Эркишев Виктор Анатольевич
Вольыт кырӟан сюлэме уг лякиськы
1980-тӥ аръёслэн пумазы республикаысь кырӟась-верась коллективъёслэн смотразы быдэс залэз зуркатӥзы Пичи Пурга ёросысь Кабыста гуртысь Эркишевъёс. Бубызы Виктор Анатольевич баянэн шудэ, 7 аресъем Толя пизы - арганэн, балалайкаен, пеллян гумыен, пу пуньыосын, эшшо шаплы эктэ на. Учкисьёс куаш чабо.
Бӧрысь сцена вылын паймытъязы на Виктор Эркишевлэн мукет дышетэм пиналъёсыз - Андрей Смагин но Алина Чернова. Соос лауреатъёс луизы республикаямы радъяськылӥсь «Ӝужась кизилиос» ӵошатсконын.
Егит нылъёс но пиос дасо ар мында мыло-кыдо экто-позыръясько «Яратон, ой, яратон» кырӟан улсын. Тодазы лыктэ меда, та туала крезьгурез кылдытӥсь - со Удмурт Республикаысь культура удысысь дано ужась, Пичи Пурга ёросысь Пӧсьтол гуртысь культурая юртлэн чеберлыкъя кивалтӥсез Виктор Анатольевич Эркишев шуыса.
Арганэн воштэм баян
Лэзись ке луысал, пичи Вити, оло, кӧкыысен ик арган кыскасал ни. Крезьгурез но кырӟанъёсыз со туж яратэ, но, куараезлэсь кепыраса, зол нёжъяны уг дӥсьты. Соин, лэся, вань мылкыдыныз баян борды кыстӥське. Семьяосызлэсь лушкем ветлэ гуртысьтызы Яшагай доры, таизлэн баянэз вань. Кыштырак пыре пиосмурт доры, пуке, паймымон куара поттӥсь арберилэсь бирдыоссэ зӥбылэ - сюлэмыз ӧръяське ук!
Берлогес ини 4-тӥ классэ ветлӥсь пияш дышиз юмшан дыръя куноос сьӧры калъяськыны. Арганчиез адӟе ке, сьӧрысьтыз уг ни кыльы. Юмшан бере арганзэс вунэтыса кельто. Витялы со ик кулэ - эх, кыска, курадӟытэ ук сое.
Мемеез Лидия Николаевна пиезлэсь синмаськонзэ валалляз - уго ачиз но туж яратылӥз балалайка сиосты кырӟатыны. Нош войнаез пыр потэм тятяезлэсь Анатолий Александровичлэсь Витя баян курыны ӧз дӥсьтыгес. Но воксё инструменттэк ӧз кельты воргорон пизэ, басьтӥз 32 манетэн арган.
Но Витялэн, арганэн шудыса, кӧтыз чаляк тыриз. Малпаз сое воштыны баянэн. Гуртысьтызы Зосимагай таӵе ӵектонлы ӧз пумитъяськы. Но тятяез татын но Витялы ӝот-ӝот вераз: баянэн шудыны ӧд дышы ке, аргандэ берен курод. Но верамез юнме луиз: вакчи дыр куспын Витялэн кылыз туж тупаз баянэн.
Со дырысен пинал баянчи воштонтэм луиз. Районэ смотре нуо. Сцена пасьтана вӧлскем хор кырӟа, нош егит аккомпаниаторлэн йырпыдэсыз баянэз сьӧрысь ӧжытак гинэ адӟиське ай. Солдат пи келян вакытъёсы школаысь великен бертӥсь Витяез юмшасьёс сьӧразы ӧтё. Куддыръя юаса но уг уло - пияшлэсь великсэ кенер борды урдо, ассэ машина кузове ӝуто но кияз арган донго. Ма, егит усточи таӵе кулэ каремзылы пумтэм шумпотылӥз. Со дырысен Эркишев инструментъёс дортӥ огшоры ортчыны уг быгаты. Машинаез яратӥсь мурт котькуд корт валэн ворттылон сярысь малпа ке, Виктор котькуд баянэз маялляны дась.
8-тӥ класс бере, колхозын быдэс гужем пӧсяса-ужаса, со аслыз кельшымон баян басьтыны быгатӥз. Малпаз: улонзэ герӟалоз крезьгурен. Дораз индылӥсь ӧй вал: трактористэ мын, экономистэ дышетскы. Оло, мемеез ас понназ сюлмаськылӥз, гуртысь арганчиез винаен кӧялозы-вӧялозы шуыса. Соку валаса уд вуы, гылыт луоз сюресэд. Но таиз сярысь Витя азьло ик малпаськиз: уз, солэн арган куараез кудӟонэн уз сураськы. Арганчилэсь мылкыдзэ вина уг ӝуты - крезьгур лӧпкытэ.
Дипломтэк крезьгурчи
10-тӥ классэз йылпумъясь усточилы колхоз направление висъяз культпросветучилищее. Пияшез кутӥзы аккомпаниатор люкетэ. Но дышетскыны ар сяна ӧз кылды, вуоно тулысаз Витяез армие нуизы.
Службазэ ортчыса, дышетсконэн йырин ӧй вал ни, гужемаз кышнояськиз гуртысьтызы Галяен. Кышноез ньыль ареслы быдӟымгес но йӧногес вал ни - Глазысь вуз каронъя техникумез йылпумъямын. Соин нылкышно, дышетсконзэ азьланьтыны косыса, картсэ Иже ыстӥз. Воргорон кышнозэ лушкалозы кожаз-а, мар-а - документъёссэ басьтыса, гуртэ бертӥз.
Озьы ке но баянчилэсь дипломзэ юась-марась ӧй вал - артысь Пӧсьтол гуртысь клубе ужаны ӧтизы. Татын Эркишев нырысь ик кылдытӥз агитбригада. Соин ӵош тодаз вайиз училищеын ар ӵоже дышетэм эктонъёсты.
Собере кылдӥз «Ялыке» ансамбль. Огвакытэ татчы кырӟаны но эктыны 30 пала мурт ветлӥз. Коллективлэсь ужзэ дунъязы - сётӥзы калык ансамбль ним. Котькыӵе удысэ вутскыны тыршиз егит адями. Оркестр но люказ - котькуд шудӥсьлы тупен-тупен валэктэ, инструментлэсь котькуд сизэ тупатыса сётэ.
Бӧрысьгес кылдытъяз на гуртысь пиослэсь ансамбльзэс. Малпанъёсыз трос - котькудзэ вормемез но улонэ пыӵатэмез потӥз. Зэм, куддыръя ӧпкелиз, вакытаз дышетскыса ӧз вуы шуыса. Уго котькыӵе удысын кулэ тодон-валан, нош Эркишевлэн со интыын - шӧдон. Ярам, зэма ке со.
Социализм аръёсы культура удысын ужасьёс но палэнэ ӧз кыле кизёнлэсь, турнанлэсь, аранлэсь. Озьы усто баянчи комбайнын но пукиз, машина руль но бергатӥз, тракторен но огкыл шедьтӥз. Нош аран-кутсан вискын Эркишев кияз баян кутэ, вӧзаз кырӟасьёс султо: ӵош ужась эшъёслэсь, пе, ужан мылдкыдзэс шулдыр гурен ӧръяно.
Огвакытэ культураысь чигнамез но потылӥз воргоронлэн. Но таӵе малпанъёссэ шӧдӥз ёросысь культурая ёзын ужась Александра Ефремова. Оло солэн ӟеч кылъёсызлы луыса, оло мукет муген, но культураысь кошкыны ӝуткаськем Эркишев мылкыдзэ зӥбломытӥз. Собере 1993-тӥ арын сётӥзы на республикаысь культура удысысь дано ужась ним. Сыӵе дунъязы бере, озьы гинэ быждэ уд ни урды, малпаз Виктор Анатольевич.
Пиезлы кузьмаз бурдъёс
Аслаз пытьыезъя ик крезьгур дуннее вамыштӥз Эркишевлэн Толя пиез. Туннэ егит артистэз шаерамы тодӥсьтэмез ӧвӧл, дыр. Озьы ке но нокин уг малпа, Анатолий атаезлэн сӥзем сюресэзъя вамышъя шуыса. Уго аслыз ачиз Виктор Анатольевич котьку пичигес потылӥз: малпанъёсылы бурдъяськыны, пе, ӧй сёты. Нош пиелэн вань мылкыдъёсыз, пе, мед быдэсмозы.
6 аресъем пи атаезлэсь дышетэмзэ син куспын пыӵатылӥз. Воргорон баянэн шудыса возьматэ, тэшкылиез, уть шуытозь, сьӧраз шудэ ини. Нош балалайкаез макем яратӥз - кылзӥськисьтэм сиосын нюръяськиз, чиньыосысьтыз вир потытозь. Кыӵе гинэ концертъёсы ӧз вуылэ атай но пи. Сьӧразы нуллӥзы пичи пуконзэс, уго Толиклэн соку музозь пыдъёсыз ӧз на сузьылэ, нош инструментэз кызьы ке возёно ук.
Тэшкыли-усточи нырысь баян кыска, собере балалайкаен шудэ, шулан пелля, пу пуньыосын шальтыртэ. Номерзэ йылпумъя тапыртонэн. Таӵе мусо «питранлы» синмаськыса, зал куаш поттэ, кичабонъёс борддоръёсты зуркато. Огез сыӵе концерт бере Эркишевъёслы вазиськиз культурая министрлэн со аръёсы воштӥсез Аверьян Христофоров. Ижын, пе, ӝоген усьтӥськоз усточи нылпиослы школа-интернат, пидэс лэзёды ке, нокыӵе экзаменъёстэк отчы кутомы.
Сыӵе сюрес усьтӥське бере, атай пыд пуктылыса ӧз улы. Гуртысь воргорон кивоштӥсьсэ бордаз кельтон сярысь золгес сюлмаськыны кулэ ке, бадӟымез Эркишев пиезлы бурдъёс кузьманы малпаз. Толя йылпумъяз усточиослэсь школазэс, Воткаысь крезьгуръя колледжез. Собере поттӥз эстрада кырӟанъёсын нырысетӥ альбомзэ. Татчы пырем кырӟанъёс пӧлысь огзэ гинэ «Яратон, ой, яратонэз» гожтӥз бубиз. Отӥзэ егит крезьгурчи ачиз вормиз.
Виктор Анатольевичлэн мукетыз шумпотонэз - Аля нылыз. Солы туэ 21 арес тырмоз. Педагогикая колледжез йылпумъяса, нылмурт тодон-валан люканы пыриз Удмурт кун университетэ. Аля атаез кадь шаплы ӧвӧл, зӥбыт, малпаськись, выемын мукет дуннее - кылбуранэ. Аспӧртэмлыко но сюлэме пырись чуръёсыз бугырто бубизлэсь мылкыдзэ. Уката но - кын куртчон вакытаз воргорон огназ кыле ке.
Уксё утчано… вӧлдэтлы
30 ар ӵоже ини гуртысь культура удысэз синмаськымон азинтэ Виктор Эркишев. Ужаны кутскыкуз, Пӧсьтолысь та юртэз клуб шуыны ик возьыт вал. Уго ӧс но пыкъяськыса кадь гинэ сылӥз. Гужем-сӥзьылзэ татын улӥзы городысь вуэм ужасьёс. Соин ик чылкытлык но чеберлык сярысь вераны ым ик ӧз пыры.
Клубын ужасьёс нырысь кутскизы сюрес борды: гурт шортӥ асфальт вӧлдэмын, нош клубе кожоно ке, нӧдэ лёгиськоно. Материал висъяло ке, туж шумпото, кылемзэ ужъёсты - асфальт вӧлдонзэ ик - асьсэос лэсьтыны йӧндыро ни.
Секыт югдур вал виясь липетэн но. Таяз учыре маскарчи Эркишев нырысетӥ апреле вазь ӵукна ик жингыртӥз ёросысь культурая ёзэ.
- Умоесь-а? Котьма карелэ, нош милям липетмы куашказ.
Трубкалэн сопал пумаз лулӟизы:
- Кызьы?
- Ма, эн куалектэ сокем, туннэ нырысетӥ апрель ук.
Оло воргоронлэн маскаръяськемез юрттӥз, оло зэмен но югдурез валазы - но тулысаз ик липет выльдӥськиз.
Пӧсьтолысь культурая юрт туннэ но уте Удмурт театрлэсь историзэ. Уд оскиське - лыктэлэ. Залын радэн сыло вуж театрысь ваем… пеймыт-горд пуконъёс.
Таяз учыре но Виктор Анатольевич бабыса ӧз улы. Театрез выльдон сярысь тодэмез бере кӧня ке уй йырзэ тӥяз: нош пуконъёссэс кытчы карозы ни меда?
Ӵуказеяз ик театрлэн директорезлы Андрей Ураськинлы жингыртӥз: вуж пуконъёстэс Пӧсьтолэ уд сётэ-а? Андрей Ивановичлы таӵе юанэн вазиськисьёс вылӥллямтэ ай, соин пурга воргоронлы вакчияк «лыктэлэ» шуиз.
Ёросысь кивалтӥсьёсты зуркатыса, культурая ёзысь валтӥсь бухгалтерез кутыса, гурт хозяйствоысь машина сюлворыса, пиосъёсты ӧтьыса, Эркишев вуиз Удмурт театре. Асьсэ кужымен ик татысь пуконъёсты ишказы, нуизы. Пӧсьтолысь учкисьёссылы концертъёсын устогес мед луоз шуыса, залысь выжзэ но ӝутӥзы на. Гуртысь нылкышноос ужлэсь уг кышкало, эсьма, пӧлазы сыӵе йӧно воргоронзы вань.
Егитъёс сярысь малпанзэ но Виктор Анатольевич палэнэ ӧз киргаты. Тани дискотека ортчытъян зал кемалась возьма ни тупатъямез. Пинал калыкез шумпоттон понна татын но чебер луиз - клубын туала амалъя лэсьтӥзы ошиськись вӧлдэт. Быдэстэм уж шоры учкыса, кӧт уг тыры, нош пукон залысь вӧлдэтлы уксё ӧз ни тырмы. Сыӵе лулӟылонзэс вис кариз гурт кооперативлэн тӧроез Надежда Баранова. Юаз: малы учкисьёслэн пукон интыязы вӧлдэтты ӧз выльдӥськы? Уксё ӧвӧл шуэмлы кивалтӥсь ӵогиз: лэсьтэ гинэ, коньдон висъялом. Соин ум янгышалэ, Пӧсьтолысь культурая юрт Пичи Пурга ёросын огез адӟем карымонэз луэ шуимы ке.
Кырӟан сюдэ
Пичи Пурга ёросын трос усто кырӟась-верась коллективъёс. Но республикалэн палэназ потаны одӥгъёсызлы ӵемгес шуд усе, мукетъёссэ быдэс район яратэ. Тазьы вераны луэ культура юртысь «Ялыке» коллектив сярысь. Улон куремъя 1994-тӥ арын бадӟым ансамбльлэсь кылиз пичигес но тужгес шаплы люкетэз. Кытчы гинэ туннэ уг вутско соос. Кин ке ӧтись луиз ке, оп! шуытозь, бичаськозы но сюрес вылэ потозы.
Огпол телевизор азьын тэк кыллись Эркишевлы жингыртӥсь луиз. Быръён азьын, пе, пумиськон радъяськом, калык уг люкаськы. Концертэн лыктэ али, гуртоослы ивортӥм ке, шаплы вуозы.
Виктор Анатольевич машина ӧтиз, коллективысь нылкышноослы ивортӥз. Мынӥзы, кырӟазы, эктӥзы но бертыса нош ик телевизор азе пуксизы. Уго концерт номеръёссы соослэн котьку дась, выльдэмын. Соин ӧтисьёс уг быро. Кинлэсь ке сюанзэ, вордскем нуналзэ я мукет праздникез радъяно - «Ялыкеос» котьку дасесь. Татын валало: мӧйыослы кырӟан кулэ ке, егитъёслы - дискотека, нош Эркишев ваньзэ радъяны масьтёр.
Соин шутэтскон нуналъёссы тэк уг ортчо - куноос возьмало. Тазьы ужамзылэн пайдаез но шӧдскымон - уксё ке ӧй поттысалзы, клубзэс но тупатъяны, костюм но выльдыны амалзы ӧй луысал.
Англи кылтэк но компьютертэк кыдёке уд мыны
Витё ар талэсь азьло гуртысь шор ёзо школае вайизы компьютер. Виктор Анатольевич, техникалы бырем адями, котыртӥз озь но, тазь но берга ини. Нош ачиз кыӵе кнопка зӥбыны но уг тоды. Мукетъёслэсь кылэмез вань: компьютерен, пе, крезьгур но гожъяны, кырӟанлы аранжировка но дасяны луэ.
Со сярысь луэ, дыр, тодыны Толя пиезлэсь, но таиз котьку дорын ӧвӧл ук. Марысь-мар ке, пидэ возьмаса уд пук. Иське, ваньзэ аслыд тодоно - йылысеныз пумозяз. Школаын крезьгуръя урокъёс ортчытэмез бере воргорон уйшорозь компьютер бордын пуке. Ӵукна вазь ик школае вуыса, нош компьютер борды сир кадь лякиське. Пумен вала кадь.
Собере чугдӥз ужез: клавиатураен радъям куара компьютере уг поты. Малы? Со нуналъёсы школаязы вуизы Америкаысь куноос. Таосты но юанэныз могӟытӥз ни Эркишев. Юрттэт ӧвӧл. Тодӥсь-валась сюриз: нош компьютерады, пе, крезьгур платаез вань-а? Вылымтэ. Басьтӥзы, ярам.
Гур гожъяно луиз но - ӟуч кылын программа ӧвӧл. Эркишев вазиське англи кылъя дышетӥсьлы Галина Александровна Кротовалы. Таизлэн валэктонэз одӥг: яке тон англи кылэз дышетӥськод, яке мон крезьгур грамотаез йырйыны ӧдъяло. Кудмы ӝоггес пӧрмытом? Берлань сюрес ӧвӧл - словарь кутыса, программаысь котькуд кылзэ йырвиымаз пыӵатӥз воргорон. Озьы пӧсяса, 45 арзэ ортчем мурт компьютерез вормиз.
Ватсано на созэ но. Гуртысь крезьгурчиослэсь таӵе шугъяськонзэс тодыса, усто специалист Иван Григорьевых Ижын ортчытӥз нимысьтыз мастер-класс. Татчы шумпотыса вуиз Эркишев но. Григорьевыхлэсь вакчи дыр куспын дышетэмзэ со ачиз толэзьёсын-толэзьёсын йырйиз. Эк, ӧжыт вазьгес визьмасалзы ке. Но аслаз ортчем сюресэз Виктор Анатольевичлы али но дуно.
Табере дораз вазиськисьёс уг бырыло. Пурга ёрослэн мукет сэрегъёсысьтыз но - я Брангуртысь, я Выль Мӧньялась - лыкто. Артэ Дэри ёросысь клубъёсын ужасьёс но кожалляло. Вуж кассетаысь плёнка вылэ гожтэм гурез выльдыны-чеберматыны куро. Виктор Анатольевич нокыӵе куронлэсь уг палэнскы. Математикъёс шуэмъя, макем секыт задача, сокем потэ сое быдэстэм. Куддыръя 3-4 минутъем кырӟанлы аранжировка дасяны 2-3 нунал кошке. Уго литератураысь произведенилы сямен, татын но крезьгурез чеберман амалъёсты кутоно. Гур но весь огкадь луыны уг быгаты, кытын ке тубе, ӝутске я уллань ваське. Волятэм пул кадь огшоры чузъяськиз ке, нокинлэн сюлэмаз уз лякиськы.
Крезьгур дуннеын улӥсь муртлэсь палэнтӥ ӧз кошкы кырӟан гожъян но. Ёросысь мукет авторъёслэсь - Сергей Сосновлэсь, Леонид Душниковлэсь - оло куддыръя кепыралляз но. Малпаз, кытчы мон нырме чуртнасько.
Огпол школаын перемена дыръя ки улаз кылбур шедиз: тон пичи, мон пичи…. Ма, талэн аслаз гурез вань ни ук, понназ чабкиськиз дышетӥсь… Коридоретӥ классэ вамышъятозяз, быдэс кырӟан вордскиз. Нылпиосты соку ик кырӟатӥз. Соосыз паймо: ой, выль маке шедем. Бӧрысь та кырӟанэз Андрей Смагин быдэс республика тыр вӧлмытӥз, «Ӝужась кизилиос» конкурсэ пыриськыкуз. Озьы нылпиослы луыса вордскизы мукет кырӟанъёс но.
Бадӟымъёслы сӥзем «Гуртысь нылъёс», «Шудо-а тон, анай?» кырӟанъёс азьвыл чузъяськылӥзы радио пыр но. Вань на эшшо 6-7 сокем паськыт вӧлмымтэ ужъёсыз. Но кырӟанъёслэн лыдзы сьӧры уйиськыны Эркишев уг дырты. Тырмоз, соосты «Ялыке» быдэстӥз ке.
* * *
Сыӵе со Кабыста гуртын вордскем, еврей сямо удмурт воргорон. Улон косэ ке, со пичи трактореныз тур! ворттылэ, быдэс гуртлы паймымон картофка октон арбери но пӧрмытэ, тракторезлы кусо бича. Шудыса сямен, крезьгур чеберма, выль кырӟасьёсты будэтэ. Ӵапак таӵе огшоры но гань-гань улонэз тодӥсьтэм адямиос вылын возиське удмурт культура. Виктор Анатольевич Эркишев но, азяз нимысьтыз бадӟым куронъёс пуктытэк, нуналмысь уте но азинтэ та удысэз.
Источник:
За предоставление материала выражаем огромную благодарность редакции газеты "Удмурт дунне"
