Пчеловодова Ирина Вячеславовна
Котькудӥзлэн аслаз кырӟанэз[править]
Ирина Пчеловодова – филология наукаосъя кандидат. 2004-тӥ арыcен кивалтэ Удмурт кун университетысь «Чипчирган» ансамблен. Та аръёс ӵоже ансамблен концертъёсын вуылӥз ни Перме, Саранске, Кингисеппе но трос мукет городъёсы. Удмурт кырӟанъёсын диск но книга поттӥз. Удмурт кун университет бордысь искусствоосъя но дизайнъя институтын дышетэ крезьгуръя искусстволы. Историяя, кылъя но литературая Удмурт институтын наукая эскеронъёсын выре.
Йыромон
- Ирина Вячеславовна, Алнаш черкогуртын будыса, тӥ ӟучъяськиськоды вал кадь. Ку удмуртлык пала берытскиз йырды?
- Жаляса верано, мон огвакытэ возьдаськисько вал удмурт луэмелэсь. Кин тодэ, вордскем Шор Утчанам ик улысал ке, оло, сокем ӧй но кепырасал. Но Вячеслав Спиридонович атайме черкогуртысь «Большевик» колхозэ валтӥсь агрономе ӧтизы. Анае Татьяна Захаровна ӧз пумитъяськы. Дипломезъя дышетӥсь со. Улонэз быдэсак герӟаськемын нылпиосын. Нырысь школаын, собере детдомын, али 28-тӥ арзэ нылпи садын ужа ни. Тэшкылиосты визьноданъя со нимысьтыз программа но гожтӥз, удмурт нылпи фольклорен герӟаса. Соин ик семьяямы ми ноку удмурт кылэз, удмурт сям-йылолъёсты ӧм вунэтылэ. Но Алнашысь нылпи садэ мон ӟучъяськись пиналъёс пӧлы сюри. Воспитателе но ӟуч. Кӧты ӝожен бӧрдыса улӥсько вал. Садэ мынэме воксё ӧз потылы. Со понна ӟуч кыллы ӝог дыши.
Школаысь классамы удмуртъёс вал ке но, куспамы анай кылмес малы ке ӧм поттылэ. 9-тӥ классэз йылпумъяме бере Ижысь крезьгуръя училищее сюрыса, уката ньылӥ кылме. Алнашысь крезьгуръя школае ветлыкум, кин ке валэктысалыз ке: удмурт гур туж аспӧртэм, сое сюлмыныз шудыны быгатоз удмурт гинэ. Соку, оло, йырсазям маиз ке берыктӥськысалыз. Но тае училищеын но верась ӧз шедьы.
Ма, мон пианиноен огшоры шудӥсь вал. Соин ик, кин но со, оло, воксё ӧз оскы, та удысын тодон-валан басьтонме азинто шуыса. Валамон вал соиз но: Казаньысь крезьгуръя консерваторие уг пыры. Но монэ нодъязы Петрозаводскысь Глазунов нимо консерваторие йыгаськыны. Студентъёс радэ сюри ик. Соку ик шӧдӥ: мон – удмурт, аспӧртэмлыко, удмурт луэменым мукетъёслы тунсыко, таин данъяськоно! Соку гинэ удмуртъёс шоры учконэ воштӥськиз. Соку гинэ асьме кырӟанъёсын, сям-йылолъёсын сюлмысьтым тунсыкъяськыны кутски. Ма, факультетэ но талы юрттӥз: фин-угор калыкъёслэсь крезьгурзэс дышетӥ.
- Петрозаводскысь омырен шокам мурт кызьы берытскиз на Иже?
- Туж секыт вакыт вал со мон понна. Кытын азьланяз улоно но ужано? Та юан уйвӧтъёсам но маза ӧз сётылы. Вань эшъёсы Петрозаводске кылё. Куд-огез татын ик семья кылдытӥз ни. Нош мыным та ласянь ӧз удалты. Собере, кызьы анай-атаелэсь, бӧлякъёсылэсь сокемын улом? Мынам сюлэм туж мӧзмись.
Берытски Удмуртие. Воксё буш. Уж утчаса, вамыштӥ Историяя, кылъя но литературая институтэ. Кивалтӥсез Кузьма Иванович Куликов меӵак шуиз: ми доры аспирантурае пырид ке, тонэ кутомы. Остэ, сокема дышетскыса жади. Ку ачим понна улом? Но Кузьма Иванович кулэ кылъёс ӝог шедьтӥз. Сотэк шуг вераны, кытын мон али луысал, мар карысал.
Зэм, фольклористлэн, филология наукаосъя докторлэн Татьяна Григорьевна Владыкиналэн бурд улаз интыос ӧй вал ни. Но монэ озьы ке но кутӥзы. Соку но мон ялан учкылӥ Петрозаводск пала. Кыӵе ке конференция я фестиваль радъяло ке, мон отын ни. Ма, асьсэос но мылкыдме ялан пожаса улӥзы. Консерваториын усьтыны малпало вал нимысьтыз фин-угор кафедра. Отын, пе, ужалозы пӧртэм выжыысь адямиос. Монэ доразы ӧтё вал. Но малпанзэс улонэ пыӵатыны малы ке ӧз быгатэ.
Туж бадӟым тау кареме потэ Татьяна Григорьевналы. Со монэ бурдъяз, аслым осконме будэтӥз. Кандидат ужме гожтыны но туж трос юрттӥз. Сотэк мон сокем трос выльзэ усьтыны ӧй быгатысал, дыр.
- Тӥ дорозь удмурт кырӟан лирика рос-прос эскеремын ӧй вал…
- Мон сое туж зол эскери, ӧй шуысал. Отын ужез туж трос на. Сям-йылолъёсын герӟаськем кырӟанъёс вашкалае ышо ни, гуртъёсын соосты уг гурлало ни. Нош лирика туж зол вӧлмемын на. Ӵапак крезьгур пыр удмуртъёс усьто асьсэлэсь вӧсьсэс. Та бордын ужакум, мон туж трос выльзэ тодӥ. Удмуртлэн туж узыр улонэз, узыр лул-пуш дуннеез. Кырӟанъёссэ книгаен поттыса, сое рос-прос кие кутыса гинэ, ваньзы тае валаны луэ.
Уг вунэтӥськы Дэбес ёросэ экспедициен потамме. Лапег кышномурт кырӟамез бӧрсьы ӝожомыса лулӟиз: ми, пе, дунне пыдсы кылем адямиос. Та кылъёсызлэсь ачим ик синвуаськи.
Бурдъяськон
- Кызьы сюрес лёгиды «Чипчирганэ»?
- Петрозаводскын, 4-тӥ курсэз йылпумъяса, малпаськыны кутски: одӥг ар кылемын визь люканы, астэ кытын ке рос-прос утчано ни. Атае тодматӥз «Чипчирганэн» кивалтӥсь Розита Анкудиноваен. Со мынэсьтым юаз: флейтаен шудӥськод-а? Мар ватонэз – быгатӥсько. Та инструментэн, пе, шудод «Чипчирганын». Со сяна, кырӟанъёсын кассета сётӥз, татысь кырӟанъёсты, пе, бумага вылэ гожъяно. Со малпа вал «Чипчирганлэн» репертуарысьтыз кырӟанъёсын нимысьтыз книга поттыны.
5-тӥ курсэз йылпумъяй но, улон воксё воштӥськем. Розита Андриановна шуэ: «Чипчирган» ӧвӧл ни. Бакоми. Кызьы озьы? 1975-тӥ арысен улӥз но, табере ӧвӧл ни? Кивалтӥсьсы туж зол висьыны усемен, коллектив куашкан калэ вуэм. Сюлэмы чепыльскыса ик юай: мар мон карыны быгатӥсько? Розита Андриановна та юанэлы валэктон соку ик ӧз сёты. Нырысь со монэ ансамблен тодматӥз, репетициосы ӧтчаз. Собере гинэ шуиз: мон тонэ ас интыям кельтӥсько. Мон воксё но талы дась ӧй вал. Но со буйгатӥз: эн курда, мон тыныд юртто. Кырӟанъёсты бырйыны валэктӥз, нырысь репетициосы ветлӥз, кызьы но мар карыны нодъяз.
- Капчи-а, секыт-а кивалтыны?
- Кудласянь учкод. Нырысь араз мар бордысен кутскыны ик уг валаськы вал. Розита Анкудинова оген-оген студентъёсты бича вылэм. Коридорысен кутэ но косэ, пе: туннэ репетицие лыкты. Мынам студентъёсты озьы уйылыны дыры но, дӥсьтонэ но ӧз тырмылы. Но 10 кузя люкаськылӥмы ик. Котьма ке но куалекъянэ ӧз ортчылы: нёжто мыным оскем ужез азьланьтыны уг вормы?
Ас азям бадӟым ужпум пуктӥ: удмурт культураез но сям-йылолъёсты егитъёс пӧлын улӟытоно, соин тунсыкъяськонэз ӝутоно. Соин ик студентъёсын гуртъёсы экспедициен потаськомы кылылымтэ удмурт кырӟанъёс шедьтон вылысь. Собере соосты ик кырӟаськомы, калыке вӧлмытӥськомы. Шумпотӥсько: быгатӥмы «Весяк крезь» но «Чипчирган» дискъёс поттыны.
Нырысь-валысь костюмъёсмы палэнысен туж тумошо адскизы. Кинлэн вашкала, кинлэн туала дӥсь вылаз золтэмын. Но та шоры синэз кыньылӥ. Ки улын номыр ӧвӧл дыръя та но туж умой ни. Туннэ милям асьмелэн дӥськутмы ни. Сое вурыны уксё висъязы УдГУ-лэн ректорез но удмурт филология факультет. Туннэ «Чипчирганлэн» шорсюлмыз возиське 15 адями бордын. Огзы но кырњаны-эктыны юромо дышетскемын ӧвӧл. Но таослы мон котьку оскисько. Куазь но, мылкыдзы шоры но учкытэк, репетицие лыктозы, концертэн потозы. Бадӟым семья кадь. Со сяна, ваньмон дыръязы концертъёсын потаны бордамы лякиське эшшо 20 мурт.
Ушъяськыны быгатӥсько соин но. Туала «Чипчирганлэн» аслаз хореографез вань – Валентина Студитских, Андрей Прокопьев этнохореологлэн «Эктон корка» студияз ветлэмын со. Мон кырӟаны дышетӥсько, нош со – тапыртыны. Та сярысь ас вакытаз уйбыртыса улӥз Розита Анкудинова. Соиныз но, таиныз но огназ выриз уго.
Али егитъёс удмуртлык пала ымнырынызы берытскизы ни. Соин ик капчи соосын ужаны. Азьло, сцена вылэ потыкумы, залын пукисьёс милемыз серем но карылӥзы, шара вераськыса но пукылӥзы. Али валаса учко, кылзо.
Милемыз котькуд гуртын шумпотыса пумитало. Студентъёс асьсэос но талы лӧпто. Али вожмасько Киясае но Балезиное потаны. Егитъёс асьсэос но воштӥсько, удмуртлык борды кыстӥськыны кутско, Удмуртилэн палэназ, кунгож сьӧры потаса. Отын соос шоры учко: ух-ты, кыӵе тӥ чебересь, кыӵе шулдыр кырӟаськоды, кыӵе мусо эктӥськоды! Удмуртиын талы дышемынгес ни ук. Нош палэнын паймо на. Соин сэрен ик студентъёс бурдъяськыса берто, асэнызы золгес данъяськыны кутско. Талы ачим но туж шумпотӥсько: эшшо кӧня ке удмуртлэсь сюлэмзэ вырӟытыны быгатӥ ук. Озьыен, «Чипчирган» возиськоз.
Ас вакытаз «Чипчирганлэн» школаез пыр потӥзы Удмуртиысь дано артистка Н. Уткина, кылбурчи-бард В. Котков, «Айкай» ансамбльлэн кивалтӥсез П. Данилов, журналист Н. Степанова. Туала студентъёс но вормонъёсынызы паймытозы, дыр, ай.
Секыт тани мар ласянь. Милям татчыозь ӧвӧл репетициос ортчытъяны кабинетмы. Дӥсьмы одӥг интыын, мугормы мукет азьын, шуэм сямен. УдГУ-ын аудиториослэсь буш дырзэс шедьтыны туж шуг. Но оскисько: югдур воштӥськоз.
Узьыгумычи
- Туннэ тӥ огнады. Огпол зол сутскиды но табере кинэ ке яратыны уд дӥсьтӥське ни? Яке шуддэс ӧд пумиталэ на?
- Куд-ог адямиос воксё чигисько: ой, яратӥсько. Мынам улонам сокем бадӟым но ӟырдыт яратонэ ӧй вал на. Озьыен, ӧз на сюры сыӵе адями, кинлы оскыны луэ. Туала пиос пӧлысь йырам кылдытэм идеалэз шедьтыны шуг. Соос вань ке но, кинэн ке быръемын-капыртэмын ни. Нош мон атае кадь воргоронэз утчасько. Со котьку вань секыт ужъёсты ас вылаз басьтэ. Анае но шуэ: сюлэмшугме картэлы верасько ке, соку ик ужпумез сэрттэ-пертче. Ма, мон тусбуйын пӧртэмгес ик, лэся. Петрозаводскын дыръям котырам гожеръясь пиос уно вал. Отын яратонме но пумитай вал. Но малы ке семья ӧз кылды. Удмуртиын шорам учкисьёс ӧжытгес. Ма, Ижын аслым но пиосын йырин ӧй вал, лэся. Уж пӧлы быдэсак выемын уго. Но мылкыды туннэ воксё куашкамын ӧвӧл. Малпасько: мынам ваньмыз азьпалан на.
- Куд-ог нылъёс шудзэс возьмаса пуко. Мукетъёсыз синмасько ке, асьсэос нырысь вамыш лэсьтыны дӥсьто. Тӥ кудъёсыз пӧлы асьтэдыз пыртӥськоды?
- Туала арын кышномурт улонэз ас кияз кутэ ни, пиосмуртлэсь гызмыльтэмзэ возьматэк. Таин нокинэ уд паймыты. Соин ик адӟи ке, мон кинлы ке кельшисько шуыса, ачим солы синмаськемын луи ке, нырысь вамыш лэсьтыны уг кышка.
- Нош ик уж пӧлы выйыса уд кыле-а? Оло, йырады бергало ни доктор уж борды басьтӥськон малпанъёс?
- Со сярысь воксё уг малпаськы на. Быгатӥ ке, куке лэсьто ай. Мар Инмар вералоз ни.Кышкасько та дуннеын асме ыштыны. Малпасько: туннэ мон асме шедьтӥ ни. Ыштӥ, сураськи ке, студентъёсты сьӧрам валтыны уг пӧрмыты, вылды. Нош туннэ соос мыным оско, мон бордысь кужым басьто, бурдъясько.
- Лякыт сюлэмо мурт студентъёсын но небыт, дыр?
- Студентъёслы мон эш. Тон соослы матынгес луиськод ке, соос но тон азьын усьтӥсько. Мыным аслым но озьы капчигес. «Кык» пуктылэме ӧвӧл. Та отметка воксё уг возьматы адямилэсь нодлыктэм луэмзэ.
- Мар кариськоды ваньмон дыръяды?
- Ваньмон дыры мынам вань меда? Ӝыт репетициосы ветлӥсько. Чильпаськыны яратӥсько. Но али чиньыосы отчыозь но уг вуо. Кузь шутэтскон дыръя одно ик тыршисько бертыны Алнашам. Отчы шер вуылӥсько бере, бадӟым шудэн лыдъясько Алнаш омырен шоканэз. Соку ик бакчае потӥсько – музъемын вырыны кельше. Отысь кужым басьтӥсько, секыт мылкыдме пушказ кельтӥсько кадь. Нюлэскытӥ юмшасько. 20-тӥ дауре гожъяськем писательёсты лыдӟыны яратӥсько: Милан Кундера, Франсуаза Саган. Соослэн произведениоссы сюлэмылы матын луо. Кельшо крезьгурен герӟаськем произведениос.
Театре ветлыны яратӥсько, улэп крезьгурлэсь чузъяськемзэ утчаса. Отысь лӧптэм мылкыдын бертӥськод: мон но тани пианино сьӧры пуксё. Но со сьӧры уггес пуксьылӥськы. Котькудӥзлэн аслаз кырӟанэз, аслаз инструментэз вань, лэся. Мынамез – узьыгумы (тростниковая флейта).
2004-тӥ арын Кез ёросэ потай экспедициен. Отысь шедьтӥ узьыгумыен шудӥсез. Со – Евгений Худяков. Жаляса верано, кулӥз ни. Синмаськи инструментэзлы. Ар ортчыса, дораз дышетскыны ветлӥ, сыӵе инструмент аслым Петрозаводскын лэсьтытӥ. Соин шудыны кутски но валай: та мынам. Сое киям кутӥсько ке, котькыӵе гурез шудыны быгатӥсько. Студентъёсты куддыръя дышетӥсько шудыны. Туж огшоры инструмент. Кызьы уд валаське, шуисько, татчы пельтыны гинэ кулэ, куараез ачиз потэ. Но ваньмызлэсь со уг кылзӥськы.
Удмуртиысь крезь лэсьтӥсь Сергей Кунгуров огпол концертмы бере дорам матэктӥз но шуэ: узьыгумыез лулыныды шӧдыса, шудӥськоды. Кубызэз но (скрипка) киям кутылӥсько. Но со сокем ик матын ӧвӧл. Нош узьыгумы ачим кадь – востэм нылкышно выллем: пичи, куараез но туж зол уг шуккиськы. Озьыен, ӝытъёсы соин, бускельёслы люкетытэк, шудыны луэ.
- Асьтэлы асьтэос кыӵе крезьгурез ӵемгес шудӥськоды?
- Ӵемысь, ачим но валатэк, шудӥсько мӧзмыт гуръёсты. Кырӟан пыр куректонме поттӥсько, лэся. Шулдыр гур пыртӥ сое нокызьы но пушкысь улляны уг луы. Туж кельше Николай Постников композиторлэн Ашальчи Окилэн «Сюрес дурын» чуръёсызъя гожтэм кырӟанэз. Сое кылзыкум, али ке но синкылиосы вияло.
Источник:
За предоставление материала выражаем огромную благодарность редакции газеты "Удмурт дунне"
