Фёдорова Любовь Петровна
Мон – дышетӥсь, мон - дышетскись[править]
Любовь Петровна Фёдорова - Удмурт кун университетысь удмурт филологияя факультетлэн деканэз, педагогика наукаосъя кандидат, удмурт литературая программаосты, дышетскон книгаосты кылдытон бордын ужась, бадӟым куронъёс пуктӥсь дышетӥсь, чеберлыкез гажась кышномурт, яратӥсь кузпал но лякыт сюлэмо анай.
Кызьы радъяськиз солэн улон сюресэз? Кыӵе малпанъёсын но сюлмаськонъёсын улэ та кышномурт? Кыл сётӥськом аслыз Любовь Петровналы.
Кыл кутыны кулэ вал
- Будӥ трос нылпиё семьяын. Пиналъёс – куать кузя. Кык ныл но ньыль пи. Ми, нылъёс, бадӟымъёсыз вал. Малпасько пиналлэн семьяын кӧнятӥез луэмез ӵем дыръя солэн сямъёсаз аспӧртэм пытьы но кельтэ. Азьвыл, нылпиос трос дыръя, бадӟымез нылпи пичиосыз понна кыл кутыны кулэ вал. Али трос пинал уг ваё ни бере, нылпиос асьсэ понназыгес улыны дышемын.
Улон шоры учконэ, калык пӧлын асме воземе трослы герӟаськемын пичи дырысеным ик кыл кутыны дышеменым. Вордӥськи 1958-тӥ арын Алнаш ёросысь Шайтангуртын. Нырысь дышетски асьме гуртын ик, собере Азаматысь тямыс классъем школаын, нош укмыс-дас классъёсы – Алнашысь шор ёзо школаын.
Семьяямы мон ялан дышетӥсь интыын вал. Пичи вынъёсылы котьмае валэктӥсько, визьнодасько. Университетэз йылпумъям бере но вынъёсме школаын дышетӥ на.
Школаын мыным котьку но тунсыко пото вал лэчыт визез кулэ карись наукаос: физика, химия, математика. Нош азьланезлы бырйи гуманитарной наукаосъя удысэз.
Нош кин гинэ луэме ӧз потылы! Малпанъёсы ялан вошъяськизы. Потэ вал дышетӥсь луэме. Собере – инженер. Мон уг на валаськы вал, мар ужа инженер, но мыным кельше вал та кыллэн чузъяськемез. Туж яра вал библиотекаын пукыны. Мыным потылӥз: библиотекарь – со туж умой уж, тон быдэс нунал книгаос пӧлы выемын, тонэ нокин но нокытчы но мыныны уг косы. Бӧрысь потэ ни вал фармацевт луэме. Алнашысь аптекае пырисько но – отын сыӵе чылкыт, аспӧртэм аптека зын мыным туж яралляз.
Одӥг вакыт луэме потэ вал агроном но. Мынӥськод кадь бусыетӥ… Тӥни озьы, мылкыдъёсы ялан вошъяськизы. Но сюлэмам тужгес но юн пытьы кельтӥз, лэся, нырысетӥ дышетӥсе Юлия Николаевна Николаева. Со милемыз нырысетӥ классын гинэ дышетӥз, собере школаысьтымы кошкиз. Но со одӥгез адями, кудӥзлэн мылкыдыз, сямыз кылиз мынам улонам, азьланезлы сюрес бырйыкум, бадӟым инты басьтӥз.
Озьыен, мон луи дышетӥсь. Но улонам вань сайкыт малпанъёсы быдэсмизы шуыны быгатӥсько. Дорам бадӟым библиотекае. Мон сое студентъёслы но лыдӟыны ӵектӥсько. Котькуд анай, семьяё нылкышно луэ, дыр, фармацевт но. Пиналэз утялтоно, эмъяно ук. Пие пичи дыръяз ӵем висьылэ вал. Инженерлэсь ужзэ мон умой тодӥсько. Картэ – инженер. Агроном ласянь ке, мынам вань бакчае. Лыдӟисько трос книгаос: кызьы бакчаез утялтоно, кыӵе кидысъёс вань, кызьы соосты будэтоно. Уг тодӥськы, умой-а со, ӧвӧл-а, но асьмеос пӧртэм удысъёсъя ужано, ваньзэ быгатоно луиськом.
Корка пыроно витетӥ этажысен
- Тодӥськоды-а, школаез али йылпумъясьёс пӧлын луысал ке, бырйысал, дыр, дизайнерлэсь ужзэ. Али та удыс мон понна туж тунсыко потэ. Кызьы адями инкуазен тупаса, сое сӧрытэк улыны быгатэ. Та ласянь мыным кельше Прибалтикаын. Вильнюсэ вуылыкум, туж синмаськыса учки татысь чеберлыклы, инкуазья тупатӥськыса пуктэм городлы.
Асьмеос мар ке лэсьтыны малпаськом ке, азьвылзэ куашкатӥськом, ваньзэ быдтӥськом. Собере выльысь мерттӥськыны кутскиськом.
Туж тунсыко потӥз Финляндиысь Куопио городын. Отысен мон адӟи: коркалэн пыронэз луыны быгатэ вылэм витетӥ этажысен но. Гурезез тӥятэк со борды лэсьтэм корка пыроно вылӥысен. Малы? Урам озьы мынэ. Та корка пырон нырысетӥ этажаз луысал ке, со кыдёкынгес но секытгес но луысал. Тӥни сыӵе аспӧртэм амал. Жаляса верано, асьмеос озьы улыны ум быгатӥське на. Нош азьвылзэ ке чаклано, удмурт калык инкуазен туж тупаса улэ вылэм. Гуртъёсысь но жуг-жагез уд адӟы. Али котькудӥз ас юртъер котыраз гинэ берга, нош огъя гуртлэн тусыз сое уг сюлмаськыты. Та ужпум туж малпаськытэ.
Быръён азьын сылӥсько ке
- Инкуазен тунсыкъяськонэ пичи дырысен ик вал ни. Химия урокъёсты яратэмме адӟыса ик, вылды, дышетӥсе Юлия Семёновна Малых туж куре вал монэ биолого-химической факультетэ пырыны. Мон дасяськыны кутски. Но малы ке малпанъёсы пумен-пумен воштӥськыны ӧдъязы. Малпай: та факультетэ пыри ке, удмурт эшъёсы луозы меда? Со дыре ик мургес тунсыкъяськыны ӧдъяй кыллэн историеныз. Туж яратыса лыдӟисько вал Людмила Христолюбовалэсь, Маргарита Гришкиналэсь «Молот» журналысь ужъёссэс. Историен но этнографиен тунсыкъяськыны кутскеме вуттӥз монэ историяя но филологияя факультетэ.
Улонын быръён азьын сылӥсько ке, мон малы ке котьку бырйисько сыӵе сюресэз, кытын тросгес шуг-секытъёс, борддоръёс пумисько. Дышетскыны пыреме бере бырйи кылъя специализациез. Татын мон тау карысал Валентин Кельмаковлы, Геннадий Ушаковлы. Соос дышетӥзы монэ кыллэсь радлыксэ, историзэ тодыны-валаны. Кельмаковлэн урокъёсыз туж ярало вал. Малы ке шуоно со дышетылӥз малпаськыны. Озьы университетэз йылпумъяй кылчи луыса. Ужаны кутски школаын, историяя дышетӥсь луи. Кылъя аспирантурае ӵектӥзы вал ке но, соку отын инты ӧй вал. Кӧня ке дыр ортчыса, Геннадий Ушаков монэ шедьтӥз но шуэ: удмурт литературая одӥг методистмы но ӧвӧл. Соин ик Москвае аспирантурае дышетскыны мыноно.
Мон кема малпаськи. Аслэсьтым улонме чутрак воштыны уггес дӥсьтӥськы вал. Нош ик жингыртӥзы: мыноно ик, пе. Ар пала ужай на Россиысь Наукаосъя академилэн Урал люкетысьтыз историяя, кылъя но литературая Удмурт институтын методикалы сӥзем ёзын. Собере пыри Москваысь Национальной образованияя НИИ-лэн аспирантураяз.
Куке-соку Якутиын вал кадь…
- Москваын дышетскон адямилэсь дунне шоры огъя учконзэ паськытатэ. Мон уг шуиськы интыысь дышетон лябгес. Но Москва, Ленинград аспирантураос адямиез вылӥегес ӝуто. Малы? Отын дышетско пӧртэм улосъёсысь, республикаосысь адямиос. Ми улӥмы одӥг общежитиын Узбекистанысь, Якутиысь, Чечняысь, Осетиысь, Поволжье республикаосысь аспирантъёсын. Озьы, пӧртэм улосъёсысь егитъёсын ӵош дышетскыса, адямилэн дунне шоры учконэз но паськытгес луэ. Наукая кивалтӥсе вал Россиысь одӥгез валтӥсь методист, педагогика наукаосъя доктор Меджи Валентиновна Черкезова.
Пусйыны кулэ на, дыр: аспирантураын ми шаерамы али тодмо луэм адямиосын ӵош дышетским: Валентина Ившина, Зоя Суворова, собере вуиз Светлана Арекеева но мукетъёсыз. Али но та адямиосын кусып возиськом.
Туж эшъяськисько вал Якутиысь аспирантъёсын. Али мон ачим аслым Якутиын куке-соку вал кадь потӥсько ни. Адӟисько вал: якутъёслэн дышетскыны, вылӥегес тубыны мылкыдзы мукетъёсызлэсь сярысь бадӟымгес. Тол каникулъёс вуо гинэ, Ленин нимо библиотекаын якутъёслэн ӝыны вуззы люкаське ни: лыдӟиськыны, экзаменъёслы дасяськыны, кандидат ужзэс гожъяны. Паймисько: макем якутъёс тыршисесь, тодон-валан басьтон мылкыдзы туж бадӟым.
Асьмелэн, финн-угор калыкъёслэн, жаляса верано, сыӵе мылкыдъёсмы юнэсь ӧвӧл. Соин ик, малпасько, адӟем кароно ик тюрк выжыысь калыкъёслэсь.
Аспирантураын ӵош дышетскем якутъёсмы докторъёс но луэмын ни, нош ми ялан мертаськиськом, малпаськиськом на. Та ласянь милемыз Глафира Никольская но тышкаське.
Мон – Москваын, картэ – Ижевскын, пимы – Татариын…
- Аспирантураын дышетскыкум ик, мон бызи, семья кылдытӥ. Кузпалы – Татариысь Тэремшур гуртысь, удмурт. Со Москваын техникумын дышетске вал, но заочной амалъя. Ужаз Ижевскын. Соку семьямы туж тунсыко вал. Кузпалылэн сессиосыз дыръя ми ӵош улӥмы, сессиез йылпумъяське но, люкиськоно луэ. Кыкетӥ курс бере вордӥськиз Володя пимы. Одӥг арзэ мон Ижевскын пиналын пуки. Соку но кӧня быгатӥ ужай, школаын урокъёс пыр пӧртэм эскеронъёс ортчытъяй.
Семьяен улон бадӟым куронъёс пуктэ. Озьы ке но аспирантураме мон очной амалъя ик йылпумъяй. Пимес ар ӵоже возиз кузпалылэн анаез. Со понна солы бадӟым тау. Тӥни озьы улӥмы: мон – Москваын, картэ – Ижевскын, пимы – Татариын.
Москваысь техникумез йылпумъямез бере, кузпалы пыриз на Ижевскысь Техникая кун университетэ. Семьяё адямиос ке но вал, ми тыршимы котькудмы ас удысмыя вылӥегес тубыны, дышетскыны, азьлань сюресмес ог-огмылы ӧм ворсалэ.
Ужамъя дӥсьтон но
- Москва бере ужаны лыктӥ Дышетӥсьёслэсь тодон-валанзэс будэтонъя институтэ. Татын мон дышетӥсьёсын ужаны кулэ ни вал. Ноку но уг вунэты, кызьы лыдӟи нырысетӥ лекциосме. Ачим школаын ужамын ке но вал, куинь ар со трос шат? Нош мон азьын пукизы быдэс улонзэс школалы сӥзем адямиос но.
Пумен-пумен ужамъя дӥсьтонлык но, быгатонлык но лыктэ. Дышетӥсьёсын одӥг кыл шедьтӥ. Кудзэ ке ачим дышетӥ, кудӥз ке асме дышетӥз, дыр.
Соку ик вераськон ӝутскиз школаосы шаертодонъя урокъёсты пыртон сярысь. Но солэн методикаез дасямын ӧй вал на. Соин ик кылдытӥськиз та удысъя ужась группа. Тау карисько Дора Израилевна Черашняялы. Та программа бордын ми соин ӵош ужамы. Шумпотыса пусйисько, Россиысь улосъёс пӧлысь шаертодонъя программа ваньмызлэсь вазь кылдӥз Удмуртиын.
Ветлӥмы дышетӥсьёслэн Москваын ортчем семинаразы. Отын милям шаертодонъя программамы вылӥ дунъямын вал.
Программамылэн валтӥсь тодметъёсыз: ас шаердэ тодон, яратон но ӟечез понна ужан. Куке пинал ас шаерзэ тодэ, соку со сое яратэ, нош яратэ ке, солэн вань кужымзэ сётэмез потоз сое чебергес но, чылкытгес но карон понна.
Институтын ужам аръёсы туж пайдаё вал. Мон соосты ӟечен гинэ тодам ваисько. Но озьы ке но интыме воштоно луи. Малы? Институтын ми, методистъёс, трос ӧй вал. Соин ик котькудмылы гуртъёсысь школаосы ӵем потано луэ вал. Сюрес вылын я машина тӥяське, я автобус уг вуы. Куддыръя гуртын ик кӧлоно луэ. Пиелэн садике, возьмаськись вӧзы кыльылэмез но вань. Кузпалы малпа мон басьто, нош мон сюрес вылысь бертыса уг вуиськы. Соин ик университетэ вуи.
Вакыт воштӥськемъя воштӥськизы дышетон удысысь дунъетъёс но. Мукет сямен учкыны ӧдъям литератураез, солэсь историзэ. Соин ик школаосын удмурт литературая выль программалы кулэяськон кылдӥз. Нош ик люкамын вал группа. Ужазы Алексей Ермолаев, Пётр Поздеев, Александр Шкляев, Светлана Арекеева, Виктор Шибанов. Коллективлэн кивалтӥсез мон вал. Программа бордын кема гинэ ужам. Али со школаосы пыӵаны ӧдъяз ни.
Валентина Ившинаен ӵош гожтӥмы витетӥ класслы дышетскон книга.
Воргорон вакыт вуттӥз куашканэ
- Тунсыко потэ феминизм (гендер) шуон ӧр. Западын со 60-тӥ аръёсы эскеремын вал. Асьме доры берло дыръёсы гинэ вуиз. Гендер эскеронъя центръёсмы вань Россиын но.
Маин та ӧр тунсыко? Дунне вылын вань нылкышно но воргорон. Соос пӧртэмесь. Дунне шоры учконзы но висъяське. Нылкышно но воргорон кусыпъёс пӧртэм культураосын пӧртэмесь. Со озьы ик шӧдӥське литератураын но. Кызьы удмурт воргоронъёс учко нылкышно образ шоры? Та удыс туж тунсыко. Студентъёсын ӵош эскериськом удмурт нылкышно литератураез.
Мынам малпамея, огъя улонэз ке учконо, нылкышноос пиосмуртъёслэн пельпумъёссы сьӧрысь пото соку, куке обществоын бадӟым воштӥськонъёс ортчыны кутско. Кылем даурысь 20-тӥ аръёсы огъя культура воштӥське. Та вакытэ син азе пуксё А. Оки, Баженова, 60-тӥ аръёсы - Л. Чернова, С. Иванова. Али огъя дуннеын ортчо бадӟым воштӥськонъёс. «Адями – со воргорон» малпан куашканы ӧдъяз. Дуннеын политикая но экономикая но бадӟым шуг-секытъёс кылдӥзы. Воргорон вакыт вуттӥз дуннеез куашкатонэ. Кышноос но воргоронъёс кивалтон удысын огмында луыны кулэ, дыр. Оло, соку палэнскомы войнаен шудэмлэсь.
Та ласянь синмаськымон луэ Финляндия. Татын президентсы – кышномурт. Парламентазы но нылкышноос трос. Улон но Финляндиын ӟеч радъямын.
Ас куронъёсыдлы ачид но мед тупалод
- Школаын дышетскыкум но, университетын но монэ котьку тыршо вал кивалтӥсь карыны. Мукет ласянь, кивалтон мылкыды туж ик ӧй вал. Кизилия мон нылмурт. Солэн кивалтон быгатонлыкез вань шуыса тодӥсько. Нош малы меда монэ быръё? Сётэм кылме котьку но быдэстыны тыршемысьтым но, дыр. Удмурт филологияя факультетэ декан луыны курыса, мыным кык пол вазиськылӥзы ни вал. Но со ужлэсь палэнскыны выри. Мынам малпамея, та ныпъетэз нуыны быгатӥсь мукет адямиос но вал. Но берлоез декан Пётр Воронцов улонысь шӧдтэк шорысь кошкем бере, мон мур малпаськонэ уси но ӧй ни пыкиськы. Адямиосты дунъясько ужаны быгатэмзыя, сётэм кылзэс быдэстыны тыршемзыя. Уг гажаськы адямиез, кудӥзлэн улон шоры аслаз учконэз ӧвӧл. Озьы тӧл пельтэмъя улыны капчи, дыр, но сыӵеос мыным уг ярало. Уг гажаськы на диплом басьтон понна гинэ дышетскисьёсты. Тон студент ке, тон сярысь вераны мед быгатозы, зэм но, вылӥ образование басьтэмын шуыса. Со понна мар сётэ университет – тодыны тыршоно. Соин ик студентъёс азе мон чурыт куронъёс пуктӥсько, малпаськыны косӥсько.
Асьме гуртысь пиналъёслэн малпаськыны быгатонлыксы ӧжыт кадь потэ, но луонлыксы вань. Солы пиналэз дышетыны кулэ школаын ик.
Куке тон ачид кинлэсь ке куриськод, со куронъёслы тон ачид но тупаны кулэ. Аръёс ортчыса, визьмо студент вала: зэм но, дышетӥсьёс шонер куро вылэм. Нош лябзэ дышетскисез улляськод ке, кӧня урод кылъёсты, каргаськемъёсты кылоно луэ. Палэнысен гинэ капчи кадь потэ, дыр, студентэз уллян сярысь приказ гожтон. Нош учкиськод ке анай-атайзэ, соос берпум коньдонзэс сётыса дышетыны тыршо пиналзэс, кӧня бӧрдо-куректо… Куддыръя студентъёслы дышетскыны луонлык сётӥськом на. Но со вакыт ик адӟиськом но валаськом, урод лэсьтӥськом, «брак» поттӥськом шуыса. Кыӵе адямилэн мынэмез потоз меда куиньёслы мырдэм-мырдэм дышетскем, ас удыссэ тодӥсьтэм врач доры. Татын но озьы ик. Ляб студент уг визьмоя, школае мынэ, пиналэз дышетэ, отысь нош ляб пиналъёс вуо.
Улон воштӥське бере, воштӥськыны кулэ факультет но. Туала рынокез чакласа адӟиськом: удмурт кылъя но литературая дышетӥсьёслы ёрмон ӧвӧл кадь. Соин ик азьпала учкон вань: филолог-документовед, юрист-документовед выллем специализациос усьтоно, книга поттон удыслы, редакциослы редакторъёсты дасяно, дыр.
Ужлэн емышез котьку луоз
Шутэтскон нуналъёсам яратӥсько куасэн ветлыны. Ӵемысь вань семьяенымы ӵош потаськом, ялкариськом. Туж яратӥсько писпуос вискытӥ пиштӥсь шунды шоры учкыны. Сыӵе чебер.
Пӧраськыны яратӥсько. Чеберлыкез туж гажасько. Соин но бакчаям трос сяськаос будэтӥсько.
Ноку но йырысьтым уг кошко анаелэн верам кылъёсыз: ужам ужедлэн емышез одно ик луоз, дас ар ортчыса-а, одӥг-а… Анае шуылоз на вал, котькуд адямилэн куректонэз но, шумпотонэз но аслаз шуыса. Мон та верамез уггес валаськы вал. Али малпасько: адями шоры учкиськод но малпаськод солэн нокыӵе сюлмаськонэз ӧвӧл кадь, нош тынад куректонэд – ваньмызлэсь бадӟым. Калык визь шуэ, дыр, нокинлы ноку но эн вожъяськы, котькудӥзлэн аслаз куректонэз но, шумпотонэз но, но котькудӥзлы со тырме. Аръёс ортчемъя та кылъёсты мургес но мургес валаськод кадь.
Источник:
Фёдорова Л. П. Мон - дышетӥсь, мон - дышетскись / Л. П. Фёдорова ; записала Елена Миннигараева // Удмурт дунне. - 2003. - 11 апр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
