Емельянов Константин Васильевич

Гур вылысь Емельян

К. В. Емельянов

Тыпылэсь меда, бадярлэсь меда... Мугорыз бадӟым ӧвӧл ке но, та кылъёс тупало Игра ёросысь Мазьги (Лонки-Ворцы) гуртын улӥсь Константин Васильевич Емельяновлы. Мукетъёсызлэсь со номырин но уг висъяськы кадь. Озьы ке но гуртоос соин данъясько. Быдэс улонзэ музъем ужан машинаосын герӟам воргоронлэн нимыз удмурт лыдӟисьёслы тодмо. Серемес веросъёсыз, фельетонъёсыз, повестьёсыз калыклэсь мылкыдзэ бурдъяло, кулэ интыяз визь-кенеш но сёто.

- Быдэс улондэс механизатор луыса ортчытӥды: гыриды-кизиды, ю-нянь будэтӥды. Оло, та уж мылкыддыя но ӧй вал?

- Милесьтым мылкыдмес юась-марась ӧй вал со вакытэ. Немец фашистъёслэн кунмы вылэ урдскемзы тросэзлэсь егитъёслэсь чебер малпанъёссэс сураз-пожаз. Мон соку Играысь шор ёзо школаын укмысэтӥ классын дышетскисько вал. Война кутскемен, улонмы уродмыны ӧдъяз. Вылаз ик, ужасьмы - трудодень поттӥсьмы - нэнэмы гинэ кылиз, тятямы - фронтын. Азьвыл аръёсы бубамы но уксё поттылӥз. Со но мӧйымыса висьыны усиз. Нош сиисьёсмы лачак: ми, ньыль нылпиос, но кык пересьёс. Соин ик мыным, пиналъёс пӧлысь самой бадӟымезлы, дышетсконэн йырин ӧйлась ни, 1943-тӥ арын сое аналтӥ.

- Тракторист луыны малпады-а?

- Дышетскемысь дугдэме бере, кӧня ке улыса, монэ партилэн райкомаз ӧтизы но кыкетӥ секретарь доры пырыны косӥзы. Кытысь кин луэмме верай но, МТС-э, трактористъёсты дасян курсъёсы, мыныны дэмлазы. Тае кылыса пӧсьвуаськи но кезьыт вуэ чусӥськи кадь: сыӵе кырсь уже! Пыкиськисько шӧтай вал, но монэ дезертирен лыдъялом шуизы. Кин со дезертир, мон ӟеч тодӥсько вал.

Урод мылкыдме шӧдыса, вылды, партилэн райкомаз пукисьёс трактористлэн ужез пайдаё шуыса гочатӥзы: трудоденьлы быдэ куинь кило ю тысь но манетэн ӝыныен коньдон сӥзизы. «Корт вал» котырын номыре тодӥсьтэм адями МТС-э вамыштӥ. Школаын ӟеч дышетскисько вал бере, куд-ог тодмоосы серем но карыны выризы: «Таиз, эше, география яке математика предмет ӧвӧл - трактор». Зэм ик но, сое тодон понна трос ӝук сиёно, пӧсяно луиз.

- Амалды ке луысал, оло, чылкак мукет сюрес бырйысалды?

- Пичиысен ик книга-газет лыдӟыны яратылӥ. Атае но оже кошкыкуз визьнодаса кельтӥз - дышетскыны косӥз. Дышетӥсь луэме потэ вал. Сизьым классэз йылпумъяса, гуртысьтымы Толя Корепановен Якшур-Бодьялась педучилищее мынӥм. Кыкнамес ик экзаментэк кутӥзы - похвальной грамотаосмы вал. Дышетскыны кутскимы 1-тӥ октябрьысен. Толэзьзэ Факел посёлокын нюлэс дасянын ужано луиз.

Ньыльдон иськемъем сюресэз мынытозямы, кутъёсмы пӧсьтылӥзы. Нырысетӥ арняяз ик нюлэскы нин дуре ветлоно луиз. Кут кутанэз ноку но адӟылымтэ мурт аслым пыдкук пӧрай. Ярано коть, эше та ужлы чырткем вылэм. Огнам ке луысал, оло, гольык пыд бертыны кыльысал. Кызьы но озьы Октябрь праздникъёс дорозь дышетскимы. Отӥяз эше чутрак пумит кариськиз Бодьяла мыныны. Мон но малпаськонэ уси. Сиён ичи. Магазинысь басьтыны ваньзэ шедьтоно ӧвӧл я коньдонлы ёрмоно. Тыбыр вылын нуэмез кык арнялы гинэ окмылӥз. Анайме нюлэс дасянэ келязы, пересьёслэн ужаны пайдазы ӧй вал. Кезьыт тол нуналъёсы дас, сизьым но кык аресъем сузэр-вынъёсме син азям пуктылӥ но педучилищеме аналтӥ. Берен Играла - тямысэтӥ классэ - вамыштӥ.

- Дышетӥсь луымтэысьтыды уд ӧпкелиське-а?

- Паймоно кадь, вань улытозям монэ кин ке китӥм нуллӥсь вал, лэся. Улон сюрес быръён сярысь малпаськыса ӧй улы, кытчы косӥзы, отчы ик вамыштӥ. Шумпотӥсько: мон понна ваньмыз со умоен берытскиз. Тракторист ӧй луысал ке, оло, тросэз сямен курадӟыса улысалмы.

- Нош гожъяськыны кызьы кутскиды?

- Таиз сярысь монэ ӵемысь юало. Ачим но сое уг валаськы. Инкуазен сётэм мылкыд-а, мар-а со. Пичиысен лыдӟиськыны яратӥсько вал, со-а, мар-а гожъяськыны мылкыдме ӝутӥз. Кыкетӥ классын дышетскыкум, премия чотын «Дась лу!» газет гожтӥзы. Макем бадӟым шумпотон вал! Одӥг чурзэ но лыдӟытэк ӧй кельтылы. Со дырысен газетэн ӧй люкиськылы. Туж вожъяськылӥ отчы гожъясь ас ёзъёсылы. Мынам но гожъяме потылӥз, нош кызьы, ма бордысен кутскыны амалы ӧй вал. Дышетӥсьёслы вазиськыны дӥсьтонэ ӧз тырмы - укыр керпотӥсь. Сизьыметӥ классэз быдтытозям, номыри но ӧз пишмы. Со понна тодмоосылы, ӵыжы-выжыосылы гожтэт гожъяны яратылӥ. Пумитаз ивор басьтэме но гожъяськон мылкыдме пуромытылӥз.

Нырысетӥ гожтэме потӥз 1942-тӥ арын «Сталин сюрес» ёрос газетын. 1947-тӥ арын сӥё-дано механизатормы Анастасия Малых сярысь гожтэмме «Советской Удмуртия» газетэ ыстӥ. Поттӥзы. Кык-куинь толэзь ортчыса, ӵош ужась эше Андрей Емельянов мынэсьтым юа: газетэ номыр ӧд-а гожъя, пе? Гонорарме солы ыстӥллям. Отчыозь ӧй но тодылы, гожъяськонэн но узырмыны луэ шуыса. Ёрмон дыръёсы со туж юрттылӥз. Налог тырыны но тырмылӥз. 1960-тӥ арын гуртысьтымы мон нырысетӥез «Иж-49» мото басьтыны быгатӥ. Гожъяськон мылкыды туж бадӟым вал, но ӵем дыръя сое кудлань ӧръяны ӧй тодылы.

- Озьы ке но веросъёстэс но повестьёстэс книгаен поттыны быгатӥллямды.

- Куатьтонэтӥ арозь пичи корреспонденциос гожъялляй, отӥяз верос но гожтоно кариськи. «Дышетски, лэся» серемес веросме газетэ печатлазы. Гожъямъя, пе, ки воля. Озьы-а, мар-а. Нырысь ужъёсме трос тупатъязы, нош отӥяз - ичигес. Гожъяськон мылкыдме Писательёслэн огазеяськоназы но шӧдӥллям. Арлы одӥг пол егит гожъясьёслы семинаръёс радъяллязы. Мынэсьтым арлыдме ӧз учке, егитъёсын ӵош дышетскыны ӧтьылӥзы, гожъямъёсме эскерылӥзы.

Одӥг пол таӵе ужрадысен Ф. Ермаков тодосчиен кенешыса сылонъямы веросъёсме книгаен поттон сярысь малпан йырам чилектӥз. Со монэ Геннадий Красильниковен вераськыны ыстӥз. Пумиськеммы токма ӧз луы: веросъёсме люкаса вайыны косӥз. Надежда Кралина тодосчи соосты учкиз но поттоно шуиз. Ар но ӧз ортчы - «Ветлӥ меда, ӧй меда...» веросъёсын сборнике потӥз. Книга поттон секыт но ӝег шуо ке но, мыным татын но удалтылӥз. Кыкетӥзэ но книгаме калык доры вуттон сярысь малпанэ кылдӥз, собере - эшшо. Озьы вордскизы «Бускельёс» (1975-тӥ ар), «Эшъёсы-юлтошъёсы» (1978-тӥ ар), «Капка сьӧрын» (1988-тӥ ар), «Пилиськем горшок» (1989-тӥ ар). Нош «Яратонэз уд алда» ужме дас ар витисько ни. Югыт дуннеез адӟыса вуттоз ик меда выль книгае, ачим вань дыръя? Мылкыд куашка.

- Юрттӥсьёсты но вал, дыр?

- Озьытэк-а. Ӟеч муртъёс трос вал. Веросъёс, повестьёс гожъяны мылкыдме бурдъязы Флор Васильев, Владимир Романов, Фома Ермаков, Даниил Яшин, Семён Перевощиков, Роман Валишин, Николай Васильев, Кирилл Ломагин, Рашит Хайдаров, Генрих Перевощиков. Соостэк, оло, гожъясь но ӧй луысал. Паймоно кадь: вань дышетӥсьёсы мынэсьтым егитэсь, нош куд-огез улонысь но кошкизы ини. Тау соослы. Монэ мӧйы ӧз каре, дышетӥзы.

- Нош али мар бордын ужаськоды?

- Гожъяськись мурт озьы гинэ тыпак дугдыны уг быгаты. Кык тема йырын берга, но мӧйыгес кариськисько ни, лэся. Ручка кутыны катьы уг тырмы. Гожъяй ке но, вакчи веросъёсын гинэ выро на.

- Вань веросъёсты лякытэн лыдӟисько, кытысь сыӵе узыр кыл шедьтӥськоды?

- Номыр но мултэссэ малпаса уг улӥськы, асьме вераськон кылъёсын гожъяськисько. Ручка кутӥськод ке, кылъёс асьсэос радызъя пуксё кадь. Ма, собере кема улэмын пересь бубаосын. Соослэн вераськон манеръёссы мыным пыӵазы.

- Серемес чуръёс гожтыкуды, юри малпаса пукиськоды-а, улонысь басьтӥськоды-а?

- Серемес учыръёсын котькудӥз адями пумиськылэ: я ас вылтӥз ортче, я муртъёслэсь кылэ. Сое умойгес кылзоно но волятыса гожтоно. Ӵем дыръя семья куспамы луэм учыръёсты но гожъялляй. Одӥг учыр тодам лыктэ. Галя кузпалы кияз газет кутэм но «Шӧкыч» бамез лыдӟе. Пальпотылэ, собере шара вера: «Учкы ай, Костя, асьмеос кадь но улӥсьёс вылэм». Мон ымам ву ӟузем кадь луи. Пумозяз лыдӟыса, фамилиме синйылтӥз но шуэ: «Тьфу, шайтан, шедьтӥсько ук кинлы ымме усьяны!»

- Кузпалды сярысь кылпум поттылӥды бере, куинь кылын ке но вералэ вал.

- Ма веранэз? Кузпалы - Галина Фёдоровна - та улонысь вазь кошкиз. Ньыльдон ар ӵош улӥмы, ньыль нылпи будэтӥмы. Ваньзылы вылӥ тодон-валан басьтыны юрттӥм. Табере куатетӥ арзэ тани юрт котырын огнам бергасько.

- Нош кызьы тодматскиды?

- Гуртысьтымы ик вал со. Одӥг тракторен ужамы. Ужанъямы ик матысь эшъёс но луимы. Паймисько вал егит нылашлэн чиданэзлы: смена ӵоже ужатозяз, одӥг но шутэтскыны ӧз пуксьылы, нош мон пичи ке но умйылтӥськыны тыршылӥ.

- Егит ныллэсь йырзэ кема бергатӥллямды - бер кузпалъяськиллямды.

- Ма, ньыльдон арес но ӧй вал ай (серекъя). Огнын улон капчи, нокин понна но йыр уг висьы. Лушкем «емышмы» будэ ни вал, солэсь мӧзмылӥ. Пичи нылы, капка азяз потыса, оло, нуназеысен ик мынэсьтым ужысь бертэмме возьмаса пукылӥз. Дугдӥсько но, мотоям пуктыса, гуртозям тубытӥсько. Вешаса кӧлтӥсько, ӵуказеяз нош ик капка азяз васькытӥсько. Ӵошенназэс ик тубытыны оломар возиз. Вить арлэсь кема Галяез курадӟытӥ. Соин но, лэся, табере огнаме улыны кельтӥз.

- Мӧйымыса огнын шимес, дыр?

- Мӧзмытгес. Пудоосын вераськыса, соосыз вешаса, кӧтме буйгатӥсько.

- Оло, скал но вордӥськоды?

- Кузпалы кулэм бере одӥг ар вордӥ на. Бӧрысь ӧй дӥсьты ни толлы кельтыны. Шӧдтэк шорысь висьыны усид ке - быриськиз. Бускельёс ялан скалдэ уз кыске ук.

- Пудо бордын вырыны пичиысен ик-а яратӥськоды?

- Кытын, пе. Кузпалы висемен, вань уж мон вылэ погыльтӥськиз. Со дырозь пудо котыре кутскылэме но ӧй вал. Кузпалылэн ветлэмез ӧйлась ни но, скал доры мыным потоно луиз. Кызьы кысконо шуыса юалляськеме бере, дыр-р куалекъяса, гид пала вамыштӥ. Скал доры вуытозям, ма гинэ малпаса ӧй вутты, тужгес но кышкай ӵыжемезлэсь. Нош скал визьмо вылэм, интыысьтыз но ӧз вырӟы. Пӧсь мунчоысь кадь потӥ гидысь. Йӧл юыны яратӥсько бере, кыскыны но ӝог дыши.

- Нош кыӵе тӥ улонын, серемес веросъёсысьтыды геройёсты сямен ик-а маскаръяськиськоды?

- Маскаръяськись вань ке, серекъяны кин пумит луоз? Кит-кит серекъяны яратӥсько. Но ӵемысь ас югдам усьыса ветлӥсько. Мурт сюлэм шыкыс ӧвӧл - усьтыса уд учкы, шуо. Со мон сярысь верамын. Инкуазез яратӥсько, тужгес но шумпотӥсько тулыслы, нырысетӥ турын-куарлы, сяськаослы. Кезьыт тол йылпумъяськем бере улон выльысь вордске кадь. Мон но егитомисько, но пурысьтам йырсиосы малы ке уг кулэсмо.

- Юбилейдэс пусйыны нылпиосты бертозы, дыр, куноосты лыктозы, кузьымъёсын вуозы, шулдыръяськоды...

- Егит дырысеным мон шулдыръяськонъёсыз адӟемпотостэм карисько. Гырыны-кизьыны потон нуналъёсы, май праздникъёсы, адямиос, чебер дӥсяськыса, ог-огзы доры куное мыно, шулдыръясько, нош милям бусыын самой пӧсь вакыт кутске вал. Вазен ведь вордскем нуналъёс сярысь тодӥсь-марась но ӧй вал, сое пусйыса но ӧм улэ. Вылаз ик, со мынам тупамын ю-нянь октон но, картофка копан вакытэ. Пӧсь ужгуре выйыса, тодэ ик уг лыктылы вал вордскем нунал. Огшоры нунал но тӥни.

Кузьым сярысь верано ке, мон сое басьтӥ ни. Мынам куать внуке, нош алигес тани пересь ӵужатай луи. Солэсь трос ма кулэ на?

- Кулэ на, вылды, гур вылды!

- Э-э-э, соиз ини чылкак мукет. Гур выл - мынам самой матысь эше. Маке малпано ке - отчы, шунсконо ке - отчы. Пӧсь куазен салкым утчаса уг улӥськы, нош ик - отчы. Выжыкылысь Емеля сямен, гур вылэным люкиськыны уг ӵыдӥськы. Фамилие но Емельянов ук.

Источник:

Емельянов К. В. Гур вылысь Емельян / К. В. Емельянов ; записала В. Кутузова // Удмурт дунне. - 2006. - 22 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"