Перевозчиков Анатолий Аркадьевич
«Аргурезь» йылысен учкыса…
Шӧдыса-валаса вуттыны ик уг луы - вордскем нунал кытӥ-мартӥ ыше-сылме ни. Соос озьы толэзьёсты улляло. Таосыныз нош гонӟыртыса ортчо аръёс. Куддыр малпаськонэн йырин ик ӧвӧл. Но вуиськод сыӵе вакытэ, куке син азяд пуктыны турттӥськод лобӟем сюрестэ. Мыштэ учкиськод но малпаськонэ усиськод: ма лэсьтыса вуттӥ ай мон, мар лэсьтыса вутто на? Тужгес но таӵе малпан каръяське, куатьтон аръем гожез выжыку.
Тани тодмо удмурт кылбурчи, Удмурт Республикаысь культура удысысь дано ужась Анатолий Перевозчиков но сыӵе воже вуиз ни. Шыпытак ужаса-пукыса, вормыны луонтэмзэ но лэсьтӥз ни кадь. Ортчем ар пумын лыдӟисьёс доры вуттӥз «Донды батыр, солэн пиосыз но Уйпери сярысь кузь мадёс-кырӟан» книгазэ. Но, малпасько, сюлэм висёнъёсыз ӧз быре на.
- Анатолий Аркадьевич, уг ке янгышаськы, берло дасо арзэ вань сюлэм шуныттэ сётыса ужад удмурт эпос бордын. Лыдӟиськод книгадэ но, тазьы ик шӧдӥськод пумитад вашкала тӧлъёслэсь ырамзэс-пельтэмзэс. Огдырлы ачид но со дуннее вуылӥськод кадь. Кызьы дӥсьтӥд но кытысь сомында кужым шедьтӥд со вапумез бугыртыны но лыдӟись доры вуттыны?
- Кызьы тодмо, котькуд калыклэн эпосэз вань. Эпос - со (тодӥсьтэмезлы вакчияк ӟуч кылын верасал) «повествование о предполагаемых в прошлом, как бы свершившихся и вспоминаемых повествователем…»
Нош удмурт калык маин кулэс, маин пиртэш? Визьмын-а лазег? Ужаны, эктыны-кырӟаны, шулдыръяськыны-а уг быгаты? Мон пичи дыръям ик юондырысен удмурт кышноослэн кунооссэс сектан сямен кырӟам-верамзылы паймылӥ. Со кыӵе ке нимысьтыз кылбурчиен, крезьгурчиен гожтэм кырӟан ӧй вал, со кузё кышноен асэныз малпам чур но гур вал. Озьы быдэс пичи Пуро гуртмы кырӟа вал ас улэмез-вылэмез, сюлмаськон-шугъяськонъёсыз, шумпотонэз сярысь… Валамон, ваньмызлэн огкадь уг пӧрмы вал, но кыло-буроосыз, кырӟаны быгатӥсьёсыз туж сӥлы карылӥзы гуртамы, соостэк одӥг шулдыръяськон но (тужгес сюан-бӧрысь) ӧз ортчылы… Али, туала визьмын, туж жалясько, пересьёслэсь со кырӟам-верамзэс ручкаен-карандашен ке но гожтыса ӧй кельты шуыса. Соку уго диктофон-магнитофон кадьёс гуртысьёслэн ӧй вал на.
Зэм, соку, пичи дыръям, гожъясь луо шуыса ӧй но малпалля. Кытысь тодод, оло, со кырӟась-верась кышноос ик сюлмам та быгатонлыклы кидыс уськытӥзы? Собере со пушйиз, сяськаяськиз. Нош али емышез вуэ ни… Соин ик кисьтӥськизы, луоз, таӵе чуръёс:
… Но тысь усиз сюлэм муэ!
Солы бен мар али кулэ?
Мар-о кулэ юлы-няньлы
Узы сямен кисьман понна,
Дас выжыё удан понна?
Дас кык ёзо луон понна?
Азвесь шепо, зарни тысё,
Ыргон кыо луон понна?
Кулэ - Шунды-мумы шунтэм,
Кулэ - Толэзь дядяй вешам,
Зор апилэн нуныямез.
Кулэ - тылобурдо кырӟам,
Егитъёслэн ӟеч мылкыдзы,
Пересьёслэн кадырламзы…
Верано, дыр, созэ но: эпос борды кутскыны дӥсьтонэ ӧй тырмысал, бурдъясьёсы ке ӧй луысалзы. Соос удмуртлык понна туж висись, сюлмаськись дунне адямиос: Л. Д. Кутянова-Айтуганова, В. Е. Владыкин но Г. Н. Шушакова. Нош калык доры, лыдӟись доры та произведение ӧй вуысал финнъёс (М. А. Кастрен нимо огазеяськон) но «Удмуртия» издательство ӧй ке юрттысалзы. Удмурт калыклэн нимыныз музъемозь ик йыбырттӥсько, туж бадӟым тау шуисько, талэсь но трос дэлето, талэсь но трос шедьтыса мед улозы-вылозы.
Быдӟым кылбурчимылэн Кузебай Гердлэн, тодмо критик, профессор Ф. К. Ермаков гожтэмъя, «Дӧкъявыл» эпосэз вылэм. Удмурт но ӟуч кылын, удмурт кылынэз кельтэмын, пе, О. И. Андреева кие, ӟучез - М. Г. Худяков кие… Ӧйтӧд, эпос борды кутскытозям, М. Г. Худяковлэн гинэ таӵе ужез тодмо вал. Солэн но вань люкетъёсыз печатламтэ на вал. Собере потӥз В. Ванюшевлэн «Дорвыжыез». Бӧрысьгес, курадӟыса ке но, вуиз мынамез но «нуные».
Ыра-а отын вашкала тӧл, шӧдӥське-а вашкала улон, кӧня зэмосэз но пӧямез -вералоз-дунъялоз лыдӟись. Но туж потэ оскеме, мон но та кузьмадёс-кырӟанэным удмуртъёсты сайкатонын мар ке но пайдаёзэ лэсьтӥ шуыса.
- Ойдо ватытэк вераськом: кыӵе мылкыдын пумитаськод, кызьы шуо писательёс пенсие кошконзэс, профессиональной уже выжон вакыттэ. Угось гожъяськон бусыдэ гырыны табере дырыд тросгес луоз ни. Яке…
- Ӟеч но, ӝож но мылкыдын. Малы озьы-а? Нырысь ик, шумпотӥсько, пенсие потон Аргурезям тубыны быгатӥ шуыса. Тодытэк-кылытэк уд улӥське, дыр, угось али тросэз воргоронъёс, та арлыдэз вормытэк, сояз дуннее кошко. Собере, зэм но, гуртын гань-гань, дыртытэк, эли-кеби вырытэк, нокытын ужатэк, гожъяськыса пукыны малпаса быдтыр улӥ, шуыны луоз. Совето власть вакытэ, эсьма, кылбуръёсылы вордскыны номыр но медаз люкеты шуыса, возьмаськисьын но тырши. Али та огыр-бугыр вакытэ, куке кырын демократия сильтӧл кузёяське, кылбур гожъяса кӧтэз «кышъяны» шуглэсь но шуг. Таин валче таӵе чуръёсы юнме шорысь ӧз вордӥське, дыр:
Мынам няне - кылэ-буре!
Но со уг сюды, уг, монэ.
Уг сюды кадь ненокинэ -
Сыӵе малпан лулэз пуре…
Озьыен, дыры трос луоз, но ужатэк улыны быгато меда, сютэм улон, «кӧтэз кышъян» выльысь кыӵе ке но удысэ уд кыткиськыты меда? Малыез валамон, дунъёс куртчылӥсько, нош пенсия государство укыр ичи тыре. Мукетыз но сюлмаськытэ: луоз-а тазалыке?
- Тодӥсько: тынад визылан ӧрыд паськыт но мур. Одӥгъёсыз чуръёсыд вутто ноку вунонтэм зарни пичи дыре, мукетъёсыз ӧтё шаермес данъяны, адямилыко луонмес утьыны, куинетӥосыз пальпоттыто. Нош тросэз тырмемын дуннеез валанэн-шӧдонэн, кызьы шуо - философской лирика. Котькудзэ гожтыны нимысьтыз мылкыд кулэ. Иське, со мылкыдъёсъя ик жильырто кылам-бурамъёсыд?
- Вань мынам (уно гинэ!) кылбуран, кылбур сярысь чуръёсы. Куд-ог критикъёс шуылӥзы, марлы со кулэ? Кызьы тодмо: липетысь виясь шапык одӥг интые весь усе ке, бетонэз но пася. Мон но, курлан тыш сиыса, одӥг вакытэ та чуръёс нокинлы но кулэ ӧвӧл шуыса, малпаны ӧдъяй вал. Но тани одӥг пол Василий Ванюшев шуэ: «Ма, кылбур сярысь чуръёсыд туж тунсыкоесь ук». Собере дышетӥсьёслэсь кылӥсько: таӵе чуръёс, пе, гожъясьлэсь «секретъёссэ», «кухнязэ» усьто. Ачиз, пе, кылбурчи сое ӧз ке шарая, ми, огшоры лыдӟисьёс,ум кылбураське бере, сое ноку ум тодэ. Нош тани кемалась ик ӧвӧл кылбурлы сӥзем чуръёсме тодмо критик Александр Шкляев но пусъем («Вордскем кыл» журнал, 2007, 1.). Иське, зэм но, кулэ таӵе чуръёс. Нош философской лирика, кызьы шуиськоды, гожъяны трос «педагогъёсы» пӧлысь тужгес трос пайда сётӥз Флор Васильев. Валамон, школаысь дышетӥсь сямен мыным урокын визь-нод ӧз сётылы, но критической статьяосаз, гожтэтъёсаз чуръёсысьтым тырмымтэоссэ вералляз. Иське, малы ке солы дыши ке, туж бадӟым тау солы. Мукет быгатӥсьёсмы но ӝоже медаз усе (ӵок, улонысь кошкемын ке но), шуом, Владимир Романов, Герман Ходырев но трос мукетъёсыз.
- Малпанъёстэ, кылбурен сяна, ӧръяськод на прозаен но. Ӟечъёсыз «Чулпон» липет улэ пыризы. Берло аръёсы «Удмурт дуннеез» лыдӟисьёс шуныт пумиталлязы гожтэчетъёстэ. Чыры-пыры выллем адӟиськись учырысь мур малпаськонэ вуттыны быгатонлыкеныд паймытъяд. Но берло дыре син шорад уг йӧтыло ни шат сыӵе тэчетъёс - гожъямъёсыд уг адӟисько ни…
- Гожтэчет - со кылбур ӧръяськымтэ дыръя мылкыдэз «пуштытъян», кисьтон. Ачид адӟиськод мон, кызьы шуо, «многостаночник», пӧртэм жанръёсты, валъёсты сямен, кыткыны вырылӥсько. Со урод ӧвӧл, дыр. Малы ке шуоно адями ноку но аслэсьтыз вань луонлыксэ уг тоды. Тодосчиос йырвиыммы сярысь верало: солэн туж пичи люкетэз гинэ ужа, отӥыз шутэтске, азьтэмъяське. Нош литературной жанръёс, амалъёс, мон малпамъя, йырлэсь, виымлэсь-а шуод, пӧртэм сэрегъёссэ ужато, вӧлдэтэ сяласа кылльыны маза уг сёто, выль сямен, выль кужымен тыршыны бурдъяло. Нош одӥг сюреслы дышон - гожъяськись понна кулон.
- Мар бордын пукиськод та дыре, кыӵе малпанъёс пужнӥсько татчыозь сьӧд-чиль возиськись йырад?
- Малпанъёс трос. Но, кызьы тодмо, творческой адямиос пӧртэм сьӧд кужымъёслы оскисесь, син усемлэсь кышкасесь. Соин ик верано-а, ӧвӧл-а? Тьфу! Тьфу! Паллян пельпум сьӧрам сялӟисько… Али мон та ылё-кырсё вакытмы сярысь проза гожтыны курадӟисько. Ӟигары луиз ке, Инмар юрттэмен, оло, сое но вормо, быдэсто. Туж потэ на исторической проза борды но басьтӥськеме… Огъя вераса, малпанъёсы муш палэп мында…
- Я бен, сӥзём, иське, тылкӧльы кадь тазалык, лэчыт перо. Малпанъёсыд, пызьырась ошмес синмысь дун ву выллем ик, лыдӟись доры мед вуозы. «Аргурезедлэн» йылаз мӧзмонэз медад шӧды.
Источник:
Перевозчиков А. А. «Аргурезь» йылысен учкыса… / А. А. Перевозчиков ; записал Рашид Хайдаров // Удмурт дунне. - 2007. - 22 февр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
