Сергеева Галина Александровна

Тодмотэмез трос на

24-тӥ октябре 55 арес тырмиз Национальной библиотекаысь йӧскалык но шаертодон литературая но библиографияя ёзэтысь валтӥсь библиотекарьлы Галина Сергеевалы. Та удысын со 23-тӥ арзэ тырше, умой ужамез Удмуртиысь Правительстволэн, Культурая но Нациосын ужан политикая министерствоослэн Данъян грамотаосынызы пусъемын.

5-тӥ пинал

— Вордскемын Можга ёросысь Атасгуртын, — веранзэ мытэ Галина Сергеева. — Али со пичи кылемын ни, нош ми будон вакытэ бадӟым вал, солэсь азьвыл черкогуртэн лыдъяськылӥз. Уд но оске, вань апай-агайёсы Александрово черкогуртын вордскемын шуыса пусъемын, нош мон, берпуметӥез — 5-тӥез — пинал, вордскемея Атасгуртысь.

Гуртамы 3 классъем школамы вал. Дышетӥсьмы Лидия Петровна Агафонова котьма ужлы дышетӥз, трос тунсыкозэ мадиз. Нош 4-тӥ классысен артысь Пычас станцие дышетскыны ветлӥмы. Озьы ми котькуд нунал, котькыӵе куазен 3 иськем сюресэз пыдын вамышъяллямы. Гурт кузя мынонэз эшшо иськем мында люкаськылӥз на. Гурт пумын улӥсь эшъёсылы сыӵе вожъяськылӥ! Озьы ми нуналлы быдэ мугормес кыдатӥмы. Куд-ог дыръя школае нуналаз 2 пол но ветлылӥ. Урокъёс бырем бере сумкаме кельтыны доре бертылӥсько вал, собере нош ик школае кошкылӥ. Угось котькыӵе ужрадэ мыло-кыдо пыриськылӥ, спортъя ӵошатсконъёсыз но одӥгзэ но ӧй кельтылы, куасэн я пыдын бызьылӥ.

8-тӥ классозь эшъёсы пӧлын тужгес бадӟым мугоро нылаш вал, нош 9-тӥ классэ вуимы но физкультурая урокын мон пумысеныз кыкетӥ султӥ. Со дырысен аслым весь пичи мугоро потӥсько.

Школаын лушкем малпаськылӥ экономической факультет сярысь. Но 10-тӥ классын дышетскыкум, гуртамы концертэн вуылӥз УдГУ-ысь «Чипчирган» ансамбль — филологияя факультетын дышетскисьёс. Сыӵе шулдыр концерт возьматӥзы но сюлэмме бугыртӥзы. Со концерт бере аслым кыл сётӥ: мон но одно ик соос дорын дышетско. Со дырысен экономической факультет сярысь вунэтӥ.

Ижевске мынэмелэсь азьло апай-агайёсылэсь юай, монэ дышетскыны лэзёзы-а шуыса. Угось пичиысен ми атайтэк кылемын, Зоя Александровна анаймы огназ 5 пиналэз будэтӥз. Атаймы кулыку, мон 5-тӥ классын гинэ дышетскисько вал ай. Школазэс йылпумъяса, апай-агайёсы шаплыгес коньдон поттон сярысь малпаськизы. Соин, лэся, апай-агайёсы шуизы, пӧлысьтымы одӥгез ке но мед дышетскоз, быгатэммыя юрттомы, пе.

Мон но соосты возьытэ ӧй уськытъя. Котьку, стипендия басьтыса, дышетски. Озьы ке но уксёлы ёрмон дыръёс но вал. Угось ми вакытэ гуртысь лыктэмъёс пӧлысь туж ӧжытэзлы гинэ общежитиын улыны удалтӥз. Данын вал воргоронъёс но спортсменъёс гинэ, соослы ик общежитие но сётъязы. 2 арзэ эшъёсыным ӵош квартираын улӥ. 2-тӥ курсысен квартира ласянь шуг-секытъёс кылдӥзы, ма карыны паймемысьтым, дышетсконме но куштыны медӥсько ни вал. Ярам коть, дыраз буйгатӥз дышетӥсьмы Серафим Васильевич Соколов. 3-тӥ курсысен, пе, общежитие интыяны тыршомы, чида на кӧня ке. Верам кылзэ быдэстӥз, озьы мыным но общежитиын улыны кылдӥз.

Семьяысь пичиез пинал вал бере, арнялы быдэ, анаелы юрттӥськыны шуыса, гуртэ бертылӥ. Али йырыным малпасько ке, юрттӥськемелэсь тросгес анайлэсь мӧзмем сюлэмме буйгатылӥ, дыр.

Егит мылкыд

— Студент вакыт шулдыр ортчиз. 2-тӥ курс бере диалектологической экспедицие Марий Элысь Карлыганэ вуылӥмы. Милемын кивалтӥз Валентин Кельмакович Кельмаков. Нуназе калык пӧлтӥ юалляськыса ветлӥмы, нош ӝытазеяз клубын концерт возьматъямы. Тужгес юн чабизы 3 кузя кырӟаммылы: Валентин Кельмаков, Владимир Возняков но мон. Кытысь сонямында дӥсьтонлыке тырмем сцена вылэ тубыны, али но паймисько. Озьы экспедициос дыръя пичи гурт сцена вылын быгатонлыкъёсмес волятылӥмы, нош сӥзьылаз Ижысь «Ижмаш» клубын бадӟым концерт сётылӥмы. Карлыганысь ваем «Апи» эктонмес аслаз репертуараз «Италмас» ансамбль кутӥз. Ми солы туж шумпотэмын вал.

Со дырысен табере трос аръёс ортчизы ни. Тросэз ӵош дышетскем эшъёсы нимо-дано дышетӥсьёс, ас удысазы адӟем карымон адямиос луэмын. Кылсярысь, «Вордскем кыл» журналын ужась, покчи классъёслы «Лыдӟон книга» учебниклэн одӥгез авторез Ирина Тимерзянова, Правительстволэн пресс-службаяз ужась Алексей Тимерзянов, «Мынам Удмуртие» телерадиокомпаниысь журналист Юлия Александрова, шаерысьтымы тодмо крезьгурчи Владимир Возняков, Дэбес школаын ужась Эльзя Нуриахметова, Ярысь педколледжын дышетӥсь Альбина Данилова но мукетъёсыз.

Удмурт факультетын дышетскисьёс котьку шулдыръяськыны яратылӥзы. Университетын кыӵе ке ужрад ортче ке, отчы одно ик пыриськылӥзы пичи но бадӟым курсъёсын дышетскисьёс. 1 курслы бадӟымгес вал Слава Сергеев. Одӥг ӝыт бере гуртозям келяз, собере киноосы ветлӥмы.

Тупаны но кулэ, 2-тӥ курсысен июнь толэзе Дэри ёросысь Казмасэ сюанэ ветлӥмы. Гуртысьтымы Роза Чувашова отчы бызиз. Егитъёсын шулдыръяськимы, ваньмы удмурт дэремъёсын вал. Соку эшшо модаын вал удмурт дэрем улын шальтыртӥсь арбериосын юбка нуллыны. Клубе но эктыны потамы. Мон уг но тодӥськы вал, Слава Сергеев ӵапак со гуртысь шуыса. Клубысен мынам эктэмелы со эшшо но золгес синмаськем. Кильтыръяськимы-вераськимы но гуртамы бертӥмы. Мукет нуналэ экзаменмы вал. Отысь капчи мылкыдын потӥсько но, монэ ӧс дорын Слава вите. Со дырысен эшшо 2 ар пумиськылӥмы на.

Ма луысал азьланяз, вераны шуг. УдГУ-эз йылпумъяса, Слава кошкиз вал Ленинградэ аспирантураын дышетскыны. Кема улыны ӧз чида, бертӥз, усьтыр-табыр кышнояськиз но армие кошкиз. 5-тӥ курсэз йылпумъяку, нылмы вордскиз.

Бадӟым храм

— Университетэз йылпумъяй ке но, дышетӥсьын одӥг нунал но ужаны ӧз кылды. УдГУ бере одӥг арзэ пиналэн пуки но нылпи садэ ужаны интыяськи. Татысен ик матысь эшъяськи Можга ёросын вордскем Ольга Ивановаен. Соин туннэ но юн кусып возиськомы. Тэшкылиосын ужаны кельшиз, анай-атайёс но кылзӥськисесь вал. 8 ар садын ужатозям, эшшо одӥг пол декретын пукыса вуттӥ на. Оло, туннэ но нылпиосын ужасал, тазалыке чутыны кутскиз. Мукет интые выжон сярысь малпаськытэк ӧйлась.

1994-тӥ арын вал со. Уж утчан мылкыдме шӧдыса, кузпалы шуиз, Ленин нимо библиотекаын, пе, интызы вань, мыныны косӥз шаерысьтымы культурая министр Геннадий Васильевич Чайников доры. Кузпаллэсь уд кылзӥськы шат.

Ленин нимо библиотекае студент дыръям гинэ пыралляме вал. Мыным со вераны луонтэм чебер потылӥз, ас поннам сое ӵошатылӥ бадӟым храмен. Уж утчаса пырыкум, библиотекаын тодо ни вал, мон культурая министр дорысь лыктӥсько шуыса. Соин ик, дыр, пумитазы монэ шуныт. Директорез Нелли Михайловна Собина ваньмыныз пыр-поч тодматӥз но филологияя но шаертодон литературая ёзэтъёсын, пе, интыос вань, кудзэ быръёд? Чик малпаськытэк, удмуртаз шуи.

Библиотекаын ужась луон понна тодон-валанэ ӧжыт вал. Ки улам шедем книгаосыз ваньзэ лыдӟыны тыршылӥ. Бадӟым ик вылэм книга дунне, мон понна туннэ но трос тодмотэмез на.

Библиотекаысь шаертодонъя ёзэт 1969-тӥ арын кылдэмын, нош 1984-тӥ арын ужаны кутскиз «Удмурт шаер» клуб. Сое кылдытӥз Мария Михайловна Самсонова, мытэм ужзэ туннэ но мыло-кыдо азинтӥськомы. Озьы толэзьлы быдэ кыӵе ке ужрад ортчытӥськомы. Выль книгаен тодматӥськомы, шаерысьтымы тодмо адямиослэсь (гожъяськисьёс, суредаськисьёс, кылбурчиос) юбилей ӝытъёссэс радъяськомы. Котькуд ужрадлы нимысьтыз адӟытон дасяськомы на.

Куд-огез, оло, малпа, библиотекарьлэн ужез мӧзмыт шуыса. Мон озьы ӧй верасал. Милям ёзэтамы трос егитъёс тыршо. Котькуд нуналмес тунсыко радъяны выриськомы. Берло дыре улонлэн куронъёсыз воштӥсько. Лыдӟисьёс дорамы пыдынызы лыктыны уг ваньмо бере, соос пумитэ асьмелы мыноно. Интернет вотэс пыр. Со понна электронной каталогмес узырмытыны выриськомы. Туала периодика отчы шеде, отысь ик шедьтыны луэ вуж газетъёсты, бадӟым текстъёсты, выль иворъёсты «Воршуд» викисайтысь лыдӟыны луэ. Ӵемгес отчы пырало студентъёс, дышетӥсьёс, пӧлазы вань кунгож сьӧрын улӥсьёс но.

Пиналъёс сярысь но ум вунэтӥське. Кылем арын Ижысь 4-тӥ-7-тӥ классъёсын дышетскисьёс пӧлын «Дышетӥськомы Удмурт шаермес» интерактивной путешествие радъяны кутскимы. Ужрадмы февральысен май толэзёзь кыстӥське, толэзьлы быдэ выль тема малпаськомы. Нылпиослы тунсыкогес мед луоз шуыса, нырысетӥ араз ужрадъёсмес библиотекаосын ортчытъямы, нош туэ — музейёсын. Трос жетон люкам классъёс вормисе потӥзы. Паймытӥзы 256-тӥ школаысь ляб адӟись нылпиос: соос шаермес котькинлэсь ӟеч тодо вылэм.

Шаертодон литературая ёзын ужаса, быдэсак удмурт луиськиз ни кадь. Ужын, семьяын удмурт сямен вераськыса, куд-ог дыръя ӟучъёсын но анай кылыным лабыртыны кутскисько. Нош пичи дыръямы ми эшъёсынымы гинэ но ӟуч вераськиськомы вал. Апай-агайёсы одӥгзы но удмуртэз дышетэмын ӧвӧл. Нош милям ӝыны классмы удмурт кылъя урокъёсын пукиз, нош ӝыныез со вакытэ урамын шудӥз. Туж вожъяськыса учкылӥмы со эшъёсмы шоры.

Шӧдске, со урокъёсын пукеме юнме ӧз луы. Улонын асме шедьтыны удмурт луэме юрттӥз. Кемалась ик ӧвӧл монэ мукет отделэн кивалтӥсе пуктӥзы вал. 3 нунал ужаны чидай но берен аслам интыям куриськи.

Пӧртэмесь но огкадесь

— Кӧня асме тодӥсько, ялан востэм, возьдаськись нылаш вал. Куд-ог дыръя ачим ик паймисько, кызьы мон Сергеевлы бызиськем. Одӥгзэ вераны быгатӥсько, мон тодматски но семья кылдытӥ Слава Сергеевен, нош Ар-Сергилы ӧй бызьысал, дыр. Со шаплы — мон каллен. Соку гинэ гожъяськыны кутскыкуз, мон но юрттӥськылӥ, удмуртысь ӟуче подстрочникъёс лэсьтылэме но вань. Нимо-дано луоз шуыса, ӧй малпаськылы. Табере тани 33-тӥ арзэ ӵош улӥськомы. Уг ватӥськы, семья куспын котькыӵе дыръёсмы вал. Славаен туж пӧртэмесь ке но, огкадез но вань. Ми соин кыкнамы но Тигръёс. Одӥг коркан, пе, кык сьӧсь пӧйшуръёс улыны уг чидало. Но ми вератэк ог-огмес валаськомы кадь.

Кык нылъёсмы будо, соос мон выжые мынэмын кадь. Кыкназы ик Удмурт кун университетэз йылпумъязы. Бадӟымез та вие пиналын пуке, кыкетӥез Ижысь Октябрь ёрос администрациын ужа.

Кылем арын музъем басьтӥмы. Табере, ваньмон дыр шеде ке, бакчаямы дыртӥськомы. Та вакытлы мунчомы вань ни, кылиз на юрт пуктыны.

Сергеева, Г. А. Тодмотэмез трос на [Текст] : [беседа] / Галина Сергеева ; записала Валентина Емельянова // Удмурт дунне. - 2017. - 26 окт. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"