Романова Галина Васильевна

Ӝужыт-ӝужыт гурезьын

Г. В. Романова

Туннэ тӥ азьын одӥгез тужгес яркытэз удмурт кизили – тодмо кылбурчи но журналист Галина Романова.

- Ой, мон асме кизили ӧй шуысал. Ас понназ котькуд адями кизили, дыр. Мон малпасько, шаерамы туж трос яркыт кизилиос. Соос, культура, искусство, спорт, политика удысын сяна, огшоры гуртын но трос. Нуналмысь дунъет возьматэк тыршись, сюлэмзэ семьяезлы, нылпиезлы сётӥсь мурт – со кизили, дыр. Тани туэ мон тодматски Завьял ёросысь Якшур гуртысь паймымон кышномуртэн Валентина Лазареваен. Скал кыске, ӟеч ужамзэ пусйизы «За заслуги перед Отечеством» орденлэн кыкетӥ степенё медаленыз. Агрономе дышетскем вылэм со, уж сюрымтэен, скал кыскыны кутскем. Малпасько: Валентина Лазарева, мон сярысь, асьме шаерлы тросгес пайда вайиз. Соин одно ик пумиськыны, со сярысь гожтыны малпасько.

- Тӥ асьтэос ужан сюрестэс фермаын мытӥды, соин сыӵе дунъяны быгатӥськоды, дыр?

- О-о, нырысь скал кыски, собере дышетски. Гуртын улон соку секыт вал, коньдон ӧз тырмылы. Ми вить нылпиос будӥм, мон – бадӟымез. Меми-дяди уй-нунал ужазы. Но няньтэк, вӧйтэк ӧм улэ. Трактореныз дядие гуртмы котырысь бусыосты кӧня пол медам гыриз-кизиз-октӥз? Азьмынӥсь механизатор вал. 1960-тӥ аръёсы ӟеч ужасез дунъяны кутскизы. Одӥг аре дядиелы нырысьсэ умой-умой коньдон сётӥзы. Мемиелэсь юа: «Мар меда басьтоно талы, Аннуш?» «Басьтон мында номыр ӧвӧл», - лулӟиське мемие. «Айда телевизор басьтом». Ас понназ меми оломар малпаз, вылды, но, дядиелы пумит ӧз кариськы. Со вакытэ гуртамы нокинлэн но телевизорез ӧй вал на, ми доры учкыны быдэс урам сямен ветлӥз.

Тямыс класс бере мон Можга педучилищее дышетскыны мыноно кариськи. Мемиен дяди шумпотӥзы: со вакытэ гуртын дышетӥсь самой гажано мурт вал. Но отчы пырыны ӝыны баллэ ӧз тырмы, йырме ошыса, гуртэ бертӥ. Ма кароно? Скал кыскисьёс ӧз тырмылэ. Озьы мон, 15 аресъем нылаш, 16 скалэз киын кыскыны кутски. Со сяна, скалъёслы пельпум выламы карнанэн ог 70 метр кемысь чырс сюкась нуллӥськом, саникен тусьёсазы сиён тыриськом, кыскем йӧлэн тырмытэм 40 килограммъем флягаез кезьыт вуэ поныны ӝуткаськом. Озьы ӵукна 5 часысен ӝытазе 10 часозь – фермаын. Нуназе гинэ кӧня ке шутэтскон луылӥз. Мынам мугор умой-умой юнмамтэ на, еж. Ар ортчыса, начармыны кутски, ымныры ӵужектӥз. Меми колхоз кузёмы доры бызиз: тазьы ужаз ке, пе, нылы быроз, лэзь сое городэ, милям эшшо ньыль нылпимы вань на, сооссэ ваньзэс колхозэ кельтомы. Кузёмы мемилэсь сюлворемзэ пеляз понэм, кошкыны лэзизы. Со вакытэ крестьян калык туж ӟибемын вал, паспорт гинэ но ӧз сётъялэ.

Ёрмысагес будӥм ке но, пичи дыры мынам туж шудо вал: мемиен дядилэн одӥг пол но чабкемзы, кеськемзы-куаретэмзы ӧвӧл. Маке лэсьтыны быгатӥськод ке, меми ушъялоз ини, выльысь ужаны мылкыд ӝутске. Дядямы кезьытгес вал, но шорамы ноку ӧз кесяськылы. Маке янгыш лэсьтӥд ке, одӥг-кык кылын сыӵе вералоз, мугор юзыр-кезьыр луыса кошкоз.

Колхозысь справкаен гинэ, паспорттэк, кытчы пырод? ПТУ-е. Каменщик луи. Туала егитъёс рабочийын ужаны керпото ни, соку ик йӧногес луэмзы, узырмемзы потэ, нош мынам йырам но ӧй вал кытын ке капчи уж утчаны, озьы ик луыны кулэ кадь. Шумпотӥ ини гуртысь мозмемелы. Урод ӧй ужа кадь потӥсько, но эшъёсылэн олокӧня пол вераллямзы вань: Галя, тон лэсьтӥськись ӧвӧл.

- Кӧня кирпич поныса вуттӥды бен?

- Ма, трос ик. Соцгородысь вуж коркаосты ваньзэ сямен милям бригадамы ӝутӥз. Но тужгес тодмоез объект – Политпросвещениея юрт (али Филармония). Широкий урам пала потӥсь одӥг укно висэз аслам киыным тыри. Юрт вӧзтӥ ортчыкум, тодам лыктэ ке, котьку учкисько.

- Соку шӧдонды ӧй вал-а, куке-соку со сцена вылысен тӥледыз данъялозы шуыса? Трос вералляськоды ук пичи дырысеныды ик ишанъёсты, пусъёсты адӟылэмъёсты сярысь.

- Соиз зэм. Ваньмыз сямен соос гожъямъёсам пыремын. Али ке но паймисько одӥгезлы: ог дас кык-дас куинь арес дыръям, Парсьгурт школаысь бертыкум, вылам вуюись васькиз. Киме, пыдме, дэремме учкисько но – быдэсак бусыр-лыз-вож-ӵуж-горд буёлэн воректӥ. Сыӵе чебер! Ишанъёс сярысь ке: котькуд адямилэн утись Кылчинэз вань ук, кызьы-о со кыӵе ке пусъёсын уз вера азьлапалан мар ке урод луонозэ? Одно кызьы ке шӧдытоз. Но асьмелэн йырмы укыр вылын, пыд азьмес ум адӟиське, котырмес ум кылӥське.

Кыӵе ке тодмо мурт луо шуыса, шӧдонэ ӧй вал кадь потэ, эшъёсылэсь номырин ик ӧй висъяськылы. Одӥгеныз гинэ ке шат: кинэ ке ултӥяло, вӧсь каро ке, со адямиез жаляса бӧрдӥсько вал. Лыдӟиськыны яратӥ. Книга кутӥсько но шыпак гинэ пегӟисько. Меме шуэ ни: «Нош ик та нылко ужлэсь пегӟиз ведь». Малы ке но гуртысьтымы Василий Ильич дышетӥсь дядиелы шуылоз вал: «Та нылыдлэсь, Васьлей, кин ке но потоз». Школаын драмкружок усьтӥзы но, милемыз маке но гожтыны косӥзы. Мон куинь синмо адями сярысь пьеса-выжыкыл гожтӥ. Сое быдэс класс азьын лыдӟизы. Озьы школаын герой луи. Нош мыным потӥз: сыӵе гинэ гожъяны котькуд адями быгатоз. Выжыкылэлы луыса-а, мар-а со дышетӥсь дядиелы озьы вералляз.

Кин тодэ, оло, озьы ик туннэ ке но ужасал ай строительствоын, банкъёс, резиденциос пуктысал, общежитиямы «Советской Удмуртиысь» Матильда Иванова ке ӧй пырысал. Огкылын вераса, мон понна шуак ин ӧс усьтиськиз кадь: монэ, 18 аресъем, тямыс класс гинэ быдтэм муртэ, сыӵе бадӟым, йӧно газетэ ужаны ӧтизы. Аслым ачим ӵӧжпи кадь потылӥ. Ужай машинистка, гожтэт лыдъясь, корректор луыса, но ас поннам весь гожъяськылӥ.

- Кызьы нош сыӵе ӵӧжпилы тодмо кылбурчи Владимир Романов синмаськем меда?

- Ой, ӧйтӧд. Юсьлы пӧрмытскон вакытам укшаз, дыр (серекъя). Редакцие нырысетӥзэ вуэме бере ик воргоронъёс весь куальтырто вал: милям, пе, татын, «Дась лу!»-ын тынад кадь фамилиен кышнояськымтэ воргорон ужа, ойдо тодматом. Валтыса сямен нуизы. Володя мынэсьтым мӧйыгес вылэм. Нырысь шорам пыр-пыр учкиз, собере маке серекъятӥз. Кытын-о, пе, улӥськод? Отын но отын, шуисько. Со чабкиськиз: мон но, пе, тон вӧзын улӥсько. Озьы со ми доры ӝытлы быдэ сямен вуылыны ӧдъяз, ваньмес серекъятылӥз. Улыса-вылыса тодмо луиз: милям фамилиосмы гинэ ӧвӧл, атай нимъёсмы но, вордскем толэзьмы но тупало вылэм. Кылдэмез сыӵе, дыр: весь одӥг нимъёс котырын берганы. Володялэн мон дырозь туганэз но Галя нимо ик вылэм, мынам пие но, али улоно кузэ но – Володяос. Пие но ӧжыт гинэ Романова фамилиё нылашен ӧз кузпалъяськы, но оломар луиз. Я, оло, со умойлы ай.

- Али но шуылӥсез вань: тӥлесьтыд нимдэс Володя Романов лэсьтӥз, пе. Нош тодэ ваёнъёсады гожъяськоды люкетэмез, серем карылыны выремез сярысь. Кудӥз шонер?

- Шуисез мед шуоз. Ма, фамилие гинэ но аслам но (серекъя). Ватонэз ӧвӧл, Володя монэ кышно басьтэм бере ныры чатырскыса ветлӥз: туж данъяськисько вал, сыӵе визьмо, тодмо адямиен улӥсько шуыса. Ӟеч улыкумы, ой, кӧня вожъяськисьёс вал! Но быземе бере ик мон гожъяськонме аналтӥ. Керпотӥ: Володялэн гожъямъёсыз сыӵе яркыт, нош мынам мар? Володя монэ нырысь-валысь кылбурчиен ӧз ик адӟылы, чуръёсме унь-мань гинэ карылӥз. Учконэз небӟиз Флор Васильевлэн огпол ушъямез бере. Ачид-а, мар-а, пе, Галя понна гожтӥд? Володя паймем. Соингес ик нырысетӥ книгае Володяен 12 ар улэммы бере гинэ потӥз. Собере со шорам мукетгес синмын учкыны кутскиз, дунъяны но ӧдъяз. Зэм, семья улонлы со ӧз юртты ни.

- Но тӥ асьтэды асьтэос но ӵемысь мукетъёслэсь улӥе пуктӥськоды ук. Кылсярысь, алигес лыдӟисьёсын пумиськонын верады, нылкышно кылбурчиос пӧлын асьтэлы ляб потӥськоды шуыса. Зэм-а озьы лыдъяськоды яке востэмъяськиськоды-а?

- Зэмзэ озьы потэ. Тани ми, ньыль нылкышноос-кылбурчиос, ӵошгес ӝужам, шуыны луоз. Но мон соос пӧлысь тужгес лябез. Татьяна Черноваен Людмила Кутянова – соос зэмос кылбурчиос, нош Алла Кузнецова, мон малпамъя, воксё гений. Мон так, огшоры. Мынам кылбуран манеры но мукет ук: соослэн кыӵе ке философия, лирика, мынам ваньмыз сямен улонысь учыр вылын возисько. Соос верослы матын, шуод-а, мар-а. Табере нош тани чылкак проза гинэ гожъясько на: веросъёс, сценкаос, юморескаос, пьесаос… Куддыр юало, мае гожтыны секытгес? А кызьы сое валэктод? Кылбур гожтыны огласянь каньыл, трос дыр кулэ ӧвӧл: кутскид но кисьтид вить минут ӵоже. Но малы ке но со ваньмызлэн уг вордскы ук, гожто ке но, сюлэмез уг бугырты. Иське, ӟеч кылбур гожтыны сокем ик каньыл ӧвӧл, оло, секытгес но, угось со понна адямилэн пушкыз маке луыны кулэ: яке укыр курадӟыны-висьыны, яке шудлэсь шукыръяськыны. Проза пӧрме визьмынгес. Нош пьесаос трос тодэмез кулэ каро. Архивъёсын но бугыръяськоно луэ, лыдӟиськоно.

- Асьтэлэсь кылбуръёстэс уд ушъяське ке но, соосты дунъязы крезьгур гожъясьёс.

- Нырысетӥ кылбуръёсы яратон сярысь вал. Но ми вакытэ сыӵе гожъямъёсыз сокем ик ӧз дунъялэ. Людмила Кутяноваез но со понна «тышказы». Мон выжи вордӥськем шаер, совето вакытысь праздникъёслы сӥзем кылбуръёс вылэ. Собере йырам шуккиз: ма, соосты ведь туннэ лыдӟозы но ӵуказе вунэтозы. Малпаськыны кутски: малы калык кырӟанъёс сыӵе сюлэмез бугырто, дауръёсын сое кылысь кылэ верало-кырӟало? Гуртам бертӥ, кошовкае вал кытки но Булае, Парсьгуртэ шонтӥ. Отысь кырӟаны яратӥсь кышномуртъёсын пумиськи. Соосын лул-сюлмысь вераськи, кырӟанъёссэс трос гожтӥ. Собере «висьыны» кутски калык кырӟанъёсын, кылбуръёсме соос манеренгес гожъяй ни. Крезьгурчиос соку ик омырскизы гожъямъёсы вылэ. Огез бӧрсьы мукетыз кырӟанъёс калыке вӧлмыны кутскизы. Пие Булай починкаысь бертыса шуоз вал: «Мама, тодӥськод-а, «Тон ӧвӧл мынам» кырӟандэ егитъёс ваньзы кырӟало, мон но».

Та кылбурея нырысьсэ крезьгур гожтӥз Геннадий Бекманов. Гурзэ шудыса, кырӟаса мыным возьматӥз но, чик ӧз яра. Малы ке шуоно сое мон ачим кырӟаса гожтӥ, гурез вал ни. Дыр ортчемъя аслам гуре кытчы ке аръёс сьӧры ышиз, Геннадийлэн али ке но улэ, шумпоттэ. Мон асме шуысал: кырӟанлы кылъёс гожъясь кылбурчи. Соос мынам ог 50 мында люкаськиллям ни.

- Вазен тӥ котькуд концерт, спектакль дыръя кассетаосын, книгаосын вуз карылӥды. Со шоры пӧртэм сямен учкисьёс вал. Асьтэос кыӵе мылкыдъёсын фойеын сылылӥды?

- Азьвыл ведь удмурт кырӟанъёсын кассетаосты тылын утчаса но ӧй шедьтысалыд. Нош мынам кылъёсыя гожтэм кырӟанъёс быдэс кассета тыр люкаськизы ни вал. Лыдӟисьёсын пумиськылонъёс дыръя соосты весь курылӥзы. Малпай: лэсьтоно. Туж шуген кассетаос гожъяй. Пайдаезлэсь тросгес курадӟи. Мынам сыӵе сямы: маке малпасько ке, одно лэсьтоно кожасько. Куддыръя со мыным уродэн но берыктӥське. Олокыӵе но кылъёсты кылоно луиз мукет кылбурчиослэсь-крезьгурчиослэсь кырӟанъёссэс но калык кырӟанъёсты, эктон гуръёсты, нылпи кырӟанъёсты кассетаен вузаны кутскеме бере. Олокӧня пол шуылӥ: уг ни выры соин. Нош калык дорам лыктэ, йыбыртъяса кадь, сюлворыса куре. Возьытме возь вылэ лэзисько но, нош ик вуз карыны потӥсько. Видеокассетаос борды но кутски вал но, киям зол гинэ «шуккизы». Нош кӧня удмурт книгаосты, «Вордскем кыл», «Инвожо», «Кенеш» журналъёсты калык доры вуттӥ! 1991-тӥ арын удмурт гожъяськисьёс пӧлысь мон нырысьсэ аслам коньдонэным «Выль кен» книгаме поттӥ. Нокыӵе спонсоръёс юрттытэк. 8 сюрс тиражен.

- Критикъёслэн кыл вылазы Галина Романова табере драматург но. 2003-тӥ арын Удмурт театр пуктӥз тӥляд пьесадыя «Шунды-Мумы» спектакль. Но тодӥсько, мылкыдды укыр ӟеч ӧз кыльы. Малы?

- Пьесалэн авторез сяна, спектакль пуктонын трос калык ужа: режиссёр, артистъёс, суредась… Котькудӥзлэн пьеса шоры учконэз аслаз. «Шунды-Мумыелэн» режиссёрез, егит воргорон, мыным юрттӥсь кариськиз, одӥг чурзэ но ӧз гожты ке но. Пьесаеным ар пала ужай, кык пол но, куинь пол но тупатъяй. Нош дунъязы «Удмурт дуннеын» кык-куинь толэзь ужаме мында гинэ. Сое но ӝынызэ режиссёр басьтӥз. Пьесае афишаосын кык нимын потӥз, нош одӥгез газет гожтэм: «Шунды-Мумы» калык легенда, пе.

Али «Ватос» пьесае бордын ужаны малпа Удмурт театрысь тодмо режиссёр Леонид Романов. Нимзэ калык кырӟанысь «Зарни меда, азвесь меда» кариз. Оскисько: куспамы валамтэос уз луэ.

- Тӥляд уй-нуналады кӧня час?

- Малы-о?

- Ма, ӝыны суткады «Удмурт дуннелэн» редакцияз ортче. Газетын ужась журналистлэн ваньмон дырыз уггес луылы, нош тӥ книгаос гожъяны но дыр, ӟигар шедьтӥськоды на.

- Мылкыд-малпан ке вань, амал сюре, но татӥяз ӟигар пинал дыръя кадь ик ӧвӧл ни. Али малпаса-малпаса аслым паймисько: Воткинской шоссеысь Печатья юртэ ужаны ветлыкум, нуналаз сюреслы гинэ 3 час быдтӥсько вал, озьы но котьма карыны вутскылӥ. Газет журналистлэн ужез зэмзэ но секыт. Мон пӧртэм редакциосын ужай, но «Удмурт дуннее» вуыса гинэ валай зэмос журналистлэсь ужзэ. Нырысь пал курадӟоно луиз. Шумпотӥсько, газетмылэн кужымез вань на ай шуыса.

Удмурт лыдӟисьёсын ужась А. Азин нимо библиотекаез кыкетӥ этажысь мурӝолэ поттыны малпаллям. Со сярысь гожтӥ, валэктон курыса, вылӥ кивалтӥсьёслы вазиським. Библиотекалэн кивалтӥсез Нина Куприянова туэ тулыс городысь люкаськем библиотекарьёс азьын мыным тау кариз: соосыз интыязы ик кельтӥллям. «Кытчы нуиськод, Герд?» статьяям сюлмы вӧсь луыса гожтӥ вал городмылэн удмуртлыкез уг адӟиськы, Гердлы памятник али ке но ӧвӧл на шуыса. Табере Гердлы памятник сылэ ни, Герд нимо ульчаез азьланьтон сярысь верасько ини, «Шунды» посёлоке коркаос пуктылыса. Татын одӥг шапык ке но мынам но статьяе «ужаз», дыр, кадь потэ. Нош «Удмурт кизилиосты» гожтыку, кӧня ӟеч, паймымон адямиосын пумиськылоно! Соослэсь но кужым басьтӥськод, узырмиськод.

- Но таӵе ужын ужаса но, тӥ кызьы ке уд керӟегъяськиське, гань-гань адӟиськиськоды, шугъяськон вакытъёсы но пазяськытэк-мар радзэ шедьтӥськоды. Куке пӧсекъямды-черекъямды вань-а яке тӥ пинал дырысен таӵе визьмо?

- Уз лу, пе, ини. Гороскопъя мон лев, тигр ведь. Сэреге ӝипто ке, гижыосме но поттыны быгатӥсько. Нош кесяськыса мар шедьтод, уг куаретӥськы, чидасько. Кин ке тодысал ке, пушкам кыӵе вулканъёс, гейзеръёс пуштыло-ӝутскыло! Супыльтӥсьёс но трос вал, вӧсь карисьёс но… Ӵок, Инмар ваньзэ адӟе.

- Нош бӧрдылэмды?

- Азьвыл асме жаляса бӧрдылӥ. Калык сямен улэме потӥз, кузпалъёс ӧз удалтэ: одӥгез монэ курытэныз воштӥз, кыкетӥез – юмшась кышномуртэн. Али сюлэмы вӧсь луэ, кин ке курадӟисез адӟыкум.

- Трос пол яратыны луэ-а?

- Мынам куинь пиосмуртъёс сярысь кылбуре вань. Россиысь писательёслэн огазеяськоназы пыртыкузы, гожъямъёсме учкизы но шуизы: та кылбурен гинэ но, пе, кутыны луоз ни.

Куинь пиосмуртъёс понна

Дунне вылысь мон котькинлэсь чебер.

Куинь пиосмуртъёс

Учко шорам

Аръёс но нуналъёс пӧлысь.

Огез

Йӧтӥськылэ тужгес векчи сюлэм сие,

Тодэ вайытылэ шулдыр пинал дырез,

Кырӟа егит даурелэсь зарни вакытъёссэ.

Кыкетӥез

Киме кутэ но пальпотэ,

Кузьма пӧсь сюлэмзэ.

Куинетӥез…

Соиз –

Мынам ноку кырӟаллямтэ гуре,

Кылын но вераны быгатонтэм чуре…

Куинетӥез понна

Мон мак сяська сямен, дыр, гомасько,

Солы, солы гинэ

Ноку вераллямтэ мусо кылъёс

Уез-уйбыт шыпыртӥсько.

Кык пиосъёс понна

Мон огшоры, музъем вылысь чебер йӧн нылкышно.

Куинетӥез понна –

Выжыкылысь туж паймымон чебер нылаш.

Куинетӥез пияш

Ноку уз вамышты монэн артэ,

Уз учкы мусоясь синъёсыныз.

Вуиз ке нош сӥзьыл,

Кезьыт салкыматӥз ке сюлэмме,

Тулыс шунды сямен шунтоз монэ

Ноку адӟылымтэ,

Малпанъёсам гинэ улӥсь

Куинетӥез пияш.

Та кылбуре гожтэмын 24 ар талэсь азьвыл, улонам тужгес секыт вакытэ. Володя Романов чарка пыдэсэ мургес но мургес выйиз. Но мон егит вал ай, синмаськисьёс сюрылӥзы. Пумитай яратонме, Семёнэз. Яратон дуннеын пыласькыкум, олокытысь асьсэос вуись кылбуръёс ышизы-быризы. Берло мукет сяменгес гожъяськи ни. Нош туннэ кылбурелэсь берпуметӥ чуръёссэ тазьы ик гожтысал.

- Галина Васильевна, тӥ мыло-кыдо пыриськиськоды удмурт нылкышно кенешлэн ужаз. Нош политика куке ас бордаз кыскылӥз-а?

- Ой, эн юа! Чик интересно уг поты. Политика ӟеч ке, огшоры адями солэсь бервылъёссэ вылаз шӧдыны кулэ ӧвӧл. Нош асьмелэн мар луыса кошке?

- Малы вожъяськиськоды?

- Аслам пичи ке но гожъяськон сэреге мед луысал – нимаз ӝӧкен, компьютерен, но сыӵе малпанэ ноку уз быдэсмы ни, дыр. Вожъяськисько нылпиоссэс дышетыны быгатэм муртъёслы – котькуд мумылэн потэ ук, пиналыд аслэсьтыд визьмогес, шудогес мед луоз шуыса.

- Нош малэсь ке кышканды вань-а?

- Кышкасько нокинлы кулэтэм луонлэсь, ужтэк кылёнлэсь, ёрмонлэсь.

- Кинлы вӧсяськиськоды?

- Туж секыт вакытъёсам Инмарлы, Кылдысинлы, Ӟумья воршудэлы, мемиелы-дядиелы (соос кемалась улонысь кошкизы ини) вазиськисько. Чигиськыса усьыны уг сёто, юртто. Дунне вылын Иисус Христос вал шуыса оскисько, но солэн нимыныз трос спекулировать карыны кутскизы.

- Но тӥ со сямен ӟеч уж понна лулдэс сётыны быгатысалды-а?

- Удмурт государство кылдытон, калыкмес утён-улӟытон вылысь - чик малпаськытэк сётысал.

- Зарни юбилейдылы сӥзьыса, тӥ поттӥды «Ӝужыт-ӝужыт гурезе» книга. Отын ватытэк, возьдаськытэк вераськоды асьтэлэн улэм-вылэмды, улон, адямиос шоры учкемды сярысь… Туннэ нуналлы макем ӝужыт гурезь вылын сылӥськоды кадь потэ?

- Егит дыръя одӥг пол малпаськиськод но, сизьым пол вамыштӥськод вал. Соин ик трос янгышъёс лэсьтӥськод, лызэктымон шуккылӥськиськод. Сотэк улон шӧмез уд вала. Мӧйымемъя вамыш лэсьтэмлэсь азьвыл сизьым пол малпаськиськод, кыдёкегес учкыны-адӟыны турттӥськод. Гурезь йыл пумтэм ӝужыт. Адями отчы быдэс улонзэ сузьтӥське. Нош кыӵе ӝужыт со мынам, созэ ини лыдӟись гожъямъёсыя мед вералоз.

Гожтэм книгаосыз:

«Ӵош вамышъялом» (1982)

«Шепасько юос» (1988)

«Выль кен» (1991)

«Мир женской души» - ӟуч кылын Л. Кузнецоваен, Т. Черноваен, Л. Кутяноваен ӵош. (1992)

«Ӝужыт-ӝужыт гурезе» (2000)

«Ньыль тылскем» - эстон но удмурт кылын Л. Кузнецоваен, Т. Черноваен, Л. Кутяноваен ӵош. (2002)

«Лобась валъёс» (2006)

Пьесаосыз:

«Уӵы чирдэм зэм меда но…» (2000)

«Яратон сыӵе вылэм» (2001)

«Ватос» (2001)