Удмурт визькылъёс

Удмурт визькылъёс

А

Адӟон пыд улысь потэ.

Азьдэ-бердэ учкыса ул.

Адями вань улытозяз визь люка.

Адямилэн визьмыз сизьым пӧртэм.

Адями излэсь чурытгес, сяськалэсь небытгес.

Адямиез кылын но виёд.

Адямиез сюлоен уд дышеты.

Адямилэн кыӵеез ужамез бордысь адӟиське.

Адямиез тужгес мактан йӧлэз шуныт интые пуктэм кадь.

Адями уженыз чебер.

Азьтэм муртлы шунды но вазь ӝужа.

Азьтэм муртлы нунал но кузь.

Азьтэм пунылы ас гонэз но секыт потэ.

Азяд вӧялоз, берад сялалоз.

Алама гырем му вылэ йӧны потэ.

Алдаськись мурт нокинлы но уг оскы.

Алдаськыса кӧттэ уд тыры.

Алдаськон сылэ одӥг пыд йылын, зэмлык – кык пыд йылын.

Анай-атай зарнилэсь но дуно.

Анай-атай уродзэ уз вералэ.

Анай-атаед сётымтэ бере, Инмар уз сёты.

Анай йӧлын визь пырымтэ бере, скал йӧлын уз пыры ни.

Анай кылыныз тышкаське, сюлмыныз яратэ.

Апрель узыр вуэн, нош май – ожоен.

Арберилэн пыдыз потӥз.

Арнялы быдэ сюан уг луы.

Аръёс дэремез но, бамез но бездыто.

Ас вордскем гуртэз котькинлы дуно.

Ас вордэм музъемдэ, анай-атайдэ кадь, палэнысь уд шедьты.

Ас вужередлэсь уд пегӟы.

Ас кылзэ вунэтэм адями – йыромем адями.

Аслад вордскем музъем вылад шунды но мусогес пиштэ.

Астэ ужын возьматы, кыл вылын гинэ эн.

Атасэн атас уг тупало.

Атайлэн верамез чаль уг вуны, анайлэн вунэ.

Ачид ке ӟеч, калык но ӟеч.

Ачид понна гинэ эн улы, мурт понна но тыршы.

Ачид ужатэк атай ваньбурен даурез ортчытыны уг луы.

Б

Бадӟым семьяен ужаны капчи.

Бадӟым ымез пичи уд кар ни.

Бадярез ӵогыны – чурыт, вузэ юыны – ческыт.

Бакалэн но аслаз кырӟанэз.

Бодылэн кык пумыз.

Бӧрдонэз но, серекъянэз но – ваньмыз ми бордын.

Быронзэ шӧдыкуз кый но, пе, быж йылаз султэ.

Буко кадь шонер.

Бусы дэмен ужен шулдыр.

Буш бекчелэн куараез зол.

В

Вал гуртсэ котьку шедьтоз.

Вал но скал луиз.

Валэз валано гурезь выллань тубыку, нош эшез – шуг-секытэ шедьыку.

Вал погылляськем интые гонэз кыле.

Вал пыдыныз, скал сюрыныз кышкатэ.

Валлэн пыдыз ньыль ке но, канжаське.

Валэз сюлоен уг сюдо.

Валэз шуласа люктало, куноез кырӟаса сектало.

Ваньбур дорад ачиз уг лыкты.

Вань малпанэд кыл вылад медаз пукы.

Ваньзэ сюлэмад понӥд ке, чаль пересьмод.

Ваньмыз ас сяменыз нянь сие.

Вӧй, пе, кортэз но небӟытэ.

Верам кылдэ берен уд басьты.

Вераны капчи – лэсьтыны шуг.

Ветлон сюрес вылэ турын уг поты.

Визьмо кыл кезьыт куазен но шунтоз.

Визьмо мурт азьлань учке.

Визьмо муртлэсь верамзэ пеляд пон.

Висьымтэ йырам кышет керттӥ.

Вить чиньыез куать уд кар ни.

Вожась мурт юбоен но вожа.

Вожед ке потэ, вож турынэз куртчы.

Вожъяськон сюлэмез сыномытэ.

Вожомисьлэн синмыз ик бездэмын.

Востэм муртлэн кылыз секыт.

Возьытэз возь вылын.

Востэм ыжез ӵышкыны капчигес.

Вордӥськем дунне котькинлэсь дуно.

Вордскем кылдэ ке вунэтӥд, вордэм нэнэдэ но вунэтод.

Вордскымтэ чуньы вылын эн ворттылы.

Вормонтэм валэз кортнало.

Ворсам ыме кут ноку но уз пыры.

Вӧез вӧен уг зырало.

Вужзэ вылез воштэ, пересьсэ – пиналэз.

Вужерлэсь кыдёке уд кошкы.

Вуж юболэн дӥньыз юн.

Ву из ултӥ но потоз.

Вукоысь ю тысен уг берто.

Ву но ӧрзэ воштэ.

Вуысь но кӧсын потоз.

Вуӵкетӥсь муртлы вуӵкетон сюре.

Выжыезъя йылыз.

Выль ведраын ву ческытгес.

Выль нянь ческыт.

Выль юртэз кышномурт уте.

Вылыз зарни, пушкыз эгыр.

Вытэз быдтыны луэ, куректонэз уг.

Г

Гажано эш уксёлэсь но дуногес.

Гажан эшлэсь вузэ но мусурлэсь ческытгес потыса юиськод.

Геры но тӥр сютэм уз кельтэ.

Герой одӥг пол кулэ, кышкась – сюрс пол.

Гогыедлэсь вылэ уд тэтчы.

Гырись геры сыномыны уг сётскы.

Гу дуре пушнер потэ.

Гур вылын пукись мурт трос тодэ, шуо.

Гурезь вылэ вамышен тубод, гурезь улэ питралод.

Гурезен гурезь ноку уз пумиське, нош адями адямиен пумиське.

Гурезьлэсь ӝужытсэ тодэмед ке потэ, тубыса утча.

Гужем дася дӧдьы, нош толалтэ – уробо.

Гырпум матын, но сузьыны уг луы.

Гырыку шундыез уг учко.

Д

Дасезлы шум эн поты, ачид лэсьты.

Дас пол мерта, огпол ванды.

Дӥськут нуллытэк но вужме.

Дыртыса ужам уж йӧно уг луы.

Дӧдьыдэ дася гужем, нош урободэ – толалтэ.

Дӧдьыезъя пукисез, валэзъя кузёез.

Дунне азьзэ но, берзэ но возьматэ.

Дунне – колёса, сюлэм – пияла.

Дунтэм гонтэм луэ.

Думыны быгатэм бере, пертчыны но быгаты.

Душеслэсь душес синзэ уз кокча.

Дэремед ке ӧз котмы, нянед шӧг йӧтоз.

Дырез номырин но уд дугдыты.

Дышетскем мурт – синмо мурт.

Дышетскем нянь уг куры.

Дышетскон секыт ке но, солэн емышез ческыт.

Дышетскымтэ мурт бурдтэм тылобурдо кадь.

Дышетскытэк кутэз но кутаны уд быгаты.

Ж

Жоб муртэ аслаз жобез виёз.

З

Зарни пыр но синкыли вия.

Зарни энерчак валлэсь тыбырзэ зыра ке, сое кушты но сут.

Зарнилы эн синмаськы – синмыд мальдоз.

Ӟ

Ӟазег бурдызлы оске, нош адями – пыдызлы.

Ӟег нянь кадь ӟеч адями.

Ӟеч муртъёс ӵукна ик уг кырӟало.

Ӟеч муртлэн ваньмыз ӟеч, урод муртлэн ваньмыз урод.

Ӟеч муртлэн сылалэз но ческыт.

Ӟеч муртлэн эшез но ӟеч.

Ӟеч муртэ ӟечен буре ваёно.

Ӟеч муртъёс пӧлын ӟеч луэмед потэ ке, ас выжыысьтыд сизьым полэс песянайдэ но песятайдэ вунэтоно ӧвӧл.

Ӟеч муртлэн ӟечез берыктӥське, уродлэн уродэз.

Ӟеч сюдэм валлэн чуньыез но сэзь вордске.

Ӟечсэ чеберен уд вошты.

Ӟичы кескич ке но, капканэ сюре.

Ӟозлэн кукыз кузь но, визьмыз вакчи.

Ӟудэм ӵӧж берлань уя.

Ӟукыртӥсь писпу пограм бераз но ӟукыртэ.

И

Инмарлэсь сётэмзэ эн возьма.

Инмысь усемзэ возьматозь, пыд азьысьсэ утялты.

Й

Йӧ векчи интытӥз чиге.

Йӧнтэм муртлэн кылыз из пыртӥ потэ.

Йыбыртъясь мурт йыбыртъямез возьма.

Йылсамтэ кабан ӝог сисьме.

Йыр валэктэ, ки лэсьтэ.

Йыркуръяськись муртлэсь кырӟамзэ уд кылы.

Йыр – малпан понна.

Йыр малпа, пыд нуэ.

Йыр малпаны, ки ужаны.

Йырыныд ке ӧд ужа, кылын уд вера.

К

Кайгу улыны дышетэ.

Калыклэсь люкиськыса эн улы.

Калык пӧлын уродэз но, ӟечез но вань.

Калык тыныд сюрес возьматоз.

Калык ужаку – ужа, калык юмшаку – юмша.

Кам сопалан одӥг куреглы скал сёто.

Капчи шедьтэм ваньбур капчи ик быре.

Кар лэсьтэ пи поттӥсь тылобурдо.

Кеньырез пырыен уг лыдӟо.

Кин кытчы, нош гондыр – гуаз.

Кин номыр уг ужа, со гинэ уг янгыша.

Кинлэн уробояз пукиськод, соя ик кырӟаськод.

Кык син куспысь нырдэ ишкалтоз.

Кыкез сьӧры эн уиськы, одӥгзэ но уд куты.

Кык тямыс – дас куать, кыкнамы – огкадь.

Кын куртчон вакытэз.

Кырыж будэм писпуэз уд ни шонерты.

Кырыж кут кутчаз.

Куректон бӧрсьы кайгу уиське, шуо.

Кие потэм пӧськы быдэс мугорез висьытэ.

Кин аслэсьтыз анайзэ яратэ, муртлэсьсэ уз тышкаськы.

Кин уг ужа, со уг сиы.

Кырӟан котькинэн эшъяське.

Кырӟаса уж капчи мынэ.

Кырӟаса ужад ке, ужедлэсь быремзэ но уд шӧды.

Кырыж будэм писпуэз заман шонертыны уг луы.

Кытчы вень, отчы ик сӥньыс но.

Куды кизёд, ӧжыт ик басьтод.

Куноез кылын уг утялто.

Кылдэ малпаса вера.

Кык пол вордӥськыны уг луы.

Котькыӵе ужлэн аслаз чеберез вань.

Котькин аслэсьтыз интызэ яратэ.

Котькинлэн ас синвуэз аслыз кузьытгес потэ.

Кут кутамлэсь азьло каб лэсьто.

Кыскись валлы сиес поно.

Коӵолэн пиез куӵо ке но, аслыз мусо.

Коӵолэсь куӵозэ уд быдты.

Кыедам ана нянен сюдэ, луо музъем тӧлбер сётэ.

Кылыныз сизьым шур йылэ вуттоз.

Кужмо адямилэсь гурезь но кышка.

Кытчы вень, отчы ик сӥньыс.

Кыӵе ке выжыез, сыӵе ик улваез.

Кыӵе кышномурт, сыӵе ик пурты.

Кызьы атайёсмы улӥллям, милемыз но озьы косӥллям.

Кудмында ужад, сомында ик басьтод.

Кудӟем муртлэн сизьым кысконо скалэз.

Кунолы кык пол шумпотоно: лыктыкуз но кошкыкуз.

Курадӟытэк ӟечсэ уд адӟы. Кин трос лыдӟе, со трос тодэ.

Кион адямилэн эшез уз луы.

Кион синвулы эн оскы.

Кионлэн кӧтыз котьку буш.

Кионэз пыдъёсыз сюдо.

Куазь но бӧрдон азяз серекъя.

Куаратэк кырӟалод, сюлэмтэк – уд.

Кылыныз кӧясь-вӧясь – улонын котьку ик алдаськись.

Корка нылпиен шулдыр.

Котькин ас черсонзэ черсэ.

Котькыӵе емышлэн аслаз дырыз.

Котькыӵе корка ас кузёеныз шулдыр.

Котькыӵе ужын быгатэм кулэ.

Коӵо котькытын куӵо.

Кӧжылэн пазьгиськон сямыз вань.

Кӧльыез куртчыса уд паньгаты.

Кӧс кырӟанэз сюлме уд лякы.

Коӵо аслэсьтыз куӵозэ уг тоды.

Кошкись вуэ кык пол уд пыры.

Куректон сьӧд пилем кадь: лыктэ но, кошке но.

Кыз борды куар уг поты.

Кыйбодыез гольык киын уд куты.

Кый каре кыйёс гинэ пырало.

Кык гондыръёс одӥг гуэ уз тэре.

Кык лудкеч сьӧры уиськид ке, огзэ но уд куты.

Кырӟан котькинэн эшъяське.

Кырӟанэз кутскид ке, пумозяз вутты.

Кырӟась муртлы кузь сюрес но вакчи потэ.

Кырыж быж кырсез бичамысь уз дугды.

Кыедгуби, губи ке но, сылалтыны уг яра.

Кыл веньлэсь но лэчыт.

Кылыныз кортэз но пасялоз.

Кылыныз сизьым шур йылэ вуттоз.

Кылдэ кузь эн лэзья.

Кылдэ пинь сьӧрад возь.

Кыллэн лыэз ӧвӧл.

Кыл пумысь кыл потэ.

Кыл пӧсьтурынлэсь но курыт.

Кылыд ке вань, ужед но мед луоз.

Кылыныд трос эн кока: пиньыд пырдоз.

Кырӟаны умой ӵош, вераськыны – оген.

Кырӟанэн валэз уд сюды.

Кырӟась мурт вордскыкуз ик ик кырӟаса вордӥське.

Кышномуртлэн лулыз сизьым полэс.

Куддыр душеслы но курег сюры вылэ пуксёно луэ.

Кызэз ӵогытэк уд погырты.

Кин маин кӧтсэ тыре: со – крезен, мон – тӥрен.

Кужмо адямилэсь гурезь но кышка.

Кужмо луэ!

Кутлэн родняез кут, сапеглэн – сапег.

Кураськисьлы тӧл котьку пумит.

Курег азьлань уг ӵабтӥськы.

Курег котьку зорлэсь пегӟе.

Л

Лэсьтоно уждэ ӵуказелы эн кельты.

Лэчыт кыл чапкытэк но бӧрӟытэ.

Лудкечез пыдыз нуллэ, кионэз пиньыз сюдэ.

Лушкаськись муртлэн киыз кузь.

Лушкем уж кыре потэ.

Лымы ке трос – ву трос, ву ке трос – нянь трос.

М

Мар вашкалаосыз ушъянэз: соос чиньызэс кӧнязэ тодӥллямтэ.

Малылэн «лыэз» вань.

Матысь эшез зарниен но уд вошты.

Марӟанэз гурезьысь утчало, нош визез – калыкысь.

Макем писпу векчигес, сокем вуэз трос вите.

Мактаськисьлэн атасэз но пуза.

Мактаськемез кышъяськыны но уг яра.

Мар ужад, сое ик сиёд.

Мертчанэзъя шортэз, шортэзъя дэремез.

Меӵ гурезе тубыны секыт.

Муртлэн ванезлы эн вожъяськы.

Муртлэн скалэз но валэн адӟиське.

Муртлэн ужез шоры учкыса тыр уд луы.

Мон калык кадь ӧвӧл, калык мон кадь ӧвӧл.

Мылкыдтэк кут но уд кута.

Мыжгид ке, берен уд басьты ни.

Мынӥсь гурезь вамен но ортчоз, сылӥсь – гуэ усёз.

Мыкыртэм чырты вылэ пуксьыны капчи.

Музъемлэн но пельыз вань.

Мурт дуннеын шуд уд шедьты.

Муртлэн ваньбурезлы эн синмаськы.

Муртлэн дӧдьыяз эн пуксьы.

Муртлэн кунянэз но скал быдӟа.

Муртлэн корказ кема уд улы.

Муртлэсь яратымтэ ужзэ ачид но эн ужа.

Муш кадь ужа!

Н

Небыт тӧл вешалля, кезьыт тӧл чепылля.

Ньылпу выжыын кыз уг буды.

Нунал – кузь, даур – вакчи.

Нунал синмо, уй пелё.

Нюлэскын писпу но огкадь ӧвӧл.

Нянь инмысь уг усьы.

Нянь кырӟатэ, вина – бӧрӟытэ.

Нянь шоремдэ сиыкуд малпа, кызьы со ӝӧк вылэ вуиз.

Няньлэсь бадӟым кин вань?

О

Одӥг визь умой, дас витез эшшо умойгес.

Одӥг интыяз лӥял гинэ пуке.

Одӥг муш сю чибиньлэсь дуно.

Одӥгез мерттӥз, мукетыз будэтӥз, нош куинетӥез шуэ: садэ – мынам.

Одӥг нунал вазьгес кизёд, арнялы вазьгес аралод.

Ортчемзэ бугыръян – бурмем сюлэмез вӧсь карон.

Ортчемзэ уд берыкты ни.

Одӥг даур уло, кык уг.

Одӥг саник куед куштом но, одӥг культо мултэс ӝутом.

Оген венез но ӝутыны секыт.

Оген сюрес но кузь.

Огназ сылӥсь писпуэз тӧл капчиен погыртэ.

Ортчиз, кошкиз – жаль ӧвӧл, азьпалан дыръёс ӟеч луозы ай.

Ошмесэ уг сялало.

Ошместэк шур уг кылды.

Ӧ

Ӧд ке лэсьты, уз лэсьтӥськы.

П

Палэзьпуэ яблок уг поты.

Пал кышнолэсь адӟонзэ нокин но медаз адӟы.

Пась умортое шырчик уг каръяськы.

Парсь инмез уг адӟы.

Парзэ пар шедьтоз.

Пашпумульыпу урод музъеме уг поты.

Пежъянтэк сапег уд кышъя, сиктантэк кут уд кута.

Пель – кылон понна.

Пелляськись ассэ уг пелля.

Пересь писэй гур вылэз яратэ.

Пересь муртлэсь верамзэ пеляд пон.

Пинал адямилы дас тямыс арестэк сюлэм уг пыры.

Пинал толэзь изьыны вазь выдэ.

Писпу дано емышен, адями – ужен.

Писпу погра ке но, солэн лӥялэз кыле.

Пересьмемъя тубат меӵгес луэ.

Пӧсьтоно путо (кушак) мед пӧсьтоз, ортчоно даур мед ортчоз.

Пилиськем дурыез лякыны уг луы.

Писэй ӧвӧл ке, шырлы дунне.

Пичилэсь бадӟым луэ.

Пичи уж но бадӟымзэ кылдытэ.

Пияла юн ке но, сӧриське.

Пуны кузёзэ кыдёкысен тодма.

Пуны утоз, кион сиёз.

Пуны утоз – тӧл нуоз.

Писэй пичи ке но, пуныез ворме.

Писпу шорсюлмысен сисьмыны кутске.

Порпи ыбылӥське.

Пӧяськись муртлы огпол оско.

Пӧяськыса уд узырмы.

Пудо кулоз – лыэз кылёз, адями кошкоз – ужез кылёз.

Пуксьы отчы но, кытын Инмар ӧвӧл, но эн пуксьы отчы, кытын бадӟымез ӧвӧл.

Пуны но нимзэ вала.

Пушнер сутэ ке но, шыдын пӧзе.

Пӧсьтэм дӥськутэз кышъяса выль уд кары ни.

Пукись ву зынме.

Пурысьтамез уд ваты.

Пуэз нюлэскы уг нулло, нюлэскысь ваё.

Пыдэстэм вышкыез вуэн уд тырмыты.

Пыдъёс нулло, киос сюдо.

С

Сабантуй ортчем бере мыжыкез уг возьмато ни.

Сезьы вал доры уг лыкты.

Сезьыез ӟеглэсь азьло уг арало.

Секытэз адӟымтэ мурт адямиез жаляны уг вала.

Семья возиське пересьёсын.

Семья пушкын анай-атай кузё.

Сюлмо уж ӝог азинске.

Сизьымез огзэ уг витьы.

Сӥзьыл нунал сизьым пӧртэм.

Сиемед ке потӥз, Кам вамен но уяса потод.

Сӥльвирдэ кыдатод, висёнлэсь палэнскод.

Син – адӟон понна.

Синтэм мурт адӟе.

Со гинэ уг янгыша, кин номыр уг ужа.

Солэн возьытэз возь вылын.

Сиыны бере кыль, кизьыны – эн.

Сьӧдэз тӧдьы уд кар.

Сюлмысь потэм кырӟан сюлэме ик пыре.

Сюлэме пырем мӧзмонэз пушмульы кӧмез сямен уд кушты.

Сюрес вылын боды но эш.

Сюреслэн дурыз вань, пумыз ӧвӧл.

Сюресэд мед удалтоз!

Сьӧдэз тӧдьы уд кары.

Сяська но тӧлӟе, даур но ортче.

Т

Табаез вӧятэк, табань уд сиы.

Тазалыкез зарниен уд вошты.

Таӵеез гинэ уд адӟы али.

Толэзь югыт ке но, шунды кадь ӧвӧл.

Трос супыльтэм возьытэ вуттэ.

Тузӥ дӥсьлэн кырсез чальгес син шоры йӧтэ.

Тыршись шыр пулэз но пась кароз.

Тыпы но куке сисьпу луэ.

Тэк кыллись визь куасьме.

Тӥр ачиз уг кора.

Толэзь пиштэ ке но, уг шунты.

Трос тодэм нянь уг куры.

Тулэз тулэн ик потто.

Тулыс куазь нош ик берытскоз, нош верам кылдэ уд берыкты.

Тулыс куаръёс выльысь пото.

Тулыс нунал быдэс арез сюдэ.

Тулыс чебер сяськаен, нош сӥзьыл – емышен.

Туриез тури котьку шедьтоз.

Турынэз букоен уг турнало.

Тусьты-пуньы жингыртытэк уг улы.

Туэ чипы но курегез дышетэ.

Тылтэк ӵын уг поты.

Тыршись шыр пулэз но пася.

Тэкитамтэ уробо ӟукыртэ.

У

Удмурт вукоысь бертыкуз но кырӟа.

Узырмемед ке потэ, ужаны кулэ.

Узыр мурт корт кӧжы кадь чурыт.

Улон ачиз сюрес возьматэ.

Улон – колёса, азьлань питра.

Улон нылкышно бордысен кутске.

Улон – луд пыр ортчон ӧвӧл; люкиськод – нош ик пумиськод.

Улытозяд дышетскы.

Умой кузё дӧдьызэ гужем дася.

Уж адямиез чебер каре.

Уж адямиез чылкытатэ.

Ужаку час шоры уг учко.

Ужам бере сиён ческыт кошке.

Ужаны уж дышетэ.

Ужась муртэ котькытын ярато.

Ужась мурт нокытын но сиытэк уз кул.

Ужаса поттэм емыш котьмалэсь но ческыт.

Ужатэк шудбурез уд адӟы.

Ужез мылыд потытэк эн лэсьты.

Ужез огнад лэсьтыса уд быдты.

Ужез яраты, со ваньмызлы дышетоз.

Уж зарнилэсь но дуно.

Уж котькыӵе куректонэз эмъяны быгатэ.

Уж сюдоз но, дышетоз но.

Уж дышетэ, нош азьтэм курадӟытэ.

Узырлэн кыл вылаз – кӧй, сюлэмаз – пӧсьтурын.

Узыр мурт корт кӧжы кадь чурыт.

Узыр муртлэн чечыез но кузьыт.

Уй кузь ке, нунал вуоз.

Улон воштӥськемъя, калык но воштӥське.

Умой кышномурт – ӝыны юрт.

Умой кунолы капка котьку усьтэмын.

Усёнме ке тодысал, куро вӧлдысал.

Урод муртлэн сюлмыз сьӧд.

Утялтӥськод ке, писпу но шонер, чебер будэ.

Ушъяськисьлэн атасэз но пуза.

Ч

Часлэн пыдыз ӧвӧл ке но, ветлэ.

Чебер ныл бутьмартэк но чебер.

Чеберез ӝӧк вылэ уг пукто.

Ческыт мед мыноз!

Ческыт ымдэ кӧш эн кар.

Ческытэз пичиен сиё.

Чиданлэн пумыз ӧвӧл.

Чипеез вуэн уд кышкаты.

Чорыг мур интыез утча.

Чорыгез уяны эн дышеты.

Чурыт мульыез куртчыны пиньыд уз вормы.

Чурыт муртлэсь лымызэ но уд куры.

Чиньы но кузё – вакчиё.

Ӵ

Ӵем нюлэскы узы уг поты.

Ӵуказе веран кылдэ ӵуказе вера.

Ӵушъял пичи ке но, гондырез но вӧсь каре.

Ӵын лыдӟыса ветлэ.

Ӵыныз вань, тылыз ӧвӧл.

Ш

Шаплы мурт котькытчы шаплы вуэ.

Шаплылы – улон, калленлы – кулон.

Шедьтэм тӥрен уд узырмы, кузёезлы сёт.

Шуш ымнырлэсь эн кӧшкема, кышка сьӧд сюлэмлэсь.

Шунды ас чеберезлы шумпотэ.

Шунды выллань, нунал азьлань.

Шундыез мешоке уд ваты.

Шудтэм мурт вылэ кыллись кор но, пе, погра.

Шудэз валес вылысь уг утчало.

Шонер кырыжез ворме.

Шырез кабан улэ уг пачкато.

Шырлэн каргаськемез писэйлы уз усьы.

Шырлэсь писэй уг кылзӥськы.

Шырлэсь юрттэмзэ эн возьма.

Шырпу пичи гинэ ке но, мугорез висьытэ.

Ы

Ыжез кеч карыны уг луы.

Ыж ке луид, кион сюроз.

Ымаз ву ӟузем.

Ышем пуртлэн ныдыз зарни.

Ыштэмдэ бӧрдыса уд берыкты.

Ыштэм зарниез шедьтыны луэ, нош дырез уг ни.

Ыштӥд ке, шедьтыны быгаты.

Э

Эзель уз юа, лыктоз но басьтоз.

Эмъюм бурмытэ одӥг висёнлэсь, уж – сюэзлэсь.

Эн кесяськы, ымад куака пыроз.

Эш ке вань, мӧзмыт ӧвӧл.

Эш доры мыныку иськемъёсты уг лыдӟо.

Эшедлэн куараез пеймытын но тодмо.

Эштэ уж дурысь утча.

Ю

Юа, ымад уз чапке.

Югыт дунне котькытын одӥг.

Югытлэсь нокытчы уд пегӟы.

Я

Ямсыз бордысь чеберез адӟыны тупатэмын.

Янгыштэ вералоз эшед, ватоз – тушмонэд.

Литература

Удмуртский фольклор Пословицы, поговорки