Сергеев Вячеслав Витальевич

From Воршуд
Jump to navigationJump to search

Кагазэз лулыныз улӟытӥсь[edit]

Сергеев В.В.

Вячеслав Ар-Серги - шаерысьтымы валтӥсь писательёс пӧлысь огез. Солэн гожъямъёсыз - веросъёсыз, кылбуръёсыз, пьесаосыз - пыртэмын ини удмурт литературая дышетон программае. Писательлэн гожъямъёсызъя курсовой но диплом ужъёс дасяло.

Писательлэсь дано нимъёссэ но премиоссэ лыдъяса, дырмес гинэ быдтом. Вералом огзэ: туэ 20-тӥ октябре Удмурт Республикаысь Президентлэн А. А. Волковлэн Указэзъя Вячеслав Ар-Сергилэн Удмуртиысь литератураын трос аръёс ӵоже сюлмо но пайдаё ужамез пусъемын «Удмурт Элькунысь калык писатель» дано нимын. Вячеслав Ар-Серги шаерысьтымы дас кыкетӥез «калык писатель» луиз.

УдГУ-ысь удмурт филологияя факультетысь дышетӥсьёс но студентъёс Вячеслав Ар-Сергиез берло дыре шаерысьтымы тужгес тодмо но лыдӟымон удмурт авторен лыдъяло.

- Асьтэос со сярысь мар малпаськоды, Вячеслав Витальевич?

- Уг валаськы мар шуыны ик. Дышетски, ужай, гожъяськи. Дыр ортче. Нокинэ визьманы ӧй выры кадь, угось аслым но куддыр кеньыр пунэмано луылэ. Нош тодмо луэме сярысь ке… Мыным кулэ дыръяз малы ке уг тодмало, кулэ ке ӧвӧл – тодмало. Ужалляй пӧртэм интыосын, газетын но. Трос адямиосын пумиськылоно луылӥз.

- Удмурт Республикалэн энциклопедияз 634-тӥ бамын тӥляд фамилиды вань…

- Ваньмыз отын шонер, улон но ужан сюресысьтым ньыльмосэз сяна пыремын ӧвӧл ке но. Вордски мон Дэри ёросысь Выль Каӟмас гуртын 42 ар талэсь азьло. Будон дыры ортчиз анай вурем сатин шароварен, толзэ – пыдам гындалиен. Туж яратӥсько вал дышетскыны но алякъяськыны. Кӧня пол монэ анае «кызьпу ӝукен» сюдылӥз, агайёс но бере ӧз кыле. Атайлэсь гинэ курдано луылӥз. Со вие куасэн-салазкиен нискыланы укыр яратылӥм. Эсьма, куддыр сомында лымы усе вал – корка муръёос гинэ адскылӥзы. Али сыӵе букосъёс уг луо ни. Бордам маке умоез но уродэз вань ке, анае Афанасья Фёдоровна бордысь (Дыды апай, Дыды кума, Дыды ӵужодӥг шуо вал). Эх, кыӵе со чебер кырӟалляз удмурт кырӟанъёсты. Атайме Виталий Степановичез электрик луэмысьтыз Ток Витя шуылӥзы. Арганэн со кадь ӟеч шудӥсез кылэме али но ӧвӧл. Берытскысал на-а мон быдэ вуэм интыосам? Ӧй, дыр. Одӥг шуре кык пол уг пыро, шуо ук. Мон но дыр ортчемъя, йырсие югыт луэмъя кабзэ мукет адями луи ини, гуртоосы но, уртче будэм эшъёсы но, гольык пыдын бызьылэм ульчаосы но кемалась воштӥськизы ни. Гуртам но музон адямиос табере улыны выжыяськемын.

- Гожъяськыны кызьы кутскиды?

- Николай Гоголез лыдӟыны кутски гинэ но, солэсь веросъёссэ шимес пӧртмаса эшъёсылы мадьылӥ. Соослы туж кельшиз. Озьы мон сюрес лёги гурт библиотекае. Со мыным черк кадь чылкыт но чебер потылӥз со вие. Ӝоген огез «шимес» веросэ понна тау карись кылзӥсе монэ дунтэк киное но пыртӥз. Билет ведь дуно вал – 5 коньы! Кытысь ай сое шедьтод! А татын – мелэ! Умой ай та! – малпай мон. Со дырысен ик мон вань сюлмысьтым яратӥ киноез. Со ведь милям улоно дуннемылэсь сыӵе пӧртэм вал! Жалясько, нокин но со вие ӧз индылы киноын ужаны луэ шуыса. Атаез ялан ёртылӥ: кызьы-мар кино пӧрме. Сое, пие, визьмо адямиос, писательёс гожто, валэктӥз со. Тӥни соку вӧзам кылдӥз Писатель. Со вал 14-15 арес вакытам. Отчыозь мон пичиен-пичиен отын-татын печатласькисько вал, яратылӥ сочинение гожъяны. Соку ик мон юн-юн малпай писатель луыны. Со дырысен уно книгаос поттылӥ. Но али «Тишина на площадке! Мотор!» командаен мыным вазиськысалзы ке, ваньзэ вунэтыса, отчы бызьысал. Кино мон понна – со туж вылӥ маке.

- Со мылкыдды ик кылдытӥз, луоз, кино? Тӥляд сценарийдыя удмурт калык кылос вылын 1992-тӥ арын режиссёр Аркадий Черниенко «Алангасарлэн вужерез» кинофильм пуктӥз. Со луиз нырысетӥез чеберлыко удмурт фильм. Асьтэос но видеофильмъёслы сценарист но режиссёр луылӥды. Удмурт театрлэн сцена вылаз кӧня ке пьесадэс Василий Ушаков пуктӥз…

- Кинофильм сярысь ке. Мар мон шуо, кулэезъя дунъясь сое ӧз луы. Ваньмыз ортчиз «яра – уг яра» мертэтъёс вылын гинэ. Оло, асьме учкись дась ӧй вал собыдӟа макеез «ньылыны?» Куддыр сыӵе юан но кылдылэ. А ведь фильм сярысь вераськонэз туж ӟеч ӧръяны луысал, со кыӵе ке но мырӟет луысал асьме профессиональной искусствомылы азьлань вамыштыны. Со фильм учкисьёсмылэн чиньы пыртӥзы вияз кадь. Со бӧрсы мон эшшо кык кинофильмлы сценарий гожтӥ на. Таосыз ӝӧкам ик «бабизы». Оло, куке сайкалозы но. Ӧйтӧд. Но берло дыре мон доры нош ик вуылӥзы кӧня ке оскытӥсь муртъёс кино пуктон ласянь. Адӟом ини мар луоз. Кино – со туж но туж дуно маке. Мон уг лыдъяськы «Алангасарлэн вужерез» фильмез шедеврен. Инмар мед утёз со янгышлэсь… Но та фильмын вань туж ӟеч интыосыз, кудъёссэ ӟеч учкыса, азинтыны но луысал. Та фильм «эктонлэн» нырысетӥ вамышез. Жаль, мукетъёсыз ӧз луэ ни. Фильмез ялан чакласа улӥз ачиз Ролан Быков. Мон понна со – быдӟым усточи. Ролан Быков дуннеысь кинематографиын «ӟеч эктӥсь» вал. Таиныз ваньмыз соглаш луозы. Аркадий Черниенко лыдъяське Ролан Быковлэн дышетскисеныз. Сыӵе дышетӥсен данъяськоно луэ. Шуд усьылӥз улонам трос тодмо актёръёсын но тодматскылыны, вераськылыны. Уката ик Москваын. Но ӧз кылды, лэся, мыным улонам аслэсьтым режиссёрме пумитаны. Яке пумитай ини, но валаны ӧй вуы на. Мынам вань кӧня ке радиоспектакльёсы, инсценировкаосы. Профессиональной сцена вылын мынам ньыль пьесае пуктэмын, огез соос пӧлысь «Ёк-макарёк» моноспектакль. Эх, кыӵе эркын но мыло-кыдо ужаськиз Россиысь дано артистэн Александр Перевозчиковен. Актёр туж тросэзлы мыным синме усьтӥз. Туж ӝикытак гинэ, кулэ интыяз кулэ кыл вераса.

Сцена инме ӝутыны кулэ кык бурдъёс вылын – актёрлэн но авторлэн. Нош огазеяны кулэ соосты режиссёр. Таиз асьмелэн уггес пӧрмы. Шуо, театр, пе, кутске вешалкаысен. Янгыш со. Театр кутске текст, автор бордысен. Жаль, тае ноку но ӧз вала асьме театрмы. Котькуд театр драматургез ӟеч емышез сямен будэтыны кулэ. Данъяны но дунъяны сое.

- Нош мар малпаськоды туала литературамы сярысь?

- А кытчы со пыроз? Улоз но, векалоз но. Гожъясь муртъёс ноку но уз быре. Асьме удмурт авторъёсмы калык педагогикая йӧнтэм дышетэмын, весяклы суралтэмын «йӧскадь луыны». Калыкъёслэсь висъяськонтэм. Та малпан ик тул кадь пыре авторъёслэн лулъёсазы, со ӵоге эркы куриськись кырӟанзэс. Нёжто автор быдэсак йӧскадь луыны кулэ. Вань адямиос кадь луон солы со бырон. Инкуазьмы гинэ пушкамы пумитъяське, озьы ик улӥськом ини асэнымы нюръяськыса.

Котькуд автор номырин ӵошатонтэм луыны кулэ ас кылдэмезъя, будэмезъя, солэн котькуд произведениез кыӵе ке но ченгешон котырын берганы кулэ. Озьы мон малпасько самой бадӟымез шугъяськонмы сярысь. Нош литературамы Инмарен ӵошен кема улоз на. Калыкмы но. Сое 4-5 даур ӵоже быроз ини шуыса кышкатъяло. Нош со улэ али! Ӵуказе но улоз. Удмурт калык – туж-туж кужмо калык. Тани-тани усёз ни кадь (мукетыз усьысал ни), нош удмуртэд лать-лать вамышъя каньылля. Кужмыз солэн син адӟонтэм мурдалаосы ватэмын, дыр. Вылтӥ-вылтӥ гинэ учкисьёслы ноку но быдэсэн уз адскы.

- Кунэресгес луэ мылкыд тӥледыз кылзыса…

- Кылзэ сакгес… Та кылъёс сётыны кулэ огшоры ӟеч мылкыд. «Асьмелэсь но начаръёсыз вань» – шуылоз вал бабуше. Пилемъёс сьӧртӥ асьмеос лобаса ум ветлэ. Асьмелы кык ана-удыс сётэм Кылдытӥсьмы – уж но музъем. Ичи-а? Вылаз ик, ужмес но, музъеммес но герӟало ошмес кадь жильыртӥсь кырӟанъёсмы. Зарни кырӟанъёсмы… Таиз но урод ӧвӧл кадь.

- Шуом, шуак вань удмуртъёс одӥг городэ каръяськозы, отын ваньзы ог-огзэс тодозы, гажалозы…

- Утопия. Удмурт гурт сое али но возьматэ ни. Тымиськем вир чырсаны кутске, нош ку вылын яраос ке трос мугор быре. Со ведь аксиома. Одӥг городын улӥсь иськавынъёс соку ик ог-огзэс зыръёсын кокалозы. Али улонэз учкыса верасько озьы.

Удмурт сяме, вире пыӵамын ини таӵе гож – солы ялан кин ке куинетӥ мурт азьын астэ кыӵе ке но пӧртэмгес кароно. Кузёзы азьын ляльчиос сямен. Уно дауръёс сое кыӵе ке артист нергелы пӧрмытӥзы ни. Лыдӟе колониальной писательёсты: Африкаысь, Индиысь, Латин Америкаысь. Тӥ сое ӟеч шӧдоды – со кин ке куиньметӥ адями азьын кык огвироослэсь чеберъяськыны выремзэс. Со мылкыд вире пыӵа. Мар кароно? Ужатоно вылэм со мылкыдэз ӟеч пала. Но ку со луоз…

Мон кемалась валай ни кадь – уг яра Дуннеын ушъямонзэ но курламонзэ гинэ утчаны. Гожъясь мурт тыршыны кулэ Дуннеез адӟыны сыӵеен, кыӵе со вань, собере ини со тодэмзэ ас лулыныз улӟытыны.

- Малы асьмелэн сыӵе романъёсмы ӧвӧл? Оло, соку ӟечгес валасалмы асьмедыз?

- Асьмеос «йӧскадесь» ук… Нош кылбуръёсмы? Оске мыным, асьме поэтъёс номырин но бере уг кылё Дуннеысь музон поэтъёслэсь. Тросэзлэсь. Асьмелэн вань жальыр пӧзись фольклор ошмесмы. Омыръяно но омыръяно отысь. Яке ведра калмы чиге, яке кус секыт луэ. Яке кынармы-а уг тырмы.

- Вячеслав Витальевич, тӥ прозаик сямен тодмогес кадь, но Ар-Серги аслаз кылбуръёсыныз туж данъяське, шуо…

- Мон ноку но ӧй люкылы гожъямме жанръёсъя. Мыным вань произведениосы, аслам вордэмъёсы, дуноесь пото. Зэм, куд-огез оло конгылёгес но, дыго-могогес ке но.

Мон малпасько, литератураез жанръёсъя люке ачиз лыдӟись гинэ. Кылбур формаен гожтэмез со адӟе ке, возьма мылкыд лопырскемез, юн проза тусын ке – кыӵе ке ивор. Малпан йыре лыктэ ке, со ачиз ини вера, кыӵе дӥськут солы дӥсяно. Мон кылдытӥсько произведенилэсь лул-мугорзэ, нош вылтуссэ со ачиз радъяны косэ. Та учырын ательеысь дӥсь вурисьлы укшасько. Уг луы пӧртэм идеяосты униформае – одӥг пусъем но инъям жанре туйнаны. Нош кылбур ласянь ке… Силлабо-тоника асьме странае пыӵаз Европаысь, зэмос кылбуретмы асьмелэн «эктэ» пуш рифмаос но верлибръёс котырын. Озьы ик гожъяны но мон вырисько. Кылбурын нырысь интые котьку малпанэз пуктӥсько, собере ини нош ик – малпан ассэ ачиз кабе кисьтэ. Куддыр толэзьскын луэ быдэс книга тыр кылбур гожтыны, нош куддыр одӥг чур но арен-арен уг лыкты. Соин ик кылбур чур котьку но витем куно. Марлы ке но туала лыдӟись кылбурез сокем ик санэ уг ке но поны, нырысь ик сое адӟе.

- Тӥ патриот-а?

- Вакыт сыӵе луиз ини, кин ассэ патриот шуыса гадяз мыжгаса ветлэ, со ик ваньзэ асэстэ но. Мон ноку но нокинлэсь номырзэ ӧй талалля… Ачим сярысь ке… Мон яратӥсько ас семьяме, огшоры панельлэсь ӝутэм коркаме, синмаськисько удмурт кыллы. Шаерысьтым ӵемысь поталлясько палэнэ, бертыкум нош, тамаша кадь, сюлэм гадьысь потымон ик тэтчаса йыгаське, ява. Шуо ук, кин ӧй вал палэнын, кызьы со вордскем палъёссэ яратоз… Нош мон азьвыл странаетӥмы уно ветлӥ, кунгож сьӧртӥ но. Визиткаям котьку гожъяй кык кыл гинэ – «удмурт писатель». Ачид кыӵе - сыӵе пумиталозы. Табере эшъёсы но чарак. Пӧртэм интыосын, Москваын но, кунгож сьӧрын но. Соос ваньзы тодо, кин мон. Соин ик тунсыко но, дыр, потӥсько соослы. Адямиез ужъя но лулъя учко ук.

- Тӥ уно ужаськоды кылысь кылэ берыктон удысын но. Мар со сётэ тӥлед?

- Аслыд ачид оскон. Иське, пӧй, быръем сюресэд тынад но сокем янгыш ӧвӧл. Мишши Юхма, мадьяръёс, Шолом-Алейхем, Александр Островский, Александр Варфоломеев, Низами Гянджеви но трос мукетъёсыз пыризы табере ини асьме удмурт азбаре но удмурт сямен вераськыны ӧдъязы. Сыӵе куноосты мон ваи дорамы. Шуо: «Кытын гинэ скалмы медаз юмша, кунянэз милям луоз». Али выль чуръёсы ӝегало ке, соку ик выжисько берыктон уже. Пуктэм вамышез дыго-мого карем уг пот вылэм.

- Кыӵе асьме писательёсты тӥ юнгес гажаськоды?

- Ваньзэсты. Кужмооссэ шӧтасько сутыны, лябъёсызлэсь пегӟыны. Писательёс – умой калык. Нылпиос кадесь.

- Мар лыдӟиськоды ваньмыкуды?

- Ваньмон дыр ичи, нош шеде ке – газет, журнал, словарьёс, энциклопедиос, справочник кадьёс. Нош искусство удысъя ке, алигес туж ӟеч мылкыдын выльысь лыдӟи на Ирвинг Стоунлэсь «Жажда жизни» романзэ. Со сӥземын Ван Гог художниклы. Кыӵе меда тыл сутӥз со куанер горданьлэсь лулзэ суредаськыкуз, эсьма, солы чидатэк огзэ пельзэ но вандоно луиз шуыса? Уйшор уйин но юзыр-кезьыр луыса сайкасько – кыӵе Тыл?

- Вячеслав Витальевич, тодӥсько, тӥ ужаськоды ас кожады, ас дорады. Юнматэм уждунтэк, но улэп адямилэн нуналлы быдэ сиемез но, юэмез но потэ.

- Потэ – аслад но, семьяелэн но. Соин ик коньы сямен бергано луэ. Зэм, мон нокытын штатъя уг ужаськы, эрико адями, но тӧлэз ӵыжаса уг ветлӥськы ук. Мон ужасько удмурт литератураын. Тани алигес Завьяловоын творчествоелы сӥзем ӝытэ ортчиз. Туж юрттӥз администрацилэн йырыз Галина Васильевна Баталова. Бадӟым тау солы. Йылпумъяй та вие милициен герӟаськем книгаме. Табере мар кароно? Уг тодскы. Вань ужъёсы мынам бергало отын ик – гожъяськон удысын. Дышетскемея мон – филолог.

- Тӥ журналын валтӥсь редактор вал ук. Марлы кошкиды?

- Дышетскемме йылэтэме потӥз яке улон-а озьы куриз: Москваысь Литературной институтэ дышетскыны кошки. Али но солы тау карисько. Синъёс паськытазыгес кадь. Конечно, умой луысал, кытын ке, шуныт интыын пукыса, уждун басьтыны, нош ваньмон дыръя книга гожъяны. Но тӥ кытысь ке кылылӥды-адӟылӥды ни-а удмурт калык писателез уже ӧтён сярысь ялонэз? Мон ӧй. Нош кыӵе редактор корреспондентэ басьтоз солэсь ужзэ ӟеч тодӥсь муртэ?

- Вераськонмы Печатьлэн нуналыз азьын тупа. Кыӵе луыны кулэ туала журналист?

- Журналистлэн ужез, ачимъя тодӥсько, капчи ӧвӧл. Котькуд гожъясь мурт озьы гожтыны кулэ, кызьы со дорозь нокин ӧз гожъя на. Огъя вераса, гожъясьлы нуналлы быдэ выльвылэз ӝутоно.

- Кызьы учке семьяды ужды, улон манерды шоры? Мӧзмыт ӧвӧл-а ялан ас вактаз гожъяськыса пукись муртэн?

- Уг быгаты, дыр, вераны. Юаме ӧвӧл. Соослэн но ӝожтӥськемзы ӧвӧл. Дорын семьяе азьын гожъяськыса мон шер пукисько, ӵемгес бызьылоно луэ пӧртэм интыостӥ. Ужасько уйингес. Соку йыр сэзь луэ. Ваньмыз изё, нокин уг люкеты.

- Нош малпанъёс куддыр уг ке быдэсмо? Книга поттыны али туж секыт.

- Улонын ваньмыз луэ. Вылез пьесае но тани, Культурая министерствоенымы кутэм маке, 2-3 арзэ кылле ни режиссёрлэн ӝӧказ. Кисьматэ на, дыр. Алигес жингыртӥ но со шуиз: марым, пе, артистъёсмы шудыны курдало. Курдаськод ке сцена вылын сюлэмдэ усьтыны, соку марлы артистэ дышетсконэз вал? Но мон уг бӧрдӥськы – Инмар ке ӧз кушты, ум быре ай. Улонын югыт ӵукнаос данаклы тросгес.

Литература нянь – курыт, но со – мынам. Со мынам киыным, пӧсям вуэным поттэмын. Ӧпкельыны уг яра. Улонам кыӵе ке шуг-секыт кылдэ ке, ноку но, нокинэ но янгыш уг кариськы адямиосты но, властез но, государствоез но – иське, ачим сыӵе. Урод югдурез тупатон амал утчасько – кин-о, ачим ке ӧй?

Со понна мынам вань оскымон эшъёсы –ӝӧк вылам котьку витё тӧдьы кагаз но книгаосы. Соос монэ ноку уз вузалэ. Гожъяськонэлэн висказ пото, учко почтаез – оло, Венгриысь выль романэ вуиз…

Источник:

Сергеев В. В. Кагазэз лулыныз улӟытӥсь / В. В. Сергеев ; записала Галина Иванова // Удмурт дунне. - 2004. - 16 янв. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"