Ившин Вениамин

Материал из Воршуда
Перейти к навигацииПерейти к поиску

Вениамин Никонорович Ившин – тодмо удмурт поэт, публицист, редактор, кылысь кылэ берыктӥсь, Россиысь писательёслэн огазеяськонзылэн ёзчиез, Удмуртиысь (1994) но Россиысь (1998) лулчеберет удысысь сӥё-дано ужась.

Галина Романова

Улон сюресэз[править]

Ившин Вениамин вордскиз Кез ёросысь Ванялуд гуртын 1947-тӥ арын 30-тӥ коньывуонэ. Гуртсы пичи гинэ вал, ог куамын корка, нош солы бадӟым потылӥз. [1]

Соос анайзылэн ньыль кузя вал. Будӥз Вениамин Ившин крестьян семьяын нокыӵе секыт, сьӧд ужлэсь пыкиськытэк. Тӥр но, кусо но, сюрло но ки улаз бергазы. Но агайёсыз уй но нунал секыт ужын тыршизы, трактористъёс, индылӥзы: «Нош тон дышетскы, дышетскы…». Веня тыршиз... Секыт вакытэ быдэстӥз Мария Алексеевна нылпиоссэ. Озьы ке но, со быгатӥз пиналъёсызлы кырӟась-верась, капчи мылкыдзэ сётыны, укта ик пичиезлы, Веня пиезлы. Пияш юн эшъяське вал инкуазен, соин ик йыраз малпан кылдӥз: нюлэсчи луоно. Отчы дышето вал Йошкар-Олаын. Кыдёкын шуыса, анаез ӧз лэзьы. Озьы дышетскемезъя со педагог луэ, нош сюлмыныз – инкуазез кырӟась, улэпсэ данъясь, куасьмыны кутскемзэ улӟытӥсь. [2]

Школазэ йылпумъяса пыриз дышетскыны Удмурт пединститутысь филологияя факльтетлэн удмурт ёзэтаз, но йылпумъяз сое 1971-тӥ арын. Вениамин Ившинлэн вал бадӟым дышетӥсьёсыз. Ӟуч литератураез со Кез черкогуртысь школаын дышетскыкуз, литобъединение ветлыса, О. Поскрёбышев дорын дышетӥз, удмуртсэ университетын – Д. Яшин дорын, нош кылбурет удысын нырысь вамышъёссэ солэсь чакласа возиз Ф. Васильев. [3]

1971-тӥ арын «Дась лу!» газетэ ужаны ӧтизы. Ньыль толэзь гинэ ужаса вуттӥз но, сое армие басьтӥзы. Кык арзэ Германиын служить кариз. Озьы со вакытэ Вениамин Ившинлы шуд усиз кунгож сьӧры вуылыны.

19791983-тӥ аръёсы со газетын ик литсотрудник, редактор вал.

19721979, 19831986-тӥ аръёсы «Советской Удмуртия» газетын ёзэтэн кивалтӥз, собере валтӥсь редакторлэн воштӥсез вал.

1975-тӥ арын егит писательёслэн Москваын ортчем кенешазы пыриськиз. Егит автор азьын выль инвисъёс усьтӥськизы. [4]

Нош 1986-тӥ арын, партилэн Удмурт обкомезлэн куремезъя, Вениамин Ившин пиналъёслы «Кизили» журнал кылдытон бордын ужаз. [5]

В. Ившин Николай Витрукен

««Дась лу!» газет но «Кизили» журнал сярысь ог кылын гинэ уд вера. Отын мынам вунонтэм чебер егит дыры ортчиз», – тодаз вае Вениамин Никонорович. Та газетын ужакуз Вениамин Ившин трос лэсьтӥз газетэз чебергес, тунсыкогес карон понна. Ужась эшъёсыныз ӵош, Г. Ходыревен, А. Гребинаен, Е. Глебоваен, К. Михайловен но мукетъёсыныз, пиналъёсын уно пумиськылонъёс, ӵошатсконъёс, ёросын пинал корреспондентъёслы слётъёс ортчытъязы, выль ужъёссылы дунъет сётылӥзы, устооссэ газет баме вуттылӥзы. Озьы пиналъёслэсь лыдӟиськыны мылкыдзэс пуромытылӥзы, гожъяськыны быгатонлыкъёссэс ӝутыны юрттылӥзы. Аслаз но Вениамин Никоноровичлэн та газетын ужакуз ик сюлэмаз нырысьсэ кенжиз пиналъёслы кылбур гожъян тылгизьыез. [6]

19901994-тӥ аръёсы туж секыт вакытэ Вениамин Ившин «Кенеш» журналлэн валтӥсь редакторез вал. [5]

1994-тӥ арысен Вениамин Никонорович «Удмуртия» книгапоттониын валтӥсь редактор луыса ужа. [1]

2001-тӥ арын «Удмуртская Республика» энциклопедия кылдытон бордын ужамез понна Вениамин Никонорович Ившинлы Кун премия сётэмын.

Гожъямъёсыз сярысь[править]

Веня сизьыметӥ классын дышетскыкуз, огпол удмурт кылъя но литературая дышетӥсьсы Раиса Степановна Щепина косӥз ас школазы сярысь сочинение гожтыны. Пияш гожтӥз «витьлы», солэн гожтэм сочинениез кылбурлы пӧрмиз. Со бордысен ик луиз поэзия борды «ӝабырсконэз». [2]

Со вакытэ «Кизили» ёрос газет бордын егит кылбурчиослэн но журналистъёслэн кружоксы ужаз. Соин кибашлы ӟуч кылбурчи но дано дышетӥсь Олег Алексеевич Поскрёбышев кивалтӥз. Со дорын дышетскемез кутскись кылбурчи понна зэмос школа луиз: кылэз шӧдон-валан ласянь но, кылтӥрлык ласянь но, лыдӟыны дышетскон ласянь но. Кружоке ветлӥсьёс печатласькизы ёрос газетазы. Собере дышетӥсез ик, куд-ог кылбуръёссэ бырйыса, келяз «Молот» журналэ. Собере сое печатлазы «Советской Удмуртия» газетын. Пумен Вениамин Ившинлэн поэтической куараез юнма, творчествоезлы дунъет сёто Ф. Васильев, Д. Яшин, П. Поздеев, Г. Ходырев, Л. Кутянова. 1976-тӥ арын потӥз «Мар дуно» нырысетӥ кылбурет бичетэз. Азькылаз писатель но редактор Николай Васильев гожтэ: «Умой мылкыд кельто Вениамин Ившинлэн кылбуръёсыз. Соосты лыдӟыса валаськод: поэт кырӟаны тырше ас куараеныз…». Собере печатласькизы «Инбаммы одӥг» (1980), «Выжъёс» (1983), «Котыртӥ-котыртӥ» (1993) но мукетъёсыз ужъёсыз. «Узел голосов» (2001) бичетэз тужгес но умой пӧрмем. Сое ӟуч кылэ Владимир Емельянов берыктӥз. Татын туала адямилэн ӟырдыт мылкыдыз, глобализация вакытэ калык йылолъёсты, кылэз, удмурт этносэз утьыны тыршон шӧдӥське. Книгаысь книгае авторлэн тыршемез, будэмез шӧдӥське. Удмурт поэзиын революция лэсьтыны со уг тыршы. Постмодернизмлэн тулкымъёсаз но, этнофутуризмлэн кожъёсаз но уг шонскылы. Кылбурчи ичи кылтӥрлыкен бадӟым образъёс суреданы тырше. Огшоры инкуазь суред вылын лыдӟисез философия малпанэ вуттыны тырше. [4]

Чеберлыко гожтэм ужлэн кужымез ӵапак со бордын: лыдӟисен валамон, оскымон, визьмо кылын вераськыны быгатоно. Автор шӧдыны мед быгатоз калыклэсь сюлэм висёнъёссэ но, адӟыны мед пӧрмытоз синмысьтыз югырак чилектӥсь шумпотон тылсиоссэ но. [7]

Удмурт Элькунысь гожъяськисьёслэн огазеяськонзылэн кивалтэтэз

Мае адӟид, шуо,

Сьӧрлон сюрес вылын?

Уг котыръя, адӟи

Кыксэ шумпотонэз:


Нырысь ик тодматски

Мукет калыкъёсын.

Кыкетӥез – мон нош

Вуи дорам туннэ.

Вениамин Ившин, улонлэн куашетӥсь ӧраз вамышъяса но, ноку ӧз тыршы ӵашетыса, куаразэ будэтыса вераськыны, солэн поэзиез «чалмыт» шуыны луоз, визыласа ӧръёсын жильыртыса бызе. Мылкыдзэ мултэс пальккатэк, кылбурчи малпаське со сярысь, мар тужгес но дуно сюлэмызлы: улонлэн ӟеч палъёсыз – чылкыт мылкыдъёс, шумпоттӥсь ужъёс. [8]

Куараосты шӧдонэз, жингрес рифмаосын «шудыны» быгатэмез Вениамин Ившинэз нылпиослы матэ каризы, соос понна ужаны мылкыдыз ӝутскиз. Чур бӧрсьы чур, пичильтыкъёслы сӥзем кылбуръёс люкаськизы, куриськизы нимысьтыз книгае. Озьы потӥзы Вениамин Ившинлэн «Шур сьӧрысь бӧдёно» (1990), «Шуланэ дас вить» (1995), «Ворпо гуждор» (1997), «Паймытӥсь дуннеын» (2002) книгаосыз. Со дыре ик кылбурчи пыриськиз кыкетӥ но витетӥ классъёслы лыдӟон книгаос дасянэ. Та ужъёсаз автор чеберлыко литературалэсь валтӥсь тодметсэ пыӵатыны умой быгатэм – образъёс вылын сюлмо, ӟеч луыны дышетон. [4]


…Мыняса Эля сылэ,

Мон но, пе, ужай, юрттӥ:

– Сӧлиськем тэлкыослэсь

Пылызэс, нэнэ, октӥ.

«Нылпи литератураез лыдӟыса гинэ пиналъёслэсь сямъёссэс уд тоды. Та ласянь улон ачиз узыр сандыксэ усьтэ. Мылкыдыд, чакласькыны быгатонлыкед гинэ мед луозы. Школае, нылпи садэ-а вуисько, бускель пиналъёслэсь шудэмзэс-а адӟисько – аслым уно тунсыкозэ синйылтӥсько, ӵапак отысь темаосы, малпанъёсы кылдо», – вера Вениамин Никонорович. [6]

Кылбурлэн кыӵе куара, крезьгур сётэмезъя но вераны луэ автор сярысь. Вениамин Ившинлэн чуръёсыз кырӟанэ курисько. Тросэз кылбуръёсыз кырӟанъёс луизы. Кылсярысь, Г. Корепанов-Камский гинэ ог дас витезлы крезьгур гожтӥз: «Льӧль кырӟан», «Тэтэ», «Ӵӧжпиос» но мукетсэ. [2]

Вениамин Ившин трос ужа кылысь кылэ берыктон уж бордын. Удмурт кылэ берыктӥз ӟуч классикъёслэсь куд-ог произведениоссэс А. Пушкинлэсь, Ю. Лермонтовлэсь, Н. Некрасовлэсь. А. С. Пушкинлэн вордскем дырысеныз 200 ар тырмонэзлы, поэт берыктӥз «Поп сярысь но солэн визьтэм ляльчиез сярысь выжыкыл» произведенизэ. Та ужлы бадӟым дунъет сётӥз С. В. Михалков. Москваысь Правительствоен ялэм ӵошатсконаз «Лучшие переводы русской классики» номинациын та книга кык премия басьтӥз. [8]

Наградаосыз но премиосыз[править]

Удмурт Элькунлэн Кивалтэтэзлэн литература премиезлэн лауреатэз (2023) нылпиослы гожтэм «Асьме палась пойшуръёс» бичетэз понна.

Кузебай Герд нимо йӧскалык премия, 2017.

Эшъяськон орден, 2008.

Удмурт Элькунлэн Кун премиезлэн лауреатэз, 2001.

Удмуртиысь (1994) но Россиысь (1998) лулчеберет удысысь сӥё-дано ужась.

Россиысь писательёслэн огазеяськонзылэн ёзчиез, 1984.

Библиография[править]

Книгаосыз[править]

Ворпо гуждор = Разноцветная лужайка : 2-5 аресъем нылпиослы лыдӟон книга / суредаз В. Г. Мустаев. – Ижевск : Удмуртия, 1997. – 158 с. : ил.

Воршуд музъем = Земля Воршуда : кылбуръёс : на удмурт. яз. – Ижевск : Удмуртия, 1997. – 462 с. : ил., 1 л. портр.

Выжъёс : кылбуръёс. – Ижевск : Удмуртия, 1983. – 55 с.

Инбаммы одӥг : кылбуръёс. – Ижевск : Удмуртия, 1980. – 96 с.

Котыртӥ-котыртӥ : кылбуръёс. – Ижевск : Удмуртия, 1993. – 103 с.

Мадиськонъёс. Буя ачид! / худож. А. М. Андрюшкин. – Ижевск : Удмуртия, 2002. – с. : ил.

Мар дуно. – Ижевск : Удмуртия, 1976. – 64 с.

Паймытӥсь дуннеын : семьяын лыдӟон книга : веросъёс, выжыкылъёс, кылбуръёс. – Ижевск : Удмуртия, 2002. – 223 с. : ил.

Пуньы буясь коньы : веросъёс, кылбуръёс: семьяын лыдӟон книга. – Ижевск : Удмуртия, 2007. – 158 с. : ил.

Узел голосов : стихи / авториз. пер. с удмурт. В. Емельянова. – Ижевск : Удмуртия, 2001. – 230 с., ил.

Шуланэ дас вить : тылобурдо гуръёс / суредаз В. Г. Мустаев. – Ижевск : Удмуртия, 1995. – 16 с. : ил.

Шур сьӧрысь бӧдёно : кылбуръёс. – Ижевск : Удмуртия, 1990. – 48 с. : ил.

Статьяосыз[править]

Азвесь толэзь ; Тушсы беразы ; Эшъёс ; Чурыт нянь ; Шофёр // Инвожо. – 2007. – № 5/6. – С. 112 : фот.

Бусы // Вордскем кыл. – 2009. – № 2. – С. 24–25.

Вить вынъёс ; Усьтӥське но пытсаське ; Пичи дурись ; Синучкон ; Юрттӥсь Мики ; Нодтэм парсьпиос ; Выль ар уйин // Удмурт дунне. – 2009. – 23 дек. – С. 7.

Ву дурын ; Гульчык ; Шорад учкыса ; Тулыс. Ӝыт ; Зоя Алексеевна Богомоловалы. "Тӧдьы но вож но лыз..." // Вордскем кыл. – 2007. – № 11/12. – С. 30–31 : фот.

Вужерзэ уйылӥсь гондыр : выжыкыл / худож. Галина Иванова // Кенеш. – 2013. – № 3. – С. 88-93 : рис.

"...Два моих живых крыла" // Луч. – 2007. – № 11/12. – С. 77–79.

Ӟичы но куака : выжыкыл / иллюстрациез В. Мустаевлэн // Кизили. – 2010. – № 7. – С. 11 : цв. ил.

Йырсиме ачим пунӥ ; Вож шашы ; Жильыртӥсь Вало ; Ву нуны ; Пукон ; Уйин / иллюстрациез М. Водикинуслэн // Кизили. – 2007. – № 10. – С. 6–7 : фот.

Губи салам ; Кудыын ӟаӟег пуке ; Нэнэзы изён дыръя ; Мисьтӥськид-а, Мики? // Покчи эше : 1–2-тӥ классъёсын ватсаса лыдӟон книга / М. П. Лаврентьева, Е. Н. Дмитриева, В. Н. Ившин. – Ижевск, 2006. – С. 8, 11, 19, 36.

"Камский берег терзают бугристые сизые волны..." : Олегу Алексеевичу Поскребышеву : стихи / пер. В. Емельянова // Италмас. – 2010. – № 3. – С. 8. – (Памятные посвящения).

Куата-куата-куатали : выжыкылъёс / худож. Галина Иванова // Кенеш. – 2013. – № 2. – С. 82-87 : рис.

Кызьы латтьы мульы кырӟа : выжыкыл // Кизили. – 2012. – № 1. – С. 10 : цв.ил.

Кызьы чабак оскытӥз : выжыкыл / иллюстрациез В. Мустаевлэн // Кизили. – 2010. – № 10. – С. 8 : цв. ил.

Лобасьтэм туриос ; Лапчи // Ӟечбур! – 2007. – 25 окт. – С. 5.

Лымы ; Мар шуоз? // Удмурт дунне. – 2009. – 31 дек. – С. 23.

Материнский дом / пер. с удмурт. В. Емельянова // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 215–216 ; Изв. Удмурт. Респ. – 2005. – 10 нояб. – С. 14. – (Сияние рифм).

Миськем час ; Дэременым, пе // Азвесь кышетэн толэзь : веросъёс : семьяын лыдӟон книга. – Ижевск, 2007. – С. 47.

Мон – агай ; Пиосмурт ; Обыда ; Ӵӧж но коӵыш. Сьӧд таки // Зарни дэремен шунды : семьяын лыдӟон книга. – Ижевск, 2006. – С. 46–47.

Мон – кылбурлэн ляльчиез, дыр... // Кенеш. – 2007. – № 9. – С. 3–10 : фот.

Мушъёслэн юлтошъёссы : верос // Ӟечбур! – 2008. – 17 июля. – С. 8.

Мылкыдам – гажан кож // Кенеш. – 2006. – № 1. – С. 9–12.

Мынам люкмесэ ; Мисьтаськисьёс // Ӟечбур! – 2007. – 26 июля. – С. 9.

"Мыным возьыт..." : кылбур // Инвожо : спец. вып. газ. "Известия Удмурт. Респ." и журн. "Инвожо". – 2011. – № 9/10. – С. 36.

Нюлэс иськавынъёс но Тол буба – тодьы шуба : выжыкыл / худож. Галина Иванова // Кенеш. – 2013. – № 1. – С. 66-71 : фот.

Нюлэс мадён / иллюстрациез В. Мустаевлэн // Кизили. – 2009. – № 10. – С. 10 : цв. ил.

Тау : кылбур // Кенеш. – 2007. – № 10. – С. 2.

Тӧдьы бус ; Уй инмын нянь сукыри ; Кышкасьтэм тэль ; Буяськись // Удмурт дунне. – 2010. – 27 авг. – С. 11.

Тулыс ярдур ; Дыдык гурлам ; Берыктӥськыса вазён ; Кузё кышно ; "Дэремысьтыз бирдыез..." ; "Жинге улон кубыз..." ; "Зарни угы пельёсад" ; Шапык ; Кыкнамы ; "Бусы но вож..." ; Ныл мӧзмон // Инвожо. – 2006. – № 4/5. – С. 54–55.

Тушъяськем, шу, улошо : выжыкылъёс / суредъёсыз Г. Ивановалэн // Кенеш. – 2010. – № 11/12. – С. 50–55 : ил. – (Нылпи дунне).

"Ты скромна, моя песня, как вешний рассвет перламутровый..." ; "Камский берег терзают бугристые сизые волны..." : О. А. Поскребышеву : стихи / пер. В. Емельянова // Италмас. – 2009. – № 1. – С. 94–95.

"Ты скромна, моя песня..." ; Материнский дом ; Шундыберган ; "Камский берег терзают бугристые сизые волны..." : Олегу Алексеевичу Поскребышеву / пер. В. Емельянова // Удмурты. – М., 2005. – С. 256–260.

Чучо-мучо-мучоло : выжыкылъёс / суредъёсыз Г. Ивановалэн // Кенеш. – 2010. – № 8. – С. 75–81 : ил. – (Нылпи дунне).

Шумпотэ сӥзьыл дэри : выжыкылъёс / суредъёсыз Г. Ивановалэн // Кенеш. – 2010. – № 10. – С. 86–91 : ил.

Кырӟанъёсыз[править]

Кузнецов П. Н. Мынам мунёе : нылпиослы кырӟанъёс. – Ижевск : Удмуртия, 2010. – 23 с.

Шкляева Р. Шумпотон // Ашальчи. – 2009. – № 1. – С. 22.

Постников Н. Е. Тау : "Тау визьмын шӧдӥсезлы, сюлмыныз малпасезлы..." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 98–99.

Берыктэмъёсыз[править]

Книгаос[править]

Рудольф Р. Алэм пионеръёс : верос. – Ижкар, 1932. – 32 с. – Запрещенные пионеры.

Пушкин А. С. Сказка о попе и о работнике его Балде = Поп сярысь но солэн визьтэм ляльчиез сярысь выжыкыл / худож. В. П. Коркин. – Ижевск : Удмуртия, 1999. – 23 с. : ил.

Самсонов А. А. Курочкина песенка : книжка-раскраска. – Ижевск : Удмуртия, 2003. – 8 с. : ил.

Статьяос[править]

Лермонтов М. Ю. "Ӧвол мон Байрон, мон мукет..." ; Бородино ; Жильыетын пукись ; "Куке вогыр гыа ӵуж ю бусы понназ..." ; Мӧзмыт но ӝожмыт но ; Малы Тусбуй борды ; Сьӧд пилемъёс ; Меӵ яр ; Вӧт ; Куар ; "Потӥсько огнам сюрес вылэ мон..." ; Зарезьысь эксэй ныл ; "Эн бӧрд, эн бӧрд, муспотонэ..." : кылбуръёс // Избранные произведения : стихотворения / М. Ю. Лермонтов. – Ижевск, 2008. – С. 96–216.

Некрасов Н. А. "Мон соин асме туж адӟонтэм карисько..." ; Туала ода ; Зор азьын ; Ӟеч сямъем адями ; Вунэтэм гурт ; Зӧк корка азь дорын малпаськонъёс ; "Тон малы, сюлэмы, вожомид али..."; Ужась Ермолай сярысь притча ; Добролюбовез буре вайыса ; Дорын – умойгес! ; Зиналы : кылбуръёс // Избранные произведения : стихотворения, отрывки из поэм / Н. А. Некрасов. – Ижевск, 2005. – С. 23–267.

Пушкин А. С. Роза ; М...лы мадригал ; Сосницкаялэн альбомаз ; "Токма, мусо эше, малпай мон ватыны..." ; "Тӥ жаль ӧвӧл, юнме яратонлэн..." ; Дионея ; Улонлэн уробоез ; "Уйин зефир..." ; Сутэм гожтэт ; Веросчи но кылбурчи ; Нылпи утялтӥсьлы ; Тол сюрес ; Арион ; Тон но тӥ ; "Эн кырӟа, чебер ныл, мыным..." ; Сӥзён ; "Мон тӥледды гажай: гажан шунды ай..." ; "Мон ӵаш урамъёстӥ-а юмшасько..." ; Ярдур куашкан ; Е. П. Полторацкаялы ; "Мон татын, Инезилья..." ; Куара чузъяськон ; Сӥзьыл ; Сьӧд пилем ; "...Мон нош вуи..." : кылбуръёс // Избранные произведения : стихотворения, отрывки из поэм / А. С. Пушкин. – Ижевск, 2007. – С. 28–240.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 Ившин Вениамин Никонорович (1947) // Вордскем кыл. - 2011. – № 3. – С. 35.
  2. 2,0 2,1 2,2 Богомолова З. «Кырӟанэ–марӟанэ, Чупчи йыл ӟардонэ…» // Удмурт дунне. – 1997. – 1 нояб. – С. 3.
  3. Шкляев А. Кылбурчилэн выжъёсыз–метафораосыз // Вапумысь вапуме / А. Шкляев. – Ижевск, 2000. – С. 116-120.
  4. 4,0 4,1 4,2 Зуева А. Кылбурчилэн паймытӥсь дуннеез : Вениамин Ившинлы – 60 // Кенеш. – 2007. – № 9. – С. 86–91.
  5. 5,0 5,1 Ившин Вениамин Никонорович (1947) // Удмуртская Республика : энцикл. – Изд. 2-е, испр. и доп. – Ижевск, 2008. – С. 338–339.
  6. 6,0 6,1 Ившин В. Сюлэм но йырвизь куремъя улӥсько / записал В. Занчаров // Ӟечбур! – 2007. – 25 окт. – С. 4–5.
  7. Никифоров Н. Кисьман вакыт : Вениамин Ившинлэн гожъямъёсыз сярысь // Кенеш. – 2003. – № 2. – С. 98–101.
  8. 8,0 8,1 Богомолова З. Вениамин Ившин (1947) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 55-56.