Ушаков Геннадий Афанасьевич

Материал из Воршуда
Перейти к навигацииПерейти к поиску

Мон асме ачим лэсьтӥ[править]

Г. А. Ушаков

Профессор Ушаков. Со кылъёс тырмыт, шуо, та адями сярысь юалляськыку-тунсыкъяськыку. Сое тодо, сое туж тросэз гажало, тросэз вожъясько. Со понна ик со профессор – аслаз визьмыныз, ужъёсыныз, аслаз сямыныз-калыкеныз. Нош со, керетонъёслы дырзэ быдтытэк, кыштыр гинэ лэсьтэ аслэсьтыз ужзэ. Туннэ нуналлы Геннадий Афанасьевич Ушаковлэн 10 книгаез, 150 пала научной ужез. Со Удмурт Республикаысь наука удысысь дано ужась, Россия Федерациысь дышетон удысысь отличник, Россиысь вылӥ школалэн дано ужасез. Туж тодмо методист - дышетӥсьёсты дышетӥсь. Та удысъя республикаысьтымы нырысетӥез педагогика наукаосъя кандидат. 1991-тӥ арын удмурт кыллэн методикаезъя доктор диссертацизэ утиз. Визьмо но тунсыко воргорон.

Вордӥськемын 1938-тӥ арын Свердловск улосысь Арамиль городын.

- Озьыен, тӥ милям сьӧрлось адями. Куд-огез шуо, тӥляд, пе, еврей вирды но вань.

- Чылк-чылк удмурт. Семьямы Арамиле ӟеч улон утчаса мынэм вылэм. Атай армиын водителе дышетскем. Нош азьло дыръя со бадӟым дан вал ини - кисыяд корочкаед вань дыръя саникен-а шонаськод на? Но гуртамы со вакытэ машинаос вылымтэ, соин со эшезлэн ӧтемезъя Свердловск улосэ шонтэм. Отын шофёрын ужам. Умой уло вылэм, мон вордскиськем. Но ваньзэ уретэ война. Фронтэ кошкон азяз со милемды вайиз вордскем гуртаз – Юкаменск ёросысь Балые. Татын, пе, коть сютэм уд кулэ, картофка ке но шедёз.

Вӧтын кадь гинэ тодӥсько на сое вырйылозь келяммес. Ужан машинаеныз ик кошкиз фронтэ. Кык сяна гожтэтэз ӧз вуы. Собере – «ивортэк ышиз». Машинаеныз ик снаряд улын пуштӥз, луоз.

Атайме воштӥз песятай. Туж утиз милемды, весь малы ке дышетэ, индылэ, интыяз дур но басьтэ, куаретэ но вал. Со пересьмытозь, ӟеч улӥмы, ӝожтӥськыны номырлы. Туж юн адями вал.

- Песятайды ик индылӥз, луоз, дышетӥсь луыны?

- Зэмзэ вераса, мон ачим но ӧй шӧдылы дышетӥсе йырме донгемме. Гуртамы шор ёзо школа ӧй вал, соин ик кытчы ке мыноно луиз. Песятай соку пересь ни вал, уксёлы ёрмылӥм. Соин ик мыным кулэ вал бадӟымгес стипендиен дышетсконтӥ. Мынӥ Глазове, ветлӥсько ульча кузя утчаськыса. Одӥгаз ялонысь адӟи - техникумын 40 манет стипендия сёто. Юаськыны пыри, но ӧз басьтэ - заводын ужасьёслэсь гинэ нылпиоссэс, пе, кутӥськом. Пыри мукет дышетсконтӥе – таиз, пе, педучилище. Мар со сыӵе, ачим но уг тодӥськы – стипендия гинэ мед тырозы. Ньыль эшъёс пӧлысь огнам экзаменъёсме сётӥ. Табере гуртэ бертӥ но, арлыдоос юаллясько ни: ну, кин тон табере луод? А мон уг тодӥськы – сӥзьыл мынӥ ке, юало, шуисько. Озьы сӥзьылозь быдэс гуртын но валэктӥсь ӧз шедьы, мар со «педучилище». Ма, мон дырозь гуртысьтымы палэнын дышетскемъёс ик ӧй вал.

Дышетскыны туж кельшылӥз. Школаын мон, эшъёсме кельтыны возьдаськыса, «ньыльёслы» дышетски ке, училищеын «витьёс» кельшыны ӧдъязы. Сое отличиен йылпумъяй. Со вакытэ сыӵе дипломен Россиысь котькуд вузэ вожмаськыса экзаменъёстэк кутылӥзы. Туж потэ вал юрист луэме, но соку матын сыӵе институтъёс ӧй вал, нош шулась кисыен палэнын чидалод, оло, уд. Соин вамыштӥ Глазовысь пединститутлэн удмурт люкетаз. Дышетӥсьёслы со дан луиз, весь ушъяськыса верало вал, удмурт люкетэ (!) горд дипломен адями лыктӥз шуыса. Дышетски каньылэн, бадӟыматэм стипендия басьтылӥ. Кыкетӥ курсысен ик студентъёслэн научной огазеяськонэнызы кивалтӥ ни.

- Тӥ соку ик наукаен выриськоды ни вал?

- Вырисько вал. Бесермянъёсын одӥг гуртын улӥ, одӥг классын дышетски бере, тунсыко потылӥз соослэн кылзы.

Куд-огез эшъёсы монэ серем карыны вырылӥзы: ми, пе, кылбур-верос гожъяса, гонорар поттӥськом, а тон выриськод пайдатэм ужен. Уже пайдатэм ик бен ӧй вал – котькуд научно-практической конференция бере премиен пусйылӥзы. Вылаз ик, со уж мыным сюлэмъя вал.

Куинетӥ курсын дыръямы Глазовысь удмурт люкетэз ворсазы, Иже выжтӥзы. Сыӵе воштӥськон нокыӵе ик ӧз поты – мон азьло сямен ик «витьёслы» дышетски. Витетӥ курсын дыръям министерство устоосызлы дышетскисьёслы ӵектӥз уже мыныны - соку гуртъёсын дышетӥсьёс ӧз тырмылэ. Мон лӧптыса ик кошки Сьӧлта ёросэ. Но шумпотонэз трос ӧй вал: ужасько шуыса, стипендия тыремысь дугдӥзы. Сессиосы ветлыны туж шуг вал – школаысь лэземзы ӧз потылы. Экзаменъёслы-зачётъёслы дыр висъян сярысь веранэз ик ӧвӧл ни. Кать быре вал, институтын преподавательёс сьӧры бызьылыса.

Дипломе отличиен вал бере, мон быгатысал ас мылкыд каремея школа бырйыны. Но мон Сьӧлта ёросысь Юмгалан ужаны кутски бере, директорез С. И. Зуев ӧз лэзьы, лыктӥд бере, ужа, шуиз. Школа туж начар вал, но ужам потыку, со уг люкеты. Кайтаяз ик монэ ВЛКСМ-лэн райкомаз басьтӥзы. Со уж мыным сыӵе ӧз кельшы, ярам, армие нуизы.

- ?

- Комсомолын лумбыт бызьылӥськод-бызьылӥськод, нош ӝыт малпаськод ни, мар мон лэсьтӥ шуыса – номыр но. Мон дышемын ас ужелэсь емышсэ адӟыны, соин комсомол уж мыным ӧз кельшы.

- Армиын но, тэк маршированиен вырыса, дырдэс быдтыны жаль потылӥз-ло?

- Туала егитъёс уз но оске, армиын мыным туж кельшиз. Вылӥ образованиен солдатъёс отын ӧжыт ук, вылаз ик, мон коммунист ни вал – гажаллязы солдатъёс но, офицеръёс но. Отысь комсомол огазеяськонэн кивалтӥ. Взводлэн командирез ачиз интые монэ политзанятиос нуыны косылӥз – тон, пе, югдурез мынэсьтым ӟечгес валаськод.

Гажалляй спортэз. Армие 24 арескам мынӥ ни бере, монэ «старик» гинэ каро вал. Нырысетӥ ӵошатскон азьын ну жаляло ни: кызьы, пе, тон, пересь, бызёд. Но мон кыкетӥ вуи. Вань ӵошатсконъёсы пырто вал. Волейболэн вӧй яке сакыр вылэ шудылӥм. Кин келя, со арняем пайзэ вормисьлы сётэ.

Ӵап армиын дыръя гожъяськон мылкыды пуромиз. Трос гожъяськылӥ «Красный боец» газетэ. Отысь ӵем гонорар басьяй – ваньзэ сое эшъёсын сиёнлы быдтылӥм. Котыртӥм уллёен бергазы.

Берытскеме бере ужъёсме сётъяны ӧдъяй «Советской Удмуртия» газетэ. А гуртын мар-о ӝытъёссэ карод - кумышка юод? Мыным тунсыкогес потылӥз лыдӟиськон-гожъяськон. Монэ «Советской Удмуртия» газетэ ӧтё вал, но школалэн директорез ӧз лэзьы. Собере куинь ар пала ужай райисполкомлэн председателезлэн воштӥсез луыса.

- Но тӥ сыӵегес ужын вал ни ук, со сюлэмдыя ӧй вал.

- Ӧвӧл, таиз уж мукетгес, трослы тунсыко. Мон асме ёрослэн завхозэз шуылӥ: ваньмыз тынад син азяд, ки улад. Зульыса ветлыны дыр ӧвӧл, ужа но ужа. Со должностьын дыръям мон асме уката зол возьматыны быгатӥськем, шӧдске. Гужем (кивалтӥсе М. И. Носков зарезь дурын шутэтскыку) жингыртӥз партилэн райкомезлэн нырысетӥ секретарез Д. М. Кощеев: тонэ, пе, калыкез дышетонъя министрлы воштӥсе ӧтизы, эн ӵыжаськы. Зэм но, ӧтизы. Соку ик соглаш кариськыны шуг вал, кури на арня малпаськыны. Вылаз ик, кивалтӥсе ӧй вал, кинлы мон, шуисько, районме кельто? Нош Носков, зарезь дурысь бертыкуз ик, Совминэ пырем: тӥ, пе, усто ужасьёсты, гуртэ ыстэм интые, отысь басьтӥськоды. Всё – кыли мон Сьӧлталам. Но со дырысен ужмы ӧз радъяськы ни. Кыӵе кивалтӥсьлы кельше, сое воштӥсез ортчыны ӧдъя ке? Михаил Ивановичлэн йырыз кур луиз: кызьы-озьы, сое уг адӟо, а воштӥсьсэ Иже министерствое ӧтё… Кутскиз монэ вормонтэм ужъёсын пачкатыны. Я со монэ куинь нунал ӵоже пекарня вуттыны косэ, я эшшо маке. Ма, шуисько, со выжыкылын гинэ озьы луэ: отын борддорез но, гурез но ӧвӧл на. Зэмзэ вераса, со ӵап аслаз ужез но ай. Мон учки-учки но сялӟи: сыӵе визьтэмъёсын ужатозь кошкод. Мынӥ райкоме. Соку, пе, Носковез куштоно. Эн, шуисько, кытчы со мыноз, а монэ котькытчы басьтозы, мон аслэсьтым дунме тодӥсько. Озьы мон «Советской Удмуртие» вуи. Редактор В. М. Михайлов монэ Ува улосъя корреспондентэ пуктӥз. Ар улыса, куинь комнатаен квартира сётӥзы. Ваньмыз умой кадь, но йырез ялан сюпсиз кемалась быдэстымтэ малпан: туж потӥз аспирантураын дышетскеме.

- Соня пӧртэм уж вошъяса, выльысь дышетӥсе берытскыны?

- Бен. Аспирантураын но озьы ик юазы. Дышетӥсьысь журналистэ мынӥсьёсты, пе, тодӥськом, нош журналистысь – дышетӥсе… Но со вакытлы мынам методикая книгае вал ни, соин ик оскымон потӥ кадь. Мар бен, малпамын – лэсьтэмын. Зэм, со понна «алдаськоно» луиз. Газетлэн редакторез отпускын, замез нош характеристика нокызьы ӧз сёты, кузё, пе, куаретоз. Вазиськи Дышетӥсьёслэсь тодон-валанзэс будэтонъя институтэ Р. Ф. Березинлы. Отысь характеристикаен мынӥ аспирантурае. Экзаменъёсме умой сётӥ. Но табере отын гарантиен гожтэт куро: Удмурт университет мед оскытоз, дышетскемдэ йылпумъямед бере уже кутоз шуыса. УдГУ-ын ӧз сётэ. Вазиськи Глазове – сётӥзы.

- Али но со сярысь тодады вайиськоды на бере, кӧтты туж ӝож, дыр?

- Сотэк ӧвӧл. Ай мадё тани. Защитае дырызлэсь вазь потӥ. Диссертациме утьыса гинэ вуттӥ, аспирантураез куинь арлы ворсазы, озьы эшъёсы сокема возьмаса пуконо луизы. Табере татчы – УдГУ-э - ӧтьыны ӧдъязы. Ма, шуисько, тӥ мыным ӧд оске, гарантия но ӧд сётэ вал ук. Но аслам Иже ик кылеме потэ.

- Озьы тӥ таяз учыре Глазов пединститутэз алдады?

- Озьы луэ. Ректорез ныж пуртэн вандӥ, шуыны луоз. Со вакытэ уго Глазысь пединститутын 22 процентэз гинэ дышетӥсьёс диссертацизэс утемын вал, профессоръёс сярысь веранэз ӧвӧл ни. Озьы Глазов пединститутлэн ректорез Виктор Андреевич Евстафьев монэ «кулэтэм карон сярысь» бумага гожтӥз. Солэн соку валамез мон понна туж дуно.

- Наукае сыӵе курадӟыса, кема мынӥллямды. Но алдаськытэк вераса, ӧд жалялэ-а мукет сюресъёстэс аналтэмысьтыды?

- Ноку но. Мон пинал дырысеным быгатылӥ асме дунъяны (самоанализэн вырыны). Улонын со туж юрттэ. Бен, мон тодмо луыны быгатысал, дыр, гожъяськись сямен но. Журналистикалы материалъёс сяна, мон серемес кылбур-верос но гожъяны йӧндырылӥ. Ушъяллязы. Тани одӥгзэ тодӥсько на: городысь пияш гужемлы гуртэ бертэм. Сое кунян пыртыны косо. «Заходи, заходи», пе, шуэ, капка азе султыса. Кунян пегӟем. Со пияш сярысь кылбур гожтӥ: «Кунянзы удмурт, лэся, буйгатӥз ассэ Вася». Но ваньмыз со сюлэмез ӧз буйгатъя.

Со вакытэ луонлыкъёс вал партия ужъя ӝутӥськыны: визь тырмылӥз кадь, ӟигар вал. Вылаз ик, соку удмуртъёсты ӝутыны вырылӥзы, но мыным соиз но тунсыко ӧз потылы: лэсьтэмзылэсь трос ог-огзэс йыръё, пуконъёссэс ӵыжало.

- Сыӵеос котькытын шедё. Тӥляд удысты сьӧлыктэм шат?

- Ой, эн вера, но татын коть уж мылкыдъя. Зэм, методика мыным соку ик «ӧз сюры». Дышетӥ удмурт литературая но, туала удмурт кылъя но, ӵошатон грамматикая но. Кык-а, куинь-а ар озьы курадӟи, собере Роза Яшина шуиз: ну ни со методикадэ. Мынам мылкыд лӧптӥз. Ватсазы на огъя языкознаниез. Ту-уж тунсыко вылэм. Мон со предмет шоры чылкак мукет синмын учкыны ӧдъяй. Кыл – со быдэс философия вылэм.

- Тӥ трос аръёс ӵоже студентъёслэн педпрактикаенызы кивалтэмын. Кыӵе визьнод, индылон сётӥськоды вуоно дышетӥсьёслы нырысь ик?

- Дасяськытэк уроке эн ветлэ! Пиналъёсты уд алда. Азьтэмъёсты адӟонтэм карисько, уроке уг лэзиськы вал.

- Методикаез котькудӥзлэн аслаз луыны быгатэ, дыр. Кулэ-а ваньмыз Ушаковъя кариськыны?

- Ушаковъя кариськыны нокин но уг косы. Но наукаысь огъя инъетэз (базаез) – традиционной методикаез - котькуд дышетӥсь тодыны кулэ. Собере ини тон малпа маке выльзэ, аслэсьтыдзэ. Но со дышетскись пиналлы изъян медаз вайы.

Зэмзэ вераса, методикаез туж шуг валаны. Тани татын но учёнойёс меӵак вераны, аспирантъёсме ултӥяны выро: методика – со наука ӧвӧл, пе. Нош малы ӧвӧл методикая докторъёс? Малы ке шуоно та удысъя диссертациосты утёнъя кенеш ӧвӧл. Национальной кылъёсъя мон соку быдэс Россиын огнам доктор вал. Бигеръёслэн но ӧвӧл. Тӥни сыӵе шуг югдур. Кызьы кенеш кылдытод?

- Кӧня вордскыны выре доктор диссертация?

- Гожтӥ кык ар ӵоже. Но йырам вить ар бергатӥ. Сое пуксьыса соку ик уд гожты ук. Нырысь шорсюлэмзэ адӟоно, концепцизэ радъяно. Куддыр со ачид бордысь гинэ уг поты ук. Вожъяськисьёс, пыдзэс пуктыны вырисьёс шедё. Тани докторантурае потыны ӧдъяй но, мукетыз вожмаськыны ӧдъяз. Кыкетӥез пышкыло: нёжто, пе, методикая докторской гожтыны луоз. Гожтӥ. Мон аслам малпанъёсылэсь токма ноку но уг куштӥськиськы.

- Проректор - университетын бадӟым адями. Тӥ вить ар ӵоже со ужез быдэсъяды, но верамзыя, амалтэк кошконо луиды. Егит дыръяды Сьӧлталан луэм учыр выльысь тодады лыктӥз, дыр?

- Татын мукетгес учыр. Вожъяськисьёс луизы улласянь. «Кокчаны» ӧдъязы ӵош ужась удмурт эшъёсы. Мынам со йырам но ӧз тэрылы: малы? Проректорын дыръям сомында выль факультетъёс усьтӥм. Соос пӧлын – удмурт филологияя факультет. Отын кафедраез кыклы люким, кык лаборатория усьтӥм, нош дунъязы чагиськонъёсын. Тужгес паймытӥз соиз: чагиськисьёс лэсьтэм ужез куашкатыны ӧдъяллям: ваньзэ, мае Ушаков лэсьтӥз, быдтоно, пе. Сыӵе выросъёсты валаны нокыӵе визь уг тырмы. Ма, мон сое аслым лэсьтӥ-а, мар-а?

- Но тӥ ужлы паймыса кема уд пуке.

- Соку ик кык ӵектон вуиз. Мынӥ Рудольф Березин доры Дышетӥсьёслэсь тодон-валанзэс будэтонъя институтэ. Вить толэзь куспын отын аспирантура усьтыны быгатӥ.

- Собере мукет университетэ «куразы»?

- Озьы. Восточно-европейской университетэн тунсыко пӧрмиз. Эдуард Гордон югдурез тодэм но жингыртэ: пумиськоно, пе, вал. Ӧтиз ас дораз чай юыны. Кыл бӧрсьы кыл, собере Эдуард Семёнович кисыысьтыз лачак визиткаос поттэ. Кӧнязэ ке мыным мыче. Учкисько но, визитка вылэ гожтэмын: Ушаков Геннадий Афанасьевич – МВЕУ-лэн проректорез. Мон солэн сыӵе амало луэмезлы синмаськи, соглаш кариськи.

- Дун басьтыса дышетӥсь вузын улонды майбыр луиз, дыр?

- Дас поллы секытгес. Ужез рос-прос радъямтэ вал ай. Студентъёсты дышето ни, лицензиез ӧвӧл. Малы, пе, со кулэ? Нош эскеронъёс – вылысьтыз вылаз. Документъёс дасяса, трос дыр бырылӥз. Закон, право удысэз лыдӟыса пукылӥ. Куинь ар ӵоже дышетӥсьёсты дасянъя, искусствоосъя, спортъя, компьютерен ужанъя, кивалтонъя, коньдонъя но экономикая колледжъёс усьтӥм. Университетлэн данэз нуналмысь ӝутскыны ӧдъяз.

- Озьы ке но дунын дышетскыса басьтэм дипломъёс осконтэмгес пото. Тӥ ужамын кун вузын но, коммерческояз но - дышетскисьёслэсь тодон-валанзэс амалтэк ӵошатылӥды, луоз.

- Бен. Вожзэс медаз вае дунтэк дышетскисьёс, но дунын дышетскись эшъёссы соосты ӵемысь ортчо. Коньдонэн дышетскисьёслэн мылкыдзы туж бадӟым. Кудӥз шуо, отын куронъёс сокем юнэсь ӧвӧл. Юнэсь – ваньмыз уг чидало – арлы быдэ кӧняез ке кошке. Нош дунтэк дышетскисьёс сыӵе луонлыксэс уг дунъяло, азьтэмъяськыны кутско.

- Табере тӥ выльысь Удмурт кун университетын. Кызьы сое валано?

- Туж огшоры. Ректор Виталий Анатольевич Журавлёв берытскыны куриз. Ми соин керетыса ӧм люкиське вал ук. Зэмзэ вераса, берытсконэлы но юрттӥз чагиськон. Мон педагогикаысь диссертациосъя кенешын вал. Вань диссертациос мон пыртӥ потылӥзы: я эксперт, я оппонент луылӥ. Но выль положение потӥз. Соя кенеше кыльыны быгатӥзы на штатысь адямиос гинэ. Мон вылэ чагиськиллям. Соку Журавлёв шуиз: тон мыным кулэ, берытскы. Мон шуи: берытско, но удмуртъёс доры уг. Валасько, пе. Озьы ӟуч кылъя кафедрае кариськи. Али кык книга бордын ужасько. Куд-огез нош пиньзэс сыскыса ветло, малы, пе, сое ректор берыктӥз на.

- Улытозяды сомында чагиськонъёс, вузан учыръёс. Мар юрттэ возиськыны?

- Куддыръя со ик юрттэ – кыдано-а, мар-а. Мон тодӥсько ук, визьтэм муртэ уг жуго. Вӧсь бен, ӟеч лэсьтэмед понна ке озьы каро, но кытчы пырод, адямиослэн сямзы ке сыӵе. Ачим-а сыӵе - ваменэс, песятай кадь. Со шуэ вал: муртлэсь эн басьты, но аслэсьтыдзэ эн сёты.

- Куке но тӥ верады вал, чеберлыко произведение гожтэмды потэ шуыса. Малы сӥземын луоз со?

- Вань сыӵе мылкыды, но со луоз ай, дорын пукыны кутски ке гинэ. Нимаськоз со «Зарни». Гуртамы тунсыко учыр вал: одӥг воргорон улытозяз зарни люказ. Кулэмез бере солэн коркаез понна вожмаськыны ӧдъязы. Кӧня ке манетэн гинэ басьтӥз колхоз председатель. Адями медъяса, ватосэз утчатӥз. Шедьтӥзы. Отысен кутске предлэн быдэс выжыезлэн быронэз…

- Тӥ данъяськыса шуылӥськоды: «Мон асме ачим лэсьтӥ».

- Нырысь мон сярысь озьы шуиз университетысь проректор Сергей Максимович Решетников. Со зэм но озьы. Ваньмыз, маи мынам вань – со мынам. Улонам инмысь номыр но ӧз усьы – ӵем дыръя кошкись поездэ кечырскылоно луылӥз. Озьы, верай ни, 34 арескам гинэ аспирантурае сюри. Кин ке люкетыны, кин ке жаляны вырылӥз. Нырысетӥосызлы шуылӥ: пограмме возьмаса, жадёды. Жалясь муртъёсты но уг яратӥськы, сюлмысь ӧвӧл со. Соин котьку шуисько: мон ачим!


Источник:

Ушаков Г. А. Мон асме ачим лэсьтӥ / Г. А. Ушаков ; записала Зинаида Рябинина // Удмурт дунне. - 2004. - 21 мая. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"