Васильева Галина Николаевна

Материал из Воршуда
Перейти к навигацииПерейти к поиску

Удмурт кылы монэ шунтэ[править]

Г. Н. Васильева

Галина Николаевна Васильевалэн улон сюресэз быдэсак герӟаськемын комсомолэн, партиен но дышетонэн. Кылем арын со луиз педагогика наукаосъя кандидат.

Вордӥськемын 1945-тӥ арын Балезино районысь Чуялуд гуртын.

Кытын гинэ со ӧз ужалля, дано наградаосын пусъемын. Со - дышетон удысысь сиё-дано ужась, Россия Федерациысь дышетонъя отличник. Озьы ик пусъемын «За доблестный труд» медален но «За заслуги перед Отечеством» орденлэн II степенё медаленыз.

Зэмос визьмо адями асэныз уг данъяськы, шуо калыкын. Та веран быдэсак тупа гожтоно героелы. Соиз но шонер: сыӵе адямиос куддыръя саюлэ но сюро. Оло, янгышасько?

Мон бырйи Пониноез, Понино - монэ

- Галина Николаевна, тӥ пӧртэм ужъёсын кивалтэмын, но тустыя дышетӥсь ик кылемын. Школае нырысетӥ вамышты кызьы кутскиз?

- Анае, Лидия Ефимовна Саласина, дышетӥсь вал. 1-тӥ сентябре со вазь ӵукна ик ужаны кошкиз. Мыным 6 арес. Та аресын соку школае ӧз басьтылэ. Но мон, дышетскисьёс сьӧры уйиськыса, школае вуиськем. Бадӟым пиналъёс монэ учительское донгиллям. Бӧрысь анае тодаз вайылӥз: ӝожонэн курмем дӥсен, пе, директор азьын сылӥд. Директор дышетскыны лэзиз но шуиз: тыныд, нылок, аресыд вуытозь, 1-тӥ классын кык ар пуконо луоз. Тӥни озьы мон дышетскыны кутски Наговицынской шуиськись начальной школаын. Но ӟеч дышетски, кык ар пуконо ӧз луы. Собере со школамы сизьым классъем луиз. Сое быдэстыса, куинь кузя Балезиноысь 1 номеро шор ёзо школае мынӥмы. Сое нырысетӥ йылпумъямъёс пӧлын мон но вал.

Дышетсконме азьланьтӥ Глазовысь пединститутын, физикая но математикая факультетын, сое быдэстӥ 1966-тӥ арын. Ужаны кык интые ӵектӥзы: Глазов ёросысь Понино школае но Балезино ёросысь Люк школае.

- Люке сюрысалды ке, тӥ монэ но дышетысалды, вылды…

- Люкын ужаны мыным туж тупа вал, Чуялудысен отчыозь 10 иськем сяна ӧй вал. Но мон Пониноез бырйи. Огпол отчы тодмое доры вуылӥ но, со черкогурт мыным туж зол кельшиз. Ужаны шеди шор ёзо школа-интернатэ.

- Интернатысь нылпиосын ужаны секыт, дыр, вал?

- Отын аналтэм пиналъёс ӧз дышетскылэ. Со вал уйпал ёросъёсысь нылпиослы нимысьтыз шор ёзо школа. Тросаз гуртъёсын со аръёсы нылпиосты ньыль яке тямыс классозь гинэ дышетылӥзы. Тодон-валанзэс азинтыны мылкыд карисьёс понна Пониноын интернат усьтӥзы. Солэн директорез шуылӥз: кыӵе умой адямиосын пӧрмытыны луэ со пиналъёсты! Зэмзэ ик, соос пӧлысь ӟеч адямиос потӥзы. Та интернатын ик дышетскиз вуоно бортпроводница Надежда Курченко. АН-24 самолётысь пассажиръёсты террористъёслэсь утемез понна со кулэмез бере ини Горд Знамя орденэн пусъемын. Нылпиос интернатэ пӧртэм гуртъёсысь лыктэмын вал. Ми соос понна ӵемысь анай интыын луылӥм. Со юрттылӥз дышетскисьёсмес ӟечгес валаны.

- Отын кема-а ужады?

- Куинь ар. Огпол ӧтизы комсомоллэн Глазовысь райкомаз: дышетонъя отделэ кивалтӥсь, пе, кулэ. Но ӧтизы ноябре. Ма, кызьы куштод нылпиосты дышетскон ар кутскон азьын? Вылаз ик, мон дышетӥсько 8-тӥ но 10-тӥ классъёсысь нылпиосты, соосты улонэ поттоно ук. Эшшо математикая огез дышетӥсьмы школаысь кошкиз на. Райкоме мыныны пумит луи. Но гужем выльысь отчы ӧтизы, табере комсомоллэн кыкетӥ секретарезлэсь ужзэ ӵектӥзы. Шуизы: кандидатурадэ пленумын эскерозы на. Мыным сяна, та ужез эшшо куинь ныллы ӵектӥллям на вылэм. Пленумысь адямиосты ужан программаосынымы тодматӥмы. Бырйизы монэ.

- Иське, озьы кутскиз тӥляд будон сюресты. Но тодэм потэ: малы одно ик тӥледыз синйылтӥзы?

- Будонэ Пониноысен кутскиз, малпасько. Отын мон туж умой коллективе сюри. Соин кивалтӥз усто но кужмо директор, сӥё-дано дышетӥсь Лубнин Георгий Николаевич. Бӧрысьгес со калыкез дышетонъя министрлэн воштӥсез луыса но ужаз. Коллективамы туж трос егит дышетӥсьёс вал, ваньзы комсомолэ пыремын. Школаысь комсомол организациен кивалтыны малы ке монэ бырйизы. Со аръёсы райкомъёсы ужаны басьтылӥзы бадӟым комсомол огазеяськонъёсысь адямиосты. Тӥни сыӵе учконъя мон тупасько вал, дыр, райкомын но ужаны. Собере ачим но туж мыло-кыдо вал. Со ласянь но удалтӥз: Пониноын улон инты сётӥзы, ӝытъёсы мон доры люкаськылӥмы. Егит дышетӥсьёслэн улонзы сярысь директормы юн сюлмаськылӥз, бакча сиёнлы но, картофкалы но ӧм ёрмылэ.

Комсомол но партия кыдатӥзы

- Егит дыръя аслэсьтыд сюрестэ шедьтыны капчи ӧвӧл. Соин сэрен визьмо адямиос но куддыръя ышо-быро. Тӥледлы со ласянь удалтӥз: комсомоллэн ки улаз сюриды.

- Комсомоллэн кыкетӥ секретарез луыса, кык ар ужай. Со куспын бызи, нылы вордӥськиз. 1972-тӥ арын комсомоллэн Глазовысь райкомезлы нырысетӥ секретаре бырйизы. Та ужын кема гинэ тырши, сизьым ар пала. Соку республикаямы нылкышно секретарьёс кык-куинь сяна ӧз лыдъяськылэ. Ялан командировкаосы потано луылӥз, нылы пичи ке но. Но картэ оскымон вал, мыным туж зол юрттылӥз. Ужай компартилэн Глазов райкомаз. Собере монэ ыстӥзы партилэн обкомаз, улыны Иже выжоно луи. Отын кык ар ужаме бере бырйизы Ижевскысь горисполкомлэн тӧроезлы воштӥсе.

- Тӥ, Глазовысь лыктэм мурт, Ижысь бадӟым кивалтӥсьёс пӧлын кепыр ӧд потылэ-а?

- Зэмзэ но, обкомын ужакум ай, мон нокыӵе решениос кутыны ӧй быгатылы на, городэз но, татысь калыкез но ӟеч ӧй тодылы. Нош горисполкомын дӥсьтӥсьгес луи, городлэн ужпумъёсыз пӧлы мургес выйи, ужаны машина но висъязы ни. Собере нош ик выль уже ӝутӥзы: компартилэн обкомезлы секретаре юнматӥзы.

- Коммунистъёсын кивалтонды ӵапак тупаз КПСС вылэ лекъяськон, вань сьӧлыкъёсты со вылэ куштон вакытэ.

- Мон туж зол шӧдӥсько ни вал партиез быдтыны турттон мылкыдъёсты. Улонлэсь вань шуг-секытъёссэ 1980-тӥ аръёсы партийной ужасьёс вылэ погыльтыны ӧдъязы. Сыӵе янгыше уськытонъёсты мон али но шонерен уг лыдъяськы. Зэмос коммунистъёс ноку узырлык пӧлы выйыса ӧз улэ. Со аръёсысь политикаез мон алигес гинэ мургес валаны кутски, азьвыл совето республикаосын али ортчылӥсь буёло революциослэсь мынэмзэс адӟыса.

- Партиез быдтэмзы бере тӥ нош ик дышетон удысэ-а берытскиды?

- Мыным шуд усиз. Партиез куашкатэмзы азьынгес ужме воштоно луи. 1990-тӥ арын монэ Удмуртия ласянь юнматӥзы Россия Федерациысь Дышетонъя министерстволэн Национальной школалэн ужпумъёсызъя кенешаз консультантэ. Ӵапак соку министерствоын сыӵе выль ёз (кенеш) кылдӥз. Выль тулкыме сюри

- Галина Николаевна, со кенешын ужамды пайдаен-а берытскиз?

- Отын ужаса, туж трос пумиськылӥ мукет республикаосысь национальной ужпумъёсын вырись специалистъёсын. Аслым мон туж трос тодон-валан басьтӥ. Республикалэсь осконзэ но быдэстӥ кадь потэ. Ӵапак соку, 1990-тӥ аръёсы, Удмуртиын паськыт ӧръяськиз национальной движение. Туж кулэ луиз дышетонын но анай кыллы вӧл-вӧл сюрес сётыны. Озьы 1991-тӥ арын республикаямы кылдытӥмы дышетонын национальной ужпумъёсты азинтонъя концепция. Со концепциез мыным но улонэ пыӵатоно луиз. Россиысь Дышетонъя министерстволэн кенешаз одӥг ар ужаме бере выльысь Удмуртие берытски. Татын соку бадӟымесь воштӥськонъёс мынӥзы. Калыкез дышетонъя министр Антонина Михайловна Лисина Правительстволэн Тӧроезлэн воштӥсез луиз. Со интые дышетонъя министре Алла Васильевна Ерёменкоез юнматӥзы. Нош монэ министрлы нырысетӥ воштӥсь каризы. Озьы мон министерствоын 12 ар ужай. Татысен ик пенсие потӥ.

- Со дыр куспын ньыль министр воштӥськиз. Нош тӥ ас интыяды ик ялан возиськиды. Озьыен, тӥледыз вань министръёс кулэен лыдъяллязы?

- Со аръёсы, возьдаськытэк вераса, трос гинэ лэсьтыны вуттӥм. Нош югдур Ельцин кивалтон вакытэ туж секыт вал, уждун ӧз тырылэ, дышетӥсьёс пӧлын но бугыръяськонъёс кутскизы, арнялы быдэ митингъёс, забастовкаос луылӥзы. Тӥни соку но вань дышетскон учреждениосты утимы, ӧм ворсалэ, дышетӥсьёс пӧлын ужтэк кылемъёс ӧй вал. Ваньмыз со капчиен ӧз сётскы.

Лицейёс пумен усьтӥмы, собере - гимназиос. Гурт гимназиос кылдӥзы Пичи Пургаын, Якшур-Бӧдьяын, Красногорьеын. Удмурт нылпиос понна куинь педучилищеын (Ижын, Уваын но Можгаын) лицей классъёс усьтӥмы. Гуртысь потэм пиналъёслы 41-тӥ, 56-тӥ школаосын нимысьтыз классъёс кылдытӥм. Отчы соосты 9-тӥ классэ басьтылӥм, институтэ пырыны дасяллямы.

Министерство пушкын но кылдытӥм дышетонын национальной ужпумъёсты нуонъя отдел, соин кема кивалтӥз Валентина Михайловна Ившина. Со аръёсы ик пичи нылпиосты будэтонъя национальной кадръёсты дасямы.

Удмурт кадръёсмылы но вылӥегес ӝутскыны юрттылӥмы. Соос пӧлы мон пыртысал Зоя Витальевна Сувороваез, со али ужа дышетонъя но наукая министрлэн нырысетӥ воштӥсез луыса. Вань та ужъёсы, выльдӥськонъёсы мынам но кынары понэмын.

- Дышетӥсьёслы уждун тыронын югдур тупатскиз кадь али.

- Со озьы. Но уждунлэн быдӟалаезъя ке учконо, государство дышетӥсез вылӥ уг дунъя. Дышетӥсьлэн уждуныз часъёс борды думемын, одӥг ставкалы 18 час тупатэмын. Тросгес коньдон басьтон понна дышетӥсьлы уно часъёс нуоно луэ. Городын нуод, нош пичиесь гурт школаосын сыӵе амалэз кутыны уг улы. Министр луыны мылкыды ӧй вал

- Галина Николаевна, малы тӥ дышетонъя министр ӧд луэ? Таӵе вераськон вань: визьмо удмуртъёсты «замозь» гинэ будэто, вылӥгес ӝутскыны уг сёто. Шонер-а со?

- Дышетонъя министръёслэсь кандидатураоссэс эскерылыку, дырын-дырын мон сярысь но вераськонъёс ӝутскылӥзы. Огпол мынэсьтым кандидатураме Вылӥ Кенешлэн комиссияз но эскеризы. Но министре мыныны, ватытэк верасько, мынам чик но мылкыды ӧй вал. Асме туж умой шӧдӥсько вал, министрлэн воштӥсез луыса. Мон понна со уж туж валамон потылӥз, тодылӥ: кыӵе ужъёс мыным оскемын, мар понна мон кыл кутӥсько. Тазьы малпасько: котькуд адямилэн аслаз интыез луыны кулэ. Соку гинэ со ассэ кужмоен шӧдэ. Министр луон понна нырысь ик бергатыны быгатоно хозяйствоен герӟаськем ужпумъёсты. Со уж капчи ӧвӧл.

Али но мон замын. Пенсие потыса ужасько Дышетон удысын национальной ужпумъёсты тодон-эскеронъя институтын, директорлэн воштӥсез луыса. Соин али ӝабыр-ӝабыр кивалтэ Надежда Ивановна Ураськина.

- Дышетонъя министръёс пӧлысь кудӥныз лякытгес вал ужаны?

- Ог-огенызы ӵошатыны секыт, ваньзылэн ас сямъёссы вал. Ӵошатыны но кулэ меда? Озьы ке но мон, ваньмыныз ик огкыл шедьтыса, тупаса ужалляй. Тур-пар выреммы ӧй вал. Тани басьтомы национальной ужпумъёсты дышетонэ пыӵатонэз ик. Министр Алла Ерёменко палэнысь лыктэм адями ке но вал, национальной ужпумъёс борды сюлмыныз шӧдыса, кылзӥськыса басьтӥськылӥз. Удмурт кенешъёсы монэным ӵош мынылӥз но шуылӥз: «Галина Николаевна, мыным ваньзэ пыр-поч берыктэ. Тодэме потэ, мар вералоз калык».

- Кылем арын тӥ педагогика наукаосъя кандидат луиды. Кыӵе ужпумлы сӥземын диссертациды?

- Удмурт школалэн историезлы. «История и перспективы национального образования в Удмуртской Республике» - озьы нимаське уже. Асьме шаерын национальной движение тужгес но зол улӟемын вал кылем даурлэн 20-тӥ - 30-тӥ аръёсаз. Соку трос усьтӥськылӥзы удмурт школаос, асьме просветительёслэн данак книгаоссы потылӥзы.

- Арлыдо адямиослэсь куддыръя кылоно луэ, удмурт школаосты удмурт кивалтӥсьёс ик быдтӥзы шуыса.

- Мон озьы уг малпаськы. История озьы мынӥз: тросэз удмурт югдытӥсьёс - Верещагин, Михеев, Герд, Яковлев - 1930-тӥ аръёсы быдтэмын. Соослэн удмурт кылын гожтэм книгаоссы, учебникъёссы начальной классъёслы гинэ сӥземын вал. Нош собере школаос 7 классъем дышетонэ выжизы. Соку ик шӧдӥськиз учебникъёслэн ӧвӧлзы. Вань предметъёсъя удмурт кылын учебникъёс гожтон борды нокин ӧз ни басьтӥськы. Тӥни озьы школаос басьтӥськизы удмурт кылэз но литератураез дышетон борды гинэ. Быдэсак удмурт школаос усьтыны луонлык ӧй вал ни. Со понна одӥг кивалтӥсез янгыше уськытон - со шонер ӧвӧл. Сыӵе вал, шуом, удмурт политикалэн бервылъёсыз.

- Удмуртлык понна тӥ туж зол сюлмаськиськоды. Но кулэ-а удмурт кылэз кужмысь дышетыны?

- Удмурт кыл гуртъёсын уз быры. Нош городын сое дышетон борды басьтӥськоно ке, ваньмыз йӧскадь, вылӥ уровенен мед луоз. Ньӧмыз понна гинэ дышетон кулэ ӧвӧл. Городысь удмурт классэ сюрем нылпиос тодон-валанзэс возьматыны уг ке быгато, соосты бӧрысь исало гинэ, сыӵеослэн азьланезлы сюрессы ворсаське. Сыӵе ляб удмурт школаос но классъёс городын кулэ ӧвӧл.

- Лена нылды удмурт кылэз тодэ-а?

- Вала, но вераськыны керпотэ. Глазовысен Иже улыны выжеммы бере, со вал 1983-тӥ арын, татын одӥг удмурт класс но усьтэмын ӧй вал на. 90-тӥ аръёсы гинэ Ижын 30 пала школаын национальной классъёс усьтӥськизы. Но туж умой валасько: удмурт кылэз тодон нокинлы но мултэс ӧвӧл. Нылылэн пичиез пиез али удмурт кылэз дышетыны кутскиз.

- Тӥ, городын улыса но, картты ӟуч луыса но, бадӟым кивалтӥсьёс пӧлын ужаса но, удмурт кылдылэсь ӧд куштӥське. Мон ӟуч шуыса ӧд чеберъяське. Национальной ужпумъёсын ӧй вырысалды ке, вераськысалды-а удмурт сямен?

- Анай кыл йӧлын пыӵамын ке, сое пӧртэм калык пӧлын улыса но тодад ваёд. Мыным удмурт кыл ноку ӧз люкетылы. Ас кылыным улыны мыным туж шуныт. Удмурт писательёслэсь, поэтъёслэсь гожъямъёссэс туж яратӥсько лыдӟыны. Котькин мон мед луысал - удмурт ик кыльысал. Удмурт шуыса монэ нокин ӧз ултӥялля. Удмуртъёс ик бен куддыръя серекъяллязы, диалект кылъёсын вераськемме кылыса.

Семьялэн кык кузёез, ужедлэн - ачид гинэ

- Семья но уж - кызьы радъяськизы соос тӥляд улонады?

- Семьяез кык адями кылдытэ, кык адями ик со понна кыл кутэ. Семьяын тон гинэ огнад кузёяськыны уд быгатӥськы. Уж - со тынад гинэ, кызьы тон ужалод, тон бордысь гинэ потэ.

- Улон сюрестэс син азяды пуктыса, ас поннады кыӵе йылпумъянъёс лэсьтысалды?

- Нырысь ик, яратоно анайме ӧй аналты, утялтытэк ӧй кельты, дорам вози. Анае сярысь сюлмаськон мон понна туж бадӟым инты басьтылӥз. Азьланьтӥ солэсь ужзэ. Ужан книжкаяз солэн пырак одӥг интыын тыршемез гинэ гожтэмын. Со сӥё-дано дышетӥсь вал. Будэтӥ нылме. Ужай отын, кытчы ыстылӥз монэ партия. Озьы ке но нылы котьку но шӧдылӥз яратэмме, сюлэм шунытме. Кытын гинэ ӧй ужа, котькытын вань мылкыдме, сюлэмме сётыса тыршылӥ. Наукаын но кыӵе ке пытьы кельтӥ. Ужъёсы пӧртэм сборникъёсын печатламын.

- Мае уд чидаське?

- Ог-огдэ вузанэз. Пыриськись, солань-талань шонаськись, супыльтӥсь адямиосыз уг яратӥськы.

- Кыӵе адямиосты гажаськоды?

- Ватскытэк, усьтэм сюлмын улӥсьёсты. Ас ужазы пӧзьыны быгатӥсьёсты. Куддыръя асьмеос туж трос ӝожтӥськиськомы, соиз яке таиз кивалтӥсь удмуртъёслы уг юртты шуыса. Но мынам малпамея, удмуртъёс асьсэос но вылӥе ӝутэм адямизылы юрттыны кулэ, со шунды ӧвӧл ук, ваньзэ огкадь шунтыны уг быгаты. Одӥг кивалтӥсь но, мынам учкемея, удмуртъёслы юри урод лэсьтыны уг туртты. Со тырше, ваньмыз сярысь сюлмаськыса. Но пӧрмытэ-а, уг-а - со ини мукет ужпум.

Источник:

Васильева Г. Н. Удмурт кылы монэ шунтэ / Г. Н. Васильева ; записала Т. Банникова // Удмурт дунне. - 2007. - 15 июня. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"