Тихонова Любовь

Материал из Воршуда
Перейти к: навигация, поиск

Любовь Ивановна Тихонова – удмурт кылбурчи, журналист, Россиысь гожъяськисьёслэн огазеяськонзылэн ёзчиез, Россиысь журналистъёслэн огазеяськонзылэн ёзчиез Удмурт Элькунлэн лулчеберет удысын сӥё-дано ужась

00000003.JPG

Улон сюресэз

Любовь Ивановна Тихонова вордӥськиз 1959-тӥ арын 26-тӥ тулыспалэ Пичи Пурга ёросысь Аксакшур гуртын колхозникъёслэн семьяязы. Отын ик йылпумъяз 8 классэз. [1]

«Пичи дыры тужгес но шудо ортчиз», – шуэ Любовь Ивановна. Уго со бадӟым, тямыс нылпиё, семьяын будэмын. Котьку но ӵош, тупаса улӥзы, ужаллязы. Дядяйзы пиналъёссэ ужлы дышетӥз. Книга-газетэз яратон мылкыд нэнэйзы пыӵатӥз. Ӝытъёсы эстӥськись гур вӧзы ваньзы ӵош пуксё но, анайзы пиналъёслы удмурт книгаосты, журнал-газетъёсты лыдӟе. Пичи Люба ялан ас понназ книга гожъяса-лэсьтылыса-вурылыса шудылӥз. Нош куке «Дась лу!» газетын материалъёсыз печатласькыны кутскизы, гожъяськон мылкыдыз эшшо но ӝутскиз. Газет баме печатласькем понна почта пыр кузьым-книга келяллязы. Солы шумпотыса, нылаш пыд улысьтыз музъемез шӧдытэк ветлылӥз. Гожъяськон мылкыдзэ эшшо Герман Алексеевич Ходырев ӝутказ на. [2]

Дышетсконзэ азьланьтӥз Кечолысь шор ёзо школаын. Кылбуръёс гожъяны мылкыдзэ жутӥз Вова агаез. Но кызьы шуэ ачиз Л. Тихонова, "ваньмызлы кутскон сётӥсь луэ, дыр, нэнӥе".

Со сяна, солы литературно-творческой кружок но юрттӥз. Аксакшур школаын сизьыметӥ классын дышетскыкуз, эшъёсыныз ӵош тодмо кылбурчилэн Анатолий Перевозчиковлэн кружоказ ветлыны ӧдъяз. Сьӧд сутэр синмо, чиль-чиль сьӧд йырсиё, шунды кадь пальышась нылмурт занятиосын мыло-кыдо тыршиз.

Быдэ вуэмъяз улон Любовь Тихоноваез котькуд пала сэрпалляз: школазэ йылпумъяса кӧня ке ужаз Ижевскысь типографиын но, Пичи Пургалась ветлабораториын но, Ярын потӥсь "Сельская правда" ёрос газетын кылкутӥсь секретарьлэн юрттӥсез но вал. Нылаш дышетскыны пырылӥз Глазовысь пединститутэ, собере ыстӥзы Москваысь полиграфической институтэ. Кӧня ке ар писательёслэн огазеяськоназы секретарь луыса ужаз.

1990-тӥ арын "Инвожо" журнал потыны ӧдъям бере Л. Тихонова отын машинисткаын, корректорын ужаз, журналистозь будӥз. Ужан висказ ик заочно дышетскиз УдГУ-ысь филология факультетын.

2009-тӥ арын выже «Удмурт дунне» газетлэн редакцияз.

2003-тӥ арын кылбурчиез Россиысь Писательёслэн огазеяськоназы кутӥзы.

Удмуртлыкез азинтонэ, удмурт огазеяськонъёслэн ужазы мыло-кыдо пыриськемез понна 2011-тӥ арын Любовь Ивановна Тихонова Ашальчи Оки нимо премиен пусъемын. [3]

Гожъямъёсыз сярысь

"Пичи Иви" нимо нырысетӥ кылбурзэ Любовь Тихонова гожтӥз 7-тӥ классын дыръяз, со потӥз "Дась лу!" газетын. Кылбурчи туж шуныт кылъёс вера удмурт кылъя но литературая дышетӥсезлы А. А. Вахрушевалы. Со сяна, солэсь гожъяськон мылкыдзэ бурдъяз Г. А. Ходырев. Кылбуръёсыз трос гинэ люкаськизы ке но, книгаен печатланы ӧз дырты. Нош нырысетӥез "Лымыгырлы" сборникез 1994-тӥ арын потӥз. [4]

Кыкетӥез "Лул-сюлэм" (2002) бичетэз лыдӟись кие вуиз тямыс ар ортчыса.

Кылбуръёс пӧртэм ужпумъёс сярысь верало но поэтессалэсь мылкыдзэ, малпанъёссэ возьмато.

Мукет кылбурчиос сямен ик, Л. Тихонова но анайзэ данъяса, гожтэ "Огшоры кузьыме" кылбураз:

Огшоры кузьымме

Кузьмало ни тыныд,

Муспотон мемие,

Та кылбур чуръёсме.

Соин ӵош автор туала вакытэ улонлэсь пӧртэм палзэ но сэрттэ-пертче. Тани со улэ, ужа удмурт калыклэн столица шуоназ — Иж карын, нош солы отын ӝокытгес но вордскем атай юртаз кадь шуныт ӧвӧл. "Малы мыным ӟоскыт та городын" кылбурез троссэ лыдӟисьёсты малпаськытоз. Озьы Л. Тихонова трос удмурт адямиослэсь мылкыдзэс вераз: уго шовинист мылкыдо муртъёс али но кырыж учко удмурт шоры, со номыр но уродзэ ӧз ке но лэсьты, солэсь поттэм няньзэ сиё но йӧлзэ юо ке но. Со — удмурт, соин ик со янгыш ас вордӥськеменыз. Соин ик поэтесса вазиське: "Малы, Иж кар, ӧд лу тон атай юрт?!".

Таӵе секыт мылкыдо кылбуръёсын артэ чылкак мукет адско вордскем гуртэз сярысь чуръёсыз:

Lt2.jpg

Тани со, вордӥськем интые,

Шыпытак каръяське Аксаке.

Чус сыло урамын коркаос,

Выжыкыл кадь мадё бурдоос,

Мунчо зын лӧсъяське омыре,

Тулысэн шокыштэ ни шоре.

Пу вандэ, пильылэ бускеле,

Кыдёкын ик ӧвӧл вож тэле.

Востэмлэсь но востэм капкаос.

Ваче син кырмышто укноос:

Одӥг-ог поттыло куаразэс.

Тон-а, мон-а меда чебергес?

Таизлы ик матын "Аксаке — мынам доре" кылбур но. [4]

Любовь Тихоновалэн бичетэз огазея пӧртэм темаосты: кылбурчи но кылбуран, улон но кулон сярысь малпаськон, город но гурт кусыпъёс, яратон, дорез сӥлы карон но мукет. Соос пӧлын тужгес но висъясько яратон, улон но кулон сярысь кылбуръёсыз.

Автор валтӥсь малпанъёссэ, дунне шӧдонзэ нырысетӥ бичетысьтыз "Огшоры улон" кылбурын шараяз:

Огшоры улонэ,

Ог-пӧртэм чиданэ,

Шудбуре — тӧлсяська,

Пельтытэк но куашка",

Вуюись — осконэ,

Со кылдэ но быре".

Яратонлы сӥзем кылбуръёсаз шараяське солэн палдурес луэмез. Лирической героинялы шудо луыны люкетэ гажанэзлэн кышнояськемез ("Кылдэмез озьы", "Кык кияд ик зундэс", "Ӵок, кошкид ке кошкид...", "Ӵогиз-пилиз сюлэмме", "Та тӧдьы кышетэ..."). Со шӧдэ: воргорон тупатэм улонзэ юри, соин огазе луон понна, уз тӥя. Кусыпсы соослэн кемалы ӧвӧл бере, oг-огдэ яратыса, гажаса валче улон сярысь малпан но быдэсмонтэм луэ. Лирической героинялэн адӟонэз — оген улон. Оген кылён гур Л. Тихоновалэн кылбуретаз бадӟым инты басьтэ: яратон лирикаын гинэ ӧвӧл, мукет кылбуръёсын но. Гажано муртэз понна нюръяськыны со дышемын ӧвӧл, уг но быгаты:

Ӧвӧл со мынам яратон дусыме,

Уг тырмы аслым карыны кужыме.

"Ӧтё куное"

Воргоронлэн улоназ лирической героиня валтӥсь инты уг басьты — сыӵе солэн шӧдонэз. Оло, соин но ачиз шоры куд-ог дыръя со ултӥясагес учке, аслаз адӟонэныз уг ченгешы. Со шудо ини, яратонзэ пумитаз шуыса. Таӵе югдур тодэ вайытэ Н. Байтеряковлэсь поэзизэ, озьы ик мукет нылкышно кылбурчиослэсь чуръёссэс. [5]

Любовь Тихонова ӟеч быгатэ нылмуртлэсь-кышномуртлэсь сюлмаськонъёссэ суреданы. Кылбуръёсаз шӧдӥське улонмы сярысь малпаськемез, отысь ассэ утчамез, чигиськон пыр аслэсьтыз шудзэ, яратонзэ шедьтыны турттэмез. [6]

Пичи Пурга ёросысь Вуж Монья школаын дышетскись Л. Михайлова Любовь Тихоновалэсь творчествозэ ӵошатэ Ашальчи Окилэн творчествоеныз. [7]

Та автор озьы ик гожъя серемес веросъёс, юморескаос, нылпиослы выжыкылъёс. Витьтонлэсь тросэз кылбуръёсыз кырӟан луэмын, одӥг-огезлы ачиз ик гур но кылдытэ. Нош «Удмурт нылкышно» кылбурезъя кырӟан удмурт нылкышнолы гимн выллем луэмын ини. [2]

Кылбуръёссэ эскерыса, вераны луоз: Л. Тихоновалэн кылбуран дуннеезлэн аспӧртэмлыкез кылбурысь кылбуре яркытгес чильпыра, адӟиське кылбурчилэн будэмез. Со палэнскыны быгатэ яратон сярысь гинэ гожъяськонлэсь но гожъяськон дуннеезлэсь ӧръёссэ паськытатэ. [5]

Наградаосыз но премиосыз

Ашальчи Оки нимо премилэн лауреатэз.

Удмурт Элькунысь печатья но ивортодэтъя министерстволэн данъян кагазэз, 1994.

Удмурт Элькунлэн Правительствоезлэн данъян кагазэз, 2002.

Библиография

Книгаосыз

Лул-сюлэм : кылбуръёс, кырӟанъёс. – Ижевск : Удмуртия, 2002. – 160 с.

Лымыгырлы : кылбуръёс. – Ижевск : Удмуртия, 1994. – 79 с.

Статьяосыз

9-тӥ Май ; Песятай ӧз берты ни доре // Удмурт дунне. – 2010. – 20 апр. – С. 7. – (Быдӟым Вормонлы – 65 ар).

Азбарын кузё // Удмурт дунне. – 2005. – 9 февр.

Акрочуръёс сӥзисько... // Удмурт дунне. – 2009. – 3 марта. – С. 7.

Анаез асэныд воштӥськод : нылпи садын ужасьёслы // Удмурт дунне. – 2011. – 27 сент. – С. 6.

Ассэ ачиз пӧяз // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 104–105.

Ӧвӧлтэм шудэ = "Как в чаще лесной – костяника..." / удмурт кылысь берыктӥз Р. Казакова // Удмурт дунне. – 2008. – 27 мая. – С. 4.

Вукарнан : выжыкыл / иллюстрациез И. Лопатиналэн // Кизили. – 2006. – № 11/12. – С. 11.

Гондырнюк : эссе // Удмурт дунне. – 2010. – 21 сент. – С. 7.

Дугдылӥсьтэм : Ар-Сергилы эшлыко чуръёс // Удмурт дунне. – 2006. – 7 июля. – С. 15.

Дуно, зарни куноосы : улонысь учыр // Удмурт дунне. – 2009. – 25 авг. – С. 6.

Жалямысьтым жалязы ; Лушкаськись мокоос : улонысь учыръёс // Удмурт дунне. – 2011. – 15 июля. – С. 15. – ("Лӧпшо Педунь серекъя" конкурсэ).

Инмарен кылдытэм лулъёс : верос // Удмурт дунне. – 2009. – 15 сент. – С. 6.

Казакова Р. Ф. Чакласьконо ке... ; "Котькытын мон мед луом..." ; Ӵыдонтэм яратонэ ; Кыдёкысь гожтэт // Удмурт дунне. – 2008. – 27 мая. – С. 4.

"Как в чаще лесной костяника..." / пер. Р. Казаковой // Удмурты. – М., 2005. – С. 333.

Кӧл ни, пие ; Пу трактор ; Басьтэ школае // Зарни дэремен шунды : семьяын лыдӟон книга. – Ижевск, 2006. – С. 100.

Котьку тон сюлэмамы // Ӟечбур! – 2010. – 7 окт. – С. 3.

"Лымыгырлы" бичетысь ; "Лул–сюлэм" бичетысь // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 258–269.

Малы мыным ӟоскыт та городын = Miks on linnas kitsas... ; Усьтӥське огдырлы = Üürikeseks avaneb... ; Мултэс потӥськод = Näid liigne olevat... ; "Сьӧлыктэм сьӧлыко..." = Patuta patune naine... : [кылбуръёс] // Kuum ӧӧ : suome-ugri ranvaste tanapaeva luulet. – Tallinn, 2006. – С. 378–381. – На удмурт. и эст. яз.

Милемыз витиськод // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 224.

"Мне душен ты, угрюмый Камень-Город..." ; "От тихой печали до тяжкого вздоха..." ; "Город в халате тумана, дома и аллеи..." / пер. А. Демьянова // Удмурты. – М., 2005. – С. 333–334.

Мусое, чаль мон кие... : улонысь учыр // Удмурт дунне. – 2009. – 28 июля. – С. 8.

Нырысетӥ дышетӥсь // Удмурт дунне. – 2010. – 14 дек. – С. 5. – ("Дуннеез усьтӥсь" конкурсэ ).

Ой, малы? // Ашальчи. – 2007. – № 5. – С. 36.

Пинь кыскась Гондыр : серемес мадёс // Удмурт дунне. – 2011. – 22 апр. – С. 15.

Сьӧлыктэм нылашлэн сьӧлыкез : улонысь учыр // Удмурт дунне. – 2010. – 6 июля. – С. 6.

"Та Толикмы тыл но тыл..." ; "Ой, йӧно ик та Лариса..." ; "Чылкак пайме та Онись..." ; "Тон кема-а куатаськод на..." ; "Гур дурын берга Люба..." ; "Ой, тузӥ дӥсяськемед..." / иллюстрациез Вяч. Михайловлэн // Кизили. – 2009. – № 2. – С. 11 : рис.

Тон понна мон – ӟеч куно // Кенеш. – 2009. – № 2. – С. 3–8 : фот.

Удмурт нылкышно // Вордскем кыл. – 2008. – № 10. – С. 19.

Удмуртская женщина / пер. В. Глушкова // Удмурты. – М., 2005. – С. 332–333.

Ческыт лым : улонысь учыр // Удмурт дунне. – 2010. – 29 дек. – С. 7.

Шедьтос : улонысь учыр // Удмурт дунне. – 2009. – 29 сент. – С. 7.

Шуд но бур кузьмаса // Удмурт дунне. – 2009. – 31 дек. – С. 23.

Шумпотон ваёз Выль ар // Удмурт дунне. – 2010. – 28 дек. – С. 7.

Эмчилы ; Дышетӥсьлы ; Вордӥськем нуналэн ; Витьтон ареслы ; Нуны сюанлы ; Коркатуйлы ; Выль арен ; Тулыс праздникен ; Салдат пилы ; Дорлы ; Удмурт нылкышно кенешлы // Кенеш. – 2010. – № 9. – С. 42–45.

Юнме ӧвӧл : В. Васильевалы сӥземын // Удмурт дунне. – 2007. – 7 авг. – С. 7.

Яратӥсько тонэ, Пурга! // Малая Родина – большая любовь. – Малая Пурга, 2010. – С. 4.

Кырӟанъёсыз

Антонова Е. Удмурт нылкышно // Ашальчи. – 2008. – № 1. – С. 34 ; Кенеш. – 2005. – № 9. – С. 89 ; Ашальчи. – 2009. – № 1. – С. 29.

Бекманов Г. И. Кылбурчилы : "Шудо муртъёс уг гожъяло кылбур..." // Кенеш. – 2008. – № 1. – С. 110.

Ганьков Г. Мон уг луы туганэд // Кенеш. – 2008. – № 5/6. – С. 58.

Карпов В. С. Тон эн ветлы, монэ утчаса : "Сюлэмдэ мон азьын чигыса..." // Удмурт дунне. – 2008. – 25 марта. – С. 6.

Кириллов С. К. Дауре быриз // Ашальчи. – 2008. – № 4. – С. 28 ; Ашальчи. – 2010. – № 3. – С. 23.

Кириллов С. К. Дауре ортчиз... : "Яратӥ-а оло ӧй -а..." // Удмурт дунне. – 2011. – 18 янв. – С. 6. – (Шудэлэ тӥ, серектэ) ; Кенеш. – 2008. – № 5/6. – С. 13–14.

Кириллов С. К. Уйвӧтам вуылӥ Париже : "Уйвӧтам вуылӥ Париже..." // Кенеш. – 2010. – № 2. – С. 108–109.

Корепанова А. Мемиелы // Кенеш. – 2005. – № 9. – С. 31–32.

Корепанова А. Шумпотон синвуос // Кенеш. – 2008. – № 5/6. – С. 61.

Коротаев В. Усьтӥське огдырлы : "Веттаськись пучы выллем ик..." // Пою тебя, мой край родной : сб. песен композиторов-любителей Удмуртии. – Ижевск, 2008. – С. 24.

Крестьянинов В. Чиданэ ке быриз : "Кӧня-о чидалом на тонэ..." // Удмурт дунне. – 2006. – 3 окт. – С. 7.

Кузнецов П. Н. Табань : "Йӧл но, вӧй но – ваньмыз вань // Удмурт дунне. – 2006. – 10 марта. – С. 14.

Кузнецов П. Н. Шуд но бур кузьмаса : "Лымыез пурӟытыса..." // Кенеш. – 2011. – № 5/6. – С. 9.

Орлова Р. Сяськаос : "Бакча берысь ӵуж сяськаез..." // Удмурт дунне. – 2009. – 4 марта. – С. 7.

Оськин М. Кӧл ни, пие : "Кӧл ни, пичи пиёке..." / крезьгурзэ тупатъяз Ю. Толкач // Вакыт (Игра). – 2005. – 16 сент.

Постников Н. Е. Аслам кадь : "Вордӥськем гуртэд но..." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 101.

Самсонова, Галина. Выль арез пумитаськом : "Вамыштэ ни дорамы..." / крезьгурез Галина Самсоновалэн ; кылъёсыз Любовь Тихоновалэн ; иллюстрациез Галина Ивановалэн // Кизили. – 2013. – № 1. – С. 11 : цв. ил.

Самсонова Г. Н. Школаен люкиськон : "Ӵуж италмас сяськаосты..." // Удмурт дунне. – 2010. – 14 дек. – С. 5. – ("Дуннеез усьтӥсь" конкурсэ ).

Зорина О. Синъёсам учкемед // Ашальчи. – 2008. – № 6. – С. 27.

Ураськин А. И. Асьмеос кулэ ог-огмылы : "Кемалась ӧй адӟы ни тонэ..." // Ашальчи. – 2011. – № 1. – С. 21 ; Кенеш. – 2008. – № 5/6. – С. 60.

Ураськин А. И. Кӧл ни, пие : "Кӧл ни, пичи пиёке..." // Ашальчи. – 2011. – № 1. – С. 19 ; Кенеш. – 2008. – № 5/6. – С. 8.

Ураськин А. И. Ой, малы? : "Ой, малы со ӝытэ..." // Кенеш. – 2008. – № 7. – С. 111 ; Ашальчи. – 2011. – № 1. – С. 14.

Ураськин А. И. Уг пот тонэ пӧям : "Курисько, эн ветлы ни сьӧрам..." // Ашальчи. – 2011. – № 1. – С. 15.

Уткина Н. Олокызьы // Кенеш. – 2008. – № 5/6. – С. 65.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. Ермаков Ф. Любовь Тихонова (1959) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 110–111.
  2. 2,0 2,1 Тихонова Л. «Осконэ – яратон» // Кенеш. – 2009. – № 2. – С. 86–89.
  3. Панфилова Е. Яратон бордысь – мылкыд! // Удмурт дунне. – 2011. – 4 мая. – С. 2.
  4. 4,0 4,1 Ермаков Ф. Тихонова Любовь Ивановна // Пурга ёросын вордскем писательёслэн творчествозы / Ф. К. Ермаков. – Ижевск, 1999. – С. 117–124.
  5. 5,0 5,1 Федорова Л. Любовь Тихонова (1959) // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 257-277.
  6. Пискунова М. Нылкышно кылбурасьёс // Выль даур. – Можга, 2003. – 7 июнь. – С. 2.
  7. Михайлова Л. Пурга музъемлэн Ашальчиез : Л. Тихоновалэн творчествоезъя олимпиадае вуэм реферат // Вордскем кыл. – 2001. – № 8. – С. 72–77