Ходырева Марина Германовна
Марина Ходырева крезьгурчилы – 50 арес[править]
Марина Ходырева – Россиысь Крезьгурчиослэн огазеяськонзылэн ёзчиез, шаерысьтымы тодмо крезьгурчи, тодосчи, Удмурт театрлэн крезьгуръя люкетэныз кивалтӥсь.
- Марина Германовна, тӥ тодмо удмурт кылбурчилэн Герман Ходыревлэн нылыз. Атайдылэн лёгем пытьыезъя ӵапак вамыштоно кадь…
- Атае крезьгур борды кыстӥськемме шӧдӥз. Иже вуэммы бере монэ 30-тӥ школае сётӥзы. Отын туж золэсь дышетӥсьёс. Мыным пичиысен туж кельше вал литература, вакчиесь мадёсъёс кылдытъяй. Но улонэ литератураен ӧз герӟаськы, крезьгур сюлэмме вормиз. Куать арескысен крезьгуръя 1 номеро школае гожтӥзы. Мон отчы мыло-кыдо ветлӥ. Туж яратӥ фортепианоез. Огдыре ик нылпи балетъя школаын дышетски. Потэ вал балерина луэме, циркын эктэме.
Но, школаез йылпумъяса, дышетскыны пыроно кариськи крезьгуръя училищее. Секыт вал отчы шедьыны, одӥг интые куинь-ньыль пинал пырыны турттэ. Трос удмурт нылъёс но пиос училищеын дышетскизы. Крезьгур дуннее вуттэмезлы тау кареме потэ Ольга Ивановалы. Со кивалтӥз крезьгуръя 1 номеро школаен. Нош училищеын мур-мур тодон-валан сётӥзы ини Людмила Петрушина, Юрий Толкач, Александр Корепанов, Римма Чуракова, Леонид Исупов. Та дышетӥсьёсын ми гуртысь кырӟасьёс доры поталлямы. Можга ёросысь Бадӟым Сибы гуртэ вуылэмме ноку уг вунэты. Мынам али ке но син азям быдӟым ӟуч дышетӥсьлэн Вера Васильевна Толстаялэн улэм юртэз.
- Училище бере кошкиды консерваторие.
- Озьы. Училищеез горд дипломен йылпумъяй но Казаньысь консерваторие пырыны шӧтай. Дасям ужъёсме отысь профессорлы Анатолий Лупповлы возьматӥ. Соос яразы кадь, озьы мон бадӟым улонэ вамыш лэсьтӥ. Консерваториын ини, училищеын сярысь, куронъёс чылкак мукетэсь вал. Ӵемысь ас кожамы ужаллямы. Эшъёсы ваньмыз сямен эрзяос, мокшаос, поръёс, чувашъёс вал.
Дышетскон туж тунсыко потӥз. Фольклор борды кыстӥськи. Практика дыръя Татарстанысь Огырчи ёросысь Варклед-Бӧдья гуртэ ветлӥ. Отысь люкам кырӟан-веранъёсты нимаз сузьетэн поттӥ. Собере Удмуртиысь уйпал удмуртъёслэн, бесерманъёслэн кырӟанъёсынызы «Кама-рекордс» студиен нимысьтыз дискъёс поттӥмы. Озьы ик ужамы Кияса ёросысь Уддяди гуртысь кырӟасьёсын но. Соосын но диск поттэмын. Куинетӥез диск «Карсовай гуръёс» нимаське. Бӧрысь Москваысь «Мелодия» фирмаын но Германиын со кырӟанъёсын ик компакт-диск поттыны быгатӥмы.
- Собере уждэс но улондэс наукаен герӟады?
- Озьы луиз. Атае Никифор Павловен, УдНИИ-ысь тодосчиен, ӵемысь кенешылӥллям. Со ик монэ консерваторие келян сярысь кылпум поттылэм. Дышетсконзэ йылпумъямез бере, пе, институтэ кутомы. Озьы ик луиз. Иже бертӥ но, монэ соку ик Историяя, кылъя но литературая Удмурт институтэ кутӥзы. Отысен ини дышетскыны пыри Москваысь аспирантурае. Быдэсак выйи крезьгур удысэ. 1990-тӥ аръёсы Эстониысь Тарту городысь литература музейын тодон-валан люкай. Татын мон калык крезьгурлэсь аспӧртэмлыкъёссэ тодыны тырши. Эстон эшъёсылы удмурт кыл но сям-йылолъёс сярысь ӵемысь верано луылӥз. Соослэн кылынызы ӧй ке но быгаты вераськыны, англи кылэз умой тодӥсько вал. Соку ик шуд усиз вуылыны Норвегие. Отын но калыккуспо фестивальёс ортчыло вылэм. Та кык кунъёсы вуылэме мон понна бадӟым школа луиз. «Удмуртия» кун телерадиокомпанилэн капеллаеныз вуылӥ на эшшо Венгрие. Соку мон Удмурт радиолэн «Ингур» радиостанцияз ужай. Венгриын ортчизы удмурт культуралы сӥзем нуналъёс. Озьы ик шуд усиз Финляндиын быдэс дуннеысь тодосчиослэн – этнографъёслэн, историкъёслэн, филологъёслэн, антропологъёслэн, фольклористъёслэн но музыковедъёслэн – Финляндиысь фольклор школаязы вуылыны. Отын кенешон мынӥз пичи калыкъёслэсь крезьгур культуразэс утён сярысь. 90-тӥ аръёслэн пумазы ини Финляндиын ортчиз дуннеысь фин-угор театръёслэн фестивальзы. Татысь но узырмыса бертӥ. Со вакытэгес ик Ижысь медициная кун академиысь «Ашальчи» ансамблен ужай.
- Городын будыса но, удмурт кылын чебер но вольыт вераськиськоды.
- Мон вордски шаермылэн дано интыяз – Алнаш ёросын. Отын кык аресозь улӥськем. Алнашын монэ утиз атаелэн анаез. Песянае ик, лэся, монэ дышетӥз удмурт выжымес но калыкмес яратыны. Туж гажа вал со ас выжы-кумызэ но удмурт кылэз. Со вакытэ Герман Алексеевич «Алнаш колхозник» газетын ужаз, редакциез ворсазы но, анаен атае городэ выжоно луизы. Ижын ини ӵужанай монэн пукиз. Со но ялан удмурт кылын бӧтьыртылӥз. Ми котьку но ӵыжы-выжыосынымы удмурт кылын вераськылӥмы: ми-а соос доры кунояны мынӥськом, соос-а ми доры лыкто.
- Тӥляд кузпалды Александр Иванов – история наукаосъя кандидат, археолог. Ма малпаса, пиналъёстылы аспӧртэм нимъёс тыриды. Кытысь соосты шедьтӥды?
- Саша уйпал удмуртъёслэн культураенызы тунсыкъяське. Вордскем интыез но солэн угось Балезино палъёсысь Атасгуртысь. Ми соин дасо аръёс пала ӵошеннамы гинэ улӥмы, пиналъёсмы кема ӧй вал.
Нылпиосмы вордскизы но малпаськом: Иванов фамилиос туж трос. Нылпиосмылэн нимъёссы коть аспӧртэмесь мед луозы шуыса, удмурт вашкала нимъёсты утчаса, трос бугыръяськоно луиз пӧртэм кылбичетъёсысь, аспӧртэм книгаосысь. Нылмес, кема возьмам пиналмес, Зарина шуыса нимамы. Со нимез шедьтӥмы тодмо тодосчилэн Михаил Атамановлэн «Нимбугор» книгаысьтыз. Нылмы милемлы зарни кадь дуно, туэ 8-тӥ классэ ветлэ ини. Туж чебер но быгатыса эктэ.
Нош пимылы Донай ним понӥмы. Таиз Дунай дун-чылкыт шурен герӟаськемын. Со сыӵе ик чылкыт сюлэмо мед луоз. Донай дышетске 5-тӥ классын. Герман Алексеевич песятаез сямен ик, туж умой шудэ балалайкаен. Кыкназы но нылпиосмы ярато лыдӟиськыны. Вань соослы кинлэсь адӟем карыны: ӵужатайзы тодмо нылпи кылбурчи вал. Жаляса верано, нылпиосме атай адӟыса ӧз вуы ни.
- Тӥ Удмурт театрын крезьгуръя люкетэн кивалтӥськоды. Ужды сюлэмдыя-а?
- Уже туж тунсыко. Сцена вылын пуктоно спектакльёслы кырӟанъёс бырйисько. Нош тупасьсэ уг ке шедьтӥськы, ачим гожтӥсько. Дас спектакльлы крезьгур гожтӥ ини. Атаелэн «Кызьы Табышен Аника вумуртэз вормизы» выжыкылэзлы крезьгур гожтӥ. Сое Удмурт театрысь артистъёс сцена вылын пуктӥзы ини. Мукет выжыкылъёслы но крезьгуръёсы вань. Бразилиысь драматурглэн Гильерме Фигейредолэн «Эзоп» драмаезлы но гур кылдытӥ. Пётр Захаровлэн «Эбга» драмаезлы но тупамон гур шедьтӥ кадь. Мыным шуд усиз «Алангасарлэн вужерез» кинофильмын пеймыт нюлэскын кырӟась нылмуртэ шудыны.
- Спектакльёслы сяна но кырӟанъёс гожъяськоды, луоз?
- Ма, трос гинэ ни соос. Шумпотыса вераны быгатӥсько: та вакытэ Герман Алексеевичлэн нылпи кылбуръёсызъя 23 кырӟан гожтӥ. Калыкын уг тырмо нылпи кырӟанъёс. Та нуналъёсы Нациосын ужан политикая министерстволэн проектэзъя Герман Алексеевичлэн кылбуръёсыныз но мынам крезьгуръёсыным «Турлы буёлъёс» диск потыны кулэ.
- Марина Германовна, зарни юбилейдэс кыӵе мылкыдын пумитаськоды?
- Пичи дыръя 50 аресъем адями шоры мӧйы ни та шуыса учконо вал. Нош ачид вылэ вуэ ке, мӧйымемдэ пичи но шӧдоно вылымтэ. Юнме пересьёс шуиллямтэ: арлыды бадӟым ни ке но, мылкыды пичи муртлэн кадь капчи. Мон асме 30-35 аресам кадь шӧдӥсько. Уката ик сыӵе мылкыд мыным сётэ, дыр, яратоно удысэ – крезьгур гожъянэ.
Источник:
За предоставление материала выражаем огромную благодарность редакции газеты "Удмурт дунне"
