Перевозчиков Юрий Александрович

Ышыге уг поты ышеме

Перевозчиков Ю. А.

Юрий Александрович Перевозчиков - одӥгез азинлыко егит адями.

Йылпумъямын Удмурт кун университетэз, Историяя, кылъя но литературая Удмурт институтлэсь аспирантуразэ, Россиысь кунсьӧр кусыпъёсъя министерстволэсь Дипломатияя академизэ. Калык кусыпъёсъя специалист.

Удмурт кун университетысь историяя факультетысь валтӥсь дышетӥсь, история наукаосъя кандидат.

Улосэз азинтон стратегияя институтысь департаментлэн кивалтӥсез.

2004-тӥ-2006-тӥ аръёсы - Шара политикая школалэн менеджерез.

Удмурт Республикалэн Президентэзлэн но Правительстволэн администрациысьтызы Калык кусыпъёсъя но протоколъя управлениысь секторен кивалтӥсь.

Удмурт культурая «Дэмен» огазеяськонлэн правлениезлэн ёзчиез, Финн-угор егитъёслэн ассоциацизылэн кенешазы быръем мурт. Удмурт-уэльс эшъяськонъя обществолэн вице-президентэз, «Утка» этноклублэн вице-президентэз. Быръемын Нациосын ужан политикая министерство бордысь кенеше.

«Феномен Удмуртии» но трос мукет проектъёс бордын ужам адями.

Вераське удмурт, чех, венгер, немец, англи, финн кылъёсын/

- Юрий Александрович, кызьы тӥ асьтэды шуысалды: дышетӥсь, тодосчи, дипломат, проектъёс гожъян удысъя специалист?

- Али сыӵе вакыт: адями ассэ одӥг кылын гинэ вераны уг быгаты. Та ласянь кемась ӧвӧл кенешим тодмо тодосчиен Галина Никитинаен. Со но шуэ, туала вакытэ, пе, адями ассэ пӧртэм муртэн шӧдэ. Студентъёсын ужасько бере, тодӥсько, соос но асьсэды кин шуыны ӵемысь уг тодо. Нош дас-дас вить ар талэсь азьло ай ваньмыз валамон вал.

Соин ик тазьы влэкто, министерствоын мон - калык кусыпъёсъя ужась, университетын - тодосчи, дышетӥсь, общественной ужын - чылкак мукет адями. Историк-этнограф луэме юрттэ калык кусыпъёсын ужаны. Этнологлэн эскеронъёсыз котьку но калык кусыпъёс бордын луо. Озьыен, со дипломат луыны кулэ, адямиосын, культураосын кусып тупатыны мед быгатоз.

- Тӥ пичи дырысеныды атайтэк кылиды. Сыӵе пиос, пе, мукетэсьгес луо, озьы-а?

- Атайтэк кылем нылпиос мукетъёсызлэсь сокем уг висъясько, дыр. Оло нош улонын асьсэды золгес шедьтыны быгато ай. Нош анайтэк быдэсмем пинал мукетгес луэ ик. Мамае - Людмила Николаевна кык пи будэтӥз. Костя агае одӥг ареслы бадӟымгес вал, но ми сокем пӧртэмесь. Мама кыкнамес но одӥг выллем визьманы выриз кадь но, мон книгаос бордынгес пуки, Костя ульчаостӥ бызьылӥз. Мон кык вылӥ образование басьтӥ, диссертациме ути, со ужбергатӥсь луиз. Пичи дырмы туж шудо вал: нылпи сад, школа, тренировкаос, пионер лагерь. Мон Ижысь туж огшоры 43 номеро школае ветлӥ, сое зарни медален йылпумъяй. Агае теннисэн зол шудӥз, спортъя мастер, мынам - кыкетӥ разряд.

Мамамы вань улонзэ ужаз «Ижсталь» заводын. Солэн пинал дырыз туж секыт вал. Анаез вань кулӥз. Тросэз тодмоосмы шуо: мамады, пе, вань улонзэ пиналъёсызлы сӥзиз. Озьы ик вань.

- Одӥгаз пумиськонын тӥ шуиды: улонады туж бадӟым пытьы кельтӥз егит нылаш - Татьяна Минниахметова. Али со тодмо тодосчи, Австриын улэ. Малы сое асьтэ дышетӥсеныды лыдъяськоды?

- Ой, таиз туж яркыт тодэ ваён. 1982-тӥ ар, пионер лагерь. Мыным - 11 арес. Вожатоймы - Удмурт кун университетысь филологияя факультетысь студентка Татьяна. Отрядысьтымы пиос соин туж данъясько вал. Татьяна спортэн, каратэен, выриз. Со милемыз оскытӥз: киыныз кирпичез пильылэ, пӧртэм приёмъёс возьматъя. Татьяна кырӟаны но яратылӥз, туж тунсыко вераськиз. Вожатоенымы зол эшъяським. Со ми доры квартирае но куное вуылӥз, вордӥськем нуналам котьку но кузьмалляз книгаос. Нырысетӥ кузьымез - Салават Юлаев сярысь роман. Собере сётъяз Удмуртилы сӥзем бичетъёс но. Отысь лыдӟемъёсме мон песянаелэн верамъёсыныз ӵошатыны ӧдъяй, удмурт культураен тунсыкъяськыны кутски.

- Соку удмурт сямен вераськиськоды ни вал-а?

- Уг. Песянаелэн анаез Аграфена Ивановна но монэ удмурт кылын ӧз дышеты. Анае но песянайёсы мон азьын удмурт кылэ выжо вал, мае ке медам вала шуыса. Нош 1980-тӥ арын песянаелэн анаез городын огшап шутэтскиз. Паймиз: мар ай та таӵе, нунокъёсыз удмурт сямен воксё номыре уг валало ук. Песянай милемыз визьманы ӧдъяз.

1985-тӥ арын гожтӥськиськом вал «Знание - сила» журналлы. Али но тодӥсько на отысь Членов этнографлэсь туж тунсыко статьязэ лыдӟемме. Отын валэктэмын вал аслэсьтыд выжыдэ эскеронъя но выжы писпуэз лэсьтонъя методика. Шарканысь песянаелэн юрттэмезъя мон сизьым тубатозь выжыме тодӥ. Тӥни соку калык культураен тунсыкъяськонэ эшшо йылӥз.

Кӧня ке ар ортчыса быръёно ни вал азьлане сюрес. Татын бадӟым пытьы кельтӥз Галина Гелевна Владимирова дышетӥсьмы. Со историк вал, Словакиын но ужамын. Дышетӥсь туж тунсыко мадьылӥз кунгож сьӧрысь улон сярысь.

Вал на журналист луон малпанэ. Сочинениос чебер гожъяй, олимпиадаосын вормисе потай, школа ӝытъёслы кылбур «пӧралляй», кырӟанъёс гожъяны кутски. Тунсыко потылӥз черчение, архитектура. Малпалляй та удысэ мыныны. Но… секыт висеменым сэрен мамае монэ мукет городъёсы дышетскыны ӧз лэзьы, нош журналистэ но архитекторе Ижын ӧз дышетылэ. Соин ик бырйи Удмурт кун университетысь историяя факультетэз. Анае татчыозь уг тоды кыӵе корпусын дышетскемме но. Студентъёсын ужасько бере, паймисько: куд-огезлэн анай-атайзы котькуд экзаменын кузязы ветло, юаллясько…

- Историяя факультетын дышетскисьёс уноез туж тау карыса тодазы ваё Владимир Владыкин тодосчиез. Тӥ солэн школаез пыр потӥды-а?

- Мон Владимир Емельяновичез бадӟым дышетӥсеным лыдъясько. Куке-соку Татьяна Минниахметова кузьмаз вал «Край родниковый» книга. Отын нырысетӥ статьяез ик Владыкинлэн вал, туж яраз. Университетын нырысетӥ нуналаз этнографилы сӥзем лекциез лыдӟиз Владимир Владыкин. Тӥни соку тодӥ: та паймымон тодосчи - улэп (бадӟым адями ке, улэп ӧвӧл ни кожаськом вал-а, мар-а). Матэгес тодматским бӧрысьгес. Владимир Емельянович тунсыкъяськиз: кин мон, кытысь, вераськисько-а удмурт кылын. Уд ке - со урод, дышетыны кулэ.

Кыкетӥ курс бере Владыкин дораз ӧтиз но шуэ: университетысь группа мыноз Венгриысь Сегед городэ. Вань, пе, кык историклы инты, тонэ дэмласько. Но кунгож сьӧры огшоры гинэ мыноно ӧвӧл, астэ, калыктэ возьматыны быгатоно. Со понна, пе, тыныд удмурт кылэз дышетоно, кык толэзь ӵоже дырыд вань на.

Мон басьтӥ удмурт-ӟуч кыллюкамез. Туж зол юрттӥз отысь грамматикая очеркез. Владыкин сётӥз на удмурт кырӟанъёсын бичет, озьы мон удмурт кылэз пичи-пичи валаны ӧдъяй. Та вакытэгес ик экспедицие потамы. Ачиз Владыкин кивалтӥз. Со вал «кизилиё» экспедиция: Дышетӥсьёслэсь тодон-валанзэс будэтонъя институтысь Люция Волкова - али Глазов пединститутын кафедраен кивалтэ, Елена Попова - али история наукаосъя кандидат, кык книгалэн авторез, Юрий Александров - Нациосын ужан политикая министерствоысь отделэн кивалтӥсь, Андрей Прокопьев - история наукаосъя кандидат, «Эктон корка» студилэн кивалтӥсез, Игорь Ганеев - тодосчи, али Болгариын улэ, Ольга Загуляева (Смирнова) - биолог, психолог, Удмурт нылкышно кенеш огазеяськонлэн правленияз ужась. Но соку нокин ӧз на тоды, кинъёс ми луомы.

- Тӥ но-а?

- Мон наука котыре кыстӥськи. Витетӥ курсысен ужай ни университетысь индоураликая лабораториын. Сое кылдытӥз Владимир Напольских тодосчи. Али со Санкт-Петербургысь университетын тырше.

Бӧрысь мон аспирантурае пыроно кариськи. Но ӝоген мӧзмыны ӧдъяй, эскерон ужъёслы коньдон шедьтыны туж секыт вал. Одӥг пол телефон трубкаысь лякыт нылкышно куара кылӥськиз:

- Мон куарадыя шӧдӥсько, тӥ - егит. Нош милям финн-угор егитъёслэн азинскемзылы сӥзем конференция ортче. Пыриськемды уг поты-а?

- Потэ, малы уз, - шуисько.

Но тунсыкъяськонэ мукетгес вал: финн-угор кусыпъёсты наука ласянь эскерыны уз луы-а меда? Бӧрысь тодӥ: со жингыртӥсь Надежда Уткина вылэм. Конференциын мыным туж яраз, резолюцилэсь бадӟым люкетсэ ачим дасяй. Кӧня ке дыр ортчыса, ӧтизы «Шунды» огазеяськонлэн лагеряз лекциос лыдӟыны, озьы общественной уже пыриськыны кутски. Одӥг вакытэ «Шунды» огазеяськонлэн кивалтӥсез но вал. Ужамы Надежда Уткинаен ӵош, нырысьсэ басьтӥським проектъёс гожъян борды. Дасямы «Шундылэсь» программазэ: наука, экология удысъёсъя, студентъёсын ужанъя. Нырысьсэ утыны кутским кунгож сьӧрысь грантъёсты.

- Тӥледыз проектъёс дасясь специалистэн лыдъяло. Асьтэос та пумысен мар малпаськоды?

- Проектъёсы трос шуыны мон уг быгатӥськы. Ма, котьку но грант понна ӧй ужа. Кылдытэмын вал «Вожодыр» тол лагерь, али - бадӟым классъёсын дышетскисьёслы - азьветлӥсьёслы «Вамыш» школа. Сое Татьяна Ишматова пичияк воштӥз.

«Шунды» огазеяськон бордын ужаны кутскизы удмурт кылэз дышетонъя курсъёс. Соку удмурт кыл кун кыл каремын, но сое пыӵатонъя программа ӧй вал на. Игорь Ганеевен ӵош гожтӥмы удмурт кылэз дышетонъя книга.

Одӥгез бадӟым проектэ - «Ӵош» («Вместе») ассоциациез кылдытонэ но «Марӟан гуръёс» дискез поттонэ пыриськон. «Ӵош» ассоциациез кылдытон туж тунсыко вал. Сыӵе малпан вордӥськиз МАФУН-лэн пумиськонъёсысьтыз. Но со азьын ай Надежда Уткинаен ӵош «Шундылэсь» но бигер егитъёслэн «Имам» огазеяськонзылэсь правленизэс люкамы. Со бӧрсьы Глазовын калыккуспо фестиваль ортчытӥм. Радъямы КВН-ёс но. Озьы ваньмыз со огазеяськиз, 2000-тӥ арын Удмуртиын ортчиз «Ми - Россиысь» форум. Отчы вуылӥз Россиысь калыкъёслэн ассамблеяенызы кивалтӥсь Рамазан Абдулатипов но. Та аре ик «Ӵош» ассоциация ужаны ӧдъяз.

- Кун Думаысь депутат Светлана Смирнова бордын ӵемысь сылэ тӥляд нимды. Кызьы ӵош ужаны кутскиды?

- Светлана Константиновна туж быгатэ адямиосты командае люканы, соос азе ужпумъёсты рос-прос пуктыны. Со вӧзын котьку но кужмо адямиос ужало. Мон али но Смирновалэн депутат ужъёсызъя юрттӥсез луисько.

1997-тӥ арын Светлана Смирнова Кунсьӧр кусыпъёсъя министерстволэн дипломатияя академиезлэн конференцияз вуылӥз, доклад лыдӟиз. Соку ик малпанэз кылдэм монэ отчы келяны. Со понна, пе, кылъёсты тодоно, син шорын луоно. Светлана Константиновна оске вал, мон экзаменъёсме сётыны быгато шуыса. Кунсьӧр кылъёс пӧлысь бырйи венгер кылын экзаменэз. Дышетӥсь - чылк-чылк венгр вылэм, картэз Россиысь. Экзаменме аудиторие тубытозям сётӥ, шуыны луоз. Со венгер кылын юалляськиз, кытысь, кин мон. О-о, удмурт, иське, ӵыжы-выжы луиськом…

Тау карисько Светлана Смирновалы, со монэ адӟиз, юрттӥз, стипендия но ар ӵоже басьтыса улӥ. Удмуртие берытскеме бере но юрттӥз, Калык кусыпъёсъя министерствое ужаны интыяськи. Мон дипломатияя академиын вуоно посолъёсын ӵош дышетски. Бӧрысь Светлана Константиновна дэмлаз аналитикая ӟеч центр кылдытыны. Озьы быдэсак со доры ужаны выжи.

- Али тӥ нош ик министерствоын. Мӧзмыт уг поты-а?

- Потэ. Мон асме творчествое месӥськем адямиен уг лыдъяськы, но сюлэмылы матынгес эрико ужаны. Соин ик ӧй куштӥськы университетын ужелэсь, студентъёслы лекциос лыдӟисько, наукаен вырисько. Мыным тунсыко пото пиар технологиос, шара политикая уж.

- Нялтас вераса, тӥ туж мыло-кыдо ужаськоды вал «Шара политикая школа» проектын. Но со куспетӥ луиз. Уг поты-а асьтэлэн та выллем проект кылдытэмды?

- Сыӵе малпан вал. Со вылэ пыкиськыса, «Егит азьветлӥсьлэн школаез» кылдытэмын ни, шуыны луоз. Но коньдон туж ӧжыт. Улосмылэн палэназ та проектэз вӧлмытыны секыт. «Егит азьветлӥсьлэн школаез» проект басьтӥз Приволжск федерал округысь грант. Но коньдон одӥг арлы гинэ чакламын.

- Егит азьветлӥсьёсты будэтон борды али пӧртэм огазеяськонъёс, партиос, движениос басьтӥсько. Со зэмзэ но-а кивалтӥсьёсты будэтыны юрттэ?

- Общественной огазеяськонъёс буш интыын уг ужало. Та ужпум борды басьтӥськизы бере, иське, шугадӟонмы вань. Мукет ласянь, лидеръёс азе выль куронъёс пуктӥсько, соос визьмоесь, коньдон поттыны быгатӥсесь гинэ медаз луэ, калык выжызэс мед шӧдозы на. Сотэк учке ай, мар пӧрме: адями пичияк ӝутске но, нырыз чатырске, вӧзысь калыкен кусыпъёсыз тӥясько.

- Ӵемысь шуиськом, сыӵе ни асьмелэн сяммы. Зэмзэ но-а удмуртъёс пӧлын вылтӥяськон золгес шӧдӥське?

- Вань калыкъёслэн сыӵе сямзы вань, но асьмеос, удмуртъёс, асьмеды ултӥ карыны дышемын, малпаськомы: ми гинэ сыӵеесь. Бигеръёслэн, ӟучъёслэн ог-огзэс лёган сямзы кытӥяз золгес но ай.

Общественной огазеяськонъёс азьветлӥсьёсмес эскерон выллем луо. Адями аслэсьтыз быгатонлыкъёссэ чакла, кулэ муртъёсын тодматске. Та ужпум шоры огъя ке учконо, асьмелэн Россиын граждан общество ӧвӧл на. Пӧртэм калык огазеяськонъёс шоры кулэтэм макеос шоры кадь учко, адями уг данъяськы общественной ужен выременыз. Азьвыл улонлэн школаеныз лыдъяськылӥзы партия, комсомол. Собере соос государствоен огинэ бурмылӥзы. Туала вакытэ общественной огазеяськонъёс луыны кулэ улыны дышетӥсь школаос выллем. Тӥни соку отысь потозы зэмос азьветлӥсьёс.

Президент Владимир Путин аслаз вазиськоназ вера: 8 миллион адями пыриське пӧртэм общественной огазеяськонъёслэн ужазы. Но со туж ӧжыт. Россиысь вань адямиослэсь лыдзэс чаклано ке, 100 миллионэз ке но пӧртэм огазеяськонъёсы пырысалзы ке, соку граждан общество сярысь вераськыны луысал.

- Уд жаляське-а дипломат луымтэдэс?

- Пичияк жалянэ вань. Али Светлана Смирнова но Дипломатияя академиын экзаменъёссэ сётэ. Отын дышетӥсен вераськыкуз, тодмо луэм: Венгриын кылем сӥзьыл шуг-секытъёс кылдыку, МИД-ын, пе, венгер кылын вераськись специалистэз утчаллям - шедьтӥллямтэ. Удмуртие нокин вазиськымтэ ни, дышетсконме горд дипломен йылпумъяй ке но. Озьы пичияк ӧз тырмы, дыр, удалтон дорозь вамыше.

МИД-ын дышетскыкум, мон ӧжыт лыдъем калыкъёслэн кылъёсынызы вераськись специалист лыдъяськисько вал, соин ик Албаниын война кутскем бере албан кылэз дышетӥсь пичи группае келязы. Но, валамон ини, нокинлэн но со кылэз дышетэмез, Албание мынэмез уг поты вал. Бӧрысьгес группаез пичиятӥзы. Мар сярысь со вера? Государствомы ужа тылпу кысӥсьёс сямен. Кытын ке мар ке луэ ке, отчы шуак адямиосты дасяны ӧдъяськом, нош кыдёке азьлане учкыны ум быгатӥське. Москваын, монэ ӝог шедьтысалзы, нош МИД-аз ик кыльыны мылкыды ӧй вал, отын уж уг дунъяськы. Соин берытски Удмурт шаерам. Уноез Москвае кошко но ышо. Отын, оло, соос кизилиос, но калыксы понна тунсыко луэмысь дугдо. Одӥг пол Светлана Смирнова вераз: мон, пе, оскисько, куке-соку ми но асьме республикамылы кулэ луом…

- Кулэ луымтэысь шат уноез визьмо удмуртъёсмы палэнэ кошко?

- Озьы, дыр. Кемалась ӧвӧл Германиысь удмурт пияш монэ Интернет пыр шедьтӥз. Павел Кожевников выжыезъя Дэбес ёросысь Зар. Медла гуртысь. Германиын улэ семьяеныз ӵош, ужа компьютер компаниын. Ми Германие ӵем вуылыны ум быгатӥське, со Удмуртие бертылэ. Но татчы берытскыны уг малпа али. Россиын, пе, воштӥськонъёс зол ӧвӧл на. Тӥни озьы котькудӥзлэн аслаз улонэз, мон судья ӧвӧл.

- Кылӥськиз вал, тӥ корка пуктӥськоды шуыса. Озьыен, Удмурт шаерлэсь палэнэ кошкон мылкыдды ӧвӧл ни?

- Корка ӝутон сярысь малпан но шуак ӧз кылды. Эстоние докторантурае дышетскыны ӧтё вал. Малпаськыны ӧдъяй: я, вуыло на эшшо мукет кунъёсы, проектъёс кылдытъяло. Но 30 аресам маи вань ни? Коркае, семьяе, машинае?

Улыны котькытын луэ, тани удмуртъёслы тодмо Ева Тулуз тодосчиез учком. Ну, солы аслаз Францияз улонтэмез вал? Но со басьтӥз Россия но Эстония вискысь хуторын корка. Улонэз тунсыко кадь, Интернет вань. Мон но Дэри ёросысь Изгуртын корка пуктоно кариськи, со аслым ярамон, удмурт тусъем мед луоз.

- Семья кылдытыны но дыр вуиз кадь уг поты-а?

- Кык лудкеч сьӧры уйиськод - одӥгзэ но уд куты. Мон уг шугъяськиськы, пересьмо но семья кылдытыны нокинэн луоз шуыса. Яратоно нылы вань. Малы дыртонэз? Берло дыре тросгес лыдӟиськыны тыршисько. Туж кельше визьмо литература, кемалась ӧвӧл Чехиысь Михаил Кундералэсь «Невыносимая лёгкость бытия» книгазэ лыдӟи. Малпасько сое удмурт кылэ берыктыны. Но чех кылын та книга потэм 1970-тӥ аръёсы Парижын, мон сое нокытысь шедьтыны уг быгатӥськы. Книгаын возьматэмын нуналмысь улон, но со пыр усьтӥське адямилэн лулупуш дуннеез. Зэмзэ но озьы луэ: огшорыын - мур пуштрос.

Источник:

Перевозчиков Ю. А. Ышыге уг поты ышеме / Ю. А. Перевозчиков // Удмурт дунне. - 2007. - 8 июня. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"