Макарова Екатерина

Материал из Воршуда
Перейти к: навигация, поиск

Екатерина Васильевна Макарова– удмурт кылбурчи.

Екатерина Макарова

Улон сюресэз

Екатерина Макарова вордӥськиз Пичи Пурга ёросысь Кутер-Кутон гуртын 1976-тӥ арын 18 толсуре. [1]

Катя дышетскиз Аксакшур школаын. Солы пичи дыръяз удалтӥз. 5-тӥ классъёсын дышетскыкуз, школаязы удмурт кылэз дышетыны Надежда Петровна Демьянова лыктӥз. Со гожъяськыны мыло-кыдо пиналъёсты «Чингыли» литературной кружоке люказ. Пӧлазы Катя но вал. Котьку чылк-чылк дӥсяськемын, тӧдьы бантикъёсын бер парта сьӧры пуксёз но шыпыт гинэ кылзӥськыса пукоз. [2]

Е. Макарова нылыныз

Школазэ йылпумъяса, 1992-тӥ арын Катя пыриз дышетскыны Можга педучилищее. Малы гинэ ӧз дышетэ отын! Баянэн, гитараен, горнэн шудыны, чебер эктыны, фото поттаны, киноаппаратэн ужаны, суредаськыны, гожъяськыны, киужен вырыны но трос-трос мукетэзлы. Татын ик солэсь кылбурась но вошъяськись мылкыдзэ дышетӥсь Татьяна Сергеевна Иванова шӧдӥз но визь-кенешъёсын юрттылӥз. Екатерина Макарова татысь потэм тодмо нимъёслэсь лыдзэс йылэтӥз. [2]

1996-тӥ арын, дышетсконзэ йылпумъяса, Катя ужаны интыяське вордскем ёросысьтыз ик Гожня школае. Со куспын ик заочно пыре дышетскыны.

1996-2002-тӥ аръёсы дышетскиз Удмурт госуниверситетысь филологияя факультетын. Диплом уженыз кивалтӥсез вал Василий Михайлович Ванюшев. Соин ӵошен поттӥзы «Кыл но кылбурет» студентъёслы пособие. [3]

2002-тӥ арысен ужа Пичи Пурга ёросысь Байситово школаын дышетӥсь луыса.

Гожъямъёсыз сярысь

Катя Макарова пичи дырысеныз «Дась лу!» («Ӟечбур!») газетэн эшъяське. Мылысь-кыдысь гожъяськемез понна редакция сое синпель кузьымъёсын но пусйылэм. «Лыдӟиськыны яратӥсько бере, – мылкыдзэ усьтэ Екатерина Васильевна, – книгалэсь но бадӟым кузьым номыр ӧй вал мыным… Котькуд гожъям ужме печатлало вал». [1]

Со вакытэ ёросын «Пурга гуръёс» литобъединение рос-прос ужаны кутскиз. Та ужез «Маяк» газетын ужась З. Я. Титова вырӟытӥз. Со вань сюлэмзэ сётыса выриз пиналъёсын. Катя та пумиськонъёсты чидатэк витьылӥз. Со нуналъёсы нылашлы, оло, бурдъёс кылдылӥзы. [1]

Школаын дышетскон аръёс ӝог ортчизы. Катялэн кылбуръёсыз но «юнмазы». «Солэсь одӥг кылзэ но тупатоно ӧвӧл, ваньмыз интыяз гожтэмын», – «Дась лу!» газетэ ысъям кылбуръёссэ лыдӟыса шуоз вал со вакытэ отын ужась Сергей Матвеев. [2] Бадӟым дунъет творчествоезлы 1995-тӥ арын сётӥз вал П. Захаров: «Котькуд кылыз юн-юн ас интыяз пуке ни, уд кушты, уд вошты ни сое чурысьтыз. Мылкыдыз но, малпанэз но, крезьгурез но, ваньмыз одӥг уробо борды кыткемын. Кылбурчи юн возе аслэсьтыз серметсэ…» [4]

Makarova2.jpg

Та дас тямыс но аресам,

Я кин оскоз, сыӵе жади...

Ӧссэ ӧз усьты на инбам,

Улон пыдзэ ини подӥз.


Ыштӥ дорме, ыштӥ дырме,

Егит-а мон яке пересь?

Даур зӥбе кадь пельпумме,

Азям… ай ортчымтэ сюрес.

Можга педучилищеын ужась дышетӥсь М. Пискунова 2003-тӥ арын Е. Макаровалэн творчествоезлы таӵе дунъет сётэм: «Екатерина Макарова – тужгес но вӧсь луисез, котьма понна сюлмаськисез, астэ нокинлы кулэтэмен шӧдӥсез, трос улон но кулон сярысь малпаськисез. Нош солы 30 арес но ӧвӧл ай! Улонмес адӟе ини даурзэ ортчытэм песянай сямен, нош малпаське, оло, соослы валантэм ужпумъёс, валатонъёс сярысь: зэмлык, сюлмаськон, адӟон, чидан, оскон, жалян, шудбур, яратон, мӧзмон, маке пӧрмымтэ пумысен зол-зол куректон… Кылбуръёсыз мур психологическоесь, философскоесь»: [5]

Бӧрдэ, викышъя кылбуре,

Жаля, дыр, жуммем улонме –

Пото ай кыре но буре

Ачим нуллыкум пыдъёсме.

Мон кошки ке, мар ке воштӥськоз шат?

Мон ӧй вал но, уг лу но Инмар.

Сӥзьылзэ коть ужлы ёрмыса шат,

Шайвылме шулдыртоз бадяр куар.

Екатерина Макаровалэн кылбур дуннеяз кышкыт но, шурдыт но. Шыпыт гинэ, «улонлэсь мултэс курытэк» кылбуранысь тросгес шӧдӥськом ӝож куараосыз, ортчем дырын малпаськонэз. Но егит муртлэн вань ай утисьёсыз: Инмар, Яратон, Инкуазь… Инкуазен ваче син кыльыса, со лул висёнзэ буйгатэ. [6]

Бурдо но мон, пилем но моно ӧвӧл,

Лулы гинэ инбам сярысь бӧрдэ.

Я ӝутскы вал, я лоба вал вӧл-вӧл,

Малы тазьы адӟон монэн шудэ.

Куд-ог кылбуръёсызъя крезьгурчиосмы гожтӥзы кырӟанъёс. Нырысь ик Эдуард Уразов «Ой, уе, тани нош пумиським…» нимо кылбурзэ синйылтэм. Собере Пантелей Кузнецов, Пётр Симонов, Виктор Крестьянинов. Нош Пуро клубын ужась Юрий Волков солэн кылъёсызъя даслэсь уно кырӟан пормытӥз ини. [3]

«Куремзыя-косэмзыя мон гожъяськыны уг быгатӥськы. Кылбуръёсме сюлэмам кема веттаса возисько…», – шуэ поэтесса. [3] Сьӧлыко дунне-а, лопыръяськись юг лул-а, творчествоез дунъяны тыршон-а, яратон-мӧзмон-а – ваньмыз та авторлэн чуръёсаз малпаськон-шӧдон пыр поттэмын, соин ик кылбурчиен ӵош яке выжыкыл дуннее выжоно, яке музъем вылэ уськытсконо ... "Шӧдон" – Екатерина Макаровалэн нырысетӥ книгаез 2006-тӥ арын потӥз. Нижний Тагилэ Россиысь егит гожъясьёслэн семинаразы ветлэмзы бӧрсьы Люза Бадретдинаваен кыкназылэсь но бичетсэс «Удмуртия» издательствоын печатланы дэмламын вал уго. Вить ар ортчыса, Эстониысь эшъёсыз Екатерина Макровалэн «Шӧдон» книгаезлы вылӥ дунъет сётӥзы, но 2011-тӥ арын со отысь ӵыжы-выжы луись калыкъёслэн литературной премизылэн лауреатэз луиз. [3]

Книгаез вить сӧзнэтлы люкемын. Кылбуръёссэ эскерисьёс одӥг ымысь кадь верало – Екатерина Макаровалэсь кылбуръёссэ лыдӟыса паймоно: ма та улонэз адӟем муртлэн малпанъёсыз-шӧдонъёсыз ук, шуыса. [7]

Солэсь кылбуръёссэ лыдӟыса, пумен валэктон шедьтӥськод: солэн вӧзаз ӧвӧл чебер яратонэз, сое валась, гажась муртэз. Соин ик лулыз – четлыке пытсам тылобурдолэн кадь. Отысь чаляк мозмытскемез потэ. Но героиня оске: таӵе векаса улонлы пум вуоз «Огпол ке но серекты, сюлэм…»

Но кылбур бичетлэн пумаз сюлэм тырме шумпотонэн: ӝож гуро мылкыдэз сайя сайкыт, шулдыр инкуазь. [7]

Наградаосыз но премиосыз

Эстониысь ӵыжы-выжы калыкъёслэн литературной премизылэн лауреатэз, 2011.

Библиография

Книгаосыз

Шӧдон : кылбуръёс / худож. В. Коркин. – Ижевск : Удмуртия, 2006. – 79 с.

Статьяосыз

"А ӧшинь сайын еджыд бобув-лым..." ; "Тi арсӧ некор гажтӧмӧн эн шуӧй..." : стихи / пер. Н. Обрезковой // Льӧм ю = Льӧмпуа юок = Ломбо эн’ер = Zelnikemeggyes patakoska = Льӧмпу шур = Toomingajȏ gi = Tuomijoki = Tom’jogi : кывбуръяс, вуджӧдӧмъяс. – Сыктывкар, 2008. – С. 146–147. – На коми языке.

Дунне берган ; "Сӥзьыл, сӥзьыл, малы меда..." ; "Тэбинись сӥзьыл куазь киултӥз улонме..." ; "Сӥзьыллэн мылкыдыз паласькиз-а?." ; "Укноям меда, сюлмам меда..." ; "Мыным кельше синмаськыны..." ; "Сӥзьыл куазез эн шуэлэ мӧзмыт..." ; "Куке салкым ӵукнаосы..." : кылбуръёс // Инвожо. – 2007. – № 5/6. – С. 118–119.

Куаръёс дыгыр куалекъяло... : кылбуръёс // Удмурт дунне. – 2007. – 25 сент. – С. 7. – Пуштросэз: "Сӥзьыл куазез эн шуэлэ мӧзмыт..." ; "Куке салкыт ӵукнаосы...".

Мон сыӵе, кыӵе вань... : кылбуръёс // Удмурт дунне. – 2012. – 15 февр. – С. 2. – (ИнГОЖ).

"Ӧшын сайын лым-бабыввез..." ; "Ме ог тӧд ни, кӧр – ӧддьӧн ни важын..." : стихи // Льӧм ю = Льӧмпуа юок = Ломбо эн’ер = Zelnikemeggyes patakoska = Льӧмпу шур = Toomingajȏ gi = Tuomijoki = Tom’jogi : кывбуръяс, вуджӧдӧмъяс. – Сыктывкар, 2008. – С. 102–103. – На коми-пермяцком языке.

Та уе... : кылбур // Удмурт дунне. – 2007. – 14 февр. – С. 7.

"Та дас тямыс но аресам..." ; "Вордӥды но, дыр..." ; "Тонэ уг яра ни яратыны...". Тулыс : кылбуръёс // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 348–350.

"Тi арсӧ некор гажтӧмӧн эн шуӧй..." ; "А ӧшинь сайын лӧня усьӧ лым..." ; "Талун ме радӧйла бӧрда..." ; "Арся асыв. Пуясысь..." ; "Арлӧн шуштӧм лов шыыс ыджыдалӧ олӧмас..." ; "Тан шӧйтӧ кӧдзыд гажтӧм ар..." ; "А меным муса тэнад мич..." : кывбуръяс / пер. Н. Обрезкова // Арт. – Сыктывкар, 2007. – № 2. – С. 66–68. – На коми языке.

"Чебересь кылъёсме утчакум кадь..." = "Nagu otsides kaunimaid sõnu..." ; "Эн бӧрды, нылы, я , эн бӧрды..." = "Sa ära oh nuta, mu paike..." ; "Укноям меда, сюлэмам меда..." = "Minu aknal koputad, sügisvihm..." ; "Мыным кельше синмаськыны..." = Mul meeldib armuda nüüd taas... : кылбуръёс // Kuum ӧӧ : suome-ugri ranvaste tanapaeva luulet. – Tallinn, 2006. – С. 518–521. – На удмурт. и эст. яз.

Чуслэсь но чус улос : кылбуръёс // Удмурт дунне. – 2006. – 14 нояб. – С. 6.

Кырӟанъёсыз

Антонова З. Асьмеос луомы кыкнамы : "Укноям меда, сюлэмам меда..." // Ашальчи. – 2006. – № 3. – С. 46.

Волков Ю. Укноям меда, сюлэмам меда? : "Укноям меда, сюлэмам меда..." // Кенеш. – 2008. – № 5/6. – С. 31.

Волков Ю. Эн ушъяськы чебереныд : "Чебереныд эн ушъяськы укыр..." // Удмурт дунне. – 2008. – 23 апр. – С. 6 ; Кенеш. – 2011. – № 1. – С. 105.

Крестьянинов В. Асьмеос луом кыкнамы : "Укноям меда, сюлэмам меда..." // Удмурт дунне. – 2006. – 3 окт. – С. 7.

Постников Н. Мар уг тырмы на сюлэмлы? : "Вордӥды но, дыр..." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 109.

Симанов П. Асьмеос луомы кыкнамы : "Укноям меда, сюлэмам меда // Кенеш. – 2011. – № 8. – С. 107–108.

Берыктэмъёсыз

Обрезкова Н. "Мон кышкасько..." ; "Милям уйпаламы толэд..." ; "Куке но берытскод дорад..." ; "Быгатӥськод ке..." ; "Вань кылбуръёс..." ; "Куке но укнояд тынад..." // Инвожо. – 2010. – № 1/2. – С. 53.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 Ермолина А. Арган гуро, кылбур чуро Пуро, яке кызьы милемыз шулдыртӥзы усточиос // Ӟечбур! – 2005. – 10 февр. – С. 2.
  2. 2,0 2,1 2,2 Бадретдинова Л. Шӧдонэз бубыли бурдъёслэн кадь // Ӟечбур! – 2008. – 17 апр. – С. 3.
  3. 3,0 3,1 3,2 3,3 Чернова Т. Векчи бурд – шӧдонэд // Удмурт дунне. – 2012. – 15 февр. – С. 2.
  4. Захаров П. Пиртэшо синкылиос… // Инвожо. – 1995. – № 9. – С. 6-10
  5. Пискунова М. Нылкышно кылбурасьёс // Выль даур (Можга) – 2003. – 21 июнь. – С. 1.
  6. Чернова Т. Сылмыны инбаме… // Удмурт дунне. – 2006. – 14 нояб. – С. 6
  7. 7,0 7,1 Демьянова Н. Эн ӝега дунъяны адямиез // Удмурт дунне. – 2008. – 14 окт. – С. 7.