Ураськина Надежда Ивановна
Шерше ля фам
Вордӥськемын: Дэбес ёросысь Берёзовка (Нумрезь) гуртын
Гороскопезъя: Водолей
Дышетскемез: Дэбес педучилище, Удмурт кун университетысь филологияя факультет, аспирантура
Ужан тубатъёсыз: Ижысь 23 номеро школаысь покчи классъёсты дышетӥсь, Удмурт кун университетысь дышетӥсь, Дышетон удысын национальной ужпумъёсты тодон-эскеронъя институтлэн директорез
Семьяез: кузпалыз Андрей Иванович Ураськин, Удмурт йӧскалык театрлэн директорез, нылыз - Настя, 17 арес, Ижысь Гуманитарной лицейын дышетскись
- Надежда Ивановна, 8-тӥ Март азьын гожтон вылысь ми редакциын кема утчам туж шудо удмурт нылкышноез… Син усемлэсь уд кышкаське-а?
- Уг.
- Тӥ сямен, шуд ас кожаз лыктэ-а, сое лэсьто-а?
- Ой, соиз но, таиз но, дыр. Нырысь ик, потэ, дыр, кыӵе семьяын вордскем бордысь. Мон бадӟым семьяын будэмын, вить пиос пӧлын. Соос монэ сыӵе эркияса возизы - чылкак мунёез музэн, огпол но шуккемзы, исамзы ӧй вал. Али но куспамы туж тупаськом, ог-огмы доры куное ветлӥськом. Кенъёсмы но туж-туж мыло-кыдоесь. Муми-буби огшоры крестьянъёс, но мыным потэ, соос кадь интеллигент адямиос ӧвӧл: туж лачмытэсь, калыкен кусып шедьтыны быгатӥсесь. Анаймы туж чылкытэз, чеберез гажась. Фермаын ужаса вылысь но со вуттӥськылӥз утялскыны, коркамес ӝикыт возьыны - валесъёсыз котьку шуккемын, валемын луо вал. Одӥг ныл шуыса, со монэ ужлэсь ӧз палэнтылы. Городэ кошкыкуз, монэ скал кыскыны кельтылӥз - мон огнам та векчи, пичи киосыным 15-16 скалэз кыскылӥ. Соин ик, нырысетӥез профессие доярка, шуисько.
- Туннэ нылпи садэ ветлӥсь дыдыос пӧлын но миссъёсты утчало ни, азьвыл чебер нылъёс понна конкурсъёс ӧз радъяськылэ, но пиос котьку висъяло туж-тужъёссэ. Вожмаськыса куспазы жугиськылӥзы-а?
- Ӧ-ӧз. Мон асме чеберен али но уг лыдъяськы. Нош школаын дышетскыкум, мон нокинлэн син азяз ик ӧй сюрылы кадь - туж востэм, дӥсьтӥсьтэм вал. Тани али кивалтӥсьёслэсь пинал дырзэс юаськод ке, ваньмыз верало школаын дышетскыкузы ик азьветлӥсь луэмзэс, пионерын-комсомолын кивалтэмзэс, а мынам мылкыды но ӧй вал кадь висъяськыны, маке карыны. Яке ӧй дӥсьтылы. Огласянь, со урод - педучилищеын кыӵе курадӟи! Малы ке монэ ӟуч группае пуктӥзы. Ӟуч сямен чебер вераськеме уг луы, возьдаськисько. Дышетскыны но нырысь арзэ туж шугъяськи. Керпотэменым ик, дыр, мынам ныл эшъёсы гинэ но ӧй вал - кыӵе пиос? Тау карисько удмурт кылъя дышетӥсьлы Мария Петровна Байметовалы. Со монэ предметэзлы ӧз дышеты, но мон ветлӥ солэн драмкружоказ. Тӥни отын ини мон усьтӥськи. Кружоке лобаса ветлӥ. Асме шедьтӥ, дышетсконэ но радъяськиз. Пумен ӟуч эшъёсме сутӥ но, ортчи но. Педучилищеез йылпумъян азьын ваньмыз сюлмасько - кинэ кытчы лэзёзы - ваньмызлэн городэ мынэмзы потэ, нош инты вить гинэ. Мон со сярысь ӧй ик малпаськылы, но кенешын вить мурт пӧлысь веразы мынэсьтым но нимме. Тӥни со минутэ гинэ вордскиз мон пушкын аслым оскон - Иже ӟуч пиналъёсты дышетыны ысто бере, иське, мон маке пӧрмытӥсько? Со вал, дыр, улонысьтым одӥгез тужгес яркытэз, шудоез вакытэ.
- 18 арескын тӥ, гуртысь потэм удмурт нылаш, дышетӥды ни городысь ӟуч пиналъёсты. Тросэзлэсь кылылэме вань, городысь анай-атайёсын ужаны шуг, соос укыр вылтӥяськисесь, копаськисесь… Огъя кыл утчаны кема-а выриды?
- Милемыз педучилищеын методикалы зол дышетӥзы, соин кышканэ ӧй вал. Дышетӥ ӟучъёсты но, бигеръёсты но, удмуртъёсты но. Анай-атайёсын кусып капчиен тупатылӥ. Урокъёсам пукемзы бере ӟеч кыл вераллязы.
Ӧжыт секытгес вал городлы дышыны - мӧзмылӥ. Но татын но юрттӥз удмурт кылэз гажаме. Урокъёс, школаын ужрадъёс бере бызьыса мынӥсько вал «Ижмаш» культура юртысь калык театре. Кивалтӥсез Анатолий Андреевич Митрофанов монэ туж умой пумитаз - со вакытэ пинал нылъёссы ӵап уг тырмо вылэм. Театрын соку ик рольёс сётъяны ӧдъяз. Мон нош ик улӟи, лобаса ветлыны кутски. Нош мылкыд вань дыръя, ваньмыз капчиен лэсьтӥське ук: соин ужам нокыӵе шугъяськонъёс ӧй вал. Но мыным эшшо маке ӧз тырмылы. Малпай дышетскыны. Кема ӧй бырйы - мынӥ Удмурт университетысь филологияя факультетэ. Со сярысь эшъёсылы верай. Одӥгез ӟучомем удмурт эше шуэ: а кытчы мынод на, тон милям вотячка бере… Мыным соку туж ӝож вал, но ӧй вазьы. Мар бен, улон ваньзэ интыяз пуктэ: мон университетэз йылпумъяй, кандидат диссертация ути, институтэн кивалтӥсько, нош со озьы ик училищеын басьтэм тодон-валанэныз кылиз.
Аспирантурае пырон сярысь мынам малпанам ик ӧй вал. Дышетски заочно, диплом дасяй уйпал диалектъёсъя. Ужме утеме кельшем, дыр, - дунъетъёс сётыкузы, тодосчи Татьяна Григорьевна Перевозчикова шуак ӵектӥз аспирантурае мыныны. Мон малпай-малпай но… Мар пыронтэмез - ужме лэсьтыса вуттӥсько, семьяе вӧзам.
- Диссертацидэс сӥзиды синтаксислы. Со кылтодонысь одӥгез шугез, эскерымтэез удыс. Маизлы синмаськиды?
- Шонергес ке - диссертацие сӥземын методикалы, ӟуч синтаксисэз удмурт классъёсын дышетонлы. Малы со борды басьтӥськи? Малы ке шуоно, школаын ужаса, мон адӟылӥ, кыӵе янгышъёс лэсьто ӟуч сямен вераськыкузы-гожъяськыкузы удмурт нылпиос. Малпасько, со туж кулэ, тунсыко тема. Ужме гожъян вакытэ ик удмурт студентъёсты дышетӥ. Мыным туж кельшиз егитъёсын ужаны, соосын ӵош шуг юанъёслы валэктонъёс утчаны.
- Азьвыл кивалтонын ужамтэ муртлы собере шуак оско выль кылдытэм институтэз…
- Зоя Витальевна Сувороваез дышетонъя министрлы нырысетӥ воштӥсе ӵектэмзы бере интыяз адями кулэ луиз. Зоя Витальевна вазиськем университетэ, кивалтӥсьёс малы ке монэ ӵектӥллям. Мон нырысь куалектӥ, кузпалыным кенеши. Собере малпай, ӵекто бере, эскероно. Озьы куатетӥ арзэ институтэн кивалтӥсько ни. Зэм, университетысь кошконо луи, уг дышетӥськы ни, но отысь преподавательёсын валче ужаськом.
- Маин герӟаськемын тӥляд ужды, малы кулэ луиз нимаз институт?
- Удмурт кылмы кун кыллэсь статуссэ басьтэм бере солы бадӟымгес саклык висъяськыны кутскизы, нош удмурт кылъя учебникъёс вужмемын ни вал. Удмурт кылэз дышетыны мылкыд каризы сое тодӥсьтэмъёс но - таосызлы чылкак мукет программая книгаос кулэ. Тӥни озьы, институтмы национальной школаослы дышетскон книгаос, пособиос гожъя, дася. Ваньзэ-ӧвӧлзэ дас ар ӵоже 132 книга поттэмын ни. Республикамы та ужез кулэен лыдъя, 2006-тӥ арын та ужлы 5 миллион манет висъямын вал. Со коньдонэн 27 пумо книга поттыны быгатӥм. Соин удмурт кылэз дышетыны мылкыд карисьёс понна учебникъёс ласянь али нокыӵе шугъяськонъёс ӧвӧл, мылкыдзы гинэ мед луоз.
- Кызьы дунъяськоды институтады дасям книгаосты? Тросэз анай-атайёс, дышетӥсьёс газетмы пыр но шараяллязы ни пыкылонъёссэс. Асьтэос меӵак пыриськиськоды-а учебникъёс дасянэ?
- Пыкылонъёстэк, тырмымтэостэк бен кытын луэ? Озьы учконо ке, газетын но ӵем гинэ янгыш адӟиське. Но асьмеос валаськом ук - книгаез но, газетэз но улэп адямиос лэсьто - кин уг янгыша? Ужасьтэм мурт гинэ. Собере автор одӥг-кык, нош лыдӟись-учкись - сюрсъёсын. Котькудӥзъя кариськыны уг луы. Кинлы ке кешыр шуон кельше, кинлы ке - ӵужкушман…
Институтамы ми 15 кузя ужаськом. Мон вань специалистъёсмес туж вылӥ дунъясько. Кылсярысь, ми дорын кемалась ужало ни тодмо авторъёс Юлия Байтерякова, Галина Турова, Надежда Боталова, Вера Пантелеева, Алевтина Журавлёва, Антонина Комарова, Елена Николаева, Галина Васильева, Алексей Петров… Витез соос пӧлысь - наукая кандидатъёс. Пусйымон соиз: учебник лэсьтон бордын тыршо методистъёс, школаын ужам тодосчиос. Куд-огез огдыре институтын но, школаын но ужа. Соос туж ӟеч тодо нылпиослэсь луонлыкъёссэс, психологизэс. Озьы автор теория вылын гинэ уг, ваньзэ уж вылын эскерыса, книга дася. Кӧня ке арзэ ни, книга потытозь, ми шаерысьтымы куд-ог школаос вылын эскерон ортчытӥськом - шуом, потоно учебникъя нырысь кӧня ке класс гинэ дышетске. Дышетӥсь чакла-учке, учебникысь тырмымтэоссэ пусъе. Со бӧрсьы тодосчиос учебникез выльысь сӥсъяло на, собере гинэ бадӟым тиражен поттӥськом.
Асэным ушъяськеме уг поты, директорлэн мукетгес ужез. Но берло дыре книга поттонэ каллен пыриськисько ни. Али ужасько В. Кельмаковен ӵош. Со дася удмурт синонимъёсын словарь. Вот, шуиськом, удмурт кыл куанер, нош учкиськод но - одӥг кыллы дас-дас вить синоним сюре. Мон малпасько, потӥз ке со кыллюкам, гожъяськисьёс, журналистъёс понна ӝӧк выл книгалы пӧрмоз.
- Надежда Ивановна, вождэс эн вае, но котькуд тодмо-дано удмуртлы ми одӥг юан сётӥськом - асьтэлэн пиналды анай кылыныз вераське-а?
- Малы солы вожез поттод, мон ачим но лыдъясько, тросэз семьяысь потэ шуыса. Котькӧня книга печатла, квота малпа, семьяын асьсэ выжызылэсь возьдаськизы, вылтӥяськизы ке, номыр уз пӧрмы. Милемлы номыр понна возьдаськыны - Настямы удмурт кылын вераське, зэм, ужано грамматика бордын. Тодэ кадь англи кылэз но, дышетэ немецсэ. Но городын будэменыз, солы, конечно, каньылгес ӟуч сямен малпаськыны - кылбуръёссэ ӟуч кылын гожъя.
- Андрей Ивановичен тӥ ялан калык син азьын: котьку чебересь, йӧноесь. Тӥ зэмзэ но туж синмаськымон пар. Таиз шудды кызьы вуиз?
- Вуттӥз одӥг туж ӟеч кышномурт. Университетын дышетскыкум, мон малы ке курсовой уженым ӝегай. Удмурт кабинетысь лаборантлы керпотыса вазиськисько - темаос ӧвӧл ни-а? Анастасия Михайловна Семёнова шуэ: тани, Анатолий Григорьевлэн пьесаосызъя тема вань, маке нокин уг басьтӥськы. А мыным котьмар мед луоз ни, ӝогак лэсьтоно. Но спектакльёсты адӟытэк, асэныз улэп авторен вераськытэк, пьесаосъя ӟеч курсовой уд гожты. Мынӥ Удмурт театре. Вазиськи Анатолий Леонтьевичлэн кузпалэзлы Евгения Николаевналы. Со монэ кабинетаз пыртӥз (режиссёрлэн юрттӥсез луыса ужа вал), Григорьевлэсь «Лысву сямен уг тӧлзы синкыли» пьесазэ лыдӟыны сётӥз но ачиз кытчы ке кошкиз. Кӧня ке минут ортчыса, ӧс пӧртмаськыны кутскиз кадь: я огез воргорон усьтэ, я кыкетӥез - номырзэ уг валаськы. Бӧрысь веразы ни: Евгения Николаевна озьы, монэ учкыны шуыса, кышнояськымтэ артистъёссэс ысъям. Со малпа вылэм монэ Александр Баймурзинлы ӵектыны, но Саша мыным ӧз синмаськы. Зэм, ӝыт спектакль бере со монэ келяз ик. Андрей Ураськинэн ӵош…
Аръёс ортчемъя яратон тӧлӟе шуэмлы мон уг оскиськы - иське, кылдымтэ вал. Иське, утчано аслэсьтыд адямидэ, зэмос куздэ. Кызь арескын ке ӧд шедьты, шедьтод куамын, ньыльдон, витьтон арес дыръяд - но со кытын ке одно луыны кулэ. Сотэк кызьы улод?
- Надежда Ивановна, дорады лыктон азям мон тӥ сярысь пӧртэм малпанъёсты кылӥ: кин ке тӥледлы синмаське, кин ке шекъёстэс утчаны выре.
- Кин ке вожъяське. А мар отын паймымонэз? Озьыен, мон верамон. Бездыт адямиос сярысь уг супыльто ук. Со - вожъяськон. Адямилэн аслаз номыр уг пӧрмы ке, со мукетсэ вера. Азьвыл ӝож потэ вал, али дыши ни - тодады вае ай, кыӵе кивалтӥсез уг курлало.
- Иське, зэмос нылкышно луыны кулэ…
- Нылкышно луыны кулэ … яратӥсь но яратымон. Вот озьы. Шуо ук, пиосмуртъёс, пе, дунъяло, нылкышно усто пӧраны, картсэ мусояны но калык пӧлын ассэ йӧно возьыны быгатэ ке. Мон соин быдэсак соглаш. Кыӵе нылкышно, картсэ яратӥз ке, пӧраськонлэсь палэнскоз меда? Солы сиёнэд, пыжкемед кельше ке, уката ческытгес пӧрам потэ ук. Мусо кылъёстэ ке жаляд, мукетыз вералоз. Мӧзмыт, дыр, ялан дораз керттӥськыса, сериал учкыса пукись кышноен но.
Яратоно кырӟанэз: «Кык сюлэмъёс» (кылъёсыз В. Ванюшевлэн, крезьгурез А. Ураськинлэн)
Яратоно авторъёсыз: А. Макаренко, А. Сухомлинский
Яратоно актрисаез: Чулпан Хаматова
Сиёнэз: чорыг, емыш
Сяськаосыз: возьвыл сяськаос, хризантема
Дӥськутэз: классика
Буёлэз: сайкыт-вож
Шутэтскон интыез: нюлэс
Сямыз: лачмыт, калыкен вераськыны быгатӥсь
Источник:
Ураськина Н. И. Шерше ля фам / Н. И. Ураськина ; записала Зинаида Рябинина // Удмурт дунне. - 2007. - 9 марта. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
