Диева Ада

Материал из Воршуда
Перейти к: навигация, поиск

Ада Заитовна Диева – кылбурчи, крезьгурчи, кырӟась, журналист, Россиысь журналистъёслэн огазеяськонзылэн ёзчиез, Удмурт Элькунысь гожъяськисьёслэн огазеяськонзылэн ёзчиез.

Dieva.jpg

Улон сюресэз

Ада Диева вордӥськиз Башкортостан музъем вылын Янаул ёросысь Вот-Ошья гуртын 1958-тӥ арын 8 куарусёнэ. [1]

Ада пичи дырысеныз ик кырӟаны яратылӥз. Солы удалтӥз – вӧзаз анай-атаез сяна, лякыт сямо но туж визьмо яратоно песяез вал. «Али но син азям на: тани песяеным ӵош черсыса пуконъямы удмурт гуръёсты нёжъяськомы. Мон куараеным сое вормыны турттӥсько. Нош тодмо гурез кырӟакумы, воксё согисько вал», – вера А. Диева. Озьы пичи дырысен тусьты-пуньы миське-а, нюлэскын узы-боры бича-а, ӟег пӧлысь сяськаослэсь тугоко керттэ-а – мылкыдыз кырӟанэ куриськылӥз. [2]

Школаын но нылаш етӥз вал. Бигер кырӟанъёсты удмурт кылэ берыктыса, эшъёсыныз ӵош кык кылын кырӟаллязы. Нош кӧня концертъёс пуктылӥзы! Эшъёсызлэсь мылкыдзэс ӝутыса, концертлы программа дасялляз, ачиз ик режиссер но, нуись но кариськылӥз. [1]

"Юг индур" кылбур сборникезлэн презентациез дыръя

Выль Артаул школаысь дас классэз йылпумъяса, Иже лыктӥз но радиомонтажницае дышетскиз, одӥг арзэ механикая заводын ужаз. Соку ик академической хоре кырӟаны ветлӥз, нотаосын кырӟаны, фортепианоен шудыны дышиз. 1980-тӥ арын Удмурт кун университетысь филология факультетэ дышетскыны пыриз. [3]

Университетэз йылпумъяса, «Италмас» ансамбле конкурсэз ортчиз: 15 мурт пӧлысь куиньзэ бырйизы. Ада кадь шудоез ӧй вал, дыр, соку! Но шумпотонэз кема ӧз кыстӥськы, «сюлмаськисьёс» сюризы. Вань улондэ, пе, татын сӧрод, мукет уж утча, артист шудо уг луы. Кылзӥськиз. [1] Жаляськод-а ансамбльысь кошкемысьтыд, шуыса юамлы, Ада Диева вера: «Жалясько шуыса, меӵак вераны уг яра, дыр. Тодмо артист луон пумысь вылтӥяськон малпанъёс мон пушкын ноку но ӧз бугыръяськылэ. «Италмасэ» кыльысал ке, кин тодэ, аслам кырӟанъёсы удмурт калык пӧлы, оло, ноку но ӧй вӧлмысалзы...» [4]

Озьы со вуиз ужаны Трамвайно-троллейбусной управлениын комсомоллэн секретарез луыса, пумен «Тюрагай» ансамбле кырӟаны ветлӥз. [1] Полиграфкомбинатын корректорын ужакуз, удмурт телевидениын внештатной дикторлы конкурсэ ортчиз. Кема ик ужаса ӧз вутты: бызиз, пиез вордӥськиз но вордскем гуртаз кошкиз. Отын дышетскем школаяз англи кылэз нуиз. Но вордӥськем гуртаз гань-гань улыны ӧз быгаты, сюлмыз Удмуртие куриськиз. [5]

1996-тӥ арын нош ик Иже лыктӥз но «Инвожо» журналын ужаны кутскиз. [3]

Ада корреспондент луыса ужа, публицистика удысын тыршиз. Отчы кышномурт трос дырзэ но кужымзэ сётоно луиз. Озьы ке но ужез сюлэмъяз. [5]

Писательёслэн огазеяськоназы пумиськонъёс радъялляз, чеберлыко литератураез вӧлмытонъя бюролэн директорез вал. [1]

2010-тӥ арын Ада Заитовна Писательёслэн огазеяськоназы ужаны выжиз.

Гожъямъёсыз сярысь

Адалэн пӧртэм гуръёс университетын дышетскыкуз ик вордӥськыны кутскизы ни вал. Но нылаш соосты ас понназ нёжъяса буйгалляз. Но удмуртлык борды умой-умой басьтӥськемзы бере гинэ чидан сӥньысэз чигиз – гуръёссэ-кылбуръёссэ калыке поттыны дӥсьтӥз. [2]

Гуръёс ӧз кошке, кышномуртэз эшшо но золгес бинизы. Озьы 1999-тӥ арын Ада нырысьсэ «Яратон» нимо кырӟан гожтӥз.

Оло утчай мон тонэ – яратонэ,

Оло шедьтӥд тон монэ – яратонэ.


Кыкнамы ик валамы,

Синмаським ог-огмылы.

Тупалом ӵош кожамы

Кыкнамы.

Кылъёссэ но ачиз ик малпаз. «Инвожоысь» эшъёсызлы возьматӥз. Соос Адаез ушъязы, кырӟанэд ӟеч пӧрмем шуизы. Егит кышномуртлэн аслыз ачиз осконэз юнмаз, мылкыдыз ӝутскиз. Кырӟан бӧрсьы кырӟан кылдытъяны кутскиз. Аслаз кылъёсыз сяна, тодмо кылбурчиослэсь но гожъямъёссэс кутыны дӥсьтӥз ни. [5]

Галина Романовалэн, Светлана Любимовалэн, Любовь Тихоновалэн, Зоя Трухиналэн, Людмила Хрулёвалэн, Пётр Захаровлэн кылъёссыя кырӟанъёс кассета вылэ гожтэмын. [1] «Шонерзэ вераса, нылкышно творчество мылкыд вылын кылдэ. Улонысь кусыпъёс, синмаськыны, куректыны, ваньзэ сюлэм пыр поттыны быгатон юрттэ выль вамыш лэсьтыны», – вера ас творчествоез сярысь Ада Диева. [1]

Лыдӟиськисьёсын пумиськон Чайковский карын

2004-тӥ арын творческой ӝыт ортчытӥз. Калык туж шуныт пумитаз егит артистэз. Концертъёс со ӵем уг ортчыты. Со капчи уж ӧвӧл уга. Концертъёсты ар пала дасяське, программазэ но, дӥсьёссэ но выльдыны тыршэ. Эстрадае потон сярысь Ада ӧз малпаськы вал. Тросгес фольклорен, классикаен тунсыкъяськылӥз, солы калык гуръёс матынэсьгес вал… Но «Дэмен» но «Удмурт кенеш» огазеяськонъёслэн радъям «Лымыгырлы» нимо ужрадысен ваньмыз воштӥськиз. Со ужрадэз Ада Сергей Саваен ӵош ортчытӥзы. Соку ик «Лушкем яратон» кырӟанэныз нырысьсэ сцена вылэ потыны кылдӥз. учкисьёс кырӟанэз шуныт пумитазы. [6]


Удмурт крезьгурчи шуиськом но, кырӟанъёсыд ваньмыз ик бигер шӧмоесь кадь, шуса юамъёслы, Ада серектыса вера:«Озьы шат?! Одӥгез гинэ ук!.. Ма мон ачим уг шодӥськы кадь... Собере Башкириысь удмуртъёслэн гурзы, татын сярысь, конечно, мукетгес – бигер шӧмоесь ик вань… Озьы ке но мон асме чылк-чылк удмурт кышномурт шуисько. Улыны но Удмуртиын ярагес. Башкириын мыным шоканы омыр ик уг тырмы». [4] Ада Диевалэн кылбуръёсыз сӥземын яратонлы, кышномуртлэн но пиосмуртлэн кусыпъёссылы.

Туж кема мон тонэ малпаса,

Шыпытэ йыроми одӥгнам.

Уйшор тӧл небытак веттаса,

Вуттылӥз кылъёстэ пель сьӧрам.


Кемалась мон возьмай ваземдэ,

Тон ачид ик сётӥд куарадэ.

Шунды си, дыр, кузьмаз тусбуйдэ,

Пыраклы сутыны сюлэмме.

Ада Диевалэн ужам-тыршемез адӟиськытэк ӧз кыльы. 2012-тӥ арын сое кутӥзы Удмуртиысь Писательёслэн огазеяськоназы. [7]

Туэ Адалэн нырысетӥ кылбур бичетэз потӥз. «Юг Индур» нимам со книгазэ. Башкортостанын вордӥськем Ада Диева ас шаерзэ, анай-атайзэ, песянай-песятайзэ сӥлы каре, дунъя. Пинал дырлы, вордскем шаерлы, сям-йылолъёслы сӥзем гуръёс сюлэмез шунто, мылкыдэз бурдъяло («Атаелы», «Дуно песяелы»).

Удмуртьёслэн одӥгез тунсыко йылолзы палэзьпуэн герӟаськемын. Та писпу сьӧд кужымъёслэсь уте. [8]

Пичигес дыръёсам нюлэскысь

Мерттыны бырйиськем палэзыпу.

Шӧдӥськем, дыр, утись со писпу...

Берлогес ни валай,

Мон мусо песяе вераку:

«Кисыяд одно нуллы,

Нылы,

Палэзь вай,

Со утёз

Лулдэ, кужымдэ но

Шуддэ».

А. Диевалэсь лирической кылбуръёссэ чакласа, поэзизэ куинь люкетъёслы висъяны луэ: анай-атайлы сӥзем чуръёс; вордскем шаерез, инкуазез данъян; эрик сярысь. [8]

Кылбурчи переводъёс бордын но кужымзэ эскере: ӟуч но бигер кылъёсысь кылбуръёс, кырзанъёс берыктылэ. Ӟуч кылысь А. Демьяновлэсь, В. Глушковлэсь, А. Вепрёвлэсь, Н. Затеевлэсь, Р. Хамидуллинлэсь кылбуръёссэс удмурт кылэ берыктӥз ини. Быдӟым бигер поэтлэсь, классиклэсь Г. Тукайлэсь берыктэм кылбуръёсыз Кузонын куать кылын потэм «Габдулла Тукай. Кылбуръёс» (2011-тӥ ар) книгае пыртэмын. Биектаулылэсь бигер кылысь кылбуръёссэ но кырӟанъёссэ берыктӥз, кырӟанъёсызлы крезьгур гожтӥз. Адалэсь кылбуръёссэ ӟуч кылэ берыктэ тодмо кылбурчи, переводчик А. Демьянов. [8]

Наградаосыз но премиосыз

Печатья но ивор вӧлмытонъя министерстволэн Данъян грамотаез, 2000.

Башкорстанын ортчем «Ӝужась кизилиос» конкурслэн лауреатэз, 2002.

Удмурт Элькунлэн Кун Кенешезлэн Данъян грамотаез, 2011.

Н. Бурашников нимо премилэн лауреатэз (Чайковский), 2011.

Культурая, печатья но ивор вӧлмытонъя министерстволэн Данъян грамотаез, 2012.

Книгаосыз

Юг Индур. – Ижевск : Инвожо, 1912. – 90 с.

Статьяосыз

Встряхнись, душа... : стихи / пер. с удмурт. А. Демьянов // Луч. – 2011. – № 5/6. – С. 12–13. – Содерж.: "Очнись, душа! Встряхнись и воскрыли – ..." ; "И опять я бес-сонную ночь привечай..." ; "Стихло гром, воссияние молний..." ; Заветное мечта-нье ; "А снег на улице и валится, и кружится..." ; Тайная любовь ; "И мое ретивое – не камень..." ; "О, душа! Не сорвись на ошибке..." ; "По семицветке-радуге гуляю..." ; "Слова мои, слова не радуют..." ; Море лазурное ; Рассвет ; Ландыш.

Грезится мне молодое цветенье : стихи / пер. с удмурт. А. Демьянов // Луч. – 2010. – № 7/8. – С. 34–35. – Содерж.: "Маме и отцу..."; Красивая поляна ; "Обрядилась черёмуха в цвет-кружева..." ; "Животворно земли материнское лоно..." ; "Белой лебедью, гордою птицей..." ; "Годы вы, годы, летучие тени..." ; "Под ношей моей неизбывной печали..." ; "Во всём с тобою в доле я..." ; "Долго-долго в потёмках блуждаю..." ; "Придёт, манящ и невесом...".

Очнись, душа! ; «Обрядилась черемуха в свет-кружева…» ; Красивая поляна ; «Животворно земли материнское лоно…» ; Ландыш / пер с удмурт. А. Демьянов // С юбилеем, институт!  : лит. сб. – Ижевск, 2011. – С. 59–61.

Толон вӧтай вал мон тонэ... : кылбуръёс // Кенеш. – 2013. – № 3. – С. 32-36. – (Поэзия). – Вакчияк авторез сярысь гожтэмын

"Тӧдьы юсь кадь лобай мон эркын..." ; "Жал-ль бӧрдӥсь синъёсме..." ; Ой, кыӵе тон... ; Пот пумитам : кылбуръёс // Ашальчи. – 2005. – № 4. – С. 13

Тӧдьы юсь кадь лобай мон эркын... : кылбуръёс // Кенеш. – 2008. – № 10. – С. 62–65. – Содерж.: Ошья ; "Синмаськон вань уга..." ; "Уясь пилемъёс нош нуо кайгу-ме..." ; "Куке мӧзмисько вордӥськем гуртэлэсь..." ; "Мон тонэ туж кема малпаса..." ; "Мыжыкен жугемлэсь но юнгес..." ; "Тӧдьы юсь кадь лобай мон эркын..." ; "Мусое тон мынам, дуное..." ; Уйвӧт ; "Туж шуныт но мусо учкеме..." ; "Люкиським ни, ыштӥд тон монэ..." ; "Кӧлыны выдыкум..." ; "Ой, кыӵе тунсыко тон, умой..." ; "Ой, лулы, эн гинэ янгыша тон!..".

Шудбуре тон мынам ; Дуно песяелы : кылбуръёс // Удмурт дунне. – 2011. – 30 август. – С. 7.

Кырӟанъёсыз

Диева А. Витё тонэ : "Толон, туннэ но ӵуказе..." / кылъёссэ гожтӥз З. Трухина // Ашальчи. – 2005. – № 3. – С. 25.

Диева А. Тон мынам шумпотонэ / кылъёсыз Г. Романовалэн // Кенеш. – 2008. – № 5/6. – С. 68 ; Ашальчи. – 2008. – № 5. – С. 37.

Диева А. Чебер пияше : "Кытысь вуыса, син азям шедид..." / кылъёсыз но крезьгу-рез А. З. Диевалэн // Удмурт дунне. – 2007. – 28 ноябрь. – С. 6.

Диева А. Яратон : "Оло утчай мон тонэ – яратонэ..." / кылъёсыз но крезьгурез А. З. Диевалэн // Удмурт дунне. – 2007. – 28 ноябрь. – С. 6.

Хаким Р. Эн вера тон ӝож кыл! : "Ноку но эн вера тон ӝож кыл..." / кылъёсыз Р. Чурагуловлэн ; удмурт кылэ берыктӥз А. Диева // Байгурезь (Дебесы). – 2005. – 30 март.

Шабалин Н. М. Азьло ик синмаськысал : "Туж мусо, туж етӥз..." // Ашальчи. – 2005. – № 3. – С. 25.

Берыктэмъёсыз

Ву дур вадьсын // Байгурезь (Дебесы). – 2005. – 30 марта.

Глушков В. Егит кыльысал на... ; "Коньывуон но ортчоз ни..." : кылбуръёс // Кенеш. – 2012. – № 3. – С. 57.

Затеев Н. Тает снег = Шуна лымы // Настроение = Мылкыд / Николай Затеев. – Глазов, 2011. – С. 83–113.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 1,3 1,4 1,5 1,6 Диева А. Мӧзмон : Ада Диева // Ашальчи. – 2005. – № 4. – С. 12–13.
  2. 2,0 2,1 Хайдар Р. Крезьгура но кырӟа Ада // Удмурт дунне. – 2007. – 28 нояб. – С. 6.
  3. 3,0 3,1 Диева А. Кырӟаса лэзём али // Удмурт дунне. - 2003. – 25 июля. – С.13.
  4. 4,0 4,1 Соловьева Н. Ворекъясь шудбур сиос // Известия Удмуртской Республики. – 2007. – 11 янв. – С. 12.
  5. 5,0 5,1 5,2 Романова Г. Пӧзись ошмес ӧръяське // Удмурт дунне. – 2004. – 7 мая. – С. 12.
  6. Любимова С. Ваньмыз кутскиз «Яратон» бордысен // Инвожо. – 2001. – № 4. – С. 31; 34.
  7. Тихонова Л. Кытын удмурт гожъяськисьёс? // Удмурт дунне. – 2012. – 14 март. – С. 1.
  8. 8,0 8,1 8,2 Зуева-Измайлова А. Азькыл // Юг Индур / А. З. Диева. – Ижевск, 2012. – С. 3–7.