Белых Валентин Леонидович
Батыр[править]
Та лякыт, зӥбыт, небыт куараё воргоронлэн лул-сюлэмаз тыл ошмес пӧземлы оскыны шуг. Суредам ужъёссэ адӟыса гинэ валаськод: Валентин Белых — тыл кадь ӟырдыт мылкыдо, бадӟым дарто мурт. Сыӵе ӧй луысал ке, дауръёс сьӧры ватскем, ышем дуннеез шӧдыны, возьматыны быгатысал шат: «Иднакар», «Арчикар базар», «Вашкала удмурт азбар», «Витён», «Курбон сётон», «Тыло сюрес», «Гондыр дыргон - Шайтанэз уллян»... Нош удмурт батыръёс-азьветлӥсьёс кыӵе йӧноесь вылӥллям, пӧлазы — ачиз художник но: тӧдьы ыжку дӥсен, лэчыт синмо. Валентин Белыхлэсь удмуртъёслэн азьвыл улонзылы сӥзем ужъёссэ учкыса, юзыр-кезьыр луиськод, вирсэръёстӥ вашкала выжыосмылэн пӧсь вир быземзы таӵе ик шӧдӥськыны кутске кадь. Собере юанъёс бӧрсьы юанъёс курадӟытыны ӧдъяло. Соос пӧлысь огез тужгес но сюлэмез чепыльтэ: малы но ку асьмеос асьмеды гажамысь дугдӥмы? Бадӟым художник озьы ик инкуазез, адями тусбуйёсты суреданы яратэ. Котькудӥзлы сюлэм шунытсэ, вань быгатонлыксэ сётэ. Соин ик соос вӧзтӥ уӵертыса гинэ огшоры ортчыны уг луы, доразы малпаськыса сылэм, учкемъя учкем потэ.
Валентин Леонидович Белых — Удмуртиысь искусство удысысь дано ужась, Удмуртилэн Кун премиезлэн лауреатэз, Россиысь но кунгож сьӧрысь трос адӟытонъёсы пыриськем мурт. Вордӥськемын 1952-тӥ арын 20-тӥ августэ Дэбес ёросысь Сенькагуртын. Сизьым арес тырмемез бере семьязы улыны Воткае выжиз. Отын тямыс классэз быдтыса, профтехучилищеын токарьлы дышетскиз, собере малпамтэ шорысь Казаньысь художественной училищее пыриз. Сое горд дипломен йылпумъяса, Воткаысь «Юбилейной» культура юртын валтӥсь суредась луыса ужаз. 1978-тӥ арын Иже лыктӥз, 24 ар ӵоже калык театръёсын, Операя но балетъя театрын, Удмурт театрын валтӥсь суредась вал. Али — ас понназ суреда.
- Валентин Леонидович, тӥ шудо адями. Мастерскойды вань, яратоно ужады нуналаз кызь ньыль час ӵоже выемды луэ. Адӟиське: писательёсты но кылбурчиосты сямен, суредасьёсты выльдӥськон уг жугы.
- Суредаськон – со ведь быдэс дуннелы валамон маке. Солэн кунгожез ӧвӧл. Нош тани удмурт кылын гожъяськисьёсыз ке басьтоно, соосты лыдӟисьёс ӧжыт, Россиысь пичи гинэ музъемын уло. Совето власть вакытэ, конечно, гожъяськисьёслы сямен ик, милемлы но умойгес вал. Адӟытонъёс тросгес ортчытъязы. Отын возьматоно суредъёсыдлэсь эскизъёссэ вайиськод но кивалтӥсьёсын огкыл гожтӥськод. Суред бордын ужакуд ик, коньдонэн юрттылӥзы. Нош табере, зӧк кисыосты утчаса, аслыд бызьылоно луэ. Туж умой, тонэ тодо, дунъяло ке. Ним юрттэ. Асьсэос шедьто, суреданы курыса жингыръяло.
- Егит суредасьёслы секытгес, дыр?
- Ой, соос кион сямен бызьыло! Тазалыксы вань, сютэм уз кулэ.
- Узыръёс кыӵегес суредъёс лэсьтыны куро?
- Инкуазез, пыласькись гольык нылъёсты, семьязэс.
- Калыклэн сямыз, йылолъёсыз адямилы анай йӧлын пыӵаны кутске. Нош тӥледыз туж пичиысен удмурт калык пӧлысь ишкалтӥзы. Озьы ке но тӥ кадь сое шӧдӥсез-валасез ӧжыт, дыр.
- Мон сизьым арескозь чылк-чылк удмурт калык пӧлын будӥ. Адямилэн со дуннеез льӧль синмын адӟон вакытэз. Соку калыклэсь курадӟемзэ уд валаськы на ай, нокыӵе куректонэз но уд тодӥськы. Соин ик вордӥськем Сенькагуртме мон туж умоен гинэ тодам вайисько. Кызьы туж чебер тыметамы кык корлэсь тусь кадь гыркъем кырбасэн уялляй. Кырбасэ выдӥськод но синкыли кадь чылкыт вуын уясь чорыгъёсты учкыса кыллиськод, тӧдьы вусяськаос вылтӥ вукарнанъёс лобало. Тымет вылэ лумбытлы ышылӥ. Улон райын кадь потылӥз. Сенькагуртэ мыным али ке но кужым сётэ. Нош Воткае вуыса, адэ сюри кадь. Ӟуч кылэз пичи но ӧй тоды угось, школаын шымырскыса пуки.
- Удмуртъёслэсь вашкала улонзэс суреданы кызьы басьтӥськиды?
- Удмуртъёслэн вашкала дуннеязы шоканы кутски, Операя но балетъя театрын ужакум. 1985-тӥ арын Евгения Копысова нылпиослы удмурт эпосъя тӧлпери сярысь опера гожтӥз. Солы декорация лэсьтыкум, удмуртъёслэсь вашкала улонзэс тодоно луиз. Собере Удмурт театрын Пётр Кудряшовлэн «Уте милемыз, инмаръёс!» пьесаез бордын ужай. Нош тужгес но зол кыстӥськи, «Алангасарлэн вужерез» кинофильм бордын ужакум. Ми соку Шаркан ёросысь Мувыр гурт дорын сикын, вашкала удмурт гурт кадь лэсьтэм декорация пушкын улӥм, выламы - вашкала удмурт дӥсь. Соку йылаз-пумаз вуттымтэ трос суредъёсы кылдӥзы. Кытчы соосты карод? Куштыны жаль. Вай ай, малпасько, пӧрмемъёссэ удмурт калыклэсь вашкала улонзэ возьматӥсь картинаос лэсьтыны куто. Тӥни озьы кылдӥзы «Иднакар», «Арчикар базар», «Курбон сётон» но трос мукет суредъёсы.
- Мон но Мувырысь «вашкала гуртын» вал. Паймымон инты. Сомында отын ужамын-тыршемын, нош кинофильмез ӧз яра.
- Пӧрмемын ӧй вал со. Ваньмыз режиссёр бордысь потэ ук. Гожтэм сценариез со яке туж вылӥе ӝутоз, яке саптаса куштоз.
- М. Ивановалэсь «Истоки удмуртского народа», М. Гришкиналэсь «Удмурты», А. Леонтьевлэсь «Сюрес усьтӥське мынӥсьлы» книгаоссэс суредады. Вашкала удмуртъёслэсь вылтуссэс кызьы сыӵе ӟеч суреданы тодӥды?
- Удмурт вылтусъёсын туспуктэмъёс люканы кутски. Тани соос – быдэс пачка. Учкы ай тани тае, тодмаськод-а?
- Иван Данилов писатель.
- Бен. Кисьтэм-басьтэм удмурт тус. Со бордысь мон Донды батырлэсь образзэ суредай. Нош таиз удмурт бомж, пыдйылчи. Мон соин вераськи, собере фотоаппаратэн туссэ пуктӥ. Таиз но пыдйылчи. Соос кыӵе вань сыӵе ик ветло: уг мычисько, уг ӵышкисько, вылазы мар ке сюрем дӥсяло. Соин ик вашкалаосты суреданы туж тупало. Туннэ ми пиеным черк доры мыныны малпаськомы: оло нош кыӵе ке тунсыко пыдйылчиез адӟо но, фото вылэ пуктомы. Али мыным соос Ижкар кылдэмлы сӥзем триптих суредлы кулэ. Пумаз-йылаз вуттыны ньыль тусбуй кулэ на. Пыдйылчиос пӧлысь кызетӥ даурлэн кутсконаз кадь адямиосты шедьтыны луэ: тушоесь, сӥльвироесь.
Вашкалаосты валан понна мон финн-угор калыкъёслы сӥзем литература трос лыдӟи, Ханты-Мансийске ветлӥ. Нюлэскын улӥсь но улэм адямиос котькытын одӥг кадесьгес. Но ханты-мансиослэн тросэз кылемын ай, асьмелэн вунэмын ни.
- «Шайтанэз уллян» суредды нош кызьы кылдӥз? Сыӵе йылолэз ас синмыныды ӧд адӟе, дыр, ук?
- Со йылол сярысь мон кыӵе ке книгаысь лыдӟи, Владимир Владыкинлэсь-а, мар-а. Со туж умой гожтыны быгатэ, син азе таӵе ик улэпен пуксе.
- Удмурт батыръёс бордын ужамдэс тодэм потэ вылэм.
- Батыръёсты суреданы мыным Юра Лобанов суредась малпан сётӥз, нош соос сярысь калыклэсь верамъёссэ Маргарита Гришкина тодосчи гожтӥз. Тусбуйёссэс ачим малпай. Тани, шуом, Иван Грозныйлэсь но, Александр Невскийлэсь но зэмос ымныр туссэс ум тодӥське ук, суредась сое ачиз малпа. Удмурт батыръёсты но мон аслам адӟемея, сюлэм шӧдэмея пуктӥ. Иван Данилов писательлэсь, Слава Байков артистлэсь, Саша Абрамов но Слава Михайлов суредасьёслэсь ымныр тусъёссэс но мукет тунсыко муртъёслэсь батыръёсылы образ кари. Менсадык Гарипов суредасьлэн но тупасал но, ӧй вутты – улонысь вазь кошкиз.
- Мыным тӥ асьтэос но батыр кадь потӥськоды. Батыр сюлэмо адями гинэ аслаз калыкезлы сомында лэсьтыны быгатоз.
- Пушкам мынам удмурт сюлэм жугиське ук. Сое йырвизьмад бергатыса шуиськод: Инмар тыныд пичияк быгатонлык сётӥз бере, удмурт калыкед сярысь кырӟа, тонэ удмурт анай нонтӥз, будэтӥз. Вань уже мынам – удмурт калыклы тау карон выллем. Вашкала дыръя батыръёс калыкез тушмонлэсь утизы, со понна лулзэс но сётылӥзы. Нош табере асьмелэн тушмонмы пушкамы пуке: аракы юон но азьтэмъяськон. Соосын нюръяськыны кулэ. Туж шумпотысал, со висёнъёсты эмъяны суредъёсы пичи ке но юрттысалзы ке.
Можга педучилищеын вашкала удмуртъёсты возьматӥсь суредъёсыным адӟытон ортчытэм бере мыным ӟуч пияшлэсь гожтэт вуиз. Со туж вожъяськем удмуртъёслэн сыӵе йӧно батыръёссылы. Ӟучъёссэ но батыръёсты суреда вал, шуэ. Нош удмурт воргоронъёсмылы вашкалаослэсь адӟем кароно ик вылэм.
- Иван Грозный Арчакармес ӧй пазьгысал ке, Удмурт кун кылдытыны быгатысалмы-а?
- Ноку но ӧй быгатысалмы, кин ке но зӥбись одно ик сюрысал. Бадӟым нюлэсъёс пушкын улӥсь адями ас дуннеяз, ас лул-пушказ выйыса ветлэ. Со ожмаськыны, кинэ ке вӧсь карыны, зӥбыны уг быгаты. Тани, шуом, гурезьын улӥсьёс доры тушмон вуэ ке, соос соку ик огазеясько, тушмонлы пумит ӝутско. Отын ватскыны нокытчы. Нош нюлэскын улӥсь калык тушмонлэсь шыпытак гинэ ватскыны быгатэ. Нюлэс пумтэм бадӟым ук, малы юнме йырдэ быдтод. Асьмелэн батыръёсмы Булгар кун кылдэмлэсь азьвыл вылӥллям, выжыен-выжыен, воршудэн улыкумы. Нош Булгар кунэн огазеяськеммы бере батыръёс быризы. Калыксэс утён понна соос туж зол нюръяськизы, жугиськизы, дыр, но со сярысь гожъясь ӧз луы. Гожъяськыны ум быгатӥське на вал угось.
- Вашкала дырысен адями тыллэсь куриськылӥз, солы вӧсяськылӥз, сое данъяз, солэсь кышказ но. Тӥляд ужъёсады но тыл бадӟым инты басьтэ.
- Тыл – со пичи улэп шунды. Кызьы сое данъятэк кельтод. Адями – инкуазьлэн нылпиез. Солэн весяк адӟемез потэ ву тулкымез, гурезь йылысь инвисэз но тыл ӝуамез. Отысь со аслыз кужым, шумпотон басьтэ. Шаркан ёросысь Мувыр-Пашурысь дачаям чылкыт тымет ву но вань, тылскыны но луэ. Но мон тужгес но яратӥсько шундылэсь пуксемзэ учкыны. Каллен гинэ сима тысяса пукисько но учкисько, учкисько… Мыным сыӵе умой луэ.
- Кыӵе жанр бордын ужакуды, сюлэмды тужгес но веськаса, каньылмыса кошке?
- Кельшымон муртлэсь тусбуйзэ суредакум. Сое пуктӥсько, нош азям – борддор выллем тӧдьы дэра. Суредаськод-суредаськод но, тӧдьы дэра вылысь тон шоры льӧль бамен, кот синъёсын адями учкыны кутске. Луло кадь ик. Эк, сюлэм икак луыса тэтчаны кутске ук! Быгатэмедлы сыӵе шумпотӥськод! Нош инкуазьлэсь чебер, аспӧртэмлыко люкетсэ суреданы кутскыкум, аслым ачим сыӵе пичи, кыӵе ке нумыр кадь гинэ потӥсько. Инмарлэн кылдытэм инкуазез сыӵе йӧно ук! Суреданы курадӟисько-курадӟисько но, пӧрме ке, быдэс мугоры шумпотонэн пачылме. Тау тыныд, Инмаре, шуисько, молитва лыдӟисько.
- Тӥляд ужъёсты мыным туж матынэсь. Вашкалаослэн улэменызы мон но тунсыкъяськисько ук, «Шунды-Мумы» пьеса но гожтӥ. Удмурт театрын сое пуктыку, декорациос тӥ туж быгатыса дасяды. Шунды-Мумы инмарез но мынам синмыныд адӟыны быгатӥды.
- Мон ог 50 пьесалы декорациос лэсьтӥ, дыр. Дышетскемея художник-декоратор ук. Пьесаез лыдӟыны киям басьтӥсько ке, мар бордаз кырмиськыны утчаськисько. Отын пыртӥз потӥсь гожез мед луоз. Со котырын режиссёр но, мон но ужаськомы ни.
- Улонады чутрак воштӥськонъёс юрттӥзы-а, люкетӥзы-а?
- Нырысетӥез воштӥськон сизьым арескын вал: улыны Воткае лыктӥм. Со мыным трос курадӟонъёс вайиз. Нош кыкетӥез учыр суредась луыны сюрес усьтӥз. Воткаын мон изостудие ветлӥ. Одӥг гужем практикамес Елабугаын ортчытӥм. Отысь пристань дорын суредаса пукыкум, «Ракета» теплоход дугдӥз. Отысь кыӵе ке воргорон потӥз но дорам лыктӥз. Суредме учкыса шуиз: «Вуэд югытгес луэм ук, пеймытгес кар. Тани та буёл отчы тупалоз». Йырме ӝутӥ но воргорон шоры учки: сыӵе йӧно, синмаськымон мурт. Солэн верамезъя кари но, суредэ чылкак воштӥськиз: инбам ас туссэ шедьтӥз, Кам шур – ас туссэ. Сыӵе пайми! Изостудиын милемыз нимысьтыз дышетскымтэ, ас понназы гинэ ужась суредаськисьёс дышетӥзы бере, та удысын ӟеч тодон-валан сётыны ӧз быгатэ. Со воргорон Казаньысь художественной училищеысь преподаватель Евгений Владимирович Зуев вылэм. Со вакытэ мон, профтехучилищеез быдтыса, токарьын ужай, Казаньысь со училищее пырыны дасяськисько вал. Толэзь ортчыса, экзаменъёс луыны кулэ ни. Профтехучилищеын дышетскемын бере, асме сыӵе ултӥ вози, дӥсьтонэ чик ӧй вал. Казане вуи, училищелэн чебер, ӝужыт юртаз пыри но аслым ачим шуи: татын мон одно дышетско! Евгений Зуевен малпамтэ шорысь пумиськон мыным улонме чутрак воштыны оскон кылдытӥз. Пыри, дышетски.
- Тӥ троссэ азьпалтӥды, тодмо суредась луиды.
- Казаньысь училищеын дышетон программазы туж умой вал. Адямилэн кымсаз Инмар чупамын ке, со ассэ ачиз будэтыны быгатоз ини. Азьтэмъяськоно гинэ ӧвӧл. Мон тодэмъя гинэ тани академиез быдтэм суредасьёс кӧняез ышизы-быризы ни.
- Кылӥ вал, тӥледыз Удмуртиысь Суредасьёслэн огазеяськонзылы тӧрое бырйылӥзы.
- Одӥг ар гинэ вал: 1991-тӥ арын, путч шуон вакытэ. Калык паймемын, кудпала шонскыны уг вала. Суредасьёс пӧлын керетонъёс ӝутскизы. Чидай-чидай но кивалтон ужлэсь куштӥськи. Тӧрое Пётр Ёлкинэз бырйимы. Со калыкен ужаны быгатэ.
- Зэмос суредась луыны вордскемдэс ку-о шӧдӥды?
- «Удмурт сюан» картинаме но мамаелэсь туссэ кулон азяз эгырен суредаме бере. Шумпотӥсько: мамаме суредаса вуттӥ. Но солэн синъёсаз улэп тылсиосыз ӧй вал ни, сопал дуннее учко. «Удмурт сюан» картинаеным мон нырысьсэ Москваын ортчись бадӟым адӟытонэ пыриськи. 1979-тӥ арын вал со. Суредме Москваысь Бадӟым театрысь Валерий Левенталь валтӥсь художниклэн картинаез вӧзы ошиллям. Адӟытонысь тужгес умой интые. Сое валаса, синкылиосы ӵужыр гинэ васькыны ӧдъязы. Мынэсьтым ужме быдэс дуннелы тодмо суредасьлэн уженыз огкадь дунъязы ук. Кин мон? Огшоры колхозницалэн пиез, профтехучилищеын «кыклы» дышетскем мурт (математика мыным ӧз сётӥськы). Отчыозь сюлмы луд кечлэн кадь тэтча ке вал, батырлэн сямен йыг! йыг! жугиськыны кутскиз, ява. Собере Россиын ортчылӥсь трос адӟытонъёсы пыриськыны дӥсьтонэ тырмиз ни. Ужъёсме котькытын вылӥ дунъязы.
- Кунгож сьӧрын но адӟытонъёсты вал ук.
- 1996-тӥ арын Венгриын вал, 1999-тӥ арын - Англиын. Но мынам кунгож сьӧръёсы ветлэме уг поты. Суредъёсты таможня пыр поттон понна туж трос шуг-секытъёсын пумиськоно, керӟегъяськоно. Интернет сайтам алигес Франциысь но Америкаысь ӧтёнъёс вуизы вал но, пумит кариськи.
- Табере асьтэлы кизили кадь потӥськоды, дыр, ини?
- Кизили – со инбамын ӝуа, куддыръя усе но. Мон кизили ӧвӧл – кузьыли. Ужась кузьыли. Кузьыли кадь ужаса гинэ батырмоно.
Источник:
Белых В. Л. Батыр / В. Л. Белых ; записала Г. Романова // Удмурт дунне. - 2007. - 24 авг. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
