Степанова Надежда Леонидовна
Котькуд нуналысь ӟечсэ утчано
Надежда Леонидовна Степанова - дышетӥсь, кибашлы, удмурт культураез ӝутон понна нюръяськись… Пусъемын «Старший учитель» нимын, Россиысь дышетон удысысь дано ужась луэ. Пӧртэм грамотаосыз кие уг тэро. «Дышетон» нацпроект чотын радъям конкурсын вормисе потӥз но 100 сюрс манет басьтӥз…
- Дышетӥсь мукет адямиослэсь воксё мукет вакытэ улэ кадь потэ. Со понна выль ар кутске 1-тӥ сентябрьысен. Ортчем дышетскон арлы йылпумъянъёс лэсьтоно, матэктӥсезлы планъёс дасяно. Туэ но арня талэсь азьло кутски ни выль программа гожтон борды.
Но шумпоттӥсез но ӧжыт ӧвӧл! Нылпиос дорад мӧзмем тусын лыкто ке, сюлэм ик бугыртӥське. Гужем вылтӥ мабыдӟаесь соос будо! 1-тӥ классэ вамыштыкузы, валаны уг луы ай оло пуко соос, оло сыло - партаос ӝужытэсь. Нош куинетӥ-ньылетӥ классъёсын тодмантэм воштӥсько. Йӧноесь, чебересь, сабырлыесь…
- Тодӥсько: нылпиос городлэн пӧртэм сэрегъёсысьтыз ветло классады.
- Зэмен но, вань Металлургысь но, Машиностроительысь но, Буммаш палась но дорам дышетскисьёс. Туж ӧжытэз школамы котырын ик улэ. Малпасько вал: соиз я таиз пинал огшоры сюриз классам, бӧрысь анай-атайёс верало ни, тодмоосмы ӵектӥзы, пе, дорады мыныны. Милям школамылэн интыез туж ӟеч - городлэн шораз. Цирке пыдын мынӥськом, музейёсы - пыдын, театръёсы - пыдын… Интыямы ум пукиське, ялан поръяськом. Удмурт кун университетэ толэзьлы быдэ кожылӥськом. Нылпиос, школаез йылпумъякузы, медаз кышкалэ отчы мыныны, пичиысен мед тодматскозы вылӥ тодон-валан сётӥсь учреждениосын. Университетын вань суредаськон искусствоосъя музей. Отысь одӥг адӟытонэз но ум кельтӥське, пӧртэм ужрадъёсы пыриськиськом - озьы трос тунсыкозэ тодӥськом. Кылсярысь, мадё милемлы, кызьы кылдо суредъёс, кызьы дӥсяськылӥзы-улӥзы вашкала удмуртъёс но трос мукетсэ. Со сямен ик нылпиос дышо кылзӥськыны, юанъёс сётъяны. Котьку шуисько: тау карыны быгатоно, муртлэсь гинэ возьмано ӧвӧл, аслыд но сётыны дышетсконо. Озьы асьмелэсь суредъёсмес кузьмаськом, куддыръя эктыса но кельтӥськом. Киужъёс трос лэсьтӥськом. Соос классамы уг тэро ни - коридоре но поттӥськом. Зэм, куддыр тышкаськемзы но потэ - борддоръёсты, пе, наштаськом.
- Пиналъёсты киужлы дышетон понна дышетӥсь ачиз троссэ быгатыны кулэ.
- Гуртын будэмын ук мон! Мамае айшетъёс, юбкаос, миндэр пуйыос но мукетсэ вуре вал. Сюанъёслы но мукет юон дыръёслы озьы кузьымъёс дасялляз. Со сяна, гуртоос пӧлын но вурыны курисьёс ӧжыт ӧй вал - я асьсэос уг пӧрмыто, я вуриськон машиназы ик ӧвӧл. Мамае ужаз нянь пыжисьын. Уже дыртыны ӧдъя ке, мынэсьтым уг но юа, быгато-а, уг-а, удыссэ йылпумъя шуэ но - тӥни. Нош мон вурисько. Пӧрмытӥсько! Бӧрысьгес эшъёсылы но вуриськыны кутски. Ой, кыӵе керттӥськеме потэ вал! Нош журналъёс ӧвӧл, шорт уг сюры. Папае механизатор вал. Одӥг пол кытысь ке ваем ваталэсь векчи гозы выллем маке. Э-э, солэсь шарф керттӥсько кожасько ук. Мамае лӧпкытъя на, кертты-кертты, нылы, мон нулло, шуэ. Туж шумпотӥсько, мамамы улэп на. Али но улэ Сьӧлта ёросысь Аяшур гуртамы.
- Гуртты сокем ик бадӟым ӧвӧл кадь?
- Али ог дасо корка сяна кылемын ӧвӧл ни - сюреслэсь палэнэ интыяськеменыз, гуртоос кошкыны кутскизы. Нош ми пичи вакытэ кык бадӟым урамъёс вал. Огпалзэ Аяшур шуылӥзы - удмуртъёс улӥзы, мукет ульчаез малы ке Акмар нималлязы. Таяз ӟучъёсгес вал. Но куспамы эшъяськыса улӥмы. Нылпиос ӵош люкаськиськом но, э-э, жиетыса шудӥськом. Али но син шорам, кызьы толалтэзэ, бадӟым дӧдьые ог дасо кузя пуксьыса, гурезь уллань нискылаллямы. Штани, дэрем сӧзулъёсмы йӧэн кортнаськылэмын. Семьяямы ми вить пиналъёс вал, одӥгез братмы бырыны шедиз. Мон - кыкетӥез. Котькыӵе вакытъёсмы луо, дыр, вал, но анай-атаелэн ноку кесяськемзы ӧй вал. Одӥг пол гинэ мар меда сыӵе йыртэмай - папаелэсь вожзэ поттӥ. Дышетыны малпаз. Корказьысь ӵужонэз басьтӥз, отысь одӥг вайзэ кыскиз но монэ небыт интыям шуккиз. Собере пумен каллен но каллен шлачкетыны ӧдъяз - ачиз уг вала ни мар карыны.
Милемыз будэтыны юрттӥськиз бабамы. Со ик мыным ним но понэм. Надюша! Надежда Крупская кадь дышетӥсь луоз, пе. Ачиз но со дышетӥсь вал, но кӧня ке курсъёсты гинэ ортчемын. Ми палъёсы вуэмын безграмотностен нюръяськон понна. Нуназезэ школаын пиналъёсты лыдӟиськыны-гожъяськыны дышетэ вылэм, ӝытъёссэ - мӧйыосты.
- Иське, дышетӥсе мынӥды Надежда Крупская кадь луон понна?
- Бабаелэн мылкыдыз, зэмен но, пушкам кыӵе ке но тылгизьы ӝуатӥз, малпасько. Но со сяна улонам синмаськымон дышетӥсьёс трос пумиськылӥзы. Куинь классэз мон йылпумъяй асьме гуртысь ик школаын. Куинетӥ классын дышетскыкум, вуиз пинал гинэ нылаш, Тамара Михайловна. Ой, кыӵе со урокъёссэ нуылӥз! Шудылӥз баянэн. Мынам папае Германиын служить карем, отысь баян ваем. Соин ик Тамара Михайловна дорамы одӥг-ог пыра вал. Мон возьдаськыса, гур вылын часъёсын пукылӥ, ява. Но, шораз учкыса, малпалляй: одно луо дышетӥсь! Дышетскытозям куинь школа вошъяно луи. 3 классэз йылпумъяме бере гуртысьтымызэ пытсазы - 6-тӥ классозь ветлӥм Вужгуртэ, ог 3 иськем палэнэ. Но сюрес нюлэс но шай пыртӥ кыстӥське вал. Сокем кышкалляй! Оло, соин но куасэн ворттылыны дыши. Гурезьёстӥ нискылтыкум, ноку уг усиськы вал. 7-тӥ-8-тӥ классэ мынӥ Сюромошур школае. Та гуртэ быземын ни вал яратоно дышетӥсе Тамара Михайловна, отын со математикая урокъёсты нуиз. Али но ужа на.
Дышетски шудыса сямен. Пионер, комсомол аръёс али но тодам. Школаысьтымы тужгес адӟем карымон пиналъёсын ӵош ысъяллязы Сьӧлтала пӧртэм слётъёсы. Ой, кыӵе соку йыр выллань ӝутскылӥз. 8-тӥ класс бере Дэбес педучилищее мыныны малпай. Бен, дышетӥсьёсы 9-тӥ классэ кыльыны туж косо вал: ӟеч, пе, дышетскиськод.
- Но тӥ вамыштӥды педучилищее…
- Воксё огнам мынӥ, мамае но малы ӧз келя - сокем оскем-а, мар-а мыным. Но училищеез капчиен шедьтӥ. 8 классэз «витьёсын» гинэ йылпумъяй бере, экзаменъёс сётоно уз луы, шуизы.
- Пичи дыръяды туж керпотӥсь вал, шуиськоды. Кызьы сокем дӥсьтӥсь луиды?
- Мыным туж удалтӥз. Киужъёс борды кужмысь ӧй басьтӥськы, кырӟаны косэмысьтызы ӧй кутскы, куасъёс вылэ пиньёсме куртчыса ӧй султы - сюризы адямиос, оскытӥзы, мынам со пӧрме шуыса. Школаын ик тупен умой лэзьяськисько вал. Одӥг пол ӵошатсконъёс дыръя таӵе но учыр луиз. Тупез лэзи - дышетӥсе дорам лыктэ но выльысь шоналскыны косэ. Малы - паймисько. Туп, пе, судьяос сьӧры лобӟиз, кытчы усемзэ адӟыса ӧз вуттэ. Школамес йылпумъяммы бере 20 ар тырмонэ ветлӥ, соку шуизы: мынэсьтым рекордме, пе, татчыозь нокин ӧз ортчы. Педучилищеын баскетбол шудыны дыши, баян киям кутӥ. Папае шуоз вал: ох, Надюш, вань пиосъёслэсь нырулзэс ӵушод!
Троссэ лэсьтыны быгатӥсько. Но уяны уг пӧрмытӥськы. Нылпиосы вордскизы, шуи: соос мынам уялозы. Фортепьяноен шудыны уг валаськы. Нылпиосы мынам быгатозы! Бадӟымез нылмы, Верамы, крезьгуръя школа пыр потэмын. Покчи классъёсын дышетскыкуз ай, бӧрдылэмез но вань: мама, урокъёсме лэсьтыса уг вуиськы, жадисько. Мон но жадисько, шуисько. Арня пумын воксё какалмисько ни. Но субботае, арняе ял карисько но нош ик азьлань мынӥсько. Крезьгуръя школадэ йылпумъялод, вералляй Верилы, собере ачид тодод, азьланьтод на-а та удысъя тодон-валан люкандэ. Анай-атайёслы котьку шуисько: сюрс мурт пӧлысь одӥгез ке шат азинсконъёс чик тыршытэк басьтыны быгатэ. Ваньмыз сётӥське ужен. Милям семьяямы телевизор дурын огшоры пукон дыръёс уг луо - шутэтскон вискын но маке киужен ке но выроно. Нылмы крезьгуръя школаез туж усто йылпумъяз! 11-тӥ классэз но азвесь медален быдтӥз.
Гришамы, Вераен ӵошатыса, трослы востэмгес. Ассэ возьматыны уг яраты. Но мар ке борды кутске ке, одно ик быдэстэ. Пичи дыръяз ветлӥз авиамодельной кружоке - республикаямы радъяськись ӵошатсконъёсын вормисьёс радэ сюрылӥз. Шашкиен шудонъя бадӟымъёс пӧлын 1-тӥ разряд басьтӥз. Кузпалы мынам - туж ӟеч атай но кужмо дышетӥсь. Пимес бурдъяны быгатӥз. Сюйлэсь пӧртэм мунёос, пӧйшуръёс лэсьтытъяз. Вуылӥзы-а, ӧз-а соос пӧсь гуре - шуг вераны, но атаез со понна кӧня ке но коньдон сётэ вал. Озьы пимы валаны ӧдъяз: маке но тыршемлэн емышез одно луэ. Куд-ог анай-атайёс пиналъёссылы «вить» басьтэмзы понна дас манет, тусьты-пуньы миськемзы понна эшшо вить манет ватсало. Таиз воксё шонертэм. Юрттэм понна коньдон сётыны уг яра. Со умойтэм! Нош Гришамы ас киосыныз маке но арбериос лэсьтылӥз - таиз чылкак мукет учыр. Атаезлэн сётэм коньдонэныз со нырысь ческыт сиёнъёс басья вал. Собере валаз: люкано. Люказ но монэ магазинэ ӧтиз: сӥньысъёс, пе, басьтоно. Со крестикен туж мыло-кыдо пужъятскылӥз. Одӥг пол, юрттэм карыса, мон но салфетка лэсьтоназ чуртнаськи. Пие бервылме адӟиз но, э-э, ӝожомиз ук, мама, тон ваньзэ умойтэм лэсьтӥд, пе. Ваньзэ чебер лэсьтыны выри, шуисько. Но тынад крестикъёсыд бур пала учко, кулэ вал паллянэ. Ваньзэ сэрттӥз.
- Пиналъёсты али будӥзы ни, кыксы ик ас сюрессэс шедьтӥзы. Но тӥ ик ӧд быръе-а кудпала нырысь вамыш соослы лэсьтыны? - Пичи дыръязы малпаллямы: котькыӵе удысын асьсэды эскерыны мед быгатозы. Куддыръя пиньёсме йӧнатыны уг мынӥськы вал соосты дышетыны коньдон висъян понна. Дышетӥм зэмлыкез яратыны, со куддыр вӧсь каре ке но. Дорамы коньдонмы эркын котьку кылле - отысь дас манетсэ но нокин лушкем уз басьты. Куинь канфетмы вань ке - люкиськом ньыльлы. Банан одӥг кылемын ке - нош ик ньыльлы.
Верамы но, Гришамы но УдГУ-ысь худграфез ас мылкыд каремзыя бырйизы. Верамы ас азяз туж бадӟымесь куронъёс пуктыны быгатэ. Мае тодэ-вала - отысь аслыз кулэзэ быгатыса быръе. Дипломез горд сюй шудонъёс лэсьтонлы сӥземын вал. Ужзэ утьыкуз, солы шуизы: печатланы кисьмам дась материал, книгаен поттоно. Ас кужыменымы ог дасо пособие поттыны быгатӥм. Валам: солэсь троссэ ум ворме. Угось соку ик шуим: со чебер бумага вылын мед луоз, нылпиослэн киязы кутэмзы мед потоз. Верамы Интернетэн эшъяське бере, со пыр ик Финляндиозь йыгаськиз, грант басьтӥз. Но дипломзэ книгаозь вуттон понна со борды ватсаса нимысьтыз дышетскон пособие дасяно на вал. Озьы быдэс семьямы кыстӥськиз та уже. Мон ватсаса литература утчай на, Гришамы туспуктылӥз… Али Верамы дышетске Англиын. Фордлэн фондэныз радъям одӥгаз ӵошатсконэ пыриськиз, вормисе потӥз, озьы кунгож сьӧры вуиз, быземын ӧвӧл на.
Гришамы, худграфез йылпумъяса, нимысьтыз тунсыкъяське туспуктылонэн, «Сайлент Ву Гур» группаын барабанщик. Кузпалъяськиз ни. Кенмы дизайнер. Озьы кыкназы ялан маке но юдыло, вурисько.
- Надежда Леонидовна, кузпалды сярысь нимысьтыз вератэк кельтыны уг луы!
- Мынам со республикаямы тодмо адями - кибашлы Анатолий Петрович Степанов. Тодматским ай Дэбес педучилищеын. Мон школьной люкетаз дышетски, со худграфын. Куспытӥмы кыӵе ке но тылгизьы ортчиз. Кузпалы туж визьмо, азьлане учкись адями. Армиысь вуиз, шуиз: туэ кышноясько, вуоно арын худграфе пыро. Дышетскон куспаз куинь уже вуттӥське вал. Лекциоссэ но чик ӧз келля. Со вакытэ ик мон ачим Глазовысь пединститутын заочно амалэн дышетски на. Кык пинал вордыса вуттӥм.
Университет бере картэ ог 20 ар пала ужаз школаын. Табере ас понназ бергано кариськиз. Россиез уно котыръя, кунгож сьӧры но вуылэ. Монэ но сьӧраз кыске ини. Али август пумын гинэ Эстоние ветлӥм. Отын студентъёс скульптураос лэсьтыны дышетскизы. Мастер кулэ вал - ӧтизы кузпалме. Ужрадэз радъясьёслы со верам, монэ но отчы нуэмез потэ шуыса. Соосыз ӝожомиллям: инты ӧвӧл. Кузпалы быгатэм оскытыны: уд жалялэ, кутӥды шуыса! Озьы ми улӥмы нюлэскын, 14 муртлы нуналлы быдэ тыл вылын сиён пӧзьтылӥ. Собере малпай: киуж ӧй люкетысал. Асьмелэн турын пӧсь куазен ӝуаса быремын, отын со вож-вож, туж ческыт зыно. Озьы сое ишкай, ковёр лэсьтӥ. Эсьма, сое но басьтӥзы, адӟытонэ поттом шуизы. 2006-тӥ арын Уваын семьямылэн киужъёсыныз нырысетӥ адӟытонэз ортчиз. Толя соку мыным шуиз: Надя, борддоръёсты маин ке но чебертоно на вал, оло, маке со лэсьтод. Кылемын на вал толэзь. Со куспын мон панноос, ныпъетъёс, басма юдэсъёслэсь шобретъёс лэсьтӥ. Пӧрмытӥ. Табере киужъёсмес пӧртэм ёросъёсын возьматъяськом ни.
- Анатолий Петрович тӥледыз, школаысь кошкыса, киужъёсын гинэ вырыны уг косы-а?
- Луыло сыӵе вакытъёсыз. Но мон класс басьтӥсько, соосты, ӝыныё куштыса, кельтэме уг поты ни. Собере, одӥг школаын ог 30 ар ӵоже ужатозям, нылпиос борды туж юн бурми ни кадь. Тодӥсько на нырысь ужаны лыктэмме - сокем жадьылӥ. Али но тау карисько анай-атайёслы, 19 аресъем макелы пиналъёссэс оскемзы понна. Но аслым соку туж визьмо, котьмае быгатӥсь потӥсько ни вал. Тетрадьёсты эскерыса, уйшор берозь пукылӥ - суйёсы-чыртые выремысь дугдылӥзы. Та дыр куспын трос курсъёстӥ-семинаръёстӥ ветлӥ. Али ӝутӥськы гинэ - луонлыкъёс трос, интыяд эн пукы! Дышетон пособиослэн вань улэп авторъёсынызы пумиськылыны, соосты кылзыны тыршисько. «Дом учителя» огазеяськон пыр соосын пумиськылыны дыши. Со понна куддыр аспӧртэмлыко бартер но лэсьтӥськом. Лекциосты мон, дун тырытэк, кылзӥсько, интыяз усьтэм урок возьматӥсько. Сыӵе семинаръёсы-курсъёсы пыриськыса, валасько: нылпиослы выль темаосты шонер валэктӥсько! Мон шонер сюрес вылын! Ой, кӧня выль малпанъёс йырын берганы ӧдъяло, уж борды нош ик гижысь-пиньысь басьтӥськиськод.
Валасько: удмурт кылмес-культурамес ӝутон борды улӥысен - семьяысен, нылпиос бордысен - басьтӥськоно. Таиныз классэным удмурт кылэз дышетӥськом - кытӥ кырӟаськом, кытӥ шудӥськом. Отчыозь мон шаерез тодонъя урокъёс нуисько вал. Коридор кузя дырын-дырын кутэн но поръясько, вань классъёс понна ортчытъяськом удмурт пӧрамъёсын ярмаркаос но мукет ужрадъёс.
- Надежда Леонидовна, кылэме вань, классады тӥ е возиськоды шуыса?
- Вал сыӵе вакытъёс. Одӥгез классэ туж йӧнтэм вал. Пӧртэм нылпи садъёсысь соос вуизы, котькудӥзлэн ик азьветлӥсь луэмез потэ. Огназэс кельтэме уг луы вал: соку ик жугиськыны кутско. Поттӥ е, думи батарея борды. Шуисько: котькуд автобусын, машинаын таӵе е вань, адями шуккиськыны-вӧсь луыны медаз шедьы шуыса. Валаськоды ке, асьтэды кияды кутыны уд быгатӥське, лыктӥськоды но думиськиськоды та борды. Котьма дауртоно луэ. Нылпиос - со нылпиос. Но мон соослэсь ачим тросэзлы дышетскисько. Туала пиналъёс чылкак мукет сямен малпасько - жаляса верано, куд-ог дышетӥсьёс тае уг валало. Арлы чаклам дышетон программаез кӧня ке час куспын сётыны быгато. Но кулэ-а со? Пиналъёсты нырысь ик дышетоно ог-огенызы огкыл шедьтыны, асьсэды валаны. Ваньзэ лэсьтыны луэ шудон пыр. Классысьтым пиналъёс асьсэды мушъёс шуо. Котькытчы вутскиськом уга. Пӧртэм проектъёс-презентациос но гожъяськом, соосты утьыны дышетскиськом. Одӥг пиналэ но тэк уг пукы. Пӧртэм ужрадъёсы пыриськыса, нылпиос быгатонъёссэс юнматыны, калык азьын асьсэды возьыны дышетско. Нылъёсылы но пиосылы шуисько: котькуд нуналысь, ӝожомонъёсты вунэтыса, маке но ӟечсэ утчано. Кылсярысь, туннэ туж чебер буква гожтыны пӧрмытӥды яке выль эшты кылдӥз. Оло нош анай-атаеныды сюлмысь вераськиды, яке коӵышпиосты вордскизы. Сыӵе пичи чыры-пырыослэсь кылдэ ук котырысь вань умоез. Соку гинэ вераны быгатомы: мон туж шудо!
Источник:
За предоставление материала выражаем огромную благодарность редакции газеты "Удмурт дунне"
