Христофоров Аверьян Трофимович

From Воршуд
Jump to navigationJump to search

Выльдӥськонлэн вамышъёсыз чурытэсь[edit]

А. Т. Христофоров

Аверьян Трофимович Христофоров вордӥськемын Кизнер ёросысь Выльпыртэм гуртын. Ижысь культпросветучилищеез йылпумъяса, армие ветлӥз, собере Кизнер ёросысь Балдейка гуртысь клубен кивалтӥз. 1974-тӥ арын Челябинскысь культурая институтэз йылпумъяз, 1983-тӥ арын - Свердловскысь вылӥ партийной школаез. ВЛКСМ-лэн Удмурт обкомысьтыз отделэн кивалтӥсьлэн воштӥсез, КПСС-лэн Удмурт обкомезлэн инструкторез луыса ужаз. 1987-тӥ арысен Аверьян Трофимович Удмурт Республикаысь культурая министрлэн воштӥсез, министрлэн нырысетӥ воштӥсез луэ, нош 2004-тӥ арысен – Удмурт Республикаысь культурая министр. Аверьян Христофоров – Удмурт Республикаысь культура удысысь дано ужась, солы Россия Федерациысь Культурая министерстволэн «Культураын басьтэм вормонъёс понна» гадьпусэз сётэмын.

Выльпыртэмысь арганчи

- Аверьян Трофимович, нимды тӥляд аспӧртэмлыко. Пичи дыръяды гурт калык шорады кызьы вазиськылӥз?

- Анай-атай сыӵе ним сётэм бере, озьы ик – Аверьян. Культпросветучилищеын дышетскыкум, Валера шуизы. Пичи выны но отчы дышетскыны пыриз, кык Валера Христофоровъёс луимы. Соку мыным вордӥськем нимы берытскиз – Аверьян.

- Вордӥськем гурттылэн но нимыз аспӧртэмлыко – Выльпыртэм.

- Пичи гинэ вал со – 20 юртъем. 1980-тӥ аръёсы быриз. Гуртамы мон пичи дыръя начальной школа ужаз. Отын дышетскыса, 8 классэз Балдейка школаын быдтӥ, собере тӥни – культпросветучилище.

- Кырӟаны-эктыны яратӥськоды вал, дыр, мылкыдды отчы кыскиз бере?

- Милям гуртын гажано арганчимы вал. Атаймылэн но туж шудэмез потӥз, но пельпум вылаз - сизьым нылпи. Соосты сюдоно, будэтоно. Соку со милемлы арган басьтӥз. Пиосызлэсь шудыны быгатэмзэс адӟыса, 5-тӥ классын дышетскыкум, баян басьтӥз на. Соин но ми пичи выныным асьме понна шудыны дышим. Атае монэ Ижысь крезьгуръя училищее дышетскыны ваиз вал. Но отын ӵектӥзы культпросветучилищее мыныны. Татын мон клубъёсын ужаны режиссёр специальность басьтӥ. Но баянэн шудӥсько вал бере, пӧртэм концертъёсы пыриськылӥ, троссэ соосты ачим ик дасялляй но. Баянэн шудыны быгатэме мыным туж юрттӥз, Челябинскысь культурая институтын дышетскыкум. Гуртысь коньдонэн юрттыны уг быгато вал бере, пӧртэм ужрадъёсын баянэн шудыса асме сюдылӥ.

- Анай-атайёсты колхозын ужазы-а?

- Анае огшоры колхозница вал, нош атае – пудо першал. Можгаын ветеринаре дышетскиз, куинь война пыртӥ потӥз. Улэп ке но бертӥз, кыкетӥ группаен инвалид луиз. Озьы но тӥни сизьым нылпи будэтыны быгатӥз на.

Коньдон но культура

- Обкомъёсын ужан аръёсты кыӵеен тодады кылиз?

- Комсомоллэн обкомаз мон егитъёслэсь агитбригадаоссэс, кино возьматонэз, культура юртъёсты син шорам возисько вал. Ар но ӝыны ортчыса, партилэн обкомаз пропаганда отделэ ӧтизы. Ньыль ар ортчыса, отчы культура отдел кылдытӥзы. Отын культурая инструкторын 9 арлэсь кема ужай. Азьвыл тунсыко вал ужаны. Удмуртиын ӵемысь ортчытъямы советской литературалэсь, культуралэсь нуналъёссэс, кинофестивальёс, быдэс Россиысь калыкъёслэн творчествозыя фестивальёс. Отчы коньдон ӟеч висъяськылӥз.

- Дас сизьым ар ӵоже культурая министрлэн воштӥсез луыса ужады. Культура удысын нырысь ик малы тросгес саклык висъяны кулэ кадь потэ?

- ХХ но ХХI даур. Соос чылкак пӧртэмесь. Культуралэн пуштросэз азьвыл кадь ик кылиз ке но, дунъетъёс воштӥськизы. Али кыӵе ке культура юртэз пуктыны, музеез усьтыны секытгес луиз. Котыр ласянь эскероно: туж-а со кулэ, кӧня коньдон отчы кисьтӥськоз но кӧня пайдаез луоз. Соин ӵош ик нокыӵе коньдонэн мертаны уг луы адямилэсь театре, концертъёсы ветлыса басьтэм лулпуш узырлыксэ. Соин ик государство одно возьыны, утьыны, вӧлмытыны кулэ классической музыкаез, калык кырӟан-веранъёсты, театрез.

- Быдӟым режиссёр Борис Покровский «Аргументы и факты» газетын потэм статьяын шуиз: «Доллар вань дыръя, культура ӧвӧл».

- Улонэз коньдонэн гинэ мертаны уг луы шуиськом ке но, туала арын тросэз со борды пыкиське. Рынок экономикая ужаны дышетсконо. Ог-огеныд ӵошатскыса, астэ ӟечгес возьматыны тыршыса. Тани, шуом, Чайковскийлы сӥзем фестивале Операя но балетъя театрысь асьме артистъёс сяна, Пермьысь но пыриськизы. Учкись соосты ӵошатыны быгатэ ини. Мукет дыръя со кельшем артистъёсыз доры лыктыны коньдонзэ уз жаля ни. Али мон шумпотыса адӟисько: телевидениын пӧртэм каналъёсын, тужгес но «Культураын», музыкалы, театрлы, хореографилы трос инты висъяло. Иське, оскон вань: долларлы луыса культура уз пашмы али.

Кытын кичӧлтӥсьёс?

- Одӥг вылӥ кивалтӥсьлэсь юай: малы асьме музъем вылын удмуртъёслэн али но рос-прос театрзы ӧвӧл, малы удмурт книгаос уг пото, малы К. Герд нимо гимназилы город шоры ӟеч-ӟеч юрт уг шедьто, малы удмурт теле- радиопередачаосты шер гинэ кылыны луэ на? Со тазьы валэктӥз: удмуртъёс кадь ӧжыт лыдъем калыкъёс, пе, азьланяз бырозы, соин ик кулэ-а меда удмурт культурае юнме коньдон кисьтыны? Та пумысен тӥ кызьы малпаськоды, Аверьян Трофимович?

- Жаляса верано луэ: асьмеос вордӥськем музъем выламы 30 процент пала гинэ кылемын на. Быдэс дуннеын но, мукет калыкъёсын ӵошатыса, финн-угор калыкъёс ӧжытгес но ӧжытгес кылё. Рынокъя экономика тужгес но зол шукке ӧжыт лыдъем калыкъёсты. Тани школаосын вань национально-региональной компонент шуон улсын нуиськись урокъёс. Отын Удмурт шаер, асьме писательёс, художникъёс, артистъёс, крезьгурчиос сярысь верало. Ваньмыз со умой. Но егитъёс табере нырысь ик малпасько: малы со мыным азьланяз кулэ луоз, соосты тодэме мыным кыӵе пайдаен берытскоз? Тӥни мар бордын ужпум. Табере егитъёсты кужмысь дэмласа дышетыны уг луы ни.

- Москваысь дышетӥсьёс ЕГЭ шуонлы йылпумъянъёс лэсьтӥллям но чабкиськиллям: нылпиос ӟуч кылэз мырдэм но кызьы «куиньлы» гинэ, пе, тодо, нош англи но немец кылъёсты – «ньыльлы».

- Нылпиос валало угось: со кылъёстэк улонын инты шедьтыны шуг луоз. Алигес тани асьмелэн бадӟым делегацимы Эстоние ньылетӥ финн-угор конгрессэ ветлӥз. Отын вераськон вал ӧжыт лыдъем калыкъёсты, соослэсь культуразэс утён сярысь. Ӧсамы ведь глобализация йыгаське ни. Одӥг калык но табере ас понназ висъяськыса уг ни улы, ог-огеныз сураське. Рынокъя экономикаын адямилы лулпуш дуннезэ узырмытыны кытысь ке мае ке витьыса пукыны кулэ ӧвӧл. Сое со курыны, дунэн басьтыны кулэ. Адями няньтэк уз чида, нош, шуом, книгатэк, музыкатэк, театртэк чидалоз. Соин ик анай-атай пиналзэ пичиысен книга лыдӟыны, музыкаез валаны, спектакльёсты учкыны дышетӥз ке, солы со будэм бераз нянь сямен ик кулэ луоз. Озьы ик удмурт кылмы но.

- Асьмелэн ӵемысь кылыны но лыдӟыны луэ «Удмуртиез азинтон» программа сярысь. Отчы коньдон нимысьтыз висъяське. Уг луы вал меда пуктыны, шуом, Герман Корепановлэсь «Наталь» операзэ, Геннадий Корепанов-Камскийлэсь «Италмас» балетсэ? Та крезьгурчиослэн туэ юбилейёссы ук.

- Зэм но, соосты пуктон пумысен Операя но балетъя театр министерствоямы вазиськыны кулэ. Мынам малпамея, удмурт классика театрлэн репертуараз котьку мед луысал вылэм. Ми со сярысь вераськиськом, но улон нуналлы быдэ кыӵе ке но ужпумъёс пуктэ. Соин ик, коньдон поттон понна «Ханума» кадьёсты тросгес возьматоно луэ. «Наталь» опералэсь но «Италмас» балетлэсь люкетъёссэс юбилейлы сӥзем концертъёсын возьматъялозы. Нош быдэсаксэ пуктон понна соосты туала куронъёсъя выльдыны кулэ. Со спектакльёсты учкыны удмурт калык гинэ медаз ветлы, соосын мед тодматскозы мукет выжы калыкъёс но, егитъёс но.

- Мон гожъяськись бере, тодэме потэ: рынокъя экономика вакытэ улонамы кызьыгес удмурт книга поттыны кулэ, кызьы сое калык доры вуттоно? «Удмуртия» издательствоын али черодзэ куамынлэсь трос рукопись вите.

- «Кенеш», «Инвожо», «Луч» журналъёс пыр калыклэн тодэмез луэ авторъёслэсь ужъёссэс. Удмурт калык пӧлын мед луысалзы кичӧлтӥсьёс. Соос книга поттыны фонд мед кылдытысалзы. Тани егитъёслэн этнофутуризмъя «Одома» огазеяськонзы вань ук. Соос бызьыло, коньдон но шедьто. Егитъёсын ужась кун комитет пыр но фонд кылдытыны луысал. Бызьылоно, утчаськоно, государстволэсь яке кинлэсь ке возьмаса пуконо ӧвӧл. Писательёслэн огазеяськоназы но кулэ вал егит гожъясьёслэсь секцизэс кылдытыны. Собере гожъяськисьёслы калыке тросгес потано, реклама лэсьтоно. Кин ке но соосты адӟысал, юрттыны басьтӥськысал. Пушкин шуиз вал: «Мы страшно нелюбопытны». Соин ик асьмелэн кичӧлтӥсьёсмы, сьӧразы валтыны быгатӥсь адямиосмы туж ӧжыт яке чик но ӧвӧл.

- Малы тросаз библиотекаосысь удмурт газет-журналъёсты адӟыны уг луы?

- Библиотекаосы коньдон ӧжыт сётӥське. Но ведь удмурт калыклэн лыдӟиськемез потэ ке, солэн со сярысь гурт кузёлы, ёрос йырлы вазиськемез луэ. Аслыд бызьылоно, ӵош кариськыса, куронэн вазиськоно. Верай ини: кин ке тон сярысь сюлмаськон вакытъёс ортчизы.

Министр малпаськыны кулэ

- Культуралы коньдон туж ӧжыт висъяло бере, кырӟась-эктӥсь, шудӥсь профессионал коллективъёсты кулэстыны уд малпаське-а?

- Али асьмелэн 7 театрмы, 7 концерт возьматъясь коллективмы. Ваньзэ возьыны чакласьком.

- Удмурт театрлэн югдурез али секыт. Мар луоз соин азьланяз?

- 2005-тӥ – 2009-тӥ аръёс ӵоже юртсэ рос-прос тупатъяны, выльдыны малпаськом.

- Отысь артистъёс но «пересьмо» ини. Выльёссэ дасяны уд малпаське-а?

- 2005-тӥ арын Москваысь Щепкин нимо училищее ог 5 нылъёсты но 15 пиосты дышетскыны келяны малпаськом. Конкурс ортчытом. Городын улӥсь, удмурт кылэз тодӥсь егитъёстыгес кутомы. Малы ке шуоно дышетскыса бертэмзы бере улон интылы ёрмон туж шӧдӥськоз.

- Шуг-секытъёсты вормыны кытысь кужым басьтӥськоды?

- Культура удысысь. Отын ужась адямиосты троссэ ӟеч тодӥсько. Соос дорам ӵемысь асьсэ ужпумъёсынызы, куронъёсынызы лыкто. Юрттыны быгатӥсько ке, шумпотон басьтӥсько.

Министрлы малпаськыны, созэ яке тазэ ужпумез ас понназ сэрттыны-пертчыны тросгес дыр мед сётысалзы. Нунал туж ӝог ортче, син азе сокем адӟиськисьтэм чыры-пыры ужъёс пӧлы ышоно.

Сабырлык но дыр

- Тӥ асьтэдыз котькинэн лачмыт, зӥбыт, йӧно возьыны быгатӥськоды. Сямды сыӵе-а яке культура удысын ужан адямиез сабырлы каре-а?

- Анай-атайёсы сабырлыесь вал. Соос астэ калык пӧлын кызьы возьыны, йӧнлы дышетӥзы. Ма, собере улон ачиз но дышетэ. Мон гуртысь 15 арескысен Иже лыктӥ. Аслым ачим шуи: кылын гинэ супыльтоно ӧвӧл, астэ ужын возьматыны кулэ. Калык тонэ тыршемедъя, умой сямыдъя дунъялоз.

Источник:

Христофоров А. Т. Выльдӥськонлэн вамышъёсыз чурытэсь / А. Т. Христофоров ; записал Г. Романов // Удмурт дунне. - 2004. - 3 сентября. - С. (Удмурт кизилиос).

За предоставление материала выражаем огромную благодарность редакции газеты "Удмурт дунне"