Романов Леонид Григорьевич
Сценаез улӟытӥсь[править]
Паймоно солэн сэзьлыкезлы, чупрес, йӧно, жадёнэз, тэк пуконэз валасьтэм луэмезлы. Огдыре пӧртэм тусо-буё, олокыӵе но сямо адямиосты возьматыны быгатэмезлы. Со дыре ик артэ шудӥсьёсыз шоры рентген сиос пыртӥ сямен учкемезлы но дунъет сётэмезлы. Егитэныз пинал мылкыдын вераськоз, мӧйыеныз арлыдоос сямен кенешоз - котькудӥныз огкыл шедьтоз. Ваньмыз та кылъёс верамын Россиысь искусство удысысь дано ужась, Удмурт Республикаысь калык артист, элькунысьтымы Национальной театрысь валтӥсь режиссёр Леонид Григорьевич Романов сярысь.
- Паймоно но вожъяськоно, шорады учкыса, Леонид Григорьевич. Арня талэсь азьвыл тӥледлы сизьымдон арес шуккиз. Уд но оскы.
- Куддыр аслым но осконтэмгес потэ. Али театрмес выльдо бере, гуртъёсысь ум пыралляське. Куд-ог кышноос кырмышъяло на: э, та Романовзэс дорамы кельтоно вылэм, малы котьку кышноеныд ветлӥськод? Кыӵе кышноен, шуисько. Аля Романова пумысь ке, соин милям фамилимы гинэ огкадь. Э-э, чабкисько ук, малы азьло ик ӧд вера. Тодысалмы ке…
- Лушкаса кельтысалзы, озьыен. Тузӥ кышноосты шудон манереныды бордады кыскиськоды, дыр. Кытысь-о сыӵе быгатонлык?
- Милям Ленинградысь А. Островский нимо театральной институтамы одӥг грузинлэсь экзаменысен юало: мар со сыӵе «система Станиславского»? Соиз валэктэ: Станиславскийлэн системаез, марым, юандэс вералэ на ай… А-а, со-а… со марым, «один выходит, другой заходит, этот заходит, другой уходит. Так систематически выходят и заходят».
- Амалтэк город. Нош асьтэос сое кызьы пыӵатӥськоды - «огез пыре, мукетыз потэ» шуон амалэз?
- Дышетӥсьёсмы туж умоесь вал. Лӧпкытъяны быгатылӥзы. Москваын Маяковский нимо академической театрын режиссёре дышетскыкум но, Станиславскийлэн ӧрезъя ужамы. Али но озьы ик выриськом. Куке бур киынызы паллян пельзэс корманы кутско, сыӵеосты туж ик валаса уг вуттӥськы. Оло, сыӵеез но кулэ. Табере ведь олокыӵе амалъёс вань. Режиссёр ужано луэ пичиен-пичиен, созэ-тазэ шедьтыса-будэтыса, отысь-татысь адӟыса.
- Кин артистын ужамын, солэн пуктэм спектаклез кужмогес луэ, иське?
- Озьы, дыр, но. Со ик люкетэ но. Режиссёр но артист одӥг пьеса борды кыткиськемын ке но, ужзы чылкак пӧртэм. Режиссёрлы артист шоры рентген пыр учконо, солэсь валтӥсь нюжазэ поттоно. Огезлы конфет сётыны кулэ, мукетсэ сюлоен тышкано, куинетӥезлэсь йырзэ маялляно. Кудӥзлы куаӵак вазиськод, куарадэ золгес поттӥськод - мар быгатэ вал, сое но уг лэсьты ни. Сыӵе аспӧртэмлык: котькуд адями - пӧртэм сям.
- Тӥ, Леонид Григорьевич, пьесаен тодматскыкуды ик, син азяды пуктӥськоды, луоз, солэсь сцена вылын адӟиськонзэ?
- Конечно. Режиссёрлы дышетӥсе СССР-ысь калык артист, СССР-лэн но Россилэн кун премиоссылэн лауреатсы А. А. Гончаров тазьы учке вал: мар вань пьесаын тунсыкоез? Со тылгизьыез шедьтыса, гожтэм быдэс тылпулы пуроме.
- Сыӵе школа пыр ортчыса, Удмурт театре вуиды. Нош асьме калыклэн сям но мукет, режиссёрлэн портфелез но буш.
- Тырттэм портфелен уд ушъяськы. Егор Загребин тани артистъёслы 4-тӥзэ лыдӟе ни выль пьесазэ, но туннэ нуналлы сое пуктыны уг луы на. Анатолий Григорьев кемалась гожтӥз ни вал «Пужмерен ӵуштаськем яратонзэ». Умой вал, аслыз малы ке но пумыз ӧз яра, аналтӥз - 5-6 ар нокызьы пумзэ уг йылса. Али лэсьтэм кадь ини.
Вал умой спектакльёс: П. Кудряшовлэн «Уте милемыз, Инмаръёс!», Г. Перевощиковлэн «Секыт шепъёс», Н. Самсоновлэн «Вунэтэм шундыберган»… В. Котковлэн «Пинал мылкыд - юмал йӧлпыд» пьесаезъя спектаклез тужгес кельше вал палэнын улӥсь удмуртъёслы. Ой, кыӵе тӥ чебер вераськиськоды, шуо, милям ведь озьы уг пӧрмы. Уг но валало, ми кылбурен гожтэм спектаклез шудӥськом шуыса. Отын кылыз туж капчи. Кема мынӥз Егор Загребинлэн «Исьток но Насьток» комедиез. Нош табере солэсь но кема «улэ» ни «Яратон уг пересьмы» спектакльмы. Возьматӥськом сое удмурт но ӟуч кылын. Сюрс пол пуктэмын ни, дыр. Театрмес ӟеч-ӟеч тупатъязы ке, «Сюан» спектакльмес улӟытыны малпаськиськом. Со ведь чылк-чылк крезьгуро комедия.
- Пуктыны секыт уз луы-а?
- Тюливитез шедьтом. Кӧнязэ ке эктӥсьёсты ӧтём «Эктон корка» студиысь, культурая училищеысь. Кырӟанъёстэк, эктонъёстэк кыӵе шулдыр сюан луоз. Сюанэз ведь шулдырто егитъёс. Соин ик, оло, сюжетсэ воштоно луоз. Но быгатыса. Вашкала пьесаез туалалы берыктоно ке, туж трос ужано.
Тани Якшур-Бӧдья ёросысь П. Кудряшов вайиз вал «Уте милемыз, Инмаръёс» кылбурен пьесазэ, ми сое шудӥм. Табере рок-опера жанрен ужаны мылкыды вань. Удмурт шӧмо крезьгур гожтӥз Евгения Копысова. Театрамы кырӟасьёсмы тырмыт: Зорина, Ложкин, Моисеевъёс, Иван Григорьевых дорамы лыктӥз. Крезьгур но лэсьтысалзы.
- Нош мар кугӟатэ-ӝегатэ?
- Москваын дыръям «Юнона и Авось» спектакльлэсь репетициоссэ ог дас пол учки. Номыриз ик ӧй вал кадь отын, Рыбниковлэн веросэз но пичи гинэ ук. Нош сыӵе зол пуктӥзы, кунгож сьӧрын гинэ, оло, сюрс пол шудӥзы, ваньмыз крезьгур вылын возиське.
Кудряшовлэсь но пьесазэ тупатъяса ӟеч пӧрмытыны луоно. Но сыӵе малпанъёс пото ини пьеса ӧвӧлысь. Луысал ке портфелям ог 2-3 дась пьеса…
Милям кызьы луэ? Автор вае пьеса, лыдӟе. Ми асьмелэсь куронъёсмес вераськом. Тырмымтэоссэ пусйиськом. Гожтӥсь малпа: со аслэсьтыз ужзэ быдэстӥз, отӥяз тӥляд ужзы. Но милемлы мукет сямен кулэ. Драматург котьку режиссёрен уртче ужа. Анатолий Григорьев тани котькуд репетициосын пуке. Учке-чакла, маиз уг кельшы - вошъя. Алексей Шкляев но, «Сьӧлыктэм сьӧлык» пьесазэ дасякумы, репетициосын пукылӥз. Пьесалэн сцена вылэ вуон сюресэз трос чиданэз кулэ каре. Сотэк пиртэш но осконтэм пӧрмоз шудон. Отын уз шӧдӥськы зэмос улон.
- Нош кызьы но ку меда Быдӟым ож аръёсы будэм пиналлэн йыраз шуккиз артист луон сярысь?
- Атайме мон син азям пуктыны уг быгатӥськы ни: пыраклы ож лудэ кылиз. Тодӥсько на: огпол монэ сьӧраз мунчое басьтӥз. Пӧсь кисьтӥз - чидан ӧвӧл. Выж вылэ васьки. Кутскизы ук агаймуртъёс ог-огзэс веникен йыганы. Ӵап со куспын тыл кысӥз - тём-тём луиз. «Мунчо кузё, пот!» - кеськиз атай. Мон ӟыз! бӧрдыны кутски. «Эн кышка, пие, эн», - ӝик-ӝик ӟыгыртӥз монэ атай ӟырдам мугорыныз. Тӥни со пӧсез али но шӧдӥсько на.
Собере тодӥсько на: почтальон пичи бумага вайиз но, анае, апайёсы бӧрдыны кутскизы. Мон соку суредаськыны туж яратӥсько вал. Бумага ӧвӧлысь, я книга сэргы, я газет пуме гожмалляськи. Почтальон пичи гинэ бумага ваем но, со мыным ӧжыт луоз малпаса бӧрдо, кожай. Олокӧня аръёс ортчыса гинэ, тодӥ ни, со похоронка вылэм шуыса.
Нош артист луон сярысь малпаськон ик ӧй вал. Так-то нырысьсэ немец офицерез шудӥ, 4-тӥ классын дышетскыкум. Милициын ужась ӵужмуртэлэсь фуражказэ, пиджаксэ сётӥзы. Кылме верасько но сылӥсько: вот мон кыӵе молодец. Мукетъёсыз кылъёссэс уг тодо - ӝӧк улын пукись дышетӥселэсь верамзэ возьмаса уло. Уг кыло - мыкыртӥськыса ик юало. Учкисьёс коскаса серекъяло.
Бадӟымгес классъёсын дышетскыкум ни, гуртысьтымы нылъёс, пединститутэз йылпумъяса, школаын дышетыны кутскизы. Ӝуткаськизы «Улэм потэез» пуктыны. Мыным, мугоро пияшлы, Демилэсь рользэ сётӥзы. Дышетӥсьмы Любаез шудэ. Отын чупаськон сценаез вань. Сомында репетициосын огпол но ӧй дӥсьты дышетӥсьмес чупаны. Тани спектакль мынэ ни. Люба Демилы яратэмзэ вера. Соку как кутӥ но туж зол чупай. Дарали кадь гордэктӥм, ог-огмылы мышкин берытским. Учкисьёс люр чабо. «Чупаз ведь, чупаз!» - кесясько.
Собере «Кезьыт ошмесысь» Беглойлэсь рользэ сётӥзы на. Пумаз геройме ыбо. Зэм возьматон вылысь, кулиса сьӧрысен пӧйшуран пыӵалэн ка-ак! ыбизы - выль клубмылэн борддоръёсыз ик дыректӥзы. Калык курдаз, мон шалтрак уси. Пичи выны быз-з! бӧрдэ: «Лёнька агаез виизы!» Калык горе: чын ӧвӧл со, шуо. Выны синъёссэ посэ: «Адӟи, виизы, ӵыныз ик потӥз!» Мон кыллисько, вырыны уг яра бере. Тӥни сыӵе нырысь вамышъёсы.
Пор шаерысь Мари-Турек ёросысь Карлыган школаез быдтыса, Иже вуи 1955-тӥ арын. Геннадий Овчинников эше пединститутэ пыриз, мон - 9 номеро технической училищее. Диплом басьтэме бере эше доры мынӥ, отын Герман Ходырев пуке. Со ми пала ветлӥз вал, балалайкаеныз Карлыган палъёсмес паймытыса кельтӥз. Со шуэ:
- Лёня, ӵуказе филармониын экзамен ортчоз, Ленинградэ артистэ дышетскыны келяло. Ойдо, дасяськы.
Бер ни, шуисько. Нош со кытысь ке В. Садовниковлэсь «Пань-пань котэм няньзэ», М. Горькийлэсь «Песня о Соколезэ» вуттӥз. Уйскын дышетод, пе.
Уйин зориз. Ӵуказеяз, дэри коласа, экзаменэ вуиськиз. Ленинградысь комиссия азьын «Пань-пань котэм нянез» лыдӟисько. «Кунян сьӧры скал, со сьӧры мон, как ӵыжиз» кылъёсты вераса ӵыжи но, ката улысьтым маке быдӟа дэри комиссия пала лобӟиз но таӵ! гинэ мышказы усиз. Кышкаменызы шымырскизы. Институтын 5 ар дышетскытозям, Георгий Васильевич Галафрен серекъялляз, тон, пе, монэ ӧжыт гинэ ӧд сӧсырты.
- Озьыен, уй куспын артистэ выжиды?
- Озьы луэ. Нырысь тур бере ик басьтӥзы. Полина Ухова, Валентина Загуляева, мон - училищеосты быдтэмъёс вал. Но соку дышетскем бӧрсьы одно ужано вал. Мон но арня-а, кык-а ужаса вуттӥ. Со понна мыным 300 манет уждун сётӥзы. Гуртысь пилэн, сомында коньдонэз улытозям кутылэме-адӟылэме ӧй вал. Гужембыт трудодень понна ужалляськиз.
- Артистлы куддыр обезьянэз но шудыны быгатоно, куддыр генералэз но...
- Умой артист луэмед ке потэ, быгаты, пе, астэ 9 аресъем пиналэн лыдъяны. Соос мае ке но валало, малы ке оско. Артист котьку сыӵе луыны кулэ. Пуксид пукон вылэ, мынӥськод ни, вал вылын сямен ворттыса. Яке бадьпу ньӧрез кыткид - таиныз но вал сямен гырдалля. Нырысь ик оскыны кулэ. Сотэк коть дас ар дышетскы - учкись шудэмедлы уз оскы.
- Вылӥ тодонлыкен артистъёслэн шудонзы Удмурт театрлэн сцена вылаз капчи азинскиз-а?
- Тодӥсь-валась адямиос шуо: артистлы нырысь 40 арзэ гинэ ужаны секыт, отӥяз, пе, капчи. Нош мон 47-тӥ арзэ ужасько ни, но капчи луиз шуыны шугъяськисько. Котькыӵе рольлэн аслаз аспӧртэмлыкез.
Тани берпуметӥяз «Бускельёс-маскарчиос» спектаклямы юись муртэ шудӥсько. Улытозям кудӟытозь юэме ӧвӧл бере, пушкам мукет адями пырыны турттэ. Адямиос ваньзы пӧртэм бере, котькуд роль - со нимысьтыз улон.
Куддыръя кытысен ке пумитаськод усто вераськись, шудыны быгатӥсь муртэ но юри чакласа, эскерыса сылӥсько. Крезьгуро театрен «Василий Тёркин» бордын уртче ужакумы, пересез шудӥсько. Туж характерной адями. Архангельскын гастрольын дыръям базаре потӥ. Учкисько: пересь сылалтэм киярен вуз каре, отын ик сапег кышъя. Ут ай, выросэзъя ӵапак мынам шудоно героелы туж тупа ук та! Супыр-сап выре: сӥньыссэ вандыны качы кутыса уг улы, пиньыныз куртче но, ымдурыз сьӧд-сьӧд луэм. От та доры куинь нунал ветлӥ. Киярзэ басьтӥсько но вераськемзэ кылзӥсько. Туж тумошо, аспӧртэмлыко адями, ролям кутӥ солэсь выросъёссэ-манеръёссэ. Режиссёрмы паймиз: чылкак мукет шудыны ӧдъяд, пе.
Озьы тӥни, куддыр адямилэсь сям-выроссэ но лушкано луэ, ява. Нош куддыр йӧтылэ но.
- Кызьы?
- «Луысал ке берыктыны» спектакльын Жора Мартыновез шудӥ. Дышетскись нылашез вандэ со. Вазен театрын артистъёслы нимаз потон ӧс ӧй вал, учкисьёслэн залзы пыр ветлӥмы. Шудонме йылпумъяса потыкум, кышномурт дорам лыктӥз но «Тани ук со нылашез вандӥсь!» шуыса, ка-ак йыр берам сётӥз - шляпае ик пезьдӥз. Ӝогак гылӟоно луиз. Ма, выльысь омырске на вал ук. Нош «виисько» вал Оля Трофимоваез. Табере со мынам кузпалы, ӵош улӥськом, 23 арес нылмы вань.
- Тӥ сценаен гинэ уд улӥське. Тӥляд мукет висёнды - спорт. Бызьылон - толалтэ куасэн, гужемзэ пыдын.
- Зоре-а, лымыя-а, - котьку кырын. Туэ но, нюкысь берпум лымы шунатозь, куасме ӧй утялты. Пичиысен со сяме пыӵаз. Школае Карлыганэ ветлӥ. Котькыӵе куазен куасэн. Ленинградын но весь спортэн выри. Вить ар куспын вань туспуктэмъёсы куасэн гинэ. Тон артистлы дышетскид-а, спортсменлы-а, юало вал.
- Со понна котьку йыгмыт возиськиськоды. Кышно курась казакпиез шудоды на. Но рольёс пумысен ке, кинэ-о шудытэк кылиды?
- Баба-Ягаез. Малы, шуиськод-а? Дышетскон аръёсамы студент театрамы туж синмаськыса учки Алиса Фрейндлихлэсь Баба-Ягаез шудэмзэ. Мон, куинетӥ радын пукись маке, сое адӟыса, кышкаменым шымырски. Тумошо адӟиськись Алисалэн синъёсыз ӝуало, пиньёсыз тарккето. Алигес, 70 арессэ пусйыкуз, телевидение меӵак эфире жингыртыны курадӟи. Ӧй шедьы. Ӟечкылам сяна, мукет веран муге но вал на.
Сӥзьыл ми, сокугес гинэ вуэмъёс, месткоме быръёнэ пыриськиськом. Лушкем быръён списокын А. Фрейндлих вань. Атае каргам войнае быриз бере, та немец, дыр, шуи но ӵуши. Кенешын йылпумъян лэсьто ини: одӥгезлы но нокин пумит луымтэ. Фрейндлихез гинэ 1 мурт ӵушем, пе. Ӵыж гордэктӥ. Ярам, ачиз пумит кариськем, шуизы. Тӥни сыӵе сьӧлыкен ветлӥсько. Таки вераны йӧнзэ ӧй шедьты…
- Нош яратоно рольды?
- Весь колхоз предъёсты шудылӥ мон. Карлыганысьтым удмуртъёсы огдыре «Восход» колхоззылы тӧрое но ӧтьыса нерад карылӥзы. Умой шудӥськод - пӧрмытод, пе. Нылпи садын Наташа нылылэсь юало: «Кытын атаед ужа?» Со ляп вазем: «Колхозлэн предэз». «Кызьы колхоз пред?!» - паймиллям. Ма, так-то артист со, шуэ, пе.
Чик вужмисьтэм роле вань на. Тол бабай. Тазэ 1961-тӥ арез пумитан дырысен шудӥсько ни. Арлы быдэ. Культурая министрлэн воштӥсез луыса ужакум но ӧй вискатылы.
- Озьыен, Тол бабай арлыдэ вуыса но, йыгмыт кузё выллем ик мед возиськоды, Леонид Григорьевич.
- Тау!
Источник:
Романов Л. Г. Сценаез улӟытӥсь / Л. Г. Романов ; записал Рашид Хайдар // Удмурт дунне. - 2007. - 27 апр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
