Тубылова Федосья Михайловна

Материал из Воршуда
Перейти к навигацииПерейти к поиску

Зарни но ӧвӧл мон, азвесь но ӧвол[править]

Тубылова Ф. М.

Федосья Михайловна Тубылова – Удмурт Республикаысь культура удысысь дано ужась, Ашальчи Оки нимо премилэн лауреатэз, «Зарни шеп» фольклор коллективлэн кивалтӥсез. 27 ар ӵоже «Зарни шеп» уте Пичи Пурга ёрослэсь, ма быдэс республикамылэсь но, данзэ. Та дыр куспын коллектив ӝыны дуннеез котыртӥз ни. Котькыӵе шаерын со кельтэ аслэсьтыз пытьызэ, шедьтэ аслэсьтыз учкисьсэ. «Зарни шеплэн» трос дано нимъёсыз. Дуно кузьымъёсыз но синпелетъёсыз быдэс музей тыр. Солы нимысьтыз сэрег лэсьтэмын Тубыловъёслэн корка сигазы. Федосья Михайловна - «Зарни шеплэн» мумиз, куинь ныллэн анаез, ньыль внуклэн ӵужмемеез. Вордскиз 1934-тӥ арын Пичи Пурга ёросысь Поӵыш гуртын.

- Федосья Михайловна, тӥляд туж бадӟым улон ныпъетты. Ансамбль но, дано нимъёс но, нылъёстэс но соослэсь пиналъёссэс будэтон. Озьы ке но Федосья Тубылова шуид ке, тӥледыз нырысь ик Валентин Тубыловлэн кузпалыз шуыса тодозы. Вылӥ кивалтӥсьлэн кышноез луыны секыт-а вал?

- Тазьы юасьёс трос. Валэктонэ ваньмызлы одӥг – секыт. Маке верамлэсь азьло котькуд кылэз мертано. Куддыр пинез но куртчиськод - мултэссэ медам меӵкыты. Вань пӧсез-курытэз вылам шӧдӥ дефицит аръёсы. Котькытын - черодъёс. Мон начальник кышно шуыса, черод азьпала но ноку ӧй султылы, дан ӧй потты. Мар татын сылӥськод, мын но чалякгес басьты шуылӥсьёс вал мыным. Валэктылӥ: мон тӥ кадь ик адями. Огпол магазинэ пыри. Мӧйы кышноос верасько. Нӧкы вӧй но, пе, ӧвӧл, нош начальстволэн ӝӧк вылысьтыз со ноку уг быры, дыр. Монэ тодмаса веразы-а соос, уг тодӥськы. Озьы ке но мон ваньзэ вылам кыскисько. А милям соослэн сямен ик вӧймы ӧвӧл. Эх, малпасько, та кышноосты али гуртам нуоно но холодильникме усьтыса возьматоно вал.

Таӵе учыръёс трос луылӥзы. Олома но супыльтӥсьёслы, тӥ шонер ӧвӧл шуыса, куке меӵак верам потэ. Сюлэм сэректэ, но… Нылъёсмылы но капчи ӧз йӧты. Соослэсь но котькуд вамышсэс-серектэмзэс чакласьёс вал, дыр.

- Соин-а, мар-а кузпалды сьӧры Иже но ӧд мынэ? Картты городын, нош тӥ вань улондэс - Пургалан.

- Сям, дыр, со.

- Кепыран-а яке нылкышно визь-а?

- Ма, возьдаськон ик ӧвӧл, дыр. Мон Валентин сьӧры ветлыны ӧй малпа, ӧй но ваньмылы. Юрт учконо, пудо-живот утёно. Берло кык арзэ гинэ тани моӵ уг сузьы. Чипы-курег котырын гинэ бергасько на. Семья, нылпи будэтон мон вылэ усиз. Валентин, агрономын ужакуз, 5 часын ӵукна дорысь потылӥз. Бертэ бер, пиналъёс сое уг ик адӟо вал. Кылем арын 70 арессэ пусйыку, мон серекъяса верасько: 46-тӥ арзэ ӵош улӥськом ни, но со пӧлысь ӝынызэ ке но артэ улӥм ик-а, мар-а, кылемзэ весь нимаз.

- Озьы ке но воргорон тыбыр сьӧрын гинэ ватскыса улэмды ӧз поты. «Зарни шеп» юнме ӧз вордскы ук.


- 1970-тӥ арын Пурга райгазетлэн редакцияз ужаны кутски. Вылам куштӥзы ужасьёслэсь шутэтскон дырзэс радъянэз. Со куспын кызьы ке йырам лыктӥз: калыкез вашкала дӥськутъёсын тодматъяно. Мынам соос - быдэс сандык. Редакциысь эшъёсылы со малпанме усьтӥ. Мыло-кыдоос 12 кузя люкаським. Ижын калык театрлэн кивалтӥсез Анатолий Андреевич Митрофанов фольклор ӝытъёс ортчытъя вал. Отчы ӧтизы. Мынӥмы. «Советской Удмуртия» газетын ужасьёс адӟизы но шуо: ма, тӥ ваньды редакциысь но типографиысь ӧвӧл, дыр, милям редакцимы бадӟымгес ке но, тамында кышноосмы ӧвӧл. Ма, милям но пиосмы вань, лулӟисько, только огез ӟуч, мукетызлы кырӟан-веран нокыӵе уг поты. Озьы ке но коллективын пиостэк мӧзмыт - воргоронъёсты утчаны кутски.

Пыдыз капчи вылэм нырысетӥезлэн – Василий Громовлэн. Ижын линотипистэ дышетскись Вася редакцие практика ортчыны вуиз. Ӵап соку кыӵе ке но концерт дасяськомы вал.

- Тон, Вася, уд кырӟаськы-а? - юасько.

- Ма, незнай, - шуэ, - утчаны, пе, луысал.

Туж чебер кырӟаз. Озьы воргоронмы кылдӥз. Вася вӧзы шофёрмы Васильев Коля лыктӥз. Со бӧрсьы - радиокоррреспондент Михайлов Женя (али удмурт телевидениын ужа). Арганчимы таки ӧвӧл на. Школаысь музыкалы дышетӥсез Ивановез фольклор ӝытъёсы чоръяськом вал. Нош репетиция сотэк ортчытъяськом. Аргантэк туж шуг. Та югдурысь потыны олокызьы но выри. Огез дотово умой вал. Репетицие 5 манет уксёен ветлыны кутски. Соин со вакытэ арня ӵоже семьяез сюдыны луэ. А мыным арганчи кулэ. Солы мон арня ӵоже сиськоно уксёез но сётыны дась. Клубысь арган кыскасез адӟисько: 5 манетлыкен зыгатӥсько. Озьы ветлон сямен Тубылов Коляез дэмласьёс луизы. Пургалан мукет Тубыловъёс вань шуыса, пайми, Можга палъёс гинэ таӵе фамилиен кадь но. Озьы-а, тазьы-а, но фамилимы огкадь луэмен-а, мар-а, арганчиен одӥг кыл шедьтӥмы. Ансамбль ганяк шокчиз. Со дырысен 27-тӥ ар кошкиз ни.

- Коллективлэн нимыз кытысь потӥз?

- Мон гуртын будэм адями бере гурт ужез гажасько-яратӥсько. Нырысь ик кылдӥз аран дырез возьматон композиция. Сыӵе сузъет дасям бере ним но малпано ӧй вал ни. Нянь - зарни интыын. Сэре дӥськут-костюммы но, йыре пононъёсмы но, дэремъёсмы но шепъёсын суредамын-чеберматэмын вал. Озьы кылдӥз «Зарни шеп».

- Крезьгурлы нимысьтыз дышетскемды ӧвӧл. Ансамблен кивалтонын со шӧдӥське, дыр.

- Секыт йӧтэ. Мыным ведь, война вакытэ будэм муртлы, нокин верась ӧз луы, кырӟаны юри дышето шуыса. Пичи дыръям кунян сюдӥсь луэм потэ вал. Пычасысь средней школаез быдтэме бере куиськисе дышетскыны малпалляй. Но бер кыли: гужемаз ньылонме вандылӥзы. Озьы ӝегай, дышетскыны мыныны ӧй вуы. Колхозэ потӥ. Собере куризы Бобья-Уча клубын ужаны. Сомында тодэм-валаме. Пинал луысал ке, одно ик культурая училищее мынысал.

- Асьме республикаямы фольклор коллективъёс трос. Кызьы соос пӧлын висъяськыны турттэ «Зарни шеп»?

- Аспӧртэмлыко сузьетъёсыныз. Удмурт йылолъёс трос. Адямиос мед тодозы-валалозы соосты. Со понна утьыны кулэ вашкалаослэсь кырӟан-веранъёссэс. Уго со - калыклэн дауръёсын люкам лул-чеберез. Со йылолъёсты ми бӧрсьысь возьматӥськом. Кырӟам-верам пыр син шоры пуксё асьме калыклэн улонэз но сямъёсыз.

Тани вордске нуны. Со кӧкыын ай ветлэ, нош мемей-дядяез кубо-дусым ортчыто ни, нылпизылы пар утчало. Пиналъёс будо, сьӧр гуртэ шудыны потало. Быдэ вуэм нылъёс пиоссэс армие келяло. Ӝоген вуэ бызён–кышнояськон дыр но. Кизён бусы ужъёс бырем бере, турнан дорозь ӧжыт вис луыку, кен вайыны турттылӥзы. Анай-атайёс ваче кенешон ортчыто. Нылэз кужмысь лушкан-ваён ӧвӧл ке, ваньмыз дасямын ни ке, со йылолэз ӟечкын ныл сётон шуылӥзы. Сэре луэ кен пылатон.

Удмурт калыкэн трос веранъёсыз герӟаськемын ужен. Солы сӥземын милям «Возьвыл ужгур» сузьетмы. Сӥзьыл вуэ, Пукро бере сюан жингыртэ. Бызён-кышнояськон одӥг нуналэн гинэ уг йылпумъяськы – вань на беразьмы (кин ке сое сюан бӧрысь, сюан ярашон шуэ). Семья бадӟыма бере, яна потонъёс но луо ни. Соку быдэс гуртэн веме каро. Солы сӥземын «Корка ӝутон» сузьетмы. Вань со йылолъёсты сцена вылысен калык доры вуттыны тыршиськом, пыртылӥськом выль люкетъёс. Трос вераськытэк, валэктытэк, кырӟан но кылбур пыр мед со сям-йылолъёс калык сюлэме кылёзы.

- Ансамбльлы юри кутскыса кырӟан гожъясьёс ӧвӧл ук. Кырӟан ошместы уг куасьмы-а?

- Улон сюресэ вакчи ӧвӧл ни, кырӟанъёс калыкысь лыкто. Ачим но гожтӥсько. Со сяна, вань милям «Кузь сюресъёс – ваем кырӟанъёс» сузьетмы. Татын коми, мордва, финн, башкир, чиган кырӟанъёсмы, кукмор, карлыган эктонъёсмы. Котькудӥзлэн аслаз кылдэмез.

1995-тӥ арын Чебоксары городлэн юбилеяз ветлӥм. Гужем, ӵапак турнан дыр. Вань гурт ужез, пудо-животмес куштыса, милемлы концертэн кошконо луиз. Чебоксарые вуим, шуныт пумитазы. Туж зол мероприятие вал. Коллективмес эшшо одӥг нуналлы кыльыны куро – возь вылын, пе, шулдыръяськон луоз на. Ми туж дыртӥськом. Поезд нунал ортчыса ветлэ. Юондыре кылиськом ке, эшшо одӥг уй кӧлоно луиськом. Таки кошконо кариськимы. Куно карисьёсмы вожзы потыса ик келяло милемыз. Вокзалэ вуимы. Огез арганчимы чиган гурез шудыны кутскиз, «зарни шепъёс» экто. А отын чиганъёс тачак вылӥллям. Асьсэ гурзэс кылыса, мӧйыос нылпиосын суро эктыны кутскизы ук! Милямъёс тапырто, чиганъёс но бере уг кылё. Ӝожомем куно карисьёсмылэн мылкыдзы ӧжыт веськаз кадь. Нош милям шӧдтэк шорысь вордскиз чиган кырӟанмы. Туж задор пумитало сое учкисьёсмы но.

Карлыганлэн мукет историез. Громов Васямы Камбаркае судьяе ужаны мынэ. Пургалан инты, пе, ӧвӧл. Милемын ӵош берпуметӥ концертэ ветлӥз. Карлыганысь бертыку, Вася шуэ: ой, мон жади, изьыса берто. Мынам оломар йырам чуръёс лыктӥзы:

Изьны но выдод али но,

Умме но усёд али,

Ми гинэ ум мӧзме али,

Ачид но мӧзмод ай.

Со кылъёс бере мукет кылъёс сюризы. Отын ик пӧрмиз таиз кырӟанмы но Карлыган эктонмы.

- Кылэм вань: тӥ, пе, «Зарни шепе» ветлӥсьёслы кузпал но шедьтыны юрттӥськоды, семья кусыпез тэшкатӥсьёслы визь но тыриськоды.

- Олома но луэ. Нош ик Громов Вася вылэ вуисько. Редакциын практика ортчыкуз, малпасько: та пиез лэзёно ӧвӧл, типографие ик ужаны мед лыктоз, пинал нылъёсмы вань, кышноялом. Валентин райкомын ужаз бере солэсь но юаса вуттӥ, квартира шедьтыны уз-а луы шуыса. Нош Васямылэн кышноез Ижын дышетске вылэм.

Борис Горбушин лыктӥз, ансамбльысь нылэн тодматскыса, семья кылдытӥзы. Куддыръя кырӟан-эктон вискын синмаськон-лулӟылонъёс но луо. Тае шӧдӥсько ке, синмазы пырак верасько. Кылын гинэ уг тырмы ке, коллективысь кошкыны курисько. Дыр ортчыса, йӧнтэмъяськон сямзы зӥбломе ке, куд-огзэ берытскыны лэзисько.

- Коллективдэс, республикаямы сяна, тодо Россиысь трос городъёсын, кунгож сьӧрын. Но супыльтӥсьёс вань: Тубылов Вылӥ Кенешлэн тӧроез ке ӧй луысал, «Зарни шеп» дуннеез ӧй адӟысал. Со выллем кылъёс ӝожомыто-а?

- Синмам тазьы верамзы ӧвӧл ке но, мон сыӵе «шокамъёсты» шӧдылӥ. Валентинлэн бадӟым кивалтӥсь луэмез ӝегатэ вал «Зарни шепез». Кунгож сьӧры но вазьгес мыныны быгатысалмы. Тубылов лэзиз шуозы малпаса, огпол ӧм мынэ, мукет дырлы кылим. Финляндие 1993-тӥ арын потамы, Венгрие – 1994-тӥын. Мукет коллективъёс азьвылгес вуылӥзы. Ӝож, но неужто мукет коллективъёс уг валало: вань ӧтёнъёс Тубылов пыр - уг, Культурая министерство пыр вуо. Ми али но весь кытчы ке потаськом. 2004-тӥ арын Москвае, кылем гужем Ханты-Мансийске вуылӥм. Озьы ке но куд-ог адямиос али ке но уг валало. Кытчы ке мыныны уксё яке транспорт ум шедьтӥське ке, «Удмурт кенешлэсь» кур, шуо.

- Нош 1994-тӥ арын Омскын «Зарни шепез» туж сӥлы карыны фамилиды ӧз юртты ук. Мукет коллективъёс одӥг номер возьматӥзы, пургаос – быдэс ӝыт кырӟазы.

-Ой, али ке но тодам. 27 коллектив люкаськиз. Пус чӧлтӥзы. Кыски - ми сцена вылэ берпуметӥосыз потӥськом. Жюри шоры учкисько: ваньмыз йыг-йыг пурысьтам пиосъёс. Ой, кызьы таос милемыз дунъялозы? Я, шуисько, асьмемыз соос уз но кылэ ни. Черодмы вуиз. Огзэ сузьетмес возьматӥськом. Пинал нылъёсмы залэ васько но калыкез эктыны ӧтё. Отын учкисьёслэсь трос артистъёс пуко. Кинэ ӧтё - ваньмыз пото. Ӝыны зал тапыртэ уг.

Мукет нуналаз дорам лыктэ дотово таза пиосмурт.

- Тӥ-а «Зарни шеплэн» кивалтӥсез? - юа.

- Мон, - шуисько.

- Тӥ лауреат луиды. Туннэ гала-концерт. Котькуд коллектив быдэн одӥг кырӟан яке эктон возьматоз. Нош удмуртъёс - быдэс программа. Толон ӝыны зал эктӥз, туннэ вань учкисьёсты вырӟытэ. Ваньды сцена вылысь ваське.

Озьы сцена вылэ ньыль кузя кылим. Мукетъёс учкисьёс пӧлы васькизы. Жюриын пукисьёс, йырзэс берыктыса ик, тапыртӥсь зал шоры учко. Мон, пичи кышномурт, сцена вылын, вӧзам арганчиосы - огез пурысьтамын, мукетыз пилеш. Соос шудо, мон кырӟасько, синкылиосы бам кузям васько: пичи гуртысь востэм удмуртъёс та быдӟа залысь калыкез эктытыны быгатӥськом.

- Собере ӵем-а бӧрдылӥськоды?

- Ма уг. Весь уд ук. Только огез кӧтӝоже али но ӧз вуны на. Валентин Пурга райкомлэн нырысетӥ секретарез вал. 1986-тӥ арын куштӥзы. Тыриськытӥзы. Ужысь уллязы, мукет нокыӵе интые кутонтэм. Партбилетсэ гинэ басьтыса ӧз вуэ.

Со вакытэ трос мукет кивалтӥсьёсты но ужысь мозмытъязы. Огпол телевизорез лэзи. Иворъёсын верало: Татариын нырысетӥ секретарез куштӥллям. Соиз ыбиськем. Мынам ымныры кыстӥськиз. Кӧдэктэмме адӟыса, Валентин буйгатэ: асьмеос озьы ум дауртэ, ява. Туж кышкай, маке луоз шуыса. Миндэрын агрономын ужакуз, чакланы но ветлылӥ. Кинлы ке кивалтон, кинлы ке ӝужыт пукон, нош милям семья, нылъёс.

Сэре Асан совхоз-техникумен кивалтыны ӧтизы. Со - Асанын, мон – Пургалан. Суббота-арняе со доры ветлӥсько. Пургала быз! бӧрдыса бертӥсько. Сыӵе жаль потылӥз. Асанэ улыны кошкыны радэ ик вал. Корка пуктыны инты но чакламы. Тырмоз начальникын ветлыны, ойдо ганякгес улом, малпалляй. Но ӧз кылды. Сое алнаш калык Вылӥ Кенеше депутатэ бырйиз. Молодец, батыр пиосмурт со, чидаз, ӧз чигиськы.

- Нылъёсты – куинь кузя. Пиды ӧвӧл шуыса уд жаляське-а?

- Нырысетӥез нунымы шӧй вордскиз, пи луоно вал со. Сэре бӧрсьысь 62-тӥын, 63-тӥын нылъёс вайылӥ, пичизэ бергес – 66-тӥын. Мемейме но тятяме тышкаськисько: тӥ весь нылпи куремен, мон таӵе бӧрсьысь пиясь луи. Мон соослэн одӥг гинэ нылзы. Тятяелэн нырысетӥ кышноез нуны ваён куспетӥз кулэм. Мемеелэсь нырысетӥ картсэ но кык нылзэ чахотка погыртэм. Сэре куинетӥ нылыз но кулэм на. Сыӵе кайгу пыр потыса, мемеен тятя паръяськиллям. Артэ пуксьыса, туж ӝож кырӟало вал. Соослэсь гуръёссэс мон утисько «Зарни шеплэн» кырӟан сандыказ.

Бадӟымез нылы, Вероника, Удмурт кун университетысь экономикая факультетын дышетскиз. Али Правительствоын экономикая люкетаз специалист. Шоретӥез, Ирина, Глазовысь пединститутэз йылпумъяз. Бызиз пурга пилы, будо Таня нылыз но пиез. Пичиез, Светамы, университетысь ик историяя факультетэз быдтӥз, ужа республикаысьтымы шаертодонъя музейын. Солэн Варя нылыз но пиез. Нылъёсы ваньмыз крезьгуро школае ветлэмын, чебер кырӟало, крезьгуро инструментэн шудо.

- Асьтэос калык фольклорез люкаськоды, Валентин Кузьмич «Удмурт кенешлэн» тӧроез. Нош нылъёстылэн пиналъёссы удмурт кылын малы уг верасько?

- Верасько, только шуген. Внучкаосы «Зарни шепын» кырӟало. Но городын но райцентрын будэменызы, ӟуч луизы. Тани Вероникае Поӵышын будыса вуиз бере, солы удмуртлык золгес пыӵамын. Нош Пургалан аслам нылъёсы ик толэзь куспын ӟучомизы. Но ми Валентинэн тазьы кенешим: дорын котьку вераськоно удмурт кылын, со сям али но кылемын на.

- Йырсиды пинал ныллэн кадь юг-юг тӧдьы. Арлыддэс шӧдӥськоды-а?

- Ижысь Йӧ дворецын концерт дыръя дорам нылашъёс лыктӥзы. Йырсидэс маин-о буяськоды, юало. «Белизнаен» шу, пышкыло эшъёсы. Арлыд люкаськемез сюлэмы уг шӧды, но киосы но пыдъёсы вакчи луо ини. Жадён вуэ. Таиз ар ортчиз ке, уг ужа ни, малпасько. Нош сэре мынӥсько но мынӥсько. Коллективме кинлы кельтом шуыса сюлмаськисько. 20 армес пусйим, 25 но ортчиз, 27-тӥез кошкиз. Зэмзэ верано ке, арлыдылэсь мон туж кепырасько. Кырӟасьёсы пӧлын мон песянай, пичиосызлыгес – пересь анай. Сцена вылэ ӧй но потасал ни, но кыкетӥ куараен кырӟасьёсмы ӧжыт, соин кырӟано луэ на. Егитъёсын ӵош туспуксеме но уг поты ни. Возьдаськисько.

- Кивоштӥсь будэтӥськоды-а?

- «Зарни шепысь» мон сое уг адӟиськы.

За предоставление материала выражаем огромную благодарность редакции газеты "Удмурт дунне"

Источник:

Тубылова Ф. М. Зарни но ӧвӧл мон, азвесь но ӧвӧл / Ф. М. Тубылова ; записала Алена Ионина // Удмурт дунне. - 2006. - 10 марта. - С. 6, 11. - (Удмурт кизилиос).