Иванова Татьяна Сергеевна

Материал из Воршуда
Перейти к: навигация, поиск

Дыраз ӝужам сяська

Та улон даурмылэсь азьло вал, пе, мукетыз улон вапуммы. Отын огез феодал вылэм, музонэз - тыпы, куинетӥез - скал. Сыӵе азьвыл улонын мон асме адӟисько сюрес дурын бер ӝужам сяська интыын. Дырыз дыръя быгыльскем ненег йыръёслэн ческыт зынынызы кудӟем адямиос солэсь чеберзэ уг адӟо ни. Но куд-огез пальпотыса учке ик шораз: усьтӥськыса вуттэм на.

Озьы ачиз сярысь маде Можга педколледжысь школа люкетэн кивалтӥсь Татьяна Сергеевна Иванова. Со ассэ бер ӝужам сяськаен ӵошатэ ке но, та чик но озьы ӧвӧл. Беромыса вордскем маке улонын номыре но лэсьтыса уз вутты, нош Татьяна Сергеевна 47 ар ӵоже кыӵе но гурезез ӧз берыкты ни. Со - 2-тӥ-4-тӥ классъёслы «Лыдӟон книгалэн» соавторез, Удмурт кенешлэн Можгаысь ёзэзлэн «липетэз» улын ужась, «Такъян» клубез кылдытӥсь. Россия Федерациысь калыкез дышетонъя отличник. Удмуртиысь Калыкез дышетонъя но наукая министерство сое кык пол ысъяз Москвае аспирантурае, но отчы шонтыны куд-ог мугъёс люкетӥзы. Котьма ке но, Москва сярысь Татьяна Сергеевналэн малпанэз уг кысылы туннэ но.

Городын ортчись вань ужрадэ сямен пыриське со. Кӧня лулъёсты выль сямен улӟытэ. Дырыз вань-а, ӧвӧл-а, котькуд пиналлы саклыксэ висъя. Калык - пичиез но, бадӟымез но - ачиз валатэк, бордаз кыстӥське. Пумитад мынямзэ адӟыса гинэ но, сюлэм пальыша шумпотонэн. Тужгес секыт вакытам выльысь бурдъяськон понна мон но дораз дыртӥсько.

Улонэ чебер потоно

Пичи дыръям кин луэме потэ вал шуыса юаськод-а? Дышетӥсь. Мукет профессиез быръён сярысь ӧй ик малпалля - ноку. Можга ёросысь вордскем Вуж Ягул гуртам, эшъёсынымы шудыкумы гинэ но, мон визьнодась вал. Нылпи садын воспитательын огвакытэ ужакум но, туж возьдаськи, дырме юнме быдтӥсько шуыса. Тэшкылиослы улонэз усьтон - со сыӵе ик дышетон шуыса валай ке но, одно ик зэмос дышетӥсьын ужаме потӥз.

Зэм, дышетӥсь луэмысьтым огпол туж возьдаськи. 2000-тӥ арын Ижын ортчиз наукая но практикая конференция. Отын тодматски япон профессорен. Со Москваын одӥг ар ӵоже эскерем, кызьы уло быдӟым ӟуч кыл вӧзын пичи кылъёс - удмурт, бигер но мукетыз. Ми кенешимы, кыӵе ке юанъёсыз кылдӥзы ке, со мыным вазиськоз шуыса. Огпол выль тодмое куре мынэсьтым электрон адресме, интернет вотэс пыр, пе, кусып возём. Ӧвӧл, шуисько. Тӥ дышетӥсь-а, паймиз со. Уске, пе, факс номердэс ке но вае. Таиз но ӧвӧл. Телефон номерме куре. Ымы уг усьтӥськы ни. Со воксё бакомиз: тӥ дышетӥсь ӧвӧл, дыр. Зэмос дышетӥсь, шуисько, но сыӵе куанер бере, мар каром? Кызьы, пе, соку герӟаськыломы? Гожтэт пыр. Адямие воксё кулӥз: о-о-о, со вашкала улон ни! Котьма ке но, ог-огмылы куддыр гожъям ик.

Анае Елизавета Афанасьевна но атае Сергей Николаевич Николаев ноку пумит ӧз кариське дышетӥсь луэмелы. Бен, анаелэн огпол лулскемез вань ик: вить нылпиосы пӧлын, пе, агрономез но, географез но, зоотехникез но вань - ваньзы вылӥ образованиен, огез ке но врач медло вылэм. Но асьмелы сюрес бырйыкумы, со одӥгмылы но ӧз шуы: отчы эн мыны. Паймымон визьмо кышномурт со.

Ми песянай вӧзын нуныяськонэз тодытэк будӥмы, соин ик юрт котырысь уж усе вал пичиос вылэ. Витетӥ классысен ик колхозэ потамы. Тодӥсько на: дас ньыль арес дыръям, ӵукна вить часын султыса, эшеным ӵош борыяны мынӥмы. Малы сокем вазь? Ужаны мед вуомы шуыса. Нырысетӥ сентябре школа линейкае колхоз председатель лыктэ, гужем ӵоже тужгес ӟеч ужам муртъёслы кузьым сётэ вал. Соин но, лэся, ог-огмес ортчыны тыршим.

Сыӵе мылкыд али но пуксьымтэ кадь. Мон ке ӧй, кин лэсьтоз шуисько, лэся. Туж потэ удмурт калыкелэсь быгатэмзэ но, визьзэ но возьматэме. Озьы, юбилеенызы герӟаса, ӝытъёс ортчытъяй Россия Федерациысь сӥё-дано дышетӥсьлы Римма Даниловалы, можга композиторлы Геннадий Павловлы, Россия Федерациысь суредасьёслэн огазеяськонзылэн ёзмуртэзлы Владимир Кашинлы но писательёслы, Можга педколледжез йылпумъям муртъёслы - Герман Ходыревлы, Даниил Яшинлы, Михаил Покчи-Петровлы но трос мукетъёсызлы.

Студентъёс пӧлын удмуртлыкез утёнъя нимысьтыз программа гожтэме но соя ужаме потэ. Ваньзэ та ужрадъёсыз ортчытыны юртто мон вӧзын тыршись Маргарита Пискунова, Татьяна Кибардина но лаборант Галина Кибардина.

Куинь куронлы тупай

Кызьы шеди Можга педучилищее ужаны? Нырысь ик - мон татын дышетски. Собере ыстӥзы Можга ёросысь Пазял гуртэ. Отын нырысьсэ мон асме шӧдӥ дышетӥсен. Отысь коллектив монэ бурдъяны быгатӥз. Солы мон туннэ ке но музозь ик йыбырттӥсько. Шуысалзы ке, тынад соид но, таид но уг пӧрмы, лобӟыны пишмытысал шат? Отын мон аслым ачим оски.

1986-тӥ ар вал со. Педучилищеысь удмурт кылъя дышетӥсьсы кошкем. Римма Ивановна Данилова монэ, сокугес гинэ Удмурт кун университетлэсь удмурт филологияя факультетсэ заочно йылпумъям муртэ, со интые ужаны ӧтиз. Бӧрысьгес гинэ тодӥ: сыӵе мурт азе директор Илья Михайлович Шаврин куинь курон пуктэм: нырысетӥез - Можгаын йыр йылаз аслаз липетэз медло - квартираос ум висъяське; кыкетӥез - литературая кружокез нуыны дась мед луоз; берпуметӥез - юн оскымон медло. Таосыз лыдэ басьтыса, егитъёсты ӟеч тодӥсь Римма Ивановна монэ ӵектэм.

***

Ужаны кутскеме бере ик кружок борды басьтӥськыны ӧй кышка-а? Уг тодӥськы. Зэмзэ ке, туннэ ке но уг валаськы, кружокез шонер нуисько-а, уг-а, малы ке шуоно ачим ноку рос-прос ӧй гожъя кылбуръёс но, веросъёс но. Мукетыз но вань на. Мон дышетскыку адӟыны ӧз кылды кружоклэсь юн ужамзэ. Нырысетӥ арзэ сое нуиз ноку кылбурамтэ мурт. Кыкетӥ арзэ ми доры ветлӥз зэмос кылбурчи. Соиз но ваньмемезъя гинэ вуылӥз - оло пумиськиськом, оло ум. Талы паймыса, лэся, куинетӥ-ньылетӥ курсысен мон сюрес лёги Можга редакцие Григорий Данилов доры. Отчы но мае гожтӥ, сое гинэ нуисько вал. Нимысьтыз рос-прос кенешонъёс-ваче вуонъёс ӧз пуромылэ. Соин ик меӵак вераны уг дӥсьтӥськы, пиналъёслы творчество ласянь маин ке юрттыны пишмытӥсько-а, уг-а. Шуныт кылын ке шат? Татын ньыль ар ӵоже дышетскытозязы соослы, оло, кулэ вал оскон сётыны. Кудӥз ке кылбурзы но, оло, мон гожтыны золъямысь гинэ вордскылӥз.

Мон огзэ ӟеч тодӥсько: кружокам ветлӥсьёс асьсэос туж визьмоесь, мынэсьтым но малпанме куддыр йырин-чукин берыкто. Соин ик литератураын но асьсэлэсь ӧрзэс шедьто. Со Пичи Пургалась Катя Макарова. Татын дышетскыкуз, «Инвожо» журналын кылбур сузьетэз потӥз но Дмитрий Лукьянов паймыса ик сипыртӥз: та ныллэн чуръёсыз улонэз адӟем муртлэн кадь.

Туж киям кутэме потэ «Удмурт дунне» газетын ужась Лена Панфиловалэсь (Миннигараевалэсь) кылбур книгазэ. Трос ӟеч кылъёс вераз Валера (Эрик) Батуев. Со ветколледжын ке но дышетскиз, кружоке татчы вуылӥз. Соку мон ӧй оскы, со сыӵе бадӟымозь будоз шуыса. Но Валералэн аслаз юн шорсюлмыз вал. Ас улонзэ со ачиз лэсьтӥз.

Литкружокмы али улэп, озьы шуом. Кылем арын педколледжез йылпумъязы Светлана Марданова но Ольга Арсентьева. Али «пӧрамъёсынызы» шумпотто 4-тӥ курсысь Таня Николаева но 10-тӥ классысь лицей группаысь Надя Николаева. Таослэн ужъёсынызы буклет поттыны малпаськомы. Литературае пачкаен-пачкаен уг пото - отчы оген-оген вамышто. Кружоке кык мурт ветлэ ке, соос котыре адями люканы луэ. Вить-куать кузя луимы ке, тырмоз. Талэсь ятыр люкаськимы ке, матысь эшъёс луомы меда?

Книга вылын - нимтул гинэ

Пиналъёс пӧлын ялан бергаса, кызьы уг жадиськы шуиськод-а? Улон азьлань питрамъя со шоры учкон но чутрак воштӥське. Потэ выль техника. Туала вакытэз компьютертэк син азе пуктыны уд быгаты ни. Мынам но урокъёсам слайд-шоу шуонэз пыртэме потэ, егитъёслы уката тунсыкогес дышетскыны медло кадь. Пичиосызлы удмуртлыкез гажан мылкыд пыӵатэме потэ. Юнме шат 2-тӥ-4-тӥ классъёслы «Лыдӟон книга» бордын но ужай?

Мон ноку нимысьтыз ӧй малпа, учебникъёслы автор луо шуыса. 1996-тӥ арын букварьёслы конкурс ялӥзы. Соку Римма Данилова асэныз ӵош ужаны дэмлаз. Но мынам нылы пичи на вал, соин ик солы юрттыны ӧй дырты. Нош али Калыкез дышетонъя но наукая министерствоысь жингыртӥзы но уж сётӥськом шуизы. Пӧртэм методикаосты тодӥсько бере, валатэк ӧй кыльы: лыдӟон книгаос вужмемын. Аръёс ӵоже тодон-валан но будӥз. Таин сэрен чигнаме ӧз лу - басьтӥськи.

Книга лэсьтон мыным капчиен ӧз сётӥськы. Нырысь ик - киын бичам материал шоры уг ик учко - ваньзэ компьютерен бичано. Мукет могӟет но сюриз. Учебниклы программа лэсьтӥз одӥгез, материал люказ мукетыз. Ваньмыз одӥг мурт киын луысал ке, трослы капчигес йӧтысал. Соин ик книга программая ӧзгес лу, но министерство воштонъёс пыртыны лэзиз.

Иже ветлыны но шуг вал. Педколледжысь но мылпотэмъя уд пегӟы. Римма Данилова шонер вера: нимтул гинэ кыле книга вылэ. Озьы ик вань со. Учебник дасяны туж ӧжыт дыр сётӥзы. Соин сэрен вань малпанъёсыз книгае пыртыны ӧз кылды. Соку ик вӧзаз ужан тетрадь но лэсьтысал ке, учебнике тросгес ватсаны луысал удмурт произведениосты, нош соослэсь интызэс басьтӥзы пиналъёслы юанъёс но нимысьтыз ужъёс-косонъёс. Мон али выльысь со ужан тетрадез кылдыто. Котьма ке но, «Лыдӟон книга» азинтыны кулэ пиналлэсь лыдӟиськон манерзэ. Анай-атайёс али туж шер басьяло удмурт произведениосын книгаос, нош учебникын луизы ке, нылпи соосты косытэк но синйылтоз.

Городын будэм нылъёсме удмуртлык ласянь кызьы будэтӥ шуыса юаськод-а? Нылпи садын ужакум адӟи, кызьы ньыль аресъем бигер пияш, бак музэн, пал кыл но ӧз поттылы. Дораз соин вераськиллям бигер сямен. Асьсэлы тупась нылпи садъёс ӧвӧлэн, сое арес но ӝыны дыръяз сётӥллям ӟучъёс пӧлы. Бӧтьыртыны, мама-папа шуыны со выльысь дышиз ини вить аресказ. Мон тодэмъя, пиёк собере нырысетӥ классын но ньыль ар пукиз. Со шузи ӧвӧл, вераськон манерезъя гинэ ёзъёсызлэсь бере кылиз. Пиналъёслэн психиказы уго туж пӧртэм: кин ке соку ик кык кыллы дыше, кин ке огзэ но секытэн вала. Соин ик мон туж кышкай нылъёсыным гуртын удмурт сямен вераськыны, удмурт яслиос Можгаын ӧвӧл уго. Малпасько: вордскем кыллы дышетоно ке, вӧзаз огӵош музонзэ но валэктоно. Шуак ӟуч ӧре куштыса, кин но со, оло, пыраклы выёз.

Огшоры Таня

Кызьы шутэтскисько? Эгызоосыз коть корт жильыен думыса возь, шуо, соос сёровно сцена вылэ потыны амал шедьтозы. Та ӵапак мон сярысь верамын, луоз. Мон уг шуиськы: быгатӥсько шудыны - мынам потэ шудэме. Малы? Уж дурын тон - дышетӥсь, палэнэ мултэс вамыш лэсьтыны уд дӥсьты - сюрс синъёс чаклало дӥсьтэ, вераськон манердэ но тодон-валандэ. Дорын тон - анай, кузпал - котыр ласянь умой луыны кулэ: корка но чылкыт, пинал но сюдэмын, ачим но утялтэмын.

Нош калык театрын - мон аслым ачим понна - огшоры Таня. Зэм, нырысетӥ нуналъёсаз ик монэ Татьяна Сергеевна шуизы. Малы озьы - уг тодӥськы. Репетициос дыръя но сцена вылэ потон черодэ вуэмелэсь азьвыл пиналъёслэсь тетрадьёссэс эскерыса пукемысьтым-а, мар-а. Та понна эшъёсы монэ жаляло вал. Озьы ке но театрын мон улӥсько мукет улонэн: анай, кузпал, дышетӥсь луонлэсь быдэсак шутэтскисько. Мон отын шокасько егит ныллэн малпанъёсыныз, куддыр пересь кышнолэн кайгуэныз.

Можгаысь калык театре мон ветлӥ дас вить ар. Куинетӥ нылме ваеме бере соин кусып тӥяськиз. Режиссёр Мария Иванова монэ весь ӧте вал. Кык ар со монэ возьмаз. Та дыр ӵоже театре ветлымтэысьтым сюлмам кыӵе ке буш инты кылдӥз. Сое маин ке тырмытон понна, лэся, кышноосты «Такъян» клубе люкано кариськи. Мынам туж потӥз, отын ке но нылкышно ас пельпум вылысьтыз юрт утисьлэсь ныпъетсэ мед куштоз, ассэ огшоры адямиен мед шӧдоз шуыса. Сиён пӧран сярысь гинэ медаз сюлмаськы со. Мынам коркае чылкытгес уг шуиськы. Зэмзэ ке, пыжиськыны но уггес быгатӥськы. Но толэзьлы огпол «Такъянэ» огазе люкаськыса, дунне уз берыктӥськы, нош выль кужым сӥльвире, оло, пыӵалоз но.

Туж шумпотӥсько, выпускникъёсы сярысь ӟеч ивор кылӥсько, соос улон пагӟалэн эшшо но вылӥ лёгетаз тубо ке.

Кин тон, Тарас Аннапай?

Егит дыръям малпасько вал: мынам куинь нылъёсы луозы - Ирина, Марина но Карина. Со нимъёс огез но ӧз пыӵалэ, но нылъёсы куинь, зэм. Музон малпанэ вал педучилищеез, университетэз но аспирантураез йылпумъяны. Берлозэ быдэстыны ӧз кылды.

Туннэ туж потэ на ас гуртэлэсь историзэ гожтэме. Озьы ик Можга город сярысь покчиослы лыдӟон книга поттон борды басьтӥськыны малпасько (мӧйыослы вань), пичиысен карзэс гажаса мед будозы. Удмурт ӝытъёсты дасям материалъёсме но векчи ке но книгаен калык дорозь вуттысал. Эшшо одӥг гурезез берыктэме - ас выжы писпуме азьланьтэме - потэ на. Атаелэн атаезъя мон люкай ни 300-лэсь ятыр муртэ (тямыс выжы пушъет), анаелэн атаезъя - 150-зэ. Пумиськылӥм Вало шур дурын. Кулэ на вылэм анаелэн анаезъя ӵыжы-выжыосме бичаны.

Кызьы шедьтӥ сомында ӵыжы-выжыме? Педколледже огвакытэ вуылӥз Валентин Белыхлэн суредъёсын адӟытонэз. Буёлъёсын возьматэмын удмурт калыклэн историез. Со шоры учкыса, йырам шуак чилектӥз таӵе малпан: мон родняме гинэ но уг тодӥськы, возьыт!

Малпанъёс туж трос, олома но лэсьтэм потэ, но дыр уг тырмы. Суткаын часлы ке но дыр кузьгес луысал ке…

Паймисько

Малы асьмеос удмуртлыкмес утён бордын но ум тыршиське? Залын одӥг ӟуч мурт пуке ке, одно ик, солы валамон мед луоз шуыса, ӟуч сямен бӧтьыртӥськом. Озьыен, удмурт кылэз быдтонлы асьмеос муг сётӥськом?

Абдратэ асьме Правительство но. Мон дышетскыку, стипендия 30 манет вал, гуртысь пенсионер 12 манет басьяз, городысез - 24, куд-огез - 32. Нош студентъёслы али туж ичи стипендия тыро. Малы кунлы егитъёс мултэс луизы? Асьмеос ик эшшо ӟудӥськомы на, малы тужгес визьмоосыз кунгож сьӧры шонто.

Паймисько, кызьы одӥг анай-атайлэсь вордскыса, одӥг йӧлын сюдыса, ныл но пи сыӵе пӧртэмесь луо? Дыды шудэ мунёен, пичи корка лэсьтэ но сое утялтэ, нош эке машинаеныз ваньзэ кеся-пазя. Кызьы озьы инкуазе пыӵамын со?

***

Туж шумпотӥсько котькуд выль ӝужам сяськалы. Со шоры мыньпотытэк учкеме уг лу, соку ик ваньзэ вунэтӥсько, ас дуннеям выйисько.


Источник:

Иванова Т. С. Дыраз ӝужам сяська / Т. С. Иванова ; записала Е. Сараматова // Удмурт дунне. - 2007. - 29 июня. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"