Лопатина Надежда

Материал из Воршуда
Перейти к: навигация, поиск

Надежда Серафимовна Лопатина - удмурт гожъяськись, Удмурт Элькунысь сӥё-дано журналист.

Лопатина Надежда

Улон сюресэз

Надежда Лопатина вордӥськиз 1955-тӥ арын 9 шуркынмонэ Пичи Пурга ёросысь Гожня гуртын чугун сюрес вылын ужасьёслэн семьяязы. Школаын дышетскыкуз ик пиналъёслэн «Дась лу!» газетсылэн юнкорзы луэ. [1]

Герберын

«Пинал дыръям яратылӥ йыртӥянъёсын вырыны. Газетэ потэм ребуслы валэктонъёс ысъялляй. Кыӵе лӧптӥ асме вормисьёс пӧлысь адӟыса». [2]

«Яратоно газетам, оло, нуналлы быдэ гожтэтъёс ысъяллясько вал. Маке тунсыкозэ адӟисько яке школаямы усто ужрад ортче ке, мылкыдъёсме, малпанъёсме гожтыса соку ик редакцие лэзисько. Отысь ужасьёс акыльтозы шуыса уг малпаськы, лэся, вылэм», – серекъяса тодаз вае Надежда Серафимовна. [3]

Озьы бӧрысьгес нылаш кылбуръёс но пӧраны кутске. «Зэм, одӥгез учыр понна али ке но возьыт. Огвакыт гожъяськонам вис луиз. Йыре номыр уг лыкты, нош сюлэм шугектэ ни. Кутски но, А. Вотяковлэсь кылбурзэ, ӧжыт вошъяса, улаз Н. Николаева гожтыса, редакцие ыстӥ. Возьмасько-возьмасько, кылбурме уг потто, гожтэт но уг ысто. Берло ини Герман Алексеевич Ходыревлэсь юасько. Со шуэ: а тон ӧд вала шат, малы ӧй гожты. Мон «лушкаськисьёсты» уг гажаськы. Тӥни сыӵе ӟеч визь-нод сётӥз мыным. [2]

Тямыс классэ йылпумъямез бере, нылашлэн тросгес но умойгес гожъяськыны дышетскон мылкыдыз вуттэ сое Можга педучилище (19711975). Татын со суредаськыны дыше, устоосыз ужъёсыз отчы кельтэмын.[2]

Тодон-валанзэ муромытыны университетлэн удмурт филология факультетаз пыриз. Куинетӥ курсысен пӧртэм удысъёс пӧлысь аслыз журналистикаез бырйиз. Соин ик, 1980-тӥ арын университетын дышетсконзэ йылпумъяса, кема тунаса ӧз улы – пичи дырысеныз яратоно «Дась лу!» газетаз ужаны интыяськиз.[3]

Татын со выпускающий редактор, корреспондент, гожтэтъёсъя люкетлэн кивалтӥсез, кыл кутӥсь секретарь луыса ужаз. «Журналистикаез быръемысьтым одӥг пол но жаляме ӧвӧл. Кыӵе коллектив вал «Дась лу!»-ын: Герман Ходырев, Елена Глебова, Владимир Романов, Анастасия Гребина, Сергей Матвеев, Оля Бородина, Люза Бадретдинова… Ми сыӵе мылысь-кыдысь ужам… Куддыръя, ужысь кошкыны ӵыдытэк, быдэс ӝыт тема, рубрика малпаса пукылӥм». [2]

1991-тӥ арын Н. Лопатина «Кенеш» литературно-художественной журналэ кыл кутӥсь секретарьлэн должностяз выжтэмын, нош 1993-тӥ арысен «Удмуртия» книгапоттонниын технической редакторез вал. [1]

19962000-тӥ аръёсы Правительстволэн аппаратаз кылысь кылэ берыктон ёзэтаз валтӥсь ӧнерчи луыса ужаз.[1]

2000-тӥ арын берытскиз «Ӟечбур!» газетэ валтӥсь редактор луыса.[1]

«Газетэ берытскондылэн кыӵе зэмос мугъёсыз?» – шуыса юамлы со вера «Берытскеме потӥз… Аппаратын ужан интые урод ӧй вал… Но мӧзмыт» [2]

Гожъямъёсыз сярысь

Надежда Лопатина укмыс книгаослэн авторзы луэ. Со пӧртэм жанръёсын гожъяське: очеркъёс, пиналъёслы кылбуръёс но веросъёс. Нырысь учкыса, Надежда Серафимовна Лопатина туж йӧнъяськись тусо потэ. Сьӧдкысъем чебер нылкышно вераськыкуз котькуд кылзэ мерта, кожалод, ветлыкуз – котькуд вамышсэ учке. Но кӧня ке вераськем бере кит-кит серекъяны ӧдъя но, сыӵе малпанъёс тӧлӟо. Зэм, укыр шара сюлэмо но сое уд шуы. Оло, соин Надежда Серафимовна пичи дырысеныз йыртӥян дуннеын улэ? Ӵап отысь басьтэ со аслыз буйган но шумпотон. [2]

Н. Лопатиналэн кылбуръёсыз пичи классъёсын дышетскись пиналъёслы дуннелэсь чеберзэ адӟыны, урод сямъёслэсь утьыны дышето. Кылбуръёсаз валтӥсь инты басьто геройлы вакчияк, яркыт но образной характеристика сётыны быгатэмез. [1]

Надежда Серафимовна школаын уг ке но ужа, соослэн улэм-вылэмзы ялан син азяз бере, дышетӥсьёслэсь кулэяськонъёссэс тодытэк уг улы. Удмурт кылъя но литературая урокъёс нылпиос понна шулдыресьгес, тунсыкоесьгес мед луозы шуыса со пӧртэм пумо йыртӥянъёсын бичетъёс дасяны кутскиз. [4]

Озьы 1990 арын лыдӟись доры солэн «Кылъёсын шудон» книгаез вуиз. [3]

Lopkon.jpg

Туж уго со аспӧртэм,

Ачиз выре кроссвордэн.

Пичи мурт ӧвӧл ни со,

Мылкыдын егит ке но.

Кроссвордъёсыз но солэн

Поттэмын ни книгаен.

«Кылъёсын шудон» нимыз. [5]

Со дырысен эшшо тямыс пумоез книгаосыз потӥзы на. «Буква вӧзы буква», «Кызаузы оло узы»; куинь люкетэн «Азьлань, тодон-валан люканы»=«Вперед к познанию тайн!», «Чимали букваос»=«Буквы в прятки разыгрались» (кык пол поттэмын) удмурт но ӟуч кылын гожтэмын. Шаерамы кун кылъёс сярысь законэз кутэм бере ӟуч но удмурт кылын огдыре гожтэм книгаослэн кулэлыксы шӧдскымон будӥз. Ӟучомем нылпиос азьын кылдылӥсь шуг-секытъёсты ӟеч тодыса, Надежда Серафимовна букваосын но лыдпусъёсын али гинэ тодматскыны кутскись нылпиослы та книгаоссэ дасяз. [3]

Надежда Серафимовналэн книгаосыныз тодматскыса валаськод, макем чебер, узыр но жингрес асьме удмурт кылмы. Кылбуръёсыз, пӧртэм пумо йыртӥянъёсыз нылпиослэсь тодон-валанзэс муромыто, анай кылын данъяськон мылкыд пыӵато. [3]

Наградаосыз но премиосыз

"СМИротворец" ӵошатсконын

Удмурт Элькунысь Кун Кенешлэн Данъян кагазэз, 2001.

Трокай Борисов нимо калык премилэн лауреатэз, 2005.

Удмурт Элькунлэн Данъян кагазэз, 2009.

«Патриот России» синпель медаль, 2009.

Туспуктэмез Элькунмылэн «Данъян пулаз» пыртэмын, 2010.

«СМИротворец» ӵошатсконын «Ӟечбур!» газет лауреатэз луиз, 2010.

Библиография

Книгаосыз

Азьлань, тодон-валан люканы! = Вперед к познанию тайн! – Ижевск, 2005. – Кн. 1. – 16 с. – Текст рус., удм.

Азьлань, тодон-валан люканы! = Вперед к познанию тайн! – Ижевск, 2006. – Кн. 2. – 16 с. – Текст рус., удм.

Азьлань, тодон-валан люканы! = Вперед к познанию тайн! – Ижевск, 2006. – Кн. 3. – 16 с. –Текст рус., удм.

Буква вӧзы буква... : Удмурт алфавитья дасям кроссвордъёс, ӥыртӥянъёс, кылбуръёс, шудонъёс-ӵошатсконъёс. – Ижевск : Удмуртия, 1994. – 102 с.

Буквы в прятки разыгрались... = Чимали букваос : головоломки, стихи-загадки, игры, ребусы на рус. и удм. яз. – Ижевск, 1998. – 31 с.

Буквы в прятки разыгрались... = Чимали букваос : головоломки, стихи-загадки, игры, ребусы на рус. и удм. яз. – Ижевск, 2001. – 31 с.

Ӟабыльтӥсь чуръёс : пиналъёслэн веросъёссы, выжыкылъёссы, сценкаоссы, кылбуръёссы, серемес чуръёссы. – Ижевск, 2004. – 143 с.

Кызаузы оло узы : нылпиослы кылбуръёс. – Ижевск : Удмуртия, 1995. – 32 с.

Кылъёслэсь "тубат лёгетъёс" : пиналъёслы шудон-йыртӥянъёс. – Ижевск : Удмуртия, 2003. – 32 с.

Кылъёсын шудон : кроссвордъёс, йыртӥянъёс, чайнвордъёс. – Ижевск : Удмуртия, 1990. – 80 с.

Лыдъяса вуи дасозь... = Сосчитал до десяти… : стихи, пословицы, загадки, задания с числами на рус. и удм. яз. – Ижевск, 2002. – 62 с.

Статьяосыз

Армиысь - пырак "Ӟечбур!"-е // Ребристые берега души : художеств. произведения. Публицистика. О Валерии Батуеве / Эрик Батуев. – Ижевск, 2009. – С. 382–383.

Близкий друг и наставник детей // Эти строчки простые мои... / С. Перевощиков. – Ижевск, 2006. – С. 268–269.

Венгрие вуылэмед потэ ке... : [гл. ред. газ. "Ӟечбур!" о ее содержании, особенностях] // Удмурт дунне. – 2007. – 21 нояб. – С. 7.

Горд эмезь // Азвесь кышетэн толэзь : веросъёс : семьяын лыдӟон книга. – Ижевск, 2007. – С. 75.

Дэмен // Кизили. – 2008. – № 8. – С. 5.

Ӟечбур, гажано эшъёсы! // Голос юности. – 2010. – № 6. – С. 16–17.

Здравствуйте, я ваша газета! : "Ӟечбур!" исполн. 75 лет // Изв. Удмурт. Респ. – 2005. – 12 янв. - С. 4.

Мар отын – паймымон ӧсъёс сьӧрын, яке Владимир Коркин суредасьлэн улонысьтыз кӧня ке гожъёс // Ӟечбур! – 2005. – 23, 30 июня, 7, 14 июля. – С. 8.

Туала улон пичиослэн синмынызы // Кизили. – 2005. – № 10. – С. 12–13.

Тыршись муртэ синйылтытэк уг кельто // Ӟечбур! – 2009. – 10 дек. – С.1.

Узыр куды // Ӟечбур! – 2008. – 4 дек. – С. 7.

Чимали букваос // Кенеш. – 2005. – № 10. – С. 49–51.

Чорыгась // Зарни дэремен шунды : семьяын лыдӟон книга. – Ижевск, 2006. – С. 72–73.

Яркыт "дэрем" дӥсяса, умоезлы оскыса... // Ӟечбур! – 2009. – 15 янв. – С. 1.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 1,3 1,4 Уваров А. Надежда Лопатина (1955) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 160.
  2. 2,0 2,1 2,2 2,3 2,4 2,5 Лопатина Н. Одӥг вуэ кык пол пыро! / записала З. Рябинина // Удмурт кизилиос : очерки, зарисовки, интервью (2001-2007). – Ижевск, 2007. – С. 190-191.
  3. 3,0 3,1 3,2 3,3 3,4 Журавлёва А. Йыртӥян дуннелэн ватосъёсыз // Кенеш. – 2003. – № 9. – С. 80-85.
  4. Христолюбова Л. Лопатина (Николаева) Надежда Серафимовна // Удмуртские женщины. ХХ век : библиогр. справ. / Л. Христолюбова. – Ижевск, 2002. – С. 309.
  5. Ермолина А. Тӥ сое уд тодӥське // Ӟечбур! – 2005. – 6 окт. – С. 4-5.