Павлов Никифор Павлович
Кӧльыез уд куртчы, кужмо муртэз уд быдты [править]
Туэ 13-тӥ мартэ 85 арес тырмоз Никифор Павлович Павловлы - солдатлы, суредасьлы, история наукаосъя докторлы, кужмо адямилы. Вордӥськемын со Можга ёросысь Удмурт Сюгаил гуртын тямыс нылпиё крестьян семьяын.
Наукае вамышъёссэ со лэсьтӥз, аспирантураын дышетскыкуз, Удмурт научно-исследовательской институтын ужакуз. 1958-тӥ арысен со татын кивалтӥз историяя секторен, нош 1967-тӥ арысен институтлэн директорезлэн кадръёсын ужанъя воштӥсез луиз. Солэн кивалтэмез улсын потӥзы: «Очерки истории Удмуртской АССР», «Очерки истории Удмуртской организации КПСС» книгаос но мукет научной ужъёс.
Пенсие потэмез бере ини со удмурт калыклэн дано пиосыз сярысь документальной очеркъёс гожтӥз. Озьы кылдӥзы Иосиф Наговицын, Максим Прокопьев, Трофим Борисов, Иван Волков, Кузебай Герд сярысь книгаосыз.
Никифор Павловичлэн вань улонэз герӟаськемын удмурт калыклэсь историзэ сэрттонэн-пертчонэн. Но наукае сюресэз вольыт ӧй вал. Соин вераськыса но тани паймиськод: наукаын вормонъёсыз номырин но пусйымтэ. Яке сыӵе адямиос понна сӥё-дано нимъёс но медальёс малпамтэ на меда? Учёной сяна, кин бен со - Никифор Павлов?
Баку пиос кулонлэсь утизы
Можга педучилищеез йылпумъяса, Никифор Павлович Вуж Какся гуртысь школаын пичи классъёсысь нылпиосты дышетӥз. Огез дышетскисез бӧрысь тодмо кылбурчи Даниил Яшин луиз. Павловлы ужзэ азьланьтыны война люкетӥз.
- Никифор Павлович, фронтэ ас мылкыд каремдыя кошкиды-а?
- Армие мыныны тазалыкея уг яраськы вал. Но огпол комсомоллэн райкомаз ӧтизы. Юазы: кыӵе нырысетӥ долгез комсомолецлэн? Родинаез утён, шуисько. Гожты, пе, фронтэ куриськон. Кӧня ке улыса, военкоматысь ӧтён вуиз. Озьы 1941-тӥ арын ик войнае кошки. Куинь толэзь пала замполитэ дышетӥзы. Можга педучилищеын ик дышетскон курсъёс радъямын вал. Отысен милемыз Новороссийске келязы, собере - Керче. Немецъёслэн матын луэмзы татын туж зол шӧдиськиз. Соослэн кужымзы соку зол вал. 1942-тӥ арын ай асьме солдатъёслы ялан чигнано луиз. Мыным сётӥзы Иранын поттэм штыкен винтовка но вить патрон. Озьы вуи «передовое». Взводлэн командирез мыным «максим» пулемётэз оскиз.
Асьме армилэн соку туж секыт вакытэз вал: берлань чигнан. Новороссийск котырын кык взводмы пленэ сюриз. Уноез солдатъёс быризы. Мон азьын ик усьыса кулӥз взводмылэн командирез. Командиръёсмы туж ежесь, пӧсесь вал. Малы солы шимес ыбылӥськон дыръя окопетӥ султыса мыноно вал? «Ӟеч луэ, эшъёс» шуыса гинэ вуиз но - кулӥз. Быдэс полкысь одӥг рота гинэ кылиз. Немецъёслэсь пегӟыса, Кавказ гурезьёстӥ кошким.
- Сӧсырмыны татын ик-а шедиды?
- Татын. Огпол монэ политрук ӧтиз: тӥнь та пакетэз, пе, полклэн штабаз нуоно. Штабез шедьтӥ, сётӥ. Мыным татысен нош ик пакет сётӥзы, тазэ, пе, батальонлэн штабаз чаляк вуттоно. Татчы вуи но гожтэтэз лыдӟемзы бере кӧня ке возьманы куризы, валэктонъёс, пе, сьӧрад лэзём. Возьманъям дорам ик тушмонлэн снарядэз пазьгиськиз. Киосысьтым, пыдъёсысьтым вир кошке. Санитар лыктӥз, но монэ нуыны уг быгаты, аслам ветлэме уг луы. Уробоен валэн санчасте нуиз ни.
Пӧртэм госпитальёсын эмъязы - Геленджикын, Сочиын, Бакуын. Сочиын вань документъёсме лушказы: кин ке, оло, кема уг ни улы шуыса малпаз. Бакуын сутскем муртъёсын ӵош кылли. Соосты но, монэ но татын мувӧен зыраса йӧнатылӥзы. Сыӵе амал сярысь ноку кылэме ӧй вал. Куинь толэзь пала Бакуын кылли. Отын ик кулысал ни, малы ке шуоно татын ӵужектонэн висьыны уси на.
Кулонлэсь азербайджан пиос утизы. Госпитальлэн укно улаз соос лыктылӥзы солдатъёслэсь сигаретъёссэс курыны. Соосты базарын сиёнэн воштылӥзы. Милемлы госпитальын дуно папиросъёс сётъяло вал. Нош мон уг кыскиськы. Тамакез пиналъёслы сётылӥ, нош соос мыным мацони (кефир выллем) вайылӥзы. Мукет йӧл сиёнъёс ӧй вал. Ӵужектонэ пумен бырыны кутскиз.
Бакуысен ик одӥг солдат мукет мылкыдме но бугыртӥз. Огпол со шуиз: Бакуысь университетэ дышетскыны, пе, пыри. Мынам но мылкыды гомӟиз. Бертӥ ке, одно ик дышетсконме азьланьто, малпай. 1943-тӥ арын фронтысь бертӥ.
Сяськаосты суреданы яратӥсько
Никифор Павловичлэн квартираяз вань борддоръёсыз сяська суредъёсын тырмытэмын. Суредъёс лач-лач рамаосы инъямын.
- Ма, тӥ усто суредась вылӥллямды ук. Ку дырды шедиз та ужлы дышетскыны?
- Москваын живописьлы но рисованилы дышетонъя Н. Крупская нимо курсъёс радъямын вал. Соос куинь арлы чакламын ке вал, мон одӥг арлэсь тросгес отын дышетскыны вуи, школаын ужме куспетӥ карытэк. Суредъёсме умой дунъялязы.
- Нош нимысьтыз выставка ортчытон сярысь ӧд-а малпаськылэ?
- Тужгес но умойёссэ шкафын возисько ай. Огпол ӧти вал бадӟым художникез соосты учкыны, но ӧз лыкты. Кулэ ӧз кары, лэся.
- Мар сярысь верало тӥлед, воргоронлы, со сяськаос?
- Сяськаос - со инкуазен тужгес но чебер кылдытэм макеос. Соос туж ненегесь. Котькыӵе дыръёсам мон соосты синйылтытэк уг кельтӥськы. Тани огаз суредам сяськаос но вож будосъёс пӧлтӥ сюрес ортче - отӥ мон ветлӥ Сочиын дыръям. Институтын ужакум но, шутэтскон нуналъёсы сад-бакчаям дыртылӥ, сяськаослэсь мӧзмыса. Сяськаос - куректонэз буйгатон но, мур лулскылон но, улон сярысь малпаськон но. Пыдло ватэм мылкыдъёссэс удмуртъёс шара поттыны уггес быгато, возьдасько. Вань верамтэ кылъёсты но мон понна сяськаос возьмато кадь.
Мон - комсомоллэн секретарез
Кин тодэ, егит Никифор Павлов суредаськыны ӧй быгатысал ке, оло, комсомоллэн секретарез но ӧй луысал. Фронтысь бертэм пияшлы соку 21 арес гинэ вал.
- Син азе пуксё ни тӥляд егит аръёсты. Тӥ дышетӥсь но, суредась но, войнае ветлэм мурт но. Но туж пинал ай. Комсомоллэн ужаз выйыны ӵапак тӥлед ик тупа вал, дыр.
- 1943-тӥ арын фронтысь бертэме бере ик школаын ужаны кутски, табере - военрукын. Вордскем гуртам, Сюгаилын, ӵем пыралляй сельсоветэ, газетъёсты лыдӟыны шуыса. Отысь ик синйылтӥ Мария нылэз, со сельсоветын секретарь луыса ужа вал. Синмаським, сельсоветын гожтӥськыса, семья кылдытӥм. Коньдонлы туж ёрмиськом вал бере, дырын-дырын суредаськылӥ, со уженым йырин ик райисполкоме ӵем пырасько вал. Огпол монэ дораз ӧтиз райкомлэн секретарезлэн воштӥсез. Кемалась, пе, тонэ синйылтӥм ни, мылкыдмы вань секретаре юнматыны. Уксё, пе, трос басьтод. Дышетскондэ но азьланьтыны быгатод. Тӥни озьы кык ар ужай, Можга ёросысь комсомоллэн райкомезлэн секретарез луыса. Собере Москвае ВЛКСМ-лэн Центральной школаяз дышетскыны лэзизы. Отын дышетскыны туж кельшиз. Лекциос лыдӟылӥзы учебникъёслэн авторъёссы. Али но йырам возисько соослэсь верамъёссэс. Татын ик трос тодон-валанъёс сётӥзы пионеръёсын ужанъя. Отысь мон потӥ ни, пионервжатойлэсь ужзэ но ӟеч тодыса.
Москваысь бертыса, ужаны ыстӥзы Завьяловоысь комсомоллэн райкомаз, нош ик нырысетӥ секретаре. Озьы ке но отысь кошконо луи, пыды зол висемен. Сӧсырмем интыме тодмо хирург операция лэсьтӥз ке но, пыды ялан война сярысь тодам вайытылэ на. Отын ужамме «За трудовое отличие» медален пусйизы.
Ворми!
Удмурт пединститутэз Никифор Павлов 1952-тӥ арын горд дипломен йылпумъяз. Быдэсмиз солэн кема малпанэз. Табере со вылӥ образованиен дышетӥсь. Ужаны лэзё Можгаысь педучилищее. Татын со историлы дышетэ но пионервожатойёсты дася. Огдыре ик аспирантурае пырыны дасяське. 1954-тӥ-1957-тӥ аръёсы аспирант луыса дышетске Москваысь Ленин нимо пединститутын. Комсомоллэн школаяз ӧй ке дышетскысал, аспирантэ пырон конкурсэз ӧй вормысал, шуэ со.
- Мыным туж тунсыко потӥз тӥляд, аспирантлэн, диссертацидылэн темаез: «Борьба КПСС за укрепление кадров машинно-тракторных станций (1951-1955 гг.)». Туала учёнойёс таӵе тема борды уз кутске ни, гурт хозяйствоослы кадръёс туннэ но туж кулэ ке но.
- Зэм, со аръёсы партия колхозъёсты ӝутонлы туж бадӟым инты висъялляз. Но со аръёсы но тросэз аспирантъёс шуге-леке усизы. Диссертациоссэс утьыны ӧз быгатэ.
- Малы?
- Аспирантураез йылпумъян азьын ӵапак партилэн но правительстволэн постановленизы потӥз: диссертациез утемлэсь азьло аспирантлэн ужез кытын ке но печатламын луыны кулэ. Мар кароно? Тросэз ӧз быгатэ, дышетсконзэс куштӥзы. Преподаватель луыса ужаны бен соосты лэзьылӥзы ик, но наукае сюрессы ворсаськиз.
Мон таӵе амал шедьтӥ. Диссертациме Ижевске вайи но возьматӥ Удмурт издательстволэн кивалтӥсезлы Василий Константинович Тронинлы, «Удмуртская правда» газетлэн азьвыл редакторезлы. Со шуиз: ойдо, пе, диссертацидэ брошюраен поттом. Диссертацие потӥз. Макем бадӟым шумпотон!
- Озьыен, история наукаосъя кандидат луиды?
- Со понна нюръяськоно луиз на ай. Диссертацие печатламын, но табере эшшо одӥг постановление потӥз на: МТС-ёсты воштон-выльдон карон сярысь. Партия косэ МТС-ёсты быдтыны, нош мынам научной уже соосты юнматонлы сӥземын. Тодосчиос пӧлын соку но улон шоры чиновник синмын учкисьёс трос гинэ вал. Шуизы, диссертацидэ утьыны ум лэзе. Аслэсьтым осконъёсме но валанъёсме валэктон вылысь бадӟым учёнойёс дортӥ ветлытэк ӧйлась. Мон, историклэн синмыныз учкыса, югдурез тазьы валэктылӥ: МТС-ёсты быдтыны дыр вуиз, вылды, но ас вакытаз соос гуртъёслы туж бадӟым пайда вайизы, колхозъёслэн техниказы, кадръёссы кылдӥзы. Иське, азьланяз но механизация нуонлы соос луонлык кылдытӥзы. Соин ик МТС-ёс историе кылёзы. Диссертациме утьыны лэзизы. Но ньӧмыз понна шуизы: я, гожты на, пе, автореферат. Тӥни озьы книгае печатласькем бере ини автореферат гожтоно луи на.
- 1977-тӥ арын тӥ история наукаосъя доктор луиды. Таиз ужды («Крестьянство Удмуртии. 1946-1970-е годы») но колхоз улонэн герӟаськемын вал бере, докторской темадэс усьтыны, оло, сокем секыт ӧз йӧты ни?
- Учёнойлэн сюресэз капчи ӧвӧл. История наукаосъя кандидат но доктор луон вискын трос аръёс ортчизы. Доктор диссертациме гожтон азьын нош ик партилэн постановлениез потӥз: учёнойёслэн ужъёссы, пе, гожтэмын мед луозы, историяя наукаын кыӵе ке выль амалъёс кутыса. Наукаын выль сюресэз утчан - со туж секыт мар ке. Кема йырме тӥяй. Ужме гожтоно кариськи, история но социологияя методъёс вылэ пыкъяськыса. Соку мон быдэс Урал округъя огнам доктор диссертациме утьыны быгатӥ. Отӥосыз учёнойёс наукаын выль амалъёс шедьтыны шугъяськизы.
- Та книгады Удмуртилэн пӧртэм ёросъёсаз потаса гожтэмын-а?
- Озьы. Со книгаям гожтэм колхозъёсы, тӥ но, журналистъёс, вуылэ ай. Ӵошатэ, кыӵеесь вал колхозъёс 70-тӥ аръёсы но мар луэмын соосын али. Осконъёсыя мон кӧльылы тупасько
Книга ӝажыосыз дорын сылыса, Никифор Павлович возьматэ пенсие потэмез бере гожтэм книгаоссэ. Отын улэпкын кадь оградын сыло удмуртъёслэн асваланзы понна нюръяськемъёс: И. Наговицын, И. Волков, М. Прокопьев, Т. Борисов, К. Герд.
- Никифор Павлович, кызьы кылдӥзы та адямиос сярысь очеркъёсты?
- Иван Волков сярысь гожтыны малпан сётӥз одӥг коммунист, Николай Андреев. Казаньын, пе, Волковлы сӥзем урам но вань, нош Удмуртиын со сярысь ӧжыт тодӥськом.
Иосиф Наговицын сярысь гожтыкум, мон борды кырмиськизы ни Максим Прокопьев, Трофим Борисов, Кузебай Герд сярысь малпанъёс. Та адямиос сярысь материалъёс дасякум, йырам ялан кылдылӥз национальной ужпумъёслы сӥзем тема. Озьы 2000-тӥ арын таӵе книгае потӥз: «Самоопределение, автономия: идеи, реалии». Берпуметӥ книгае Гердлы сӥземын («Кузебай Герд - сын эпохи», потӥз 2004-тӥ арын»).
- Берло дыре та адямиос сярысь трос верасько, гожъяло, тужгес ик К. Герд сярысь.
- Мон шуысал: зэмос учёной книгазэ гожтэ, документъёс вылэ пыкиськыса. Зэмлыкез озьы гинэ шонер возьматыны луэ. Жаляса верано, куд-ог гожъясьёс, ки улазы шедем документъёсты кызьы ке но мыдланьтыны выро. Соослэсь гожъямъёссэс мон шелепен пуйыез кадь дунъясько.
- Никифор Павлович, куд-огез тӥледыз пыкылыны туртто книгаостэс ӟуч кылын гожъямысь.
- Малы удмурт кылын уг гожъяськиськы? Национальной политикамы сыӵегес вал уго. Школае мыныкум, гуртамы ӟучен гинэ дышетӥзы. Удмурт школа усьтылӥзы но ар ортчыса ворсазы. Тӥни озьы Сюгаилысен Можга городэ дышетскыны ветлоно луи. Удмурт кылын дышетон я кутскылӥз, я аналмылӥз. 7-тӥ классэз ӟуч кылын дышетскыса ик быдэстӥ.
Визьмо удмуртъёсты гуртъёсысь но утчалляй
Никифор Павлов 30 ар тыршиз Россиысь Наукаосъя академилэн Урал ёзысьтыз историяя, кылъя но литературая Удмурт институтын. Со аръёс ӵоже татын уно директоръёс воштӥськизы. Никифор Павлович гинэ ялан одӥг ужен выриз: татчы ужаны визьмо удмуртъёсты кыскылӥз. Тросэз соос тодмо учёнойёс луизы.
- Никифор Павлович, макем паськытаз институтлэн ужез тӥ отын ужан аръёсы?
- Институтлэсь троссэ люкетъёссэ (секторъёссэ) выль кадръёсын паськытатӥмы. Археологияя, этносоциологияя, искусствоведениея секторъёс кылдытӥмы. Котькуд аре 5-6 муртэз аспирантурае дышетскыны лэзьылӥм, огаз аре 9 муртэз но лэзим.
Кытысь утчано выль кадръёсты? Асьме вузъёсты йылпумъямъёс пӧлысь ик, малпай ас поннам. Озьы пединститутысь преподавательёс ӵектӥзы Маргарита Владимировна Гришкинаез. Со, пе, усто студент вал. Маргарита Владимировна ужа ни вылэм Яр газетлэн редакцияз. Со мыным кельшиз, визьмо но лад-лад луэменыз. Табере со история наукаосъя доктор. Али но солы тау карисько шор дауръёсы улэм удмуртъёслэсь ортчем сюрессэс возьматэмез понна.
Михаил Григорьевич Атаманов - со но мынам шедьтосэ. Ноку уг вунэты соин пумиськемме. Огпол Грах ёросэ командировкае сюри. Райцентрысен одӥг гуртэ мыноно вал. Адӟи дӧдьыен валэн сылӥсь пияшез. Ӵапак со гуртэ мынӥсько, пе, нуо. Со вылэм зоотехникын ужась Михаил Атаманов. Со доры ик кӧлыны интыяськи. Паймытӥз со монэ оломае но тодэменыз, трос лыдӟиськеменыз. Дэмлай солы Удмурт кун университетэ пырыны. Собере Министръёслэн кенешсы пыр сое аспирантурае дышетскыны келян сярысь вазиськон гожтӥм. Но Москваын дышетскыны интыос вылымтэ, Эстониысь Тарту университетэ келям. Галина Аркадьевна Никитина но институтын ас интызэ шедьтӥз. Константин Михайлович Климов но милям будэтэммы.
Институт трос научной ужъёс поттылӥз. Соосты дасянэ пӧртэм вузъёсын ужась учёнойёсты но трос кыскылӥм. Мылкыдзы бадӟым вал, сюлмо тыршылӥзы. Ма, соослы кытын ке но ас ужъёссэс печатланы кулэ ук вал.
Источник:
Павлов Н. П. Кӧльыез уд куртчы, кужмо муртэз уд быдты / Н. П. Павлов ; записала Татьяна Банникова // Удмурт дунне. - 2007. - 16 марта. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
