Шкляев Александр

Шкляев Александр Григорьевич - удмурт журналист, литературовед, гожъяськись, тодосчи но дышетӥсь.

Улон сюресэз

Шкляев Александр Григорьевич вордӥськиз Якшур-Бодья ёросысь Якшур гуртын 1944-тӥ арын 4-тӥ тулыспалэ.

Саша семьяязы 11 нылпи пӧлысь самой пичиез: мугорызъя лапег, тазалыкезъя но нырысь-валысь норед вылэм. Но огез удалтэм – агай-апайёсыз ваньзы дышетско вал бере, соослэн книгаоссы туж вазь кияз шедиллям. Соин ик Александр Григорьевич али но шуэ: «Мон агайёсылэн-апайёсылэн пельпумъёссы вылын будӥ»

Покчи классъёсын ик солы удалтӥз школа ласянь. Дышетскиз Якшур-Бодья педучилищелэн инъет шуон школаяз. Отын вань предметъёс удмурт кылын нуиськизы. Котькуд дышетскись борды юнматэмын на вал педучилищеысь студент. Али ке но Александр Григорьевич тодаз возе дышетӥсьёссэ: соос сюлмаз мур пытьы кельтӥзы, трос тодон-валан сётӥзы. Анна Егоровна Загребина, Никита Владимирович Вахрушев, Сергей Григорьевич Иванов. «Одӥг пол, – тодаз вае со, – ӟуч кылъя уроксэ Фаина Фёдоровна Ворончихина тазьы кутскиз: "Саша, - шуэ - мон туннэ ӵукна одӥг удмурт поэтлэсь ӟуч кылын вераськемзэ кылзӥ. Укыр юн шӧдӥське акцентэз. Тон ведь, Саша, удмурт писатель луод. Дышеты ӟуч кылэз, гожъяськыны но, вераськыны но умой мед быгатод». Школаез Александр азвесь медален йылпумъяз.

Витетӥ классысен ик Саша гужемъёсы колхозын ужаз. Нырысь кык гужемзэ гуртоослэсь ыжъёссэс возьмаз. Сизьыметӥ классэз йылпумъямез бере, валэн но тыршиз. Собере комбайнёрлэн юрттӥсез но вал.

Саша шор классъёсын дышетскыкуз, апаезлы кыӵе ке праздник дыръя чеберак шкатулка кузьмазы. Ворсэт вылаз суредамын вал Москваысь Ленин нимо гурезьысь университет. Эшшо ке 11-тӥ классын дышетскыкуз, школаязы ошизы Москваысь университетэ дышетскыны пырон сярысь ялон. Отын вань факультетъёс сярысь пыр-поч гожтэмын. Со тырысь Сашалэн мукет малпанэз ӧй вал ни. Отчы мыноно.

1962-тӥ арын Александр Шкляев пыриз дышетскыны Москваысь Кун университетысь журналистика ёзэтаз. Татчы пырыны юрттӥзы асьме редакциосын ужасьёс, соос рекомендация сётӥзы.

Студент дыръяз Саша тыршиз быдэс Совето шаерез котыръяны. Кытчы гинэ ӧз вуылы, одно ик шедьтылӥз со интылэсь Удмуртиен кыӵе ке но герӟетсэ. Университетсэ быдтыкуз, Саша «витьлы» утиз Андрей Платонов сярысь ужзэ. Солы дэмлазы аспирантурае пырыны.

1967-тӥ арын дышетсконзэ йылпумъяса, бертӥз удмурт шаераз. Со арын ик ужаны кутскиз «Комсомолец Удмуртии» газетлэн редакцияз. Редакциын ужамез Александр Шкляевлы юрттӥз Удмуртиен рос-прос тодматскыны. 1968–1971-тӥ аръёсы дышетскиз Москваысь МГУ-ын аспирантураын. Татын Александр Григорьевич диссертацизэ сӥзиз удмурт критикалы.

1971-тӥ арын Ижевске берытскиз, кутскиз удмурт литература удысын ужаны. Интыяськиз УдНИИ-е. 70-тӥ аръёслэн шоразы А. Г. Шкляев кандидатской диссертацизэ гожтӥз. Со «На подступах к реализму» книгалы инъет кылдытӥз. 1978-тӥ арын Александр Григорьевичлы Флор Васильев жингыртӥз но шуиз: «Молот» журналлы валтӥсь редакторе лыктоно луод, пе. Мынод-а, уд-а шуыса ӧз выжыяты, пырак шуиз: «Лыктоно!». Таиз но пумит ӧз вазьы. Редакциын со вакытэ тыро-пыдо писательёс ужало вал ини: В. Широбоков, П. Чернов, А. Ермолаев, П. Поздеев, С. Перевощиков, М. Иванов.

1982–1984-тӥ аръёсы Удмуртиысь писательёслэн правленизылэн председателез луиз. 1985–1998-тӥ аръёсы – УдГУ-ысь удмурт литературая но Россиын улӥсь калыкъёслэн литературазыя кафедраен кивалтӥз. 1999-тӥ арысен УдГУ-ысь ик журналистикая кафедраен кивалтэ. Татын но со ас котыраз люказ юн коллектив.

Гожъямъёсыз сярысь

Саша Шкляев пичи веросъёссэ но кылбуръёссэ 6–7-тӥ классъёсын дышетскыкуз ик печатланы кутскиз. Соос «Удмуртиысь комсомолец», «Советской Удмуртия» газетъёсын но «Молот» журналын потылӥзы.

Александр Григорьевич али ке но шунытэн тодаз вае школаысь дышетӥсьсэ Анна Егоровна Загребинаез. Кыкетӥ классын дышетскыкуз ик, Саша солы ас киыныз лэсьтэм кылбур сборниксэ сётӥз ни. Нош Мария Ивановна Иванова Якшур-Бодья шор ёзо школаын удмурт литературая кружок нуиз. Отын пияш нырысьсэ тодматскиз кылбур гожтон амалъёсын. Поттӥзы альманах. Али со альманах – музейысь экспонатъёс пӧлын. Школаын дышетскыкуз кылбуръёсын тетрадьёсыз трос гинэ люкаськизы ни вал. А. Н. Клабуков но ялан мылкыдзэ ӝутказ: тыныд али ик книга поттоно, кӧня ке гинэ кылбур гожты на. Но пияш пумен журналистикаен вырыны кутскиз. Нош МГУ-ын дышетскыкуз кылбур гожъямысь воксё но дугдӥз. Берлогес таиз сярысь жаляз ик…

УдНИИ-ын ужаны кутскыса, нырысетӥ гожтэм статьязэ К. Гердлы сӥзиз. Но со ужез «Молот» журналысь обкоме «кошкем». Озьы ке но А. Шкляев 1978-тӥ арын, ачиз азькыл гожтыса, К. Гердлэсь «Гажан эше!..» книгазэ поттӥз. Отчы Александр Григорьевич поэтлэсь азьвыл печатламтэ кылбуръёссэ но пыртыны тыршиз. 1985-тӥ арын нырысьсэ ӟуч кылын Москваын К. Гердлэсь «Ступени» кылбур книгазэ поттӥз на. Писательёслэн огазеяськоназы ужакуз, 1977-тӥ арын Флор Васильев кичӧлтэмъя но дэмламъя, «Между Волгой и Уралом» серилэсь нырысетӥ томзэ дасяз.

1984-тӥ арын Москваын удмурт писательёслэн ужъёсынызы асьме шаерлы сӥзем «Край родниковый», 1989-тӥ арын «Песни солнечного леса» книгаос поттӥз. «Молотлы – 60» антология дасяз. Петер Домокошлэсь «История удмуртской литературы» книгазэ дасяз но поттӥз, Д. А. Яшинэн «Удмурт фольклор. Удмурт литература» пособиез но Б. Ш. Загуляеваен ӵош «Калык кылос но сое бичан» книгаез. Александр Григорьевичлэн ки пыртӥз туж трос рукопись потӥз. Солэн кивалтэм улсаз ортчылӥзы литературалы сӥзем ӝытъёс но «котырес ӝӧкъёс», егит гожъяськисьёслэн семинаръёссы, лыдӟисьёсын пумиськылонъёс. Ачиз Александр Григорьевич лыдӟись доры таӵе книгаоссэ вуттӥз: «На подступах к реализму. Удмуртская литература, литературное движение и критика в 1917-1934 гг.» (1979), «Араны егит муртъёс лыктозы…» (1985), «Времена литературы – времена жизни» (1992), «Ӵашъем нимъёс» (1995), «Вапумысь вапуме» (2000). Со сяна, Александр Григорьевич – ог 300 научной статьяослэн авторзы. Соос пӧртэм конгрессъёслэн но конференциослэн материалъёссы пӧлын печатламын.

«Вапумысь вапуме» бичетэз редакциын вить ар кыллиз. «Критикая книга дыраз потыны кулэ. Солэн пуштросэз вужме угось», – вера Александр Григорьевич. Та книгаез лыдӟыса, син шоры таӵе аспӧртэмлыкез йӧтэ – Александр Григорьевич паймытыны быгатэ. А. А. Ермолаев вера: «А. Шкляевлэсь та книгазэ лыдӟыса, шумпотыса вераны быгатӥсько: удмурт литературамы сярысь но зэмос чебер литературной, котькинлы капчиен валамон кылын гожтэм книга потӥз. Олокыӵе но канцелярской, «научной» шуон кылгерӟетъёстэк, адямиослэн куспазы вераськемзы сямен. Ваньмыз критикъёс таӵе литературной кылын гожъясалзы ке!».

А. Г. Шкляев берло книгаяз дунне вылысь пӧртэм литератураосын но культураосын герӟетъёсты-йылолъёсты палэнэ уг кельты. В. Ившинлэсь но А. Перевозчиковлэсь аспӧртэмлыксэс Е. Винокуровлэн поэтикаеныз герӟа. Егитъёслэн «Инӟарекъян» (1991) бичетсылы дунъет сётыку, юнме шорысь Сент-Экзюперилэн нимыз уг поты. Нош Ф. Васильевлэсь одӥгзэ бадӟым вормонзэ А. Шкляев герӟа импрессионизмлэсь дышетскеменыз. 2004-тӥ арын автор пиналъёслы «Уйвӧт» нимо сборниксэ «Вордскем кыллэн» книжной серияз поттӥз.

Озьы ик Александр Шкляев асьмелы тодмо аслаз шаржъёсыныз, эпиграммаосыныз но пичи веросъёсыныз. 2004-тӥ арын, ӟечкыланъёссэ, рекламкылбуръёссэ, шаржъёссэ, памфлетъёссэ, фельетонъёссэ, басняоссэ нимысь сборнике люкаса, «Эшъёс – юлтошъёс» нимо книга поттӥз.

2006-тӥ арын Удмуртиысь журналистикалэн историезлы сӥзем соавтор луыса кык книга поттӥз: «Журналистика Удмуртии: история и современность. К 100-летию удмуртской национальной периодической печати» но «Пресса и власть на уроках у свободы слова. 300 лет российской прессе. Региональный аспект». Александр Григорьевичлэн ужъёсыз коми-зырян, пор, венгер, фин, англи, немец кылъёсы берыктэмын.

Премиосыз

Россиысь журналистъёслэн огазеяськонзылэн ёзчиез, 1977

Россиысь Писательёслэн огазеяськонзылэн ёзчиез, 1979

«Знак почёта» орден, 1984

Удмурт Элькунысь наука удысысь дано ужась, 1994

Удмурт Элькунысь лулчеберет удысысь сӥё-дано ужась, 1996

Кузебай Герд нимо премилэн лауреатэз, 2004

Удмурт Элькунлэн Данъян грамотаез, 2009

УАССР-ысь Вылӥ Кенешлэн Президиумезлэн Данъян грамотаез

Библиография

Книгаосыз

Араны егит муртъёс лыктозы : критика: статьяос, очеркъёс, рецензиос / А. Г. Шкляев. – Ижевск : Удмуртия, 1986. – 240 с.

Времена литературы – времена жизни : ст. об удм. лит. / А. Г. Шкляев. – Ижевск : Удмуртия, 1992. – 208 с.

Ӵашъем нимъёс : 20-50-тӥ аръёсы репрессия улэ шедем писательёс сярысь. Соослэн кылбуръёссы, веросъёссы, пьесаоссы, статьяоссы / А. Г. Шкляев. - Ижевск : Удмуртия, 1995. - 448 с.

Эшъёс-юлтошъёс : ӟечкыланъёс, реклам кылбуръёс, автографъёс, шаржъёс, памфлетъёс, фельетонъёс, басняос, куктуаськонъёс. – Ижевск : Удмуртия, 2004. – 78 с.

Статьяосыз

Азбарын : В. П. Михайловлэн аслаз юбилеез азьын "азбараз" ӝытсэ ортчытон сярысь малпанъёсыз: эшлыко чуръёс // Удмурт дунне. – 2008. – 11 янв. – С. 15. – (Шӧкыч).

«Анае мед адӟысал вылэм...» : вакчи мадёс // Удмурт дунне. – 2006. – 30 мая. – С. 6.

Вакчи мадёсъёс // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 138–142.

Галстук // Удмурт дунне. – 2005. – 29 июня. – С. 3.

Йыбырттоно писпуос : вакчи мадёс // Удмурт дунне. – 2006. – 29 марта. – С. 7.

Капкаез ворсан азьын : эшлыко чуръёс // Удмурт дунне. – 2007. – 28 дек. – С. 15.

Кивалтӥсь ; Басня гожъясьлы : сатира жанрен гожтэм баллада : кылбур // Удмурт дунне. – 2009. – 22 сент. – С. 6. – (Шудэлэ тӥ, серектэ).

Котьмае тӥясь Ломагин ; Уа-уа! ; Юрий Аркадьевич Пиявский но удмурт трилогия ; Бухгалтер но Лев Толстой ; Юбилей медаль ; Василий Максимович ; Дыдыкъёс но вупульыос // Удмурт дунне. – 2005. – 27 июля. – С. 6.

Кузьылиос : верос // Покчи эше : 1–2-тӥ классъёсын ватсаса лыдӟон книга / М. Лаврентьева, Е. Дмитриева, В. Ившин. – Ижевск, 2006. – С. 116.

Кызьы ми писательёсыз миськимы : вакчи мадёс // Удмурт дунне. – 2005. – 8 февр.

Кызьы фольклор люкано ; Кызьы шуг югдурысь потоно ; Куинь манетъем ӵӧж : вакчи мадёсъёс // Удмурт дунне. – 2005. – 28 июня. – С. 6.

Кыл тэчы ; Уйвӧт : кылбуръёс // Зарни дэремен шунды : семьяын лыдӟон книга. – Ижевск, 2006. – С. 118–119.

Кылбурез валасьтэм тэль корасьёс ; Кызьы «Оракулэн» шудоно ; Удмурт литературалэн чебер пельугыез ; Яркыт учыр : вакчи мадёсъёс // Удмурт дунне. – 2005. – 12 июля. – С. 6.

Одӥг чыртыын кык галстук ; Пуны но карга Гитлерез : вакчи веросъёс // Удмурт дунне. – 2006. – 7 февр. – С. 6.

Отё-ботё, шоботё... : верос // Азвесь кышетэн толэзь : веросъёс : семьяын лыдӟон книга / люказ но радъяз В. Ившин. – Ижевск, 2007. – С. 119.

Партбилет яке кышно ; Пытсэтын ; Орденъёслэсь кольчуга ; Сю процентлы ӟеч : вакчи мадёсъёс // Удмурт дунне. – 2005. – 13 сент. – С. 7.

Пётр Захаровлэн 50 аресэз азьын ӧпкелёнъёсыз : кылбур // Удмурт дунне. – 2011. – 28 янв. – С. 12.

Писатель луыны кенеш ; Дунне вылын одӥг гинэ ; Каляга юрттӥз ; Газет киоск дорын ; Инмарен ыстэм нылаш : вакчи мадёсъёс // Удмурт дунне. – 2005. – 30 авг. – С. 6.

Сьӧд мугло : кылбур // Ӵужон быж, вень бугор но мукетъёс : пудо-животъёс но пӧйшуръёс сярысь кылбуръёс / люказ но радъяз В. Ившин. – Ижевск, 2011. – С. 18.

Тол бере тулыс вуэ! : эссе // Байгурезь (Дебесы). – 2009. – № 10 (нояб.). – С. 11. – (Спецвыпуск памяти Степана Павловича Широбокова).

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.