Студитских Валентина Васильевна
Вошты, воштӥськы, яраты![править]
Удмурт кун филармониын ортче камерной крезьгурлы сӥзем ӝыт. Мон отчы кыӵе ке ӧтёнъя гинэ сюрем мурт. Вӧзам пуксиз тӧдьыкысъем шоро-куспо арлыдъем нылкышно. Мон сое, пукон радъёс кузя вамышъякуз ик, синйылтӥ. Ӟечбуръяськиз, лачмытак интыяськиз пукон вылэ. Ымнырыз туж чылкыт, сайкыт, синъёсысьтыз сыӵе шуныт мылкыд лыктэ! Дэремез но, пельпум вылысьтыз кышетэз но туж валаса быръемын - кытӥ ветло суредасьёс? Мукетъят вамыштӥ театре. Фойеын сылыку, малы ке син нош ик висъяз та кышномуртэ. Со нош ик огназ. Сыӵе ик синмаськымон. Вуоно арняяз калыкез ӧтиз «Айкай» фольклор театр. Уд оскелэ, нош ик пумиським та чебер нылкышноен. Удмурт концертэ лыктэм бере, асьме выжыысь ик, дыр, малпай мон. Тодматским. Валентина Васильевна Студитских, Удмурт кун университетысь дышетӥсь-психолог вылэм. Удмурт нылкышно. Анай кылыныз синмаськымон вераське. Улон-вылонзэ мадемез бере уката паймиськод, кызьы та чиед нылкышно, куректонлы сётскытэк, уката кужмогес луэ, котыраз чеберлык пазяны быгатэ. Ӟучъёслэн вань «гармония» кылзы. Ӵапак со тӥни туж тупа та кышномуртлы.
Быдэсмымтэ малпан
Валентиналэн Студитских фамилиез - песятаезлэсь. Сюмси ёросысь Булма гуртын Студитскихъёс ӧжыт ӧвӧл. Далайгес ни военнойёс сюрес вылысен татчы кельтӥллям поляк выжыысь висьыны усем воргоронзэс. Улӟыса со кышнояськем удмурт нылмуртэн.
- Мон чылкак удмурт! - лыдъя Валентина Васильевна. - Тусы-буйы но тани быдэсак песянаелэн кадь.
Школаын со туж шыпыт, кылзӥськись нылаш вал, отличница. Туж яратылӥз физкультураез, тужгес но - гимнастикаез. Одӥгез дышетӥсьсы городысь вал, соку ик синйылтӥз нылашлэсь быгатонлыксэ. Кӧня ке нылъёсты люкаса, радъяз нимысьтыз кружок. Отын соос позыръяськизы, тэтчазы, эктӥзы. Ӝоген ӵошатсконъёсы но потаны кутскизы. Дышетӥсез туж жаляз Валяез:
- Городын будысалыд ке, тон усто гимнастка луысалыд. Тонэ тренеръёс доразы вожмаськыса басьтысалзы - таӵе арлыдын шори куасалляськыны нокин но уз быгаты ни, - паймылӥз со, быдэ вуэм нылаш шоры учкыса.
Предметъёс нылашлы огкадь лякыт сётскылӥзы кадь, нош кин луэмез потэ, рос-прос ӧз валалля. Вазиськиз Удмурт кун университетысь физикая но математикая факультетэ. Пыриз капчиен. Городын улон Валялы туж кельшиз - дышетсконэз вискын со мыло-кыдо вутскылӥз эктонъя студие, гимнастикая секцие. Висказ ужаз на. Дырыз ваньмызлы окмылӥз. Шутэтскон нуналъёсы уго со нокытчы ӧз дыртылы - Калмез шур дурысь возьёслэсь туж мӧзмылӥз ке но, бертыны нокытчы вал: семьяез улыны кошкиз Ростов улосэ. Соин ик каникулаз но анаеныз адӟиськон понна воксё мукет пала билет басьяз.
Визь Москваозь вуттэ…
Физикаез дышетӥсьёс, огласянь, туж кӧс адямиос кадь: соослэн котьку валэктонзы вань котькуд учырлы, югдурлы, вырослы. Но озьы потэ нырысь-валысь гинэ. Угось асьмелы тодмо та наукалэн туж сюбег палыз гинэ, нош со - дурыстэм. Тодосчиос али но ялан маке эскеро, выльзэ усьто, паймыто… Мыло-кыдо дышетскись нылашез синйылтэ педагогикая но психологияя кафедраысь дышетӥсь П. Горфункель. Тодосчи ӵектэ студенткалы эскеронъёс ортчытъянъя лабораториын ужаны. Озьы Валентина тунсыкъяськыны кутске психологиен, эскере пиналъёслэсь пӧртэм арлыдазы вошъяськемзэс. Университет бере сое татчы ик ужаны кельто. Бӧрысьгес университетысь педагогикая но психология кафедра паськыта, усьтӥське нимаз факультет. Кафедралэн кивалтӥсез Александр Байметов Валентина Студитскихез соку ик уже ӧте. Огдыре Валентина Васильевна ужа Дышетӥсьёслэсь тодон-валанзэс будэтонъя институтын но нылпи садын, эскере 2-7 арес пиналъёслэсь будэмзыя вошъяськись сямзэс. Эскере, кызьы куспазы герӟасько сям но визь. Нуналмысь чакланъёс возьматӥзы: 3 аресозь пинал макем трос бызьылэ-шудэ, сокем ӝоггес азинске визь ласянь. 5 арескын пинал дышетсконэн тросгес тунсыкъяське ни, солэн тросгес тодэмез потэ, таӵе вакытэ шаплы пиналлы шуггес, каньылъёсызлы сярысь. Огкылын вераса, пиналлэн вордскем сямыз азьлань улоназ ялан шӧдӥське. Кинлы ке со юрттэ, кинлы ке люкетэ, соин ик анай-атайёслы, дышетӥсьёслы туж сак луоно. Пиналэз валан, солы тупась ӧрез возьматон - улонын туж бадӟым удалтон. Бӧрысь со бордысь пото тросэз азинсконъёс, вормонъёс. Эскеронъёс тырмыт, табере соосты кызьы ке огазеяно, йылпумъян лэсьтоно, ваньмыз со анай-атайёслы но, воспитательёслы но мед яралоз, токма медаз луы. Александр Кальманович лӧпкытэ дышетскисьсэ диссертация борды басьтӥськыны. Дэмла Москваысь психологияя институтэ, Инна Равич-Щербо доры аспирантурае пырыны. Валентина Васильевна туж шумпотӥз дышетӥсезлэн оскемезлы.
Яратон кулонлэсь кужмо
Визьмо нылмурт шоры синмаськыса учкылӥзы дышетӥсьёсыз, нош егит пиос яке кисыраллязы, яке эшшо маке. Сыӵе чебер дыды огназ уг улы, малпаллязы, дыр. Озьы Валя ӧз но шӧдылы - арлыдыз куамын пала люкаськем ни. Пересьмытозяз озьы ик пукысал, вылды, наукаез йырйыса. Ярам, кафедраысьтызы шаплы кышноос сюлмаськизы - Валентинаез тодматӥзы егит инженерен Александр Колчинэн. Александр Колчин университетысь преподавательёсты паймытъям укыр зол йырсазеныз, лэчыт визьмыныз - ас вакытаз солэсь интеллектсэ нимысьтыз лабораториын эскериллям. Но Валентина синтэм-пельтэм синмаськыны ӧз дырты, чакласькиз. Семьяос, пе, яке яратыса, яке лыдъяса-чотаса кылдо. Валентинаен Александр гожтӥськизы… малпаськыса.
- Ваньмыз умой вал: пиосмы будо, анаймы юрттӥське, кузпалы заводын арысь аре ӝутске, но… одӥг нунал Шурик доре ӧз берытскы. Кыӵе шудтэм учыр луиз со нуналэ заводын, мон али но рос-прос уг тодӥськы, со вакытэ троссэ уг шараяло вал, но мон картме пыраклы ыштӥ… Бӧрдыса жадеме бере малпай: тазьы улыны уг яра! Картэз уд берыкты. Ӝабырски дышетсконэ, кутски диссертациме йылаз-пумаз вуттон борды. Али ке но со понна туж шумпотӥсько. Мон Москваын дышетски - отчы лобыса мынӥсько вал. Нош диссертация утён нуналэз улонысьтым тужгес шудо учырен лыдъясько.
Эктонлэн кылыз вань
- Нош ку тӥ выльысь удмуртомиды?
- Зэм но, гуртысь кошкем бере мон удмурт кылэз йӧскадь ӧй кылылы ни - группаямы удмуртъёс вал, дыр, но ас кылынызы ӧз вераськылэ. Эшъёсы но, картэ но ӟучъёс вал. Озьы пумен мон вунэтыны кутски кинме-марме, городын удмурт кыл сярысь тодам но ӧз лыктылы. Токен шуккем кадь луи Дышетӥсьёслэсь тодон-валанзэс будэтонъя институтэ ужаны лыктэме бере. Александр Кальманович Байметов удмурт сямен вераське вылэм! Бӧрысьгес пушкысьтым выльысь кыре-буре куриськыны ӧдъяз пӧзись мылкыды. Ӵап сыӵе дыръя учыр но тупа ук. Мон пумиськи Андрей Прокопьевен, «Эктон корка» сярысь кӧня ке вераськем бере шуисько: яра-а тӥляд репетициосады ветлыны, туж тунсыко потэ. Пожалуйста, пе. Лыктӥ но ӵап огез эктӥсьсы уг тырмы, выльысяз нош кыӵе ке муг сюриз - монэ вӧзазы пуктӥзы, озьы ик ваньмыныз ӵош тапыртыны кутски. Нош мынам «эктон» кылэз кылэме ик уг луы - пыдъёсы асьсэос кошко. Озьы кыли егитъёс пӧлы. Ой, сыӵе шумпотӥсько, бадӟым тау Андрей Николаевичлы. Улыса-вылыса тодматским университетысь «Чипчирган» ансамбльлэн кивалтӥсеныз Ирина Пчеловодоваен. Огпол со мыным ӝожтӥськиз: ансамбль хореографтэк курадӟе, оло, эскероды асьтэды. Остэ, мон нырысь шуак луи. Огласянь, туж шумпотӥ, мукет ласянь - кисырай: кызьы мон Андрей Николаевич кадьёсын ӵошатском? Но со монэ кызьы ке лӧпкытыны быгатӥз, оскон пыӵатӥз. Озьы дӥсьтонлыкме поттыса, вамыштӥ «Чипчирганэ», калленэн та уже кыстӥськи. Табере кӧня ке арзэ ни студентъёсын эктыса-кырӟаса ветлӥсько, олокытчы но вуылӥм ни. Кылем арын, кылсярысь, ваньзэс паймытӥм Ленинград улосын. Концерт сётъяно луылӥм юнме дыръя но: ву вылтӥ катерен уякумы но, калык кырӟаны куре, дэремъёсмес кутылыса ик учке. «Чипчирганэ» вуэме дырысен мон асме чылк-чылк удмурт кышномуртэн шӧдӥсько.
- Быдэ вуэм пиосты кызьы учкизы арлыдаз вуэм анайзылэн выльысь калыке потаны кутскемез шоры?
- Ой, соос шум гинэ пото. Мон улӟем бере асьсэлэн но удмурт выжызылы тунсыксы кылдӥз, табере, кытын мар вань, лыдӟо, юаллясько. Тужгес но тунсыкъясько калык кырӟанъёсын, крезьгурен. Монэ дорын удмурт дэременым шоголляло, фотосессия радъяло, компьютеразы пырто… Ма, ми эшъёс кадь ик.
- Тӥ психолог, пиостэс будэтонын со юрттӥз, дыр, нош мукетъёслы кызьы асьсэды пиналэнызы возёно, со эш кадь медло шуыса?
- Дышетскем, зэм, куд-ог учыръёсы юрттэ: сыӵе адями югдурез котыр ласянь учкыны быгатэ, тросгес вала, верамезлэсь азьло малпа. Но адями корт ӧвӧл, котьку возиськыны уг луы, куареттэк но уг луы. Пиосы быдэ вуон вакытэ милям но олокыӵе но учыръёсмы вал, но мон валалляй: макем зол алод, сокем зол соос пумитъяськозы. Со физикаысь тужгес огшорыез закон. Янгышамзылэсь но котьку куалектоно ӧвӧл, мед шӧдозы ваньзэ ас вылазы. Бадӟымез пие огвакыт дышетсконлэсь аналскылӥз, ой, кӧня куректӥ! Но бӧрысь ачиз валаз, эшъёссэ сутӥз, институтсэ быдтӥз, Москвае интыяськиз. Али контрактъя кунгож сьӧрын ужа. Таяз но учыре шуыны быгатысал: ой, кытчы кошкиськод, кинлы монэ кельтӥськод… Но солэн аслаз улонэз, мед радъялоз быгатэмезъя. Анайзэ ӧз ке вунэты, тау. Телефон пыр ӵем вераськиськом, ваньмыз умой шуэ ке, сюлэмы буйга.
- Покчиез уката йӧспӧртэм кадь, - возьматӥсько мон кузь йырси пунэтъёсын, пель угыосын пияш шоры.
- Ма со мар ни, азьвыл тусыз эшшо шукресгес вал, но аслыз кельше ке, малы мон куаретом, со монэ уг пыкылы ук. Вылаз ик, Виктор - художник, сыӵе солэн ассэ возьматон амалэз, аслаз шӧдонэз. Таиз пие горд дипломен йылпумъяз искусствоосъя школаез, университетэз. Ужа дизайнер луыса. Пиосы кыкназы крезьгурен тунсыкъясько, сое компьютерен гожъяло, покчиезлэн эшъёсыныз ӵош группаез вань - уй клубъёсын шудо. Адямилэн кыӵе ке тунсыкез вань ке, туж умой.
- Валентина Васильевна, тросэзлэн кышномуртъёслэн семьязы но тыро кадь, ёрмыны но уг ёрмо, но шумпотонэз уг шӧдо. Мар ӵекто та ласянь психологъёс?
- Пуш куараез кылзыса, улоно. Мон но котьку лачмыт ӧвӧл - асме вӧсь карыны, ултӥяны уг сёты, кылме вератэк уг улы. Бен, ӵемысь котырысь адямиосъя кариськоно луэ, но сыӵе дыръя уг яра аслыд пумит мыныны. Дышетсконо астэ пӧятэк улыны. Уг кельшы бордысьтыд адями, ужед синазькыль потэ? Но ведь тонэ со борды нокин но уг думы! Вошты, воштӥськы, яраты!
Источник:
За предоставление материала выражаем огромную благодарность редакции газеты "Удмурт дунне"
