Глебова Елена

Материал из Воршуда
Перейти к: навигация, поиск

Елена Кондратьевна Глебова - удмурт гожъяськись, журналист.

514.jpg

Улон сюресэз

Удмуртиысь тодмо журналист Глебова Елена Кондратьевна вордскиз Татарстанысь Агрыз ёросысь Сарсак-Омга гуртын 1934-тӥ арын 4-тӥ шуркынмонэ (ноябре). [1]

Ленӥлы вить толэзь тырмиз гинэ, атаез улонысь кошкиз. Солэсь нуныямзэ адӟытэк будэменыз, дыр, туж сюлэмаз пыӵаз бӧлякысьтызы Аннук апаезлы синмаськем муртлэн вешамез. Сизьым арес но тырмымтэ мурт макем вала вылэм мусоямлэсь шумпотон сётӥсь кужымзэ. Арлэн тужгес но вакчи уй вадесаз сьӧсь фашизмлэн армиез кунмылэсь гуртъёссэ, городъёссэ куашкатъяны урдскем. Сое ваментыны кужым люкан сярысь ивор басьтэм воргоронъёс ӵукна ӟардыку гуртысь кошкиллям ини. Кӧня ке нуналскын тросэз семьяос атайтэк кылизы. Собере кышномуртъёсты но пинал нылъёсты Москва доры окопъёс гудыны келязы. Нош гуртэ кылем калык, ю-нянь будэтэм, пудо вордэм сяна, ожмаськисьёслы сиён, шуныт дӥськут келян сярысь сюлмаськиз. Пиналъёс но палэнэ ӧз кыле, быгатэмзыя юрттыны тыршизы: картошка миськизы, ыжгон сузязы. Школае но Лена война вакыт мыноно луиз. Урокъёс бере классэнызы эшшо бусые ю-нянь люканы юрттон уже ветлӥзы. Трос бӧрдонъёсыз, ыштонъёсыз адӟоно луизы асьме калык со вакытэ. Леналэн но ӵужмуртъёсыз, нэнэезлэн вынъёсыз ожын быризы. Секыт вал. [2]

1949-тӥ арын семилеткаез йылпумъяз. Ижкарысь педучилищеез йылпумъяса, 1953-1954-тӥ аръёсы Пичи Пурга ёросысь Вуж Монья гуртысь школаын дышетӥсь луыса тыршиз. Нош 1954-тӥ арын Удмурт пединститутысь историко-филологической ёзэтаз дышетскыны пыриз. [3]

1959-тӥ арын Елена Удмурт пединститутэз быдтыкуз малы ке но школаосы интыос ӧй вал. Альфред Артамонов пинал нылэз тодэ вал, соин "Комсомолец Удмуртии" газетэ ӧтиз: отчы, пе, кылысь кылэ берыкъясь кулэ. Соку та газет кык кылын потылӥз. Толло студенткаез туж умой пумитаз но уже кутӥз газетлэн редакторез Л. П. Емельянов. Нош удмуртэныз соку кивалтӥз Г. С. Симаков. Егит ужасьлы со туж трос юрттӥз, тодон-валан сётӥз, берыктон удысаз ваньзэ лад-лад валэктылӥз. Елена Глебова понна со университетэз пырпотэм кадь луиз. [4]

1968-тӥ арын "Удмуртиысь комсомолец" газет пытсаськиз. Со интые потыны кутскиз пиналъёслы "Дась лу!" газет. Г. С. Симаковлэн ӵектэмезъя, гожтэтъёсъя ёзэтэн кивалтӥсе П. К. Чернов пуктӥз Е. К. Глебоваез. Нош 1979-тӥ арысен со луиз кыл кутӥсь секретарь. Нуналаз кык сю пала гожтэтъёс вуылӥзы: пиналъёслэн ужъёссы ӝӧк вылэ гурезь мында люкасько вылэм. Озьы Елена Кондратьевна тодматскиз элькунысьтымы пӧртэм интыосын улӥсь пинал гожъяськисьёсын. 1970-тӥ арын «Дась лу!» газетлэн редакцияз юнкоръёслэн нырысетӥ слётсы ортчем. Пиналъёслы ужрад туж ярам. Бӧрысь соос сыӵе пумиськонъёсы арысь аре ветлыны мылкыд карылӥзы ни. Озьы «Дась лу!» газетын ужасьёслэн син азязы гожъяськись нылпиос будӥзы... [3] «Пинал гожъяськисьёс ас нылпиосмы кадь потылӥзы. Нош слётъёс вань районъёсын сямен ортчытъяны тыршылӥм. Пиналъёсын нимысьтыз пумиськылыны но школаосы поталлям. Пумиськонъёс трос луо вал. Оглом чаклано ке, бадӟым уж лэсьтэмын,» – тодаз вае Елена Кондратьевна. [4]

1984-1986-тӥ аръёсы Елена Кондратьевна выжиз ужаны «Молот» журналэ. Отын кыл кутӥсь секретарь луыса ужаз. Та должностьын ик 1986-1991-тӥ аръёсы ужаз «Кизили» журналын. [1]

Покчиосын журнал пыр кусып тупатыны Е. Глебовалы туж юрттӥз Ижевскысь педучилищеын дышетскемез. Отын «Детская литература» предмет но вал. Покчиос понна чеберъяса веран люкетэгес но кадь, соослы действие но мед луоз. Собере чуръёстэ мед лыдӟоз но, син азяз яркыт суред мед пуксёз. Map ке сярысь вераськод, сое киыныз кырмыны, бордаз йӧтскыны, синъёсыныз адӟыны мед быгатоз, шуыса ужзэ радъяны тыршиз. [4]

Гожъямъёсыз сярысь

«Гожъяськыны кутскисьёс тазьыгес шуо: малпанъёсы сюлэмам тымиськизы но соосты кисьтэм потыны кутскиз. – Мынам озьы ӧй вал. Институтэз быдтэм дырысеным газет-журнал поттонын весь ужано луиз. Соку мон ас удысме нуон сярысь гинэ малпаськылӥ. Азьлогес пиналъёслы чеберлыко произведениос гожтон сярысь йыре но ӧз лыктылы. Ойдо, Герман Алексеевич (Ходырев) со удыссэ нуэ но нуэ, писательёс чуръёссэс солы ваё но ваё, нылпиос кылбур-веросъёссэс ысъяло но ысъяло. Нош "Кизили" журналэ вуи но нырысь-валысь мынӥ Дышетӥсьёслэсь тодон-валанзэс будэтонъя институтысьтызы дошкольной отделэ. Отысь Программаен тодматскыса, син азям пуктӥ вуоно покчи лыдӟисьёсмес», – тӥни озьы вера Елена Кондратьевна пиналъёслы веросъёс гожъяны кутскемез сярысь. [4]

"Кизили" журналын чиньыен лыдъямон гинэ ужасьёс люкаськизы. Соин ик кылкутӥсь секретарь котькинлэсь ужзэ быдэсъяно луылӥз. Произведениос вуэмъя, соосты поттэммыя, методикаез чакламъя — соиз но, таиз но уг тырмы кадь, гожъяськисьёс но уг сюро. Мукет но пӧртэм ужрадъёс кылдылӥзы. Тӥни сое чакласа ик йыре нош мар ке но лыктэ, нош мар ке но гожтэ. Кылсярысь, аффрикатаосын герӟаськем "Ӟазегпи возьмасьёс" веросэз кылдӥз. [4]

Нырысетӥ веросэз «Кизили» журналын 1986-тӥ арын потӥз. Елена Кондратьевналэн верамезъя, веросъёс гожтыны аслаз пичи дырысьтыз тодэ ваем учыръёс юрттӥзы. Собере нылпиоссэ но будэтӥз. Кыӵегес соослэн выросъёссы, мар котырынгес бергало, мар соослы кулэ кадь... Сыӵе юанъёс йыре лыктыса, ма но со сярысь верамез потыны кутскиз. Веросъёсыз пӧлын пумиське покчиослэн янгыше кылемъёссы сярысьёсыз но. Тани «Ӵуштым зын» нимояз одӥг пияш, мемизэ шумпотто кожаса, дӥськутсэс гладить карыны басьтӥське. Нош ужез уг пӧрмы..."Вож майтал" улонысь учыр вылын гожтэмын. Ма, кыӵезэ гинэ верос ӧз гожты, котькудӥз улонысь басьтэмын но адӟемын. [3]

«Кизили» журналын ужаны кутскемез бере веросъёсыз люкаськизы. Соосты бумага вылэ печатласа, «Удмуртия» издательствое вамыштӥз. Рукописьсэ басьтӥзы, кема ӧз ӝегатэ. Озьы 2000-тӥ арын «Шаньги талась атас» книгаез кылдӥз. [4]

Е. Глебова туж умой шӧдыны но валаны быгатэ покчиослэсь мылкыдъёссэс но малпанъёссэс. Солэн веросъёсыз вакчиесь гинэ, но валамонэсь огшоры сюжето, туж мур возьмато пиналлэсь пуш дуннезэ. Котькуд веросаз юмоке шедем пинал одно ик бадӟым эшезлэсь юрттэт шедьтэ. Тросэз Е. Глебовалэн веросъёсыз «Чагыр, чагыр дыдыке» радиопередачаосы но пыртэмын вал. [1]

Премиосыз

«За доблестный труд. В. И. Ленинлэн вордскем дырысеныз 100 ар тырмонзэ данъяса» юбилейной медаль, 1970

СССР-ысь журналистъёслэн огазеяськонзылэн ёзчиез, 1976

«Отличник печати» значок, 1980

«Ужысь ветеран» медаль, 1985

1995 – Удмурт Элькунысь сӥё-дано журналист ним.

Библиография

Книгаосыз

Шаньги талась атас : нылпиослы веросъёс. – Ижевск : Удмуртия, 2000. – 75 с.

Статьяосыз

Горд сюй : верос // Кизили. – 2006. – № 5/6. – С. 6–7.

Гуӵинысь льӧмпуос : выжыкыл // Кизили. – 2007. – № 2. – С. 10.

Кылын шаплы шудонъёс : поговорки // Кизили. – 2009. – № 9. – С. 2 обл.

Пашпу мульыос : верос // Кизили. – 2009. – № 11/12. – С. 10–11.

Пӧсь табань : верос // Кизили. – 2005. – № 1. – С. 8.

Шулдыр куара // Азвесь кышетэн толэзь : веросъёс : семьяын лыдӟон книга / люказ но радъяз В. Ившин. – Ижевск, 2007. – С. 29.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 Марданова Л. Елена Глебова (1934) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 143.
  2. Глебова Е. Вормон ас кожаз ӧз лыкты // Кизили. – 2008. – № 5-6. – С. 4-5.
  3. 3,0 3,1 3,2 Глебова Елена Кондратьевна // Вордскем кыл. – 2011. – № 3. – С. 22.
  4. 4,0 4,1 4,2 4,3 4,4 4,5 Лаптев А. «Пинал гожъяськисьёс ас нылпиосмы кадь потылӥзы» // Ӟечбур. – 2001. – 8 марта. – С. 4.