Трухина Зоя

Материал из Воршуда
Перейти к: навигация, поиск

Зоя Аполосовна Трухина (Трефилова; 1949-тӥ ар 4-тӥ пӧсьтолэзь, Кез ёрос, Вортча гурт – 2017-тӥ ар 30-тӥ южтолэзь, Ижкар) - удмурт кылбурчи, Россиысь гожъясьёслэн огазеяськонзылэн ёзчиез.

Зоя Трухина

Улон сюресэз

Зоя Трухина вордӥськиз Кез ёросысь Вортча гуртын 1949-тӥ арын 4-тӥ пӧсьтолэзе. Анайзы вань улонзэ колхоз ужен выриз. Семьяын ньыль нылпи будӥз, Зоя – самой пичиез. [1]

Нунокеныз, 2001

Анайзы соосты огназ пыд йылазы султытӥз. Бадӟымъёсызлэн агай-апайёсызлэн атайзы тылӝуэ быриз, нош Зоялэнэз атаез соосын ӧз улы. Война бырем бере но ай туж секыт йӧтӥз. Семьязы атайзылэн выныныз одӥг коркан улӥзы, атайзы ӧз луы ни но, соосыз коркасьтызы поттӥзы. Пичигес корка пуктыса, отын улӥзы. Нылаш ужаны ярамон будӥз но, агай-апайёсыз дорысьтызы кошкизы: апайёсыз бызизы, агайзэ армие басьтӥзы. Юртъер котырысь вань уж Зоя вылэ усиз. Анаеныз кыкназы куамын сотка музъемзэс утялтӥзы, турын но тыбыр вылазы нуллӥзы… [2]

Туж дышетскемез потэ вал медучилищеын — ӧз кылды. Анаез юрттыны уг быгаты шуиз, ньыль ар дышетоно вал ук. Сад утись-будэтӥсь но луэмез потэ вал. Эшеныз ӵош Парзие та ужлы дышетскыны но мынӥзы вал. Но бере кылиллям. Озьы 1965-тӥ арын Пужмезь школаез йылпумъяса, Глазкарысь торгово-кооперативной училищее дышетскыны пыриз. Сое 1967-тӥ арын йылпумъяса, кошкиз городэ. Отын кӧня ке арзэ ужаз вузкарись луыса. [3]

1970-тӥ арын Зоя лыктӥз Ижкарысь механической заводэ. Вить ар ужаса гинэ, солы огъя улонние инты сётӥзы.


Тямыс ар тыршиз станок дорын. Пумен заводын ик ужась егитъёслэсь ӝыт школазэс йылпумъяз.[2]

Бугырес улон сюресэтӥ йӧн вамышъяны солы туж юрттӥз Горькийысь промышленно-экономической техникумын заочно дышетскемез. Отын со дышетскиз 1978–1979-тӥ аръёсы.

34 ар заводын ужатозяз пӧртэм ӧнеръёслы дышиз: фрезеровщик но, шлифовщик но, штамповщик но мукет. Будӥз техник-плановикозь. 2004-тӥ арын шутэтскыны потӥз, заводлэн ужысь сӥё-дано ветеранэз луиз.[4]

З. А. Трухина улонысь кошкиз 2017-тӥ арын 30-тӥ южтолэзе, кема висьыса улэмез бере. [5]

Гожъямъёсыз сярысь

7-тӥ классын дышетскыкуз, Зоя одӥг пияшлы синмаськем. Солы сӥзьыса кык кылбур гожтэм. Бӧрысь со ужъёссэ вунэтэм. Но аръёс ортчыса кылбуран мылкыдыз ӧръяськиз. [3]

Заводын ужакуз, сиськон дыр вискын, кылбур чуръёс кылдӥзы. Соосты кинлы ке возьматэмез потӥз. Вӧзысь отделын Ираида Андреевна удмурт нылкышно ужа вал. Солы возьматоно кариськиз. Нош со Анатолий учкоз ай, пе. Со вылэм кузпалыз Анатолий Николаевич Уваровлэн, со вакытэ «Кенеш» журналлэн валтӥсь редакторез. Тӥни озьы 1988-тӥ арын пӧсьтолэзе "Кенеш" журналын "Мемиелы" но "Пужымъёс"кык кылбурез потӥз. Собере мукет изданиосы но сюрес лёгиз. «Удмурт дунне» газет бордын соку литкружок ужа вал, отчы ветлӥз. Кылбуръёсыз печатласькизы «Инвожо», «Ашальчи», «Вордскем кыл», «Дамский клуб», «Кизили» журналъёсын но «Удмурт дунне», «Металлист», «Звезда» газетъёсын. [2]

Ас кужыменыз но заводлэн юрттэменыз 1992-тӥ арын 3оя Трухина поттэ нырысетӥ кылбур бичетсэ – "Уй пал сяськаос", кыкетӥез печатласькиз 1994-тӥ арын "Быгато-а тонтэк..." ("Смогу ли без тебя...") нимын. Отчы пыртэмын удмурт но ӟуч кылбуръёсыз. 2005-тӥ арын лыдӟись кие вуиз куинетӥ бичетэз — "Мон вордски шаерам гурланы". Татчы пыризы кылбуръёсыз но кырӟанъёсыз. Вань кылбуръёсаз сямен ик, Зоя Трухина вордӥськем палъёссэ, Удмурт шаерзэ, гуртооссэ, калыксэ яратэмез сярысь вера. Шуныт мылкыдын тодаз вае пичи дырзэ, ӵош будэм эшъёссэ. Трос чуръёсыз инкуазь суредъёслы, шудтэм яратонлы но ортчись даурлы сӥземын. [4]

"Уй пал сяськаос" бичетэз нырысетӥ бамысеныз берпуметӥозяз пыӵамын кылбурчилэн уйпал шаерзэ, удмуртъёссэ мур гажаменыз, соосын ӵош сюлэмшугъяськеменыз. Валамон ини, авторлэн тросэз кылбуръёсыз сӥземын аныкай музъемлы, отысь шулдыр, чебер инкуазьлы ("Сяськаос — вордӥськем интые", "Пызеп шуре!", "Кулэ ӧвӧл зарни зундэс", "Шунтэ Вортча тылсие" но мукет). Со данъяське отысь котькуд писпуэн, сяськаен, нымы-кибыосын. Татын солы ваньмыз дуно: Пызеп шурез но, Чупчи возез но, пӧртэм нимо нюкъёсыз но. Вортча палъёсаз гинэ лирической героиня гадь тыраз шокчыны, сюлэмзэ усьтыны быгатэ. [4]

Кызьы шуэ Т. Чернова: "Зоя Трухиналэн лирической героиняез — улонысь пӧсь-кезьытэз адӟем кышномурт: удмуртлык куанермем пумысен шугъяськись, инкуазез саптамлы пумит кариськись, ас шудзэ-данзэ утьыны дась луись. Со дыре ик со ненег сюлэмо: весь оске на шуд сяськалэн ӝужанэзлы". Зэмзэ но, та кылъёс туж умой усьто лирической героинялэсь малпанъёссэ. [3]

Вордскем улослы сӥзем кылбуръёсаз автор анаез, оглом пересь муртъёсты гажан, данъян темаез но ӝутэ ("Адӟи уйвӧтам", "Учкисько мон шорад, мемие...", "Йыбырттӥсько тыныд", "Аръёс ортчо..." но мукет). Лирической героиня понна вордӥськем музъемез но, вордэм мемиез но — кыксы ик мусо нылзэс возьмась анайёс. Нош нылзы — дорзэ мур гажась, тау карон мылкыдын тырмем адями. Соин ик таӵе кылбуръёс ӵемысь йылпумъясько кыӵе ке куронэн яке кужмо вазиськонэн. [4]

Вордӥськем шаерез гажан темаен артэ бичетын пумиське яратон лирика но ("Уд малпаськы-а?", "Эн кысы", "Малы?" но мукет). Кылбурчи возьматэ кылбуретаз палдурес, шудтэм яратонэз, кудӥз удмурт нылкышно литератураын валтӥсь луэ. Лирической героиня понна яратоно муртэзтэк улон — со кезьыт тол, ӵуж куаръёсын сӥзьыл.

Пумиськон ӝыт

3. Трухиналэн кыкетӥ бичетаз "Быгато-а тонтэк..." пыремын ини пӧртэм жанрен произведенниос: кылбуръёс, одӥг новеллаез, кык сценкаез, кырӟанъёсыз но ӟуч кылын кылбуръёсыз. Татын но, нырысетӥ бичетын кадь ик, валтӥсь инты басьтэ вордӥськем улосэз данъян тема. Кылбуръёсыз пыӵамын публицистика мылкыдын, соин ик ӵемысь ӧтён, индылон интонация кылӥське. 3оя Трухиналэн творчествояз валтӥсь инты басьто пезьгыт гражданской пуштросо кылбуръёс. Нырысетӥ бичетэн ӵошатыса, кыкетӥяз вордӥськем шаер — со Кез, Вортча палъёс гинэ ӧвӧл ни, табере та валанэ Ижкар но пыре ("Кылбурме гожтӥсько...", "Ӝуатӥсько...", "Возь выл сяська кадь..."):

Уз, уз юнма калык,

Ас дорзэ гажатэк!

Шаердэ, Ижкардэ

Уть тон, возь сюлэмад,

Тыршы, будэт данзэ

Тон — татын,

Тон — дорад!

Кыкетӥ бичетын яркытгес шӧдӥськыны кутско улон-вылонэн но чеберлыкен герӟаськем ужпумъёс: автор ӧте удмуртъёсты ас кылынызы вераськыны, удмуртлыксэс утьыны ("Вордӥськем калыке!", "Яратӥсько...", "Выжытэк уд пушйы..."). [4]

Л. Кутянова шуэ: "Зоялэн аслаз куараез ӟечгес кылӥське удмурт калыкез понна шугъяськыса, сюлмаськыса гожтэм чуръёсаз. Удмуртлыклэсь пашмемзэ, начармыны кутскемзэ возьматыкуз, аспортэмлыко ӵошатонъёс, суредъёс, крезьгур шедьтэ.

Улон ӧрмы,

Пумем сугон кадь,

Чурытоме, чурытоме...

Удмурт дунне,

Пашмем тыпы кадь,

Уг быгаты ӝутны

Рос-прос

Удмуртлыксэ.

2005-тӥ арын лыдӟись кие вуиз 3. Трухиналэн куинетӥ "Мон вордски шаерам гурланы" бичетэз, нош ик пусъе авторлэн кылбуретэзлэсь валтӥсь малпанзэ. Та бичетаз пыризы кылбуръёс но кырӟанъёс. Йӧн интызэс шедьтӥллям нылпиослы сӥзем кылбуръёс, кудъёсыз огазеямын пичи гинэ "Пичиосы — мусокайёсы" люкетэ. Соос пыӵамын нылпиосты ӟырдыт яратонэн но улон шоры пиналъёслэн синмынызы учкыны тыршонэн ("Кучапи, кучапи", "Пичи нуноке тон мынам!", "Ымнырыд — пужы, пужы"). Таяз бичетын героинялэн шудо луонэз герӟаськемын нунокеныз но кузпалэныз, кудӥз сое валаны тыршиз, кудӥныз шудэз но кайгуэз ӵош ортчизы.

3оя Трухиналэсь кылбуръёссэ оглом учконо ке, солэн кылбуретаз туж бадӟым инты басьто инкуазен герӟаськем кылсуредъёс, ӵошатонъёс, олицетворение. Татын пусйыны луоз таӵе ӵем пумиськылӥсь образъёсты: сяська, возь, бусы, писпу. Сяськалэн образэз 3. Трухиналэн кылбуретаз ӵемысь герӟаськемын луэ пинал дырен, яратонэн, чеберлыкен но оглом капчи мылкыдъёсын, малпанъёсын ("Сяськаос — вордӥськем интые!", "Каньыра...", "Уд малпаськы-а?", "Нылылы" но мукет). [4]

Зоя Трухиналэн кылбуръёсыз эстрадной лирикалы матэкто. Автор данъя вордӥськем улосэз, анаез, удмурт кылэз, инкуазез; ваньзэ сое утьыны, чебертыны ӧте. Кылбурчилэн лирической героиняез улонысь шуг-секытъёсты адӟемын ке но, со ноку уг ышты умоезлы осконзэ, котькытысь шедьтыны быгатэ ӟеч палзэ, "шудтэк но шудо" луыны пӧрмытэ.[4]

3. Трухиналэн кылбуран дуннеез матын удмурт литератураысь эстрадной лирикалы. Солэн кылбуръёсаз нырысь интые потэ вордӥськем шаерзэ, удмурт калыксэ данъян. Лирической героиняезлэн сюлэмшугъяськонэз, куректонэз ас бордысьтыз потто.

Данакез кылбуръёсыз кырӟан луэмын. Асьме крезьгурчиосмы, Ольга Зорина, Николай Уткин, Пантелей Кузнецов но мукетъёсыз кылбуръёссэ синйылтытэк ӧз кельтэ. Калык яратыса кылзэ но, кырӟа но соосты. [4]

2006-тӥ арын Зоя Аполосовна Трухина Россиысь писательёслэн огазеяськонзылэн ёзчиез луиз. [1]

Премиосыз но наградаосыз

Удмурт Элькунысь лулчеберетъя министерстволэн Данъян грамотаез, 2009.

Библиография

Книгаосыз

Быгато-а тонтэк... : кылбуръёс, кырӟанъёс, сценкаос = Смогу ли без тебя : стихи, песни, сценки. – Ижевск : Удмуртия, 1994. – 74 с.

Мон вордски шаерам гурланы : кылбуръёс, кырӟанъёс. – Ижевск : Удмуртия, 2005. – 80 с. : ил., ноты.

Сӥзьыл лыктэ ни уйвӧтэ : быдэ вуисьёслы кылбуръёс / дасяз Р. О. Хайдар ; суредаз В. Е. Пахомов. – Ижевск, 1998. – 15 с. – (Прил. к журн. "Вордскем кыл").

Уй пал сяськаос : кылбуръёс. – Ижевск, 1992. – 55 с.

Статьяосыз

"Али гинэ вуи кадь Ижкаре..." ; "Кинэ яратӥсько, кинэ вунэтӥсько..." ; "Эх, аръёсы, аръёсы..." ; "Учкы, Коли, учкы, Мани..." ; "Пичи, пичи алекчи..." // Ӟечбур! – 2009. – 9 июля. – С. 4.

Берпум кырӟанъёс // Удмурт дунне. – 2006. – 18 окт. – С. 7.

Доре татын ; Дуно шаер ; Адями ке тон... ; Пинал дауре // Удмурт дунне. – 2009. – 3 июля. – С. 14 : фот.

"Ижкар ураме..." // Ӟечбур! – 2008. – 12 июня. – С. 1.

Кезьыт ; Компьютертэк мар карод?... // Кизили. – 2008. – № 5/6. – С. 3 обл.

Кечпие ; "Пичи, пичи..." ; Куашказ // Зарни дэремен шунды : семьяын лыдӟон книга. – Ижевск, 2006. – С. 101.

Лобӟись аръёслэсь пегӟисько // Кенеш. – 2009. – № 7. – С. 83–86.

"Люкало вордӥськем нуналам..." ; "Тонэныд, тонэныд..." // Инвожо. – 2009. – № 8/9. – С. 86.

Меӵак но могак // Удмурт дунне. – 2007. – 12 янв. – С. 15. – (Шӧкыч).

"Мяу! мяугетыса лыктэ писэй армы..." // Ӟечбур! – 2010. – 30 дек. – С. 1.

"Родной мой Кез!" ; "Бывает, жалуюсь на жизнь..." ; "Мне хочется вернуться..." // Звезда (Кез). – 2007. – 26 июня.

Синъёсаз – мӧзмон // Ӟечбур! – 2010. – 26 авг. – С. 5.

"Солы мон сӥзьысал инэз..." // Инвожо. – 2007. – № 3/4. – С. 54–55 : фот.

Сяськаос утялтэмез ярато // Ӟечбур! – 2010. – 9 дек. – С. 2 : фот. цв.

Тон шунты улостэ... : кылбуръёс // Кенеш. – 2011. – № 11/12. – С. 60-61. – Пуштросэз: "Кин уг яраты кылзэ..." ; "Данъяськисько..." ; "Тысьёсын сырмало..." ; "Йырдэ эн кары кур..." ; "Али гинэ, али гинэ..." ; "Ӧвӧл ни мылкыды..."

Тӧл шула ; Тол // Удмурт дунне. – 2009. – 22 дек. – С. 7.

"Уй пал сяськаос" бичетысь ; "Быгато-а тонтэк..." бичетысь ; "Мон вордски шаерам гурланы" бичетысь // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 238–250.

Улонмы – йӧ кадь // Герд. – 2007. – № 3 (март). – С. 3.

Шуныт гужем... ; "Бадӟым уже..." // Ӟечбур! – 2008. – 26 июня. – С. 3.

Кырӟанъёсыз

Диева А. З. Витё тонэ : "Толон, туннэ но ӵуказе..." // Ашальчи. – 2005. – № 3. – С. 25.

Постников Н. Е. Кузьмалод на меда?.. : "Кузьмалод на меда..." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 110.

Уткин Н. Кырӟасько ас поннам : "Кылисько ке огнам..." // Ашальчи. – 2009. – № 3. – С. 22 ; Кенеш. – 2008. – № 5/6. – С. 64.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 Зверева Т. Зоя Трухина (1949) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 111.
  2. 2,0 2,1 2,2 Кутянова Л. З. Трухиналэн кылбуръёсыз сярысь // Кенеш. – 2004. – № 7. – С. 84–85.
  3. 3,0 3,1 3,2 Чернова Т. «Кырӟасько ас поннам…» // Удмурт дунне. – 2004.- 6 июль. – С. 3.
  4. 4,0 4,1 4,2 4,3 4,4 4,5 4,6 4,7 Федорова Л. Зоя Трухина (1949) // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 237–257.
  5. Тихонова, Л. И. Уйпал сяськаосыз уз кысэ // Удмурт дунне. - 2017. - 6 апр. - С. 7.