Михайлов Владимир
Владимир Пантелеевич Михайлов - удмурт кылбурчи, журналист, Россиысь гожъяськисьёслэн огазеяськонзылэн ёзчиез.
Улон сюресэз[править]
Владимир Михайлов вордскиз Можга ёросысь Вуж Юбера гуртын 1957-тӥ арын 10 куартолэзе колхозникъёслэн семьяязы. [1]
Пичи Вовик (семьяын куинетӥ нылпи) 9-тӥ куартолэзе вордскиз, нош кагазэ 10-тӥ куартолэзе гожтӥзы: атаез озьы куриз. Пантелей Михайлович – гуртысьтызы нырысетӥ шофёр но тракторист – ож вакытэ снарядъёс ворттӥз, машинаеныз Берлинозь вуиз. Соин ик Вормон Нуналэз нокыӵе мукет праздникъёсын сурамез ӧз поты – пиезлэн вордскем нуналыныз но. [2]
Мани апайлы (паспортъя – Ксения Николаевна) ньыль нылпиосыныз трос секытсэ чидано луиз: Вовикезлы сизьым арес тырмыку, картэз бырыны шедиз. Озьы ке но калык радъя улыны тыршизы: пичиысен ужан радлыкез валаса, ог-огзылы юрттыса. Дышетскиз Вова Пётр Бабкинлэсь нимзэ нуллӥсь школаын. Герой сярысь книга гожтыкузы, доразы Владимир Голубев писатель, Герман Ходырев кылбурчи, Антон Шнайдер тодмо туспуктӥсь вуылӥзы. Соос нылпиосын лулысь-сюлмысь вераськизы, сюлмазы гожъяськон гизьы уськытыны тыршизы. Тыршемзы юнме ӧз луы: пиналъёслэн ужъёссы «Советской Удмуртия» газетын нылпиослы сӥзем бамъёсын поталлязы. [3] Школа бере Володя Удмурт кун университетэ филологи факультетэ дышетскыны пыриз, журналист луэмез потӥз. Университетын Володя Даниил Яшинлэн литературая кружоказ ветлыны кутскиз. Михаил Федотов тодмо кылбурчиен но мукет эшъёсыныз ӵош «Егит куараос», «Инвожо» бордгазет поттылӥзы, огвакытэ Володя солэн валтӥсь редакторез но луылӥз.
Университетын дышетскыкуз, Володя практиказэ школаын но, «Дась лу!» газетын но ортчиз. Соиз но, таиз но ужъёсыз яразы. 1979-тӥ арын дышетыны Яр ёросысь Лековай школае келязы, «Советской Удмуртия» газетлэн редакцияз кельто ке но вал. Улонэзлэсь тазьы берытскемзэ со бӧрысь дунъяз ни. Школаын литературая но кылъя урокъёсты нуэм сяна, Володя немец кыллы дышетӥз, физкультурая, ужъя урокъёсты но нуиз, интернатын воспитатель но вал. Котькыӵе ужлы шаплы дышетӥсез ӵош ужась эшъёсыз но, гурт калык но яратӥзы. Отын ик кышноеныз Любовь Фёдоровнаен пумиськиз. [3]
Берло куинь арзэ Владимир Пантелеевич школалэн директорез вал ини. Ужез секыт вакытэ тупаз, мылкыдыз сураськылӥз. Соку со Ижкаре кошкон сярысь кылпум поттылыны кутскиз: ӵап «Советской Удмуртия» газетэ ужаны ӧтизы угось. Роноын шуизы: лэзём, пе, но выль дышетскон арлы школадэ дася. Егит пиосмурт бурдъяськиз. Но бере кылем: уг ни лыкты кожаса, интыяз мукет муртэ кутӥллям. [3]
Ӵапак та вакытэ Элькунысьтымы писательёслэн огазеяськонзылы литконсультант кулэ луиз. 1982-тӥ арын огазеяськонлэн тӧроез Александр Шкляев Владимир Михайловез дораз ужаны басьтӥз, квартира но сётӥзы. Вить ар ӵоже литконсультантын но литератураез вӧлмытонъя бюроын тыршемез бере Удмурт радиое кошконо кариськиз. [4]
Радиое Владимир Пантелеевич кизьыны дасям муэ ӟеч кидыс кадь тупаз. Радио кылзӥсьёслэн яратоно авторзы луиз. Озьы Володя Михайлов радиоын 1987-тӥ арысен тырше ини. Иворъёсъя редакциын нырысь ужаз, собере — литературая но драмая редакциын. Володялэсь капчи мылкыдын, мактаськыса гожъямъёссэ тодыса, Удмурт радиоын ужасьёс серемес веранъёсын быдэс сузьет дасяны дэмлазы. Нош кызьы меда солы ним сётоно?
«Оломар нимъёс утчаса трос эн ул,— шуиз Ар-Серги,— «Ладилэн азбарез» шу но, ужез быроз», – тодаз вае Владимир Пантелеевич. Туж тупаз со ним. Та передача кылбуръёсын но крезьгуръёсын быдэсак дасямын. Отчы артистьёс, писательёс, журналистъёс ӵемысь пыриськыло. Радио кылзӥсьёслы «Ладилэн азбарез» туж яраз. Володялэн эшъёсыз но куддыръя паймыло: кытысь сомында серекъятӥсь кылбуръёс шедьтэ? 1993-тӥ арысен соос быдэс бадӟым книга поттымон люкаськемын ни. Бӧрысьгес «Чуки-беки» передача кылдӥз. Соиз но калыке ӝог вӧлмиз. [3]
Радиоверанъёс лэсьтэм сяна, татын ӟуч кылын но передачаос дасяно луылэ. Удмурт адямилэн керпотон сямыз вань. Владимир Пантелеевичлэн но нырысь-валысь сыӵе мылкыдъёсыз вал. Но куинь-ньыль передачаос дасямез бере аслыз ачиз осконэз кужмояз. Солэсь но ортчыт: ӟуч кылын радиоверанъёс дасяса, со «Сибирский тракт» нимо регион фестивальёсын куинь пол вормисе потылӥз. Всероссийской радиолэн фондъёсаз возиське солэн сценариезъя гожтэм «Лӧпшо Педунь но Алдар» радиоспектакль но А. С. Пушкинлэн «Капитанская дочка» повестезъя лэсьтэм радиофильм. [3]
Та дыре но «Зарни арлыд», «Даур нюжаос», «Вормонлэн дуныз» передачаос дася но кылзӥсьёс доры вуттэ. Владимир Михайловлы туж трос ветлоно луэ. Быдэс Удмуртиез йылысеныз пумозяз ортчем сяна, со Киров, Пермь улосъёсы, Татарстанэ, Йошкар-Ола, Свердловск, Тюмень, Москва городъёсы, Венгрие вуылӥз ни. Котькытысь трос тодон-валанъёсын узырмыса бертэ.
Гожъямъёсыз сярысь[править]
Нырысетӥ кылбурзэ Володя куинетӥ классын дышетскуз гожтӥз. Одӥг пол со шутэтскон нуналзэс ортчытэмзы сярысь статья гожтӥз но Валентина Гавриловна Александрова дышетӥсезлы возьматӥз. Соиз лыдӟиз но пияшлэсь мылкыдзэ лӧпкытӥз, таидлэсь, пе, кылбур пӧрмоно кадь. Кӧня ке тупатъяса, редакцие келяз. Ӝоген сое печатлазы. Пичи пияшлэн шумпотонэзлы пумыз ик ӧй вал. [3]
Со дырысен гожъяськон чер пияшлэн лулпушказ пыриз. Газетэ олокыӵе но иворъёс, кылбуръёс ысъяны ӧдъяз. Ваньзэ ӧз поттылэ ке но, котькудӥзлы Ижысь Г. Ходыревлэсь, В. Ившинлэсь, В. Ивашкинлэсь гожтэтъёс басьяз. Одӥг пол нош классысьтызы йӧнтэмъяськись кык пиос сярысь фельетон гожтыны пормытӥз. Со понна «геройёс» пичи Вовикез партаысь сумка возён ӝажые туллязы — фельетон гожъянлэсь кемалы люкизы. [5]
Инмарен сётэм тылгизьыез озьы гинэ кысыны уг луы вылэм. Табере Владимир Пантелеевич серемессэ но, бичатӥсьсэ но, шиёзэ но фельетон гожтыны уг ни кышка. Но пичи арлыдысь бадӟымазгес потыкуз гожъяськемысь дугдылӥз: ӟуч кылъя предметэн одӥг четвертьын «куинь» потӥз. [3]
Студент дыръяз бордгазетысь «Динамо» стадионын» кылбурзэ Александр Шкляев дышетӥсьсы синйылтӥз. Татын, пе, Аркадий Клабуковлэн гожъян сямыз адӟиське, нылпиослы гожъяса утча ай. Оскалтӥз — пӧрмиз. Кылбуръёсыз удмурт газет-журналъёсы сяна «Йыр вадьсын инбам», «Вуюись», ӟуч кылын «Горизонт» огъя гожтэм бичетъёсы пыртэмын. Табере нылпи кылбуръёсыныз нимаз книгаосыз потӥзы ини: «Лобӟы, лобӟы, дыдыке!» (1988) , «Пужыё дэрем» (2007), «Вордскем кыл» журналын — «Шушыё кисыос», «Эгесъёс», «Све-тофор», «Бадӟым будӥсько», «Ӟоз — вуриськись», «Гужем тэль». [6]
Котькуд авторлэн гожъяськон сямыз аслаз. Володя Михайловлэн кылбуръёсыз тросэз кыӵе ке учырысь, югдурысь кылдэмын. Одӥг пол пичи Ксюша нылыз атаслэсь турлы буёлъёсын кисьтаськись тылызэ шедьтэм. Сое вылӥе пельтэ но музэ котыръяськыса усемзэ учкыса сылэ, собере нош ик кутыса вылӥе пельтэ. Володя нылыз шоры учкиз но «Тылы» кылбур гожтӥз. Учыръёс вамышлы быдэ шедё: бакчаын сугон-а будэ, сикын кузьыли-а аслыз кар лэсьтэ, губиясь-а йыромем... Геройзэ со чузъяськемен шудытэ, тӧлэз ӟечыратэ, тыметэз синучкон каре... Кызьы ке но, маин ке но пичи лыдӟисьсэ пальпоттыны, мылкыдзэ шулдыр карыны тырше. [3]
Нылпиослы гожъямен ӵош сюлэм вӧсьсэ, сюлмаськонъёссэ Володя Михайлов мӧйыослы гожтэм чуръёсаз кисьтэ. Удмурт кылбуръёсын Таллиннын поттэм «Азвесь лодка» антологиын солэн «Черкын» кылбурез пыремын. Автор куректэ адямилэн вакчи даурез пумысь:
Сюсьтыл но шапыклы быдэ
Кыле лапег, синэ но вакчия.
Асьме улон но, со сюсьтыл музэн,
Ӝог жуалоз, куке вуоз пумыз.
Кылбурчилэн жингрес чуръёсызлы крезьгурчиос но синмасько. Солэн кылъёсызъя чебересь кырӟанъёс кылдытӥзы П. Кузнецов, Г. Павлов, С. Белых, Е. Антонова. [6]
Кылысь кылэ берыктон бордын но трос ужа. Берыктэ ӟуч, пор, венгер писательёслэсь гожъямъёссэс. Владимир Пантелеевич шуэ: «Зэмос кылбурчи сыӵе луыны кулэ, сое лыдӟыса аслад но мылкыдыд кылбураны мед ӝутӥськоз».
2004-тӥ арын Владимир Пантелеевич Михайлов луиз Владимир Романов нимо литературая премилэн лауреатэз.
Наградаосыз но премиосыз[править]
Удмурт Элькунысь Госсоветлэн Данъян грамотаез.
РФ-ысь журналистъёслэн огазеяськонзылэн «Серебряное перо» знакеныз пусъемын.
Владимир Романов нимо литературая премилэн лауреатэз, 2004.
Библиография[править]
Книгаосыз[править]
Лобӟы, лобӟы, дыдыке : пиналъёслы кылбуръёс. – Ижевск : Удмуртия, 1988. – 28 с.
Пужыё дэрем : пиналъёслы кулбуръёс, поэма. – Ижевск : Удмуртия, 2007. – 39 с. : ил.
Вошъяське улон суред : нылпиослы кылбуръёс, поэмаос. – Ижевск: Удмуртия, 2022. – 94 с.
Адске улон сюресэ . – Ижевск: Шелест, 2022. – 268 с.
Статьяосыз[править]
Айбат ай со... // Удмурт дунне. – 2010. – 25 авг. – С. 7. – (Шудэлэ тӥ, серектэ).
Африкан бабай : серемес верос // Удмурт дунне. – 2005. – 14 янв. – (Шӧкыч).
Буре ваём ; Ивортэк быриз // Удмурт дунне. – 2007. – 20 июня. – С. 7.
Весь мед утёз ибырвесь // Удмурт дунне. – 2010. – 3 нояб. – С. 5.
Восьмон ; Пыдкук // Удмурт дунне. – 2006. – 1 дек. – С. 15.
Вот так гриб! / пер. с удмурт. В. Емельянова // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 246.
Грибник ; Вот так гриб! ; Бабушка ; Чиполлино ; Сказочное село / пер. В. Емельянова // Удмурты. – М., 2005. – С. 293–296.
Демонстрация : тодэ ваён // Удмурт дунне. – 2009. – 30 апр. – С. 15. – (Шӧкыч).
Доре сюрес ; "Шыпыт тыын..." ; Туспуктэмъёс ; Удмурт шаере // Герд. – 2007. – № 4 (апр.). – С. 3.
Ӟечбур! // Удмурт дунне. – 2010. – 19 нояб. – С. 12.
Ӟечкыланъёс // Кенеш. – 2010. – № 9. – С. 21–37.
Йырыд ке куд... : кылбур / Владимир Михайлов // Кенеш. – 2007. – N 7. – С. 107-109.
Кактус кампет // Удмурт дунне. – 2005. – 6 мая. – С. 15.
Комакъёс : серемес веросъёс // Кенеш. – 2005. – № 2. – С. 103–106.
Куартолэзь / иллюстрациез Н. Быковлэн // Кизили. – 2007. – № 5/6. – С. 2.
Кузёослы гожтэт : серемес веросъёс // Кенеш. – 2007. – № 4. – С. 101–108.
Кунпус ; Кункрезь ; Куншет // Ӟечбур! – 2010. – 28 окт. – С. 7 : цв. ил. – (Шаермылы – 90).
Кусып кыдёкын – мылкыд матын ; Классэ пыре ке дышетӥсь // Удмурт дунне. – 2010. – 24 нояб. – С. 7.
Кучапи // Покчи эше : 1–2-тӥ классъёсын ватсаса лыдӟон книга / М. П. Лаврентьева, Е. Н. Дмитриева, В. Н. Ившин. – Ижевск, 2006. – С. 27.
Кучапи ; Кин меда? ; Трактор // Зарни дэремен шунды : семьяын лыдӟон книга. – Ижевск, 2006. – С. 76–77.
Маскара мадёнъёс // Удмурт дунне. – 2009. – 28 авг. – С. 15. – (Шӧкыч).
Маскарчи мадёнъёс // Удмурт дунне. – 2009. – 8 мая. – С. 15. – (Шӧкыч).
Нуны веттан гур / Владимир Михайлов // Кизили. – 2011. – № 11/12. – С. 2.
Огмылкыдын ; Кунмес утизы : кылбуръёс // Кизили. – 2012. – № 5/6. – С. 10.
Песятае // Удмурт дунне. – 2007. – 8 мая. – С. 7.
Поездын – кино ; 16 -тӥ этажын / суредаз М. Водикинус // Кизили. – 2010. – № 7. – С. 2 : цв. ил.
Покчи-пичи эше // Ӟечбур! – 2010. – 18 нояб. – С. 1.
Сизьым шур йылын // Удмурт дунне. – 2007. – 15 июня. – С. 15. – (Шӧкыч).
Тореадор, яке Прапор но ош : серемес верос // Удмурт дунне. – 2005. – 29 апр. – С. 15.
"Травостой в малаговских лугах густой..." // Италмас. – 2007. – № 1. – С. 82.
Удмурт Элькун / иллюстрациез Вячеслав Михайловлэн // Кизили. – 2010. – № 11/12. – С. 3 : цв. ил.
Ури-Бери но Рос-Прос : (нылпиослы поэма) / худож. И. Лопатина // Вордскем кыл. – 2007. – № 8. – Вкл. л. – ("Вордскем кыллэн" книжкаез).
Кырӟанъёс[править]
Антонова З. Сюан : "Шунды выллем зарни зундэсъёсын..." // Удмурт дунне. – 2008. – 24 сент. – С. 6.
Павлов Г. И. Кучапи : "Шедьтӥд монэ шур дурысь..." // Кенеш. – 2008. – № 5/6. – С. 74–75.
Берыктэмъёсыз[править]
Кашин Ю. И. Копуша, Мурлик но... : веросъёс // Кенеш. – 2011. – № 3. – С. 73–80 : фот.
"Шочмо эл чылалан икте веле..." / пер. Э. Анисимов // Ончыко. – Йошкар-Ола, 2007. – № 4. – С. 140–143. – "Родина у всех одна...".
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература[править]
- ↑ Уваров А. Владимир Михайлов (1957) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 85.
- ↑ Гаврилова М. Юморчи // Удмурт дунне. – 2009. – 14 апр. – С. 8.
- ↑ 3,0 3,1 3,2 3,3 3,4 3,5 3,6 3,7 Гаврилова М. Ладилэн бадӟым азбарез // Кенеш. – 2007. – № 4. – С.89–93.
- ↑ Возняков В. Ладилэн азбараз // Удмурт дунне. – 2003. – 8 мая. – С. 6, 11. – (Удмурт кизилиос).
- ↑ Михайлов Владимир Пантелеевич (1957) // Сельский активист – учитель / М. И. Шишкин. Можга писательёс. Можга удмуртлыкез азинтыса. Пазял гуртысь фольклор / А. А. Комаров. – Ижевск, 2010. – С. 116–118.
- ↑ 6,0 6,1 Ермолина А. Кызьы пичи Вовик бадӟым Лади луиз… // Ӟечбур! – 2004. – 8 апр. – С. 6–7.
