Кельмаков Валентин Кельмакович

Материал из Воршуда
Перейти к: навигация, поиск

Одӥг ӧртӥ ортче улон сюрес

В. К. Кельмаков

Ӟуч кылтодосчи Шахматов аслыз ужан программа кылдытэм 14 арес дыръяз. Удмурт тодосчиез Виктор Туганаевез удмурт калыклы, Удмурт шаерысь инкуазьлы но сое эскеронлы туж трос ӟечсэ лэсьтэмез понна Вож адями шуыса нимазы. Удмурт кун университетысь филология наукаосъя докторез Валей Кельмаков профессорез та кык визьмо адямиос вӧзы пуктӥ ке, мыным пумит нокин но уз вазьы, дыр.

Кукмор уг данъяськы сапеген гинэ

Ӵап та Кукмор музъем вылын, Тыло гуртын, 1942-тӥ арын вордскемын Валентин. Атаез 1940-тӥ арын финнъёсын ожмаське, собере – немецъёсын. 1941-тӥ арын ноябре бырыны шеде. Малпаз меда Кельмак Байметович Байкеев, кык толэзь ортчыса, солэн кыкетӥ пиез вордскоз шуыса? Тазэ, оло, тодӥз ик, нош профессор луонзэ –ӧз.

Йошкар-Олаын

Милемлы 1959-тӥ-1964-тӥ аръёсы Удмурт пединститутын бадӟым шуд усиз. Дышетӥзы визьмо адямиос: А. А. Поздеева, Роза но Даниил Яшинъёс, И. В. Тараканов, З. А. Богомолова, А. А. Александров но мукетъёсыз. Группаенымы кивалтӥз Иван Васильевич Тараканов. Со ик быгатӥз Валентинэз кыскыны аслаз сюресаз – наукае.

Коньдон ласянь шуг ке но, туж шудо вал егит дыр. 1961-тӥ арын куинетӥ курсысен ыстӥзы Шаркан ёросысь Билиб гуртэ. Быдэс толэзьзэ Валентин валэн ужаз.

Институтын но нокыӵе ужлэсь ӧз кышкалля, стипендиез быре ке, станцие вагон ӝоктыны мынэ вал.

Котькыӵе мудрон операез-балетэз Валентин валалляз, огпол учкыса, книгаез – огпол лыдӟыса. Соин, лэся, деканмы А. Д. Игнатьева сое «югыт йыр» нималляз. Спортэн ӵошатсконъёслэсь но ӧз палэнскылы. Яратылӥз кырӟаны-вераны. Группамы концертъёсын поталляз пӧртэм гуртъёсы. Зэм, одӥг арзэ Валентин ас группаяз ӧй вал. Со выжиз Йошкар-Олаысь пединститутэ.

Мон нырысь ик пусйысал солэсь юбо кадь шонер сылэмзэ, кин ке азьын ноку някыръяськымтэзэ. Милям ноку но кылэммы ӧвӧл солэсь «шуг» яке «секыт» шуэмзэ.

Шумайлов урамысь общежитиын улыкумы, ми ас даурамы нырысьсэ, дыр, дӥськутмес миськыны малпамы. Огмы но ум пӧрмытӥське нылкышно ужез лэсьтыны. Туж курадӟим. Мон акыльтӥ. Со буйгатэ: азьланяз умойгес пишмытом ай. Дышим.

Ӟазег, пе, ушъяськем: ветлыны но, уяны но, лобаны но быгатӥсько. Солы шуиллям: бызьылы вал тон койык кадь, уя чипей кадь, лоба ӧрӟи кадь, тӥни соку ушъяськы. Валентинлэн ужъёсыз укшало койыклэн, чипейлэн но ӧрӟилэн быгатэмъёссылы. Ӧвӧл ушъяськон сямыз гинэ. Иван Тараканов огаз книгаяз гожтэ: «Ӝужыт, веськрес, синмаськымон, дыртыса вамышъясь студент, вылласянь ке учконо, ас эшъёсызлэсь сокем номырин ик уг висъяськы вал кадь, чик келлятэк дышетскемзэ но удмурт кылэз мултэс зол яратэмзэ лыдэ басьтоно ке ӧй вал. Тае валаса, мон солы нимысьтыз вералляй финно-угроведение удысысь выль книгаос сярысь, озьы сое удмурт кылъя научной кружоклэн ужаз кыски, нош III курсэз йылпумъямез бере дэмлай Мари пединститутын дышетскыны, ӵыжы-выжы кылмес тодон вылысь».

Москва

Иван Тараканов гожтонзэ тазьы йылтэ: «Удмурт пединститут бере со дэмламын вал СССР-ысь Наукаосъя академилэн Кылтодонъя институтэзлэн аспирантураяз».

Со гожтӥз «Удмурт кыллэн Кукмор диалектэз» темая диссертация. Озьы филология наукаосъя кандидат луиз. Кивалтӥсез вал Москваын улӥсь коми профессор В. И. Лыткин.

Дасо аръёс ортчыса, 1993-тӥ арын, Москваын ик доцент В. К. Кельмаков доктор диссертацизэ утиз. Нимаське со тазьы: «Удмурт диалектъёслэн кылдэмзы но азинскемзы».

Тарту, Сыктывкар, Иж…

Финн-угор калыкъёслэн шоркаръёсазы ӵемгес ортчыло кылъёсысь но культураосысь пӧртэм ужпумъёсты эскеронъя пумиськонъёс. Конференциос, сипозиумъёс, кенешонъёс юнмато финн-угор тодосчиослэсь но калыкъёслэсь кусыпъёссэс.

Уг луы быдэс исьнерез чигтыны. Но капчиен тӥяло отысь нимаз ньӧръёссэ. Озьы ик уд вормы огазеяськем калыкъёсты. Матысь калыкъёс огъя кужымен гинэ быгатозы ас кылзэс но культуразэс вуоно дауръёсы кельтыны.

Финн-угор калыкъёс дунне вылын ог 30 миллион. Юн кусып возён понна, ог-огедлэсь кылдэ тодыны кулэ. Тӥни маин герӟаськемын тодмо удмурт тодосчилэн В. К. Кельмаковлэн быръем улон сюресэз.

- Ачид нош кӧня кылэз тодӥськод? – юай мон солэсь.

Со малпаськиз но чиньыоссэ куасалъяса лыдъяз:

- Удмурт, ӟуч, бигер, пор, коми, венгер, немец, финн.

Тямыс люкаськиз кадь.

Кельмаков шонертӥз:

- Зэм, ваньзэ огкадь уг валаськы, одӥг-огеныз вераськисько но гожъяськисько. Мукетыныз вераськисько гинэ. Куинетӥосыныз аслым кулэ литература лыдӟисько. 1992-тӥ-1994-тӥ аръёсы Финляндие кык пол вуылӥ. Отын удмурт кыллы дышетӥ. Ачим финн кылэз дышетӥ. Капчиен вераськыны но гожъяськыны быгатӥсько.

Трос тодэ бере, со мылысь-кыдысь тодматске пӧртэм кылъёсын гожтэм ужъёсын. Таӵе тодон-валан солы юрттэ. Ӵошатонъёс пыр, калыкъёсмылэсь историзэс но улон-вылонзэс мур валано. Яратоно удысъёсыз пӧлысь огез – диалектъёсты чаклан. Со сярысь верано ке, быдэс Удмуртиез, уй паласен лымшорозь, Кельмаков ортчиз студентъёсын ӵош.

Ужъёсызлэн пуштроссы сярысь юаме бере, Валентин шуиз:

- Асме ачим ушъям кадь медаз луы шуыса, номыр уг вера. Тод мукетъёсызлэсь.

Мар карод? Вуылӥ Историяя, кылъя но литературая институтэ. Пумиськылӥ филология наукаосъя кандидатэн Людмила Кирилловаен. Тани мар со мадиз:

- Вань удмурт тодосчиос пӧлысь мон сое самой вылӥе пуктӥсько но удмурт кизилиен лыдъяны кемалась дыр вуэмын шуыса малпасько. Кыӵе гинэ юанэн эн вазиськы, котьку рос-прос валэктон сётоз. Юанъёс кылдыку, визь-кенеш басьтӥськом. Аспӧртэм энциклопедия выллем. Ужпумез сэрттэ-пертче аслаз дунъетэныз. Фонетикаез эскеронэ кутӥз копак выль амал. Сое валэктыны кылъёс но уд шедьты.

Нош кыӵе ӟеч кичӧлтӥсь вылэм Валентин Кельмакович! Со кичӧлтэмъя ортчытъяны кутскизы пермь (коми-зырян, коми-пермяк но удмурт) кылъёсъя симпозиумъёс. Ижын 1986-тӥ, 1988-тӥ, 1994-тӥ но 1996-тӥ аръёсы радъямын вал, Сыктывкарын – 1990-тӥ, 1992-тӥ, 1998-тӥ но 2000-тӥ аръёсы, мукет конференциос Кельмаковтэк уг азинско. Тани туэ тулыс ортчиз калык куспо симпозиум. Солэсь ужзэ радъязы Германиысь, Финляндиысь но Удмуртиысь профессоръёс Бернард Комри, Пиркко Суйхконен но Валей Кельмаков.

Тодосчи котькыӵе визьмо медло, но бӧрсяз вамышъёсыз ӧвӧл ке, со умойтэм. Валентин Кельмакович трос сюлмаське егитъёсты будэтон сярысь. Соосты симпозиумъёсы но конференциосы кыска. Алигес Кудымкаре куиньзэ аспирантсэ нуллӥз. Мартэ соосты Москваысь Ломоносов нимо университетэ вуттылӥз. Аспирантъёсыз ветлӥзы Петрозаводске. Вань солэн удмурт кыллы дышетскисьёсыз Голландиын, Германиын, Финляндиын.

Со туж трос лэсьтӥз удмурт кыллэсь фонетиказэ но морфологизэ азинтонын. Ӝутӥз ноку «гырымтэ выльвылъёсты» – удмурт диалектологиез, исторической грамматикаез, удмурт кыллэсь морфологизэ, синтаксисэз, удмурт ономастикаез, удмуртъёслэсь вераськемзылэсь пӧртэмлыкъёссэс чакласа, чебер вераськонъя книгаос поттӥз. Кылъёсты шонер кутон ласянь вераськылӥз радио пыр. Калыклы рос-прос валэктылӥз, кызьы шонер кутоно выль терминъёсты. Визьмо тодосчилэн огез бадӟым удысэз – программаос кылдытон. Исторической грамматикая, диалектологияя но удмурт кылтодонлэн историезъя ужъёс дасяса, нырысь ачиз соосъя студентъёсты дышетӥз, курсовой ужъёс но дипломъёс гожъятӥз. Табере мукетъёсыз но сыӵе программаосъя дышето. Паймымон адями ноку уг жадьы кожалод. Экспедициоссы дыръя студентъёсын концерт возьматъяло. Озьы калыкен уката каньылэн тодматске. Диалект материал бичан сяменызы калык кырӟанъёсты люкало. Валентин Кельмаковичлэн люкам калык кырӟанъёсыз быдэс книгаен поттымон. Устооссэ кылыны луэ ни радио но телевизор пыр. Кылсярысь, тани огез:

- Марлы тӥяй, марлы тӥяй

Льӧмпулэсь но сяськазэ?

Али ке но ӧй тӥясал,

Сьӧд льӧмзэ ке тодысал…

Кунгож сьӧрын

Таиз Германиын улӥсь Михаил Гайдслер В. К Кельмаковлы удмурт кылын тазьы гожтэ:

Гажано Валентин Кельмакович!

Туж кема дипломной уж кыстӥськиз, но али дась со! Шумпотӥсько, мон сое туннэ Тӥледлы лэзьыны быгатӥсько шуыса. Малпамея сояз ӧжыт гинэ вылез но, тунсыкоез но, но ужлэн самой валтӥсь люкетэз – со 5-тӥ глава, кудаз мон коми но удмурт кылъёсысь синкопа учыръёс ӵошатӥ. Туж шумпотысал, куке со сярысь вераськыны быгатӥмы ке.

Кызьы улӥськоды? Тазалыкты юн-а? Туж ӵем Удмуртия сярысь малпасько, Ижкарлэсь мӧзмисько. Туж зол мае конференцие лыктэме потэ, но али экзаменъёслы дасяськоно. Но, может быть, трос уксё но дыр шедьтӥ ке, мон сюрприз кадь лыкто! Салам вералэ вань удмурт эшъёслы! Ӟырдыт саламен Миши.

Нош тани ма вераз мыным Удмурт кун университетысь аспирант Леонид Ившин:

- Валей Кельмакович луэ удмурт но быдэс финн-угор кылтодонысь одӥгез тодмо но валтӥсь тодосчи. Ас удыссэ юнме шорысь ӧвӧл быръем, туж трос ужъёссэ поттыса вуиз ни. Унозэ лыдӟо кунгож сьӧрысь адямиос.

В. К. Кельмаков Удмурт кун университетын мылысь-кыдысь нуэ лекциоссэ, эскероно темазэ пыр-поч валэктэ. Студентъёс солэсь кышкалогес. Малы ке шуоно ассэ туж юн возе зачётъёсын но экзаменъёсын. Нош курданы кулэ ӧвӧл, дыр. Котькуд экзамен дыръя, наукаез тодӥськод-а, уд-а, сюлмын пуке ик пичи ке но кышкан. Нош удыстэ кӧня ке валаськод ке, Валентин Кельмакович шӧдытэк уз кыльы.

Адями корка пуктыны малпа ке, коръёс, пулъёс, кирпич, шифер но мукетсэ люка. Соку гинэ корказэ ӝутыны кутске. Кылтодон наукаын – тырмыт тодон-валан басьтыса, унозэ ужпумъёсты сюлэм пыртӥз поттыса но кыллэн азинсконаз тодмотэмзэ усьтыса, Кельмаков тырмыт лэсьтӥськон арбериос люказ ни. Удмурт кылтӥрлыкъя «корка пуктонын» кузё кариськыны правоез туж бадӟым.

Ми ӵошен учкиськом компьютерысьтыз вань ужъёсызъя списокез. 193 соос! Ӵошатон понна: П. Н. Перевощиковлэн – 34, В. И. Алатыревлэн, Т. И. Тепляшиналэн но И. В. Таракановлэн – быдэн 150 пала. Валентин Кельмаковичлэн ог кызь ужез книгаен печатламын. Нимаз вордскыны вуымтэ на ньылез «Диалектная и историческая фонетика удмуртского языка», «Мынам вераме потэ»… (дышетӥсьёслы но нылпиослы удмурт диалектъёсъя лыдӟон книга), «Удмуртъёслэн вераськон сямъёссы, «Из истории удмуртского языкознания».

Кыл сярысь малпанъёссэ тазьы вераз на:

- Котькуд кыллэн аслаз азинскон сюресэз. Тани Венгриын XVIII-XIX дауръёсы дас сюрс пала выль кыл кылдытэмын. Вить сюрсэз пыӵаз литературае. Финнъёс, XVI даурысен кутскыса, асьсэос кылдытӥзы туала узыр но кужмо кылзэс.

Кин удмурт кыллэн азинсконэз сярысь сюлмаське, со валалоз, мар сярысь вераськон мынэ. Асьме удмурт кылэз ке басьтоно, демократие выжон аръёсы удмурт кылэз выльдон, умоятон но узырмытон паськыт радъяськиз. Но выль удыс уг ортчы янгышъёстэк но пумитъяськонъёстэк. Венгръёслэн выль кылдытэм кылъёссы ӝыныез юнмазы бере, малы асьмелы но чылкытгес удмурт кылын дыртоно ӧвӧл? Удмурт кыл удмурт медло.

- Кудзэ кылэз чылкак удмурт сямен вераны луэ, сое ик пыртоно но басьтоно асьмелы, будэтэ Валентин. – Кылсярысь, малы послелог интые ум шуиське нимбер? Со 30-тӥ аръёсы ик кылдытэмын ини.

Бен, пумен дышиськом ни йырмурт, кун, элькун вераны. Уй палъёс сямен сиськонни яке пыронни шуыны чебер вылэм, лымшор калыкъёслы уг кельшы. Нош –ни- суффикс вакчияк гинэ инты шуэмез возьматэ ук. Яке тросэз уг тодо, мар со «лем» кыл. Лемтэй но лемиськем кылъёс мае возьмато шуыса юаськод ке, адямиос шуо: лякиськем. Лем кыл вашкала дыръя воштэ вылэм клей кылэз.

Тӥни озьы, удмурт лыдӟисьлы кулэ вылэм туннэ огзэ, ӵуказе мукетсэ кылмес ӟечгес тодыны, ӟечгес вераськыны но гожъяськыны. Озьы вылӥегес ӝутомы удмуртлыкмес. Та сюрес вылын мукет тодосчиосын ӵош асьмеды шонер валтэ Кельмаков профессор. Азьлане вамыштозы соослэн дышетэм студентъёссы но аспирантъёссы. Валей Кельмакович дорын али сизьым кузя аспирант дышетске, одӥгез кандидат луиз.


Источник:

Кельмаков В. К. Одӥг ӧртӥ ортче улон сюрес / В. К. Кельмаков ; записал П. Скобелев // Удмурт дунне. - 2001. - 31 авг. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"