Тубылов Валентин Кузьмич

From Воршуд
Revision as of 14:42, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Мынӥсь муртэ кайгу уг погырты![edit]

Тубылов.jpg

Тани со – тып-тып мугоро, бадӟым сюлэмо удмурт – Валентин Кузьмич Тубылов. Пужит (пумит) пельтӥсь тӧлъёслы ноку сётскисьтэм мурт туннэ азьлань валтэ шаерысьтымы но сьӧрлось удмуртъёсты.

Удмуртъёс – туж дӥсьтӥсь но шаплы адямиос. Выжыосмы пӧлын туннэ вань ни быдэс дуннемылы тодмо адямиос. Удмурт калыклэн зэмос синмаськонэз но данъяськонэз – визьмо но сэзь удмурт, «Удмурт кенеш» огазеяськонлэн тӧроез Валентин Кузьмич Тубылов.

Та адями – нокыӵе шугадӟонъёсты тодӥсьтэм зэмос батыр: нокыӵе сильтӧл, нокыӵе тӧлпери, нокыӵе кайгу сое ноку уз куасалты, уз погырты. Та адями – пӧсь тылӝузэ кисьтӥсь ӝуась кизили кадь: кыдёкысен пиштэ солэн мукетъёсызлы югыт кузьмась яркыт тылыз, туж кыдёкысен шӧдӥське сюлэмез небӟытӥсь няськыт шунытэз.

«Удмурт кенеш» огазеяськонэн кивалтэм сяна, Валентин Кузьмич Тубылов Дуннеысь финн-угор калыкъёслэн Кенешонъя комитетсылэн адямиез луэ.

- Валентин Кузьмич, таӵе батыр адямилэн выжыосыз но туж юнэсь, дыр?

- Можга ёросысь Сьӧрсак куторын вордӥськи. 1924-тӥ арын кылдэм со. Выжыосы азьвылгес чылкак мукет интыын улӥллям. Гуртазы укмыс юртъер вылэм. Одӥг чебер нуналэ шукрес тылпу быдэс гуртэз ньылэм. Курадӟыны кылем адямиослы юри висъяллям нюлэс. Та интыын ик кылдэм кутормы но.

- Отӥяз улон-вылонды кызьы азьланьтӥськиз?

- Семьяямы тямыс нылпи вылэм – кылимы вить кузя: ньыль пи но одӥг ныл. Туннэ ваньмы тазаесь. Анае, Ксения Ивановна (куторамы Очей апай шуылӥзы), но атае, Кузьма Михайлович, лачмыт сямо адямиос вал. Анае вордӥськемын вылэм Карашур гуртын, атае – куторамы ик. Тубыловъёс – оглом юн адямиос. Пересь атае шуылэм: «Тубыл выжы медаз быры!»

Нырысь ик дышетски Гордошурын. Собере –ӟуч Букшур гуртын. Сизьым классэз йылпумъяй Бадӟым Кибьялан. Шор ёзо школаын дышетско шуыса, Пычасэ мынӥ вал – тямыс классэз йылпумъяса кошки. Улон секыт вал: дышетскем понна но дун курылӥзы. Мынӥ Можгала – фабрикаослы но заводъёслы ужасьёсты дасясь училищее.

Можгалан дышетсконме йылпумъяй но, монэ келязы Сарапул ёросэ. Кам шур сьӧрын Октябрьский посёлокез ӝутӥмы. Тӥрен ужаны яратӥсько вал бере, удысэ сюлэмыя вал. Армиозь татын тырши. Армиын ГДР-ын вал. Гуртэ вуи Выль аре – 4-тӥ январе. Ӵуказеяз ик дорам лыктӥз колхозлэн тӧроез. Шорам учкыса, сюлмысьтыз куриз: «Бригадирлэсь сюлмаськонъёссэ ас вылад басьтоно луод, пие». Собере гурт кенеш вал. Отын монэ бригадире огкылысь юнматӥзы ни.

Сӥзьылозь ужай. Собере дышетскыны кошки Сарапулысь совхоз-техникуме. Татын но улон капчи ӧй вал: дӥськут но, кӧттыр но кулэ. Ми, армиын кыдам егит воргоронъёс, киосмес алвыламы тырыса ӧм пукылэ: ӝытъёсы, уйёсы, шутэтскон нуналъёсы но ужаллямы – тыро вагонъёсты ӝоктылӥмы, мукет удысъёсы вутскылӥмы. Стипендимы вӧзы туж ӟеч ватсэт вуылӥз.

Техникумын дышетскыкум ик, калык понна ужанлэсь ӧй палэнскылы: куинь ар ӵоже училищеысь егитъёслэн профкоменызы кивалтӥ. Техникумез «витьёслы» йылпумъяй – мыным горд диплом сётӥзы.

Отӥяз ыстӥзы Пичи Пурга ёросысь «Молния» колхозэ. Татын тямыс ар ужай: нырысь ик бригадир вал, собере – агроном, парткомлэн секретарез, колхозлэн тӧроезлэн воштӥсез. Отӥяз басьтӥзы партилэн Пичи Пурга райкомаз – кыкетӥ секретаре бырйизы. Сизьым ар ужай та удысын.

Собере укмыс ар ӵоже вал партилэн Пичи Пурга райкомезлэн нырысетӥ секретарез.

- 1986-тӥ арын «тӥ доры лыктӥзы» секыт нуналъёс…

- Кӧня ке адями ӝожтӥськонъёс гожъяны кутскем. Шаеренымы кивалтӥсьёс но со вакытэ воштӥськизы: Валерий Константинович Марисов шутэтскыны кошкем бере, партилэн Удмурт обкомезлэн нырысетӥ секретарез луиз Пётр Семёнович Грищенко. Выль адями, валамон ни, югдурез ӟеч уг тоды на вал.

Отӥяз ми сярысь гожъяз «Советская Россия» газет. Со ивортӥз: партилэн Пичи Пурга райкомезлэн нырысетӥ секретарез ас тодэмезъя кивалтэ, лэсьтӥськон удысэз аналтӥз, нош сое син азяз син азяз возьыны кулэ вал исполком. Зэм, ваньмыз со малпамын вал. Лэсьтӥськон удысысь но нокыӵе шекъёсты ӧз шедьтэ. Валамон ни: таӵе югдур кылдэм бере, ужаны ӧз луы. Тон сярысь шуш малпанъёс вордӥськыло ке, кызьы возиськод на сыӵе азьын? Мон котькыӵе интыын агроном луыса ужаны быгатӥсько.

Ужысьтым ас мылкыдыя кошки. Ар но ӝыны ӵоже агроном луыса тырши «Малопургинский» совхозын. Зэм, муос татын начаресь ик: пыд улын – луо. Удысам кутыны ӧдъяй азьмынӥсь амалъёсты. Нырысетӥ араз ик туж ӟеч картошка будэтӥмы: удалтонлыкез кык полэс шумпотон ваиз. Отӥяз совхозын ужасьёс директоре дэмлало вал. Таӵе ӵектон, валамон ни, азьвыл кивалтӥсьлы ӧз яра. Ӵапак та вакытэ шутэтскыны кошкиз Асан совхоз-техникумлэн азьвыл кузёез Борис Авдеевич Меркушев. Адямиос малпазы, луоз: таӵе батырез мед воштоз таӵе ик етӥз но юн сямо адями.

Выль уж сярысь азьвыл ик ивортӥз гурт удысъя но сиён-юонъя министрлэн воштӥсез Александр Петрович Осинкин. Александр Петровичен куке но ӵош дышетскимы Ижысь гурт удысъя институтын. Дорам огпол лыктыса, министрлэн воштӥсез дэмлаз:

- Асан совхоз-техникумлы выль кузё кулэ. Ветлыса учкы – оло, оскалтод?

Асан совхоз-техникуме азьло но вуылӥ вал ини: ёросысьтым кивалтӥсьёслы татысь азьмынӥсь амалъёсын тодматскыны дэмлалляй. Выль удыс ӵектэмзы бере, совхоз-техникуме вуылӥ. Ветлэме бере ик ӵуказеяз кенеш ортчытӥзы. Огинэ люкаськылӥзы техникумын дышетскисьёс, совхозын ужасьёс. Огъя кенешын выль кузёлы дурбасьтӥз куинь сю укмыстон мурт.

- Борис Авдеевич Меркушев бере выль кузёез адямиос кызьы пумитазы?

- Оглом секыт ӧй вал татын. Уж но, дышетон но радъяськизы. Директоре монэ бырйыкузы, Борис Авдеевич Меркушев шутэтске вал. Бертӥз но ваче пуким, валче ужан сярысь кенешим. Ог-огмылэсь киосмес кырмыса шуим:

- Секыт учыръёсы ог-огмес ум куштэ.

Азьвыл кузёзэс куд-огез курланы выризы ик. Сыӵеослы шуылӥ: мон номыре уг тодӥськы, со сярысь кылэме ик уг поты. Ачим та адямиез ноку но уг курла.

Выль удысын маке пӧрмытӥ ке – адӟоды. Ӧй быгаты ке – синмам ик вералоды. Совхозэ лыктэме бере, улон-вылонэ но радъяськиз. Мыным висъязы кык бӧлето юрт. Азьвылгес ӵектӥзы вал куинь висъетозэ. Соку мон алӥ:

- Таяз интыялэ трос нылпиё, ёрмись семьяез.

Куд-огез соку кушетскизы. Кызьы озьы: совхоз-техникумлэн директорез сыӵе дуно макелэсь палэнтӥське? Совхоз-техникумын удмуртъёс ужало. Шутэтскон нуналъёсы но сюлмо тыршись калык пӧлы вуылӥсько вал. Куд-огез нош ик паймылӥзы: ма, директормы таӵе вакытэ но ялкаронэз уг тоды шат?

- Ӵапак татысен тӥ луиды Удмурт Элькунысь Вылӥ Кенешлэн депутатэз.

- Азьвыл малпасько вал: алнаш музъем вылын ик ужало ай, татысь калыкез ӟеч ужъёсын шумпотто. Ачим ӧвӧл дыръя, алнашъёс вылӥ кивалтон ёзэ дэмлаллям. Депутат луон понна нюръяськонэ монэн ӵош пыриськизы алнаш музъем вылын вордӥськем пи - нылпиосты эмъясь, Ижысь медициная кун институтысь дышетӥсь Иван Георгиевич Гришкин но Алнаш ёросысь Суворов нимо колхозлэн тӧроез Владимир Тимофеевич Сабуров.

Депутат луон понна, адямиос зол ик ти ёросысь весь вань колхозъёстӥ. Калык ӟеч мылкыдын пумиталляз. 1990-тӥ арын апреле ортчизы быръёнъёс. Мыным дурбасьтӥз куатьтон процентлэсь уноез калык. Ӟеч мылкыдо адямиосын валче депутат луи. Тужгес бадӟым тау Кузёбай гуртысь калыклы. Кузёбайёс удмурт адямилэсь сюлмаськонъёссэ тужгес зол шӧдо кадь. Удмурт йылолъёс-сямъёс но татын ӟеч утисько.

Нырысетӥ сессиысен ик депутатъёс Вылӥ Кенешлы Тӧрое дэмланы ӧдъязы. Кема малпаськи. Собере дӥсьтӥ ик. Нимылы дурбасьтӥзы партилэн Сарапул райкомезлэн нырысетӥ секретарез Владимир Петрович Мантуров, партилэн Ижысь Первомай райкомезлэн нырысетӥ секретарез Юрий Михайлович Седлов, мукет адямиос.

Зэм, мон огнам ӧй вал. Партилэн Удмурт обкомез вылӥ удысэ дэмлаз Удмурт шаерысь Министръёслэн Кенешсылэсь Тӧрозэ Геннадий Николаевич Дмитриевез (партиезлэн данэз ӧй вал ни бере, солы туж кӧня ке депутатъёс – автозаводысь пумитъяськизы) инженерез Александр Фёдорович Шишкинэз, Удмурт Элькунысь Вылӥ Кенешысь адямиослэн юанъёссылы валэктӥсь ёзлэсь кивалтӥсьсэ Ювенарий Нестерович Русскихез.

Нюръяськон оглом капчи ӧй вал. Вылӥ Кенешлэсь Тӧрозэ депутатъёс бырйизы, куаразэс лушкем сётыса. Сю сизьымдон депутат пӧлысь мыным дурбасьтӥз укмыстон куатезлэсь уноез.

- Вылӥ Кенешен кивалтон аръёсты капчиесь ӧй вал: ӵапак та вакытэ быдӟым кунмес зуркатъязы тужгес кышкыт учыръёс.

- Бен, тужгес огыр-бугыр вадес учыраз. 1991-тӥ арын август толэзе кылдӥз кышкыт учыръёсъя кун комитет, 1993-тӥ арын август толэзе ыбылӥзы Россия Федерацилэсь Вылӥ кенешсэ. Кенешъёсты быдтыны турттылӥзы. Нош асьмелэн Вылӥ Кенешмы кутӥз интыосын аскивалтон сярысь закон (Россиын – нырысьсэ). Ортчытӥмы быръёнъёс. Калыкез лёганы ӧм сётэ.

1993-тӥ арын август толэзе Россия Федерацилэсь Вылӥ Кенешсэ ыбылэм бере, Удмурт Элькунлэсь Вылӥ Кенешсэ но сэрттыны малпало вал. Куд-огез керӟегъяськылӥзы: шаерамы нокыӵе воштӥськонъёс уг шӧдӥсько, Удмурт Элькунысь Вылӥ Кенеш соослы пыд пуктэ. Укно улэ лыктыса, огез но мыдыз кесяськылӥзы: Удмурт Элькунысь Вылӥ Кенешлэсь Тӧрозэ Валентин Тубыловез ужезлэсь мозмытоно. Куд-огез нимтэм гожтэтъёс ыстылӥзы, телефон пыр жингыртылӥзы.

1991-тӥ арын август толэзьлэн ӵапак со шукрес нуналаз дасяськи вал Москвае – татын ортчыны кулэ вал федерацилэсь валче ужан, ог-огедлы юрттон сярысь огкылзэ эскеронъя кенеш (КПСС-лэн ЦК-езлэн Генеральной секретарез Михаил Сергеевич Горбачёв таӵе ужрадъёсы ӵемысь люкалля вал шаеръёслэсь кузёоссэс). Ӵукна номыре тодытэк мынӥ Ижысь аэропортэ. Самолёт малы ке дыраз ӧз вуы: сое витьыса пукисько депутатъёслы чаклам висъетын. Ӵапак соку жингыртӥз Удмурт шаерысь Министръёслэн Кенешсылэн Тӧроезлэн воштӥсез Виталий Александрович Соловьёв.

- Кылӥд-а шукрес иворез? – малы ке дырекъяса юаз Виталий Александрович. – Али гинэ радио пыр ивортӥзы: кышкыт учыръёсъя кун комитет кылдэм.

Югдурез ӟечгес тодон вылысь, соку ик лэзи радиоез: кышкыт учыр сярысь ӵапак кыкетӥзэ ивортӥзы. Таӵе кышкыт нунал кемдэм бере, Москвае ӧй ни мыны – берытски Вылӥ Кенеше. Жингыртӥсько одӥгезлы, кыкезлы – нокин уг вазьы. Соку ӧй чида ни – жингыртӥ Россия Федерациысь Вылӥ Кенешлэн Тӧроезлы Руслан Имранович Хасбулатовлы. Секретарез шуэ:

- Москваын нокыӵе керӟегъяськонъёс уг шӧдӥсько кадь. Котькытын гань-гань.

Собере ик вуыны ӧдъязы пӧртэм пумоез иворъёс (телеграммаос). Одӥгаз гожтӥськем КПСС-лэн ЦК-езлэн огдырлы юнматэм Генеральной секретарез Геннадий Иванович Янаев, мукетаз - Россия Федерациысь Вылӥ Кенешлэн Тӧроез Борис Николаевич Ельцин. Одӥгез тазьы ӵектэ, мукетыз - озьы.

Мон соку ик люкай Президиумлэсь кенешсэ. Вераськи радио пыр, телевизор пыр. Шуи: вань сюлмаськонъёсты Вылӥ Кенеш ас вылаз басьтэ, Конституцияя сыӵе эрикрадэз (правоез) ӧвӧл ке но.

Соку ик люкай бадӟым заводъёслэсь, эштосъёслэсь кивалтӥсьёссэс. Соослы ивортӥ: марысь мар ке, тӥледыз янгыш каризы ке, весь ваньзэ погыльтэ Удмурт Элькунысь Вылӥ Кенешлэн Президиумез, Валентин Тубылов вылэ. Тӥ янгыш ӧвӧл. Тӥ номыре уд тодӥське.

Утиськыны быгатэмзы понна, берло соос туж тау каризы. Со секыт нуналъёсы, зэм но нокин ӧз бугыръяськы. Отӥяз улон-вылон ӟоскытаз. Ӟырдам югдур сӥям бере, Вылӥ Кенешлэсь депутатъёссэ ёртыны ӧдъязы: тон кытын вал со вакытэ, кинлы дурбасьтӥд?!

Сессия ортчытыны дэмлазы. Шуисько: ужпумез эскероды ке – эскере, кыл кутытыны малпаськоды ке – кутытэ. Весь ваньмыз шонер радъямын вал ук.

Отӥяз зуркатъязы заводъёслэсь кивалтӥсьёссэс. Куд-огзэ чылкак коскатъязы: со кышкыт август нуналъёсы тон кытын вал?! Кинлы дурбасьтӥд: Геннадий Янаевлы-а, Борис Ельцинлы-а?! Геннадий Янаевлы синмаськылӥд ке, ужысьтыд, озьыен, кошконо луод. Кунамы кышкыт югдур кылдэмен валче, куд-ог уйёсты Вылӥ Кенешлэн юртаз ортчытъяно луиз. Куалекъянлы ӧй сётскылы. Ляб луид ке, таӵе удысын ужаны уд быгаты.

Россия Федерацилэсь Вылӥ Кенешсэ ыбылыку, ӵапак Москвае учырай. Вир кисьтонэз алон вылысь вазиськылӥм Руслан Имранович Хасбулатовлы, Борис Николаевич Ельцинлы. Кышкыт учыр ас синъёсыным ӧй адӟы – со нуналэ ӵапак Кремльын вал. Зэм, танкъёслэн ыбылэмзы отчыозь кылӥськылӥз.

Туж ӝож: вир кисьтонэз алыны ӧз луы. Собыдӟа шаерен кивалтӥсько вал бере, аслам но азьпал улонэ соку сӥньыс вылын сямен возиськиз. Чик ӧй тодылы: берто на-а, уг-а Москваысь.

Россия Федерациысь Вылӥ Кенешлэн адӟонэз выллем учыр ик вите вылэм Чечняез. Россилэсь ож кужымзэ отчы пыртонлы чутрак пумитъяськимы вал. Россилэн Кивалтэтэзлэн Тӧроез Виктор Степанович Черномырдин алэммес ӧз кылзы. Россиын ожтыллэсь утёнъя министр Павел Сергеевич Грачёв лӧптылӥз: Грозные одӥг батарея десант лэзимы ке, Джохар Дудаевез пытсамы ке – ваньмыз интыяз пуксёз.

Нош улон-вылон чылкак мыдлань берыктӥськиз: Джохар Дудаевез быдтӥзы, сое воштӥсез Доку Завгаевез но ӧвӧлтэмак каризы (ассэ Джохар Дудаевез адӟылыны ӧз кылдылы, нош Доку Завгаевен пумиськылӥ – йӧно но юн адями вал). Джохар Дудаев курылӥз: ми но, бигеръёс кадь, эрико мед луысалмы. Зэм, солэсь куронзэ нокин кылэм-адӟем ик ӧз кары. Огвакытэ бигеръёслэн азьветлӥсьсы Минтимер Шаймиев вылэ но урдӥськылыны ӧдъязы. Одӥгаз кенешысен шуи:

- Шумпотэ ай: та кунэн кивалтэ таӵе паймымон адями – визьмо но кыдёке учкыны быгатӥсь.

Минтимер Шарипович берло туж шумпотӥз:

- Мыным дурбасьтэмед понна, туж бадӟым тау тыныд, Валентин Кузьмич: интыяз луизы соку верам кылъёсыд.

- Вылӥ Кенешен кивалтон аръёсады пумиськылӥды Россилэн Президентэныз Борис Ельцинэн.

- Борис Николаевич шаерамы кык пол вуылӥз. 1990-тӥ аръёслэн кутсконазы улон-вылон сокем куанер ӧй вал ай калык малы ке ялан оскылӥз на, Россилэсь вылӥ кузёзэ но ӝутскем мылкыдын пумиталляз. Отӥяз ваньмыз аналмиз. Россилэн Президентэз быдэсъяз одӥг ужпумез: быдӟым кунэз быдэсак куашкатоно. Зэм, та адями кыӵе ке кужымъёслэн ляльчизы вал: огназ ӧй быгатысал ук со сыӵе кужмо тылобурдоез – быдӟым партимес – куасалтыны но погыртыны. Куд-огезлы со кулэ вал, котькыӵе могӟетъёсты вормыса мыныны быгатӥсь танк выллем. Сямызъя со ӵапак сыӵе ик вал.

Россилэн Президентэз экономикаен вырон сярысь ӧз ик малпаськылы ни. Улон-вылон чылкак куашкамен, тужгес но шуг югдуре шедимы асьмеос, Удмурт шаерын улӥсьёс. Ож тӥрлык поттӥсь заводъёсмы чылкак бырон калэ вуизы. Нош мукет вуз поттоно ке, со понна сомында коньдон кулэ ук…

Россилэн Президентэз, шаерамы ветлыкуз, юрттыны мылкыд кариз вал. Нош сётэм кылзэ ӧз быдэсты.

- Вылӥ Кенешен кивалтыкуды, кыӵе учыръёс сюлэмады кылизы?

- Соку ялан сюлмаськылӥмы Удмурт Республикалэсь ымнырзэ выльдон сярысь. Куинь ар ӵоже тупатъяны-радъяны выримы Конституцимес (ачим ик сое тупатъясь-выльдӥсь ёзэн кивалтӥ). Зэм, мылкыдъёс соку пӧртэмесь вал: одӥгез тапала кыске, мукетыз инме лобӟыны турттэ. Та вакытэ ик кылдӥзы Удмурт кунмылэн тодметъёсыз. Та ужлы мылкыд сётӥзы история наукаосъя докторъёс-тодосчиос Кузьма Иванович Куликов но Владимир Емельянович Владыкин. Ялэмын вал кунмылы пус кылдытонъя ӵошатскон. Вожвылъяськонэ трос адями пыриськиз. Вормиз алнаш пи – шаерысьтымы егит суредась Юрий Лобанов.

Зэм, кун тодметъёсты кылдытонъя ужрадэз куд-огез мыдланьтыны вырылӥзы. Шаерысьтымы одӥг ӟуч искусствовед шуылӥз: удмуртъёслэн данъяськонзы – италмас сяська. Со ик мед луоз удмурт кунлэн тодметэз. Та ӵектонлы чутрак пумит луи. Италмас сяська вылысь гинэ адӟыны луэ шат удмуртлыкмес? Кытын бен солэн выжыосыз, кытын зэмос пуштросэз?

Та малпанэз палэнтыса, лыдэ басьтэмын вал мукетыз. Юрий Лобановлэн дэмлам пусэз тужгес чеберез но адӟиськымонэз вал. Кунмылэсь тодметъёссэ юнматӥсь кагаз вылэ ачим гожтӥськи. Котьма мед луоз ни но, кыӵе ке уж быдэстэмын, дыр. Та вакытэ ик кылдӥз Удмурт кунмылэн гурез. Таяз ужрадэ но трос адями пыриськиз. Ӵошатсконын кужымзэс мертазы шаерысьтымы тодмо крезьгурчиос Геннадий Корепанов-Камский, Евгения Копысова, Николай Шабалин, Александр Корепанов. Огъя вожвылъяськонын вормиз улонысь дырызлэсь вазь кошкем крезьгурчимылэн Герман Корепановлэн пиез – Александр Корепанов. Атаезлэн крезьгурез вылын со туж чебер кунгур кылдытӥз.

- 1995-тӥ ар. Удмурт Элькунысь Вылӥ Кенеш интые кылдӥз Кун Кенеш. Солэн Тӧроез луон понна, Тӥледлы кык гинэ куара ӧз тырмы.

- Кинъёс ке пумит кариськизы. Кун Кенешлэн вуоно Тӧроез кинлы ке сӥзиз, луоз, выль удыс. Нош мон нокинлы зарни гурезь ӧй ӵекты. Секыт шуккетэз чидай: келяны но быгатыны кулэ. Зэм, соку малпасько вал: весь ваньмыз ачим сямен ик сюлэмзы куремъя ужало. Нош зэмос улон-вылон чылкак мукет вылэм.

- 1997-тӥ ар. Куатетӥ удмурт ӧтчам тӥледыз оглулысь бырйиз «Удмурт кенеш» огазеяськонлы тӧрое.

- Азьло ик адӟисько вал ни: адямиос маке солань-талань кыстасько, шаерысьтымы вылӥ кивалтӥсьёс но татысь муртъёсты сокем ик лыдэ уг басьтыло кадь. Кун Кенешысь гурт удысъя ёзэн кивалтыкум ик «Удмурт кенешлэн» ужъёсыныз тунсыкъяськылӥ. Огазеяськонлэн тӧроез луыны дэмлазы татысь адямиос ик.

Кужым но, луонлык но вань на бере, оскалтоно, малпасько. Вылаз ик, «Удмурт кенеш» огазеяськонлэн тӧроез луыны кулэ, дыр, Удмурт Элькунысь Кун Кенешлэн депутатэз. Куатетӥ удмурт ӧтчам огазеяськонлы тӧрое оглулысь бырйиз кадь. Огазеяськонэ вуэме бере, нырысь ик басьтӥськимы ёрос кенешъёсты юнматон борды. Соос юнэсь ӧй вал: одӥгъёсыз кылдэмын ик ӧй вал, мукетъёсыз ӧз ик ужалэ, куинетӥосызлэн кивалтӥсьёссы ялан вошъяськылӥзы, ужаны луонлыксы ӧвӧлэн. Огазеяськон вӧзы юрттӥсьёс но кылдылӥзы. Радъяськиз «Удмурт шаерлэсь экономикаын кулэяськонъёссэ утён понна» эштослэн ужез. Вордӥськиз «Герд» газет.

Тямысэтӥ удмурт ӧтчамын выльысь «Удмурт кенеш» огазеяськонлэн тӧроез луыны мылкыд кари. Ӟигар но, луонлык но вань кадь ай. Зэм, ваньмыз, валамон ни, уг пӧрмы.

- Коми Республикалэн йырыз ӟуч Юрий Спиридонов но азьветлӥсь комиос кемалась ини шедьтӥзы кадь одӥг кыл. Асьмеос валчеяськыны быгатомы-а?

- Юрий Спиридонов югдурез ӟечгес вала, дыр. Асьмеос но валчеяськыны малы ум быгатэлэ? Быгатомы. Со понна ог-огдэ валан но мылкыд гинэ кулэ.

- Тӥляд кузпалды, Федосья Михайловна Тубылова, кивалтэ шаерысьтымы тужгес дано «Зарни шеп» ансамблен. Вылӥ Кенешлэн Тӧроез луэмды бере, ансамблез, кинлэсь ке кепыраса, сьӧрло потанлэсь алоно ӧз луылы-а?

- Та ужпумен мон ноку ӧй выры: со понна шаерамы вань Культурая министерство. Одӥг пол гинэ таӵе учыр луиз. 1994-тӥ арын ноябрь толэзе «Зарни шеп» вуылӥз Финляндие. Мон но отчы мыныны кулэ вал –ӧй быгаты. Ӵапак со вакытэ Удмурт шаермылэн вордскем нуналозяз юнматыны кулэ вал Удмурт Элькунмылэсь пуссэ (гербзэ) но гурзэ (гимнзэ). «Та ужпум тужгес кулэгес», - малпай.

Финляндие вуылытэк, номыре ӧй ышты. Со понна дыраз юнматэмын вал, Удмурт Элькунмылэн пусэз (гербез) но гурез (гимнэз). Мон ноку тазьы уг шуы: «Зарни шеп» ансамблез кытчы ке лэзелэ вал…

- Тӥледыз ӵемысь пыкыло…

- Пыкыло ужасьтэм адямиос. Ӵапак 1990-тӥ аръёсы быдэсмизы кадь уноез ӟеч малпанъёс. Быдэсак тупатъямын-выльдэмын Удмурт Республикалэн Конституциез. Отчы пыртэмын таӵе веран: удмурт шаерын кун кылъёс луо удмурт но ӟуч кылъёс. Ӵапак та аръёсы юнматэмын Удмурт кунмылэн тодметъёсыз: кунпус (герб) но кунгур (гимн). Кутэмын Удмурт Элькунлэн асэриклыкез сярысь декларация. Куд-огез шуо: ӧз юнматӥськы Кун кылъёс сярысь закон. 1994-тӥ арын гинэ ук ай Конституциямы пыртэмын таӵе веран: удмурт шаерын кун кылъёс луо удмурт но ӟуч кылъёс. Отӥяз та ужпумез нокин ӧз эскеры ни. Туэ, октябрь толэзе, Удмурт Элькунысь Кун Кенешлэн сессияз мед юнматысалмы ини Кун кылъёс сярысь законэз. Зэм, тросэзлы депутатъёслы со уг яра. Мон куштыны кури дас витетӥ статьяысь таӵе кылъёссэ: удмурт кылэз дышетоно, пе, луэмезъя. Ӵапак со ик ӧз яра куд-огезлы.

Удмурт кылмес луэмезъя гинэ дышетыны косӥд ке, асьмемыз нокин уз дунъя, удмурт кылмы улонын аслэсьтыз интызэ ноку уз шедьты, ялан ляльчи луоз. Нош анай кылмы – дунне вылын одӥг гинэ. Ӵапак 1990-тӥ аръёсы ик сюлмаськимы Удмурт Элькунмылэн ымнырыз сярысь. Тросэз паймылӥзы: удмурт шаерез кызьы нимано? Мон шуи: - Удмурт шаер – удмуртъёслэн шаерзы. Мед луоз Удмурт Элькун – Удмурт Республика. Монэн котькин огкылысь кариськиз.

* * *

Ичи ӧвӧл соос, визьмо удмуртъёс. Соос пӧлын туннэ тужгес кужмоез, тужгес батырез, тужгес сэзез, тужгес дӥсьтӥсез – «Удмурт кенеш» огазеяськонлэн тӧроез Валентин Кузьмич Тубылов. Котькыӵе шугадӟонъёсты вормыса, азьлань но азьлань валтэ со аслэсьтыз дуно удмурт калыксэ. Мынӥсь муртэ нокыӵе кайгу, нокыӵе сильтӧл, нокыӵе тӧлпери уг погырты.

Источник:

Тубылов, В. К. Мынӥсь муртэ кайгу уг погырты! / Тубылов В.К. ; записала Виноградова Е. // Удмурт дунне. - 2001. - 12 окт.


За предоставление материала выражаем огромную благодарность редакции газеты "Удмурт дунне"