз. Россиысь архитекторъёслэн огазеяськонзылэн ёзмуртэз, Удмуртиысь, Россиысь, дуннеысь архитектурая конкурсъёслэн трос полэс лауреатсы.

- Касим Шарифьянович, суредан искусствоез тодӥсьтэм муртлы тӥлесьтыд ужъёстэс валаны шуг - соос реализмлэсь кыдёкын.

- Бен, мон ужасько пусъёсын, символъёсын. Адями – Музъем – Инсьӧр. Тӥни кыӵе кусыпъёсты возьматэме потэ суредъёсам. Валамон ини, татын мыным юрттэ удмурт луэме, инкуазез шӧдонэ. Мон – язычник. Солэсь уг возьдаськиськы, данъяськисько. Урод шат, адями улосэн огкылысь улэ ке, сое яратэ ке, со пыр ассэ вала-адӟе ке.

- Тӥляд одӥгез валтӥсез проектты но сӥземын Удмурт вӧсьлы.

- Бен. Жаль, со улонэ ӧз пыӵа. Укмыстонэтӥ аръёслэн кутсконазы Ижын кылдӥз Удмурт вӧсь. Кивалтӥсе бырйим ужбергатӥсез Владислав Якуповез. Котырамы пумен тросгес калык люкаськиз. Пӧламы вал трос тодмо удмурт адямиос. Кенешим Ижын удмурт вӧсяськон инты пуктыны. Со малпанлы тросэз дурбасьтӥзы, город администрация инты но сётыны пумит ӧз луы – висъязы Культбазаысь Кызьпу арамаез.

Мон мылысь-кыдысь басьтӥськи проект дасян борды. Отчы вань кужымме но шӧдонме понӥ. Вӧсяськон интылэн валтӥсь тодметэз - 77 метр ӝуждалаем Ин юбо. Малы юбо? Со котыртӥ берга улон. Со вань калыкез котыраз огазея-бине. Уже ваньмызлы туж кельшиз. Табере сое быдэстоно гинэ на. Но кызьы? Коньдон ӧвӧл. Валамон ини, кивалтӥсьёс вӧсяськон юртлы ноку но коньдон уз висъялэ. Шуизы: потэ ке, пуктэ, ми ум люкетэ. Коньдон курыса вазиським калыклы. Вазиськизы Башкортостанысь Алтау гуртысь удмуртъёс гинэ. Вӧсяськон юрт пуктыны 200 манет сяна люканы ӧм быгатэ, узыр удмуртъёс ӧз сюре. Уг тодӥськы, куке-соку, оло, Вӧсь куала ӝутӥськоз ик.

- Бумага вылэ озьы ик кылиз кадь эшшо огез синмаськымон ужды – Удмурт театрлы проектты…

- Таиз уката жаль. Соя нимысьтыз конкурс ялӥзы. Мынам проектэ отын устоеныз лыдъямын. Азьвыл чакламъя мэрия вадьсы выль юрт ӝутӥськыны кулэ вал. Но пӧртэм мугъёсъя со малпанлэсь куштӥськизы, тупатъяны ӧдъязы ализэ театрез. Но мон оскисько, куке-соку Ижын луоз ик выль Удмурт театрлы выль юрт, оло, мон улытозям ик. Проектъя отын чакламын быдэс комплекс. Театрлэн юртэз сяна, котыраз интыяськыны кулэ вал Вӧсь куала но удмурт мифологилы сӥзем музей, калык киужъёсын пичи юртъёс-магазинъёс, удмурт сиён-юонэн сиськонни, сад.

- Зэмзэ но синмаськымон, но улонэ пыӵам проектъёс быдэсмымтэосызлэсь золгес шумпотто, дыр.

- Сыӵеосыз но ӧжыт ӧвӧл. Кылсярысь, мынам проектэя лэсьтэмын Ашальчи Окилы сӥзем сквер (Грак ёрос), Удмурт университетлэн кыкетӥ корпусэз азьысь А. С. Пушкинлы сӥзем сквер, Воткаысь но Можгалась улон юртъёс, Уваысь спортъя база, Глазысь нылпи ваён юрт но трос мукетыз. Али Ижын лэсьтӥське Эшъяськон юрт. Шонерзэ вераса, вуж юртлы выль шӧм пыртӥськом. Азьвыл чакламея мон сое мукетгес малпай вал, но куризы классикалы матэктытыны.

- Тӥледлы кельше-а городмылэн тусыз?

- Тросэз малы ке пыкыло архитекторъёсты, но ваньмыз потэ ук вылӥысь. Кылсярысь, Хрущёв вакытэ шуэмын вал: вакчи дыр ӵоже тросгес пуктоно улон юртъёс. Валамон ини, дунтэмгес мед усёз шуыса, проект бордын но нокин йырзэ ӧз тия: кык-куинь гож лэсьтӥзы но - ярам, макем огшорыгес, сокем дунтэмгес. Со понна тросгес адями квартира басьтоз. Нош кельшоз-а, уз-а, мар пӧртэмез - таизлы мед шумпотоз. Жаляса верано луэ, ӵемысь али но озьыгес ик луыса кошке. Улон интылы кулэяськисьёс трос, юрт ӝутӥсь фирмаос проектировщикъёсты дыртыто, нош коньдонзэс жаляло. Кин-о, копейкаен ужаса, шедевр кылдытоз?

- Со понна тӥляд улон коркады котькинлэсь висъяське, дыр.

- Мон, кызьы шуод ай, сапегтэк пукись сапег кышъясь мактал: улӥсько сыӵе ик огшоры «хрущёвкаын».

- Уг оскы, тӥ, солэсь борддоръёссэ кесятэк, мазэ ке вошъятэк улӥськоды шуыса.

- Мынам утялскыны гинэ но дыры уг тырмы, кышно весь куаретэ, дорез мастерскойлы пӧрмытӥд ни шуыса. Корка пуктон сярысь котькуд пиосмурт малпаське, валамон. Пуктӥ ке, мон сое туж огшоры, эсэпсэ валаса лэсьто, атайлэн сямен. Улон корка мултэс чеберъямын ке, гольтрес адӟиське, со сьӧры шунытэз ыше-толӟе.

- Тӥ котьку туж шуныт вераськоды атайды сярысь.

- Милемлы туж удалтӥз анай-атаен. Ми, тямыс нылпи, ваньмы соослы йыбырттыны дась. Мингавир анаймы туж лякыт но визьмо кышномурт вал. Солэн туж потэ вылэм дышетӥсь луэмез, но сюратаез чурытаськыса ньыль класслэсь трос дышетскыны лэзьымтэ. Со кӧтӝожзэ весь вералляз, милемыз ачиз понна но дышетскыны косылӥз. Атаймы Шэри (Шарифьян) - милям Инмармы но, Дышетӥсьмы но. Сое гуртоос но туж гажаллязы. Атай туж чебер, йӧно, визьмо, кибашлы вал. Киосыз – зарни. Мар борды гинэ уг йӧтскы, ваньмыз улӟе, выжыкыллы пӧрме. Корка ӝутыны бускель гуртъёсысь бигеръёс но ӧтчаллязы. Улытозям та пельпумъёс вылын быдэс гурт пуктӥ, дыр, шуэ вал. Ваньзэ пӧрмытъяз. Пичи дыръямы ми туж паймыса учкылӥм чиньыосыз шоры: соос туж кузесь, шаплыесь. Куинь чиньыеныз быдэс черык йӧлэз ӝутыса юылӥз. Нош суредаськылӥз кыӵе! Тужгес но яратылӥз пу вӧлыны, наличникъёс лэсьтыны. Соос туж огшорыесь вал, мултэс сяськаостэк, бабляостэк, но адямиос одно атаез лэсьтыны курылӥзы. Со эсэпсэ валалляз. Котькуд пуссэ малпаса пуктылӥз. Калык дас пол ӵоге, мон - огпол, шуэ вал атай. Дыртыса суп-сап ужамез ӧз гажалля.

Быгатонлыкъёсыз выжизы нылпиосызлы. Ми ваньмы пичи дыръямы ик суредаськыны, вӧлӥськыны яратылӥм. Азбар тыр шелеп луэ вал. Песянаймылэн киысьтымы пулъёсты но кыскамез вань: юнме, пе, арам кариськоды. Но ми ӧм кылзӥськылэ, атаймы дурбасьтылӥз уго. Озьы мон но Толямы асьмеды быдэсак та ужлы сӥзим. Выны асьме гуртын ик улэ, школаын суредаськонлы дышетэ, гуртысь Вӧсь кузё луэ. Кадим но (Удмурт Республикаысь дано артист, шудэ Удмурт театрын) архитектор луоно вал, мон сюрессэ воштӥ.

-?

- Школазэ йылпумъяку, со тодӥз ни вал архитекторе мынонзэ. Озьы туж каньылэн экзаменъёссэ сётӥз Свердловскысь архитектурая институтэ. Кылиз на институтэ пыртэмзы сярысь приказэз гинэ возьманы. Ӵап со вакытэ мон кылӥ, удмурт нылъёсты-пиосты Москваысь Театр искусствоосъя кун институтэ келяны дасяськемзы сярысь. Соку Ижын ужасько ни вал. Юалляськи Егор Загребинлэсь. Со шуэ: вай сое татчы, милемлы ӝужыт, чебер пиос туж кулэ. Мон, чик малпаськытэк, самолётэ пукси но Кадим доры лоби. Кема курадӟиз, но кылзӥськиз ик. Свердловскысь вузэ экзаменъёссэ «витьёслы» сётӥз вал бере, татын сое творчествоя конкурсын гинэ эскерыса кутӥзы кадь.

Зэм, сыӵе вамыш лэсьтэме понна мон бӧрысь трос пол куректылӥ. Театрын Кадимлэн мылкыдыз ӵем вошъяськылӥз. Мон соку, шораз учкыса, асме пыкылӥ: та туж зол суредась яке архитектор луоно вал, дыр. Со али но ӵем суредаське. Сюлэмы буйгаз сое режиссёрез сямен адӟеме бере гинэ. Тодӥськоды, луоз, кӧня ке ар талэсь азьло Удмурт театр пуктӥз бразиль драматурглэн Гильерми Фигейредулэн «Ӟичы но виноград» пьесаезъя «Эзоп» спектакль. Кадим Галиханов отын режиссёр но, актёр но вал. Ксанфез шудӥсь кыкез ик артист премьера азьын висьыны усе, озьы вынылы ролез ас вылаз басьтоно луиз. Синмаськымон пӧрмиз кадь. Та спектаклез мынам Москваын но адӟылэме вань, но Кадимлэн пуктэмез кужмогес потӥз. Секыт зӥбетлэсь мозмон но эрикез утчан тема удмуртъёслы туж матын, соин, дыр.

- Мукетъёсызлэн улонэнызы озьы ӧд кузёяське ни-а?

- Чутрак ӧй, но ог-огмес весь лӧпкытъям дышетскыны, вылӥ тодон-валан басьтыны. Анай-атай институтэ келяса ӧз ветлэ ук, со уж яке мон, яке Кадим вылын вал. Маринамы Свердловскысь художествоосъя колледже пырыку, сьӧраз Кадим мынӥз. Сузэрмылэн малы ке та удысъя дышетскыны мылкыдыз туж ӧй вал, ваменъяськыны кутскем. Кадим солы котьмар басьто шуэм бере гинэ соглаш кариськем. Джинс но басьтод-а, пе. Соку со туж уг но шедьы вал ук ай. Котьмар! Быдэс воз! Марина понна Кадим экзаменын но суредаськыса вуттэм. Дышетӥсь аудиториын весь уг пукы ук, профессор тамак кыскон дыръя классэ Кадим пырем но сузэрлэсь суредзэ тупатъям. Абитуриентъёс малпаллям, кин ке мукет дышетӥсь озьы индылэ. Озьы Маринамы дизайнер-педагог луиз. Со но куинь мукетъёсыз сузэръёсмы Галина, Ирина но Дарья Свердловскын уло. Ваньмыз вылӥ тодон-валанэн: экономист, врач, юрист. Альфирамы Янаулын, бухгалтер. Туж данъяськисько, свердловскъёсмы отын «Эгес» нимаськись удмурт бӧляке пырисько. Сузэрмы Марина Ягуткина со огазеяськонэн кивалтэ. Солы туж мыло-кыдо юрттӥське кузпалыз Ринат Рахимзянов.

Мукетъёсыз но сузэръёсмы кузпалъёсынызы ӵош вань удмурт ужрадъёсы семьяосынызы пырисько, сьӧразы тодмооссэс, эшъёссэс ӧтё. Эмеспиосмы Николай Веретенников но Сергей Мирвода удмуртъёс ӧвӧл ке но, милесьтым выжыосмес туж сӥлы каро, нылпиоссэс удмурт кыллы дышето. Мылкыд карисьёс понна табере Вылӥ Пышма городын арня нуналъёсы ужась школа но усьтӥзы ни. Удмурт кылэз но литератураез дышето, удмуртъёслэн историенызы, культураенызы тодматско, суредасько но мукет. Отчы ветло нылпиос но, арлыдоос но. Палэнын улэмысьтызы ӧпкельыса уг уло, огинын возисько. Гужем тани Гербер ортчытӥллям, Свердловск улосысь вить городысь удмуртъёс люкаськылӥллям. Куазен, пе, ӧзгес ке но удалты, вить час ӵоже зор улын шулдыръяським, кырӟам, одӥг кудӟем мурт но ӧй вал.

Пӧртэм интыосын улӥськом ке но, семья кусыпъёсмес ноку ум ыштӥське, ог-огмылы юрттӥськом. Тани атаймес сӥлы карыса кылдытӥм Галиханов дышетӥсьёслэсь «Шэри» выжы (династия) огазеяськонзэс. Со кыл вылын гинэ ӧвӧл, ог-огмы доры мукет городэ мыныса, ми тыро ӝӧк сьӧрын гинэ ум пукиське, ужан интыосамы мынӥськом, отысь калык понна выставкаос радъяськом, дышетскись пиналъёсын пумиськылӥськом. Пӧламы юристмы но вань бере, огазеяськонмес документъёс пыр юнматыны ӧдъяськом.

- Берло дыре тӥ трос дыр висъяськоды пиналъёсты дышетонлы: кылдытӥды «Кузьыликар» студия, гужем визьнодаськоды гуртысь нылъёсты-пиосты. Кык арня ӵоже марлы дышетыса вуттӥськоды: суредлы-а, архитектуралы-а, дизайнлы-а?

- Малпаськыны. Эгесысь потыны. Одӥг педагог но пиналэз кык арня ӵоже искусстволы дышетыны уз быгаты (пинал воксё вундеркинд ке ӧвӧл), но та вакыт ӵоже луэ сое ӧжытак ке но усьтыны. Пиналлэн пуштросэз узыр, малпаськон ӧрез тунсыко, но сое кыре поттыны уг дӥсьты. Со «удмурт сямен» малпаське: мон мыдлань ке верай, шонер ке ӧвӧл? Озьы аслэсьтыз туж тунсыко, калыклэсь пӧртэм малпанъёссэ кужмысь соге. Пиналлэн визьмыз мӧйыосын, анай-атайёсын, дышетӥсьёсын йырин нуналысь нуналэ пуме.

Туж тунсыко сое чакланы нырысетӥ урокъёсысен ик. Тани, шуом, ӧжытак юскиське но, киыз амалтэк кыстӥське яркыт буёл пала, со пиш-пиш вож яке синэз кыскись лемлет макеосын суреданы ӧдъя. Ай кызьы ке куспазы укшатэ. Сыӵе дыръя паймыса шораз учкыны шедьтӥд ке – всё! Соку ик куалектоз, малпалоз: мон маке мыдлань лэсьтӥ, сьӧд-тӧдьы, лыз-пурысь буёлъёс ик умой, дыр. Озьы ик скульптураосын, символъёсын. Со дышемын ваньзэ огшоры карыны, маке тунсыкозэ, ноку вылымтэзэ кылдытон – кышкыт. Нош ӵап образъёс, символъёс, пусъёс пыр усьтӥське ук адямилэн малпаськон философиез. Дуннеез адӟонэз-валанэз, фантазиез.

Мон тодӥсько, тросэз дышетэм пиналъёсы улоназы архитектураез уз быръе, но йыразы пыраклы кылёз чеберез валаны дышетскон, паймытӥсь арбериосын тунсыкъяськон. Туж умой луысал, городамы, республикаямы пиналъёс понна нимысьтыз сыӵе студия усьтӥськысал ке, но… Бигер общество тани монэ кемалась ӧте ни нылпиосын ужаны. Нош «Кузьыликар» ужа огдыре гинэ. Озьы но калыкез паймытъяськом: Удмуртиысь пинал архитекторъёсты ушъяло Москваын, Таллинын, мукет интыосын.

Москваысь вылӥ специалистъёс мынэсьтым юало: кызьы ужано? Мон шуисько: нылпиез гажаса, сое асэныд оградэ пуктыса. Суредаськонын «ки пуктон» азьпал интыын овӧл, нырысь ик мед луоз адямилэн идеяез, шӧдонэз, нош суреданы быгатон пумен вуоз.

- «Кузьыликарын» сяна, тӥ кизилиосты ӝуатъяськоды на Пичи Пургалан.

- «Пурга кизилиосын» вырон мыным туж кельше, тау карыны кулэ роноен кивалтӥсьлы Екатерина Зубиновалы, та юртлэн кивалтӥсезлы Валентина Панфиловалы но методистлы Ольга Гагариналы. Котькуд ёросэд пиналъёс сярысь озьы сюлмаськысал ке... Пиналъёсты ми отын дышетӥськом Толя пиеным ӵош, со ИжГТУ-ысь студент, ӝоген инженер-архитектор луоз. Арнялы быдэ отчы тэк ум ветлӥське, малпасько, ужмылэн емышез син азьын. Арлы быдэ Россиын ортчылӥсь конкурсъёсын вормылӥськом, выставкаос радъялляськом.

Дышетскем нылпиосмы быръем удыссыя капчиен пыро вузэ. Берло кык арзэ Пургалась пинал архитекторъёс Пензаын ортчылӥсь архитектурая олимпиадаысь дипломъёсын бертылӥзы. Ярослав Афиногенов «композиция» номинацияя 2-тӥ степенё диплом басьтӥз, али ИжГТУ-ын дышетске, инженер-архитектор луоз. «Пурга кизилиослэн» адӟытонзы радъямын вал туэ Екатеринбургын. Зодчествоя конкурсъёсы арлы быдэ пыриськыны тыршиськом. Туэ Москваын ортчем «Зодчество-2007» конкурсын Пичи Пургалась Михаил Леонтьев вормисе потӥз, принтерен цифровой фотоаппарат утӥз. Озьы ик ӟечен пусъемын Вуж Мӧньялась Марина Михайлова, солы дуно энциклопедия кузьмазы. Ӵош дышетскись эшъёссы пиналъёс понна туж шумпотӥзы, вормон сярысь ивортэм бере быдэс школа гудыртӥз кадь, «Ура!» кесясько. Таяз учыре сыӵе вормонлы мон уката шумпотӥсько, малы ке шуоно со пиелэн дышетскисьёсыз. Туж данъяськисько Толикеным - со мынэсьтым ужме азинтэ. Туэ фестивальлы йылпумъянъёс лэсьтыку, жюри шуиз: пиез атайзэ ортче ни. Со озьы ик луыны кулэ.

- Нош нылды?

- Нылаш анаезъя мынӥз. Ольга кузпалы Удмурт кун филармониысь «Avis cantu» капеллаын кырӟа, со республикаысьтымы дано артистка. Нылмес со ик визьнодаз, кырӟаны быгатон сяна, адямилэн профессиез луыны кулэ на шуыса. Куарадэ ыштӥд-марад ке, мар карод? Озьы Юля крезьгуръя училищее мынӥз, дирижёре дышетске, но ваньмон дыръяз весь кырӟа.

- Касим Шарифьянович, Кам тупалась удмуртъёс туж кужмоесь выжыосынызы, удмуртлыкенызы. Тани тӥляд но, башкир удмуртъёслэн, Ижын бӧлякты вань. Со туж синмаськымон. Но татчы лыктыса, соос малы ке интыысь удмуртъёсты пыкылыны, ултӥяны выро кадь, асьсэды вылэгес пукто. Яке мон янгышасько-а?

- Шонер ӧвӧл со. Одӥг ласянь, Башкириысь удмуртъёслэн лул кужымзы но визь-нодзы вашкала удмурт вӧсь дуннеен тулъямын, мукет ласянь, бигер, башкырт калык вӧзын будэмын бере, улон-вылонмес амалтэк соослэн вамышъёсынызы мертаськом. Татысь удмуртъёслы уг кельшы, дыр, сэзьгес, пезьгытгес луэммы, но со урод сям ӧвӧл ук. Бускельёсмы адӟем карымон тыршо асьсэ калыксы понна. Сюлэм вӧсь луэ, удмурт ассэ ачиз яке огвыжыысь адямизэ ултӥя ке. Трос пол чакламе вань, удмурт адями ассэ уг дунъя, пӧрмостэмен лыдъя, кулэтэм интыын возьдаське, дӥсьтӥсьтэм луэ, нош кытын ке ассэ укыр йӧнтэм возе. Паймытэ, малы удмурт гуртъёсын пиналъёссэс анай кылзылы уг дышето, анай-атайёс, быгато-а, уг-а, нуныоссэс шенгыль-пенгыль ӟуч сямен визьнодало. Озьы пинал пичиысен уг вала, кудпала кариськыны. Быгатоз-а сыӵе мурт будыса тӧллы пумит кык пыдыз вылын йыг-йыг сылыны? Анай кыл но калык йылолъёс дуннеез валанын тужгес бадӟым инъет луо. Ми, башкир музъемысь вуэмъёс, гажаськом вордскем шаермес но, татын улӥсь калыкез но, огъя культурамес яратӥськом, вормонъёсмылы дэмен шумпотӥськом. Дунъяськом котькуд удмурт адямиез, котькытын со мед улоз. Асьмеос туж ӧжыт, ог-огмы борды возиськыса улыны кулэ. Тросэз татчы вуэмын асьме калыкмылы дурбасьтыны, культурамес ӝутыны-узырмытыны, сое мукет калыкъёс пӧлы но пыӵатыны. Нимазъяськыса улӥм ке, асьмеос туж ӝог пашмом. Соин ик асьмелы эшъяськыса, валче улыны кулэ.

Источник:

Галиханов К. Ш. Адямиос дас ӵого, мон - огпол / К. Ш. Галиханов ; записала З. Рябинина // Удмурт дунне. - 2007. - 23 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"