Нуриева Ирина Муртазовна

Удмурт крезьгурлэн ошмес синэз

И. М. Нуриева

Искусствоведение наукаосъя кандидат Ирина Нуриева улонзэ сӥзиз удмурт калык крезьгурез эскеронлы. Сое бичаса, тодосчи асьме шаермес но бускель улосвылъёсты котыртӥз, наукая нимысьтыз ужъёс но калык крезьгурен 2 бичет поттӥз. Иже лыктэмез дырысен со тырше Историяя, кылъя но литературая Удмурт институтын, Удмурт кун университетын крезьгур искусствоосъя кафедралэн доцентэз луэ. Ирина Нуриева – Бигер шаерысь, кукмор удмуртъёс пӧлысь.

- Ирина Муртазовна, тӥледлы, палэнысь лыктэм удмуртлы, секыт ӧй вал-а Удмурт шаерлы но татысь удмуртъёслы дышыны?

- Тунсыко юан, но сыӵе шуг-секытъёсы ноку ӧз кылдылэ. Мон вордӥськи Германиын, атае ожгарчи бере, семьяенымы интыысь интые кӧчылӥмы. Соин, тӥяськем улон радлыкез ӝоггес тупатыса, выль интылы дышыны но улонэз азьланьтыны кулэ вал.

Мынам выжые Татарстанысь Кукмор ёросысь Куркиня гуртысь. Мон понна со котьку но пичи удмурт ошмес син. Пичи дыръям гуртэ анай-атаеным бертылыкумы, Куркинялась песянайёс куэм удмурт дэремен ветло на вал, нылпиоссэс бадӟым питрано, лакен шобыртэм ӵуж пичи уробоосын нуллӥзы. Нош котьмалэсь но кужмо мон паймисько вал кырӟамзылы.

Ми четысь (городысь) бертӥськомы бере, гуртысьтымы но бускель гуртъёсын улӥсь туганъёсмы (ӵыжы-выжыосмы) милемын адӟиськыны лыкто вал. Юонын сямен, корка тыр калык люкаське, нош кырӟаны ке кутско… Школаын, радио пыр кылэм гуръёслэсь со кырӟамзы чарак мукет вал. Тужгес но паймылӥ куаразылэн аспӧртэм тусбуезлы (тембрзылы).

Быдэ вуэме бере ини, Казаньысь консерваториын дышетскыкум, аспӧртэм кырӟан манерзы монэ озьы ик паймытыса возиз. Малы меда удмурт сям-нерге кырӟанъёсты мукет куараен кырӟало? Пумен та ужпумез эскерыса, мон валай: со тол-гужем вошъяськемъя улыны дышем вашкала йырсазьлэн тодметэз. Жаляса верано, ритмез но нотаосты сямен, куаралэсь аспӧртэм тусбуйзэ кагаз вылэ гожтыса кельтыны уг луы. Сое тон яке кылӥськод, яке уд кылӥськы ноку но – таиз ини эскерись муртлэн быгатонлыкеныз герӟаськемын.

- Палэнысь лымшор удмуртъёслэн яркыт аспӧртэмлыксы – ныр пыр кырӟамзы, кылсярысь…

- Шонер, соос ныр пыр кырӟало. Куара поттыкузы, ымныр быгытсылэсь выремзэ ик шӧдо. Мыным атай вера вал, азьло егитъёс гурт вӧзысь Батырсьӧр возь вылэ Акашкаысен (Пасха) Семыкозь (Троица) юмшаны поталлям, отын ӟечыраллям. Егит куараоссы гуртэз крезьгур бус пушкы выйыто вылэм. Ведь соос мылкыдэз буйгатон понна гинэ ӧз кырӟалэ, куаразэс кыӵе ке крезьгур инструментэз сямен нимысьтыз пуктыса, тупатыса, инкуазен, вылӥ кужымъёсын вераськизы. Сыӵе кырӟамез кылыса, юзыр-кезьыр луыса ик кошкиськод.

- Шошма удмурт выжыысь пеcянае туж оскись. Кырӟанын «Инмар» кыл кутӥське ке, сое кырӟаны соглаш уг кариськы. Малпа, православной молитваосын но кырӟанъёсын гинэ со кылэз поттылыны яра.

- Соиз ини мукет югдур. Со возьматэ, макем адями пушкы православной оскон мур пыӵамын. Шошма удмуртъёс черке вазь пыртэмын. 20-тӥ даурлэн кутсконаз соос пӧлын православиез вӧлмытыны трос сюлмаськиз Марий Элысь Карлыганысь удмурт миссионер Кузьма Андреев. Гуртаз со школа но усьтӥз, православной литератураез удмурт кылэ берыктыны сюлмаськиз. Марий Элысь Мари-Турек ёросэ но Татарстанысь Балтась ёросэ экспедицие потакум, пумиськылӥ 1905-тӥ-1907-тӥ арын вордӥськем муртъёсын. Соослэн 7-8 класс дышетскемзы вал – со трос. Карлыган гуртысь милемлы шедем нырысетӥез ик песянай дун-чылкыт Пантелеймонлы сӥзем молитваысь яке акафистысь оглюкетсэ удмурт кылын кырӟаз. Отысь песянайёс милемлы возьматылӥзы революцилэсь азьвыл удмурт кылын потэм вӧсяськон книгаосты, нош куд-огез визякуз (кӧс утьыкуз) кырӟаны-вераны соглаш уг луы вал.

- Удмурт калык крезьгурез эскерон сярысь малпанды кызьы кылдӥз?

- Дышетскыны мылкыды туж бадӟым вал, крезьгуръя вылӥ образование тужгес но басьтэме потӥз. Нылпи сямен оскисько вал, мынам малпанэ одно ик быдэсмоз шуыса. Школа бере Мурманскысь крезьгуръя училищеез быдэстӥ, собере Казаньысь консерваториын дышетски – ваньмыз азьвыл дасям планъя кадь пӧрмиз. Шӧдтэк шорысь луиз огез гинэ – фольклор борды басьтӥськеме.

Практика ортчыкум, Кукмор ёросысь удмурт калык кырӟанъёсты гожъяй вал, отчётме дышетӥселы сётӥ но, люкам материалъёсы ӝӧкам кыллизы. Монэ соос малы ке но бордазы ӧз кыске соку.

Малпанъёсам вал Д. Шостаковичлэсь крезьгурзэ яке пӧртэм искусствоослэсь герӟаськемзэс эскерыны. Нош дышетӥсе, практика уженым тодматскыса, шуиз: та туж вашкала кырӟанъёс ук! Ваньзы соос куинь нота (куара) вылын возисько, трос дауръёс ӵоже соос воштӥськытэк улӥллям.

Дышетӥселэн дэмламезъя мон удмурт калык крезьгур борды басьтӥськи. Эскерыса валай, таган (ӟечыран) кырӟанъёс Ватка сьӧрысь удмуртъёслэн но эстонъёслэн гинэ пумисько вылэм. Соку тодосчи Римма Чуракова аслэсьтыз «Лымшор пал удмуртъёслэн кырӟан гуръёссы» (1999) крезьгур бичетсэ ӧз потты на вал. Ми ӧм на тодэ, Кизнер ёросысь кык гуртын ӟечыран гуръёс шедьтэмын шуыса.

Консерваториез быдтэме бере мон вуи Историяя, кылъя но литературая Удмурт институтэ. Со дырысен татын, Ижын. Трос ар ӵоже ужаса, валай: крезьгур фольклорез пӧртэм паласен эскеронъя ужпумъёс быдтонтэм трос. Институтысь кылосбур эскеронъёсъя отделысь тодосчиос А. Голубкова, Т. Владыкина, В. Ванюшев, Л. Айтуганова, М. Атаманов та ужын мыным туж ӟеч юрттэт сётӥзы. Кылчиен В. Кельмаковен ӵош ужаны ӧз кылды ке но, солэсь диссертацизэ мон пыр-поч дышетӥ.

Вераськон кылэз диалектъёслы висъян мыным юрттӥз калык крезьгур диалектъёсты но шедьтыны. Пусъеме потэ, крезьгур кыл но вераськон кыл ог-огзылы туж матын. Крезьгурез эскерыку, Л. Карпова, И. Тараканов кылчиосмылэн ужъёссы инъет луо.

- Асьтэлы мае выльзэ усьтӥды?

- Нуналлы быдэ тодмотэмез шеде. Удмурт кырӟанэз котькуд учыре выль сямен кырӟаны, гурзэ пичияк воштыны луэ. Со асьме калык кырӟанлэн валтӥсь тодметэз. Венгер кырӟанын одӥг нотазэ гинэ воштӥд ке, со яке янгышен, яке мукет кырӟанэн лыдъяське ини. Трос дыр ӵоже удмурт калык кырӟанэз тунсыко ӧвӧл шуизы: куинь нотаысь бен марзэ шедьтод? Радио но телевидение пыр чузъяськылӥзы берло кылдэм паськыт диапазонэн калык кырӟанъёс.

Кырӟасьёсызлы но со кырӟанъёс тунсыкогес потӥзы, вашкала гуръёс палэнэ кылизы. Нош зэмос удмурт крезьгурлэн тодметэз – сюбег диапазон (куинь нота гинэ), аспӧртэм тембр, аслыз гинэ тупась ритмика. Котькуд учыре та кырӟанъёс мукет сямен чузъясько.

Мон вашкала гуръёслы туж синмаськемын, со удмурт калыклэн зэмос зарниез, валтӥсь тодметэз. Удмурт кырӟанын вашкала адямилэн дунне шоры учконэз туннэ нуналозь возиськемын. Жаляса верано, тодосчиос крезьгурлы бадӟым саклык ӧз висъяллялэ, тросгес – фольклор текстъёслы, этнографилы. Нош крезьгурын текстлэсь но узыргес тодон-валан возиське вылэм. Кылсярысь, сюан гуръёсты эскерыса, валаны луэ, эмеспи яке кен выжы сюанын валтӥсь луэ, сюанын инициацилэн (нылпиосты быдэ вуэмъёс пӧлы пыртон) трос люкетъёсыз возисько.

Туала дыре вашкала гурез тодӥсь-валась кырӟасьёсты шедьтыны шуг. Азьло магнитофонъёслы, кассетаослы ёрмыса улӥмы, но кыӵе со вакытэ фольклор вал! Али аппаратуралы узырмим, но тодӥсь кырӟасьёсмы ӧвӧл ини. Котькыӵе фольклорез эскерись тодосчи таӵе югдуре сюремын, тани со но асьме вылэ вуиз ини.

- Кытчы али потаськоды?

- Удмуртилэн уйпалаз. Крезь кырӟасьёсты бадӟым шуген огазе люкаськом. Крезьёс удмурт лулчеберетын гинэ пумисько, мукет калыкъёслэн крезь выллем кырӟанъёссы ӧвӧл. Крезь – со импровизация сяна, одно ик ӵошен кырӟан, куке котькуд кырӟась муртлэн аслаз кылъёсыз. Таӵе амал возьматэ, асьмеос, удмуртъёс, кемалась ини ю-нянь будэтӥсь, бӧлякен улӥсь калык шуыса.

Нош малы, валче кариськыса, одно ик аслэсьтыд гурдэ кырӟаны кулэ меда? Коми калык крезьгурен ӵошатыса, мон таӵе малпанэ вуи: уйпал удмуртъёслэн крезьёссы инструментальной импровизациос бордысь потэмын. Комиослэн со возиське на: нылкышноос, нюлэс куше ӵош люкаськыса, узьыгумыосын шудо. Но та малпанэз йылаз-пумаз вуттыны кулэ ай.

- Удмурт фольклорлы сӥзьыса, кыӵе ужъёсты потэмын?

- 1999-тӥ арын «Музыка в обрядовой культуре завятских удмуртов» монография потӥз, 2 люкетэн «Ватка Кам тупалась удмуртъёслэн крезьгуръёссы» книгае кукмор но шошма удмуртъёслэн крезьгуръёссы пыризы. 1995-тӥ арын потэм нырысетӥ люкетаз кукмор удмуртъёслэн кырӟанъёссы люкамын. Со бичетэз сӥзи песятаелы, усто кырӟасьлы, Куркиня гуртысь берпуметӥ вӧсясьлы Туймурза Байгельдинлы. 2004-тӥ арын шошма удмуртъёслэн гуръёсынызы люкетсэ поттыса, тау кари удмурт калык крезьгурез дунъясьлы, венгер тодосчилы Ласло Викарлы.

Удмурт калык крезьгурез ӵошатыса, ваткасьӧр кырӟанъёслэсь, зоутъёслэсь, чеберзэс, вашкала луэмзэс возьматыны тырши. Нош тунсыко таиз но: котькудӥз тодосчи аслэсьтыз эскерем крезьгурзэ тужгес но вашкалаен лыдъя. Кунсьӧр эскерисьлэсь но традициын будэм асьме тодосчиослэсь ужъёссэс ӵошатыны туж тунсыко. Кылсярысь, Ласло Викар гожтэ, макем трос шошма удмуртъёслэн вашкала дырысен воштӥськытэк кылем, «измем, кынмем» гуръёссы. Нош учконо ке, со удмурт зоутлэсь (гурлэсь) но сюан зоутлэсь пӧртэм вариантъёссэс гинэ гожтэм вылэм.

1930-тӥ аръёсы Николай Греховодов ужъёссэ калмез удмуртъёслы (Сьӧлта, Сюмси палъёсысь) сӥзиз. Со лыдъя вал, калмезъёс тужгес но вашкала гуръёсты утьыны быгатӥллям шуыса. Римма Чуракова музыковед понна кизнер удмуртъёслэн кырӟанъёссы тужгес но вашкалаесь. Уг тодӥськы, оло, со асьме лулчеберетмылэн аспӧртэмлыкез. Мургес бугыртӥд ке, вашкалаез сюрытэк уз кыльы. Крезьгурез эскерон археологилы кельше: крезьгурын но висъяны луэ пӧртэм сӥосты: вашкалазэ но, берло вакытъёсы кылдэмзэ но.

- Тӥ Удмурт кун университетын студентъёсты дышетӥськоды. Диплом ужъёсазы мае соос эскеро?

- Ми дэмласькомы соослы гуртъёсысьтызы материал люканы. Яратӥсь песянайёссы соослы ваньзэ кырӟалозы-мадёзы. Студентъёс ӵемысь сыӵе гуръёсты шедьто, кудзэ ми, тодосчиос, гуртэ одӥг-кык нуналлы потыса, ноку но гожтыны ӧм быгатысалмы!

Студентъёс арысь аре воштӥсько. Дунне воштӥське, ми доры лыкто туннэ дуннелэн нылпиосыз. Студентъёс – со асьме нылпиосмы кадь, ми соослы улонэ сюрес возьматыны кулэ. Нош нылпиосмы уло сыӵе ӟугаськем дуннеын, кытын шуг валаны, тон зэмлыкен яке алдаськонэн пумиськид. Егитъёсты яратыса, либыт валтыны кулэ азьлане.

- Нош кыӵеесь соос, туала дуннелэн нылпиосыз?

- Атайёс но нылпиос куспын валамтэос котьку луозы. Мӧйыос ӟурозы, ми ас вакытамы тӥлесьтыд умойгес вал шуыса. Но али мукетыз ужпум но кылдӥз: таӵе лек ивор сётӥсь амалъёс, таӵе трос СМИ-ос ӧй вал. Дуннеын укыр трос уродэз вӧлмиз. Адямиос дугдӥзы ог-огзэсты гажамысь, асьсэды гинэ яратыны кутскизы. Со синме ик пыре: котькудӥз егит мурт малпа, со дуннелэн, Вселеннойлэн, шорсюлмыз шуыса. Котькудӥз азьын дунне пунэмо луыса кылем. Но ведь ог-огедлы юрттон – со улонлэн нормаез. Куке тон адямиез, вуысь поттэм интые, палэнысен учкыса туспуктӥськод – таӵе сям улонлэн радаз пыре. Со кышкыт. Тодмотэм муртъёс куспын гинэ ӧвӧл, матысьёсыз куспын но яратон ӧвӧл. Ог-огзы шоры кӧт тырон амал шоры кадь гинэ учко. Эгоизм – улонын самой кышкытэз. Сыӵеез ӧй вал кадь азьвыл. Берло дас ар ӵоже улонамы америка сямъёс пыӵазы. Муртлы юрттыны потэм уг шӧдӥськы, котькудӥз ачиз понна гинэ улэ, Америкаын кадь. Со улонамы кужмысь пыртӥське, вылӥысен.

- Кызьы улоно соку?

- Валтӥсь ужпум – со шонер сюрес шедьтон. Кызьы сое быръёно, гожтэмын весяклы кылдытэм книгаын – Евангелиын. Асьмеос улӥськомы, йырмес лэзьыса, мугор сярысь сюлмаськыса. Шуом, парсь вордӥськемезъя уг быгаты йырзэ ӝутыны, со улӥе гинэ учке, кыедын гинэ бугыръяське. Ӧрӟи сямен вылӥе ӝутӥ ськысал ке, со воксё мукет дуннеез адӟысал. Нош адями быгатэ йырзэ ӝутыны, мылыз гинэ уг пот. Со ӧвӧл зомби, сое Инмар кылдытӥз, аслыз укшатыса, адямилэн мылкыдызъя улыны луонлыкез вань. Лул понна сюлмаськыса, будыны тыршыса.

- Тӥ черкын удмурт службаосы пыриськиськоды.

- Ог 7 ар удмурт службаосын кырӟасько. Туж бадӟым тау кареме потэ тодосчилы, протодиаконлы Михаил Атамановлы удмурт клиросэ монэ ваемез понна! Клиросын кырӟан мон понна Инмарлы ярамон уж лэсьтон (послушание) луиз.

Крезьгур пӧртэм луыны быгатэ: лулэз чылкытатӥсь но, туж кышкыт но. Нош православной крезьгур котьку но пайда вае. Ачид кырӟаськод ке, со эшшо но зол юрттэ. Храмысь потыку, капчигес луэ, мылкыд няська. Удмурт клиросэнымы кивалтэ Юлия Филиппова, солэн крезьгуръя образованиез ӧвӧл, но ми, вылӥ образование басьтэм муртъёс, соин данъяськыны быгатӥськом. Со вань гласъёсты, вань тропарьёсты тодаз возе, тодэ, мае кырӟаны сояз яке таяз учыре, кырӟа нотаостэк, текстъя гинэ. Эшшо туж трос калык православной кырӟанъёсты (кантикъёсты) тодэ. Соин котьку ӵош кырӟа Валя апай, Валентина Дугаева. Солэн арлыдэз вань ке но, куараез кужмо. Нырысьсэ Ижын Крестовоздвиженской храмын удмурт службаос ортчытыны кутскыку, клиросысь мылкыд монэ нырысь паймытэ вал: та адямиос сюлмысьтызы, яратыса асьсэ вылэ басьтэм ужзэс быдэсъяло. Удмурт службаосы ветлӥсь калык но монэ паймытэ ӟеч паласен: соос но мур оскись, сюлмысь вӧсяськись адямиос. Мон соослэсь дышетскисько, кызьы улоно, кызьы вӧсяськоно.

- Семьяды сярысь но мадёды-а?

- Мон туж шудо адями: анай но песянай луисько, яратоно Максим нуноке – мынам эше. Нылпиосы будӥзы ини, пыд вылазы йыг-йыг сыло, дунне шоры асьсэлэн учконзы. Анай-атае, Нина Фёдоровна но Муртаза Туймурзинович Байгельдинъёс, Иже интыяськизы. Праздникъёсы одно ик бадӟым семьяенымы люкаськиськомы. Анай-атае – нырысетӥ юрттӥсьёсы, нырысетӥ информантъёсы, 1980-тӥ аръёсы ми ӵош экспедициосы но потамы.

Соос монэ вордӥськем музъемме яратыны дышетӥзы. Кытчы гинэ ӧм вуылэ ми – Мурманске, Чебаркуле, кунгож сьӧры, котьку, одно ик милемыз бордаз кыскиз Кукмор ёросысь Куркиня гурт. Мынам но вань сюресъёсы отчы нуо.

Источник:

Нуриева И. М. Удмурт крезьгурлэн ошмес синэз / И. М. Нуриева ; записала Л. Дмитриева // Удмурт дунне. - 2013. - 29 март. - С. 10, 15. - (Удмурт кизилиос).

За предоставление материала выражаем огромную благодарность редакции газеты "Удмурт дунне"