Чуракова Римма Аркадьевна

Муш Мумы

Чуракова Р. А.

Римма Аркадьевна Чуракова – музыкая дышетӥсь, Россиысь искусство удысысь дано ужась, Россиысь композиторъёслэн огазеяськонзылэн ёзчиез. Римма Аркадьевна вордӥськиз Ижевскын - пединститутын но монтажной техникумын дышетӥсьёслэн семьяязы. 1955-тӥ арын крезьгуръя училищеез йылпумъяз, 1961-тӥ арын – Казаньысь консерваториез. Пенсие потытозяз Ижысь крезьгуръя училищеын калык крезьгурлы но кунсьӧр музыкая литературалы дышетӥз.

1973-тӥ арысен кутскыса, Римма Аркадьевна студентъёсын удмурт калык кырӟанъёсыз люка, эскере. Нимысьтыз книгаен потӥзы таӵе ужъёсыз: «Лымшор удмуртъёслэн сям-йылол кырӟанъёссы» (Таллин, 1980), «Лымшор удмуртъёслэн кырӟан сямзы но кылбур текстъёссы» (Таллин, 1986), «Удмурт сюан гуръёс» (1986), «К. П. Гердлэн творчествояз кырӟан» (1989), «Пот, пот, шундые» (1992), «Лымшор удмуртъёслэн кырӟанъёссы» (Кизнер ёрос – 1999), «Удмуртиын музыкая культура» (А. Голубковаен ӵош – 2004). Со сяна Римма Аркадьевналэн 30-лэсь трос ужъёсыз потэмын пӧртэм научной сборникъёсын, «СССР-ысь калыкъёслэн крезьгурзы» трос томъем музыкальной энциклопедиын. Римма Аркадьевна аслаз докладъёсыныз Чебоксарыын (1975), Таллиннын (1972, 1976, 1986, 1989), Свердловскын (1979), Куйбышевын (1985), Воронежын (1989), Москваын (1993, 1997), Стара Рузаын (1995) ортчем фольклор конференциосы пыриськылӥз, озьы ик – финн-угор калыкъёслэн 1990-тӥ арын Венгриын ортчем конгрессазы.

- Тӥ городын вордӥськемын ке но, удмурт выжыды борды кыстӥськиды.

- Анай-атае удмурт гуртын будэмын. Атае Дэбес ёросысь, анае Шаркан ёросысь. Но семьяямы удмурт кылын ӧз вераськылэ. Анае ӝыныё ӟуч вал. Гуртысь удмурт калыкез мон умой-умой тодӥ ини берлогес, Казаньысь консерваториез йылпумъяса, Ижысь крезьгуръя училищеын ужаны кутскеме бере. Училищеын мыным мукет предметъёсын ӵош калык творчествоез нуоно луиз. Нош мар со сыӵе удмурт фольклор? Мон понна тодымтэ-валамтэ вашкала дунне. Удмурт кырӟанъёсты учкыны-эскерыны кутски но, быдэсак со дуннее выйи. Татчыозь отысь потыны уг ни быгатӥськы. Озьы фольклор пыр мон аслэсьтым выжыме шедьтӥ.

- Удмурт кылын вераськиськоды-а?

- Шуген. Но ваньзэ валасько. Мон ведь удмурт кылэз ас поннам дышетӥ ини. Аслым ачим шуи: кылэз тодытэк, калык кырӟанъёсты умой уд вала…

- Кызьы малпаськоды: гуртын будысалды ке, луонлыкты кылдысал-а бадӟым музыкаез валаны, со удысын ужаны?

- Конешно, ӧй. Войналэсь азьло гурт калык секыт улӥз. Крезьгуръя вылӥ тодон-валан басьтон, бадӟым музыка сюресэ выжон сярысь малпанэз ик ӧй вал. Асьмелы ӟеч тодмо Михаил Бывальцевлэн, Григорий Титовлэн, Михаил Ложкинлэн консерваториын кызьы курадӟыса дышетскемзы. Табере гуртъёсын но крезьгуръя школаос вань ини, нылпиослы капчигес луиз.

Музыкае сюресэ мынам нылпи садысен ик кутскиз. Отын милям туж ӟеч дышетӥсьмы вал. Со нылпиосын пичи операос но пуктылӥз. Мон но отын шумпотыса кырӟай. Собере дышетскыны ветлӥ Ижысь нылпиосты чеберлыклы дышетон юртэ, музыкальной школае (фортепиано классэ), крезьгуръя училищее (фортепиано люкетэ). Казань консерваториысь музыкалэн теориезъя люкетэз йылпумъяй.

- Вань улонды – крезьгур пӧлын. Тӥ понна мар со – музыка?

- Али музыка радэ пырто оломае но: Бетховенлэсь симфонизэ но, ӟуч кырӟанъёсты но, огшоры шлягерез но. Соослэн куспазы виссы туж бадӟым. Зэмос музыка кылдэ, улэ, азинске аслаз чеберлыко тупам законэзъя. Со котькытын чузъяське, космосэ но вуэ. Солэсь тупатэм законзэ тӥяськод ке, искусство предмет быдэсак куашка. Пуштытэм юрт – со корка ӧвӧл ни, мискинь лошъяськись чалепъёс.

- Асьтэос крезьгур малпаны ӧд тырше-а?

- Ноку но ӧй тыршы. Мынам малпамея, крезьгур гожъяны кутсконо, сотэк тон улыны уд быгатӥськы ке.

- Удмурт калык кырӟанъёсты люкаса, тӥ трос гуртъёстӥ ветлӥды. Ма вунонтэмез, паймытӥсез кылиз?

- Мон котьку синмаськыса учкисько гурт калык шоры: сюлэм шырытсы паймымон, тужгес но мӧйы кышномуртъёслэн. Мыным соосын трос вераськоно луылӥз. Ваньзы секыт улон сюресэз ортчемын, няньлэсь дунзэ ӟеч тодо. Нош матын тодматскиськод ке, берпум нянь юдэссэс но шори люкозы, доразы но кӧлтозы, кырӟалозы но.

Ноку но уг вунэты Можга ёросысь Бадӟым Уча гуртысь Евдокия Александровна Антоноваез. (Асьмеос сое тодӥськомы «Мемие но вордэм» кырӟанлэн авторез шуыса.) Солэн кырӟаны яратэмез паймымон. Нырысь пумиськонмы туж тунсыко вал. Гурт урам кузя мынӥсько, вӧзтӥм кыӵе ке кышномурт ортче.

- Кин-о тӥляд татын удмурт кырӟанъёсты ӟеч тодэ? - юасько.

- Тӥледлы Дуся апай сярысь веразы, луоз. Со – мон.

- Луоз-а мыным тӥлесьтыд кырӟанъёстэс кылзыны но магнитофонэ гожтыны?

- Луоз. Ойдолэ лавкае пыром, мон отын вуз карисьлы юрттӥсько. Лавкаын розетка вань.

Озьы нырысьсэ гожтэмын вал солэн кырӟанъёсыз. Кӧня ке пол ми соин пумиськылӥм. Одӥг полаз нош кырӟанъёссэ быдэс кассета гожтӥ. Куке со ачиз кадь ик кырӟаны усто анаеныз но кырӟаз. Юасько: ӧд на-а жаде?.

- Малэсь-о жадёд? Со ведь кырӟан.

- Лымшор но уйпал калык кырӟанъёс чылкак пӧртэмесь. Кызьы, кыӵе мертэтъя тӥ соосты дунъяськоды?

- Зэмзэ но, лымшор но уйпал фольклор чылкак пӧртэм. Уйпалъёс сям-йылол кырӟанъёссэс «крезь» яке «голос» шуо, нош лымшоръёс – «гур». Пуштроссыя но соос пӧртэмесь. Крезез быдэсто припев кылъёсын (одӥг кылбур чурез трос пол вераса). Соя валаны уг луы, кыӵе югдурлы кырӟан сӥземын. Нош лымшор калык кырӟан кылъёсаз югдурлэсь пуштроссэ вера. Гур пуктэмзыя но, кырӟан манерзыя но соос висъясько.

- Дуннеысь пӧртэм выжы калыкъёслэсь гуръёссэс ӟеч тодӥськоды. Соос пӧлын удмуртэз кыӵе адӟиське? - Фольклор удысын ужасьёс асьме удмурт калык кырӟанъёсын тунсыкъясько, сое вылӥе пукто. Маиныз? Отысь кылыны луэ на туж-туж вашкала куараосты. Мукет калыкъёслэн со тросэз ышемын ни. Куд-ог йылол гуръёс куинь куараен огшоры кырӟаса вераны быгато инкуазьлэн бадӟым кужымез, адямилэн быронтэмез сярысь. Кылсярысь, сыӵе луо гырон-кизёнэз данъясь акашка, муш утён, йыр-пыд сётон гуръёс. Соосты кылзыса валаськод: адями инкуазьлы туж матын вал, ассэ солэн люкетэныз лыдъялляз. Амалтэк сюлмын кӧтӝож каръяське: асьмеос табере инкуазьлэсь кыӵе кыдёкын, сое укылтэм пинал сямен ӝожомытӥськом.

- Глобализация шуон шоры кызьы учкиськоды?

- Трос адямиос солы пумит, мон но чутрак пумит кариськисько. Озьы ке но глобализация матэ но матэ вуэ. «Огъя Европа» шуонэ пырись государствоослы ыштыны номыре. Отын калык культура кемалась ышемын-быремын ини. Нош асьмелэн - мукет ужпум: выжы калыклэн сям-йылолъёсыз возисько на. Но со пумен-пумен чалмыны быгатоз, ужпум тазьы ик берытскиз ке. Глобализацилэн «эшъёсыз» паспортысь «национальность» кылэз куштӥзы, соос город культура поннагес сюлмасько. Туала егитъёслэн кырӟанъёссы американецъёслэн, немецъёслэн кырӟанъёссылэсь чик пӧртэмесь ӧвӧл ни. Инкуазьын но воштӥськонъёс мыно: будосъёс, пӧйшуръёс быро. Городын али кинлэсь «кырӟамзэ» кылӥськом? Куакалэсь но ӟольгырилэсь. Нош дуннеын удмурт, бигер, пор но мукет калыкъёслэн кырӟанъёссы быризы ке, кыӵе ваньмыз огпӧртэм мӧзмыт чузъяськоз. Инмар мед утёз ини сыӵе пурысь нуналъёслэсь!

- Малы берло вакытэ Геннадий Корепанов-Камский, Герман Корепанов, Николай Шкляев кадь аспӧртэмлыко, ас калыксылэсь лулпуш дуннезэс валаса гожъясь композиторъёс уг адӟисько?

- Мон тӥледын соглаш. Композиторез будэтыны туж секыт. Со ас выжы калыкезлэсь сям-йылолъёссэ, кырӟанъёссэ ӟеч тодэм сяна, умой тодыны-валаны кулэ дунне культураез, тужгес но музыкаез. Гуртын будэм адямилы сыӵе луыны секыт. Войналэсь азьло Ижын усточиослэн интернатсы ужаны кутскиз. Со пыртӥ потӥзы куд-ог удмурт крезьгурчиос, кылсярысь, Николай Шкляев. 1960-тӥ –1980-тӥ аръёсы интернат ӧз ужа, нош Поволжьеысь мукет республикаосын композиторъёссэс будэтӥсь асьсэлэн школаоссы кылдӥзы. Та вакытэ асьмелэн но интернатмы ужа ни. Но вуиз рынок кузёяськон вакыт. Композиторлэн данэз усиз.

- Али мар бордын ужаськоды?

- 1938-тӥ – 1940-тӥ аръёсы синмаськымон усто композитор Н. М. Греховодов Ува но Вавож ёрос гуртъёсысь трос кырӟан гожъяса люказ. Соосты нимаз книгаен поттыны учкисько, эскерисько. Н. Греховодов ӟеч кусып возиз Удмурт театрен. «Тыло вӧсь», «Камит Усманов», «Сюан» спектакльёсты крезьгурен чеберъяз, артистъёслэсь тодэм кырӟанъёссэс гожъяз. Соос но книгае пырозы.

- Люкам материалъёсты сомында книгаен поттэмын, доктор диссертация утьыны но тырмозы. Со бордын ужаны уд малпаське-а?

- Мынам кандидат нимы но ӧвӧл ай. Туж бер, ог 40 аресам гинэ, фольклорез эскерон сюрес вылэ потӥ. Мынэсьтым удмурт сюан сярысь нырысетӥ книгаме быдэс дуннелы тодмо фольклорист Евгений Гиппиус учкиз-эскериз. Соин диссертация гожтон сярысь но вераським вал ини. Но мон туж зол висьыны уси, собере Гиппиус кулӥз, пересь вал ини. Озьы чебер малпанэ ӝыныё луиз. Нош берло тазьы малпаськи ини: учёной луыны туж трос кужымме быдтоно луо (малы ке шуоно соку удмурт фольклор бордын ужась тодосчиос ӧй вал на), пайдаез тросгес луоз, калыкысь люкам материалъёсты книгаен поттон бордын ужаса. Асьмеос угось туж ӝог ортчись вакытэ улӥськомы, вужез-вашкалаез ваньмыз вунэ. Соосты одно ик кельтоно. Нош туж утчаськид ке, гуртъёсысь «ватосъёсыз» шедьтыны луэ на.

- Мыным 17 арес дыръя гинэ гуртамы сюанэз удмурт сямъя ортчыто вал. Табере со вунэмын ни.

- Куд-ог интыосысь, тужгес но Удмуртилэн лымшор палъёсысьтыз, кытысь но отысь, удмурт сюанэз адӟыны луэ на. Туж жаль, сыӵе узырлык быре. Нош сюан кырӟанъёсыз трос гуртъёсысь шедьтыны быгатоно на.

- Асьтэос экспедициосы потаськоды на-а?

- Куддыръя потасько. Крезьгуръя училищеысь но Удмурт кун университетысь студентъёсын трос ужано луисько, соослэсь гуртысь гожтэм материалъёссэс ӵош учкиськом.

- Тӥ понна 70 арес трос-а, ӧжыт-а?

- Визьмыным валасько, 70 аресъем мурт мӧйы ини шуыса. Но ужаны мылкыды вань ай. Азьпалан «Куӟебай Гердлэн пытьыез кузя» книга дасян возьма. Ӟигары гинэ мед тырмоз.

- Вӧсьты но шумпотонды кыӵе?

- Куректонэ-вӧсе аслам, матысь ӵыжы-выжыосылэн, тодмоосылэн висёнэнызы герӟаськемын. Бадӟым кужым сётэ музыка: калык кырӟанъёс но, композиторъёслэнэз но. Соосты мон туж яратӥсько. Эшшо шумпотон басьтӥсько нылпиосы бордысь. Вера нылы но Илья пие монэ валало, улонзэс мон сямен ик калык кырӟанэн герӟазы. Милемлы ӵош котьку умой.

- Нылпиосты но-а удмурт калык кырӟанъёсыз тодо?

- Уг, соос ӟучсэ эскеро. Нылы крезьгуръя училищеын дышетэ. Пие Литваын улэ. Кышноеныз ӵош ӟуч фольклор бордын ужало. Соослэн отын «Былина» фольклор коллективзы но вань. Туж, пе, сӥлы каро со ансамбльзэс, котькытчы ӧтьыло. Литовецъёс но, пе, кырӟаны куро.

Кузпалы мынам духовой инструментэн шудӥсь. Пие но со удысэз бырйиз вал. Собере шуак мукет пала шонскиз, фольклорез эскерыны кутскиз. Мон нылпиосме одӥгзэс но юри музыка сюрес вылэ ӧй валты, асьсэос бырйизы. Озьы луиз - быдэс семьямы музыкантъёс.

- Ӧпкельымон янгышъёсты вань-а кадь потэ?

- Туж ӵемысь жалясько: ас вакытаз та улонмы, вашкала йылолъёс сярысь мӧйыосын сюлмысь ӧжыт вераськи. Соос ведь сомында тунсыкозэ, мыным кулэзэ тодо вал! Ваньзэ сьӧразы нуизы. Мар карод на, озьы кулэ вал, дыр.

- Кылдэмлэсь уд ортчы, шуо.

- Мон но табере озьы шуисько. Ортчемез сярысь ӧпкельыны, жаляны уг ни яра. Калык но ас кырӟанъёсаз со сярысь вера.

- Амалды ке луысал, та дуннеез кыӵе карысалды?

- Райын кадь шуи ке, укыр мултэс чебер. Одӥг вакытэ ми тодмоосынымы, куд-ог эшъёсынымы язычествоен тунсыкъяськыны кутскылӥм. Мыным отын маиз кельше: адями ассэ инкуазьлэсь вылӥе уг пукты, соин ӵош, тупаса улыны тырше. Улон ӧрзэс но инкуазья тупатылӥзы. Кылсярысь, сюан лэсьтылӥзы июньлэн пумаз, инкуазьын выль улон пушйыку, будосъёслэн тысьсы быгыльскыку. Нош йырпыд сётон йылол толалтэ гинэ ортчылӥз. Соку кезьыт, улэпез туж матын луэ кулонэн, сопал дуннеен.

Мон городын будэмын ке но, татысь улонлы ӧй дышы. Туала цивилизация шуонэз сюлмам уг пыртӥськы, отысь туж трос уродзэ адӟисько.

- Тӥледыз ужады Муш Мумы шуо.

- Муш утён сярысь кырӟанэз мон тодӥ фольклорен ужаны кутскеме бере, 1970-тӥ аръёсы. Кыӵе гинэ гуртэ уг вуиськы, одно юасько: кылэмды вань-а муш утён гурез? Озьы нырысьсэ шедьтӥ Кизнер ёросысь Гуӵин-Бодья гуртысь. Соос кык пумо вылӥллям: одӥгзэ огшоры праздникъёсы кырӟаллям, нош мукетсэ сюлворон интые кутылӥллям - кылсярысь, висъяськыкуз муш палэп кыдёке медаз кошкы. Мынам малпамея, азьвыл со муш утён ӧй вал, дыр, - муш ӧтён. Удмуртиысь лымшорпал гуртъёсысь мон муш сярысь 15 пумо кырӟан-веран шедьтӥ. Мушъёслэн шапыкен-шапыкен дуно чечыез бичамзы сямен, мон но соосты пичиен-пичиен люкай. Шумпотэмме ӵош ужась эшъёсылы вералляй. Озьы мыным Муш Мумы кушем ним лякизы.

Источник:

Чуракова Р. А. Муш Мумы / Р. А. Чуракова ; записала Галина Романова // Удмурт дунне. - 2004. - 2 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"