Перевозчиков Евгений Егорович
Выжыкыл лэзиз выжы
Удмурт театрысь артисткаез Римма Перевозчикова-Николаеваез но Мунё театрысь артистэз Евгений Перевозчиковез чиньыосазы бырттэм зундэс гинэ уг герӟа. Пинал дырысен асьсэлы выжыкыл дуннеез усьтыса, али но паймемысь уг дугдо солэн чеберезлы, аспӧртэмлыко кужымезлы. Выжыкыл соосты сюдэ но, семья кусыпъёссэс но герӟа, мылкыдзэс но пиналмытэ. Удмурт Республикаысь дано артистъёс Римма Павловна но Евгений Егорович, сцена вылын шудэм сяна, мукет быгатонлыкъёсынызы но паймытъяло.
- Евгений Егорович, котькуд артист понна Выль арлэн вуонэз - кысык вакыт. Та нуналъёсы тӥледлы шокчыны ик маза ӧвӧл кадь.
- Озьы, 23-тӥ декабрьысен 8-тӥ январёзь нылпиос понна театрмы радъяз Выль арлы шулдыръяськонъёс. Солы шуыса, нимысьтыз спектакль дасямы «Ӟичы но Кион» тодмо ӟуч выжыкылъя. Нимаське со «Проделки рыжей Лисы, или Мерзни-Мерзни, волчий хвост». Отын мон пересез шудӥсько. Выжыкыл учкемзы бере пиналъёс понна радъямын на чеберъям кыз котырын шулдыръяськон. Шудон гожтэмын Фунтик парсьпи сярысь выжыкылъя, таяз мон сыщик.
- Выжыкыл дунне тӥ борды пыраклы выжыяськем, лэся, кошкылыса выльысь театре берытскиды бере?
- Озьыгес луиз. Семьяе понна асме зэмос воргоронэн возьматэме потӥз, лэся. Тросгес уждун басьтон понна ужме воштоно кариськи. Нош кытчы мыныны уг тодӥськы. Трамвай валтӥсе кутон сярысь ялон адӟи но трос малпаськыса ӧй улы, кошки. Кемалы ӧй, кык но ӝыны ар ортчыса, выльысь берытски. Ӵош дышетскем эшъёс но весь шуо вал: ку лыктод ни, сюлэмыд, пе, театр пала ик кыске ведь? Шонер малпаськоды, шуисько. Ӧй чида, артистэ дышетски бере, отын ик, пӧй, мынам интые. Оло, пинал дыр малпанэ но выльысь валтӥз.
Пичи дыръям мон весь малпалляй артист луон сярысь. Ас поннам дасяса, мамалы-папалы концерт возьматъясько вал. Школаын но котькыӵе шулдыръяськон ужрадъёсы пыриськылӥ. Кыӵе ке сценка пуктоно ке, котьку монэ бырйылӥзы. Туж яратӥсько вал серемес мадёнъёсты вераны, люкаськем калык кӧтсэ посыса серекъялляз. Но, 10 классэз йылпумъяса, артист луон мылкыды вунӥз. Собере верась но, валэктӥсь но ӧй вал, кытын артистэ дышето. Папа тракторист-комбайнер вал. Шуиз: колхозын ужась киос уг тырмо, направление басьтыса, Пермьысь гурт хозяйствоя институтэ зоотехнике дышетскыны пыр. Направлениен мынӥ бере, пырыны секыт ӧй вал. Но мыным отын ӧз кельшы, экзаменъёс берегес ик документъёсме басьтӥ но гуртэ бертӥ. Со вакытэ мама газетысь ялон шедьтэм, Уфаысь искусствоосъя институтэ, пе, удмурт дышетскисьёсты куто. Артист луыны малпаськод вал бере, мын ветлы, шуиз. Кошки Ижевске экзаменъёс сётыны.
Мынам драмая артист луэме потэ вал, но мугоры пичиысь ыстӥзы Свердловске, мунё театрлы артистэ дышетскыны.
- Вожъяськонды ӧй вал-а драмая артистэ дышетскыны пыремъёслэсь, Римма кузпалдылэсь ик? Учкисьёс сое тодмало, нош тӥ маска сьӧрын яке мунёен шудӥськоды.
- Азьвыл сыӵе малпанъёсы вал, вожъяськытылӥз драмтеатрысь сцена. Собере дыши Мунё театрлы. Татчы мон ӵош дышетскем эшъёсылэсь бере кыльыса вуи, 1983-тӥ арын. Кык арзэ армиын вал. Театре вуэме бере мӧзмыса ӧй пукы, соку ик валтӥсь рольёс сётӥзы. Удмурт театре но ӧтё вал, пиос уг тырмо шуыса. Нылпиосты шумпоттон - туж бадӟым шуд вылэм, соос шоры учкыса, ачид но пиналмиськод кадь, шуг-секытъёс но вуно, озьы нокытчы ӧй вырӟы ни.
- Евгений Егорович, удмурт спектакльёслэсь уд мӧзмиське-а?
- Кулэ вал, конечно, соос, но туала вакытэ учкисьёсты шуг шедьтыны.
- Кузпалэныды кыкты но артистъёс, ог-огдылэсь шудэмдэс, быгатонлыкъёстэс чакласькоды-а?
- Азьвыл мон туж ӵем вуылӥсько вал Удмурт театре, Римма но нылъёсынымы ветлӥзы шудэмме учкыны. Ог-огмылэсь малпанъёсмес котьку но вераськомы вал. Али шудэмзэ одӥг-ог гинэ адӟисько на: дыр ӧвӧл, улон но воштӥськиз. Оло, мылкыд но пуксиз.
- Шуо, тӥ пӧртэм мебель лэсьтон ласянь но туж кибашлы.
- Кибашлы-а, ӧвӧл-а, но киос мыно кадь мар но со лэсьтыны. Туала вакытэ милям уждунэнымы семьяез уд сюды: куремзыя ӝӧкъёс, шкафъёс, диванъёс но мукет мебель лэсьтӥсько. Спектакльёсмылы декорациос дасян бордын но тыршисько.
* * *
- Евгений Егорович, Римма Павловна, ог-огдэс кытысен синйылтӥды?
Римма:
- Тодӥсько вал, Свердловскысь театръя училищее пичи пияш пыриз шуыса. Дышетсконмес йылпумъяса, ваньмы сямен одӥг общежитиын улӥмы ке но, армия бере Женяез мон ӧй тодма.
Евгений:
- Экзаменъёс сётон вакытэ мынам пичи мугоры син шорад ик ӧз йӧтылы. Училищеямы нылъёс лапегесь вал, нош мон эшшо но лапеггес. Бальной эктонъёслы дышетыкузы, мыным эктыны пар но уг шедьы вал. Нош тодматскимы ми шӧдтэк шорысь. Общежитиын одӥг этажын улӥмы, бускель комнатаосын. Одӥг пол Римма пыриз но нянь куре, соку гинэ гастрольёсысь вуиллям. А мынам няне тӥямын: таӵеез сяна ӧвӧл, шуисько. Собере ини нылъёс монэ ӝытъёсы куное ӧтчаны кутскизы, сюдылӥзы.
- Мугорды пичиысь жаляса, дыр?
- Соку мон бадӟым вал ини. Училищеын дышетскыкум, кӧнялы ке кыстӥськи. Эшъяськисько вал спортэн вырись пияшен, со ик пӧртэм упражнениослы дышетӥз. Армие мыныкум, одӥг но ӝыны метр вал ини ӝуждалае. Отысен юнмай на.
Мугоры пичиысь нырысетӥ араз монэ утьыса сямен возизы ньылетӥ курсысь студентъёс. Нокинлы но ултӥяны ӧз сётылэ, весь сьӧразы нуллӥзы. Пальто басьтыны шуыса, гуртысь коньдон лэзизы. Со эшъёсы ик бырйизы мыным туж кильтро дӥськут - кечато пальто.
Римма:
- Женяез мон синйылтӥ лякыт сямыз, нылпиосты яратэмез понна, соин ик сое картлы бырйи. Нылъёсмы кыкто вордӥськизы, пичи дыръязы туж жадисько вал. Папазы весь юрттӥськылӥз, мисьтаськылӥз но. Нылъёссэ со туж яратэ. Мар ке куро ке, ваньзэ быдэстоно кожа, нырысь пыкъяськем каре ик. Куддыр гастрольёсысь вуисько но, коньдонзы бырыса, семьяосы пунэме пыриллям ни.
Нылъёссэ яратэмзэ мукет сямен но возьматъяз. Кык аресказы Выль ар праздниклы костюм вурыны кутски. Дыр ӧвӧл, уже но вуттӥськоно. Вуриськонэ вуныса кылиз, изьыны выдӥ. Нош ӵукна султӥсько но, Горд Изьылэн костюмъёсыз кыксылы но дась. Женя вуриськыны но быгатэ шуыса, воксё пайми.
Ларисалы но Диналы куинь арес тырмыса, гужемзэ гастрольёсы потоно луи. Женя куалектӥз, кызьы, пе, мон валало бантикъёссэс, кофтаоссэс, колготкиоссэс тупамзыя дӥсяны? Озьы но озьы шуисько: тазэ таиныз, нош таиз таиныз тупалоз. Бертэме бере нылпи садын ужасьёс шуо: Евгений Егоровичлы памятник, пе, пуктыны кулэ нылъёссэ огназ утялтэмез понна.
Таиз учыр ньыль арес дыръязы вал. Выль ар котырын милям шутэтскон нуналъёс но ваньмон дыр уг луыло. Кезьытэн висьыны усёзы шуыса, нылъёсмес гуртэ огназэс кельтылӥмы. Соос ас понназы шудо, йыртэман сямзы ӧй вал. Мае ке шӧдыса выллем, Женя шулдыръяськонысь ӝыныё кошкем. Доре пырисько но, пе, нокин уг пумита. Ӧсэз донгем но, со сьӧрын сылӥсь дерматин сумка пограм. Отысь бӧрдэм куара кылӥськем. Шудон сяменызы бадӟым сумка пушкы ворсаськиллям но «молнизэ» усьтыны быгатӥллямтэ ни. Бӧрдыса-бӧрдыса куаразы ик бырем, суть-суть котмиллям, дӥськутъёссэс кылиллям.
- Евгений Егорович, нылъёсты кыкто вордӥськемлы ӧд пайме-а?
- Пайми, кыкто вордӥськонзэс веразы ке но вал. Солэсь но ортчыт шумпотӥ. Больницае мынэме бере шуо, тӥляд, пе, нылъёсты вордӥськизы. Нош мон пумитазы: нош пиосыз ӧвӧл-а? Юрттӥсь кулэ ик вал. Табере Богдан внукмы будэ, одӥг арес но ньыль толэзь тырмиз ни.
Римма:
- Нылъёсмы пичи дыръя Женя котьку Тол бабай луылӥз. Куать аресозь туж оскизы соос выжыкыллы. Одӥг учыр луытозь. Со нуналэ папазы жаг куштыны шуыса потӥз но, костюмзэ дӥсяса пыриз. Чеберъям кыз котырын бергаськом, шудӥськом, нылъёс кылбур верало, кырӟало. Нош мынам, сереме потыса, Женя шоры учкем уг луы ни: бадӟым изьызэ пельёсыз мырдэм возё, тани-тани ымныраз усёз. Со куспын Динамы шуак тодмаз папазэ. Урмыса бӧрдэ: тӥ монэ пӧяськоды, мыным зэмос Тол бабай кулэ! Шудонъёс ортчытыса, кызьы ке озьы буйгатӥ ик. Женялэн но мылкыдыз куашказ, со дырысен нылъёсыз понна Тол бабайлэсь дӥськутсэ ӧз дӥсялля ни.
Нош Выль арез котьку сямен ик дорын пумитаськом, куд-ог дыръя эшъёсмы лыкто. Ог-огмылы кузьымъёс сётӥськом, конкурсъёс ортчытъяськом. Табере нылъёсмы бадӟымесь ни, соос милемды шулдырто, мар ке тунсыкозэ малпало.
- Нылъёстылэн асьтэ сюрестӥ мынэмзы ӧз поты-а?
Римма:
- Школаын дышетскыкузы, асьсэос дасяло вал кыӵе ке праздникъёслы сценарийёс. Ушъяськыса шуылӥзы, ми, пе, школаямы культурая министръёс. Выжыкылъёс но, кылбуръёс но малпаллязы. Гожъяськыны но пӧрмыто вал, ужъёссы «Поколение Я» газетын поталлязы. Соин но мылкыд каризы, лэся, Удмурт кун университетысь журналистикая факультетэ пырыны, кыкетӥ курсын дышетско ни.
* * *
- Римма Павловна, нылъёстылы гожъяськон мылкыд, оло, тӥ бордысь ик паласькиз? Выжыкылъёс но, сценарийёс но гожъяськоды, газетамы но ужъёсты трос гинэ печатласькизы.
- Шуг вераны. Выжыямы вань, дыр, гожъяськыны быгатонлык. Семён Тарасович Шихарев - мынам ӵужмуртэ. Агаез, Евгений Тарасович, Быдӟым ожлэсь азьло «Гудыри» газетын ужамын. Солэн пиез но пиезлэн куинь пиосыз озьы ик гожъяськон удысэн герӟаськемын. Уло Калининградын.
- Озьы ке но вормем артист луон мылкыдды.
- Мамаелэн нырысетӥ картэз артист вылэм. Ачиз валатэк но, со пыӵатӥз мыным театрез яратон мылкыд. Кинлы ке но кулэ вал ук усьтыны аслэсьтыз сюлэмзэ. Семьяямы мон самой пичиез вал бере, артистъёс сярысь тодэ ваёнъёссэ мыным мадьылӥз. Вералляз Васса Кирилловна Виноградоваен кырӟаса пукемъёссэ: сыӵе, пе, солэн куараез чебер! Уфаысь искусствоосъя институтэз йылпумъяса бертэммы бере со Удмурт театрын уг ужа ни вал. Но чебер куаразэ кылзыны кылдӥз. Нош 80 арес тырмонзэ пусйыкуз, Егор Егорович Загребинэн ӵош мон ветлӥ сое ӟечкыланы.
- Ваньмыз сямен ик, тӥ но пичи дыръяды артист вал ни, дыр?
- Вордӥськи мон Алнаш ёросысь Сизьгуртын. Котькуд праздниклы пиналъёсын концерт яке КВН дасяськом вал. Быдэс гуртэн люкаськылӥзы милемды учкыны. Мон ик азьветлӥсьсы вал. Асьмеос малпаса, пӧртэм сценкаос пуктылӥмы. Со мылкыды ик «Ижмашысь» калык театре вуттӥз. Уфаын искусствоосъя институтлы удмурт группа дасямзэс тодыса, экзаменъёсы пыриськи, артистэ дышетскыны мынӥ. Ӧй люкиськы пичи дырысь йӧспӧртэм малпанъёсыным но, выжыкылъёс гожъяны кутски. Нылпиос но весь мадьыны куро вал изьыны выдэмзы бере. Мадён сяменым йырам мар ке вылез лыктэ. Выжыкылъёслы инсценировка лэсьтӥсько, тодӥсько уго, макем кулэясько пиналъёс сыӵе ужъёслы.
Берло аръёсы сценарийёс гожъясько. Культурая «Дэмен» огазеяськонэн Андрей Иванович Ураськин кивалтыны кутскиз но, быгатонлыкме тодыса, мыным вазиськиз. 2-тӥ августэ Виль праздникез ортчытыны ньыль арзэ сценарий гожъяй ни. Тол келян, Дӧдьы куштон йылолъёсъя но шулдыръяськонъёс радъясько. Даслэсь ятыр сыӵе ужъёсы люкаськизы ни.
Выль ар праздникъёсты ортчытонъя но организациослэсь, предприятиослэсь куронъёс вань. Одӥгаз сыӵе шулдыръяськонын Тол бабай дӥсяськыны кулэ вал артист Игорь Люкин. Нош со берпум нуналаз шуэ: Москвае, пе, кошкисько. Мар кароно? Адямиос возьмало, дун сярысь но вераськемын. Женяез юрттыны курисько. Пыкъяське: ой, мылы уг пот, уг быгаты, пе. Монэ жаляса, соглаш луиз ик. Ӝыт туж зол ортчиз. Ачим Ягаез шудӥ, нош Тол бабайме ки вылысь ки вылэ лэзизы. Чиедысьтыз жалям каро: мар, пе, Тол бабаймы таӵе сютэм ветлэ ай.
- Арлыдоос понна яке нылпиос понна ужаны капчигес?
- Нылпиосын ужан туж бадӟым шумпотон вае: соослэн шунытэнызы ачид шунтӥськиськод.
Бадӟымъёсын шулдыръяськон но кельше. Нырысь потыны уг дӥсьто, учкыса сыло, собере кошкыны уг ӵыдо ни. Арлыдоос туж мӧзмо удмурт шулдыръяськонъёслэсь. Мон яратӥсько сыӵе ӝытъёс ортчытъяны, быгатонлыкед вань ке, малы сое пушкад ватыса возёд?
Театрын ужам сяна, мон али республикаысьтымы нылпиослэн реабилитацияя центразы психолог луыса тыршисько. Дышетски асьме дорын ик. Америкаысь методикая, сертификатэ но вань. Та центрын шутэтскись, эмъяськись нылпиослэн тросэзлэн анайёссы юо, вуэмын соос шаермылэн пӧртэм сэрегъёсысьтыз, 3-4 аресъемъёсыз но вань. Мон соосын выжыкыл пыр, шудыса ужасько. Шуом, вераськон мынэ чылкытлык, чеберлык сярысь. Пырисько доразы, ымнырме кырсь карыса. Монэ адӟыса шуо: «Ой, Римма апай, кыӵе тӥ кырсь, ойдолэ мисьтӥськыны». Паймо кызьы лыктэмелы. Шуисько, монэ одӥг автобус но ӧз пукты, пыдын лыктыса жади. Шудон пыр ик вераськон ӝутӥсько пинез сузян, киез миськон сярысь. Урок ортчем бере юасько: кинэ яратоно? Монэ, монэ шуыса, ваньмыз ӟыгыръяськыны лыкто. Нылпиос понна мынам дышетӥсь чот луэме уг поты, шунытэз мед шӧдозы соос. Шорам Римма апай шуыса вазисько.
- Евгений Егорович, кузпалдылэн психологе дышетскемез семья кусыпъёсады кызьы ке шӧдӥськиз-а?
- Мылкыдыз трослы каньылгес луиз, нош со семья понна туж умой.
Римма:
- Женя монэ весь дышетыны турттэ малпанъёсме шара, ватытэк верамысьтым. Мар ке уг кельшы - ватыса воземе уг поты. Нош солэн весь пушказ бугыръяське, урод мылкыдзэ калыклы возьматэмез уг поты, уг кереты. Сыӵе дыре мон громоотвод выллем луисько ини.
Дышетскеме пумысен ке верано, ачим но шӧдӥсько мылкыдылэсь воштӥськемзэ. Кин ке пыкылэ ке, куаретэ ке, сюлэмы урод луэ вал, весь асме ачим йырйылӥ.
Одӥг аре отпускам газетады ужаны интыяськылӥ. Валтӥсь редактор Алексей Петрович Шкляев но соку шуиз: сямыд, пе, воргоронъёслэн кадь, ваньзэ верано кожаськод. Соин но монэ Рим Павлыч шуылӥз. Табере мон куаретэмзылэсь сюлэмме урод уг кариськы. Ма, мынам эшъёсы туж трос. Соос монэ ярато, сямме воштыны уг туртто.
Евгений:
- Вань ик бен сыӵе уродос сямы. Керӟегъяськеме бере ачим малпасько ни: малы меда озьы шуи. Нылъёсты но куаретӥсько ке, берло жалясько.
Римма:
- Ма, серекъятыны но туж быгатэ милям папамы. Нылъёсыз мар ке умойзэ лэсьто ке, шуэ: та нылъёсы кабын ачим кадесь. Нош мар ке йыртэмало ке, шуэ ини: мамады но сыӵе ик.
Егит дыръяз ӵемысь паймытъя вал аслаз йӧспӧртэм малпанъёсыныз, ӧвӧлтэмзэ но вань карыса вералоз. Солэн кытын ке но тӧдьы кечез улэ, со ик олокыӵе но учыръёс маде, пе. Нылъёсызлы но вералля вал со сярысь.
Евгений:
- Гуртэ бертӥсько ке, пиналъёс мон котыре бинисько ни. Мадьыны куро тӧдьы кече сярысь, кызьы, пе, улэ ни со.
- Нош тӥледды мар паймытэ та улонын?
Римма:
- Куд-огез шуо: мон номырлы но уг абдраськы ни. Нош мон али ке но паймыса учкисько пӧртэм пужыё лымы пырыос шоры, сяськаос шоры. Богданмылэн но нуналысь нуналэ будэмез, визьмаськемез, Женя но паймытъя, йӧспӧртэмъяськонъёсыныз, нылъёсмы - быгатонлыкъёсынызы. Абдрасько Ольга Зориналы, кытысь солэн сыӵе чебер куараез потэ.
Паймисько милемды удмурт кизилиос каремды пумысен но. Малы милемды бырйиды? Аслэсьтым но Женялэсь ужамзэ чакласько ке, ми чик но кизилиос ӧвӧл - огшоры ужась мушъёс. Театрын шудэм рольёсы сярысь ке верано, мон нокыӵе принцессаез но, королеваез но ӧй шуды, весь ляльчиын. Но малпано ке, монтэк уг луы вылэм. Пичи пиез шудӥсь артист шуак кулэ луиз. Кин сое воштоз одӥг нунал куспын - Римма. Монэ пересь ни шуо, но малы соку йырам фата поно? Собере ас поннам малпасько: со бордын ик шуд - тон кинлы ке но кулэ, тонэ кин ке но возьма.
Евгений:
- Монэ тросгес нылъёс паймыто. Соос пичи дырысен ик ужаны, уксё поттыны дышизы асьсэлэн визьмынызы, керттӥськыны, вуриськыны быгатэменызы. Уксёлы ёрмыса улон но дышетӥз соосты берганы. Ужаса вылысь мон аслым сотовой телефон басьтыны уг быгатӥськы, нылы аслэсьтыззэ сётӥз. Умой но уг поты: мон кулэ кадь соослы кузьманы.
- Выжыкылэз улӟытыны луысал ке, кыӵе малпандэс быдэстыны курысалды?
Евгений:
- Артистъёсты кулэезъя дунъяны мед быгатысалзы. Уксё ке ӧз луы, семьяын но шумпотон ӧжытгес луоз, ужан мылкыдыд но уз бугырскы.
Римма:
- Нош мон выжыкылъёсын, сценарийёсын книгаме поттысал.
- Сцена вылын ӵошен шудэмды уг пот-а?
Евгений:
- Семьяенымы ик кыӵе ке ӟеч программа дасян сярысь мылкыдъёсмы милям вань. Ӝутӥськыны ум вормиське.
Римма:
- Мыным ӝоген 50 арес тырмоз, малпасько, картме но, нылъёсме но одно ик сцена вылэ потто.
Источник:
Перевощиков Е. Е. Выжыкыл лэзиз выжы / Е. Е. Перевощиков, Р. П. Николаева ; записала Лия Малых // Удмурт дунне. - 2006. - 29 дек. - С. 6, 11. - (Удмурт кизилиос).
За предоставление материала выражаем огромную благодарность редакции газеты
"Удмурт дунне"
