Рябина Ольга Владимировна

From Воршуд
Jump to navigationJump to search

Мыным юрттэ Алнаш омыр…[edit]

128-6.jpg

Ольга Рябинаез атаез косэ вал агрономе дышетскыны. Нылыз бубизлэсь ӧз кылзӥськы, аслэсьтыз кариз но пыриз Удмурт кун университетысь удмурт филология факультетэ. Та вамышез сярысь Ольга Владимировна туннэ но чик уг жаля. 1977-тӥ арысен ини со Алнаш ёросысь Азамат школаын тырше, нылпиосты тодон-валан дуннее валтэ. Ольга Владимировна данъямын «Калыкез дышетон удысысь отличник» гадьпусэн. 2000-тӥ арын луиз Удмурт Республикаысь дышетон удысысь дано ужась. 2007-тӥ арын Россиысь устоосыз дышетӥсьёс пӧлы шедӥз.

- Кызлэн ӵыжинэз выжыяз ик усе, шуо калыкын. Соглаш-а тӥ соин? Мар верасалды выжыды сярысь?

— Вордӥськем интые — Ува ёросысь Косойгурт. Огшоры крестьян семьяын быдэсми бере, асме ноку дано выжыысь шуыны ӧй дӥсьтылы. Но анайме но атайме гуртын даноос пӧлы пыртылӥзы. Дас нылпи вордыса но, анаелэсь Капитолина Петровналэсь дорын пукемзэ уг тодӥськы, со весь колхоз ужъёсы потаз.

Атае Владимир Ефремович, армие ветлыса, Ижысь гурт хозяйствоя техникумын дышетскем (соку институт вылымтэ на). Солэсь ӟеч агроном пӧрмиз. Матысь адямиосыз сое Лади, Ладьмер шуылӥзы, мукетъёслы со котьку Ефремыч вал. Ми но атаймылэсь адӟем карылӥмы. Туж данъяськиськом вал, концертъёс дыръя гурт калыклы атае лекциос лыдӟылыку. Ваньзы сое туж сак кылзылӥзы. Дорын ужаны со шер сюрылӥз, соин ик пудо утялтон, сиён пӧзьтон анае но мемеймы вылынгес вал. Атае Свердловскысь вылӥ партийной школаез но пырпотӥз. Пичи дыръям мон солэсь агрономын ужамзэ чик уг тодӥськы ни, быдэс улонзэ Ува ёросысь Свердлов нимо но 21-тӥ партсъезд нимо колхозъёсын парторг вал.

Анайме малпасько ке, туала улонэз чакласа, туж жалясько сое. Ож вакытэ нюлэс коранын тыршиз, собере колхозын ужаз. Киосыныз посыса, кӧня воз дӥськут миськиз меда? Нош толалтэ гольык киосыныз люкмесын гылъяськылӥз. Ми, тэшкылиос, солы юрттыны тыршим, миськем дӥськутсэ доре вайылӥм. Со понна но кыӵе шумпотылӥз мусо анаймы! Вазь ӵукна султыса, трос кышъяськиз, керттӥськиз, олоку изьыны выдылӥз. Ярам, ми вӧзын ик улӥз атаелэн анаез. Ми сое «меме» шуылӥмы. Туж визьмо, котьмае валась пересь вал со…

Анае дасэтӥ нылпизэ вайыкуз, куинез пиналъёсыз вылӥ тодон-валан басьто ни вал. Нош атаймы меӵак ӵогиз: «Ваньдэс дышетом». Анаен атай куспазы туж тупаса улӥзы. Ноку ӧй кылылы урод вераськемзэс, милемлы но ӟеч сямъёс пыӵатыны быгатӥзы. Огез жаль: быдэ вуэм нылпиоссылэн азинсконъёссы понна шумпотыны но данъяськыны соослы ӧз кылды.

- Пичи дырысь учыр сярысь сочинение гожтыны косысалзы ке, мае тодады вайысалды?

— Атаелэсь визьмамзэ ноку уг вунэты. Огпол эшеным споръяським. Кенешим: кин ӧз вормы, солы одӥг килограмм карамель басьтоно луоз. Эше шудонэз келяз но кылзэ быдэстӥз. Мон шумпотыса дорам ческыт саламен бертӥ. Атае ӵапак доре тупаз. Саламме синйылтыса, юаз: кытысь сомында кампет шедьтӥд? Лӧптэм мылкыдын ивортӥ вормонэ сярысь. Нош атае кисыысьтыз одӥг манетсэ поттӥз но мыным мычиз: ме, басьты ческыт сиён, нош тазэ берен эшедлы берыкты. Со шер тышкаськылӥз. Тазьы дышетэмез быдэс улонам вунонтэм кылиз. Со дырысен валай: адями капчиезлы дышыны кулэ ӧвӧл.

- Малы дышетӥсь луиды?

— Котькуд тэшкыли синмаськыса учкылэ, дыр, нырысетӥ дышетӥсез шоры. Нырысетӥ визьнодасе Анисия Егоровна Нефёдова мыным туж чебер, лякыт, визьмо потэ вал. Нош бадӟым классъёсы вуыса, туж-туж синмаськи удмурт кылъя но литературая дышетӥселы Юлия Терентьевна Туйманцевалы. Со тодмо луиз на нылпиослы но дышетӥсьёслы гожтэм «Жильыртӥсь ошмес» книгаеныз. Дышетӥсь луон сярысь малпанэ сюлэм пыдсам гинэ улӥз. Та уж мыным кыдёкысь сузёнтэм кизили кадь потэ вал…

Школаез йылпумъякум, атае шуиз: агрономе мынод. Азьло анай-атайлэсь одно кылзӥськоно вал. Ас поннам малпай: ачиз агрономлэсь ужзэ рос-прос шӧмъяса ӧз вуы бере, соин монэ та удысын адӟемез потэ, дыр… Но атаелэн верамезъя чик но ӧз луы. Вася агаелэн классаз востэм нылаш Людмила Кутянова (бӧрысь луиз тодмо кылбурчи) дышетскиз. Тодӥ, со, пе, Удмурт кун университетэ пырем, удмурт кылъя дышетӥсь луыны малпа. Удмурт факультет сярысь рос-прос тодон понна мон солы гожтэт лэзи. Ӝоген иворез вуиз. Люда пыр-поч валэктэм, кызьы пыроно университетэ. Экзаменъёслы рос-прос дасяськи но капчиен шеди студентъёслэн радазы. Удмурт отделениын дышетскон аръёсы выжыкылын кадь ортчизы. Ваньмы гуртысь нылъёс но пиос, ог-огмылэсь дӥськутэн гинэ но ӧм висъяськылэ. Улӥмы одӥг семья кадь. Университетын мон кылъя специализациез бырйи. Али ке но туж кельшо кылъя урокъёс. Нош группаысьтымы эшъёсы сярысь верано ке, Галина Шушакова, Людмила Зверева (Кириллова) тодосчиос луизы, Владимир Алашеев — тележурналист…

Практикае кык полаз ик ортчиз Ува ёросысь Поршур-Тукля школаын. Туж синмаськи татысь визьнодасьлы, Россия Федерациысь дано дышетӥсьлы Калиста Петровна Гребиналы. Мон солэсь ужан амалъёссэ асэстӥ, соин ик бадӟым тау карисько нырысетӥ вамышъёс лэсьтыны но улонэ шонер сюрес лёгыны юрттэмезлы. Нялтас вераса, мынам Вася агае но, Рая сузэре но дышетӥсьёс луизы.

- Алнаш музъем вордскем интыед кадь дуно потэ ни, дыр…

— Одӥг висъетын улӥм Алнаш ёросысь Кузьымгуртын вордскем Нина Смирноваен. Со шулдыр мылкыдо, кырӟаны-маскаръяськыны усто нылаш. Тӥни со ик тодматӥз Сеня Рябинэн. Кибъя пи биология-химия факультетын дышетскиз, трос нылпиё семьяын будэмын. Тодматским 3-тӥ курсысен, нош кузпалъяським ай киямы диплом вуэм бере гинэ. Нылгалась бускельёсмы туж ушъяло алнашъёсыз: кырӟась, верась калык, сямъёссэс-йылолъёссэс но утьыса, чакласа, пе, возё. Соин ик сюанамы шулдыръяськемзэс учкыны юри ветлӥзы, паймемзэс-синмаськемзэс веразы. Мон туж дыши ни Алнаш палъёслы. Азамат гурт, отын улӥсьёс мыным вордскем интые но матысь ӵыжы-выжые кадь йӧто.

- Дӥсьтӥсь сямдылы вожъясько-а?

— Школаын дышетскыкум, мон востэм вал, секытэн сётӥськиз математика. Соин ик аслым ачим осконэ ӧй вал. Нош дӥсьтӥсь луи, университетын дышетскыкум. Группаямы тросэз педучилище бере яке кӧня ке ар ужаса лыктэмъёс вал. Соос пӧлын мон асме пичиен лыдъялляй. Но одӥг учыр ваньзэ воштӥз. Удмурт кылъя урокын Роза Ивановна Яшина юан сётӥз. Огзэ, кыксэ юаз, нокин валэктыны ӧз пӧрмыты. Мон доры черод вуиз. Востэм сямме вормыса, юанлы валэктӥ. Ваньзэ шонер вераськем. Со дырысен кужымме шӧдыны кутски, дӥсьтӥ малпанъёсме кепыратэк, шара вераны. Университетын мон ӟеч дышетски, бадӟыматэм стипендия басьтыса.

- Гурезез берыктоз, шуо тӥ сярысь.

— Котькуд ужрадэз пыр-поч малпаськыса радъясько пиналъёс но гурт калык понна. Будӥсь нылпиос тодыны кулэ гуртсылэсь, школазылэсь историзэ, данэ потэм адямиосты, вӧзазы улӥсьёс шоры ӟеч синмын мед учкозы. Котькуд гуртын вань сыӵе муртъёс, соосты адӟыны быгатоно. Ми, азаматъёс, данъяськиськом Удмуртиысь калык художникен Семён Виноградовен. Туж ӵем пумиськылӥськом соин, ачиз но вордскем Шайтангуртаз бертылэ, татын солэн мастерскоез вань. Ӟечесь кусыпъёсмы УдГУ-ысь удмурт филология факультетлэн деканэныз Любовь Фёдороваен. Ми дорын ик вордскемын Юлия Байтерякова — покчи классъёслы удмурт кылъя учебниклэн авторез… Таӵе визьмо адямиосын пумиськонъёсмы туж тунсыко но пайдаё ортчыло, одно ик мукет школаосысь удмуртоведъёсты но пиналъёсты ӧтиськом.

Азаматын вордӥськемын Трофим Борисов югдытӥсь-лэн анаез. Утчаськонъямы шедьтӥм солэсь выжыоссэ. Кык пол радъямы ӵыжы-выжыосыныз Екатерина Черноваен но Раиса Корепановаен пумиськонъёс. Та кышномуртъёсын но кусыпъёсмы юнмазы. 2011-тӥ арын аспал эшмылы Леонид Гусевлы, Удмуртиысь культура удысысь дано ужасьлы, 60 арес тырмиз. Ужрадамы гурт калык, пиналъёс но куноос трос паймымонзэ тодӥзы «Мынам Удмуртие» радиокомпаниысь куарая режиссёр сярысь. Куноен пумиськон зэмос праздниклы пӧрмиз. Та ужрадын ик учкыны кылдӥз нимо-дано луэм «Узы-боры» удмурт киноез. Отын песятайлэсь рользэ шудӥз Л. Гусев.

- Тӥ шаертодонэн тунсыкъяськиськоды, та удысын но шӧдскымон азинсконъёсты вань ини.

— Дышетон кадь ик таиз но уж туж сюлэмъям. Нырысетӥ бадӟым вормонэ вуиз, дыр, Азамат котырысь топонимикаез бичанъя конкурсын. Алнаш ёросысь 6 дышетӥсьёс та ужез ӟеч быдэстэмзы понна, Ижкаре ӧтьыса, коньдон премиен пусъемын вал. Гуртмы вӧзысь бырон калэ вуэм Ключёвка черкогуртэз улӟытон бордын тыршим. Л. Замятина дышетӥсен ӵош гуртлэсь историзэ, черклэсь кылдэмзэ эскерим, пумиськонъёс ортчытъямы. Дышетскисьёсын кенешыса, шайвылзэс утялтӥмы. Выльысь улӟыны кутскем гуртын милемыз табере дуно куноосты кадь пумитало.

Берло аръёсы удмурт культуралы сӥзем толэзьёс проект амалэн ортчыло. Кылсярысь, «Дӥся удмурт мунёез» нимояз пыриськизы 5-тӥ-9-тӥ классъёсысь нылъёс но соослэн анайёссы, песянайёссы. Тунсыко ортчизы «Табань-шоу», «Пельнянь-шоу», «Перепеч-шоу», «Фин-угор калыкъёслэн сиёнъёссы» проектъёс. Конкурсэ пӧраськемъёс дасям сяна, котькуд класслэн тунсыко рекламаез, такмакъёсыз чузъяськизы. «Табань-шоу» проектмы «Зарни бугор-2» элькун конкурсын Таукарон гожтэтэн пусъемын. Уз вуны Тылоысь пиналъёсын ӵош «Юан-веран, тодон-валан» телеконкурсэ пыриськеммы но. Милям пиналъёсмы финалэ потӥзы, «Москва-Калинин» путёвкаен пусъемын вал. Трос аръёс ужатозям, таӵе конкурсъёс но олимпиадаос, отын вормонъёс ӧжыт ӧз люкаське.

- Тӥ котькыӵе уж борды мыло-кыдо басьтӥськиськоды. Паймемзэс верало тӥледыз умой тодӥсь адямиос.

— 1996-тӥ, 2004-тӥ аръёсы 8-тӥ класслы удмурт кылъя дидактика материалъёсын пособиосы потӥзы. 2008-тӥ арын Алнаш ёросысь ик дышетӥсьёсын дасямы но поттӥмы удмурт кылъя диктантъёсын бичет. Пособиосме одӥг шокчемен кадь гожтӥ. Малпасько, косӥзы бере, оскемзэс одно быдэстоно. Эшшо мар ке поттыны луэ на, дыр, но гожтыны косӥсь ӧвӧл, ачим мылкыдме уг шараяськы, шуод-а, мар-а. Нош удмурт кылъя дышетӥсь котьку секыт учырын. Ачид трос газет-журнал ӧд басьты ке, улонлэсь бере кылёд. Интернетын удмурт кылъя урокъёслы трос материал шедьтыны уг луы. Ярам, компьютер курсъёсы ветлӥ, чаляк соин ужаны дыши. Ушъяськеме уг поты, но школаямы нырысь ик мон презентация дасяй. Фёдор Миннигараев журналистлэн но проектаз пыриськи. «Мынам Удмуртие» радио пыр ӵем чузъяськылӥзы визькылъёслэсь пуштроссэс усьтыса «Малы асьмеос озьы шуиськом» веранъёс. Та уже монэ кыскиз выпускникмы Александр Бикузин. Веранъёс поттэмын нимаз дискен.

- Тыршемды но азинсконъёсты вылӥ дунъямын.

— Дунъет сярысь малпаськыса, ӧй ужа. 1994-тӥ арын «Калыкез дышетон удысысь отличник» гадьпусэн пусйизы, 6 ар ортчыса, Удмурт Республикаысь дышетон удысысь дано ужась луи. Солэсь азьвылгес шуд усиз дышетон удысын ужасьёслэн Москваын ортчись совещаниязы пыриськыны. 2007-тӥ арын Россиысь устоосыз дышетӥсьёс пӧлы шеди. Наградаосы шӧдтэк шорысь вуизы кадь. Секыт аслыд дунъет сётыны, капчи адӟыны ужедлэсь емышъёссэ. 40 пала выпускникъёсы пырпотӥзы удмурт филология факультет пыр, тросэз ӟеч дышетӥсьёс луизы.

- Кузпалэныды кыкнады ик тӥ дышетӥсьёс. Нылъёсты но мытэм уждэс азьланьто…

— Кузпалы Семён Иванович школаын ик ужа. Пӧртэм предметъёсыз нуэ: химия, география, экономика, экология. Но тужгес но яратэ химия предметэз. Ёросамы кужмоез химик лыдъяське. Заочной амалэн дышетскисьёс дорамы ветло, химиен ужъёссэс быдэстыны юрттэт курыса. Берло дыре мукет школаосысь но дышетскисьёс вазиськылӥзы, ЕГЭ-лы дасяны курыса. Семён Ивановиче туж оскымон кузпал но усто атай, визьмо дышетӥсь но ужзэ яратӥсь адями. Картэным ог-огмес валаса улӥськомы. Мыным со ноку но ӧз люкетылы, школа ужам ӧз пыриськылы. Гурт котырысь ужъёс со вылынгес возисько. Со лыдӟиське, котькыӵе темая вераськон мытыны быгатэ, кузпалылэн гуртын но, школаын но, ёросын но данэз бадӟым. Кык нылъёсмес будэтӥм, пыд йылазы султытӥм. Бадӟымез — Надямы — ӟуч кылъя но литературая дышетӥсь, ёросысьтымы Кузьымгуртэ бызиз, ужа Тыло школаын. Урокъёс ортчытъям сяна, завучлэсь ужзэ быдэсъя. Кузпалэныз 2 пиоссэс будэто. Лена нылмы 1998-тӥ арысен Эстониын улӥз. Отын дышетсконлэсь вань тубатъёссэ ортчыса, кылем арын докторской ужзэ утиз, табере со философия наукаосъя доктор. Эстониын улытозяз, пӧртэм кунъёсы вуылӥз. Алигес дорамы бертӥз.

- Нош асьтэос кунсьӧры вуылӥды-а?

— 2006-тӥ арын Эстониез адӟыны кылдӥз. Ленамы отын дышетске вал бере, куное ӧтемез потӥз. Мурт шаере вуылӥм инвожо толэзе, пылаським Балтийской зарезьын. Нош вуэз куйыын кадь кезьыт вал.

Сюлмам туж кельшизы инбам улысь музейёс. Сомында гектар музъем вылэ интыяськемын соос! Паймоно, кӧня-кӧня туристъёс вуыло та шаере! Палэнысь лыктэмъёсын но эстон калык каньыл вераське. Азьло аръёсы турпутёвкаен кытчы но уд ветлӥськы вал. Мукет городъёсы ӵыжы-выжыосмы доры но вуылӥм. Ханты-Мансийскын но кык пол кунояським. Берло дыре мурт шаеръёсы, кыдёке потаны туж ик уг кылды ни. Тросгес дырмес висъяськом юрт котырысь ужъёслы, озьы ик газет-журналъёс, книгаос лыдӟонлы.

Дышетӥсьёсмы паймемзэс верало, мон ёросысьтымы гинэ ӧвӧл, шаерысьтымы но олокинъёс сярысь но тодӥсько шуыса. Нош мон паймисько соослэн тодымтэзылы.


Александр Бикузин, «Мынам Удмуртие» телерадиокомпаниысь журналист:

— Ольга Владимировнаез тодам вайисько ке, нырысь ик пель сьӧрам кылӥське зол, кужмо куараез. Мон укылтэмгес вал бере, али ке но жонгетэ кадь «Бикузин!!!» кеськемез. Дышетскисьёс азе бадӟымесь куронъёс пуктылӥз, со тужгес но шӧдӥське вал, дорысь ужез лэсьтыку. Соин ик ӟуч кылъя, геометрияя учебникъёслэсь азьвыл ик удмурт кылэз но литературез киям кутылӥ. Куронъёсыз бадӟымесь ке но вал, ӝожтӥськыны тодамы но ӧй вал. Капчи мылкыдо адямиен котьку озьы луэ, дыр. Ӵапак Ольга Владимировна ик монэ Пётр Черновлэсь «Казак воргорон» повестьсэ кужмысь лыдӟытӥз. Со понна али ке но тау кареме потэ. Тунсыко книга. Эшшо мон куддыръя урокъёс бере кылисько вал (дорысь ужме ке уг лэсьтӥськы). Но малы ке со понна мынам кӧты ӝож ӧз луылы. Ми Ольга Владимировнаен одӥг урамын улӥськом вал бере, тодӥсько, со спортэн эшъяське шуыса. Возььыт ке но вераны, Ольга Владимировна али ке но мынэсьтым ӵемгес куас вылэ султылэ.

Сергей Юрин, Алнашысь 25 номеро тылпу кысон частьысь кивалтӥсьлэн воштӥсез:

— Удмурт кылын чылкыт вераськеме понна тау карыны кулэ анаелы но Ольга Владимировналы, атае мынам ӟуч. Ольга Владимировна — зэмос интеллигент. Дышетӥсь ке шуисько, солэн тусбуйыз син азям пуксе. Мон йӧнтэмгес вал, уката ик 8-тӥ-9-тӥ классъёсын пиослэн йыразы ӵем ик уг лыкты, дорысь ужез быдэсъяно шуыса. Монэ но Ольга Владимировна, урок бере кельтыса, гвардеецъёс сярысь кылбурез дышетыны косӥз. Мон та кылбурез али но, уйин сайкатыса юазы ке, кутсконысеныз пумозяз лыдӟо. Выль дышетскон ар азьын Ольга Владимировналы но вань дышетӥсьёслы тау кылъёсме вераме потэ.

Источник:

Рябина, О. В. Мыным юрттэ алнаш омыр... / О. В. Рябина ; беседовали Н. Михайлова, Е. Смирнова // Удмурт дунне. - 2012. - 31 авг. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"