Денисов Виктор Николаевич

Материал из Воршуда
Перейти к: навигация, поиск

Даур ортче, куара кыле

Денисов В. Н.

Вашкала удмуртъёслэсь но мукет калыкъёслэсь улэм-вылэмзэс асьмеос тодыны быгатӥськом пӧртэм книгаосысь, газетъёсысь, научной журналъёсысь но документъёсысь. Вань на мукетыз шыкыс – фонограммархив, ӵапак отын утиське, шуыны луоз, даур куара.

Дуннеысь тодмо фонограммархивъёсын кемалась эшъяське но вань удмурт гожъямъёсты кылзэ-люка Историяя, кылъя но литературая Удмурт институтысь наукая ужась, филология наукаосъя кандидат, доцент, куарая архивъёсты утёнъя калыккуспо проектлэн координаторез но Финляндиысь Кастрен огазеяськонлэн ёзчиез Виктор Николаевич Денисов.

Тодосчи вордӥськемын Сьӧлта ёросысь Кырчим гуртын, улэ Санкт-Петербургын.

- Виктор Николаевич, школадэс йылпумъякуды, тӥ тодӥськоды ни вал-а, кин луоды?

- Тодӥсько вал, историк луо шуыса. Школа бере мон лыктӥ Иже, ужай «Ижсталь» заводын. Дышетскеме потэ вал Удмурт пединститутысь историяя факультетын. Но англи кылы чутӥз. Соин ик одӥг арзэ ветлӥ преподаватель доры. Со шуэ: малы тыныд историяя факультет, вамышты романо-германскояз, кылыд вольыт, дышетскыны пӧрмытод. Малпай, кылъёсты тодэм, зэмзэ но, уз люкеты. Озьы 1971-тӥ арын пыри кунгожсьӧр кылъёсъя факультетэ. Практикаме ортчи Сьӧлта ёросысь ик Юмга-Омга школаын. Диплом басьтэме бере отчы ик ужаны мынӥ. Бускель Югдон гуртэ шор ёзо школа усьтэмзы бере одӥг толэзь отын ужай на.

- Малы сыӵе ӧжыт?

- Республикаысьтымы Калыкез дышетонъя министерство монэ лэзиз Воронежысь кун университетэ, аспирантурае пырон азьын одӥг аръем стажировкаез отын мед ортчом шуыса. Вуи Воронеже, нош мыным шуо: профессоред кошкиз, тыныд татын номыр карыны. Соку документъёсме лэзи Москвае, Калыкез дышетонъя министерствое, ачим бертӥ доре. Толэзь но ӝыны ортчыса, Ленинградэ ӧтён вуиз. Отын но монэ нокин возьмамтэ. Ленинградысь кун университетысь англи филологияя кафедраын шуизы: стажёръёслы чакламын 13 инты, нош тӥ 23-тӥез луиськоды ни. Университетэтӥ ветлонъям, син шорам йӧтӥз фонетикая кафедралэн лабораториез. Со мыным тодам вайытӥз Удмурт кун университетысь техлабораториез, ми отын фонетикая эскеронъёс, выль приборъёс лэсьтылӥм. Ленинградысь кун университетысь лабораториын ужась дэмлаз: ветлы, пе, кунгожсьӧр кылъёслэн фонетиказыя но методиказыя кафедралэн кивалтӥсез Лидия Бондаренко доры. Профессор шуиз: милям филологиез тодо, нош техникаез уг валало, ойдо дорамы, стажёрлы одӥг интымы вань на. Юаз, кыӵе мынам специализацие. Англи кыллэн историез, шуисько. Со пумитам: тӥ удмурт ук, эскере асьтэлэсь кылдэс. Озьы мон, стажировкаез ортчыса, аспирантурае пыри. Наукая кивалтӥсе Наталья Светозарова профессор дэмлаз удмурт кылын ударениез эскерыны.

Нялтас вераса, удмурт кылэз мон ӧй дышеты, но, удмурт семьяын будэмын бере, вераськи чылкыт.

- Университетын но ӧд дышетэ-а?

- Университетын одӥг курс гинэ вал, со но ог 12 час, нуиз Валентин Кельмаков.

- Маке йырады кылиз-а?

- Кельмаков ӟучъёслы со ваньмызлы зачёт пуктӥз, нош мыным шуиз: тон удмурт, мын дасяськы, 4-5 нунал ортчыса, лыктод. Дасяськи, маиз ке йырам кылиз, вылды.

- Аспирантурае направлениен лэземын вал бере, ужаны Иже ик бертӥды-а?

- Бертӥ 1980-тӥ арын, ужаны интыяськи Удмурт кун университетысь кунгожсьӧр кылъёсъя факультетэ. Мон фонетикая специалист, но со курсэз мукет преподаватель нуэ ни вал, соин ик дышетӥ англи кыллы. Но сыӵе югдур мынам сюлмыя ӧй вал, соин ик кошки Ленинградэ. Ужаны интыяськи технологияя институтэ, кунгож сьӧрысь студентъёсты ӟуч кыллы дышетӥ. 1986-тӥ арын – доцент луи.

- Соку ик, иське, тунсыкъяськыны кутскиды удмурт фольклор записьёсын?

- Бергес. 1990-тӥ аръёсы странаын югдур ушъямон ӧй вал. Милям институтамы но секыт вакытъёс кылдӥзы, аспирантъёс ӧвӧл, уждун ичи. Соку монэ ӧтизы коммерциен вырись структурае. Выль ужан амалъёсты но выль технологиосты эскерон но соосты улонэ пыӵатон бордын ужай, вуылӥ Финляндие, Голландие, Швецие. Та удысын ньыль ар бергай. Соку монэ ӧтизы Голландие, ӵектӥзы кунгож сьӧрысь вуэм егитъёсты уже интыян, выль интые дышон ужпумъёсын юрттыны. Собере сыӵе ик фирма усьтӥмы Питерын. Вакчияк верано ке, мон юрттӥськи Финляндиысь, Голландиысь, Швециысь бизнесменъёслы ужбергатонзэс радъяны.

2001-тӥ арын тодматски Голландиысь профессорен Тьеерд де Граафен. Со славян кылъёсъя специалист, та адямиез туж умой тодо Европаын, ужа куарая фольклор архивъёсты утён бордын. 2006-тӥ арын со ӵектӥз мыным Санкт-Петербургын куарая лаборатория кылдытыны но тодмо учёнойёслэсь сюсьлэсь валикъёсы, кассетаосы гожтэм ужъёссэс цифровой форматэ выжтыны. Питерын ми, куарая архивъёсты утёнъя проект бордын ужасьёс, бырйим куать тодосчилэсь материалъёссэс, малы ке шуоно соос, тузон пӧлын костаськыса, бырысалзы гинэ. Ми соослы кыкетӥ улон сётӥмы, цифровой форматэ гожтӥмы. Ваньмыз лэсьтэмын вал Европаын кутэм стандартъёсъя. Табере фонограммархивын утиське Питерысь Петер Скорик тодосчилэн керек фольклор сярысь ужез. Евсей Пейсахлэн крымчакъёс сярысь узыр коллекциез. Туннэ нуналлы та калык ышемын ини, нош милям тыршеменымы, куараоссы кылемын. Тодосчиослэн материалъёссы туж трос вал, но соосты туала форматэ гожтыны нокинлы но нокытын.

- Мар тужгес секытэз вал?

- Лаборатория кылдытон понна кулэ выль техника. Туала компьютер басьтыны секыт ӧвӧл. Тужгес шугез вал кассетаен ужась магнитофон шедьтыны. Малы ке шуоно совето вакытэ поттэм магнитофонъёс ярантэмесь ини, нош выльёссэ табере уг лэсьто. Собере, та удысын ужась специалистэз но шедьтыны капчи ӧй вал. Питерысь лабораториез кылдытыкумы, ми вазиськимы Венаысь фонограммархиве, техникая экспертъёслэсь юрттэт курыса. Соос кыӵе ке складысьтызы шедьтӥзы «Студер» магнитофонэз. Ми сое Венаысь Питере вайим. Шкаф выллем бадӟым, секыт, 32 кило кыске. Катушкаосын яке кассетаен ужась магнитофонысь куара мынэ компьютере, со луэ ини цифровой сигнал. Но та ужлэн нырысетӥ но тужгес капчи люкетэз гинэ ай. Кыкетӥез – мар оцифровать каремын, ваньзэ сое пыр-поч гожтоно бумага вылэ но компьютере. Котькуд записьлэн луыны кулэ аслаз файлэз: кин, кытын но мар гожтэмын, кыӵе амалэн но кыӵе техникаен, кыӵе арын. Азьло сое паспорт шуо вал, табере метаданнойёс. Валамон ини, таӵе гожъямез ке ӧвӧл, компьютерын, DVD-ын утиськись материаллэн дуныз но кулэлыкез ичи, малы ке шуоно, аръёс ортчыса, нокин но уз тоды ни, кин но ма отын гожтэмын.

- Шонер ке валасько, кассетаысь, бабинаысь компьютере гожтыса кельтэм материал дауръёслы утемын?

- Пырак озьы шуыны уг луы. Куинетӥез сюлмаськон – цифровой форматэз утён. Котькуд вить-сизьым ар куспын та формат ялан выльдӥське. Куарая но аудио-, видеоархивъёсъя калыккуспо огазеяськон (IASA) нимысьтыз стандартъя ужа. Техника лэсьтӥсьёс сое санэ басьтыны кулэ, выль компьютеръёсты малпакузы-поттыкузы, вань со записьёс ас понназы (автоматически) выль форматэ мед шедёзы, медаз ыше шуыса. Нош асьме странаын таиз ласянь кышкытлык вань, малы ке шуоно Россия та калыккуспо огазеяськонэ уг пыры, озьы ик звуковой архивъёсты утёнъя асьмелэн ӧвӧл огъя стандартъёсмы. Туннэ нуналлы Культурая министерство та шугъяськытӥсь югдурлы саклык уг висъя. Нош 15-20 ар ортчыса, оло, Санкт-Петербургысь фонограммархивысь материалъёс вужмозы ини, соосты эшшо но выльгес форматэ гожтоно луоз.

- Кытын утисько вашкала удмурт материалъёс?

- Удмурт материалъёс утисько Европаысь тужгес тодмо фонограммархивъёсын: Венаын но Берлинын. Нырысь ик верало Венаысез сярысь. Татын куарая архив усьтэмын 1899-тӥ арын. Туннэ нуналлы отын 64 сюрс запись лыдъяське, пӧлазы вань удмурт материалъёс но. Соос герӟаськемын Нырысетӥ дунневыл ожен. 1915-тӥ-1918-тӥ аръёсы Австриысь крезьгурчи Роберт Лах Россиысь военнопленнойёсты Эдисонлэн фонографез вылэ гожтыса кельтӥз. Соосты валаны кыскемын вал дуннеысь тодмо тодосчиос. Кылсярысь, 25 удмуртлэсь вераськемзэ-кырӟамзэ эскериз мадьяр тодосчи Бернат Мункачи. Роберт Лах вань та гожъямъёсты нимысьтыз сборникен поттӥз. Удмуртъёслы но комиослы сӥземез печатласькиз Венаын но Лейпцигын 1926-тӥ арын. Вераны кулэ, 2007-тӥ-2009-тӥ аръёсы Венаысь фонограммархиве вуылыкум, солэн директорез Дитрих Шюллер мыным та сборникез кузьмаз. Татысь куарая архивын вань материалъёс туала форматэ выжтэмын, оцифровать каремын ини. Соин ик удмуртъёс сярысь вань гожъямъёслэсь электронной копиоссэс но мыным сётӥзы. Тани со сборник сьӧрам. Татчы пыртэмын 80-лэсь трос удмурт кырӟан. Кылсярысь, вань таӵеез:

Тӧдьы юсь лобӟоз,

Мамыкез усёз.

Солэсь но мамыксэ

Кин октоз?

Та кырӟанэз быдэстэм Мамадыш уездысь Вуж Юмья волосте пырись Улынгуртысь Василий Семёнов.

- Берлинысь фонограммархивын мар паймымонэз вань?

- Отын озьы ик утиське Нырысетӥ дунеевыл ож дыръя Германиысь лагерьёсы шедем удмуртъёслэн вераськемзы. Ваньзэ-ӧвӧлзэ гожтэмын 12 адями, кылсярысь, Кузьма Пушин, Павел Баженов, Филипп Ившин, Яков Главатских но мукетъёс. Материал туж умой утиськемын, ӟеч кылӥське. Та гожтэмъёс озьы ик мон киын ини. Берлинысь ик архивын утисько Роберт Пелисьелэн ужъёсыз. Ӵапак та тодосчи нырысь ик гожтӥз удмуртъёслэсь вераськемзэс. Германиысь тодосчи (выжыезъя со француз) 1911-тӥ-1912-тӥ аръёсы удмуртъёсты гожтон вылысь вуылэмын Глазов уездысь Понино, Ляпигурт, Кортыш но Эбгашур гуртъёсы. Удмуртъёсты сяна, со гожтэ бигеръёсты, ӟучъёсты, коми-пермякъёсты, мордваосты. Та материалъёсты учкыны, басьтыны лэзё наукаен вырисьёслы гинэ, со фонограммархивъёслэн валтӥсь куронзы. Мыным удалтӥз соосын тодматскыны. Маиз паймымон: Пелисье кырӟанъёсты но удмуртъёслэсь вераськемзэс сяна, информантъёс сярысь пыр-поч характеристика кельтэм. Кылсярысь, огез сярысь тазьы гожтэм: «Илья Семёнович, 30 арес котыр, крестьян воргорон, пыриськемын ӟуч-япон войнае, туж ужась но зэмос интеллигент» яке таиз: «Кирилл Щупин, крестьян, 20 арес, сумбыр-самбыр выросъёсыз, укыр востэм но туж оскымон, вордӥськем гуртысьтыз нокытчы кошкемез уг поты». Шӧдӥське, Пелисьелы кельшиллям удмурт адямиос, со туж шунытэн соос сярысь гожтэ.

- Нош кытын Кузебай Гердлэн фольклор коллекциез?

- Удмуртъёс сярысь вить коллекция утиське Сант-Петербургысь Ӟуч литературая институтлэн (Пушкинский Дом) фонограммархиваз. 1930-тӥ арын музыковед Елизавета Гиппиус кичӧлтэмъя радъямын вал пӧртэм республикаосы экспедициос «800 песен народов СССР» сборнике материал люкан вылысь. Удмуртие вуиз нырысетӥ экспедиция, кивалтӥз соин тодмо крезьгурчи но фольклорист Яков Эшпай. Солы юрттӥз удмурт писатель, поэт но драматург Михаил Петров. Со вал март толэзь, сюресъёс уродэсь. Но шаерамы соку ӵапак мыно вал Удмурт искусстволы сӥзем нуналъёс. Соин ик М. Петровлы удалтӥз. Со лымшор но уйпал удмуртъёслэсь кырӟанъёссэс гожтӥз, озьы ик Татарстанысь но Кировысь удмуртъёслэсь гуръёссэс, ваньзэ-ӧвӧлзэ 152 кырӟан (138 номеро коллекция). Но та гожъямъёс тырмыт ӧй вал. Соин ик сборникез дасясьёс вазиськизы Удмуртиысь научно-иследовательской институтысь наукая ужасьлы В. Пчельниковлы. Со мынӥз Ува но Сьӧлта ёросъёсы. Отын кубыз, крезь, узьыгумы, арган шудэм улсын гожтэмын вал эшшо 66 кырӟан. Троссэ быдэсто Сьӧлта ёросысь Иткул гуртысь С. Прозоров но Ува ёросысь Выльгуртысь Е. Бобровалэн хорез. Та луэ ини кыкетӥез (141 номеро) коллекция. 1937-тӥ арын «800 песен народов СССР» сборниклэн дась вал ини 6 томез: белорус, удмурт, чуваш, осетин, карел но коми кырӟанъёс, жаляса верано, потӥз белоруссъёслэн крезьгуръёсынызы гинэ.

Куинетӥ (210 номеро) коллекциез люказ фольклорист Зинаида Эвальд 1940-тӥ арын. Со фонограммархивлэн студияз гожтӥз тодмо лингвистэз Василий Алатыревез. Алатырев быдэстӥз сюан, армие келян но куно пумитан гуръёсты, ваньзэ-ӧвӧлзэ 13 кырӟан.

240 номеро коллекция ньылетӥез луэ, тазэ люказ Кузебай Герд. Со гожтэмын 1920-тӥ аръёслэн пумазы. Со эшъёсыныз ӵош, ог 15 мурт, ужаз Зура (Эгра), Ува, Вавож, Можга ёросъёсын. Сюсь валикъёс вылэ со гожтӥз 59 кырӟан-веран.

Ньылетӥез коллекциез (со утиське 432 номер улын) гожтӥзы ини Москваысь консерваториысь фольклористъёс 1937-тӥ арын. Л. Бачинский но М. Бывальцев вуылӥзы Глазов ёросэ, 30 кырӟан гожтӥзы.

Озьыен, Санкт-Петербургысь ӟуч литературая институтлэн фонограммархиваз туннэ нуналлы утиське 101 валик 1925-тӥ-1940-тӥ аръёсы гожтэм 320 удмурт кырӟан-веранъёсын.

- Кузебай Гердлэсь улонзэ-творчествозэ эскерисьёс пусъё, солэн туж бадӟым коллекциез вал шуыса, озьыен, ваньмыз шедьтэмын ӧвӧл на?

- Ученойёслэн верамзыя, К. Гердлэн куарая коллекцияз 100 пала сюсь валикез вылэм. Но Санкт-Петербургысь фонограммархиве вуиз 37-ез гинэ, кырӟанъёсын материал. Но тунсыко мукетыз учыр. Соловкиын дыръяз ини Кузебай Герд Иосиф Наговицынлы гожтэт ыстэ. Отын ивортэ: тазалыке уродме, мон сюлмаськисько архиве пумысен, отын туж трос удмурт мадиськонъёс, выжыкылъёс, гожтэм произведениосы. Кузпалы Ижысь кошкиз но, солы архивеным йырин ӧй вал ни, дыр. Туж курисько со ужъёсты шедьтыны но утьыны, кыӵе ке научной учреждение сётыны. Озьы ик Москваысь тодмоосы доры кельтэмын фонографической записьёсын архиве, 300 валикъёс вылын гожтэмын удмурт кырӟанъёс но гуръёс.

Та гожтэтъя валано: записьёсыз солэн зэмзэ но трос вылэм, малы ке шуоно К. Герд арлы быдэ экспедициосы поталляз.

- Тӥляд Санкт-Петербургысь фонограммархивъёсысь удмурт записьёсты вань. Озьыен, кылӥды, дыр, Кузебай Гердлэсь но куаразэ?

- Кылзӥ. Но доказать кароно на, со Кузебай Гердлэн куараез шуыса. Кин кырӟа, мае быдэстэ, соиз пыр-поч гожтэмын. Но со записьёсты лэсьтӥсьёс (отын куинь тодмотэм куара) асьсэды шараяллямтэ. Боз-боз куараенэз, со Михаил Тимашев, дыр. Одӥгез одно ик Кузебай Герд, солэн куараез векчи вылэм, куинетӥез тодмо ӧвӧл. Вераны кулэ, та куарая архивлэн ӟечлыкез сокем умой ӧвӧл ни, малы ке шуоно К. Герд сое трос пол кылзылэм, нош сюсь валикъёс солы чакламын ӧвӧл. Германиын уго соосты огпол кылзо но копия лэсьто вал.

- Кытын эшшо утисько удмурт куараос?

- Туж тунсыко но вылӥ ӟечлыко удмурт коллекциос утисько Эстонысь Литературая музейлэн архиваз, со кылдытэмын 1927-тӥ арын, отын 16 сюрслэсь ятыр записьёс, со пӧлысь 730-эз удмурт материалъёс. Озьы ик узыр архив вань Финляндиын, Венгриын, асьме дорын Историяя, кылъя но литературая Удмурт институтын. Но соосты цифровать карыны сюлмаськоно, малы ке шуоно магнит лентаез аръёс уг жаляло, соос уродмо. Соин ик Удмуртиын одно кылдытыны кулэ куарая лаборатория но фонотека-хранилище.

- Ӵапак со ужпумен ик тӥ лыктӥды Иже?

- Историяя, кылъя но литературая институтлы 80 ар тырмиз, мон вуи эшъёсме ӟечкыланы. Куное буш киын уг ветло бере, вайи туж паймымон изданиез. Со Нидерландыысь политиклэн Николаас Висенлэн (со пумиськылӥз Пётр I но мукет тодмо адямиосын) «Северная и Восточная Тартария» изданиез. Та кык томъем книга гожтэмын вал вашкала голланд кылын. 10 ар ӵоже Голландиысь но Россиысь тодосчиос валче ужазы но, кылем арын потӥз куинь томъем издание. Ваньзэ-ӧвӧлзэ 500 экземпляр гинэ, сое басьтыны уд шедьты, нокытын уг вузало. Малпасько, институтлэн юбилеезлы со усто кузьым луиз.

Собере, мон ужасько Британиысь проектъя: со нимаське «Историяя, кылъя но литературая Удмурт институтысь фольклор записьёсты утён». Британиысь кун библиотека но Чарльз принцлэн фондэз юрттэмен, та институтын кылем арын кылдытӥм лаборатория, 500 сюрс манет тыр басьтэмын вал техника. Со ужаны кулэ Европаын чаклам стандартъёсъя. Туэ февраль толэзьысен мынэ ини куарая архивъёсты (татын сюрс пала кассетаос но катушкаос) выль форматэ (цифровой) выжтон. Туннэ нуналлы ог 10 процентэз материалъёс туала амалэн гожтэмын ни. Лабораторилэсь ужзэ радъяны милемлы юрттэ Эстониысь куарая режиссёр Ян Тамм. Удмуртиысь архивъёсты цифровать каримы ке, соосты ыстыны луоз Эстониысь архивъёсы, нош отысь татчы вайыны удмурт материалъёсты. Озьы ик копиоссэ келяны Британиысь библиотекае.

- Чарльз принцен пумиськыса, кыӵе малпанды кылиз та адями сярысь?

- Котыр ласянь туж умой. Солэн секретарьёсыз ӟеч ужало, дыр. Малы ке шуоно монэн пумиськыкуз, тодэ ни вал: кин со азьын, кыӵе удысын тыршисько, мар сярысь вераськоно. Со туж визьмо юанъёс сётъяз, вераськонмы кыкмылы ик тунсыко но пайдаё вал. Принц эшъяське вал академикен, искусствоведэн Дмитрий Лихачёвен. Дмитрий Сергеевичлэсь сюлэмшугзэ валаса ик, коньдон сётӥз А. Пушкинлэсь Ӟуч литературая институтын утиськись рукописьёссэ (8 том) нимаз изданиен поттыны. Таӵе вамыш возьматэ адямилэсь валанзэ, визьзэ.

- Азьланяз мар карыны малпаськоды?

- Ужасько книгае бордын. Со нимаськоз «Удмуртские фольклорные записи в ведущих фонограммархивах Европы», ог 400 бамъем луоз. Огкыл шедьтӥм ке, потоз Ижын, мар ке ӧз пӧрмы ке – Голландиын.

- Ужпум коньдон борды пыкиське-а?

- Коньдон сюроз, мылкыдыд-чиданэд гинэ мед луоз.

Источник:

Денисов В. Н. Даур ортче – куара кыле / В. Н. Денисов ; записала Г. Савина // Удмурт дунне. - 2011. - 30 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"