Степанова Надежда Андреевна

Нылкышнолэн лулыз сизьым полэс

Та мыло-кыдо, котьку пальпотӥсь нылкышноез котькудӥз дунъя пӧртэм сямен. «Удмуртия» ГТРК-ысь корреспондент, Удмуртиысь дано журналист Надежда Степановаез финн-угор дуннеын но тодо асьме выжыос сярысь гожъясь тунсыко журналистэз сямен. Удмурт нылкышноос понна со - эш но визьнодась - 2006-тӥ арысен Надежда Андреевна кивалтэ Удмурт нылкышно кенешен. Солэн кичӧлтэмезъя улонэ пыӵало городысь удмурт калыкез, удмурт семьяез улӟытӥсь тунсыко проектъёс. Пиезлэн дышетсконо школаяз со - анай-атайёслэн комитетысьтызы тӧро. Покчиос понна - Надяпай. Дораз - мусо, яратӥсь анай. Матысь адямиосыз понна Надежда - оскон.

- Надежда, туннэ ужен выремдэ лыдэ басьтыса, нырысь озьы ик юам потэ кадь: кытысь тынад сыӵе удмуртлыкед? Но тон хронологиез гажаськод, шуо.

- Ма, о-о. Сэре пичи дыры вератэк кылёз ук, а со мынам туж тунсыко вал. Анаймы нылпи садын воспитатель луыса ужаз. Мон, мукет нылпиослы вожамен, садэ ветлэмысь воксё дугдӥ. Кызьы озьы: мынам анае монэ гинэ вешаны кулэ кадь, а со ваньзэс яратэ. Озьы будӥ пересь анаймы вӧзын. Мыным чик но мӧзмыт ӧй вал - ӵукналы быдэ ми соин ӵош, телевизорез лэзьыса, гимнастика лэсьтылӥм. Со мыным нимысьтыз ковёр керттӥз, куасалляськон пул вӧлӥз. Собере туж синмаськи балетлы. Койка дуре султӥсько но асме станок вӧзын кожаса, балеринаос музэн куасалляськыны вырисько. Со дыре ик песянае монэ киужлы но, гуртпӧрлы но дышетэ, удмурт выжыкылъёс мадьылэ. 5 арескам мон пельнянь кутыны быгатӥсько ни вал. Пересь анае ушъя но, эшшо ӟечгес вырисько. Ма, тӥни отысен ик кутске, дыр, удмуртлык - этнопедагогикаысен. Но со кылэз песянай, конечно, ӧз тодылы.

Школаын дышетскыкум, папаелы шуи: балерина луо. Со Можга педучилищеын крезьгурлы дышетэ вал. Номыр ӧз вазьы, вуоно арняяз сьӧраз кутӥз. Ну, малпасько, та монэ балетъя школае нуэ. Но папа педучилищеез возьматӥз, крезьгуро инструментъёсын тодматӥз. Озьы, школаын дышетскыкум, мон быгатӥсько ни вал баянэн но, гитараен но, синтезаторен но шудыны.

8-тӥ класс бере папа монэ Воткае крезьгуръя училищее ыстэ вал. Мон мукет сямен малпай: училище бере дышетскеме потоз на оло уз, эсьма, школаез йылпумъяло но соку ик университетэ мыно, вылӥ образование басьто.

- Шаплы вылэмед. Сыӵе сямыд пересь анаедлэсь-а?

- Пионерилэсь-комсомоллэсь. Тодӥськод-а, мон кыӵе востэм вал? Тодэ ик вайыны возьыт. Магазинэ няньлы мынӥсько ке, черодэз но юаны возьдаськисько. Туж кышкалляй.

Умой ай, коть школаын амал ӧй вал востэм улыны - весь отчы-татчы кысказы. «Ньыльлы»-«витьлы» дышетскем соку тырмыт ӧй вал. Сэзь дышетӥсьёсмылы тау, тужгес но пионервожатоймылы Ольга Фёдоровна Пешковалы но удмурт кылъя дышетӥселы, али школалэн директорезлы Раиса Павлиновна Герасимовалы (Пичи Пурга ёрос, Гожня школа - авт.) Школа, ёрос ужрадъёсы сяна, соос пиналъёсты республикае но поттаны выризы. Озьы, 5-тӥ классын дышетскыкум, мон, удмурт телевидениын «Горн ӧте» передачаын вормисьёс радэ потыса, «Артеке» вуылӥ. Бӧрысь школаысьтымы пионер дружиналы кивалтӥсе пуктӥзы. Огкылын вераса, тунсыко вал улонэ.

- Крезьгурен, чеберлыкен тунсыкъяськись нылаш немец кылэз быръе…

- Мынам туж потэ вал режиссёр луэме, но Перме мыныны кышкай - мӧзмо кадь потӥз. Озьы малпаськыса улонъям Раиса Павлиновна ик ӵектӥз: мын университетысь кунгожсьӧр кылъёсъя факультетэ. Нош ӧй ке быгаты? Удмурт филологие, пе, выжод. Мон визьмо муртлы оски. Тодон-валанэ но вал кадь, немец кылъя олимпиадаосын вормылэме вань. Но возьдаськытэк (данъяськыса но ай) верало: пырыны юрттӥз кадь удмурт луэме. Приёмной комиссиын кык удмурт дышетӥсь пукиз, соос монэ тодэмелэсь ӧжыт вылӥгес дунъязы кадь, потэ.

Нырысь араз городысь нылъёсын дышетскыны секытгес вал, но мон ӧй юскиськы. Куинетӥ курсын сессиме «витьёслы» гинэ сётӥ но, монэ Германие стажировкае ыстӥзы. Зэм, али ке сыӵе луонлык кылдысал, мон со дырез мукет сяменгес уже кутысал. Кулэ вал шаплыгес луыны, кусыпъёс тупатыны, а мынам дыры мукет кунэ вуэмелы паймыса ик ортчиз кадь.

- Дасяськид немец кылъя специалист луыны, нош кӧттэ тыре удмурт кыл.

- Мон удмурт кылэз котьку дунъялляй, котьку данъяло. Нош трос тодэм нянь уг куры, шуо. Немец кылэз тодэме улонам кӧня ке учыръёсы юрттылӥз. Студент дыръям мылысь-кыдысь ветлӥ «Чипчирганэ». Огпол ансамблен Финляндие потӥм. Вуим но - пумитась ӧвӧл. Сылӥськом ни паймыса. Кивалтӥсьмы Розита Андриановна Анкудинова шуэ: Надя, действуй! Мон, справочнойысь юалляськыса, калыкез посольствое нуи. Озьы уймес адямиос сямен кӧлӥм, вокзалын костаськоно ӧм луэ ни.Финн-угор конгрессъёс дыръя но немец кылын вераськисьёслэсь интервью берыктӥсьтэк басьтӥсько.

- Верало, «Чипчирган» ик тонэ журналистлы пӧрмытэм…

- Ой, мон со «Чипчирган» сярысь трос верасал но, газетты уз тырмы, дыр, о-о? Витетӥ курсын дышетскыкум, Кировысь удмуртъёс доры концертэн потӥм. Сьӧрамы мынӥз радиожурналист Милитина Гаврилова. Мон солэн микрофонэн ужамезлы синмаськи. Со учыр берегес ик кырӟанъёсмес гожтыны лыктэм Раиса Семёновна Куликова. Солы, пе, гур сяна, кырӟан пумысен малпан но кулэ. Мон мылкыдме-малпанме кисьтӥ. Солы кельшем. Кӧня ке улыса со монэ кенешыны ӧтиз. Кытысь соку сыӵе удалтон вуиз? Раиса Семёновналы котьку тау шуисько. Туэ тани радиоын ужамелы 15 ар тырмиз ни.

Радиое вуи но чабкиськи: тани ук со - мынам шудэ - журналист луон! Мон табере кылчи но, дышетӥсь но, режиссёр но! Ваньмыз-ваньмыз огдыре. Нылпиослы передача лэсьтӥсьёсты азьло уг дунъяло кадь потэ вал. Мон аслым шуи: со тужгес ӟечез передача луыны кулэ. Улонын нылпиослэсь дуноез маке вань шат? Кутски малпаськыны. Азьвыл радио пыр выжыкылъёс гинэ чузъясько ке вал, ӧдъяй гожъяны асьсэды нылпиосты. Туж секыт уж - удмурт пиналъёс, тодӥськод, кыӵе вераськисьтэмесь. Вань веранзы «о-о» но «ӧвӧл». Сыӵе дыръя юрттылӥз педагоге дышетскеме. Собере малпай удмурт пиналъёсты пӧртэм калыкъёслэн выжыкылъёсынызы тодматъяны. Туж кельше ужаны артистъёсын Александр Перевозчиковен но Алевтина Степановаен. Соостэк передача ӧй улӟысал.

- «Чагыр-чагыр дыдыке» передачаез лэсьтӥсьёс ӝоген туж вылӥ дунъямын вал - группадылы сётӥзы Удмурт Республикалэсь Кун премизэ.

- Мон понна со туж бадӟым вормон. Сыӵе дунъет бере валай: нылпиос понна ужасьёсты (озьыен, нылпиосты но) асьмелэн дунъяло ке, иське, асьмеос таза кунын улӥськом. Нылпи ваем бере мон передачаме уката яратыны кутски. Владике мынам юрттӥсе луиз.

- Анай луыса ни, тон кутскид нылкышноослы сӥзем «Ибырвесь» программа борды но.

- Кызьы ке озьы укша улонын - ваньмыз ог-огеныз герӟаське. Анай луэме бере мон чылкак воштӥськи, улон шоры мукет синъёсын учкыны ӧдъяй. Нылкышноос монэ валалозы. Мыным потӥз: табере мон кужмо, табере мон ваньзэ быгато. Мон пи вордыны быгатӥ, маке мукетсэ уг быгаты шат?

Уже йылӥз. Нуыны ӧдъяй «Финн-угор дунне» программаез. Собере солэн редакторез луи. Кусып возисько вал вань финн-угор улосъёсысь тодмо журналистъёсын. Доре ӧй ик шедьылы кадь, со понна одӥг минутэ но тэк ӧз бырылы. Пие понна ваньзэ лэсьтыны выри. Суредаське ке, выставка радъясько, эшъёссэ ӧтьыса, презентация ортчытӥсько вал. Олокыӵе но ужрадъёс, праздникъёс малпалляй. Влад 11 аресозь оскиз Тол бабайлы. Куд-огез шуо, пиналэз алданы уг яра. А мон малпасько, сыӵе алданъёс кулэ. Со выжыкыл ук! Анай-атайёс пиналзылы нырысь асьсэос со выжыкылэз лэсьтыны-кузьманы быгатыны кулэ, собере - пиналзэс выжыкыл лэсьтыны дышетыны. Мон малпасько, пие монэ дунъя. Ялан дорын гинэ пукыса, мон солы сомында сётыны ӧй быгатысал, дыр.

- Алигес 97 номеро школаын анай-атайёслэн кенешазы мадизы: 6-тӥ классысь Влад Степанов ӟуч дышетӥсьёсты куалектытэм. Урок дыръя одӥгезлэсь дышетӥсьлэсь юам: малы тӥ удмурт сямен уд валэктӥське? Табере, пе, кыкетӥ кун кылэз тодӥсьтэм дышетӥсьёс кышкало, городысь эшшо огез школа удмуртоме шуыса.

- Ма, воксё кышкалозы ни, о-о. Влад ӟуч кылын но туж умой вераське, солэн дышетӥсез эскеремез потӥз, дыр. Али арлыдыз сыӵе ук - авторитет утчан вакыт.

Со понна мыным возьыт ӧвӧл - городын будыса но, пие чылк-чылк удмурт. Мон уг валаськы, удмуртлык понна висисьёс асьсэ нылпиоссэс дышетэм интые, мукетъёссэ пыкыло ке.

Туж жаль, городын оглом ӧжыт удмурт классъёс. Дышетонъя министерствоын шуэмзы потэ: анай-атайёс нылпиоссэс отчы уг сёто. А кытчы сётозы? Ленин ёросысь анай тани юа: кытчы гожтом, Строительын одӥг школаын но удмурт класс ӧвӧл. Автозавод кеме нуллыны, пе, уг быгатӥськы, 7 часлы ӵукна уже ветлӥсько…

- Эшшо кыӵе юанъёсын-куронъёсын вазисько Удмурт нылкышно кенешлэн кивалтӥсезлы?

- Уд но малпа, гуртысь нылкышноос туж кулэясько вылэм психологлэн юрттэтэзлы. Озьы ик уг валало, кызьы, кытчы вазиськыны правооссэс тӥян учыръёсы. Юись картъёссэс кызьы утьыны уг валало. Быгатэмъя юрттыны тыршиськом. Тани «Удмурт дуннеосын» ӵош ӵем потаськом гуртъёсы, пумиськонъёс ортчытъяськом. Милям ужпуммы - огшоры вераськон гинэ ӧвӧл. Потаммылы быдэ коть одӥг-кык муртлы юрттыны мед быгатом, соин ик сьӧрамы котьку нуллӥськом специалистъёсты: наркологез, психологез. Та ужмес азинтыны малпаськом.

Эшшо, мон малпасько, нылкышно кенеш удмурт кышномуртъёслы аналскыны сётыны кулэ ӧвӧл. Мед быгатозы соос асьсэлэсь малпанзэс улонэ пыӵатыны, асьсэ понна, семьязы понна нюръяськыны.

- Тон копак тодмо феминистка Мария Арбатова кадь вераськиськод ни.

- О-о ин. Ма, мон яратӥсько солэсь книгаоссэ учкылыны, но со укыргес ук: пиосмуртъёсты но туж уг гажа кадь. А ми, удмурт нылкышноос, соосты гажаськом но дунъяськом но, яратӥськом но, только соос но милемыз мед дунъясалзы. Вот кытын ке мон верасько ке, нылкышноос воргоронъёсын огкадь правоос понна нюръяськыны кулэ шуыса, юало: туала вакытэ праводы, пе, ӧжытгес шат? Законъя ӧжытгес ӧвӧл, нош уж вылын? Нылкышнолэсь секытэн луэмзэс тодыса, уже но уг куто, разряд но нырысь воргоронлы будэто...

- Надежда, кыӵе луыны кулэ туала удмурт нылкышно?

- Нылкышно кадь: табань но пыжыны мед быгатоз, гуртаз но ватскыса медаз пукы. Нырысь интыын нылпиосыз мед луозы. Мед быгатозы кенешыса улыны. Учкы ай, удмурт нылкышноос кыӵе визьмоесь - соос котькуд ужпӧрзэс картсылы вераса лэсьто. Со, конечно, вератэк но быгатысал, но вала - азьланяз картэз но озьы соин кенешоз. Озьы ик луэ: пудо утён-а, бакча мерттон-а, пинал дышетон-а, телевизор басьтон-а - огкылысь. Туж потэ вылэм тросгес шаплы нылкышноосты адӟем, соос котьмаин мед тунсыкъяськозы, визьмоесь мед луозы, чебересь. Мыным кельшо Серафима Лебедева, Федосья Тубылова. Соос туж сабырлыесь, калыкез огазеяны быгато, калыкмы понна туж трос лэсьто.

- Ачид кызьы «валтӥсь удмуртка» луид?

- Радиоын «Ибырвесез» нуыкум, весь интервью дасялляй тодмо-дано нылкышноосын. Собере асме дэмлазы правление. Улыса-ужаса Галина Аркадьевна Никитиналы воштӥсь пуктӥзы. Галина Аркадьевна наукаен выре бере, общественной ужлы дырыз ӧз тырмылы, троссэ мыным оскылӥз. Мыным со секыт ӧз поты, ваньзэ тунсыкен быдэсъяй. Нош кылем арын тӥни кивалтӥсе бырйизы ни.

Огазеяськонмы общественной бере, нокыӵе бюджетмы ӧвӧл, соин ик ужмес радъяны малпай проектъёс вылын, туала арын сотэк нокызьы уг луы. Ӵектонэд тунсыко потэ ке, солы дурбасьто, коньдон но висъяло. Тани кык ар ӵоже Ижын ужаз Табань-клуб. Ми сое Пастухов нимо библиотекалэн кивалтӥсеныз Людмила Матвееваен ӵош ортчытъям. Малпасько, «табаньмы» удалтӥз. Сое азинтом. Озьы ик городын ужаськом «Анай кыл» проектъя, воспитательёсты огазеям «Зарни бугор» клубе. Гуртысь нылкышноос понна нош мукет проектъёс. Огкылын вераса, малпан лачак, бергаса гинэ вутты.

- Шорад учкыса, тон туж гань-гань кадь, весь пальпотӥськод.

- Огпол поездын мынӥсько, бӧрдонэ ымдурам, мылкыды туж секыт, улэм но уг поты. Сыӵе дыръя кыӵе ке кышномурт вераськыны ёрмиз. Мон сое нырысь ӧй но тодма, сыӵе ас вактам усиськем. Нош со одӥгысьтыз ёросысь нылкышно огазеяськонэн кивалтӥсь вылэм. Соку тӥни ас поннам малпай: куректӥськод ке, дорад куректы.

Эшшо огпол урок луиз: со гимназиен урод югдур дыръя бӧрдэмме телевизор пыр возьматӥзы. Туж возьыт вал. Ай эшшо юасез но вал: юри-а камера азьын синвудэ кисьтӥд?

Конечно, улон весь пальпотоно кадь ӧвӧл. Куддыр верай ни, уен-нунал пограса кыллисько, собере султӥсько но дискотека лэсьтӥсько. Эктыса пушкысь вань секытэз потэ кадь. Куддыр керттӥськон буйгатэ, куддыр - суредаськон. Тани кылем арын гинэ ай тодмо художник Валентин Белых доры дышетскыны ветлӥ. Валаса уг суредаськы, сюлэм куремъя. Луэ ук озьы: кин ке кылбур гожъя, кин ке - кырӟан, кин ке куиське. Нылкышно туж быгатӥсь ук, солэн талантъёсыз сизьым пӧртэм.

- Тодӥсько, тон планъя ужаны яратӥськод. Кыӵеен астэ адӟиськод, кӧня ке ар ортчыса?

- Ой, ӵап али воштӥськонъёс азьын сылӥсько кадь. Удмурт культураын ик асме адӟисько. Удмурт культурая центрлэсь вуэмзэ возьмасько ни мон… Эскерысал, дыр, асме кыӵе ке организаторын, общественной уж но туж мылкыдыя. Умой луысал, со удысын профессионалозь будыса.

- Ӝоген вордскем нуналдэ пусъёд. Кыӵе кузьым возьмаськод?

- Мынам вордскем нуналы но утиселэн нуналзы тупало, соин улонам удалтыны кулэ, дыр. Туж потэ дун-чылкыт интыын пылатӥськеме. Нош кыӵе кузьым возьма нылкышно? Яратон. Гажась синъёс шорам мед учкозы, кужмо пельпум мед луоз. Шуныт кылъёс возьмасько. Нош соосты верась луиз ке, кузьым но луоз.

Источник:

Степанова Н. А. Нылкышнолэн лулыз сизьым полэс / Н. А. Степанова ; записала Зинаида Рябинина // Удмурт дунне. - 2007. - 28 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"