Уткина Надежда
Лулгур
Со воректӥз шуак. Чебер синмальдымон. Яркыт тусыныз но аспӧртэмлыко куараеныз сяна, кыскиз бордаз лулгуреныз. Угось отысь, лул пушкысь, потэм гур гинэ быгатэ туж кезьытъёссэ но шунтыны.
Со гочатӥз ваньзэ: нылкышноосты но пиосмуртъёсты, пиналъёсты но арлыдоосты.
Сое шуг валаны: со – вошъяськись, паймытъясь. Но котьку синмаськымон.
«Ой, сюлмы, сюлэмы…», «Лемлет малпанэ», «Синяя птица», «Белая лилия» - калык кырӟанъёслы пӧрмо ни кадь. Но соос уг суралско ваньмыныз ӵош – соос Надежда Уткиналэн. Зэм, туннэ ми ум малпаське кырӟан сярысь вераськыны – Надя аслаз творчествоез сярысь трос мадьылӥз ни. Туннэ со паймытоз тӥледыз чылкак мукетыныз.
- Редакцие электрон почта пыр кунгож сьӧрысь ивор ӧз вуылы на вал. Соин ик тынад Англиысь гожтэмедлы ми туж паймим.
- Туала арын отын номыр паймымонэз ӧвӧл. Мон малпай: малы Англиысь газетъёс Н. Уткина сярысь гожъяло, нош Удмуртиын солэсь кытынзэ но уг тодо. Газет гожъям бере, тросэз юалляськыны ӧдъязы – тросэзлы со осконтэм потэм, шӧдске.
- Школа бере тон университетысь романо-германской филологияя факультетын дышетскид, англи кылъя дышетӥсь луид. Соин ик Англие вуылон - кемалась возьмам малпанэд вал, дыр?
- Бен, мон дышетӥ англи кылэз, но куке но Англие вуыло шуыса, ноку ӧй но малпалля, ӧй но оскылы. Со мон понна та дырозь сузёнтэм потылӥз. Но улонын, туж шер ке но, луыло выжыкылъёс. Яке юртто эшъёс. Кылем сӥзьыл Юра Перевозчиков (Кун Думалэн депутатэзлэн Светлана Смирновалэн юрттӥсез) ӵектӥз мыным конкурсэ пыриськыны.
Со сярысь со лыдӟем Интернетысь Британиысь Кенешлэн сэрегысьтыз. Мон малпай: малы эскеронтэм? Куронъёссыя быдэсак тупасько: мон – егит, визьмо, культураез валасько, со удысын тыршисько… Зэм, пичияк кышканэ вал блат шуон пумысен. Быдэс Россиысь 22 адями - со туж ӧжыт. Москваысь, Петербургысь быръёзы но ужез быриз. Татын мыным нош ик юрттӥз Юра - Британиысь Кенешен со кемаласьгес тодмо ни вал, соин ик мон пумысен ӝыны кыл верамез юрттӥз, малпасько. Зэм, конкурстэк монэ нокин но ӧз куты. Конкурсэ анкетаосын куриськон 120 мурт лэзем. Москвае кенешыны 56-сэ ӧтизы. Тӥни со 56 пӧлысь бырйизы ни 22-сэ.
- Кыӵе куронъёс пуктӥзы тӥ азе стажировкаез ортчытӥсьёс?
- Нырысь ик, валамон, юазы стажировкае мыныны мылкыд карем мугме. Мон шуи, культураен вырем сяна, мон мыло-кыдо пыриськисько национальной политикае, тунсыкъяськисько пичи калыкъёслэн улэм-вылэменызы, культураенызы. Кемалась вуылэме потэ ни вал кельтъёс доры. Дуннеез адӟон понна гинэ мынысал ке, мон бырйыны быгатысал Нидерландыез но. Нялтас вераса, кайта мон Америкаысь индеецъёс доры стажировкае мыныны малпасько. Тодэме потэ, кызьы соос уло, мукет калыкъёсын кусыпъёссэс радъяло.
Таяз стажировкаын мон бырйи калыккуспо фестивалез. Шаерамы кызьы соосты радъяны мон тодӥсько ни, 1996-тӥ арын Глазовын мынам кичӧлтэмея ортчытэмын вал Россиысь фестиваль но, нош кызьы ортчытоно бадӟым, калыккуспо фестивальёсты мон уг тодӥськы.
Вань малпанъёсы быдэсмизы: мон басьтӥ сое, мар мыным кулэ вал. Мон кылзӥ дуннеысь тужгес усто хоръёсты, вераськи та бадӟым ужрадлэн менеджеръёсыныз.
- Ачид кытын ке кырӟад-а?
- Бен, ньыль нунал ӵоже мон кырӟай Уэльсысь одӥгаз клубын, нылпиосын пумиськонъёс ортчытъяй. Монэ туж умой пумитазы – президентэз музэн ки йылазы нуллӥзы, нош монэн пумиськонъёсы трос калык вуылӥз.
Мае мон синйылтӥ? Отын калык ӟеч тодэ крезьгуро культураез, уг жаля солы коньдонзэ. Нылпи садэ ветлӥсь нылпиос нош хорын кырӟаны быгато ни – со туж усто.
- Тонэ отын ӟуч каризы, дыр?
- Ӧз. Россиысь шуыса пусйылӥзы - соиз валамон. Но мон асме котькытын удмурт шуылӥ, удмурт шӧмъем дӥсьёсын ветлӥ. Огласянь отын астэ удмуртэн шӧдыны данаклы умойгес вал, угось мон улӥ валиецъёс, асьме кадь ик пичи калык, дорын. Со ласянь огкыл шедьтыны мыным туж капчи вал. Соос туж тунсыкъяськизы удмуртъёсын. Телевидениязы интервью басьтыкузы, куризы монэ нырысь удмурт кылын вераны. Собере сое англие, англиысь валий кылэ берыктылӥзы. Мон мади асьме шаермы, асьме культурамы сярысь - турлы книгаос, открыткаос возьматъяй. Гимнмес кырӟай. Эшшо перепечен сюдӥ. Дорын ноку но быдэсак аслам пӧраме ӧвӧл, отын кутсконысеныз пумозяз ваньзэ ачим лэсьтӥ. Англиысь выль тодмоосылы туж кельшиз.
- Англиын улэмед сярысь туж ӝутскем мылкыдын мадиськод. Отчы кылемед уг поты вал-а?
- Потэ вал. Туж шуг люкиськи. Мон адямиослы туж ӝог дышисько, соин, лэся. Котьку сямен ик озьы луэ. Мон вал ни Америкаын, Испаниын, Венгриын, Финляндиын Эстониын. Тужгес но матын луизы Эстония но Англия – нокызьы сюлэмы бордысь ишкалтэме уг луы.
- Оло, кулэез но ӧвӧл?
- Мон но озьы малпасько. Англиысь вуэме бере тани юри компьютер басьтӥ – табере нуналлы быдэ гожтэт басьясько. Тани нош гожтэт. Стажировкаелэн кивалтӥсезлэсь. Мыным оскемзэ вера, ушъя. Мукетыз монэ вӧтай, шуэ.
- Тӥляд вал кузпалды но. Кыӵе вал люкиськон мугды?
- Соку нырысь тодматскеммы сярысь – медло ваньмыз радызъя. Володяен ми тодматским ай, школаын дышетскыкумы ик – пумиським шаерамы ортчись одӥгаз слётын, мон ведь котькыӵе уже мыло-кыдо пыриськисько вал. Ог-огмылы гожтэтъёс ысъям, Ижевскын пумиськылӥм. Со мыным кельшиз – ӝужыт, чебер ӟуч пияш. Мон университетэ пыри. Со, ар ужаса, армие кошкиз. Вал моряк, Кубаозь уялляз. Ар но ӝыны служить каремез бере, отпуске бертылыкуз, анай-атаеныз тодматӥз, возьманы косӥз.
- Осконтэм, тӥ кадь чебер нылашлэн со вакытэ нокинэз ӧй вал шуыса.
- Вал, конечно. Со гинэ мар, мон яратӥ! 1985-тӥ арын Москваын ортчиз Дуннеысь егитъёслэн фестивальзы. Отысен тодматски немец пияшен. Ми ог-огмылы туж-туж синмаським. Со – уката ик. Дась вал Россие лыктыны, но соку Ижевск пытсамын на вал. Монэ дораз ӧтьылӥз, гожтэт ысъяз. Ӝоген нош монэ КГБ-е кысканы ӧдъязы: юалляськизы мар сярысь вераськеммес.
- Тӥ вералляды?
- А кызьы? Мон комсомолка вал ук. Шуизы: со тынад долгед. Озьы ик кожалляй. Огкылын вераса, мон кышкай – немец яратонэным кусыпъёсмес тӥяй.
Вылаз ик, ӵап вуиз Володя. Витетӥ курсме йылпумъяку, ми кузпалъяським. Улыны ӧдъям мон дорын, тани та квартираын. Семьяен улон мыным туж кельшиз. Мон Сухих луи. Вордӥськиз Женя пимы. Но картэлэн сюлмыз ялан гуртэ кыскылӥз. Со туж яратэ вал инкуазез, пудо-животэз. Одӥг нуналэ шуиз: Надя, всё – мон тазьы уг быгатӥськы ни. Мон соку кылзӥськись егит кышно вал бере, декабристка музэн кошки со сьӧры. Инты утчаса, пельпумамы пиен вуим Ува районысь Жужгес гуртэ. Сётӥзы пу корка. Мунчомы ӧй вал – колхозлэназ ветлӥм. Колхоз прачечнойын ик зыраса-вуштыса выж лёгет миськылӥ, ӝыт но ӵук плита эстылӥ. Вал Лада ыже но - сое мон колхоз ужрадын утӥ. Буйгатъяз уже – нылпиосын но дышетӥсьёсын огкыл ӝог шедьтӥ. Мылкыдме бурдъялляз на отысь ансамбль. Шонерзэ вераса, со ик тӥяз но, дыр.
1990-тӥ арын декабре Ижевскын ортчем смотре пыриським. Отысен монэ соку ик синйылтӥзы – мон дӥсьтӥсьгем вылӥськем, лэся. Огъя номеръёс сяна, огнам но кырӟаны куриськи на. Ӧз алэ. Тӥни соку Владимир Емельянович Владыкин мон доры лыктӥз но шуиз:
- Тӥ паймымон чебер кырӟаськоды – эскере ай, асьтэос кырӟан гожъяса.
Михаил Егоров соку ик тусме пуктӥз, Георгий Грязев интервью басьтӥз. Гуртысь лыктэм артистка понна одӥг ӝыт ӵоже со туж трос вал. Мынам пушкам маиз ке берытскиз, табере мон городэ мынон сярысь гинэ малпаськыса улӥ на. Газет-телевизор пыр чакласа улӥ луоно ужрадъёсты. Котькудаз лобыса кадь ветлӥ. Но ӝоген со Сухихелы кельшемысь дугдӥз, кусыпъёсмы сӥялскизы. Одӥгез сыӵе ужрад азьын со монэ нылпиен ӵош корка пытсаса кельтӥз. Мон асме четлыкысь тылобурдоен шӧдӥ. Но потыны быгатӥ: пиеным валче укнотӥ тэтчыса кошки. Но выльысь городэ улыны ми ӵош кошким – Володя ӵап институтэ пыриз. Татын ини монэ нокин но возьыны ӧз быгаты ни. Мон сцена вылэ потӥ. Андрей Анкудинов «Арганчи» ансамбляз ӧтиз – юрттӥз, дыр, солэн анаезлэн – Розита Анкудиновалэн – «Чипчирган» ансамбляз кырӟаме. Картэлы сыӵе уже чик ӧз кельшы: мон, пе, артист ӧй басьты – кышно. Огпол гастроле лэзиз ик, кыкетӥяз пиме ӧз кельты ни, сьӧрад нуллы, шуиз. Кӧня ке толэзь улыса, ми люкиським.
- Тон ялан сюрес вылын, гастрольёсын. Пидэ будэтыны секыт, дыр?
- Сокем ӧвӧл. Мынам трос эшъёсы, ӵыжы-выжыосы. Женя дышиз ини монтэк улыны. Ми пиеным туж валаськом ог-огмес - сямъёсмы огкадесь. Али тани дышетске пианиноен, гитараен шудыны. Ветлэ искусствоосъя школае, хорлэн солистэз луэ.
Со мынам зэмос пиосмурт ини – дӥсяськыкум но учкыса гинэ улэ, индылэ, мар тупа, мар – уг. Нош ӝоген ми паспорт басьтом, Уткин луом. Угось выжыямы мон сяна Уткинъёс ӧвӧл ни. Ма, Женялэн аслаз но мынэсьтым фамилиме басьтэмез потэ.
Кытчы ке кошкылыкум, туж мӧзмисько пиелэсь, котьку трос кузьым ваисько. Бертэме бере ми соин ӵош кырӟаса пукиськом.
- Тон туннэ ӝыт куное дасяськиськод. Ӝӧк сьӧрын кырӟаны косо, дыр?
- Косо. Но котьку уг кырӟаськы. Мылкыд секыт дыръя куноын мӧзмыт кырӟан кырӟаса уд пукы ук.
- Но тынад ваньмыз сямен сыӵеесь…
- Тросэз соос кылдэмын мӧзмон дыръя. Соин ик туж матын котькуд адямилы, угось яратон, верам ини, со – шумпотыса тэтчан гинэ ӧвӧл. Со мылкыд зэмос ке, сюлэм пыртӥ потыкуз, туж курадӟытэ. Шуд сярысь малы ке туж ӧжыт кырӟало.
- Тынад шуэмед потэ…
- Бен, кырӟась мурт шудтэм луэ!
- Но ваньмыз сямен артистъёс со веранэз шонертэмен лыдъяло.
- Алдасько. Оло, вань ик кӧня ке шудоез. Но мон ас вылам шӧдӥ ни, со озьы шуыса. Соин ик малпай – тырмоз.
- Ӧй вала – тон кырӟамысь дугдыны малпаськод шат?
- Бен. Кырӟан люкетэ мыным нылкышно шудэз шӧдыны, семья кылдытыны. Нош тазьы со нокызьы уг пӧрмы. Собере, асьмеос вераським ук стажировка сярысь. Мон отчы юнме ӧй ветлы, дыр, ук, бен-а? Озьыен, маке но лэсьтыны малпасько.
Вылаз ик, мынам улонэлэн радыз сыӵе: ньыль ар пала кырӟай «Арганчиын», ньыль ар ужай «Шундыын» (нялтас вераса, «Шунды» - туж зол школа, мон отысь туж трос басьтӥ. Сыӵе ик ӟеч кылъёс вераны быгатӥсько на «Чипчирган» сярысь), ньыль ар кивалтӥ «Лулгуреным». Табере маке но выльзэ кулэ – мон кисьмай ни кадь менеджер сямен но. Мон быгато кадь потӥсько кивалтыны но. Туж бадӟым мылкыды вань Кивалтонъя академиын дышетскыны!
- Зэм, зол луысал Надежда Уткинаез министрлэн пуконаз адӟыны.
- Ну, министрозь ик вазьгес, дыр, но сыӵе вераськонъёсты мон кылылӥ. Огласянь, мон быгатысал – мынам трос тодон-валанэ, мынам трос кужыме, дартэ, мынам вань нимы – озьыен, кусыпъёсы, нош тужгес но кулэез – вань мылкыды!
- Но сыӵе «пукон» политикаен герӟаське.
- Бен. ӵемысь жаляса верано луэ, мыдлань политикаен. Асьмелэн кивалтӥсе пукто, «оскымон» луэмзэс учкыса. Нош визьмоосыз, быгатӥсьёсыз, зэмлыкез гажасьёсыз палэнэ кылё. Озьы нырысетӥосыз ӝужыт пукон вылэ пуксё но пуко, коньдон возьмаса. Нош со ӧвӧл. Соку мар каро? Номыр уг каро. В. Бельтюковез (коньдон ужпумъёсъя министрез) тышкасько но буйгатско. Вот соин сюлэм шуг. Кунгож сьӧрын озьы ӧвӧл. Асьмелы но дышетсконо котькуд удысысь поттыны. Тани культура асьме дорын воксё синазькыль луиз ни. Со «кыске» гинэ. Но сое луоз зол, азинскись удыс карыны. Дышетсконо бадӟым, дуно фестивальёс ортчытъяны. Дасяно проектъёс, ужано принципъёсъя. Егитъёслэн киязы чорыг интые, калтон сётоно. Уг ке валало, кытчы сое пуктыны, возьматоно, мед дышетскозы. Культура шоры асьмеос вашкала вакытысь шыкыс шоры сямен учкиськом. Усьтоно сое, выльдоно. Ортчытоно кыӵе ке бадӟым акция, уже кысконо пиар-компаниосты. Быгатӥськом ук быръёнъёс ортчытъяны, культураез но азинтыны быгатом!
- Тон воксё мукет луэмед.
- Бен, мон сылӥсько улонысьтым воштӥськонъёс азьын, малы ке шуоно, жади ни куанер кырӟась интыын улыны.
- Нош кызьы творчество?
- Мон солэсь куштӥськыны малпасько ӧй шуы. Нялтас вераса, кема вис карем бере, али выльысь гожъяськыны кутски.
- Тынад ужаны быгатэмедлы зэмзэ но паймод. Огдыре ик ГИТИС-ын но дышетскиськод кадь вал?
- Туэ мон диплом басьтыны кулэ ни вал, но Англие ветлэменым йырин, кайталы кельтоно луиз. Нош ужаны монэ кыкетӥ анае дышетӥз.
Асламъёсыз анай-атае (со сярысь трос пол гожъямын ни) тямыс арес дыръям аварие шедьыса быризы. Зэмзэ ке, мон сое ноку но кыкетӥ уг шуиськы – со монэ будэтӥз. Со монэ яратэ, котьку жаля, сюлмаське. Мон но сюлмысьтым яратӥсько анайме но, атайме но. Соос ноку но тэк уг пуко вал. Озьы мон но дыши кадь дырме радъяны. Тани Англиысь вуи гинэ но ӵуказеяз ӝыт атайме 75 аресэныз ӟечкыланы бертӥ, нош сизьым часын ӵукна «Шундыкар» лагере ужаны мынӥ. Отын ужаме бере вуылӥ ни Эстоние. Эстония бере нуналлы быдэ сямен ветлӥсько я отчёт, я интервью сётыса.
- Тон сыӵе пинал на, нош мае но адӟемын ӧвӧл ни…
- Мон аслым пинал уг потӥськы ни. Вот вить арзэ куштыны ке луысал… Нылкышно понна зарни вакыт – куамын арес. Соку со быгатэ ни улонэз дунъяны, солэсь шӧмзэ шӧдыны. Со быгатэ яратыны. Но со дыре ик, солы яра на янгышаны, сьӧлыканы.
Источник:
Уткина Н. Э. Лулгур / Н. Э. Уткина ; записала Зинаида Рябинина // Удмурт дунне. - 2002. - 30 авг. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
