Бекманов Геннадий Иванович
Ми возьматом на ай асьмеды!
80-тӥ аръёслэн пумазы. Сур дуре черод. Верасько кык юлтошъёс.
- Учкы, учкы, тӥни Бекманов сылэ!
- Кин со сыӵе, Бекманов?
- Тон уд тодӥськы Бекмановез?! Артистэз?!
Та суред чиньыысь ӧвӧл сюпсемын, лыдӟисез гочатон понна. Та учыр сярысь ачиз Геннадий Иванович вераз, ачиз ик кылэм но кык пияшъёслэсь вераськемзэс.
Юасько аслэсьтыз:
- Лякыт-а ас сярысьтыд сыӵе кылъёсты кылзыны?
- Ма, туж ик урод вылымтэ, мар танӥськонэз.
- Ӵем-а тонэ тодмалляло калыкын яке сурлы черодын гинэ-а?
- Хм, пыӵкылэмдэ валай. Нырысь ик, сурез яратэмысь малы ке но дугдӥ. Кыкетӥез, табере сур дуре черодъёс но ӧвӧл ни. Нош тодманы мукет интыосын но тодмало. Тани кызьы ке трамвайын мынӥсько. Кондукторлы коньдон мычисько но со шуэ: «Я, сыӵе тодмо артистлы билет вузаса уг улы ай!» Уг ваты, сюлэмын шуныт луэ сыӵе дыръя: озьыен, кин ке коть тодэ монэ калыкын, ӧжытак коть гажало, шӧдске.
Востэмъяське Геннадий Иванович. Сое, Геннадий Бекмановез, Драмая удмурт кун театрысь актёрез, кырӟасез но композиторез кин уг тоды меда асьме шаерын. Солэсь шудэмзэ ӝытлы быдэ сямен адӟыны луэ театрлэн сцена вылаз, одӥг арня но уг ортчы, дыр, солэн радио яке телевизор пыр кырӟамезтэк. Огъя вераса, артистлэн данэз со вӧзтӥ ӧз ортчы, уг но ортчы.
Кыӵе со артист но кырӟась, асьмеос тодӥськомы. Нош кыӵе со адями, кызьы но маин улэ сценалэн палэназ, катанчи сьӧрын? Со сярысь ик вераськон пумысен мон пумиськи Бекмановен театрысь солэн гримёрнояз. Но вераськон пусъем ӧръя ӧз мыны. Бекмановез-артистэз уг луы вылэм висъяны Бекмановлэсь-адямилэсь. Сое оглом гинэ учкыса валалод. Малпасько, лыдӟисьёс но озьы ик валалозы.
- Геннадий Иванович, милемлы, пыдулмес гинэ учкыса улӥсьёслы, артистъёс огшоры адямиос кадь уг пото. Соос музон сямен уло кадь, мукет сямен улонэз адӟо-валало, соослэн музон сямъёссы, огкылын вераса, инмарен пусъем адямиос. Озьы-а со?
- Озьы но, ӧвӧл но. Улӥськом ми вань калык кадь ик, сыӵе ик сюлмаськонъёсын, сыӵе ик шумпотонъёсын но куректонъёсын. Но улон шоры аспӧртэмлыкогес ик учкиськом кадь, мыным потэ. Ведь кин со актёр? Со роль шудӥсь, маскаръяськись. Со ас вылаз мукет адямиез возьматэ, солэсь «кузэ» ас вылаз «дӥся», солэн сюлэмаз но визьмаз пыре, огвакытлы муртлэн улонэныз улыны быгатыны кулэ, зэмос актёр ке со. Со дыре ик медам адскы тынад шудэмед. Учкись мед оскоз, сцена вылын, шуом, Беглой, артист Бекманов ӧвӧл шуыса. Со самой шугез милям ужамы.
Мыным огдырлы но уг удалты артист луэме сярысь вунэтыны, уката но выль роль басьтэме бере. Ульчаетӥ мынӥськод-а, черодын сылӥськод-а, ӝӧк сьӧрын пукиськод-а – ялан ас вылад мертаськод геройдэ: нош кызьы со ассэ возьысал тон интыын? Мон ялан чакласько котырысьтым адямиосты, тодмооссэ но тодмотэмъёссэ но, соослэсь выросъёссэс, ымныр туссэс вошъямзэс, вераськон манерзэс: уз-а луы маин ке но героелэсь тусбуйзэ узырмытыны. Зэмзэ но, тодмо верамез ӧжытак воштӥд ке, актёр – со профессия ӧвӧл, со – луллэн-сюлэмлэн улон амалэз.
- Но сыӵе амалэн улон трос кужымез кулэ каре ук, дыр?
- Кызьы сотэк?! Огъя учкыса, нокыӵе уж но ас кожаз уг лэсьтӥськы. Шуом, музъем гырись быгыт кужымзэ быдтэ, тодосчи визьзэ ужатэ, нош артист, ма, ваньмыз творческой ужасьёс, дыр, со сяна, лулзэ-сюлэмзэ но ужаз понэ на. Кожаз со уг ортчы, ӧжытэз шат артистъёс курадӟо лулсэр, сюлэм висёнъёсын, куд-огезлэн егитысен ик сюлэмзы ужамысь дугдэ, куддыръя пырак сцена вылын но. Ӧд синйылтылы-а: тросэзлэн мӧйы артистъёслэн ымныразы мур малпаськон тус уг бырылы?
- Но сыӵе лулсэр жадемлы пумит артистъёслэн кемалась эскерем амалзы вань, озьы-а?
- Мар ватонэз, озьы, дыр. Мон но пӧртэм ӧвӧл. Котьма ке но, эсэпсэ валаса юиськод ке, капчигес ик луэ. Со сяна, мыным туж юрттэ на инкуазь, уката но сад, нюлэс.
- Мон кемалась ик ӧй лыдӟы Дмитрий Харатьянлэсь интервьюзэ. Со шуэ: мон, пе, калык пӧлын но, ужын но лякыт сямо адями, котьку пальпотӥсь, капчи мылкыдо, нош дорам, пе, ӝӧк вылысь миськымтэ тусьты-пуньы пумысен номырлы ярантэм даллашон ӝутыны быгато. Тон но сыӵе ик керӟег ӧвӧл-а?
- Малпасько, артистъёс тросэз сыӵеесь шуыса. Спектакльын шудӥськод, вань кужымдэ сётӥськод, доре пызьыртэм маке кадь вуиськод ке, кыӵе ке чыры-пыры муг но визьтэммытыны быгатоз. Мон тани, туж уг яратӥськы квартираын воштӥськонъёсты. Телевизор яке синучкон кытчы ке огпол пуктэмын ке, со коть дасо аръёсын отын ик мед сылоз. Качы яке телепрограмма кытчы понэмын, мон сое отысь ик шедьтыны мед быгато. Нош мынам нылкышноосылэн, кузпалылэн но нылылэн, оло, висёнзы сыӵе – корка котырез весь интыеныз вошъяны. Ай монэ косо ук! Киыным шонтыса кошкисько: мыным, пӧй, кулэ ӧвӧл. Бертӥсько но шкаф мукет интыын сылэ. Ма, кызьы, пӧй, ляб нылкышноос, со секта мае ке вырӟытӥды? Нош соос улаз гын сапег пачкатыса гылӟытӥллям. Вот ведь албастыос, мынам тодам но ӧй лыктысал.
Нош одӥг пол воксё йырсазьме ыштон калэ вуттӥзы. Гастрольысь доре бертӥсько но, мар та таӵе, квартираме шат сурай: одӥгез борддормы воксё ӧвӧл. Нылкышноосы мон ӧвӧлтэм дыръя малпаллям одӥгзэ комнатаез, борддорзэ интыеныз воштыса, бадӟымгес карыны. Нош мон вазьгес бертыны кемдӥ.
- Тон верамъя, актёр сцена вылын муртлэн улонэныз улэ. Озьы ке, кӧня мурт улонэн тон улӥд ини?
- Я, лыдъялом али. Мон сцена вылын кызь ар ини. Араз, шорлыдын вераса, куинь выль спектакль пуктӥськом. Тӥни, кызь ар ӵоже куать пала рольёс люкасько, кызьы тон шуиськод, мурт улонъёс. Туж тросаз спектакльёсын валтӥсь рольёсты шудӥ. Ма, мыным кызьы ке котьку удалтылӥз рольёсын но, режиссёръёсын но, кибашлы, мӧйы эшъёсын но. Вал, мар бордын ужаны, вал, кинлэсь дышетскыны.
- Кытысь ке лыдӟеме вань, котькуд актёр улоназ Гамлетлэсь рользэ шудон сярысь малпа шуыса, ну, шуом, кызьы солдат малпа генерал луон сярысь. Тӥляд театрады «Гамлет» трагедиез ӧз пуктылэ, матысь дыре но сое пуктон сярысь уг кылӥськы. Озьы ке но тӥляд актёръёсты понна но, тон понна но вань, дыр, Гамлет быдӟа мукет кужмо рольёс? Кин тынад аслад Гамлетэд?
- Кузебай Герд. Мон кемалась малпаса улӥ сое сцена вылын возьматон сярысь. Ай пьеса но ӧй вал на гожтэмын, нош мон выльысь но выльысь солэсь тусбуйзэ син азям пуктылӥ, асме со интые пуктылӥ. Эшъёсылы но со малпанэ сярысь вералляй. Гердлы 100 ар тырмон аре, солы сӥзьыса, пӧртэм ужрадъёс ортчытэмын вал, соос пӧлын бадӟым литературно-драматической композиция. Уг ваты, ас поннам вити вал, Гердлэсь рользэ мыным ӵектозы шуыса. Ӧтизы мукет артистэз. Но мон ӝоже ӧй усьы. Малы одно ик монэ бырйыны кулэ вал, мон самой кибашлыез ӧвӧл ук, озьы-а? Но ӝоген театрмы басьтӥськиз Егор Загребинлэн «Кикы нош силе но силе» пьесаез борды. Гердлэсь рользэ мыным оскизы. Кызьы мон ужай со бордын, кызьы шудӥ та ролез – вераса уд быдты. Кемалась малпанэ быдэсмиз – таин ваньмыз верамын.
- Кызьы мон тодӥсько, тынад театрын ужед котьку умой мынӥз, рольёсыд удалтылӥзы. Малы тон витьымтэ шорысь композитор но кырӟась луид? Оло, актёрлэн данэз тырмемысь дугдӥз?
- Вот-вот, ӵапак витьымтэ шорысь, малпатэк. Одӥгаз пьесаын вал таӵе суредэз: пияш яратэ нылашез, нош соиз уг. И вот одӥг пол та спектакльын шудыкум, та суредъя йырам крезьгур лыктӥз. Пель сьӧрын весь чузъяське но чузъяське. Озьы кӧня ке дыр ӵоже. Ӵапак со вакытэ киям шедиз Галина Романовалэн кылбуръёсыныз нырысетӥ сборникез. Одӥгзэ кылбурзэ лыдӟыны кутски гинэ но, со крезьгуре соку ик йырын чузъяськыны кутскиз. Ёлки-палки, ваньмыз тупа ук: вамышез но, ритмез но, пуштрос мылкыдыз но. Кырӟай ас поннам. Номыр ӧвӧл кадь. Калык азе поттоно кариськи. Ваньмызлы туж кельшиз. Озьы вордскиз нырысетӥ кырӟанэ: «Тон ӧвӧл мынам, Мон ӧвӧл тынад…»
Отӥяз мылкыд лӧптӥз но, ӟуч сямен вераса, пошло-поехало. Выль кырӟанъёс, концертъёс, гастрольёс – ӧръяськиз…
- Кызьы вордско кырӟанъёсыд: крезьгуред-а нырысь луэ яке кылбурез лыдӟыса-а со кылдэ?
- Озьы но, тазьы но. Но ӵемгес – кылбурез лыдӟыса. Мон малпамъя, котькуд зэмос кылбурлэн лушкем гурез вань. Юнме шорысь уг шуо ук кылбурчиос: мынам пушкам, пе, кылбурелэн гурез чузъяське. Но со гурзэ шара поттыны, кырӟаны со уг быгаты. Туж шер удалтэ со гурез шӧдыны мукет муртлы, композиторлы. Со понна кылбурез пыдлозяз, берпум сиосыз дорозь валаны, сюлэм пыртӥд поттыны кулэ. Мон, кылбурлэсь пуштроссэ валан понна тыршисько солэн автореныз матысьгес тодматскыны, тодыны солэсь мылкыдзэ, малпанъёссэ, мар солэн верамез потэ аслаз чуръёсыныз. Кылсярысь, озьы вордскиз милям Людмила Кутяноваен «Берпуметӥ вальс» кырӟанмы. Мон сямен, ӟеч кырӟан пӧрмиз.
- Вордэм нылпиос ваньмыз огкадь дуно шуо ке но, вань, дыр, тон понна тужгес но дуно кырӟанэд?
- «Аргурезь». Та кырӟан яратоноез гинэ ӧвӧл. Со мынам улон гуре, мынам философие, улон шоры учкеме. Анатолий Перевозчиковлэн чуръёсыз мыным туж матын луизы.
- Нош тон ачид кылбур гожтыны ӧд эскерылы-а?
- Ӧй. Инмар сётымтэ сыӵе быгатонлык.
- Тынад быгатонлыкъёсыд сотэк тырмыт. Театрын шудӥськод, крезьгур гожъяськод, кырӟаськод, пӧртэм инструментъёс кияд кырӟало. Кытысь со ваньмыз тынад? Оло, выжыяд вал кин ке кибашлы кырӟась-верась? Адями сярысь тужгес но умой верало солэн выжыосыз.
- Выжыямы вылэм кыӵе ке Шултынник Семон. Пересьёслэн верамзыя, туж, пе, шӧртчи но, йыртэмась но вылэм. Со ик арганэз но ортчыт етӥз шудэ вылэм. Мукетъёссэ «артистъёсты» история ми дорозь вуттымтэ.
- Нош ачид кызьы искусствоен герӟаськид?
- Мон кыкетӥ классын ик баянэн шудыны кутски. Бадӟымезлэн агаелэн, Толялэн, одӥг вакыт баянэз вал. Но со малы ке но алэ вал монэ шудонлэсь. Кытчы ке кошкыса вуэ гинэ но, мон шап! баянэз борды. Ну, шудӥсько ук, ну, шудӥсько. Но одӥгез синмы укноын. Ага! Толя бертэ, баянзэ интыяз пуктоно. Озьы шудод шат кӧттырмон? Анаез олокӧня ёртыса вози баян понна. Мед басьтоз шуыса, куинь гужем ӵоже пудо возьманы ветлӥ. Басьтӥз ук. Али кадь ик тодӥсько на, кызьы ми ветлӥмы комиссионной магазинэ. Мон баянэз адӟи гинэ но соку ик ӝабырски. шудыны кутски, дунне вылысь ваньзэ вунэтыса. Котырам калык люкаськиз, кылзо, ушъяло. Анай уксёзэ лыдъя, шугъяське, тырмоз, оло, уз. Вузкарись буйгатэ: «Хватит, хватит, бабушка! Берите баян, вон как играет мальчик». Автовокзалын пукыны маза ӧвӧл ни, баян магнит кадь бордаз кыске. Ӧй чида, поттӥ но шудӥсько ини. Дорам милиционер лыктӥз:
- Мальчик, не мешай работать, перестань играть!
Кылзӥськытэк ӧйлась. Ма карод, уг вала вылэм милиционер кырӟась сюлэмез.
Нош Толя агае, кулон азязгес ини, тодаз ваиз:
- Вот кыллисько, радио пыр тынэсьтыд кырӟамдэ кылзӥсько но малпасько, малы меда уг лэзиськы вал тонэ баянэным шудыны?
- Озьы ик баян тонэ вуттӥз театре?
- Ма, пырак баян гинэ ӧз, дыр. Бадӟым классъёсын дышетскыкум, клубе ветлыны кутски, спектакльёсын шудӥ, вокально-инструментальной ансамбльын. Дас класс бере кытчы мыныны ӟудӥ. Одӥгез эше ӵектӥз: ойдо, пе, кульпросветучилищее мыном, Иже. Ойдо ке, ойдо. Отын ар дышетски но армие басьтӥзы. Хабаровске шеди, ракетчике.
- Ну зэмос службаез адӟылӥд меда? Солдат клубын дырдэ ортчытӥд, дыр?
- Кытын, пе! Кык ар куспын зэмос служака луиськиз, пӧсьсэ но кезьытсэ, шӧгзэ но кузьытсэ кӧттырмон сииськиз. Сыӵе служба бере самой шакрес «дембель» мылкыдын бертӥськиз. Нуналлы быдэ юондыр, ӝытлы быдэ вордскем Ожмос ульчаостӥ гитараосын юмшан, нуназеозь кӧлон. Ӧйтӧд, маин со ваньмыз йылпумъяськысал, но Инмар, лэся, пумитам ыстӥз удмурт кылъя но литературая дышетӥсьме Зинаида Семёновна Ниязоваез: тон, пе, кӧня юмшаны малпаськод на? Мын дышетскыны институтэ. Со кытысь ке тодэм, культурая министерство, Уфаысь искусствоосъя институтэ келян вылысь, удмурт театральной студие егитъёсты кутэ шуыса. Мыноно кариськи. Анай кыланы-бураны кутскиз: «Остэ, Инмаре, кытчы сокем кыдёке нош ик (служба бере, иське) кошкод, асьмелэн уксёмы но ӧвӧл ук!». Татын ини Толя брат куаразэ боз-боз поттӥз: «Мед дышетскоз!» Бражкаен кружказэ кымалтӥз но ӵогиз на: «Мон юртто!».
Милемды кутыны кулэ вал ватсаса наборе, кыкетӥ курсэ. Мынӥмы вал куать кузя, кельтӥзы кыксэ гинэ: монэ но одӥг нылашез. Собере милемды но берен келязы, Москва, пе, малы ке лэзьымтэ кутыны. Бертӥ. Пыри Леонид Григорьевич Романов доры (соку культурая министрлэн воштӥсез, али Удмурт театрлэн валтӥсь режиссёрез – Г. К.), «коттӥ» мӧля вылзэ. Леонид Григорьевич ӝот-ӝот вераз: котьма ке но, тонэ одно ик дышетом. Ӧйтӧд, олокинэн, вылды, со вераськиз, олокытчы гожъяз, жингыртӥз но монэ берен Уфае келязы. Озьы ик студент луи.
- Тынад кузпалыд но отын дышетскемын кадь ук?
- Отын. Отысен ик кузпалъяськимы, отын ик пимы вордскиз. Студиын дас куинь кузя дышетскимы, нош бертӥмы дась ньыль кузя.
- Дышетскыса бертӥд, тонэ кутӥзы Удмурт драмтеатре. Егит специалист, кужымед пачыл потэ, ваньзэ валтӥсь рольёсты котькинлэсь яркыт шудыны быгатод, «пересьёсты гурвылэ улляны» дась. Сыӵе Наполеон ӧй вал-а?
- Конечно, ӧй вал. Тон мар-о, дышетскондэ быдтӥд но редакцияд тӧдьы вал вылын-а, мар-а пырид? То-то угось. Мон но озьы ик. Институтын одӥгез дышетӥсьмы шуоз вал: ми, пе, тӥледды вуоно ремеслоеныды тодматӥськом гинэ, нош артист луыны улон дышетоз. Озьы ик луиз. Кӧня мон театрын ужасько, сомында ик дышетскисько. Нимысьтыз висъяса кыӵе ке артистэз яке режиссёрез вераны уг быгатӥськы, соиз яке таиз мынам дышетӥсе вал шуыса. Ваньмызлэсь пичиен-пичиен малы ке но ӟечезлы дышетски, адӟем кари. Собере, адӟем карон сяна, ас поннад но дышетскыны кулэ ук, выльзэ утчаны. Тодӥськод-а, мар со вылӥ пилотаж актёрлэн ужаз? Астэ палэнысен адӟыны быгатон, котькуд шектэ но вормондэ. Соку тон озьы шудыны быгатод, шудэмед но син шоры уз йӧты, тон но тынад героед одӥг адями луоды.
- Та вылӥ пилотажед, однако, вылӥ математика выллем мудрон маке луыса кошке. Вождэ эн потты, паньтэм, но мон малпамъя, тани, туж тросэз адямиос сцена вылын шудыны быгатысалзы кадь. Котькудӥз ик кизилиос кадь уз, но шоро-куспо пӧрмытозы.
- Котькуд адями кыӵе ке но роль шудэ улонын. Мон сое ӧй малпа, кылэмед вань, дыр. Но одӥгез улонын шудыны, мукетыз – сцена вылын. Со пӧртэм арбериос. Кудӥз улонын туж етӥз, олокызьы но маскаръяськыны, кыланы-бураны, калыкез паймытыны быгатэ, нош сцена вылэ потты сыӵе адямиез – чылкак бакоме, суйтэм-пыдтэм луэ, олокытчы вань быгатонэз ыше. Мукетыз шыр кадь лушкем но адскисьтэм, нош сцена вылын адямиез тодманы уг луы. Веранэз ӧвӧл, залын пукись муртлы сцена вылын шудон туж капчи потэ, дыр, тужгес но артистъёс эркын, курадӟытэк шудо ке. Вот тон сцена вылэ пот, соку учком, кыӵе тон артист.
Мон мар вераны турттӥсько? Инмар тынад йырад но сюлэмад номыр но ӧз ке поны, артист уд луы. Оло, дыго-мого курадӟод ик, нош зэмос артист уд луы. Ма, сцена вылын гинэ ӧвӧл озьы, котькуд удысын.
- Мар асьмеос весь уж но уж сярысь? Театрен но кырӟанэн улон уг быры ук…
- Мон понна быре, кильтыръяськытэк верасько тыныд.
- Но ваньмон дырыд вань ук. Мар кариськод, кытчы ветлӥськод, мае лыдӟиськод? - Коть оскы, коть эн, но та виын номыр но уг лыдӟиськы. Телевизорысь иворъёсты гинэ учкисько. Дыр уг тырмылы. Нуназе репетициос, ӝытазе спектакльёс, концертъёс. Гастрольёсы но ӵем гинэ потасько.
- Гуртоосыныд нош кыӵе кусыпъёсыд? Данъясько-а соос тонэныд?
- Данъяськемзэс уг тодӥськы, нош пыкылыны вуо. Мон гуртын дыръям пыдам калошаен, вылам посӥськем штанэн, вуж фуфайкаен ветлӥсько, кытӥяз мычиськемын но уг луиськы. Гуртоос урдӥсько:
- Ма, тон артист ук, малы сыӵе лусьтыр-ласьтыр ветлӥськод?!
Мон пумитазы:
- Эн тэбине! Мон татын гастрольын ӧвӧл, ужаны бертэмын.
Гуртоосын уд мӧзмы, ява. Ожмосын вань фамилияя паньтэме, солэн но Бекманов фамилиез. Со – фермер. Отчы-татчы, пе, мынӥсько ке, юало: тон артистлэн ӵыжы-выжыез ӧвӧл-а? Родной братэз, пе, шуисько но, вань ужъёс каньылак гинэ быдэсмо. Вот ведь кыӵе етӥзэсь землякъёс. Я, ӵок ойдо, мон пумит ӧвӧл, мед йыринтозы, пайдаез луэ ке.
- Котьма ке но выльысь уж борды берытскытэк уг луы. Тани ма сярысь юам потэ. Политикъёс, ма, соос гинэ ӧвӧл, искусстволэсь кужымзэ, луонлыкъёссэ валаса, артистъёсты «медъяло» асьсэ ужпумъёссэс быдэстонэ, кылсярысь, быръёнъёс азьын калыкез ас палазы кыскон понна. Тодӥсько, тон но пыриськиськод сыӵе ужрадъёсы. Сыӵе дыръя мае тон вылӥегес пуктӥськод: коньдон ужпумъёсты яке «медъясеныд» огкылысь луэмдэ?
- Коньдон ужпумъёсты вылӥегес пуктысал ке, мон ӧй керпотысал со сярысь вераны. Котьма мед шуозы но, мынам ужаме, мынам быгатэме – со мынам узырлыке, кинлэн ке ӧвӧл. Кызьы мон соин кузёясько – мынам гинэ уже. Артистлы тани ӟеч инструментъёс кулэ, йӧн-йӧн костюмъёс. Нош мынам соос, ачид адӟиськод, кыӵеесь. Вот и малпа, мае мон вылӥегес пуктӥсько. Нош быръёнъёс азьын но мукет ужрадъёс дыръя ужасько «Удмурт кенеш» понна, озьыен, удмурт калык понна.
- Тон кемалась ӧвӧл ни кутскись артист. Театр тон вылын но тынад ёзъёсыд вылын возиське, шуыны луоз. Аслад ужпумъёсыд сяна, тонэ шугъяськыто, дыр, быдэс коллективлэн «висёнъёсыз» но, озьы-а? Кыӵегес соос?
- Соос трос. Но выжызы одӥг – коньдонлы ёрмон. Тани ми асьме лымамы пӧзьыса улӥськомы. Озьы быгатонлыктэ уд но будэты, уд но шеры. Сямъёс, йылолъёс – со умой маке, веранэз ӧвӧл. Но выльдӥськонтэк ваньмыз пашме, куасьме, гынме, котькызьы шу сое. Кулэ выль кужым, выль омыр. Туж умой луысал, дорамы палэнысь, странаысь валтӥсь театръёсысь режиссёръёсты одӥг сезонлы коть, мар сезонлы – коть одӥг спектакль пуктыны ӧтьысал ке. Азьвыл дорамы критикъёс Москваысь, Ленинградысь вуыло вал. Палэнысь дунъет туж юрттэ ужаны. Ваньмыз со овӧл, малы ке шуоно коньдон ӧвӧл. Озьы ик артистъёсты возён сярысь но. Мынэсьтым юало ке кӧня уждун басьтэмме, мон йылэтыса верасько, 4 сюрс пала, пӧй. Зэмзэ вераны кытӥяз возьыт но, уз но оске. Нош мон ведь заслуженной артист, пичи ке но ватсэтъёсы вань. Нош кызьы уло егитъёс? Туж ёрмыса. Соосты театрез яратон гинэ ужын возе. Но театрез яртонэн семьядэ, пиналъёстэ уд сюды. Артист сюрес вылын уг лошъяськы, сое будэтон – штукаен производство, нош ыштыны сое кема ик ӧвӧл.
Кивалтӥсьёс нокызьы но уг валало, шӧдске, милям театрмы – быдэс дуннеын одӥг гинэ профессиональной удмурт театр шуыса. Мукет республикаосын асьсэ театръёссэс чутрак мукет сямен дунъяло.
- Пӧсекъямед валамон. Оском, тонэныд верам лэчыт ужпумъёс куке но сэрттэмын-пертчемын ик луозы шуыса. Но пумиськонмес ачид сярысь ик вераськонэн йылпумъям потэ вылэм. Тон 20 ар ӵоже ини сцена вылын. Та дыр куспын кыӵе вылӥ нимъёс, наградаос люкад?
- А, ваньмыз со синэз мальдытон гинэ. Мон понна вылӥ награда, вылӥ дунъет – пачылмем зал. Тани 7-тӥ-8-тӥ декабре луозы 20 ар ӵоже ужамелы сӥзем творческой ӝытъёсы, соку ик учкомы ини, кызьы дунъялозы монэ учкисьёс.
- Нош ас поннад йылпумъянъёсыд кыӵе?
- Кыӵе йылпумъянъёс али ик? Али гинэ улыны кутскиськом ай, мае ке–мае ке возьматомы на! Серекъясько.
- Серекъямад зэмез но трос гинэ кадь.
Источник:
Бекманов Г. И. Ми возьматом на ай асьмеды! / Г. И. Бекманов ; записал Г. Коряков // Удмурт дунне. - 2001. - 23 нояб. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
